Чʹәʹв Бьдә Мьлуктийа Йаһоԝа

1. Чьма Йаһоԝа мьлуктийеда мәсәләкә лапи баш ә?

ГАВА тӧ дина хԝә дьди мәрьвед хԝәйиһʹӧкӧм у сәрԝера, гәло те һʹьше тә кӧ әԝана мәрьвнә мьлук ьн? Дьбәкә на. Ле Йаһоԝа, йе кӧ ԛәԝата ԝи бесинор ә, йәки мьлук ә (Зәбур 113:5-8). Йаһоԝа һәр алийава мьлук ә. Хәйсәт-һʹӧнӧред ԝида ԛӧрʹәбун ԛә тʹӧнә йә. Ԝәрә әм дина хԝә бьдьнә чар һʹӧнӧред Йаһоԝа у бьвиньн кӧ ван дәрәщада мьлуктийа ԝи ча әшкәрә дьбә. Ӧса жи әме бьвиньн кӧ Иса ча чʹәʹв дьда мьлуктийа Баве хԝә. Әв йәк ԝе али мә бькә дьһа незики Йаһоԝа бьн у һе зедә чʹәʹв бьдьнә мьлуктийа ԝи.

ЙАҺОԜА ҺАЗЬР Ә ГӦҺ БЬДӘ МӘ

2. Зәбур 62:8 дәрһәԛа Йаһоԝа чь нишани мә дькә? (Ӧса жи бьньһерʹьн шькьл.)

² Тʹәви мәрьве ԛӧрʹә чәтьн ә хәбәр дьн, чьмки әԝана хԝә жь мәрьвед дьн четьр һʹәсаб дькьн. Ләма жи мәрьвед дьн нәԝерьн незики ԝан бьн йан жи дьхԝазьн хԝә жь ԝан дур бьгьрьн. Йаһоԝа ԛә йәки ӧса нинә! Әԝ мьлук ә у дьхԝазә ԝәки әм незики ԝи бьн у дьле хԝә ԝирʹа вәкьн (Бьхунә Зәбур 62:8). Чаԝа кӧ бавәки һʹәзкьри һазьр ә гӧһ бьдә зарʹед хԝә, Йаһоԝа һазьр ә гӧһ бьдә дӧайед хьзмәткʹаред хԝә. Әԝи гәләк жь ԝан дӧа һәла һе Кʹьтеба Пирозда жи да ньвисаре. Әв йәк нишан дькә, ԝәки әԝ гәләк дьхԝазә дӧайед мә бьбьһе (Йешу 10:12-14; 1 Самуйел 1:10-18). Ле һәрге әм щарна жь бо шашийед хԝә бьфькьрьн, ԝәки әм һежа ниньн кӧ Йаһоԝарʹа дӧа бькьн, әм дькарьн чь бькьн?

3. Әм жь кʹӧ заньн, ԝәки Йаһоԝа дьхԝазә кӧ әм бәрдәԝам кьн ԝирʹа дӧа бькьн?

³ Һәрге әм хԝә һежайи һʹәзкьрьна Йаһоԝа һʹәсаб накьн, диса жи әм дькарьн ԝирʹа дӧа бькьн. Әм ве йәке жь кʹӧ заньн? Мәтʹәлока дәрһәԛа кӧрʹе ӧндабуйида, Иса бәʹса хортәки кьр, йе кӧ гӧнед гьран кьрьбу у паше тʹобә кьрьбу. Диса жи, әԝ дьфькьри кӧ бав ԝе ԝи ԛәбул нәкә. Ле гава кӧрʹ вәгәрʹийа мале, баве ԝи чь кьр? Иса гот кӧ гава әԝи кӧрʹе хԝә дит, «бь ләз чу пешийа ԝи, әԝ һʹәмез кьр у пачʹ кьр» (Луԛа 15:17-20). Йаһоԝа мина ви баве һʹәзкьри йә. Гава кәсед кӧ бона чәтьнайи у гӧнед хԝә бәр хԝә дькʹәвьн у дьлтәнг ьн ԝирʹа дӧа дькьн, әԝ дькʹәвә һʹәйра ԝан, чьмки әԝ йәки мьлук ә (Луринед Йерәмйа 3:19, 20). Дьле ԝи сәр ԝан дьшәԝьтә, әԝ ча бежи бь ләз дьчә пешийа ԝан, ԝәки дьле ԝан рʹьһʹәт кә у нишани ԝан кә, кӧ әԝ ԝана һʹәз дькә (Ишайа 57:15). Гәло Йаһоԝа ча бь ләз те пешийа мә? Гәләк щара, әԝ ве йәке бь сайа рʹуспийед щьвате, мәрьвед мәйә баԝәрмәнд у хушк-бьред дьн дькә (Аԛуб 5:14, 15). Йаһоԝа бь ви щурʹәйи али мә дькә, чьмки дьхԝазә ԝәки әм һәләԛәтийа незик тʹәви ԝи хԝәй кьн.

