ಸೃಷ್ಟಿಕರ್ತನಿದ್ದಾನೆ ಅಂತ ನಂಬೋದು ಯಾಕೆ ಪ್ರಾಮುಖ್ಯ?

ಈ ಪ್ರಶ್ನೆಗೆ ಉತ್ತರ ತಿಳಿಯಲೇಬೇಕಾ? ಪುರಾವೆಗಳು ಸರ್ವಶಕ್ತನಿದ್ದಾನೆ ಅಂತ ನಿಮಗೆ ಮನವರಿಕೆ ಮಾಡಿಸಿದ್ರೆ ಬೈಬಲನ್ನು ದೇವರೇ ಬರೆಸಿರೋದು ಅನ್ನೋದಕ್ಕಿರೋ ಆಧಾರವನ್ನೂ ಪರೀಕ್ಷಿಸಬೇಕು ಅಂತ ಅನಿಸಬಹುದು. ಬೈಬಲ್‌ ಹೇಳೋದನ್ನು ನಂಬೋದಾದರೆ ನಿಮಗೆ ಸಿಗುವ ಪ್ರಯೋಜನಗಳು . . .

ನಿಮ್ಮ ಜೀವನಕ್ಕೊಂದು ಅರ್ಥ ಸಿಗುತ್ತೆ

ಬೈಬಲ್‌ ಹೇಳುತ್ತೆ: “ಆತನು[ದೇವರು] ನಿಮಗೆ ಆಕಾಶದಿಂದ ಮಳೆ ಸುರಿಸಿದನು. ಚೆನ್ನಾಗಿ ಬೆಳೆ ಬರೋ ತರ ಬೇರೆಬೇರೆ ಕಾಲಗಳನ್ನ ಕೊಟ್ಟನು. ತೃಪ್ತಿಯಾಗುವಷ್ಟು ಆಹಾರ ಕೊಡ್ತಾ ನಿಮ್ಮ ಮನಸ್ಸನ್ನ ಖುಷಿಪಡಿಸಿದನು.”—ಅಪೊಸ್ತಲರ ಕಾರ್ಯ 14:17.

ಅರ್ಥ ಏನು?: ಈ ಭೂಮಿಯಲ್ಲಿ ಇರೋದೆಲ್ಲ ಸೃಷ್ಟಿಕರ್ತ ನಮಗೆ ಕೊಟ್ಟಿರೋ ಉಡುಗೊರೆ. ಇದನ್ನೆಲ್ಲ ಕೊಟ್ಟು ದೇವರು ಎಷ್ಟು ಕಾಳಜಿ ತೋರಿಸಿದ್ದಾನೆ ಅಂತ ಅರ್ಥಮಾಡಿಕೊಂಡ್ರೆ ಈ ಉಡುಗೊರೆಗೆ ಇನ್ನಷ್ಟು ಕೃತಜ್ಞತೆ ತೋರಿಸ್ತೀವಿ.

ನಿಮಗೆ ಪ್ರಯೋಜನ ಆಗೋ ಒಳ್ಳೇ ಸಲಹೆಗಳನ್ನು ಪಡೆಯುತ್ತೀರ

ಬೈಬಲ್‌ ಹೇಳುತ್ತೆ: “ನಿನಗೆ ನ್ಯಾಯ-ನೀತಿಯಿಂದ, ಭೇದಭಾವ ಮಾಡದೆ ಇರೋದು ಅಂದ್ರೇನು ಅಂತ ಅರ್ಥ ಆಗುತ್ತೆ, ಯಾವುದು ಒಳ್ಳೇ ದಾರಿ ಅಂತ ಗೊತ್ತಾಗುತ್ತೆ.”—ಜ್ಞಾನೋಕ್ತಿ 2:9.

ಅರ್ಥ ಏನು?: ಸಂತೋಷವಾಗಿರಲು ನಮಗೆ ಏನು ಬೇಕು ಅಂತ ಸೃಷ್ಟಿಕರ್ತನಿಗೆ ಗೊತ್ತು. ಹಾಗಾಗಿ ಬೈಬಲ್‌ ಕಲಿಯುವಾಗ ನಿಮಗೆ ತುಂಬ ಅಗತ್ಯವಾಗಿರುವ ವಿಷಯಗಳು ಯಾವುದು ಅಂತ ತಿಳಿಯುತ್ತೀರ.

