Сьбат

Йаһоԝа ԛәнщийа һʹәму хьзмәткʹаред хԝә дьхԝазә. Әԝ незики һәр йәки жь мә йә, у гава әм дьлтәнг дьбьн, әԝ ве йәке дьвинә (Зәбур 145:18, 19). Дина хԝә бьде кӧ Йаһоԝа ча бона Елйас пʹехәмбәр хәм дькьр у али ԝи дькьр. Елйас хьзмәткʹаре Хԝәде йе амьн бу, у әԝ дәмәкә гәләк хьрабда дьжит. Ԝи чахи дьжмьнед Хԝәде пәй хьзмәткʹаред ԝи дькʹәтьн, у әԝана илаһи пәй Елйас кʹәтьбун кӧ ԝи бькӧжьн (1 Пʹадшати 19:1, 2). Сәрда жи, Елйас дьфькьри кӧ әԝ тʹәне йә у ида ԛәт хьзмәткʹаред Йаһоԝа нәманә (1 Пʹадшати 19:10). Ле Хԝәде дәрберʹа һатә һәԝара Елйас у мәләкәк шанд бал ԝи. Мәләк Елйасрʹа гот ԝәки әԝ тʹәне нинә у кӧ диса гәләк хьзмәткʹаред Йаһоԝа һәнә (1 Пʹадшати 19:5, 18). Иса Мәсиһ шагьртед хԝәрʹа гот кӧ әԝе бьбьн пʹара малбәтәкә мәзьн (Марԛос 10:29, 30). Ӧса жи, Йаһоԝа – йе кӧ Сәре малбәта мәйә рʹӧһʹани йә – соз дьдә, кӧ әԝе пьштгьрийа хьзмәткʹаред хԝә бькә (Зәбур 9:10). w21.06 8-9 ¶3-4

Гәләк мәрьв әʹщьз дьбьн у дьлькʹӧмьн, чьмки әм ԛәлпийа һинкьрьнед религийед майин әшкәрә дькьн. Сәрԝеред религи әндәмед хԝәрʹа дьбежьн кӧ Хԝәде кәсед хьраб давежә щәʹньме. Бь ве һинкьрьне, әԝана инсана бьн дәсте хԝәда дьгьрьн. Ле бәле, Шәʹдед Йаһоԝа әшкәрә дькьн кӧ әв йәк дәрәԝ ә, чьмки Хԝәде һʹьзкьрьн ә. Ӧса жи, сәрԝеред религи дьбежьн кӧ рʹӧһʹ намьрә, ле Шәʹдед Йаһоԝа избат дькьн кӧ әв фькьр жь пʹутпʹарьстийе те. Бәʹса хәбәре, һәгәр әв фькьр рʹаст буйа, рʹабуна мьрийа ԝе пʹучʹ буйа. Хенщи ве йәке, гәләк религийа һин дькьн кӧ һәр тьшт бьн контрола фәләкеда йә, ле Шәʹдед Йаһоԝа дьбежьн кӧ инсан хԝәйе азайа бьжартьне йә у дькарә бь хԝәстьна дьле хԝә Хԝәдерʹа хьзмәт бькә. Гава Шәʹдед Йаһоԝа дәрәԝа әшкәрә дькьн, гәло реаксийа сәрԝеред религи чаԝа йә? Әԝана гәләк һерс дькʹәвьн! Һәгәр әм дьбежьн кӧ әм рʹастийе һʹьз дькьн, гәрәке әм готьнед Хԝәде ԛәбул бькьн (Йуһʹәнна 8:45, 46). Әм мина Шәйтʹан ниньн, йе кӧ хԝә рʹастийе нәгьрт. Чь жи бьбә, әм хԝә ль рʹастийе дьгьрьн у һәр тʹьм ль гора баԝәрийа хԝә дьжин (Йуһʹәнна 8:44). Хԝәде дьхԝазә кӧ хьзмәткʹаред ԝи мина Иса хьрабийе нәфрʹәт бькьн у «хԝә ль ԛәнщийе бьгьрьн» (Рʹомайи 12:9; Ибрани 1:9). w21.05 10 ¶10-11

Һәгәр әм тедәрхьн кӧ әм кʹәтьнә тʹәлька ԛӧрʹәти йан тьмайе, гәрәке әм чь бькьн? Гәрәке әм ле бьрʹәвьн! Паԝлосе шанди готьбу ԝәки йед кӧ жь алийе Мире-щьнава һатьнә гьртьне, диса жи дькарьн жь тʹәлькед ԝи бьрʹәвьн (2 Тимотʹейо 2:26). Бир нәкә кӧ Йаһоԝа жь Мире-щьна ԛәԝитьр ә. Ләма, һәгәр әм аликʹарийа Йаһоԝа ԛәбул бькьн, әм дькарьн жь тʹәлькед Шәйтʹан бьрʹәвьн. Дәԝса кӧ әм бькʹәвьн тʹәлькед Мире-щьна у паше жь ԝан бьрʹәвьн, ԝе һьлбәт баш бә кӧ әм хԝә жь тʹәлькед ԝи бь тʹәмами дур бьгьрьн. Бона ве йәке, әм һʹәԝще аликʹарийа Йаһоԝа нә. Һәр рʹож жь Йаһоԝа аликʹарийе бьхԝазә кӧ тӧ тедәрхи һәла әв һʹӧнӧред хьраб сәр фькьр у рʹабун-рʹуньштьна тә һʹӧкӧм дькьн йан на (Зәбур 139:23, 24). Тʹӧ щара изне нәдә кӧ ԛӧрʹәти йан тьмайи сәр тә һʹӧкӧм бькьн! Мире-щьна нечʹирванәки щерʹьбанди йә, у әԝ бь һʹәзара сала һәр тьшти дькә, ԝәки хьзмәткʹаред Йаһоԝа бькә тʹәлькед хԝә. Ле зутьрәке әԝе бе гьртьне, у хьлазийеда ԝе бе ԛьрʹкьрьне (Әʹйанти 20:1-3, 10). Әм һʹьзрәта ԝе рʹоже нә! Ле һʹәта әԝ рʹож бе, мьԛабьли тʹәлькед Мире-щьна һʹьшйар бьминьн. Һаш жь хԝә һәбьн кӧ ԛӧрʹәти у тьмайи нәкʹәвә дьле ԝә. Бәле, «мьԛабьли Мирещьн бьсәкьньн у әԝе жь ԝә бьрʹәвә». w21.06 19 ¶15-17