4. Иса йәки чаԝа йә?

⁴ Иса чʹәʹв дьда Баве хԝә. Мина Йаһоԝа Хԝәде, Иса Мәсиһ жи йәки мьлук ә. Ләма жи гава әԝ сәр әʹрде дьжит, мәрьва бь рʹьһʹәти дькарьбу незики ԝи бьн у пьрса бьдьнә ԝи (Маркос 4:10, 11). Гава әԝи жь мәрьва дьпьрси, һәла әԝана сәр пьрсәки чь дьфькьрьн, ԝана ньһерʹандьна хԝә бь азайи дьгот (Мәтта 16:13-16). У гава ԝана шаши дькьр, әԝана нәдьтьрсийан, чьмки заньбун ԝәки Иса йәки ԛәнщ, дьлрʹәʹм у бь сәбьр ә (Мәтта 17:24-27). Әв йәк кӧ Иса бь тʹәмами чʹәʹв дьда һʹӧнӧред Баве хԝә, али шагьртед ԝи дькьр ԝәки дьһа баш Йаһоԝа нас кьн (Йуһʹәнна 14:9). Ԝи ԝәʹдәйи сәрокед религи мәрьвнә сәрт, ԛӧрʹә у бетʹалаш бун. Ле шагьртед Иса сәр һʹиме мәсәла Иса дитьн, ԝәки Йаһоԝа йәки ӧса нинә. Әԝ йәки мьлук ә у һазьр ә гӧһ бьдә мәрьва.

5. Сәва кӧ мәрьвед дьн һеса бькарьбьн незики мә бьн, чьма фәрз ә ԝәки әм мьлук бьн?

⁵ Әм ча дькарьн чʹәʹв бьдьнә Йаһоԝа? Һәрге әм мьлуктийе нав хԝәда пешда биньн, мәрьварʹа ԝе һеса бә незики мә бьн. Мьлукти ԝе али мә бькә, ԝәки әм нә кӧ чʹәʹвнәбар, ԛӧрʹә у кʹин бьн, ле ԝәки ԛәнщ, бь сәбьр у әʹфукʹар бьн. Ԝи чахи мәрьвед дьн ԝе бьхԝазьн незики мә бьн (Колоси 3:12-14). Илаһи фәрз ә, ԝәки рʹуспи мьлук бьн кӧ хушк-бьрарʹа һеса бә незики ԝан бьн у дьле хԝә ԝанрʹа вәкьн. Бона ве йәке һәмьки лазьм ә, ԝәки әԝана ԝәʹдә тʹәви хушк-бьра дәрбаз кьн. Һәрге мәщала ԝан һәйә, ԝе баш бә ԝәки әԝана нә кӧ бь видеоконференсийайе тʹәви щьвате текли бьн, ле һәрʹьн щьвате ԝәки рʹу бь рʹу хушк-бьра бьвиньн. Ӧса жи, чьԛас жь дәсте ԝан те, әԝана гәрәке тʹәви хушк-бьра мал бь мал хьзмәт кьн. Чьԛас баш әԝана рʹуспийа нас бькьн, һаԛас ԝанрʹа ԝе һеса бә дьле хԝә рʹуспийарʹа вәкьн.

ЙАҺОԜА ЙӘКИ БӘРБЬҺЕР Ә

6-7. Йаһоԝа ча һазьр бу сафикьрьнед хԝә ль гора хԝәстьна хьзмәткʹаред хԝә бьгӧһезә?

