ಮೆಸ್ಸೀಯನ ಆಗಮನ

ಮುಂತಿಳಿಸಲಾಗಿದ್ದ ಮೆಸ್ಸೀಯನನ್ನು ಗುರುತಿಸಲು ಯೆಹೋವನು ಜನರಿಗೆ ಸಹಾಯಮಾಡಿದನೋ? ಹೌದು. ಹೇಗೆಂಬುದನ್ನು ಪರಿಗಣಿಸಿರಿ. ಹೀಬ್ರು ಶಾಸ್ತ್ರಗ್ರಂಥವನ್ನು ಬರೆದು ಮುಗಿಸಿ ಈಗಾಗಲೇ ಸುಮಾರು 400 ವರ್ಷಗಳು ಕಳೆದಿದ್ದವು. ಗಲಿಲಾಯದ ಉತ್ತರ ಪ್ರಾಂತದಲ್ಲಿದ್ದ ನಜರೇತೆಂಬ ಪಟ್ಟಣದಲ್ಲಿ ಆಶ್ಚರ್ಯಕರ ಘಟನೆಯೊಂದು ಸಂಭವಿಸಿತು. ಆ ಪಟ್ಟಣದಲ್ಲಿ ವಾಸವಾಗಿದ್ದ ಮರಿಯಳೆಂಬ ಯುವತಿಗೆ ಗಬ್ರಿಯೇಲ ಎಂಬ ದೇವದೂತನು ದರ್ಶನ ನೀಡಿದನು! ದೇವರು ತನ್ನ ಪವಿತ್ರಾತ್ಮವನ್ನು ಅಂದರೆ ಕಾರ್ಯಕಾರಿ ಶಕ್ತಿಯನ್ನು ಆಕೆಯ ಮೇಲೆ ಉಪಯೋಗಿಸುವನೆಂದೂ, ಹೀಗೆ ಕನ್ಯೆಯಾಗಿರುವ ಅವಳು ಒಬ್ಬ ಮಗನಿಗೆ ಜನ್ಮನೀಡುವಳೆಂದೂ ಆ ದೇವದೂತನು ಮರಿಯಳಿಗೆ ಹೇಳಿದನು. ಅವಳಿಗೆ ಹುಟ್ಟುವ ಮಗನೇ ಬಹಳ ಹಿಂದೆ ದೇವರು ವಾಗ್ದಾನಿಸಿದ್ದ ರಾಜನಾಗಲಿರುವನು ಹಾಗೂ ಅವನ ಆಳ್ವಿಕೆಯು ಶಾಶ್ವತವಾಗಿರುವುದು ಎಂದು ಸಹ ಆ ದೇವದೂತನು ಹೇಳಿದನು. ಮಾತ್ರವಲ್ಲ, ಯೆಹೋವ ದೇವರು ಸ್ವರ್ಗದಲ್ಲಿದ್ದ ತನ್ನ ಮಗನ ಜೀವವನ್ನು ಮರಿಯಳ ಗರ್ಭಕ್ಕೆ ವರ್ಗಾಯಿಸುವನೆಂದೂ ಹುಟ್ಟುವ ಆ ಶಿಶು ದೇವರ ಮಗನೆನಿಸಿಕೊಳ್ಳುವನೆಂದೂ ಮರಿಯಳಿಗೆ ತಿಳಿಸಿದನು.