Гава кәсәк рʹастийа Кʹьтеба Пироз ԛәбул дькә у кәсед дьнрʹа жи бәʹса рʹастийе дькә, дьле Йаһоԝа ша дьбә (Мәтʹәлок 23:15, 16). Бешьк Йаһоԝа сәва хирәта хьзмәткʹаред хԝә гәләк ша дьбә. Мәсәлә, сала хьзмәте йа 2020-да, ԝәʹде пандәмийе, 7 705 765 һинбунед Кʹьтеба Пироз дәрбаз дькьрьн, у бь сайа ван һинбуна, 241 994 кәс һатьнә ньхӧмандьне. Әв шагьртед тʹәзә жи ԝе һинбунед Кʹьтеба Пироз дәрбаз бькьн у дьһа зедә мәрьва бькьнә шагьртед Иса Мәсиһ (Луԛа 6:40). Һәмьки гава әм ви шьхӧлида хирәт ьн, дьле Йаһоԝа ша дьбә. Шьхӧле һинкьрьне һьлбәт һеса нинә, ле бь аликʹарийа Йаһоԝа, әм дькарьн мәрьва һин бькьн кӧ әԝана жи Баве мәйи әʹзмана һʹьз бькьн. Гәло әм дькарьн хԝәрʹа нет дайньн кӧ һәри кем һинбунәкә Кʹьтеба Пироз дәрбаз бькьн? Һәгәр әм һʹәму мәщала дьдьнә хәбате кӧ һинбуна Кʹьтеба Пироз тʹәви мәрьва дәстпекьн, әме әʹщебмайи бьминьн кӧ һәр тьшт ча те кʹәрәмкьрьне. w21.07 6-7 ¶14-16

Йаһоԝа шьхӧле авакьрьна пʹарьстгәһе да дәсте Сьлеман, ле Даԝьд Пʹадша диса жи бь мәрʹданийе пьштгьрийа ви шьхӧли кьр (1 Дирок 22:11-16). Һәгәр ԛәԝата мә ида нагьһижә проектед авакьрьнеда бьхәбьтьн, әм диса жи дькарьн бь сайа ԛӧрбанкьрьнед хԝә пьштгьрийа ван проекта бькьн. Ӧса жи, әм дькарьн тьштед ӧса щаһьла һин кьн, чь кӧ ԝе кери ԝан бе. Хенщи ве йәке, дина хԝә бьде кӧ Паԝлосе шанди мәрʹданийа хԝә ча нишан дькьр. Әԝи Тимотʹейо тʹәви хԝә дьбьр хьзмәте у методед һинкьрьне у бәлакьрьна мьзгине ԝи һин дькьр (Кʹаред Шандийа 16:1-3). Бь сайа һинкьрьна кӧ Тимотʹейо жь Паԝлос станд, әԝ бу мьзгинван у дәрсдарәки баш (1 Корьнтʹи 4:17). Тимотʹейо жи әве йәке чь кӧ жь Паԝлос һин бьбу, кәсед дьн һин дькьр. w21.09 12 ¶14-15

Дина хԝә бьдә дәрсед жь сәрһатийа Аполо у Паԝлосе шанди. Һәрдӧ жи Ньвисаред Пироз рʹьнд заньбун у дәрсдаред бь нав у дәнг бун. Хенщи ве йәке һәрдӧ жи али гәләк кәса кьрьбун кӧ әԝ бьбьн шагьртед Иса Мәсиһ. Ле диса жи ԝана һәвдӧрʹа нәдькʹәтьнә ләще (Кʹаред Шандийа 18:24). Чахе Аполо жь Корьнтʹе чу, ԝәʹдә шунда Паԝлосе шанди ԝирʹа гот кӧ бьра әԝ диса вәгәрʹә Корьнтʹе (1 Корьнтʹи 16:12). Аполо фәрәсәтед хԝә бь щурʹәки баш дьда хәбате, демәк бона бәлакьрьна мьзгине у бона ԛәԝикьрьна щьвате. Жь Кʹьтеба Пироз те кʹьфше кӧ Аполо йәки мьлук бу. Мәсәлә, Кʹьтеба Пирозда найе готьне кӧ Аполо хәйиди, гава Әкила у Прьскила «һе рʹаст Рʹийа Хԝәде ԝирʹа шьровәкьрьн» (Кʹаред Шандийа 18:24-28). Чахе Паԝлосе шанди дьдит ԝәки Аполо пешда дьчә, әԝ нәдьтьрсийа кӧ мәрьвед дьн ԝе Аполо жь ԝи четьр һʹәсаб кьн. Жь ширәта кӧ Паԝлос да щьвата Корьнтʹе те кʹьфше, ԝәки әԝ йәки мьлук у сәрԝахт бу у синоред хԝә заньбун (1 Корьнтʹи 3:4-6). w21.07 18-19 ¶15-17

