Шәʹдед Йаһоԝа Һьндава Кәсед кӧ Бәре Религийа Ԝанда Бун, Чаԝа ньн?

Әм хирәт дькьн ԝәки һьндава һәр кәси бь һʹәзкьрьн, бь ԛәдьр, у һʹәйф бьн. Һәрге Шәʹдәки Йаһоԝа рʹӧһʹанида сьст буйә йан хьзмәтийа хԝә дайә сәкьнандьне, әм һәр тьшти дькьн ԝәки али ԝи бькьн, әм ԝи дьдьнә баԝәркьрьне ԝәки ԝи һʹәз дькьн, у әм али ԝи дькьн кӧ әԝ рʹӧһʹанида диса тʹәзәда пешда һәрʹә (Луԛа 15:4-7).

Һьнә дәрәщада кьред Шәʹде Йаһоԝа дьбә мәʹни, кӧ әԝ жь щьвате те дәрхьстьне (1 Корьнтʹи 5:13). Ле чьмки әм һәвал-баԝәрмәндед хԝә гәләк һʹәз дькьн, әм пешда али ԝи кәси дькьн, ԝәки әԝ жь щьвате нәйе дәрхьстьне. У һәрге әԝ бе дәрхьстьне жи, әм диса жи һʹәзкьрьн у ԛәдьр һьндава ԝида дьдьнә кʹьфше, чаԝа кӧ Кʹьтеба Пироз тʹәмийе дьдә мә (Маркос 12:31; 1 Пәтрус 2:17).

Чь дькарә бьбә мәʹни кӧ мәрьв жь щьвате бе дәрхьстьне?

Кʹьтеба Пироз зәлал нишан дькә кӧ һәрге Мәсиһи гӧнәки гьран дькә у нахԝазә бе гӧһастьне, гәрәке ԝи жь щьвате дәрхьн (1 Корьнтʹи 5:11-13). Кʹьтеба Пироз әшкәрә дькә кӧ кʹижан гӧнә дькарьн мәрьв бәрбь ве йәке бьвьн кӧ жь щьвате бе дәрхьстьне. Мәсәлә, әԝ һәйә зьнекʹари, ԛави, сәрхԝәши, меркӧжи, у дьзикьрьн (1 Корьнтʹи 6:9, 10; Галати 5:19-21; 1 Тимотʹейо 1:9, 10).

Ле диса жи, әм кәсәки бона гӧне гьран жь щьвате дәрберʹа дәрнахьн. Рʹуспийедa щьвате пешийе али ԝи кәси дькьн ԝәки әԝ тʹәрка кьред хԝә бьдә (Рʹомайи 2:4). У әԝана дьхԝазьн бь нәрми, бь һʹәзкьрьн у бь ԛәдьр дьле ԝи бькʹьрʹьн (Галати 6:1). Әв йәк дькарә али ԝи бькә, кӧ әԝ шашийа хԝә фәʹм кә у тобә кә (2 Тимотʹейо 2:24-26). Ле һәрге әԝ нахԝазә бе гӧһастьне, у бәрдәԝам дькә мьԛабьли принсипед Кʹьтеба Пироз һәрʹә у тобә накә, ви чахи әԝ гәрәке жь щьвате бе дәрхьстьне. У рʹуспийед щьвате әʹлам дькьн ԝәки әԝ кәс ида Шәʹде Йаһоԝа нинә.

Ле кʹара ве йәке чь йә, ԝәки мәрьве кӧ бәрдәԝам дькә гӧнә бькә, жь щьвате те дәрхьстьне? Йа пешьн, щьватеда принсипед Хԝәдейә нав-намусийе тенә хԝәйкьрьне у щьват жь һʹӧкӧме хьраб йе ԝи мәрьви те пʹарастьне (1 Корьнтʹи 5:6; 15:33; 1 Пәтрус 1:16). У йа дӧда, әԝ йәк дькарә али ԝи мәрьви бькә, кӧ гӧнәкьрьне бьтʹәрькинә, у бьхԝазә бе гӧһастьне (Ибрани 12:11).

Шәʹдед Йаһоԝа һьндава кәсед кӧ жь щьвате һатьнә дәрхьстьне, чаԝа ньн?