⁶ Мәрьвед бабах гәләк щара дьфькьрьн кӧ ньһерʹандьна ԝан, ньһерʹандьна һәри рʹаст ә, ләма жи нахԝазьн сафикьрьна хԝә бьгӧһезьн. Ле Йаһоԝа, йе кӧ бь рʹасти һәр тьшти занә, йәки ӧса нинә. Әԝ йәки мьлук ә, ләма жи әԝ һазьр ә сафикьрьнед хԝә бьгӧһезә. Мәсәлә, сәрһатийа Мәрйәме бьдә бәр чʹәʹве хԝә. Тʹәви бьре хԝә Һарун, әԝ мьԛабьли бьре хԝә Муса дәркʹәт, йе кӧ ԝәкʹиле Йаһоԝа бу. Бь ве йәке Мәрйәм бь рʹасти мьԛабьли Йаһоԝа дәркʹәт у беԛәдьри һьндава ԝида да кʹьфше. Ләма жи Йаһоԝа сәр ԝе һерс кʹәт у бь нәхԝәшийа кʹотибуне ле щәза кьр. Ле гава Һарун лавайа Муса кьр, кӧ али ԝе бькә, у Муса рʹәща Йаһоԝа кьр, ԝәки әԝ ле ԛәнщ кә, Йаһоԝа чь кьр? Кәсе бабах ԝе сафикьрьна хԝә нәгӧһаста. Ле Йаһоԝа йәки мьлук ә, ләма жи әԝи хԝәстьна ԝан ԛәбул кьр у Мәрйәм ԛәнщ кьр (Жьмар 12:1-15).

⁷ Йаһоԝа һьндава Һьзԛийа Пʹадша жи мьлукти да кʹьфше. Гава пʹадша гьран нәхԝәш кʹәт, Йаһоԝа бь сайа Ишайа пʹехәмбәр ԝирʹа гот, ԝәки ԝәхтәкә незикда әԝе бьмьрә. Һьзԛийа бь һесьра жь Йаһоԝа рʹәща кьр, ԝәки әԝ ԝи ԛәнщ кә. Йаһоԝа бь дьлрʹәʹми әʹмьре ԝи сәр 15 сала зедә кьр (2 Пʹадшати 20:1, 5, 6). Бәле, Йаһоԝа йәки мьлук ә, ләма жи әԝ һьм дьлрʹәʹм ә, һьм жи һазьр ә гӧһ бьдә мәрьва.

8. Әм жь кʹӧ заньн ԝәки Иса йәки бәрбьһер ә? (Маркос 3:1-6)

⁸ Иса чʹәʹв дьда Баве хԝә. Гава Иса сәр әʹрде бу, әԝ йәки бәрбьһер бу, у чь жь дәсте ԝи дьһат дькьр ԝәки али мәрьва бькә. Мәсәлә, рʹаст ә әв йәк сәрԝеред религи хԝәш нәдьһат, ле диса жи әԝи рʹожа Шәмийе мәрьвед нәхԝәш ԛәнщ дькьр (Бьхунә Маркос 3:1-6). Иро жи Иса бь бәрбьһерийе рʹебәрийа щьвате дькә. Мәсәлә, әԝ ԝан кәсед кӧ гӧнед гьран дькьн сәбьр дькә у мәщале дьдә ԝан, ԝәки хԝә рʹаст кьн (Әʹйанти 2:2-5).

9. Әм ча дькарьн бәрбьһерийе бьдьнә кʹьфше? (Бьньһерʹә ӧса жи шькьл.)