Адәм у Һеԝайе бь һʹәмде хԝә мьԛабьли Хԝәде рʹабун, ләма  жи әԝана һежа нибун, ԝәки малбәта Йаһоԝада бьминьн. Ле зӧрʹәта ԝан? Йаһоԝа мәрьва һʹьз дькә у әԝ мәщале дьдә йед гӧһдар, ԝәки бьбьнә пʹара малбәта ԝи. Әԝи бь сайа ԛӧрбана Кӧрʹе хԝә мәрʹа рʹе вәкьр (Йуһʹәнна 3:16). Ахьрийеда сәр һʹиме ԛӧрбана Иса, 144 000 мәрьвед амьн мәщал стандьн кӧ бьбьн кӧрʹед Хԝәде (Рʹомайи 8:15-17; Әʹйанти 14:1). Хенщи ԝе йәке диса бь милйона мәрьв гӧһ дьдьн Хԝәде у ԛьрара ԝи тиньн сери. Һәгәр әԝана щерʹьбандьна пашьнда демәк хьлазийа Сәрԝертийа Һʹәзарсали йа Иса Мәсиһ амьн бьминьн, әԝана ԝе бь тʹәмами бьбьн әндәмед малбәта Йаһоԝа (Зәбур 25:14; Рʹомайи 8:20, 21). Әԝана ида ньһада Йаһоԝа ча «Бав» нав дькьн (Мәтта 6:9). Ӧса жи, мәщала кәсед кӧ жь мьрьне рʹабьн ԝе һәбә, ԝәки ԛьрар у ԛанунед Йаһоԝа һин бьн. Һәгәр әԝана рʹебәрийа ԝи ԛәбул бькьн, әԝе жи бькарьбьн бьбьн пʹара малбәта ԝи. w21.08 5 ¶10-11

Паԝлосе шандирʹа щабдарик һатьбу дайине, у әԝи әв щабдари ча тьштәки һәри фәрз һʹәсаб дькьр. Әԝи мьзгин һьм ль щийед кӧ гәләк мәрьв һәбун бәла дькьр, һьм жи «мал бь мал» (Кʹаред Шандийа 20:20). Әԝ һәртʹьм һазьр бу кӧ мьзгине бәла кә. Мәсәлә, гава әԝ бажаре Атʹинайеда һивийа һәвалед хԝә бу, әԝи һьнә кәсед нав-дәнгрʹа дәрһәԛа мьзгине гьли кьр, у һьнә жь ԝан бунә шагьртед Иса Мәсиһ (Кʹаред Шандийа 17:16, 17, 34). Гава Паԝлос гьрти бу жи, әԝи кәсед дәр-дора хԝәрʹа мьзгин бәла дькьр (Филипи 1:13, 14; Кʹаред Шандийа 28:16-24). Паԝлос ԝәхта хԝә бь щурʹәки баш дьда хәбате. Әԝи гәләк щар гази кәсед дьн дькьр кӧ әԝана тʹәви ԝи хьзмәт бькьн. Мәсәлә, әԝи щарәке Йуһʹәнна, кӧ жерʹа Марԛос дьготьн, у щарәкә дьн жи Тимотʹейо хԝәрʹа бьрә хьзмәтийе (Кʹаред Шандийа 12:25; 16:1-4). Бешьк Паԝлосе шанди нишани ԝан дькьр, кӧ гәрәке әԝ щьвате чаԝа организә бькьн, чаԝа шьвантийе бькьн у чаԝа бьбьн дәрсдаред баш (1 Корьнтʹи 4:17). w22.03 27 ¶5-6

Һьнә кәс дьбежьн ԝәки әԝана баԝәрийа хԝә ԝан тьшта тиньн, кӧ тенә дитьне, ләма жи әԝана баԝәр накьн ԝәки Хԝәде һәйә. Ле диса жи, әԝана һьнә тьштед кӧ найен дитьн баԝәр дькьн, мәсәлә ԛәԝата гравитасийайе, чьмки әԝ йәк әшкәрә йә. Мина ве йәке, Кʹьтеба Пироз жи бәʹса ван тьшта дькә, «йед кӧ найенә дитьн, ле бь рʹастийе һәнә», у баԝәри һьндава ван тьшта сәр һʹиме избатед әшкәрә йә (Ибрани 11:1, ДТʹ). Йазьх гәләк кәс хирәт накьн, ԝәки ван избата леколин бькьн, ләма жи дьфькьрьн кӧ Хԝәде тʹӧнә. Һьнә зандар паши леколина избата баԝәр кьрьн, кӧ һәр тьшт жь алийе Хԝәдева һатийә әʹфьрандьн. Һьнә жь ԝан зандара бәре баԝәр нәдькьрьн ԝәки Хԝәде һәйә, чьмки университетеда һин нәдькьрьн кӧ Хԝәде һәйә. Ле әԝана дәрһәԛа Йаһоԝа пеһʹәсийан у ньһа ԝи һʹьз дькьн. Фьрԛи тʹӧнә әм хԝәнди йан жи нәхԝәнди нә, лазьм ә кӧ һәр кәс жь мә баԝәрийа хԝә һьндава Хԝәде ԛәԝи бькә. w21.08 14 ¶1; 15-16 ¶6-7

Иса бь сайа мәтʹәлока дәрһәԛа кӧрʹе ӧндабуйи зәлал кьр, ԝәки Йаһоԝа чьԛас дьлрʹәʹм ә. Ве мәтʹәлокеда, хорт жь мале чу у «әʹмьре толтийе дәрбаз кьр, һʹәму һәбука хԝә пʹучʹ кьр» (Луԛа 15:13). Паше, әԝи тʹобә кьр, хԝә ньмьз кьр у вәгәрʹийа мале. Гәло баве ԝи чь кьр? Иса Мәсиһ гот: «Гава һе дурва баве әԝ дит, дьле ԝи сәр шәԝьти, бәрбь ԝи бәзи, әԝ һʹәмез кьр у рʹамуса». Кӧрʹе ӧндабуйи гӧнед мәзьн кьрьбу, ле чьмки әԝи тʹобә кьр, бав бахшандә ԝи. Бав кӧрʹе хԝә беһӧрмәт нәкьр, ле бь дьлрʹәʹми бахшанд у малбәтеда ԛәбул кьр. Баве дьлрʹәʹм жь ве мәтʹәлоке бәрамбәри Йаһоԝа дьбә. Бь ве мәтʹәлоке, Иса әшкәрә кьр кӧ Баве ԝи һазьр ә гӧнәкʹаред кӧ жь дьл тʹобә дькьн, бьбахшинә (Луԛа 15:17-24). w21.10 8 ¶4; 9 ¶6