Кʹьтеба Пироз дьбежә ԝәки һәләԛәтийа Мәсиһи гәрәке тʹәви ԝи кәси тʹӧнә бә йе кӧ жь щьвате һатийә дәрхьстьне, у дьбежә «тʹәви кәсе ӧса хԝарьне жи нәхԝьн» (1 Корьнтʹи 5:11). Демәк әм тʹәви ԝан ԝәʹдә дәрбаз накьн. Ле йәкә әԝ найе һʹәсабе кӧ әм пьшта хԝә дьдьнә ԝан, әм бь ԛәдьр ьн һьндава ԝанда. Әм ша дьбьн гава әԝана тенә сәр щьвинед мә, у әм дькарьн ԝана сьлав кьн.b У һьм жи әԝана дькарьн жь рʹуспийа аликʹарийа рʹӧһʹани бьхԝазьн.

Ле ча нә һʹале ԝи кәси, йе кӧ жь щьвате һатийә дәрхьстьне, ле һәвалзәԝаще ԝи у зарʹед ԝи Шәʹдед Йаһоԝа нә? Рʹаст ә һәләԛәтийа ԝан тʹәви ԝи һьндава религийайе те гӧһастьне, ле һәләԛәтийа ԝан чаԝа нәфәред мале диса жи дьминә. Әԝана кӧ маләкеда дьжин, һәләԛәтийа ԝанә нормал у бь һʹәзкьрьн диса жи бәрдәԝам дьбә.

Кәсе кӧ жь щьвате һатийә дәрхьстьне дькарә жь рʹуспийа һиви кә кӧ әԝана сәрледана ԝи бькьн. Әԝана сәр һʹиме Кʹьтеба Пироз дькарьн бь һʹәзкьрьн у нәрми ԝи ширәт кьн у һелан кьн кӧ әԝ тʹобә кә у вәгәрʹә щәм Хԝәде (Зәкәрйа 1:3). Һәрге әԝ кьред хԝә бьтʹәрькинә у бь дьл бьхԝазә диса пе ԛанун у принсипед Кʹьтеба Пироз бьжи, әԝе диса жи бькарьбә бьбә әндәме щьвате. Щьватеда жи ԝе «бьбахшиньнә ԝи у ль бәр дьле ԝида бен», чаԝа кӧ Мәсиһийед Корьнтʹеда кьрьн, гава йе гӧнәкʹар гӧне хԝә ани рʹуйе хԝә у тʹобә кьр (2 Корьнтʹи 2:6-8).

Әԝед кӧ һатьбунә дәрхьстьне чь тʹәхмин кьрьнә гава вәгәрʹийанә?

Дина хԝә бьдьне кӧ Шәʹдед Йаһоԝа йед кӧ бәре жь щьвате һатьбунә дәрхьстьнә, ле паше вәгәрʹийанә щәм Хԝәде, чь дьбежьн.

«Гава мьн сафи кьр вәгәрʹьмә щьвате, мьн тʹьре рʹуспи ԝе һур бь һур мьн бьпьрсьн һәла ԝан дәһа салада чахе әз щьватеда нибум, мьн чь кьрийә. Ле ӧса нибу. Дәԝсе ԝана тʹәне мьнрʹа гот: ‘Әм дьхԝазьн тӧ пешда һәрʹи, дина хԝә бьдә сәр ве йәке’. Паши ве йәке дьле мьн ӧса рʹьһʹәт бу»—Мариа, Дәԝләтед Йәкбуйи.

«Щьват һʹьзрәта мьн бу кӧ әз вәгәрʹьм. Мьн тʹәхмин кьр кӧ әз ԛимәт ьм. Хушк-бьред мьнә рʹӧһʹани али мьн кьрьн, ԝәки әз тʹәхмин кьм кӧ Хԝәде бахшандийә мьн у дьхԝазә әз пешда һәрʹьм. Рʹуспи тʹьме кʹеләка мьн бун у али мьн дькьрьн, ԝәки әз рʹӧһʹанида ԛәнщ бьм. Ԝана дьлбини дьда мьн у али мьн кьрьн кӧ әз баԝәр кьм, ԝәки Йаһоԝа ньһа жи мьн ԛимәт дькә у һʹәз дькә»—Малком, Сиерра-Леоне.

«Әз ша мә кӧ Йаһоԝа щьмәʹта хԝә ӧса һʹәз дькә кӧ тʹәшкиләта хԝә тʹәмьз хԝәй дькә. Чь жи бона кәсед жь щьвате дәр сәрт те кʹьфше, бь рʹасти гәләк фәрз ә у нишана һʹәзкьрьне йә. Әз гәләк жь Баве хԝәйи әʹзмана рʹази мә кӧ әԝ һаԛас Хԝәдайе дьлован у афукʹар ә»—Сенди, Дәԝләтед Йәкбуйи.