ಹೆತ್ತವರೇ, ನಿಮ್ಮ ಮಾದರಿಯು ಏನನ್ನು ಕಲಿಸುತ್ತದೆ?

“ದೇವರ ಪ್ರಿಯರಾದ ಮಕ್ಕಳಿಗೆ ತಕ್ಕ ಹಾಗೆ ಆತನನ್ನು ಅನುಸರಿಸುವವರಾಗಿರಿ. . . . ನೀವೂ ಪ್ರೀತಿಯಲ್ಲಿ ನಡೆದುಕೊಳ್ಳಿರಿ.”—ಎಫೆಸ 5:1, 2.

1. ಪ್ರಥಮ ಮಾನವ ದಂಪತಿಗೆ ಯೆಹೋವನು ಯಾವ ರೀತಿಯ ನಿರ್ದೇಶನಗಳನ್ನು ಒದಗಿಸಿದನು?

ಯೆಹೋವನು ಕುಟುಂಬ ಏರ್ಪಾಡಿನ ಮೂಲಕರ್ತನಾಗಿದ್ದಾನೆ. ಆತನು ಮೊದಲ ಕುಟುಂಬವನ್ನು ಸ್ಥಾಪಿಸಿ, ಪ್ರಥಮ ಮಾನವ ದಂಪತಿಗಳಿಗೆ ಜನ್ಮನೀಡುವ ಸಾಮರ್ಥ್ಯವನ್ನು ಕೊಟ್ಟ ಕಾರಣ, ಪ್ರತಿಯೊಂದು ಕುಟುಂಬವು ತನ್ನ ಅಸ್ತಿತ್ವಕ್ಕಾಗಿ ಆತನಿಗೆ ಋಣಿಯಾಗಿದೆ. (ಎಫೆಸ 3:14, 15) ಆದಾಮಹವ್ವರ ಜವಾಬ್ದಾರಿಗಳೇನು ಎಂಬುದರ ಬಗ್ಗೆ ಆತನು ಮೂಲಭೂತ ಉಪದೇಶಗಳನ್ನು ನೀಡಿ, ಅವುಗಳನ್ನು ಪೂರೈಸುತ್ತಾ ಮುಂದುವರಿಯಲು ಅವರಿಗೆ ಸಾಕಷ್ಟು ಅವಕಾಶವನ್ನು ನೀಡಿದನು. (ಆದಿಕಾಂಡ 1:28-30; 2:6, 15-22) ಆದಾಮಹವ್ವರು ಪಾಪಗೈದ ಮೇಲೆ, ಕುಟುಂಬಗಳು ನಿಭಾಯಿಸಬೇಕಾದ ಸನ್ನಿವೇಶಗಳು ತುಂಬ ಕಷ್ಟಕರವಾದವು. ಆದರೂ, ಇಂತಹ ಸನ್ನಿವೇಶಗಳನ್ನು ತನ್ನ ಸೇವಕರು ನಿಭಾಯಿಸುವಂತೆ ಸಹಾಯ ಮಾಡಲು ಯೆಹೋವನು ಪ್ರೀತಿಪೂರ್ವಕವಾಗಿ ಮಾರ್ಗದರ್ಶನಗಳನ್ನು ಒದಗಿಸಿದನು.

2. (ಎ) ಯಾವ ವಿಧಾನದ ಮೂಲಕ ಯೆಹೋವನು ಲಿಖಿತ ಸಲಹೆಯನ್ನು ಮೌಖಿಕ ಉಪದೇಶದೊಂದಿಗೆ ಬಲಪಡಿಸಿದ್ದಾನೆ? (ಬಿ) ಯಾವ ಪ್ರಶ್ನೆಗಳನ್ನು ಹೆತ್ತವರು ಸ್ವತಃ ಕೇಳಿಕೊಳ್ಳಬೇಕು?