Иро гәләк сәрокед религийа чь жь дәсте ԝан те дькьн, ԝәки наве Хԝәде вәшерьн. Ԝана наве ԝи жь ԝәлгәрʹандьнед Кʹьтеба Пироз дәрхьстьнә у һьнә щийа ԛәдәхә дькьн деред хԝәда наве ԝи һьлдьн. Тʹәне Шәʹдед Йаһоԝа бь рʹасти ԛәдре наве Хԝәде дьгьрьн. Әм жь һʹәму религийа зедәтьр дина мәрьва дькʹьшиньн сәр наве Хԝәде. Әм хԝә нав дькьн Шәʹдед Йаһоԝа у чь жь дәсте мә те дькьн, ԝәки һежайи ви нави  бьн (Ишайа 43:10-12). Һʹәта ньһа мә 240 милйон зедәтьр Кʹьтеба Пироз йа «Ԝәлгәрʹандьна Дьнйа Тʹәзә» нәшьр кьрийә. Ве ԝәлгәрʹандьнеда наве Йаһоԝа гәләк рʹезада һатийә ньвисаре, кʹидәре кӧ ԝәлгәрʹандьнед дьнда нәданә хәбате. Хенщи ԝе йәке, әм әʹдәбйәтед кӧ наве Йаһоԝа бьльнд дькьн, сәр 1 000 зьмана зедәтьр дәрдьхьн! w21.10 20-21 ¶9-10

Чахе әм али хушк-бьред һʹәԝщәдар дькьн, әв жи пʹарәкә һʹәбандьна мә йә. Йаһоԝа соз дабу ԝәки ԝе ван мәрьва хәлат бькә, йед кӧ бь мәʹрдани аликʹарийе дьдьнә бәләнгаза (Ԛануна Дӧщари 15:10). Һәр щар чахе әм кʹомәке дьдьнә хушк йан бьраки һʹәԝщәдар, Йаһоԝа һʹәсаб дькә кӧ әм пʹешкʹеш дьдьнә Ԝи (Мәтʹәлок 19:17). Мәсәлә, гава хушк-бьред жь Филипйайе Паԝлосрʹа пʹешкʹешәк шандьн, йе кӧ ль ԝе дәме гьрти бу, әԝи әв пʹешкʹеш ча «һʹәдийа ԛәбул у ль Хԝәде хԝәш» нав кьр (Филипи 4:18). Дәрһәԛа щьвата хԝә бьфькьрә у жь хԝә бьпьрсә: «Һәла хушк йан бьраки ӧса һәйә кӧ һʹәԝще аликʹарийе йә у әз ча дькарьм али ԝи бькьм?» Чахе Йаһоԝа дьвинә кӧ әм ԝәхт, ԛәԝат, фәрәсәт у һәбуна хԝә дьдьнә хәбате сәва кӧ пьштгьрийа кәсед һʹәԝщәдар бькьн, Әԝ жь мә рʹази дьбә. Әԝ ве йәке ча пʹарәкә һʹәбандьна мә һʹәсаб дькә (Аԛуб 1:27). Сәва һʹәбандьна рʹаст ԝәʹдә у ԛәԝат лазьм ә. Ле диса жи әв бона мә баргьрани нинә (1 Йуһʹәнна 5:3). Гәло чьрʹа? Чьмки әм әԝе йәке дькьн жь бо һʹьзкьрьна һьндава Йаһоԝа у хушк-бьред хԝә. w22.03 24 ¶14-15

Сәва кӧ әм бькарьбьн һьндава хушк-бьрада дьлшәԝат бьн, гәрәке әм бьзаньбьн дәрдед ԝан чь нә. Бәʹса хәбәре, хушкәк гәләк нәхԝәш ә. Әԝ тʹӧ щара гьли у газьнед хԝә накә, ле әԝ бешьк һʹәԝще аликʹарийа мә йә. Гәло бона һазьркьрьна хԝарьне йан бона паԛьжкьрьна мале жерʹа аликʹари лазьм ә? Йан жи, бәʹса хәбәре бьраки хәбата хԝә ӧнда кьрийә. Гәло әм дькарьн һьнә пʹәрә пʹешкʹеши ԝи кьн – дьбәкә ӧса ԝәки әԝ пенәһʹәсә жи әв пʹәрә жь кʹе йә, сәва кӧ әԝ бькарьбә әʹбура  хԝә бькә һʹәта кӧ хәбате хԝәрʹа бьвинә? Дәԝса кӧ әм һивийе бьн һʹәта кәсәк жь мә аликʹарийе бьхԝазә, ԝе баш бә әм гава пешьн бавежьн кӧ аликʹарийе бьдьн. Ԝәрә әм чʹәʹв бьдьнә Йаһоԝа, йе кӧ һәр рʹож тәʹве сәр мә дәрдьхә у һивийе нинә һʹәта әм әве йәке жь ԝи бьхԝазьн. Сәрда жи, жь гәрмайа тәʹве нә тʹәне кәсед шекьрдар, ле һәр кәс кʹаре дьстинә. Әв йәк кӧ Йаһоԝа бона һʹәԝщед мә хәм дькә, һʹьзкьрьна ԝи нишан дькә. Әм гәләк ша нә кӧ Йаһоԝа һаԛас ԛәнщ у дәствәкьри йә! w21.09 22-23 ¶12-13

