Ԝана Дәрһәԛа Иса Ньвиси

Тӧ ван мәрьва сәр шькьл дьвини?— Әв һәнә Мәтта, Маркос, Луԛа, Йуһʹәнна, Пәтрус, Аԛуб, Щьһуда у Паԝлос. Әԝ һʹәму мәри һена Исада дьжитьн. Хенщи ԝе йәке, ԝана дәрһәԛа Иса ньвиси. Ԝәре әм һе зедә дәрһәԛа ԝан мәрьва пебьһʹәсьн.

Жь ԝана сьсе шанди бун, йед кӧ тʹәви Иса хьзмәт дькьрьн. Ле тӧ зани әв һәрсек кʹи бун?— Мәтта, Йуһʹәнна у Пәтрус. Мәтта у Йуһʹәннайе шанди, рʹьнд Иса нас дькьрьн. У ԝана һәр дӧ жи, дәрһәԛа әʹмьре Иса кʹьтеб ньвисин. Йуһʹәннайе шанди ӧса жи кʹьтеба бь наве Әʹйанти ньвисийә, у диса се нәʹмә бь наве Йуһʹәннайе Пешьн, Йуһʹәннайе Дӧда у Йуһʹәннайе Сьсийа. Ле Пәтрусе шанди дӧ нәʹмә ньвисинә, нәʹмә бь наве Пәтрусә Пешьн у Пәтрусә дӧда. Нәʹма хԝәйә дӧдада, Пәтрусе шанди ньвиси дәрһәԛа ԝи ԝәʹдәйи, чахе Йаһоԝа жь әʹзмен хәбәр да у дәрһәԛа Иса гьлийе ӧса гот: «Әв ә кӧрʹе мьн. Әз ԝи һʹәз дькьм у ԝирʹа ша дьбьм». Әв һʹәму нәʹмә, йед кӧ шандийа ньвисинә, Кʹьтеба Пирозда ньн.

Ле мәрьвед дьн, йед кӧ тӧ сәр шькьл дьвини, ԝана жи дәрһәԛа Иса кʹьтебед хԝәда ньвисинә. Йәк жь ԝан мәрийа Маркос ә. Дьԛәԝьмә чахе Иса гьртьн, Маркос ԝе дәре бу, у дьдит һʹәму тьшт чь кӧ дьԛәԝьми. Ле йе майин Луԛа йә. Луԛа дохтор бу у дьбәкә паши мьрьна Иса бу Мәсиһи.

Дӧ ньвискʹаред Кʹьтеба Пирозә дьн жи, кʹижана кӧ тӧ сәр шькьл дьвини, әԝана бьред Исайи щаһьл бун. Тӧ навед ԝан зани?— Навед ԝан Аԛуб у Щьһуда йә. Пешийе ԝана Иса баԝәр нәдькьр. У һәла һе жи дьфькьрин, кӧ әԝи һʹьше хԝә ӧнда кьрийә. Ле һьнә ԝәʹдә шунда, ԝана Иса баԝәр кьр у бунә Мәсиһи.

Ле ньвискʹаре Кʹьтеба Пирозә пашьн, йе кӧ тӧ сәр шькьл дьвини, Паԝлос ә. Пешийа кӧ Паԝлос бьбуйа Мәсиһи, наве ԝи Шаԝул бу. Әԝи Мәсиһи нәфрʹәт дькьрьн у һьндава ԝанда зӧлмкʹар бу. Ле тӧ зани чьма Паԝлос хԝәст бьбуйа Мәсиһи?— Щарәке, чахе Паԝлос рʹе кʹәтьбу, ньшкева әԝи бьһист кӧ кәсәк тʹәви ԝи жь әʹзмен хәбәр дьдә. Әв Иса бу! Иса жь Паԝлос пьрс кьр: «Тӧ чьма дьзерини ԝан мәрийа, йед кӧ мьн баԝәр дькьн?» Паши ԝе йәке Паԝлос һатә гӧһастьне у бу Мәсиһи. Паԝлос 14 кʹьтеб ньвисин, жь Рʹомайи һʹәта Ибрани. Әв кʹьтеб кʹәтьнә нав Кʹьтеба Пироз.

Әм һәр рʹож Кʹьтеба Пироз дьхуньн. Ӧса нинә?— Чахе әм Кʹьтеба Пироз дьхуньн, әм гәләк тьшт дәрһәԛа Иса педьһʹәсьн. Тӧ дьхԝази дәрһәԛа Иса һе зедә пебьһʹәси?—