² ನಮ್ಮ ಮಹಾನ್‌ ಉಪದೇಶಕನೋಪಾದಿ ಯೆಹೋವನು, ನಾವು ಏನು ಮಾಡಬೇಕು ಮತ್ತು ಯಾವುದರಿಂದ ದೂರವಿರಬೇಕು ಎಂಬುದರ ಕುರಿತಾದ ಲಿಖಿತ ನಿರ್ದೇಶನಗಳನ್ನು ಒದಗಿಸುವುದಕ್ಕಿಂತಲೂ ಹೆಚ್ಚಿನದ್ದನ್ನು ಮಾಡಿದ್ದಾನೆ. ಪುರಾತನ ಕಾಲಗಳಲ್ಲಿ ಲಿಖಿತ ಉಪದೇಶದೊಂದಿಗೆ ಯಾಜಕರು ಮತ್ತು ಪ್ರವಾದಿಗಳು ಹಾಗೂ ಕುಟುಂಬ ತಲೆಗಳ ಮೂಲಕ ಮೌಖಿಕ ಉಪದೇಶವನ್ನು ಆತನು ಒದಗಿಸಿದನು. ನಮ್ಮ ದಿನದಲ್ಲಿ ಇಂತಹ ಮೌಖಿಕ ಬೋಧನೆಯನ್ನು ಒದಗಿಸಲು ಆತನು ಯಾರನ್ನು ಉಪಯೋಗಿಸುತ್ತಿದ್ದಾನೆ? ಕ್ರೈಸ್ತ ಹಿರಿಯರನ್ನು ಮತ್ತು ಹೆತ್ತವರನ್ನು. ನೀವು ಒಬ್ಬ ಹೆತ್ತವರಾಗಿರುವುದಾದರೆ, ಯೆಹೋವನ ಮಾರ್ಗಗಳ ವಿಷಯವಾಗಿ ನಿಮ್ಮ ಕುಟುಂಬಕ್ಕೆ ಉಪದೇಶ ನೀಡುವ ನಿಮ್ಮ ಪಾತ್ರವನ್ನು ನಿರ್ವಹಿಸುತ್ತಿದ್ದೀರೊ?—ಜ್ಞಾನೋಕ್ತಿ 6:20-23.

3. ಪರಿಣಾಮಕಾರಿ ಬೋಧನೆಯ ವಿಷಯದಲ್ಲಿ ಕುಟುಂಬದ ತಲೆಗಳು ಯೆಹೋವನಿಂದ ಏನನ್ನು ಕಲಿತುಕೊಳ್ಳಸಾಧ್ಯವಿದೆ?

³ ಕುಟುಂಬದೊಳಗೆ ಇಂತಹ ಉಪದೇಶವನ್ನು ಹೇಗೆ ನೀಡಬೇಕು? ಈ ವಿಷಯದಲ್ಲಿ ಯೆಹೋವನು ಮಾದರಿಯನ್ನಿಡುತ್ತಾನೆ. ಯಾವುದು ಒಳ್ಳೆಯದು ಮತ್ತು ಯಾವುದು ಕೆಟ್ಟದ್ದು ಎಂಬುದನ್ನು ಆತನು ಸ್ಪಷ್ಟವಾಗಿ ತಿಳಿಸುತ್ತಾ, ವಿಷಯಗಳನ್ನು ಮತ್ತೆ ಮತ್ತೆ ಪುನರಾವರ್ತಿಸುತ್ತಾನೆ. (ವಿಮೋಚನಕಾಂಡ 20:4, 5; ಧರ್ಮೋಪದೇಶಕಾಂಡ 4:23, 24; 5:8, 9; 6:14, 15; ಯೆಹೋಶುವ 24:19, 20) ಆತನು ವಿಚಾರಪ್ರೇರಕ ಪ್ರಶ್ನೆಗಳನ್ನು ಉಪಯೋಗಿಸುತ್ತಾನೆ. (ಯೋಬ 38:4, 8, 31) ದೃಷ್ಟಾಂತಗಳು ಮತ್ತು ನಿಜ ಜೀವನದ ಉದಾಹರಣೆಗಳಿಂದ ಆತನು ನಮ್ಮ ಭಾವನೆಗಳನ್ನು ಕೆರಳಿಸಿ, ನಮ್ಮ ಹೃದಯಗಳನ್ನು ರೂಪಿಸುತ್ತಾನೆ. (ಆದಿಕಾಂಡ 15:5; ದಾನಿಯೇಲ 3:1-29) ಹೆತ್ತವರೇ, ನಿಮ್ಮ ಮಕ್ಕಳಿಗೆ ಕಲಿಸುವಾಗ ಈ ನಮೂನೆಯನ್ನು ಅನುಕರಿಸಲು ನೀವು ಪ್ರಯತ್ನಿಸುತ್ತೀರೊ?