Сәва һʹьзкьрьна хԝәйә амьн, Хԝәде һазьр ә бьбахшинә. Гава Йаһоԝа дьвинә кӧ мәрьвед гӧнәкʹар тʹобә дькьн у гӧнед хԝә дьһельн, әԝ һазьр ә бьбахшинә ԝан. Даԝьд Пʹадша дәрһәԛа Йаһоԝа ӧса готьбу: «Әԝ ԝәкә гӧнәйед мә, сәре мә накә у ԝәкә нәһәԛийед мә надә бәр мә» (Зәбур 103:8-11). Даԝьд рʹьнд заньбу кӧ исафәкә нәрʹьһʹәт барәки чьԛас гьран ә, ле әԝи дитьбу кӧ Йаһоԝа чьԛас рʹәʹм ә. Гәло Йаһоԝа чьрʹа һазьр ә бьбахшинә? Щаба ве пьрсе, рʹеза иройинда йә. Бәле, ча Даԝьд дӧайе хԝәда готьбу, Йаһоԝа һазьр ә бьбахшинә ԝан мәрьва, йед кӧ бахшандьне жь ԝи дьхԝазьн, чьмки әԝ бь һʹьзкьрьна амьн тʹьжә йә. Гава әм гӧнә дькьн,  баш ә кӧ әм пʹошман дьбьн. Пʹошманбун дькарә мә һелан бькә, ԝәки әм тʹобә бькьн у шашийед хԝә рʹаст бькьн. w21.11 5 ¶11-12

Йаһоԝа наве хԝә һʹьз дькә, у әԝ дьхԝазә кӧ һәр кәс ԛәдре ви нави бьгьрә (Ишайа 42:8). Ле ида 6 000 сал ә кӧ наве ԝи те рʹәшкьрьне (Зәбур 74:10, 18, 23). Әв йәк дәстпебу, чахе Мире-щьна (демәк «Бӧхданбеж») гот кӧ Хԝәде тьштед баш жь Адәм у Һеԝайе вәдьшерә (Дәстпебун 3:1-5). Жь ԝе дәмева дәстпебуйи, гәләк кәс дьбежьн кӧ Йаһоԝа жь мәрьва тьштед кӧ ԝанрʹа лазьм ьн вәдьшерә. Ве дәрәԝе дьле Иса гәләк дешанд. Изна Йаһоԝа һәйә кӧ ль сәр әʹрд у әʹзмана һʹӧкӧм бькә, у сәрԝертийа ԝи, сәрԝертийа һәри баш ә (Әʹйанти 4:11). Ле Мире-щьна гәләк мәләк у инсан данә баԝәркьрьн, ԝәки изна Хԝәде тʹӧнә кӧ сәрԝертийе бькә. Зутьрәки бь сайа сәбра Йаһоԝа, әв пьрс ԝе бь тʹәмами сафи бә. Һәр кәс ԝе бьзаньбә кӧ тʹәне Пʹадшатийа ԝи дькарә әʹдьлайе у бехофийе бинә сәр әʹрде. w21.07 9 ¶5-6

Фәʹмдари йә сәре малбәте дьхԝазә һәр тьшти бькә ԝәки әʹбура нәфәред хԝә бькә. Һьлбәт зор ә чахе чәтьнайед тә алийе пʹәрада һәнә. Диса жи, тӧ дькари әве дәрәще бьди хәбате, ԝәки баԝәрийа хԝә дьһа ԛәԝи ки. Готьнед Иса жь Мәтта 6:25-34 бьхунә, сәр ван готьна кʹур бьфькьрә у дӧа бькә. Бьфькьрә сәр сәрһатийед хушк-бьред хьзмәтийеда хирәт, кӧ избат дькьн ԝәки Йаһоԝа бона ԝана хәм дькә (1 Корьнтʹи 15:58). Бь ви щурʹәйи, тӧйе дьһа баԝәр би ԝәки Баве тәйи әʹзмани ԝе али тә жи бькә. Әԝ занә кӧ тӧ һʹәԝще чь йи, у әԝ дькарә тьштед лазьм бьдә тә. Чьԛас зедә тӧ дәсте Йаһоԝа бьвини, һаԛас баԝәрийа тә ԝе һе зедә ԛәԝи бә, у тӧйе һазьр би һьмбәри тәнгасийед дьһа мәзьн сәбьр ки. w21.11 20 ¶3; 21 ¶6

Баԝәрийа һьндава кʹьрʹине али гәләк шагьртед Иса Мәсиһ кьрийә кӧ нава зерандьна у тәнгасийед дьнда мьзгине бәла кьн у һʹәта мьрьне амьн бьминьн. Мәсәлә, сәрһатийа Йуһʹәннайе шанди бинә бәр чʹәʹве хԝә. Ча те кʹьфше, әԝи бь зедәтьри 60 сали мьзгина дәрһәԛа Иса у ԛӧрбана ԝи, бь амьни бәла дькьр. Гава әԝ незики 100 сали бу, дәԝләта Рʹомайи әԝ ль гьрава Патмосе сьргун кьр, чьмки ԝи ча мәрьвәки хоф һʹәсаб дькьрьн. Гәло чьма? Чьмки әԝи дәрһәԛа Хԝәде у Иса Мәсиһ шәʹдәти дьда (Әʹйанти 1:9). Бәле, Йуһʹәнна жь алийе сәбьр у амьнийева мәсәләкә гәләк баш ә! Жь кʹьтеб у нәʹмед кӧ Йуһʹәнна бь рʹебәрийа рʹӧһʹе Хԝәдейи пироз ньвисин, әшкәрә йә кӧ әԝи Иса гәләк һʹьз дькьр у кʹьрʹине ԛимәт дькьр. Дь ван ньвисарада, әԝи зедәтьри 100 щари бәʹса кʹьрʹине у кʹара ве кьр (1 Йуһʹәнна 2:2). Те кʹьфше кӧ Йуһʹәнна ԛӧрбана Иса гәләк ԛимәт дькьр. w21.04 17 ¶9-10

