Иса Тʹьме Гӧһдар бу

Һеса йә һәр гав гӧрʹа де-баве хԝә бьки?— Щарна һеса нинә. Ле ча тӧ дьфькьри, Иса гӧрʹа кʹе дькьр?—Әԝи гӧрʹа Йаһоԝа у де-баве хԝә дькьр. Мәсәлә, Иса дькарә али тә бькә, ԝәки тӧ һәла һе һьнге жи гӧрʹа де-баве хԝә бьки, чахе әв йәк һеса нинә. Ԝәре әм һе зедә дәрһәԛа ве йәке пебьһʹәсьн.

Һʹәта кӧ Иса сәр әʹрде бьһата буйине, әԝ тʹәви Баве хԝә Йаһоԝа, ль әʹзмана бу. Ле сәр әʹрде жи де-баве ԝи һәбун. Навед ԝан Усьв у Мәрйәм бу. Ле тӧ зани әԝана чаԝа бунә де-баве Иса?—

Йаһоԝа әʹмьре Иса жь әʹзмана һьлда у дәрбази зьке Мәрйәме кьр. Ӧса Иса сәр әʹрде һатә буйине. Әв йәк кʹәрәмәт бу! Чаԝа кӧ зарʹ зьке дийа хԝәда мәзьн дьбьн, ӧса жи Иса зьке Мәрйәмда мәзьн дьбу. Нәһ мәһ дәрбаз бун, у Иса һатә буйине. Ӧса Мәрйәме у Усьв бунә де-баве Иса.

Чахе Иса 12 сали бу, әԝи тьштәки ӧса кьр, йа кӧ да кʹьфше, ԝәки әԝ гәләк Баве хԝә Йаһоԝа һʹәз дькә. Әв йәк ԛәԝьми ԝи чахи, гава Иса у малбәта ԝи рʹе кʹәтьн, сәва кӧ һәрʹьн Оршәлиме. Әԝана дьчунә Оршәлиме сәва кӧ ль ԝьр Йаһоԝа бьһʹәбиньн. Ле чахе әԝана вәдьгәрʹийанә мале, Усьв у Мәрйәме тʹӧ щики нькарьбун Иса бьдитана. Зани Иса кʹидәре бу?—

Усьв у Мәрйәм гәләк ләз дькʹәтьн чахе жь Оршәлиме вәдьгәрʹийанә мал. У чахе Иса ӧнда кьрьн, дәстпекьрьн һʹәму щийа ԝи бьгәрʹьн. Әԝана гәләк бәр хԝә дькʹәтьн, чьмки нькарьбун әԝ бьдитана. Ле се рʹож шунда, ԝана Иса пʹарьстгәһеда дит! Ча тӧ дьфькьри, Иса чьрʹа пʹарьстгәһеда бу?— Чьмки ԝедәре әԝи дькарьбу һе зедә дәрһәԛа Баве хԝә Йаһоԝа пебьһʹәсийа. Иса гәләк Йаһоԝа һʹәз дькьр у дьхԝәст пебьһʹәсийа кӧ ча дькарьбу дьле ԝи ша кьра. Һәла һе чахе Иса мәзьн бу жи, әԝи һәр гав гӧрʹа Йаһоԝа дькьр. Исарʹа тʹьме һеса нибу гӧрʹа Баве хԝә бькә, ле йәкә әԝ гӧрʹа ԝида бу. Һәла һе һьнге жи әԝ гӧһдар бу, гава гәрәке бьчәрчьрийа. Ле Иса гӧрʹа Усьв у Мәрйәме жи дькьр?— Бәле. Кʹьтеба Пирозда ньвисар ә, ԝәки Иса гӧрʹа ԝан жи дькьр.

Тӧ жь мәсәла Иса чь дькари һин би?— Тӧ гәрәке гӧрʹа де-баве хԝә бьки, һәла һе һьнге жи чахе тәрʹа һеса нинә. Тӧйе гӧрʹа де-баве хԝә бьки?—