1 | ಪ್ರಾರ್ಥನೆ “ನಿಮಗಿರೋ ಚಿಂತೆಯನ್ನೆಲ್ಲಾ ದೇವರ ಮೇಲೆ ಹಾಕಿ”

ಬೈಬಲ್‌ ಹೀಗೆ ಹೇಳುತ್ತೆ: “ನಿಮಗಿರೋ ಚಿಂತೆಯನ್ನೆಲ್ಲಾ ದೇವರ ಮೇಲೆ ಹಾಕಿ. ಯಾಕಂದ್ರೆ ದೇವರಿಗೆ ನಿಮ್ಮ ಮೇಲೆ ತುಂಬ ಕಾಳಜಿ ಇದೆ.”—1 ಪೇತ್ರ 5:7.

ಇದರ ಅರ್ಥ ಏನು

‘ನಿಮ್ಮ ಚಿಂತೆಯನ್ನೆಲ್ಲಾ ನನ್ನ ಮೇಲೆ ಹಾಕಿ’ ಅಂತ ಯೆಹೋವನೇ ಹೇಳ್ತಿದ್ದಾನೆ. (ಕೀರ್ತನೆ 55:22) ನಮಗಿರೋ ಸಮಸ್ಯೆ ದೊಡ್ಡದಾಗಿರಲಿ, ಚಿಕ್ಕದಾಗಿರಲಿ ಆತನ ಹತ್ರ ಮನಸ್ಸುಬಿಚ್ಚಿ ಹೇಳಬೇಕು. ನಮಗೆ ಏನು ಅನಿಸ್ತಿದೆ, ನಮ್ಮ ಮನಸ್ಸಲ್ಲಿ ಏನಾಗ್ತಿದೆ ಅಂತ ಆತನಿಗೆ ಚೆನ್ನಾಗಿ ಗೊತ್ತು. ನಮ್ಮ ಮೇಲೆ ಆತನಿಗೆ ತುಂಬ ಕಾಳಜಿ ಇದೆ. ನಮಗೆ ಮನಶ್ಶಾಂತಿ ಸಿಗಬೇಕಂದ್ರೆ ಪ್ರಾರ್ಥನೆ ಮಾಡಬೇಕು.—ಫಿಲಿಪ್ಪಿ 4:6, 7.

ಇದು ಹೇಗೆ ಸಹಾಯ ಮಾಡುತ್ತೆ

ಮಾನಸಿಕ ಆರೋಗ್ಯದ ಸಮಸ್ಯೆಯಿಂದ ಕಷ್ಟಪಡ್ತಿರುವಾಗ ‘ನಾವು ಒಂಟಿ, ನಮಗೆ ಯಾರೂ ಇಲ್ಲ’ ಅಂತ ಅನಿಸಬಹುದು. ಯಾಕಂದ್ರೆ ನಮಗೆ ಏನಾಗ್ತಿದೆ ಅಂತ ನಮ್ಮಿಂದ ವಿವರಿಸೋಕೂ ಆಗಲ್ಲ ಮತ್ತು ಬೇರೆಯವ್ರಿಗೆ ನಾವು ಪಡ್ತಿರೋ ಕಷ್ಟ ಪೂರ್ತಿಯಾಗಿ ಅರ್ಥನೂ ಆಗಲ್ಲ. (ಜ್ಞಾನೋಕ್ತಿ 14:10) ಆದ್ರೆ, ನಮಗೆ ಹೇಗನಿಸ್ತಿದೆ, ಏನಾಗ್ತಿದೆ ಅಂತ ನಾವು ಪ್ರಾರ್ಥನೆಯಲ್ಲಿ ಮನಸ್ಸುಬಿಚ್ಚಿ ದೇವರ ಹತ್ರ ಹೇಳ್ಕೊಂಡ್ರೆ ಅದನ್ನ ಆತನು ಪ್ರೀತಿಯಿಂದ ಕೇಳಿಸ್ಕೊಳ್ತಾನೆ. ನಮ್ಮ ಕಷ್ಟವನ್ನ, ದುಃಖವನ್ನ ಆತನು ಚೆನ್ನಾಗಿ ಅರ್ಥಮಾಡ್ಕೊಳ್ತಾನೆ. ಹಾಗಾಗಿ ನಮ್ಮ ಚಿಂತೆಯನ್ನೆಲ್ಲಾ ನಾವು ಪ್ರಾರ್ಥನೆಯಲ್ಲಿ ಹೇಳಬೇಕು ಅಂತ ಆತನು ಇಷ್ಟಪಡ್ತಾನೆ.—2 ಪೂರ್ವಕಾಲವೃತ್ತಾಂತ 6:29, 30.