Йаһоԝа дьхԝәст кӧ хьзмәткʹаред ԝи һьндава мәрьвед сәԛәт рʹәʹм бьн. Мәсәлә, Исраелийа гәрәке ньфьрʹ кәсед кәрʹ нәкьрана. Бь рʹасти жи, ньфьрʹкьрьна мәрьве кәрʹ тьштәки гәләк хьраб ә, чьмки әԝ набьһе у нькарә хԝә бьпарезә. Ӧса жи ль гора Ԛануна Кʹаһинтийе 19:14, гәрәке хьзмәткʹаред Хԝәде тьштәк нәдана сәр рʹийа мәрьве кор. Кʹьтебәк дәрһәԛа кәсед сәԛәт ӧса дьбежә: «Бәре, кәсед ӧса Рʹоһьлата Навинда рʹасти зӧлме у нәһәԛийе дьһатьн». Дьбәкә һьнә кәсед берʹәʹм тьшт датанин сәр рʹийа кәсед кор, ԝәки ԝана бешиньн йан ԛәрфед хԝә бь ԝан бькьн. Әԝ чьԛас бехԝәдети йә! Бь сайа ве тʹәмийе, Йаһоԝа нишани хьзмәткʹаред хԝә дькьр кӧ әԝана гәрәке һьндава мәрьвед сәԛәт дьлрʹәʹм бьн. w21.12 8-9 ¶3-4

Аԛуб гәләки дьтьрсийа ԝәки бьре ԝи һе сәр ԝи һерс ә. Әԝи дәрһәԛа ве проблеме бь дьл Йаһоԝарʹа дӧа кьр. Паше, әԝи гәләк пʹешкʹеш Әсаԝрʹа шандьн (Дәстпебун 32:9-15). Хьлазийеда, гава әԝана рʹасти һәв һатьн, Аԛуб нә щарәке, нә жи дӧ щара, ле һʹәфт щара ль бәр Әсаԝ кʹәтә сәр чока! Бәле, Аԛуб бь ԛәдьр у мьлукти бьре хԝәрʹа ль һәв һат (Дәстпебун 33:3, 4). Гәло әм дькарьн жь ве сәрһатийе чь һин бьн? Пешийа кӧ Аԛуб чу бал Әсаԝ, әԝи бь мьлукти жь Йаһоԝа аликʹари хԝәст. Паше, әԝи ль гора дӧайе хԝә чь жь дәсте ԝи һат кьр, ԝәки бьре хԝәрʹа ль һәв бе. Гава Аԛуб у Әсаԝ рʹасти һәв һатьн, Аԛуб шәрʹ нәкьр кӧ кʹе рʹаст ә, кʹе нәһәԛ ә. Нета Аԛуб тʹәне әв бу кӧ бьре хԝәрʹа ль һәв бе. Ле тӧ дькари чʹәʹв бьди мәсәла Аԛуб? (Мәтта 5:23, 24). w21.12 25 ¶11-12

Гава тӧ дьфькьри кӧ Иса Мәсиһ әʹмьре хԝә бона гӧнед тә дайә, тӧ дьбәкә дьбежи: «Әз һежайи ве пʹешкʹеше ниньм.» Гәло чь дькарә бьбә сәбәб кӧ тӧ ӧса бьфькьри? Әм гӧнәкʹар ьн, ләма жи дьле мә дькарә мә бьдә баԝәркьрьне кӧ әм һежайи ве йәке ниньн у бекер ьн (1 Йуһʹәнна 3:19). Ԝи чахи, гәрәке әм биньн бира хԝә кӧ «Хԝәде жь дьле мә мәстьр ә». Һʹьзкьрьн у бахшандьна Баве мәйи әʹзмана, жь фькред мә йед негатив ԛәԝитьр ьн. Гәрәке әм ӧса сәр хԝә бьньһерʹьн, чаԝа кӧ Йаһоԝа сәр мә дьньһерʹә. Сәва ве йәке гәләк фәрз ә кӧ әм бәрдәԝам кьн дӧа бькьн, Кʹьтеба Пироз леколин бькьн у тʹьме тʹәви хьзмәткʹаред ԝи тʹоп бьн. Гәло чьма? Чьмки әв йәк ԝе али тә бькә кӧ тӧ дьлгәрмийа Йаһоԝа дьһа зәлал бьвини. Бь сайа леколина Кʹьтеба Пироз, тӧйе фәʹм бьки кӧ әԝ тә чьԛас һʹьз дькә. Һәр рʹож ль сәр Хәбәра Хԝәде кʹур бьфькьрә. Бь ве йәке, фькред тә жи ԝе бенә «рʹасткьрьне» (2 Тимотʹейо 3:16). w21.04 23-24 ¶12-13

Сәва кӧ баԝәрийа мә ԛәԝи бә, бәс нинә ԝәки әм тʹәне занәбуна хԝә зедә кьн. Гәрәке әм сәр тьштед кӧ әм һин дьбьн, кʹур бьфькьрьн. Ԝәрә әм сәрһатийа ньвискʹаре Зәбура 77 шеԝьр кьн. Әԝ хәмгин бу, чьмки дьфькьри ԝәки Йаһоԝа жь ԝи у жь Исраелийед дьн рʹази нинә. Ләма жи хәԝ нәдькʹәтә чʹәʹве ԝи (рʹезед 2 һʹәта 8). Гәло әԝи чь кьр? Әԝи Йаһоԝарʹа гот: «Әзе һʹәму кьред Тәда кʹур бьбьм у ль сәр кʹаред Тә бьфькьрьм» (рʹеза 12). Зәбурбеж һьлбәт рʹьнд заньбу кӧ Йаһоԝа бона хьзмәткʹаред хԝә чь кьрьбу, ле әԝ диса жи бәрхԝә дькʹәт: «Гәло Хԝәде бир кьр дьловани? Гәло бь һерсе рʹәʹма Хԝә да бьрине?» (рʹеза 9). Зәбурбеж сәр кьред Йаһоԝа кʹур дьфькьри у дьани бира хԝә, ԝәки Хԝәде чаԝа рʹәʹм у дьловани хьзмәткʹаред хԝәрʹа дьда кʹьфше (рʹеза 11). Ахьрийеда, әԝ баԝәр бу ԝәк  Йаһоԝа ԝе тʹӧ щар пьшта хԝә нәдә хьзмәткʹаред хԝә (рʹеза 15). w22.01 30-31 ¶17-18