ದೇವದೂತನು ನೀಡಿದ ಆ ಅಪೂರ್ವ ಹೊಣೆಗಾರಿಕೆಯನ್ನು ಮರಿಯಳು ದೀನತೆಯಿಂದ ಸ್ವೀಕರಿಸಿದಳು. ದೇವರು ತನ್ನ ದೂತನನ್ನು ಯೋಸೇಫನೆಂಬ ಬಡಗಿಯ ಬಳಿಗೆ ಕಳುಹಿಸಿದನು. ಈ ಯೋಸೇಫನಿಗೆ ಮರಿಯಳೊಂದಿಗೆ ಈಗಾಗಲೇ ನಿಶ್ಚಿತಾರ್ಥವಾಗಿತ್ತು. ಮರಿಯಳು ಗರ್ಭಿಣಿಯಾಗಲು ಕಾರಣವೇನೆಂಬುದನ್ನು ಆ ದೂತನು ವಿವರಿಸಿದ ಮೇಲೆ ಯೋಸೇಫನು ಮರಿಯಳನ್ನು ಮದುವೆಯಾದನು. ಅವರಿಬ್ಬರೂ ನಜರೇತಿನಲ್ಲಿ ವಾಸಿಸಿದರು. ಆದರೆ ಮೆಸ್ಸೀಯನು ಬೇತ್ಲೆಹೇಮಿನಲ್ಲಿ ಹುಟ್ಟುವನೆಂದು ಪ್ರವಾದನೆ ಹೇಳಲಾಗಿತ್ತಲ್ಲವೇ? (ಮೀಕ 5:2) ಆ ಚಿಕ್ಕ ಪಟ್ಟಣವಾದ ಬೇತ್ಲೆಹೇಮ್‌ ನಜರೇತಿನಿಂದ ಸುಮಾರು 140 ಕಿ.ಮೀ. ದೂರದಲ್ಲಿತ್ತು! ಹಾಗಾದರೆ ಆ ಪ್ರವಾದನೆ ಹೇಗೆ ನೆರವೇರಿತು?

ಆ ಸಮಯದಲ್ಲಿ ಅಧಿಕಾರದಲ್ಲಿದ್ದ ರೋಮನ್‌ ಚಕ್ರವರ್ತಿಯು ಜನಗಣತಿಯನ್ನು ಮಾಡಲು ನಿರ್ಧರಿಸಿದನು. ಆದ್ದರಿಂದ ಪ್ರತಿಯೊಬ್ಬರು ಹೆಸರನ್ನು ನೋಂದಾಯಿಸಿಕೊಳ್ಳಲು ತಮ್ಮ ಹುಟ್ಟೂರಿಗೆ ಹೋಗಬೇಕಿತ್ತು. ಯೋಸೇಫನು ಮತ್ತು ಮರಿಯಳು ಬೇತ್ಲೆಹೇಮಿನವರೇ ಆಗಿದ್ದಿರಬೇಕು. ಹಾಗಾಗಿ ಯೋಸೇಫನು ತುಂಬು ಗರ್ಭಿಣಿಯಾಗಿದ್ದ ಮರಿಯಳನ್ನು ಬೇತ್ಲೆಹೇಮಿಗೆ ಕರೆದುಕೊಂಡು ಹೋದನು. (ಲೂಕ 2:3) ಅಲ್ಲಿ ಕೊಟ್ಟಿಗೆಯೊಂದರಲ್ಲಿ ಮರಿಯಳು ಮಗುವಿಗೆ ಜನ್ಮನೀಡಿ ಮಗುವನ್ನು ಗೋದಲಿಯಲ್ಲಿ ಮಲಗಿಸಿದಳು. ವಾಗ್ದತ್ತ ಮೆಸ್ಸೀಯನು ಅಥವಾ ಕ್ರಿಸ್ತನು ಹುಟ್ಟಿದ್ದಾನೆಂಬ ಈ ಸುದ್ದಿಯನ್ನು ಬೆಟ್ಟದ ತಪ್ಪಲಿನಲ್ಲಿ ಕುರಿಕಾಯುತ್ತಿದ್ದವರಿಗೆ ತಿಳಿಸಲು ದೇವರು ಒಬ್ಬ ದೇವದೂತನನ್ನು ಕಳುಹಿಸಿದನು.

