ದೇವರ ರಾಜ್ಯ ಇರೋದು ನಿಮ್ಮ ಹೃದಯದಲ್ಲಾ?

ಬೈಬಲ್‌ ಕೊಡೋ ಉತ್ತರ

ಇಲ್ಲ. ದೇವರ ರಾಜ್ಯ ಕೇವಲ ಕ್ರೈಸ್ತರ ಮನಸ್ಸಿನಲ್ಲಿರುವ ಒಂದು ಸ್ಥಿತಿಯಲ್ಲ.a ದೇವರ ರಾಜ್ಯ ಇರೋದು ‘ಸ್ವರ್ಗದಲ್ಲಿ’ ಅಂತ ಬೈಬಲ್‌ ಹೇಳುತ್ತೆ. (ಮತ್ತಾಯ 4:17) ದೇವರ ರಾಜ್ಯ ಸ್ವರ್ಗದಿಂದ ಆಳುತ್ತಿರುವ ಒಂದು ನಿಜವಾದ ಸರ್ಕಾರ ಅನ್ನೋದನ್ನ ಬೈಬಲ್‌ ಹೇಗೆ ತೋರಿಸುತ್ತೆ ಅಂತ ನೋಡೋಣ.

• ಆಳುವ ರಾಜರು, ಪ್ರಜೆಗಳು ಮತ್ತು ನಿಯಮಗಳು ದೇವರ ರಾಜ್ಯದಲ್ಲಿ ಇರುತ್ತೆ. ದೇವರ ಚಿತ್ತ ಸ್ವರ್ಗದಲ್ಲಿ ಮತ್ತು ಭೂಮಿಯಲ್ಲಿ ಸರಾಗವಾಗಿ ನೆರವೇರೋಕೆ ಬೇಕಾದಂತ ಕಟ್ಟುಪಾಡುಗಳೂ ಇರುತ್ತವೆ.—ಮತ್ತಾಯ 6:10; ಪ್ರಕಟನೆ 5:10.

• ದೇವರ ಸರ್ಕಾರ ಅಥವಾ ರಾಜ್ಯ ಭೂಮಿ ಮೇಲಿರೋ “ಎಲ್ಲ ಜನ್ರು, ದೇಶಗಳು, ಬೇರೆಬೇರೆ ಭಾಷೆ ಮಾತಾಡೋ ಜನ್ರ” ಮೇಲೆ ಆಳ್ವಿಕೆ ನಡೆಸುತ್ತೆ. (ದಾನಿಯೇಲ 7:13, 14) ಈ ಆಳ್ವಿಕೆ ನಡೆಸೋಕೆ ಬೇಕಾದ ಅಧಿಕಾರ ಪ್ರಜೆಗಳಿಂದ ಬರಲ್ಲ ಬದಲಾಗಿ ದೇವರಿಂದ ಬರುತ್ತೆ ಅಂತ ನಮಗೆ ಗೊತ್ತಾಗುತ್ತೆ.—ಕೀರ್ತನೆ 2:4-6; ಯೆಶಾಯ 9:7.

• ತನ್ನ ನಂಬಿಗಸ್ತ ಅಪೊಸ್ತಲರಿಗೆ ಯೇಸು ‘ನೀವು ನನ್ನ ಜೊತೆ ಸಿಂಹಾಸನದ ಮೇಲೆ ಕೂತು’ ಆಳ್ತೀರಾ ಅಂತ ಹೇಳಿದ.—ಲೂಕ 22:28, 30.

• ದೇವರ ರಾಜ್ಯಕ್ಕೆ ಶತ್ರುಗಳು ಕೂಡ ಇದ್ದಾರೆ. ಆ ಶತ್ರುಗಳನ್ನ ದೇವರ ರಾಜ್ಯನೇ ನಾಶಮಾಡುತ್ತೆ.—ಕೀರ್ತನೆ 2:1, 2, 8, 9; 110:1, 2; 1 ಕೊರಿಂಥ 15:25, 26.

ದೇವರ ರಾಜ್ಯ ನಮ್ಮ ಹೃದಯದಲ್ಲಿದೆ ಅಥವಾ ಒಬ್ಬ ವ್ಯಕ್ತಿಯ ಹೃದಯದ ಮೂಲಕ ಆ ರಾಜ್ಯ ಆಳ್ತಿದೆ ಅಂತ ಬೈಬಲ್‌ನಲ್ಲಿ ಎಲ್ಲೂ ಹೇಳಲ್ಲ. ಆದ್ರೆ “ದೇವರ ಆಳ್ವಿಕೆಯ ಸಂದೇಶ” ಅಥವಾ “ದೇವರ ಆಳ್ವಿಕೆಯ ಈ ಸಿಹಿಸುದ್ದಿ” ನಮ್ಮ ಹೃದಯವನ್ನ ಪ್ರಭಾವಿಸೋ ಹಾಗೆ ಬಿಡಬೇಕು ಅಂತ ಬೈಬಲ್‌ ಹೇಳುತ್ತೆ.—ಮತ್ತಾಯ 13:19; 24:14.