⁹ Әм ча дькарьн чʹәʹв бьдьнә Йаһоԝа? Әм гәрәке бь мьлукти сәр хԝә бьхәбьтьн, ԝәки фькьр у кьред мәда бәрбьһери бе кʹьфше (Аԛуб 3:17). Мәсәлә, де-бавед бәрбьһер тьштед ӧса жь зарʹед хԝә дәʹԝа накьн, чь кӧ жь ԛәԝата ԝан дәр ә. Ве йәкеда Аԛуб мәсәләкә баш һишт, чьмки әԝи ԛәԝата зарʹед хԝә һьлдьда һʹәсаб (Дәстпебун 33:12-12). Ӧса жи де-бавед мьлук у бәрбьһер зарʹа бәрамбәри һәв накьн. Рʹуспийед щьвате жи гәрәке бәрбьһер бьн. Мәсәлә, гава кʹома рʹуспийада тьштәк те сафикьрьне, рʹуспики бәрбьһер ԝе тʹьме сәр йа хԝә нәсәкьнә, ле һазьр бә кӧ пьштгьрийа фькьред пʹьрʹанийе бькә, һәмьки тʹәне һәрге фькьред ԝан мьԛабьли принсипед Кʹьтеба Пироз нибьн (1 Тимотʹейо 3:2, 3). Хенщи ве йәке, һәрге ньһерʹандьна мә щарна жь ньһерʹандьна кәсед дьн щӧдә бә жи, әм гьшк дькарьн ԛәԝате бьдьнә хәбате, ԝәки ньһерʹандьна кәсед дьн фәʹм бькьн (Рʹомайи 14:1). Бәле, ԝәрә әм гьшк хирәт бькьн кӧ бәрбьһерийа мә ‹һәр кәсирʹа әшкәрә бә› (Филипи 4:5).

ЙАҺОԜА ЙӘКИ БЬ СӘБЬР Ә

10. Йаһоԝа сәбьра хԝә ча нишан кьрийә?

¹⁰ Мәрьвед ԛӧрʹә һʹәз накьн һивийа кәсәки бьсәкьньн. Жь бо бабахийа ԝан сәбьра ԝан тʹӧнә йә. Йаһоԝа йәки ӧса нинә. Әʹйанкьрьна сәбьреда әԝ мәсәләкә лапи баш ә. Мәсәлә, рʹожед Нӧһда әԝи гот ԝәки әԝе 120 сали һивийе бьсәкьнә, һʹәта кӧ ԛьрʹа кәсед хьраб бинә (Дәстпебун 6:3). Ләма жи епʹещә ԝәʹде Нӧһ һәбу, ԝәки зарʹед хԝә мәзьн кә у гәмийе бь аликʹарийа малбәта хԝә ава кә. Паше, гава Бьраһим дәрһәԛа кʹӧтакьрьна Содом у Гоморайе тʹәви мәләке Йаһоԝа хәбәр дьда, мәләк бь сәбьр гӧһ да пьрсед ԝи. Кәсе ԛӧрʹә дьԛәԝьмә бьгота: «Гәло тӧ дьфькьри әз ньзаньм кӧ гәрәке чь бькьм?» Ле мина Йаһоԝа, әԝ мәләк һьндава Бьраһим сәбьр да кʹьфше (Дәстпебун 18:20-33).

11. Ль гора 2 Пәтрус 3:9, Йаһоԝа чьма сәбьр дькә?

¹¹ Йаһоԝа Хԝәде бь мьлукти сәбьр дькә һʹәта рʹожа кӧ әԝи бьжартийә, ԝәки ве дьнйа хьраб кʹӧта кә. Гәло чьма? Чьмки әԝ «дьхԝазә гьшк жи тʹобә кьн» (Бьхунә 2 Пәтрус 3:9). Бь сайа сәбьра Йаһоԝа бь милйона мәрьвед дьлпʹак бунә достед ԝи, у әм гӧман ьн ԝәки диса бь милйона мәрьвед дьн жи ԝе ԝи нас кьн у бьбьнә достед ԝи. Диса жи синоре сәбьра Йаһоԝа һәйә. Әԝ мәрьва һʹәз дькә, ле чʹәʹве хԝә сәр хьрабийе нагьрә, у әԝе нәһелә ԝәки хьраби һʹәта-һʹәтайе һәбә (Һәбаԛуԛ 2:3).

12. Иса ча чʹәʹв дьдә сәбьра Йаһоԝа?