ಯೇಸುವೇ ವಾಗ್ದತ್ತ ಮೆಸ್ಸೀಯನೆಂಬುದನ್ನು ತದನಂತರ ಇತರ ಜನರು ಸಹ ದೃಢಪಡಿಸಿದರು. ಮೆಸ್ಸೀಯನು ಮಾಡಲಿದ್ದ ಮಹತ್ತ್ವದ ಕೆಲಸಕ್ಕಾಗಿ ದಾರಿ ಸಿದ್ಧಪಡಿಸುವ ವ್ಯಕ್ತಿಯೊಬ್ಬನು ಬರಲಿದ್ದಾನೆಂದು ಯೆಶಾಯ ಪ್ರವಾದಿಯು ಮುಂತಿಳಿಸಿದ್ದನು. (ಯೆಶಾಯ 40:3) ಆ ವ್ಯಕ್ತಿ ಸ್ನಾನಿಕನಾದ ಯೋಹಾನನಾಗಿದ್ದನು. ಈ ಯೋಹಾನನು ಯೇಸುವನ್ನು ಕಂಡೊಡನೆ, “ನೋಡಿ, ಲೋಕದ ಪಾಪವನ್ನು ತೆಗೆದುಹಾಕುವ ದೇವರ ಕುರಿಮರಿ!” ಎಂದು ಉದ್ಗರಿಸಿದನು. ಕೂಡಲೇ ಯೋಹಾನನ ಶಿಷ್ಯರಲ್ಲಿ ಅನೇಕರು ಯೇಸುವನ್ನು ಹಿಂಬಾಲಿಸಲು ಪ್ರಾರಂಭಿಸಿದರು. ಅವರಲ್ಲಿ ಒಬ್ಬನು “ನಮಗೆ ಮೆಸ್ಸೀಯನು ಸಿಕ್ಕಿದ್ದಾನೆ” ಎಂದು ಹೇಳಿದನು.—ಯೋಹಾನ 1:29, 36, 41.

ಯೇಸುವೇ ಮೆಸ್ಸೀಯನೆಂದು ತೋರಿಸಿದ ಮತ್ತೊಂದು ರುಜುವಾತೂ ಇತ್ತು. ಯೇಸು ಸ್ನಾನಿಕನಾದ ಯೋಹಾನನಿಂದ ದೀಕ್ಷಾಸ್ನಾನ ಪಡೆದುಕೊಂಡಾಗ ಸ್ವತಃ ಯೆಹೋವ ದೇವರೇ ಸ್ವರ್ಗದಿಂದ ಮಾತಾಡಿದನು. ಪವಿತ್ರಾತ್ಮದ ಮೂಲಕ ಯೇಸುವನ್ನು ಮೆಸ್ಸೀಯನಾಗಿ ಅಭಿಷೇಕಿಸಿ, “ಇವನು ಪ್ರಿಯನಾಗಿರುವ ನನ್ನ ಮಗನು; ಇವನನ್ನು ನಾನು ಮೆಚ್ಚಿದ್ದೇನೆ” ಎಂದು ದೇವರು ಹೇಳಿದನು. (ಮತ್ತಾಯ 3:16, 17) ಎಷ್ಟೋ ಸಮಯಗಳಿಂದ ಎದುರುನೋಡುತ್ತಿದ್ದ ಮೆಸ್ಸೀಯನು ಈಗ ಆಗಮಿಸಿದ್ದನು!

ಇದು ಯಾವಾಗ ನಡೆಯಿತು? ಕ್ರಿ.ಶ. 29ರಲ್ಲಿ. ಅಂದರೆ ಸರಿಯಾಗಿ, ದಾನಿಯೇಲನು ಹೇಳಿದ 483 ವರ್ಷಗಳು ಮುಗಿದ ಮೇಲೆ! ಇದು ಸಹ ಯೇಸುವೇ ಮೆಸ್ಸೀಯನು ಅಥವಾ ಕ್ರಿಸ್ತನು ಎಂಬುದಕ್ಕೆ ಅಲ್ಲಗಳೆಯಲಾಗದ ಒಂದು ರುಜುವಾತಾಗಿದೆ. ಈ ಮೆಸ್ಸೀಯನು ಭೂಮಿಯಲ್ಲಿದ್ದಾಗ ಯಾವ ಸಂದೇಶವನ್ನು ಸಾರಿದನು?

—ಮತ್ತಾಯ ಅಧ್ಯಾಯ 1ರಿಂದ 3; ಮಾರ್ಕ ಅಧ್ಯಾಯ 1; ಲೂಕ ಅಧ್ಯಾಯ 2; ಯೋಹಾನ ಅಧ್ಯಾಯ 1ರ ಮೇಲೆ ಆಧಾರಿತವಾಗಿದೆ.