“ದೇವರ ರಾಜ್ಯ ನಿಮ್ಮಲ್ಲಿಯೇ” ಇದೆ ಅನ್ನೋದರ ಅರ್ಥ ಏನು?

ಲೂಕ 17:21ನ್ನ ಕೆಲವು ಬೈಬಲ್‌ಗಳಲ್ಲಿ ಭಾಷಾಂತರಿಸಿರುವ ರೀತಿ ದೇವರ ರಾಜ್ಯ ಎಲ್ಲಿದೆ ಅಥವಾ ಯಾವ ಜಾಗದಲ್ಲಿದೆ ಅನ್ನೋದರ ಬಗ್ಗೆ ಕೆಲವು ಜನರಲ್ಲಿ ಗೊಂದಲಗಳನ್ನ ಉಂಟುಮಾಡಿವೆ. ಉದಾಹರಣೆಗೆ, ಸತ್ಯವೇದವು ಬೈಬಲ್‌ನಲ್ಲಿ “ದೇವರ ರಾಜ್ಯ ನಿಮ್ಮಲ್ಲಿಯೇ ಅದೇ” ಅಂತ ಭಾಷಾಂತರಿಸಲಾಗಿದೆ. ಈ ವಚನವನ್ನ ಚೆನ್ನಾಗಿ ಅರ್ಥ ಮಾಡ್ಕೊಬೇಕಂದ್ರೆ ಅದರ ಹಿಂದೆ-ಮುಂದೆ ಇರುವ ವಚನಗಳನ್ನ ನೋಡಬೇಕು.

ಇದರ ಹಿಂದೆ ಇರುವ ವಚನಗಳನ್ನ ನೋಡಿದರೆ ಒಂದು ವಿಷ್ಯ ಗೊತ್ತಾಗುತ್ತೆ, ಯೇಸು ಮಾತಾಡ್ತಾ ಇದಿದ್ದು ಫರಿಸಾಯರ ಬಗ್ಗೆ. ಅವರು ಯೇಸುವನ್ನ ವಿರೋಧಿಸುವುದು ಮಾತ್ರ ಅಲ್ಲ ಆತನನ್ನ ಸಾಯಿಸೋದಕ್ಕೂ ಸಂಚು ಮಾಡುತ್ತಿದ್ದರು. (ಮತ್ತಾಯ 12:14; ಲೂಕ 17:20) ಹೀಗಿರೋವಾಗ, ದೇವರ ರಾಜ್ಯ ಇಂತಹ ಕಠಿಣ ಹೃದಯಗಳ ಒಂದು ಸ್ಥಿತಿಯಾಗಿತ್ತು ಅಂತ ನಾವು ಹೇಳೋದು ಎಷ್ಟು ಮಾತ್ರಕ್ಕೆ ಸರಿ? ಯೇಸು ಅವರಿಗೆ ಹೀಗಂದನು: “ನಿಮ್ಮೊಳಗೆ ಕಪಟತನ, ಅನ್ಯಾಯ ತುಂಬಿಕೊಂಡಿದೆ.”—ಮತ್ತಾಯ 23:27, 28.

ಆದರೆ ಕೆಲವು ಭಾಷಾಂತರಗಳಲ್ಲಿ ಲೂಕ 17:21ನ ಸರಿಯಾದ ರೀತಿಯಲ್ಲಿ ಅನುವಾದ ಮಾಡಿದ್ದಾರೆ. ಉದಾಹರಣೆಗೆ, “ದೇವರ ರಾಜ್ಯ ಇಲ್ಲೇ ನಿಮ್ಮ ಜೊತೆ ಇದೆ.” (ಕಂಟೆಂಪರರಿ ಇಂಗ್ಲಿಷ್‌ ವರ್ಷನ್‌) ಮತ್ತು “ದೇವರ ಆಳ್ವಿಕೆ ನಿಮ್ಮ ಮಧ್ಯದಲ್ಲೇ ಇದೆ.” (ಹೊಸ ಲೋಕ ಭಾಷಾಂತರ) ಈ ಎರಡು ಭಾಷಾಂತರಗಳಿಂದ ಯೇಸು ನಿಜವಾಗ್ಲೂ ಏನು ಹೇಳ್ತಿದ್ದ ಅಂತ ಗೊತ್ತಾಗುತ್ತೆ. ಅದೇನಂದ್ರೆ ಯೇಸು ದೇವರ ರಾಜ್ಯದ ರಾಜ. ಆ ರಾಜನೇ ಫರಿಸಾಯರ ಮಧ್ಯೆ ಇದ್ದ. ಹಾಗಾಗಿ ದೇವರ ರಾಜ್ಯನೇ ಒಂದು ರೀತಿಯಲ್ಲಿ ಅವರ ಜೊತೆ ಇತ್ತು.—ಲೂಕ 1:32, 33.