¹² Иса чʹәʹв дьда Баве хԝә. Бь һʹәзара сала Иса чʹәʹв дьдә сәбьра Йаһоԝа. Әԝи дит кӧ Мире-щьна ча һьм наве Йаһоԝа, һьм жи наве мәрьвед амьн рʹәш кьр (Дәстпебун 3:4, 5; Ибо 1:11; Әʹйанти 12:10). Ӧса жи бәр чʹәʹве Иса гәләк тьштед хьраб һатьнә сәре мәрьва. Бьдә бәр чʹәʹве хԝә, кӧ әԝ чьԛас дьхԝазә «кьред Мире-щьна хьраб кә»! (1 Йуһʹәнна 3:8) Гәло чь али Иса дькә, ԝәки бь сәбьр һивийе бә, һʹәта кӧ Йаһоԝа шьхӧлед Мире-щьна кʹӧта кә? Мәʹник әв ә, кӧ әԝ йәки мьлук ә. Әԝ занә кӧ тʹәне Йаһоԝа сафи дькә, кӧ кʹәнге ԛьрара хԝә бинә сери (Кʹаред Шандийа 1:7).

13. Иса ча у чьма һьндава шандийед хԝә сәбьр дьда кʹьфше?

¹³ Гава Иса сәр әʹрде бу, әԝи һьндава шандийед хԝә жи сәбьр дьда кʹьфше. Мәсәлә, әԝана диса у диса бона ве йәке дькʹәтьнә дәʹԝе, кӧ нав ԝанда йе һәри мәзьн кʹи йә. Ле диса жи Иса гӧмана хԝә ԝан нәдьбьрʹи, ле әԝи тʹьме сәбьр дькьр (Луԛа 9:46; 22:24-27). Әԝ баԝәр бу кӧ ԝәʹдә шунда әԝана ԝе хԝә рʹаст кьн. Һәрге тӧ жи щарна шашики чәнд щара дьки, гәло тӧ рʹази нини кӧ Пʹадше тә ӧса мьлук у бь сәбьр ә?

14. Әм ча дькарьн сәбьра хԝә зедә кьн?

¹⁴ Әм ча дькарьн чʹәʹв бьдьнә Йаһоԝа? Сәва кӧ әм фькьрандьн у рʹабун-рʹуньштьна хԝәда чʹәʹв бьдьнә Йаһоԝа, әм гәрәке һин бьн кӧ ‹мина Мәсиһ бьфькьрьн› (1 Корьнтʹи 2:16). Гәло әм ча дькарьн фькьред Иса дьһа баш фәʹм кьн? Методәкә лапә баш әв ә, кӧ Кʹьтеба Пирозда дәрһәԛа жийина Иса бьхуньн. Паше әм гәрәке ԝәʹдә бьвиньн, ԝәки дәрһәԛа кьред ԝи кʹур бьфькьрьн у пебьһʹәсьн кӧ әԝи чьма ӧса дькьр. Ӧса жи әм гәрәке жь Йаһоԝа аликʹарийе бьхԝазьн, ԝәки мина Иса мьлук у бь сәбьр бьн. Әм чьԛас һин бьн кӧ мина Иса бьфькьрьн, әме һаԛас дьһа баш бькарьбьн чʹәʹв бьдьнә Йаһоԝа у сәбьр бьдьнә кʹьфше һьм һьндава хушк-бьрада, һьм жи һьндава хԝәда (Мәтта 18:26-30, 35).

ЙАҺОԜА ДИНА ХԜӘ ДЬДӘ МӘРЬВЕД МЬЛУК

15. Йаһоԝа һьндава мәрьвед мьлук чаԝа нә? (Зәбур 138:6)

¹⁵ Бьхунә Зәбур 138:6. Ԛәдьрәки чьԛас мәзьн ә кӧ Йаһоԝа, Хԝәдайе Һәри Жорьн, йе кӧ әʹрд у әʹзман әʹфьрандийә, мәрьвед мьлук ԛимәт дькә! Ԝәрә әм дина хԝә бьдьнә мәсәла чәнд жь ԝан мәрьва. Дьбәкә әм һьнәка жь ԝан рʹьнд нас накьн, ле Йаһоԝа навед ԝан Кʹьтеба Пирозда данә ньвисаре. Мәсәлә, жь бина бәр Хԝәде, Муса бәʹса кʹӧлфәтәкә бь наве Дьвора кьр, йа кӧ ԝәкә 125 сал бь амьни мала Исһаԛ у Аԛубда хьзмәт дькьр. Әм дәрһәԛа ве кʹӧлфәта амьн гәләк тьшт ньзаньн, ле Кʹьтеба Пироз нишан дькә, кӧ ԝана чьԛас әԝ кʹӧлфәт һʹәз дькьр (Дәстпебун 24:59; 35:8). Чәнд ԛьрʹнә шунда, Йаһоԝа шьванәки щаһьл бь наве Даԝьд бьжарт, йе кӧ гәрәке бьбуйа пʹадше мьләте Исраел (2 Самуйел 22:1, 36). Паши буйина Иса, Хԝәде бь сайа мәләка чәнд шьванед мьлукрʹа ԛәдьр да кʹьфше бь ве йәке кӧ пешийе ԝанрʹа гот, ԝәки Бәйтләһʹмеда Мәсиһ һатийә буйине (Луԛа 2:8-11). Ӧса жи, гава Усьв у Мәрйәм Исайе бьчʹук анин пʹарьстгәһе, Йаһоԝа мәщал да Шимәйон у Һанайе, йед кӧ әʹмьрда мәзьн бун, ԝәки әԝана Кӧрʹе Ԝи бьвиньн (Луԛа 2:25-30, 36-38). Рʹаст ә Хԝәде бьльнд ә, ле әԝ мьлука дьвинә!

