ನಮ್ಮ ಕ್ರೈಸ್ತ ಜೀವನ
ಬೈಬಲಿನ ಶ್ರದ್ಧಾಪೂರ್ವಕ ವಿದ್ಯಾರ್ಥಿಯಾಗುವುದು ಹೇಗೆ?
ಪರೀಕ್ಷೆಗಳು ಎದುರಾದಾಗ ನೀವೂ ದಾನಿಯೇಲನಂತೆ ನಂಬಿಗಸ್ತರಾಗಿರಲು ಬಯಸುವಿರಾ? ದಾನಿಯೇಲನು ದೇವರ ವಾಕ್ಯವನ್ನೂ ಅದರಲ್ಲಿರುವ ಕಷ್ಟಕರವಾದ ಪ್ರವಾದನೆಗಳನ್ನೂ ಶ್ರದ್ಧಾಪೂರ್ವಕವಾಗಿ ಅಧ್ಯಯನ ಮಾಡುತ್ತಿದ್ದನು. (ದಾನಿ 9:2) ಶ್ರದ್ಧಾಪೂರ್ವಕ ಬೈಬಲ್ ಅಧ್ಯಯನವು ನಂಬಿಗಸ್ತರಾಗಿ ಉಳಿಯಲು ನಿಮಗೂ ಸಹಾಯ ಮಾಡುತ್ತದೆ. ಇದು ಯೆಹೋವನು ಕೊಟ್ಟ ಮಾತುಗಳು ಖಂಡಿತ ನೆರವೇರುವವು ಎಂಬ ಭರವಸೆಯನ್ನು ಹೆಚ್ಚಿಸುತ್ತದೆ. (ಯೆಹೋ 23:14) ಜೊತೆಗೆ, ದೇವರ ಮೇಲೆ ನಿಮಗಿರುವ ಪ್ರೀತಿಯನ್ನೂ ಹೆಚ್ಚಿಸುತ್ತದೆ. ಈ ಪ್ರೀತಿ ಸರಿಯಾದದ್ದನ್ನು ಮಾಡಲು ನಿಮ್ಮನ್ನು ಪ್ರೇರೇಪಿಸುತ್ತದೆ. (ಕೀರ್ತ 97:10) ಆದರೆ, ಬೈಬಲ್ ಅಧ್ಯಯನವನ್ನು ಎಲ್ಲಿಂದ ಪ್ರಾರಂಭಿಸಬೇಕು? ಮುಂದಿನ ಸಲಹೆಗಳನ್ನು ಪಾಲಿಸಿ:
ನಾನು ಏನನ್ನು ಅಧ್ಯಯನ ಮಾಡಬೇಕು? ಒಳ್ಳೆಯ ಅಧ್ಯಯನ ರೂಢಿಯಲ್ಲಿ ಕೂಟಗಳಿಗೆ ತಯಾರಿಸುವುದು ಸಹ ಒಳಗೂಡಿದೆ. ವಾರದ ಬೈಬಲ್ ವಾಚನದಲ್ಲಿ ನಿಮಗೆ ಅರ್ಥವಾಗದ ವಿಷಯಗಳ ಕುರಿತು ಹೆಚ್ಚು ಅಧ್ಯಯನ ಮಾಡಿದರೆ ತುಂಬ ಪ್ರಯೋಜನಕಾರಿ ಆಗಿರುತ್ತದೆ. ಇದಕ್ಕೆ ಕೂಡಿಸಿ, ಕೆಲವರು ಬೈಬಲ್ ಪ್ರವಾದನೆಗಳ ಬಗ್ಗೆ, ಪವಿತ್ರಾತ್ಮದ ಫಲದ ವಿವಿಧ ಅಂಶಗಳ ಬಗ್ಗೆ, ಅಪೊಸ್ತಲ ಪೌಲನ ಮಿಷೆನರಿ ಪ್ರಯಾಣದ ಬಗ್ಗೆ ಅಥವಾ ಯೆಹೋವನ ಸೃಷ್ಟಿಕಾರ್ಯದ ಬಗ್ಗೆ ಹೆಚ್ಚನ್ನು ಕಲಿಯುತ್ತಾರೆ. ಒಂದು ಬೈಬಲ್ ಪ್ರಶ್ನೆ ನಿಮ್ಮ ಮನಸ್ಸಿಗೆ ಬರುವುದಾದರೆ ಅದನ್ನು ಬರೆದಿಡಿ ಮತ್ತು ಮುಂದಿನ ಬಾರಿ ಅಧ್ಯಯನ ಮಾಡುವಾಗ ಅದರ ಬಗ್ಗೆ ಸಂಶೋಧನೆ ಮಾಡಿ.