ನಾವು ಯೆಹೋವ ದೇವರಿಗೆ ಪ್ರಾರ್ಥನೆ ಮಾಡಿದಾಗ ಆತನು ನಮ್ಮ ಬಗ್ಗೆ ಚಿಂತೆ ಮಾಡ್ತಾನೆ ಅನ್ನೋ ನಂಬಿಕೆ ಇನ್ನೂ ಜಾಸ್ತಿಯಾಗುತ್ತೆ. ಒಬ್ಬ ದೇವರ ಆರಾಧಕ ತನ್ನ ಪ್ರಾರ್ಥನೆಯಲ್ಲಿ, “ನನ್ನ ಸಂಕಟವನ್ನ ನೀನು ನೋಡಿದ್ದೀಯ, ನನ್ನ ಮನದಾಳದ ಯಾತನೆಯನ್ನ ನೀನು ತಿಳ್ಕೊಂಡಿದ್ದೀಯ” ಅಂತ ಹೇಳಿದ. (ಕೀರ್ತನೆ 31:7) ನಮ್ಮ ಮನಸ್ಸಲ್ಲಿ ಎಷ್ಟೇ ಸಂಕಟ ಇರಲಿ ಅದಕ್ಕೆ ಯೆಹೋವ ದೇವರು ಗಮನ ಕೊಡ್ತಿದ್ದಾನೆ ಅನ್ನೋದನ್ನ ನಾವು ನೆನಪಲ್ಲಿ ಇಟ್ಕೊಂಡ್ರೆ ನಮ್ಮ ಸಮಸ್ಯೆನ ನಿಭಾಯಿಸೋಕೆ ಆಗುತ್ತೆ. ಆತನಿಗಿಂತ ಚೆನ್ನಾಗಿ ನಮ್ಮನ್ನ ಅರ್ಥಮಾಡ್ಕೊಳ್ಳೋಕೆ ಬೇರೆ ಯಾರಿಂದನೂ ಆಗಲ್ಲ. ಅಷ್ಟೇ ಅಲ್ಲ, ನಮ್ಮ ಸಮಸ್ಯೆಯನ್ನ ನಿಭಾಯಿಸೋಕೆ ಬೇಕಾದ ಧೈರ್ಯ ಮತ್ತು ಪ್ರೋತ್ಸಾಹವನ್ನ ಆತನು ಬೈಬಲ್‌ನಿಂದ ಕೊಡ್ತಾನೆ.

ಬೈಬಲ್‌ನಿಂದ ಸಹಾಯ ಪಡೆದ ಜೂಲ್ಯನ್‌

ಆತಂಕ ನನ್ನನ್ನ ಕಾಡಿದಾಗ . . .

“ನನಗೆ ಆತಂಕದ ಸಮಸ್ಯೆ ಇದೆ. ಇದ್ರಿಂದಾಗಿ ಮಿತಿಮೀರಿದ ಚಿಂತೆ ಕಾಡುತ್ತೆ. ಜೊತೆಗೆ, ಒ.ಸಿ.ಡಿ (ಒಬ್ಸೆಸಿವ್‌ ಕಂಪಲ್ಸಿವ್‌ ಡಿಸಾರ್ಡರ್‌) ಅನ್ನೋ ಮಾನಸಿಕ ಕಾಯಿಲೆ ಕೂಡ ಇದೆ. ಇದ್ರಿಂದ ನನ್ನ ತಲೆಯಲ್ಲಿ ತುಂಬ ಯೋಚನೆಗಳು ಬರುತ್ತೆ. ಇವುಗಳ ಬಗ್ಗೆ ಯೋಚನೆ ಮಾಡಿ-ಮಾಡಿ ಸಾಕಾಗಿ ಹೋಗಿಬಿಡುತ್ತೆ. ಇದನ್ನ ತಡಿಯೋಕೆ ನನ್ನಿಂದ ಆಗಲ್ಲ. ಇದೆಲ್ಲಾ ನನಗೆ ಯಾವಾಗ ಕಾಡುತ್ತೆ ಅಂತಾನೇ ಹೇಳೋಕಾಗಲ್ಲ. ಒಂದು ಕ್ಷಣ ಚೆನ್ನಾಗೇ ಇರ್ತೀನಿ. ಇನ್ನೊಂದು ಕ್ಷಣ ಕಾರಣನೇ ಇಲ್ಲದೆ ಆತಂಕ ಶುರು ಆಗುತ್ತೆ. ಅದ್ರಲ್ಲೂ ನಾನು ಜನ್ರ ಮಧ್ಯೆ ಇದ್ದಾಗ ಈ ಭಾವನೆ ತುಂಬ ಕಾಡುತ್ತೆ. ಬೇರೆಯವರು ನನ್ನ ಬಗ್ಗೆ ಏನು ಅಂದ್ಕೊಳ್ತಿದ್ದಾರೆ ಅಂತ ಯಾವಾಗ್ಲೂ ಯೋಚನೆ ಮಾಡ್ತಾ ಇರ್ತೀನಿ.