16. Иса ча чʹәʹв дьда Йаһоԝа ве йәкеда, кӧ һьндава мәрьвада чаԝа бу?

¹⁶ Иса чʹәʹв дьда Баве хԝә. Мина Йаһоԝа, Иса жи мәрьвед мьлук һʹәз дькьр. Мәсәлә, әԝи кәсед «нәхԝәнди у нәзан» дәрһәԛа Пʹадшатийа Хԝәде һин дькьрьн (Кʹаред Шандийа 4:13; Мәтта 11:25). Ӧса жи әԝи мәрьвед нәхԝәш нә тʹәне ԛәнщ дькьрьн, ле дьда кʹьфше, кӧ ԛәдьре ԝан дьгьрә (Луԛа 5:13). Шәва пешийа мьрьна хԝә, Иса мина хӧламәки ньгед шандийед хԝә шуштьн (Йуһʹәнна 13:5). У пешийа кӧ әԝ һьлкʹьшийа сәр әʹзмана, әԝи һʹәму шагьртед хԝәйә мьлукрʹа ԛәдьр да кʹьфше бь ве йәке, кӧ шьхӧле лапи фәрз да ԝан, демәк ԝәки әԝана али мәрьва бькьн әʹмьре һʹәта-һʹәтайе бьстиньн (Мәтта 28:19, 20).

17. Әм ча дькарьн ԛәдьре кәсед дьн бьгьрьн? (Бьньһерʹә ӧса жи шькьл.)

¹⁷ Әм ча дькарьн чʹәʹв бьдьнә Йаһоԝа? Фьрԛи тʹӧнә мәрьв жь кʹижан мьләт, култур у раса нә у хԝәнди нә йан на, әм һьндава һʹәмуйада һʹәзкьрьн у ԛәдьр дьдьнә кʹьфше, гава мьзгинийа хере ԝанрʹа гьли дькьн. У фәрәсәт йан щабдарийед мә чь бьн жи, әм диса жи хушк-бьра сәр хԝәрʹа һʹәсаб дькьн (Филипи 2:3). Һәрге әм бь мьлукти «гава пешьн бавежьн» кӧ һәр алийада ԛәдьре мәрьва бьгьрьн, Йаһоԝа ԝе жь мә рʹази бә (Рʹомайи 12:10; Сефанйа 3:12).

18. Тӧ чьма дьхԝази чʹәʹв бьди мьлуктийа Йаһоԝа?

¹⁸ Һәрге әм чь жь дәсте мә те дькьн, ԝәки чʹәʹв бьдьнә мьлуктийа Баве хԝәйи дьлован, әме һе зедә бәрбьһер у бь сәбьр бьн у һазьр бьн гӧһ бьдьнә мәрьва. Ӧса жи мина Йаһоԝа, әме ԛәдьре кәсед дьн бьгьрьн. Ԝәрә чьԛас ԛәԝата мә дьгьһиже әм һәр тьшти бькьн, ԝәки дьһа незики Хԝәдайе хԝәйи мьлук бьн. У бир нәкьн, чахе әм ӧса дькьн, әԝ мә дьһа зедә һʹәз дькә у ԛимәт дькә! (Ишайа 43:4)