Hûn Çi Dikarin Bikin wekî Dinya Tezeda Bijîn

Ji gotarên pêşiya vê em pêhesiyan, wekî zûtirekê Xwedê wê qira însaneta neguhdar û bêrem bîne. Usa jî hemû çetinayî wê bêne hildanê. Gelo çira em dikarin dudilî nebin, wekî ev hemû tişt wê ese bêne sêrî? Çimkî Xebera Xwedê, dêmek Kitêba Pîroz evê yekê soz dide:

“Dinyayê jî derbaz be” (1 YÛHENNA 2:17).

Bêşik wê hebin merivên usa, yên ku wê xilaz bin, çimkî Kitêba Pîroz soz dide:

“Ewê ku emirê Xwedê diqedîne wê heta-hetayê bimîne”.

Ça tê kifşê meriv dikarin xilaz bin, hergê qirara Xwedê biqedînin. Seva ku qirara Xwedê pêbihesin, ya pêşin lazim e wî nas bikin.

XWEDÊ “NAS KIN” WEKÎ XILAZ BIN

Îsa got: “Ev e jiyîna heta-hetayê, wekî ew te nas kin, çawa Xwedêyê rastî bêşirîkî-bêheval” (Yûhenna 17:3). Seva ku em wedê kutakirina vê dinya zulm xilaz bin, lazim e Xwedê nas bikin. Ev yek tê hesabê ne ku tenê bizanibin ku Xwedê heye yan jî hine îzbatkirina derheqa wî bizanibin, lê diha zef tişt. Em gerekê bibine dostên wî. Hergê em dixwazin hevaltiya me tevî kesekî qewî be, lazim e bona hevalê xwe wede veqetînin. Hema bi wî cûreyî emê bikaribin bibine dostên Xwedê. Dîna xwe bidine hine rastiyên sereke ji Kitêba Pîroz, yên ku wê alî me bikin bibine dostên Xwedê û dostiya xwe tevî wî qewî kin.

HER ROJ XEBERA XWEDÊ, DÊMEK KITÊBA PÎROZ, BIXÛNE

Em her roj xwarinê dixwin, seva ku bijîn. Lê Îsa got: “Însan tenê bi nên najî, lê bi her xebera ku ji devê Xwedê derdikeve” (Metta 4:4).

Îro em xeberên Yehowa ser rûpêlên Kitêba Pîroz dixûnin. Çiqas zêde tu vê kitêba buhurtî lêkolîn bikî, haqas zêde tuyê pêbihesî derheqa heleqetiya însanetê tevî Xwedê wedê berê, niha û axiriyê.

GAZÎ XWEDÊ BIKE, SEVA KU ALÎKARIYÊ BISTÎNÎ

Hergê tu dixwazî qirara Xwedê biqedînî lê tera zor e terka wan tişta bidî, çi ku Xwedê nefret dike, wî çaxî tu çi dikarî bikî? Hergê tu rind Xwedê nas bikî, ev yek wê bi cûrê mexsûs alî te bike.

Werên em dîna xwe bidine mesela kulfetekê, em wê nav kin Sakûra, ya ku bi emirekî bênamûs dijît. Çaxê ewê hînbûna Kitêba Pîroz destpêkir, ew pêhesiya, wekî Xwedê dibêje: “Ji qaviyê birevin!” (1 Korintî 6:18). Sakûrayê ji Xwedê lava dikir, wekî qewatê bidê ku terka kirên xweye xirab bide. Lê dîsa jî jêra lazim bû ku tevî hestên xwe şer bike û cêribandinada qewî bisekine. Ew dibêje: “Çaxê fikirên xirab dihatine hişê min, min bi helalî dilê xwe Yehowara vedikir. Min zanibû, wekî bi qewata xwe ezê nikaribim serkevim. Min qewata duakirinê ser xwe texmîn kir û ewê yekê min diha nêzîkî Yehowa kir”. Mîna Sakûrayê bi mîlyona meriv destpêdikin Xwedê nas bikin. Xwedê qewatê dide wan, seva ku emirê xweda guhastina bikin û usa bijîn çawa ku wî xweş tê (Fîlîpî 4:13).

Çiqas zêde hûn Xwedê nas bikin haqas nêzîk Xwedê jî wê we nas bike û hûnê bibine dostên wîye delal (Galatî 4:9; Zebûr 25:14). Wî çaxî hûnê bikaribin xilaz bin û dinya tezeda, ku Xwedê soz dide, herheyî bijîn. Lê dinya teze wê çi cûreyî be? Gotara dinda emê caba wê pirsê bistînin.