Йаһоԝа һʹьзрәта хьзмәткʹаред хԝә йед мьри йә, у әԝ дьхԝазә ԝана диса бьвинә (Ибо 14:15). Мәсәлә, бинә бәр чʹәʹве хԝә кӧ Йаһоԝа чьԛас бира досте хԝә Бьраһим кьрийә (Аԛуб 2:23). Йан жи, бьфькьрә кӧ әԝ чьԛас дьхԝазә хьзмәткʹаре хԝә Муса диса бьвинә, тʹәви кʹижани әԝи «рʹу бь рʹу» хәбәр дьда (Дәркʹәтьн 33:11). Ӧса жи, Хԝәде бешьк гәләк дьхԝазә странед Даԝьд у зәбурбежед дьн диса бьбьһе (Зәбур 104:33). Әв достед Хԝәде ньһа хәԝа мьрьнеда ньн, ле Йаһоԝа әԝана бир нәкьрьнә (Ишайа 49:15). Һʹәму хәйсәт-һʹӧнӧред ԝан һур бь һур бира ԝида ньн. Рʹожәке, Хԝәде ԝе ԝана жь мьрьне рʹакә. Ԝе рʹоже, дәнге дӧайед ԝан ԝе диса бькʹәвә гӧһе ԝи, у дьле ԝи ԝе диса ша бә кӧ әԝана жерʹа хьзмәт кьн. Һәгәр тә жи мәрьвәки хԝәйи незик ӧнда кьрийә, бьра һевийа рʹабуна мьрийа дьле тә рʹьһʹәт бькә у дьлбинийе бьдә тә. Гава рʹабәрибуна бахче Еденеда дәстпебу, Йаһоԝа заньбу ԝәки пешийа кӧ әԝ һʹале дьнйайе рʹаст кә, һʹале дьнйайе ԝе дьһа хьраб бә. Йаһоԝа хьраби, нәһәԛи у зордарийа кӧ дьнйайеда тʹьжә йә, нәфрʹәт дькә. w21.07 10 ¶11; 12 ¶12

Гава әм нишан дькьн кӧ әм хушк-бьра һʹьз дькьн, әм нишан дькьн кӧ әм кʹьрʹине ԛимәт дькьн. Гәло чьма? Чьмки Иса Мәсиһ әʹмьре хԝә нә тʹәне бона мә бәрва да, ле бона хушк-бьред мә жи. Әв йәк кӧ әԝ һазьр бу ԝәки бона ԝан бьмьрә, избат дькә кӧ әԝана бона ԝи гәләк ԛимәт ьн (1 Йуһʹәнна 3:16-18). Һʹал у һәрәкʹәтед мә нишан дькьн кӧ әм хушк-бьра чьԛас һʹьз дькьн (Әфәси 4:29, 31–5:2). Мәсәлә, ԝәхта кӧ әԝана нәхԝәш дькʹәвьн, ԝәʹде тʹәшԛәла тʹәбийәте зьраре дьвиньн йан рʹасти тәнгасийед дьн тен, әм али ԝан дькьн. Ле һәгәр хушк йан бьраки дьле мә бь готьн йан кьрьнед хԝә ешандийә, гәрәке әм чь бькьн? Гәло тӧ щарна кʹине дажойи? (Ԛануна Кʹаһинтийе 19:18). Һәгәр әре гӧһ бьдә ве ширәте: «Ль һәв сәбьр кьн у ль һәв бьбахшиньн, һәгәр газьне йәки ль һьндава йәкида һәбә. Чаԝа Хӧдан бахшандә ԝә, һун жи ӧса бьбахшиньнә һәв» (Колоси 3:13). Чьԛас зедә әм дьбахшиньн хушк у бьра, һаԛас зедә әм Баве хԝәйи әʹзманирʹа избат дькьн кӧ әм бь дьл у щан кʹьрʹине ԛимәте дькьн. w21.04 18 ¶12-13

Гәло әм дькарьн жь готьн у кьред Аполо у Паԝлосе шанди чь дәрсе һин бьн? Дьбәкә әм бь дьл у щан шьхӧле Йаһоԝа дькьн у мә али гәләк хԝәндәкʹаред Кʹьтеба Пироз кьрийә ԝәки әԝана бәрбь ньхӧмандьне һәрʹьн. Ле әм рʹьнд заньн ԝәки мә әв йәк тʹәне бь сайа ԛәԝата Йаһоԝа кьрийә. Мәсәла Аполо у Паԝлосе шанди тьштәки дьн жи мә һин дькә: Чьԛас зедә щабдарийед мә һәнә, һаԛас зедә мәщалед мә һәнә кӧ әʹдьлайе бькьнә щьвате. Әм чьԛас рʹази нә, гава бьред кʹьфшкьри әʹдьлайе у йәктийе дькьнә щьвате бь ве йәке кӧ сәр һʹиме Кʹьтеба Пироз ширәта дьдьн, у дина хушк-бьра дькʹьшиньн сәр мәсәла Иса, нә кӧ сәр хԝә (1 Корьнтʹи 4:6, 7). Хԝәде һьнә фәрәсәт данә һәр кәси жь мә. Әм дьбәкә дьфькьрьн ԝәки рола мә щьватеда бьчʹук ә. Ле бир нәкә кӧ ав, дьлоп-дьлоп дьбә гол. Ләма жи бьра әм һәвдӧрʹа нәкʹәвьн һʹӧщәте у чь жь дәсте мә те бькьн, ԝәки әʹдьлайе у йәктийе бькьнә щьвате (Әфәси 4:3). w21.07 19 ¶18-19