4. ದಂಡನೆ ವಿಧಿಸುವ ವಿಷಯದಲ್ಲಿ ನಾವು ಯೆಹೋವನಿಂದ ಏನನ್ನು ಕಲಿಯುತ್ತೇವೆ, ಮತ್ತು ದಂಡನೆಯು ಏಕೆ ಪ್ರಾಮುಖ್ಯವಾಗಿದೆ?

⁴ ಸರಿಯಾದ ವಿಷಯಗಳ ಸಂಬಂಧದಲ್ಲಿ ಯೆಹೋವನು ದೃಢನಾಗಿರುವುದಾದರೂ, ಅಪರಿಪೂರ್ಣತೆಯ ಪರಿಣಾಮಗಳನ್ನು ಆತನು ಅರ್ಥಮಾಡಿಕೊಳ್ಳುತ್ತಾನೆ. ಆದುದರಿಂದ, ದಂಡಿಸುವ ಮೊದಲು ಆತನು ಬೋಧಿಸುತ್ತಾನೆ ಮತ್ತು ಅಪರಿಪೂರ್ಣ ಮಾನವರಿಗೆ ಸತತವಾದ ಎಚ್ಚರಿಕೆಗಳನ್ನು ಹಾಗೂ ಮರುಜ್ಞಾಪನಗಳನ್ನು ನೀಡುತ್ತಾನೆ. (ಆದಿಕಾಂಡ 19:15, 16; ಯೆರೆಮೀಯ 7:23-26) ಆತನು ಶಿಕ್ಷಿಸುವಾಗ, ಅತಿರೇಕಕ್ಕೆ ಹೋಗುವುದಿಲ್ಲ, ಬದಲಾಗಿ ಉಚಿತ ರೀತಿಯಲ್ಲಿ ಹಾಗೆ ಮಾಡುತ್ತಾನೆ. (ಕೀರ್ತನೆ 103:10, 11; ಯೆಶಾಯ 28:26-29) ನಾವು ಮಕ್ಕಳೊಂದಿಗೆ ಈ ರೀತಿಯಲ್ಲಿ ವರ್ತಿಸುವಾಗ, ನಾವು ಯೆಹೋವನನ್ನು ಅರಿತುಕೊಂಡಿದ್ದೇವೆ ಎಂಬ ಪ್ರಮಾಣವನ್ನು ಇದು ನೀಡುತ್ತದೆ ಮಾತ್ರವಲ್ಲ, ಮಕ್ಕಳು ಸಹ ಆತನನ್ನು ಸುಲಭವಾಗಿ ಅರ್ಥಮಾಡಿಕೊಳ್ಳಸಾಧ್ಯವಾಗುವುದು.—ಯೆರೆಮೀಯ 22:16; 1 ಯೋಹಾನ 4:8.

5. ಆಲಿಸುವುದರ ಬಗ್ಗೆ ಹೆತ್ತವರು ಯೆಹೋವನಿಂದ ಏನನ್ನು ಕಲಿಯಬಲ್ಲರು?

⁵ ಅದ್ಭುತಕರವಾಗಿ, ಯೆಹೋವನು ಒಬ್ಬ ಪ್ರೀತಿಪರ ಸ್ವರ್ಗೀಯ ತಂದೆಯಂತೆ ಆಲಿಸುತ್ತಾನೆ. ಆತನು ಕೇವಲ ಆಜ್ಞೆಗಳನ್ನು ಹೊರಡಿಸುವುದಿಲ್ಲ. ನಮ್ಮ ಹೃದಯಗಳನ್ನು ಆತನಲ್ಲಿ ತೋಡಿಕೊಳ್ಳುವಂತೆ ಆತನು ಉತ್ತೇಜಿಸುತ್ತಾನೆ. (ಕೀರ್ತನೆ 62:8) ನಾವು ವ್ಯಕ್ತಪಡಿಸುವ ಭಾವನೆಗಳು ಸರಿಯಾಗಿರದಿದ್ದರೆ, ಆತನು ಸ್ವರ್ಗದಿಂದ ನಮ್ಮನ್ನು ಬಯ್ಯುವುದಿಲ್ಲ. ತಾಳ್ಮೆಯಿಂದ ಆತನು ನಮಗೆ ಕಲಿಸುತ್ತಾನೆ. ಆದುದರಿಂದ, ಅಪೊಸ್ತಲ ಪೌಲನ ಸಲಹೆಯು ಎಷ್ಟು ಸೂಕ್ತವಾಗಿದೆ: “ದೇವರ ಪ್ರಿಯರಾದ ಮಕ್ಕಳಿಗೆ ತಕ್ಕ ಹಾಗೆ ಆತನನ್ನು ಅನುಸರಿಸುವವರಾಗಿರಿ”! (ಎಫೆಸ 4:31-5:1) ಹೆತ್ತವರು ತಮ್ಮ ಮಕ್ಕಳಿಗೆ ಉಪದೇಶವನ್ನು ನೀಡಲು ಪ್ರಯತ್ನಿಸುವಾಗ, ಯೆಹೋವನು ಹೆತ್ತವರಿಗೆ ಎಂತಹ ಉತ್ತಮ ಮಾದರಿಯನ್ನಿಡುತ್ತಾನೆ! ಅದು ನಮ್ಮ ಹೃದಯಗಳನ್ನು ಸ್ಪರ್ಶಿಸುವ ಮತ್ತು ಆತನ ಜೀವನ ಮಾರ್ಗದಲ್ಲಿ ನಾವು ನಡೆಯಲು ಬಯಸುವಂತೆ ಮಾಡುವ ಮಾದರಿಯಾಗಿದೆ.

