Әԝе Дьле Баве Хԝә у Йаһоԝа Ша Кьр

Тӧ кәчʹьке сәр шькьл дьвини?— Әԝ ԛиза мерәки йә, наве кʹижани Йәфтаһ ә. Кʹьтеба Пироз набежә дәрһәԛа наве ве кәчʹьке, ле әм заньн кӧ әԝе дьле баве хԝә у Йаһоԝа ша кьр. Ԝәре әм дәрһәԛа ԝе у баве ԝе Йәфтаһ пебьһʹәсьн.

Йәфтаһ мерәки баш бу у тʹьме дәрһәԛа Йаһоԝа ԛиза хԝәрʹа гьли дькьр. Йәфтаһ ӧса жи мерәки ԛәԝи у рʹебәрәки баш бу. Ләма жи Исраели хԝәстьн, ԝәки әԝ рʹебәрийе ԝан бькә, сәва кӧ тʹәви дьжмьна шәрʹ бькьн.

Йәфтаһ Йаһоԝарʹа дӧа кьр сәва кӧ әԝ али ԝи бькә, шәрʹда сәркʹәвә. Йәфтаһ соз дабу Йаһоԝа, кӧ һәрге әԝ ви шәрʹида сәркʹәвә, һьнге чахе әԝ ԝе вәгәрʹийа мал, ԝе ԝи мәрьви пʹешкʹеши Хԝәде бькьра, йе кӧ пешийа һʹәмуйа жь мала ԝи дәркʹәта у рʹасти ԝи бьһата. Әԝ мәрьве кӧ пʹешкʹеши Йаһоԝа дькьрьн, гәрәке тʹәмамийа әʹмьре хԝә коне Хԝәдеда бьжита у бьхәбьтийа. Кон әԝ щи бу, кʹидәре мәрьв Хԝәде дьһʹәбандьн. Ахьрийе, Йәфтаһ шәрʹда сәркʹәт! Ле тӧ зани чахе Йәфтаһ жь шәрʹ вәгәрʹийа мал, кʹи пешийа һʹәмуйа рʹасти ԝи һат?—

Бәле, әв ԛиза Йәфтаһ бу! Әԝ зарʹа ԝийә тайе-тʹәне бу. У бьдә һʹәсабе хԝә кӧ Йәфтаһрʹа чьԛас чәтьн бу жь ԛиза хԝә бьԛәтә. Жь бо ве йәке әԝ гәләк дьлтәнг бу. Ле те бира тә, ԝәки әԝи ида соз дабу. Һьнге ԛиза ԝи готе: «Баво, һәрге тә соз дайә Йаһоԝа, бьра ӧса бә».

Ԛиза Йәфтаһ жи гәләк дьлтәнг бу. Конда, әԝе гәрәке мер нәкьра у зарʹ нәанийа. Ле әԝе гәләк дьхԝәст созе баве хԝә бинә сери, у дьле Йаһоԝа ша кә. Әв йәк сәва ԝе һе фәрз бу, нә кӧ ԝәки мер кә у зарʹа бинә. Ләма жи әԝе мала баве хԝә һишт, у тʹәмамийа әʹмьре хԝә конда дьжит.

Тӧ ча дьфькьри, ԛиза Йәфтаһ бь ве йәке, дьле баве хԝә у Йаһоԝа ша кьр?— Бәле, ша кьр! Һәрге тӧ гӧһдар и у Йаһоԝа һʹәз дьки, тӧ дькари мина ԛиза Йәфтаһ би. Тӧйе жи бькарьби дьле де-баве хԝә у Йаһоԝа гәләк ша ки.