ಯೋಹಾನನು ಕಂಡ ದರ್ಶನಗಳು

ಅಪೊಸ್ತಲ ಯೋಹಾನನು ಪತ್ಮೋಸ್‌ ದ್ವೀಪದ ಜೈಲಿನಲ್ಲಿದ್ದನು. ಆಗ ಯೇಸು ಅವನಿಗೆ ಭವಿಷ್ಯತ್ತಿನ ಬಗ್ಗೆ ಒಂದರ ನಂತರ ಒಂದಂತೆ 16 ದರ್ಶನಗಳನ್ನು ಅಥವಾ ಚಿತ್ರಗಳನ್ನು ತೋರಿಸಿದನು. ಯೆಹೋವನ ಹೆಸರು ಹೇಗೆ ಪವಿತ್ರ ಆಗುವುದು, ಆತನ ಆಳ್ವಿಕೆ ಹೇಗೆ ಬರುವುದು ಮತ್ತು ಸ್ವರ್ಗದಲ್ಲಿ ನೆರವೇರಿದಂತೆ ಭೂಮಿಯಲ್ಲೂ ಆತನ ಇಷ್ಟ ಹೇಗೆ ನೆರವೇರುವುದು ಎಂದು ಈ ದರ್ಶನಗಳು ತಿಳಿಸಿದವು.

ಒಂದು ದರ್ಶನದಲ್ಲಿ, ಯೋಹಾನನು ಸ್ವರ್ಗದಲ್ಲಿರುವ ಯೆಹೋವನ ಮಹಿಮಾಭರಿತ ಸಿಂಹಾಸನವನ್ನು ಕಂಡನು. ಅದರ ಸುತ್ತಲು ಬಿಳೀ ಬಟ್ಟೆಗಳನ್ನು ಧರಿಸಿರುವ 24 ಹಿರಿಯರು ಇದ್ದರು. ಅವರ ತಲೆಗಳ ಮೇಲೆ ಚಿನ್ನದ ಕಿರೀಟಗಳಿದ್ದವು. ಸಿಂಹಾಸನದ ಒಳಗಿಂದ ಮಿಂಚು, ಗುಡುಗುಗಳ ಶಬ್ದ ಕೇಳಿ ಬರುತ್ತಿತ್ತು. ಆಗ ಆ 24 ಹಿರಿಯರು ಯೆಹೋವನನ್ನು ಆರಾಧಿಸಿದರು. ಇನ್ನೊಂದು ದರ್ಶನದಲ್ಲಿ, ಯೋಹಾನನು ಎಲ್ಲ ಜನಾಂಗ, ಕುಲ, ಭಾಷೆಯಿಂದ ಬಂದ ಒಂದು ದೊಡ್ಡ ಗುಂಪು ಯೆಹೋವನನ್ನು ಆರಾಧಿಸುತ್ತಿರುವುದನ್ನು ಕಂಡನು. ಕುರಿಮರಿಯಾದ ಯೇಸು ಅವರನ್ನು ಜೀವಜಲಕ್ಕೆ ನಡೆಸಿದನು. ನಂತರದ ದರ್ಶನದಲ್ಲಿ, 24 ಹಿರಿಯರೊಟ್ಟಿಗೆ ಯೇಸು ಸ್ವರ್ಗದಲ್ಲಿ ರಾಜನಾಗಿ ಆಳುವುದನ್ನು ಕಂಡನು. ಮತ್ತೊಂದು ದರ್ಶನದಲ್ಲಿ, ಯೇಸು ಘಟಸರ್ಪನಾದ ಸೈತಾನ ಮತ್ತವನ ಕೆಟ್ಟ ದೂತರೊಂದಿಗೆ ಯುದ್ಧ ಮಾಡುವುದನ್ನು ಯೋಹಾನ ನೋಡಿದನು. ಯೇಸು ಅವರೆಲ್ಲರನ್ನು ಸ್ವರ್ಗದಿಂದ ಭೂಮಿಗೆ ದೊಬ್ಬಿಬಿಟ್ಟನು.

ಆಮೇಲೆ, ಕುರಿಮರಿ ಮತ್ತು 1,44,000 ಮಂದಿ ಚಿಯೋನ್‌ ಬೆಟ್ಟದ ಮೇಲೆ ನಿಂತಿರುವ ಸುಂದರ ಚಿತ್ರವನ್ನು ಯೋಹಾನ ನೋಡುತ್ತಾನೆ. ಭೂಮಿಯ ಮೇಲೆ ಹಾರುತ್ತಿದ್ದ ಒಬ್ಬ ದೇವದೂತನನ್ನು ಸಹ ಯೋಹಾನ ನೋಡಿದನು. ಆ ದೇವದೂತನು ಜನರಿಗೆ, ‘ದೇವರಿಗೆ ಭಯಪಡಿ ಆತನಿಗೆ ಗೌರವ ಕೊಡಿ’ ಎಂದು ಹೇಳುತ್ತಿದ್ದನು.

ಮುಂದಿನ ದರ್ಶನದಲ್ಲಿ ಅರ್ಮಗೆದೋನ್‌ ಯುದ್ಧವನ್ನು ಕಂಡನು. ಆ ಯುದ್ಧದಲ್ಲಿ ಯೇಸು ಮತ್ತವನ ಸೈನ್ಯ ಸೈತಾನನ ದುಷ್ಟ ವ್ಯವಸ್ಥೆಯ ಮೇಲೆ ಆಕ್ರಮಣ ಮಾಡಿತು. ಕೊನೆಯ ದರ್ಶನದಲ್ಲಿ ಸ್ವರ್ಗ ಮತ್ತು ಭೂಮಿಯಲ್ಲಿ ಶಾಂತಿ ಸಮಾಧಾನ ಇರುವುದನ್ನು ಯೋಹಾನ ಕಾಣುತ್ತಾನೆ. ಸೈತಾನ ಮತ್ತು ಅವನ ಸಂತತಿಯವರು ಸಂಪೂರ್ಣವಾಗಿ ನಾಶವಾದರು. ಸ್ವರ್ಗ ಮತ್ತು ಭೂಮಿಯಲ್ಲಿರುವ ಎಲ್ಲರೂ ಯೆಹೋವನ ಹೆಸರನ್ನು ಪವಿತ್ರವೆಂದು ಎಣಿಸಿ ಆತನನ್ನು ಮಾತ್ರ ಆರಾಧಿಸುತ್ತಿದ್ದರು.