ನಿಮ್ಮ ಪ್ರಶ್ನೆಗಳಿಗೆ ಉತ್ತರ ತಿಳಿಯುತ್ತೀರ

ಬೈಬಲ್‌ ಹೇಳುತ್ತೆ: “ದೇವರ ಬಗ್ಗೆ ಹೆಚ್ಚು ಕಲಿತೀಯ.”—ಜ್ಞಾನೋಕ್ತಿ 2:5.

ಅರ್ಥ ಏನು?: ಸೃಷ್ಟಿಕರ್ತನಿದ್ದಾನೆ ಅಂತ ತಿಳಿಯುವಾಗ ತುಂಬ ಪ್ರಾಮುಖ್ಯ ಪ್ರಶ್ನೆಗಳಿಗೆ ಉತ್ತರ ತಿಳಿಯುತ್ತೀರ. ಅಂಥ ಕೆಲವು ಪ್ರಶ್ನೆಗಳು: ಜೀವನದ ಉದ್ದೇಶ ಏನು? ಇಷ್ಟೊಂದು ಕಷ್ಟ ಯಾಕಿದೆ? ಸತ್ತ ಮೇಲೆ ಏನಾಗುತ್ತೆ? ಈ ಪ್ರಶ್ನೆಗಳಿಗೆ ಬೈಬಲಲ್ಲಿ ಉತ್ತರ ಸಿಗುತ್ತೆ.

ಭವಿಷ್ಯದ ಮೇಲೆ ಭರವಸೆ ಇಡೋಕೆ ಸಹಾಯ ಮಾಡುತ್ತೆ

ಬೈಬಲ್‌ ಹೇಳುತ್ತೆ: “ಯೆಹೋವ ಹೇಳೋದು ಏನಂದ್ರೆ . . . ‘ನೀವು ಶಾಂತಿ ನೆಮ್ಮದಿಯಿಂದ ಬದುಕಬೇಕು, ನಿಮಗೆ ಕೆಟ್ಟದು ಆಗಬಾರದು, ನಿಮ್ಮ ಭವಿಷ್ಯ ಚೆನ್ನಾಗಿರಬೇಕು, ನೀವು ಒಳ್ಳೇದನ್ನ ಎದುರುನೋಡಬೇಕು ಅನ್ನೋದೇ ನನ್ನ ಆಸೆ.’”—ಯೆರೆಮೀಯ 29:11.

ಅರ್ಥ ಏನು?: ಭವಿಷ್ಯದಲ್ಲಿ ದೇವರು ಕೆಟ್ಟತನ, ಕಷ್ಟ, ಮರಣ ತೆಗೆದುಹಾಕ್ತೀನಿ ಅಂತ ಮಾತು ಕೊಟ್ಟಿದ್ದಾನೆ. ಆ ಮಾತಲ್ಲಿ ನಂಬಿಕೆ ಇಟ್ರೆ ಪ್ರತಿದಿನ ಬರೋ ಸಮಸ್ಯೆಗಳನ್ನು ಎದುರಿಸೋಕೆ ಆಗುತ್ತೆ.

ಸೃಷ್ಟಿಕರ್ತನಿದ್ದಾನೆ ಅಂತ ನಂಬಿದ ಕೆಲವರಿಗೆ ಏನು ಪ್ರಯೋಜನ ಆಗಿದೆ?