ನನ್ನನ್ನ ಚೆನ್ನಾಗಿ ಅರ್ಥಮಾಡ್ಕೊಂಡಿರೋ ಸ್ನೇಹಿತರು ತುಂಬ ಸಹಾಯ ಮಾಡ್ತಾರೆ. ಕೆಲವು ಸಲ ಅವರು ಹೇಳೋ ವಿಷ್ಯಗಳಿಂದ ನನಗೆ ಸಹಾಯ ಸಿಗಲ್ಲ. ಆದ್ರೂ ಅವರು ಹಾಕೋ ಪ್ರಯತ್ನ ನೋಡಿದಾಗ ನನಗೆ ಖುಷಿಯಾಗುತ್ತೆ.

ನನಗಿರೋ ಮಾನಸಿಕ ಆರೋಗ್ಯದ ಸಮಸ್ಯೆಯಿಂದ ಕೆಲವು ಸಲ ಪ್ರಾರ್ಥನೆ ಮಾಡೋಕೂ ಕಷ್ಟ ಆಗುತ್ತೆ. ತುಂಬ ಪ್ರಯತ್ನ ಹಾಕಿ, ತುಂಬ ಗಮನ ಕೊಟ್ಟು ಯೆಹೋವ ದೇವರಿಗೆ ಪ್ರಾರ್ಥನೆ ಮಾಡಬೇಕಾಗುತ್ತೆ. ಯಾಕಂದ್ರೆ ನಾನು ಪ್ರಾರ್ಥನೆಯಲ್ಲಿ ಒಂದು ವಿಷ್ಯ ಹೇಳ್ತಾ ಇದ್ದ ಹಾಗೇ ಇನ್ನೊಂದು ವಿಷ್ಯ ಮನಸ್ಸಿಗೆ ಬರುತ್ತೆ. ಹೀಗೆ ತುಂಬ ಯೋಚನೆಗಳು ನನ್ನ ತಲೆಯಲ್ಲಿ ಓಡಾಡ್ತಾ ಇರುತ್ತೆ. ಹಾಗಾಗಿ ಏನು ಹೇಳಬೇಕು ಅಂತನೇ ನನಗೆ ಗೊತ್ತಾಗಲ್ಲ. ನನ್ನ ಯೋಚನೆಗಳು ನನ್ನ ನಿಯಂತ್ರಣದಲ್ಲಿ ಇಲ್ಲದೇ ಇರೋದ್ರಿಂದ ನನಗೇನು ಅನಿಸ್ತಿದೆ, ನಾನೇನು ಯೋಚನೆ ಮಾಡ್ತಿದ್ದೀನಿ ಅಂತ ಯೆಹೋವ ದೇವರ ಹತ್ರ ಹೇಳಕ್ಕೂ ನನಗೆ ಕಷ್ಟ ಆಗುತ್ತೆ.”

ಬೈಬಲ್‌ ನನಗೆ ಹೇಗೆ ಸಹಾಯ ಮಾಡ್ತಿದೆ

“ನಾವು ಮಾಡೋ ಪ್ರಾರ್ಥನೆ ಉದ್ದವಾಗಿ ಇರಬೇಕಾಗಿಲ್ಲ ಅಂತ ಬೈಬಲ್‌ ಹೇಳುತ್ತೆ. ಹಾಗಾಗಿ ನನ್ನ ಭಾವನೆಗಳನ್ನ ಮಾತಲ್ಲಿ ಹೇಳೋಕೆ ಆಗದೇ ಇದ್ದಾಗ ‘ಯೆಹೋವನೇ ದಯವಿಟ್ಟು ನನಗೆ ಸಹಾಯ ಮಾಡು’ ಅಂತ ಚಿಕ್ಕದಾಗಿ ಪ್ರಾರ್ಥನೆ ಮಾಡ್ತೀನಿ. ಯೆಹೋವ ದೇವರು ನನ್ನನ್ನ ಅರ್ಥಮಾಡ್ಕೊಳ್ತಾನೆ ಮತ್ತು ಸರಿಯಾದ ಸಮಯಕ್ಕೆ ಬೇಕಾದ ಸಹಾಯನೂ ಕೊಡ್ತಾನೆ ಅಂತ ನಾನು ನಂಬ್ತೀನಿ. ಪ್ರಾರ್ಥನೆ ಮಾಡೋದ್ರ ಜೊತೆಗೆ ನಾನು ಡಾಕ್ಟರ್‌ ಹತ್ರನೂ ಚಿಕಿತ್ಸೆ ತಗೊಂಡಿದ್ದೀನಿ. ಹೀಗೆ ಮಾಡಿದ್ರಿಂದ ನನಗೆ ತುಂಬ ಸಹಾಯ ಸಿಕ್ಕಿದೆ. ನಾನು ಯೆಹೋವನ ಸಹಾಯ ಕೇಳೋಕೆ ತುಂಬ ಪ್ರಯತ್ನ ಹಾಕಬೇಕಾಗುತ್ತೆ. ಹಾಗಿದ್ರೂ ಯೆಹೋವ ನನ್ನನ್ನ ಪ್ರೀತಿಸ್ತಾನೆ ಮತ್ತು ನನಗೆ ಸಹಾಯ ಮಾಡ್ತಾನೆ ಅನ್ನೋ ಗ್ಯಾರಂಟಿ ನನಗಿದೆ.”