ಮಾಹಿತಿ ಎಲ್ಲಿ ಸಿಗುತ್ತದೆ? ಆಧ್ಯಾತ್ಮಿಕ ನಿಧಿಗಳನ್ನು ಹುಡುಕಲಿಕ್ಕಾಗಿ ಸಂಶೋಧನಾ ಸಾಧನಗಳು ಎಂಬ ವಿಡಿಯೋದಲ್ಲಿ ಕೆಲವು ಅಧ್ಯಯನ ಸಹಾಯಕಗಳ ಬಗ್ಗೆ ತಿಳಿಸಲಾಗಿದೆ. ನಿಮಗೆಷ್ಟು ಸಂಶೋಧನೆ ಮಾಡಲು ತಿಳಿದಿದೆ ಎಂದು ನೋಡಲು ದಾನಿಯೇಲ ಅಧ್ಯಾಯ 7ರಲ್ಲಿರುವ ಮೃಗಗಳು ಯಾವ ಲೋಕಶಕ್ತಿಗಳನ್ನು ಪ್ರತಿನಿಧಿಸುತ್ತವೆಂದು ಸಂಶೋಧನೆ ಮಾಡಿ.
ಅಧ್ಯಯನಕ್ಕಾಗಿ ಎಷ್ಟು ಸಮಯ ವ್ಯಯಿಸಬೇಕು? ಆಧ್ಯಾತ್ಮಿಕವಾಗಿ ಆರೋಗ್ಯವಾಗಿರಬೇಕೆಂದರೆ ಕ್ರಮವಾದ ಅಧ್ಯಯನ ತುಂಬ ಮುಖ್ಯ. ಅಗತ್ಯವಿದ್ದರೆ, ಆರಂಭದಲ್ಲಿ ಸ್ವಲ್ಪ ಸಮಯ ಅಧ್ಯಯನ ಮಾಡಿ. ನಂತರ, ನಿಧಾನವಾಗಿ ಸಮಯವನ್ನು ಹೆಚ್ಚು ಮಾಡಿ. ದೇವರ ವಾಕ್ಯವನ್ನು ಅಧ್ಯಯನ ಮಾಡುವುದು ನಿಧಿಯನ್ನು ಅಗೆಯುವಂತಿದೆ. ನೀವು ಎಷ್ಟು ಹೆಚ್ಚು ನಿಧಿಯನ್ನು ಕಂಡುಕೊಳ್ಳುತ್ತೀರೋ ಅಷ್ಟು ಹೆಚ್ಚು ಅಗೆಯುತ್ತಾ ಹೋಗುತ್ತೀರಿ! (ಜ್ಞಾನೋ 2:3-6) ಹೆಚ್ಚೆಚ್ಚು ಅಧ್ಯಯನ ಮಾಡಿದಂತೆ ದೇವರ ವಾಕ್ಯಕ್ಕಾಗಿರುವ ನಿಮ್ಮ ಹಂಬಲ ಹೆಚ್ಚುವುದು. ಹೀಗೆ ಕ್ರಮವಾದ ಬೈಬಲ್ ಅಧ್ಯಯನವು ಒಂದು ರೂಢಿಯಾಗುವುದು.—1ಪೇತ್ರ 2:2.
ದಾನಿಯೇಲ 7ನೇ ಅಧ್ಯಾಯದಲ್ಲಿ ತಿಳಿಸಲಾಗಿರುವ ಮೃಗಗಳು ಏನನ್ನು ಸೂಚಿಸುತ್ತವೆ?
ಹೆಚ್ಚಿನ ಪ್ರಶ್ನೆ:
ದಾನಿಯೇಲ 7:8, 24 ಹೇಗೆ ನೆರವೇರಿತು?
ಮುಂದಿನ ಅಧ್ಯಯನಕ್ಕಾಗಿ ಪ್ರಶ್ನೆ:
ಪ್ರಕಟನೆ 13ನೇ ಅಧ್ಯಾಯದಲ್ಲಿ ತಿಳಿಸಲಾಗಿರುವ ಮೃಗಗಳು ಏನನ್ನು ಸೂಚಿಸುತ್ತವೆ?