“ನನ್ನ ಜೀವನದ ಪ್ರತಿಯೊಂದು ವಿಷಯದಲ್ಲಿ ದೇವರು ಸಹಾಯ ಮಾಡೋದನ್ನು ನೋಡಿ ಆಶ್ಚರ್ಯ ಆಗ್ತಿದೆ. ಜೀವನದಲ್ಲಿ ಯಾವುದಕ್ಕೆ ಪ್ರಾಮುಖ್ಯತೆ ಕೊಡಬೇಕು, ಬೇರೆಯವರ ಜೊತೆ ಹೇಗೆ ಹೊಂದಿಕೊಳ್ಳಬೇಕು, ಆತನ ಸ್ನೇಹಿತರಾಗಲು ಏನು ಮಾಡಬೇಕು ಅಂತಾನೂ ನಮಗೆ ತಿಳಿಸುತ್ತಾನೆ.”—ಸಿಂಡಿ, ಅಮೆರಿಕ.

“ಸೃಷ್ಟಿಕರ್ತನನ್ನು ನಂಬಿರೋದ್ರಿಂದ ನನ್ನ ಜೀವನದಲ್ಲಿ ಸಂತೋಷ, ಸಂತೃಪ್ತಿ ಇದೆ. ದೇವರ ಬಗ್ಗೆ, ಸೃಷ್ಟಿಯ ಬಗ್ಗೆ, ಆತನ ವಾಕ್ಯದ ಬಗ್ಗೆ ತುಂಬ ಕಲಿಯೋಕೆ ಇದೆ. ಇದನ್ನ ಕಲಿತಷ್ಟು ನನ್ನ ಆಸಕ್ತಿ ಜಾಸ್ತಿ ಆಗಿದೆ.”—ಎಲೀಸ್‌, ಫ್ರಾನ್ಸ್‌.

“ಸೃಷ್ಟಿಕರ್ತನು ಬೈಬಲಲ್ಲಿ ಬರೆಸಿರೋ ವಿಷಯಗಳನ್ನು ಪಾಲಿಸೋದ್ರಿಂದ ನಾನು ಸಂತೋಷವಾಗಿದ್ದೀನಿ. ಹೆಚ್ಚು ಚಿಂತಿಸದಿರೋಕೆ, ಒಳ್ಳೇ ಗಮನಕೊಡೋಕೆ, ಸಂತೃಪ್ತಿಯಿಂದ ಇರೋಕೆ, ಒಳ್ಳೇ ಅಪ್ಪ ಆಗೋಕೆ ಸಹಾಯ ಮಾಡಿದೆ.”—ಪೀಟರ್‌, ನೆದರ್ಲೆಂಡ್ಸ್‌.

“ಬೈಬಲ್‌ ಕಲಿಯೋ ಮುಂಚೆ, ತಿನ್ನೋದು, ಮಲಗೊದು, ಎದ್ದೂ ಬಿದ್ದೂ ಸಮಯಕ್ಕೆ ಸರಿಯಾಗಿ ಕೆಲಸಕ್ಕೆ ಹೋಗೋದೇ ನನ್ನ ಜೀವನವಾಗಿತ್ತು. ಆದ್ರೆ ಖುಷಿ ಇರ್ಲಿಲ್ಲ. ಈಗ ಪ್ರತಿದಿನ ಜೀವನವನ್ನ ಎಂಜಾಯ್‌ ಮಾಡ್ತೀನಿ. ಅದನ್ನು ಒಂದು ಅಮೂಲ್ಯವಾದ ಗಿಫ್ಟಾಗಿ ನೋಡ್ತೀನಿ.—ಲಿಸ್‌ ಎಸ್ಟೋನಿಯಾ.

“ನಾನು ಯಾವಾಗ್ಲೂ ಚಿಂತೆಯಲ್ಲಿರೋ ವ್ಯಕ್ತಿ. ಕೆಟ್ಟತನ, ಅನ್ಯಾಯ, ಕಷ್ಟಗಳನ್ನು ದೇವರು ಆದಷ್ಟು ಬೇಗ ತೆಗೆದುಹಾಕ್ತಾರೆ ಅಂತ ಗೊತ್ತಾದಾಗ ನಾನು ಹೆಚ್ಚು ಚಿಂತೆ ಮಾಡ್ದೆ ಸಮಾಧಾನವಾಗಿ ಇರೋಕೆ ಸಹಾಯವಾಯ್ತು.”—ಆ್ಯಡ್ರಿಯನ್‌, ಫ್ರಾನ್ಸ್‌.