ಮಾದರಿಯು ಬೀರುವ ಪ್ರಭಾವ

6. ಹೆತ್ತವರ ಮನೋಭಾವ ಹಾಗೂ ಮಾದರಿಯು ಮಕ್ಕಳನ್ನು ಹೇಗೆ ಪ್ರಭಾವಿಸುತ್ತದೆ?

⁶ ಮೌಖಿಕ ಉಪದೇಶದ ಜೊತೆಗೆ, ಮಾದರಿಯನ್ನಿಡುವುದು ಎಳೆಯರ ಮೇಲೆ ಆಳವಾದ ಪ್ರಭಾವವನ್ನು ಬೀರುತ್ತದೆ. ಹೆತ್ತವರು ಬಯಸಲಿ, ಬಯಸದಿರಲಿ, ಅವರ ಮಕ್ಕಳು ಅವರನ್ನು ಅನುಕರಿಸುವುದು ಖಂಡಿತ. ಹೆತ್ತವರು ನುಡಿಯುವ ಮಾತುಗಳನ್ನೇ ಮಕ್ಕಳು ನುಡಿಯುವುದನ್ನು ಕೇಳುವಾಗ, ಅವರಿಗೆ ಸಂತೋಷವಾಗಬಹುದು ಇಲ್ಲವೆ ಕೆಲವೊಮ್ಮೆ ಅದು ಅವರನ್ನು ತಲ್ಲಣಗೊಳಿಸಬಹುದು. ಹೆತ್ತವರ ನಡತೆ ಮತ್ತು ಮನೋಭಾವವು ಆತ್ಮಿಕ ವಿಷಯಗಳಿಗಾಗಿ ಆಳವಾದ ಗಣ್ಯತೆಯನ್ನು ಪ್ರತಿಬಿಂಬಿಸುವಾಗ, ಇದು ಮಕ್ಕಳ ಮೇಲೆ ಸಕಾರಾತ್ಮಕವಾದ ಪ್ರಭಾವವನ್ನು ಬೀರುತ್ತದೆ.—ಜ್ಞಾನೋಕ್ತಿ 20:7.

7. ಯೆಪ್ತಾಹನು ತನ್ನ ಮಗಳಿಗೆ ಯಾವ ರೀತಿಯ ಮಾದರಿಯನ್ನಿಟ್ಟನು, ಮತ್ತು ಯಾವ ಪರಿಣಾಮದೊಂದಿಗೆ?