Тӧ жи дькари баԝәр би ԝәки рʹожәке, тӧйе мәрьвед хԝәйи һʹьзкьри кӧ мьрьнә, диса бьвини. Әв йәк кӧ Иса тʹәви достед хԝә дьгьрийа, нишани мә дькә ԝәки әԝ бь рʹасти дьхԝазә мьрийа рʹакә (Йуһʹәнна 11:35). Дьлбинийе бьдә кәсед кӧ шине дькьн. Хенщи ве йәке кӧ Иса тʹәви Мәртʹа у Мәрйәме гьрийа, әԝи гӧһ да ԝан у бәр дьле ԝанда һат (Йуһʹәнна 11:25-27). Ԝе баш бә кӧ әм жи бәр дьле ԝан мәрьвада бен, йед кӧ шине дькьн. Рʹуспики бь наве Дан, йе кӧ ль Австралйайе дьжи, дьбежә: «Чахе мьн жьна хԝә ӧнда кьрьбу, әз һʹәԝще бәрдьлийе бум. Чәнд бьра тʹәви жьнед хԝә һазьр бун шәв у рʹож гӧһ бьдьн мьн. Әԝана сәва һесьред чʹәʹвед мьн әʹщьз нәдьбун у нәдьготьн кӧ ида бәс ә. Ӧса жи, ԝана гәләк али мьн дькьр. Мәсәлә, гава мьн хԝә бетʹаԛәт тʹәхмин дькьр, ԝана әʹрәба мьн дьшушт, бона мьн дьчунә дькʹане у хԝарьн һазьр дькьрьн. Ӧса жи, ԝана гәләк щара тʹәви мьн дӧа дькьр. Әԝана рʹасти жи ‹бона рʹожа охьрме гьран› мьнрʹа бун дост у бьра» (Мәтʹәлок 17:17). w22.01 16 ¶8-9

Йаһоԝа ԛәнщийа мә дьхԝазә (Мәтʹәлок 4:20-22). Гава әԝ бь сайа Хәбәра хԝә, бь сайа әʹдәбйәтәкә сәр һʹиме Кʹьтеба Пироз йан бь сайа хушк-бьред гьһишти, ширәте дьдә мә, әԝ нишан дькә, кӧ әԝ мә һʹьз дькә (Ибрани 12:9, 10). Дина хԝә бьде кӧ чь те готьне, нә кӧ ча те готьне. Щарна әм дьбәкә дьфькьрьн, кӧ ширәт бь щурʹәки нә һаԛас баш мәрʹа һатийә дайине. Фәʹмдари йә кӧ чахе ширәт бь щурʹәки баш те дайине, һеса йә ԝәки мәри ве ширәте ԛәбул кә (Галати 6:1). Диса жи, гава ширәте дьдьнә мә, ԝе баш бә кӧ әм дина хԝә бьдьне һәла чь мәрʹа дьбежьн. Жь хԝә бьпьрсә: «Һәгәр мьн хԝәш найе жи, кӧ ширәт чаԝа һатә дайине, гәло әз дькарьм жь ве ширәте дәрсе һин бьм? Гәло әз дькарьм сәр кемасийед кәсе кӧ ширәт дайә мьн, чʹәʹве хԝә бьгьрьм, у тʹәне дина хԝә бьдьмә сәр кʹара ширәте?» Бәле, ԝе баш бә кӧ әм бьфькьрьн, һәла жь ширәтед кӧ мәрʹа тенә дайине, әм чаԝа дькарьн кʹаре бьстиньн. w22.02 12 ¶13-14

Йаһоԝа занә кӧ мәрʹа ԝәхт у щәфа лазьм ә, ԝәки хԝә жь фькред нәрʹаст у хәйсәтед хьраб дур бьгьрьн (Зәбур 103:13, 14). Ле бь сайа Хәбәра хԝә, рʹӧһʹе хԝә у тʹәшкиләта хԝә, Йаһоԝа билани, ԛәԝат у аликʹарийе дьдә мә, ԝәки әм бенә гӧһастьне. Хԝә бь сайа Кʹьтеба Пироз кʹур бьщерʹьбинә. Хәбәра Хԝәде мина нәйньке йә. Әԝ дькарә али тә бькә ԝәки тӧ фькьр, хәбәрдан у кьред хԝә бьщерʹьбини (Аԛуб 1:22-25). Ӧса жи, Йаһоԝа һәртʹьм һазьр ә бе һәԝара тә. Әԝ рʹьнд занә кӧ ча али тә бькә, чьмки һаш пе һәйә дьле тәда чь һәйә (Мәтʹәлок 14:10; 15:11). Ләма жи һәр рʹож дӧа кә у Хәбәра Хԝәде леколин кә. Баԝәр бә кӧ ԛанунед Йаһоԝа, ԛанунед һәри баш ьн. Һʹәму ԛанун у ширәтед Йаһоԝа бона кʹара мә нә. Кәсед кӧ ль гора ԛанунед ԝи дьжин, дьбьнә хԝәйе ԛәдьр, нета жийине у бәхтәԝарийа рʹаст дьстиньн (Зәбур 19:8-11). w22.03 4 ¶8-10

Авакьрьн у хԝәйкьрьна авайед бона һʹәбандьне жи пʹарәкә һʹәбандьна мә йә. Кʹьтеба Пирозда те готьне, ԝәки шьхӧле чекьрьн у хԝәйкьрьна коне пироз, ча хәбата пироз дьһатә һʹәсабе (Дәркʹәтьн 36:1, 4). Иро жи Йаһоԝа шьхӧле авакьрьна Одед щьвата у авайед тʹәшкиләте, ча шьхӧле пироз һʹәсаб дькә. Әм ԝан хушк-бьред кӧ сәр ве шьхӧле фәрз дьхәбьтьн, гәләк ԛимәт дькьн. Ӧса жи, әԝана шьхӧле бәлакьрьна мьзгине жи тиньн сери. Һьнә жь ԝан дьхԝазьн ча пешәнг хьзмәт кьн. Һәгәр әԝана рʹӧһʹанида гьһишти нә, ԝе баш бә кӧ рʹуспи ԝана кʹьфш кьн. Һьлбәт һәр кәс нькарә шьхӧле авакьрьнеда кʹар бькә, ле әм гьшк жи дькарьн шьхӧле тʹәмьзкьрьн у хԝәйкьрьна ван авайада аликʹарийе бьдьн. w22.03 22 ¶11-12