Kitêba Pîroz Çi Dibêje Derheqa Krîzîsa Avê Nav Temamiya Dinyayêda?
Her kes ji me hewcê ava temiz e. Antonyo Gutêrrês, Sêkrêtarê Sereke yê Miletên Yekbûyî, usa dibêje: “Nav temamiya dinyayêda meriv hê zêde û zêde hewcê ava temiz dibin û ev yek dide kifşê ku emê rastî krîzîsa avê bên”. Bi mîlyarda meriva cûre-cûre welatada îda nikarin ava bona vexwarinê destxin.
Strdel/AFP via Getty Images
Gelo wedekî usa wê bê, ku ava temiz têra her kesî bike? Yan jî emê timê hewcê avê bin? Kitêba Pîroz çi dibêje?
Kitêba Pîroz soz dide wekî ava temiz wê têr-tije hebe
Kitêba Pîrozda tê gotinê, wekî rojekê problêma kêmasiya avê wê bê safîkirinê. Dewsê, ava temiz wê têr-tije be.
“Wê li beriyê av bizê û li çol û deştê çem rabin. Wê quma sincirî bibe gol, axa tî jî bibe kaniyên avê” (Îşaya 35:6, 7, ÎM).
Çima em dikarin baweriya xwe vê soza Kitêba Pîroz bînin? Bifikirin ku Kitêba Pîroz çi dibêje derheqa wê yekê, ku planêta me ça hatiye çêkirinê.
Kitêba Pîrozda çi tê gotinê derheqa erdê û ziviroka avê
“Ew Xwedê ye!–Yê ku erdê çêkiriye . . . û vikîvala neafirandiye şikil dayê ku li ser were rûniştin [jîyîn hebe]” (Îşaya 45:18, ÎM).
Xwedê erd usa çêkiriye ku li ser wê emir hebe, lema jî ewî sîstêmên tebiyetê usa çêkir, ku ew dikarin têr-tije ava temiz pêşda bînin.
“[Xwedê] dilopên avê bi jorva dikişîne û dilopên baranê bi hilma xwe disefîne. Ewr baranê diherikînin û bi têra xwe bi ser meriva dilop dikin” (Îbo 36:27, 28, ÎM).
Vê rêzêda bi zimanê hêsa tê gotinê derheqa ziviroka avê tebiyetêda ya ku Xwedê çêkiriye. Hilma avê ji erd, ber û okyanûsa hildikişe jor, û ça baran ser erdê dibare. Bi saya vê prosêsê ava temiz bona jîyîna meriv û heywana, timê heye (Waîz 1:7; Amos 5:8).
“Ezê jî wera baranê wededa bibarînim, erdê deremeta xwe bide û darên deştê jî berên xwe bidin” (Qanûna Kahîntiyê 26:4).
Bi wan giliya Xwedê soz da ku wê cimeta Îsraêl, yên ku cotkar bûn, bi berên erdê kerem bike. Xwedê zane seva ku erd berên xwe bide, lazim e ku êpêce av wededa bibare.
Ev sozê Xwedê ne ku tenê bona Îsraêla berê bû. Zûtirekê Xwedê wê evê soza xwe bona temamiya erdê bîne sêrî (Îşaya 30:23). Îro cûre-cûre ciyada krîzîsa avê pêşda tê û menî ne tenê wê yekêda ne ku baran kêm dibarin. Kitêba Pîrozda çi tê gotinê derheqa safîkirina problêmên avêva girêdayî?
Krîzîsa avê ça wê bê safîkirinê
Ji Kitêba Pîroz em pêdihesin, wekî Xwedê wê bi saya Padşatiya xwe hemû problêmên planêta me û usa jî krîzîsa avê, bide hildanê (Metta 6:9, 10). Padşatiya Xwedê ev serwêrtiya ezmanî ye, ya ku wê li ser erdê hukum bike (Daniyêl 2:44; Eyantî 11:15). Xêncî wê yekê, Padşatiya Xwedê wê hemû meniyên kêmasiya avê bide hildanê, çi ku tu padşatiyên meriva nikarin bikin.
Problêm: Guhastina klîmatê bûye sebeba wê yekê, ku ziviroka avê tevlihev bûye. Axiriya wê yekê ev e, ku cî-ciyada erd ziha û hişk dibe, lê ciyên dinda jî lêyî radibin û av ji berê dertê.
Safîkirin: Padşatiya Xwedê wê hemû prosêsên tebiyetê rast ke û êkolojiya planêta me wê baş be. Xwedê soz dide: “Va ez her tiştî nû çêdikim” (Eyantî 21:5). Wê li ser erdê ziha ava temiz têr-tije bikişe, û hela hê li ser erdê hişk jî wê gul şîn bin (Îşaya 41:17-20). Padşatiya Xwedê bin destê Îsa Mesîhda, wê hemû qewatên tebiyetê kontrol bike.
Çaxê Îsa li ser erdê bû, ewî firtone da sekinandinê û bi vê yekê da kifşê, ku qewateke çiqas mezin Xwedê daye destê wî (Markos 4:39, 41). Îsa, çawa Padşê Padşatiya Xwedê wê xem bike bona vê yekê, ku teşqelên tebiyetê îda tune bin. Meriv wê edilayê û bêxofiyêda bin û tu qeziyê netirsin.
Problêm: Merivên ku nafikirin derheqa axiriya kirên xwe û usa jî teşkîletên tima, çem, gol û avên binê erdê qirêj dikin, lema jî ava temiz hê kêm dibe.
Safîkirin: Xwedê wê erdê, çem, gol û ber temiz ke. Dinya wê bibe cinet. Kitêba Pîrozda giliyên usa hatine nivîsarê: “Wê çol û deşta ziha şa bibe, wê berî dilgeş bibe, wek gula kulîlk bide” (Îşaya 35:1, ÎM).
Çi wê bê serê wan meriva yên ku ne bona tebiyetê, ne jî bona meriva xem dikin? Xwedê soz dide wekî wê qira wan meriva bîne, yên ku tebiyetê xirab dikin (Eyantî 11:18; Metelok 2:21, 22).
Problêm: Ji bo vê yekê ku gelek ava temiz nerast tê xerckirinê, av pêra nagihîje dîsa bê tijekirinê.
Safîkirin: Qirara Xwedê wê “li ser rûyê erdê bê sêrî” bi saya Padşatiya Xwedê, lê ne ku bi saya merivên xwehez (Metta 6:9, 10). Padşatiya Xwedê wê merivara xwendina lapî baş bide. Îşaya 11:9-da usa tê gotinê: “Dinya jî wê bi zanîna Xudan [Yehowa, DT]a tije bibe, ÎM”. Bi saya vê zanebûna mexsûs û hezkirina ji dil hindava Xwedê û hemû efrînên wî, însanet wê bi cûrê kamil bona planêta meye bedew û tebiyetê xem bike.
Seva ku hê zêde derheqa Padşatiya Xwedê pêbihesin, bixûnin gotara bi navê “Padşatiya Xwedê wê Çi Bike?”
Seva ku pêbihesin wekî erd wê çawa bibe cinet, bixûnin kitêba Îşaya serê 35.
Seva ku hê zêde pêbihesin derheqa qirara Xwedê bona erdê û însanetê, binihêrin vîdêo Çira Xwedê Erd Efirandiye?
a Yehowa navê Xwedêyî şexsî ye (Zebûr 83:18). Binihêre gotara bi navê “Yehowa Kî ye?”