⁷ ಹೆತ್ತವರ ಮಾದರಿಯ ಪರಿಣಾಮವು ಬೈಬಲಿನಲ್ಲಿ ಉತ್ತಮವಾಗಿ ದೃಷ್ಟಾಂತಿಸಲ್ಪಟ್ಟಿದೆ. ಅಮ್ಮೋನಿಯರ ಮೇಲೆ ಇಸ್ರಾಯೇಲ್‌ ಜನಾಂಗವು ಜಯಗಳಿಸುವಂತೆ ಯೆಹೋವನಿಂದ ಉಪಯೋಗಿಸಲ್ಪಟ್ಟ ಯೆಪ್ತಾಹನು ಕೂಡ ಒಬ್ಬ ತಂದೆಯಾಗಿದ್ದನು. ಯೆಪ್ತಾಹನು ಇಸ್ರಾಯೇಲ್ಯರೊಂದಿಗೆ ಯೆಹೋವನ ವ್ಯವಹಾರಗಳ ಇತಿಹಾಸವನ್ನು ಪದೇ ಪದೇ ಓದಿರಬೇಕೆಂದು, ಅವನು ಅಮ್ಮೋನಿಯರ ಅರಸನಿಗೆ ನೀಡಿದ ಉತ್ತರವು ಸೂಚಿಸುತ್ತದೆ. ಅವನು ಆ ಇತಿಹಾಸವನ್ನು ಸರಳವಾಗಿ ಉದ್ಧರಿಸಬಲ್ಲವನಾಗಿದ್ದನು, ಮತ್ತು ಯೆಹೋವನಲ್ಲಿ ಬಲವಾದ ನಂಬಿಕೆಯನ್ನು ಪ್ರದರ್ಶಿಸಿದನು. ಅವನ ಮಗಳು ಅವಿವಾಹಿತ ಸ್ತ್ರೀಯೋಪಾದಿ ಜೀವನವಿಡೀ ಯೆಹೋವನಿಗೆ ಸೇವೆ ಸಲ್ಲಿಸಲು ಪ್ರದರ್ಶಿಸಿದ ನಂಬಿಕೆ ಹಾಗೂ ಸ್ವತ್ಯಾಗದ ಆತ್ಮವನ್ನು ವಿಕಸಿಸಿಕೊಳ್ಳುವಂತೆ, ಅವನ ಮಾದರಿಯು ಸಹಾಯ ಮಾಡಿತೆಂಬುದರಲ್ಲಿ ಯಾವ ಸಂದೇಹವೂ ಇಲ್ಲ.—ನ್ಯಾಯಸ್ಥಾಪಕರು 11:14-27, 34-40; ಹೋಲಿಸಿ ಯೆಹೋಶುವ 1:8.

8. (ಎ) ಯಾವ ಉತ್ತಮ ಮನೋಭಾವವನ್ನು ಸಮುವೇಲನ ಹೆತ್ತವರು ಪ್ರದರ್ಶಿಸಿದರು? (ಬಿ) ಇದರಿಂದ ಸಮುವೇಲನಿಗಾದ ಪ್ರಯೋಜನವೇನು?

⁸ ಸಮುವೇಲನು ಮಗುವಾಗಿದ್ದಾಗ ಒಬ್ಬ ಆದರ್ಶಪ್ರಾಯನಾಗಿದ್ದನು ಮತ್ತು ತನ್ನ ಜೀವನದುದ್ದಕ್ಕೂ ಒಬ್ಬ ಪ್ರವಾದಿಯಾಗಿ ದೇವರಿಗೆ ನಂಬಿಗಸ್ತನಾಗಿದ್ದನು. ನಿಮ್ಮ ಮಕ್ಕಳೂ ಅವನಂತಾಗಲು ನೀವು ಬಯಸುವಿರೊ? ಸಮುವೇಲನ ಹೆತ್ತವರಾದ ಎಲ್ಕಾನ ಮತ್ತು ಹನ್ನಳ ಮಾದರಿಯನ್ನು ವಿಶ್ಲೇಷಿಸಿರಿ. ಅವರ ಮನೆಯ ಪರಿಸ್ಥಿತಿ ಅಷ್ಟೇನೂ ಉತ್ತಮವಾಗಿರದಿದ್ದರೂ, ಪವಿತ್ರ ಗುಡಾರವು ನೆಲೆಸಿದ್ದ ಶೀಲೋವಿಗೆ ಅವರು ಆರಾಧನೆಗಾಗಿ ಕ್ರಮವಾಗಿ ಹೋಗುತ್ತಿದ್ದರು. (1 ಸಮುವೇಲ 1:3-8, 21) ಹನ್ನಳು ಪ್ರಾರ್ಥಿಸಿದಾಗ ಅವಳ ಭಾವನೆಗಳ ಆಳವನ್ನು ಗಮನಿಸಿರಿ. (1 ಸಮುವೇಲ 1:9-13) ದೇವರಿಗೆ ಮಾಡಲ್ಪಟ್ಟ ಯಾವುದೇ ಹರಕೆಯನ್ನು ನೆರವೇರಿಸುವುದರ ಮಹತ್ವದ ಕುರಿತು ಅವರಿಬ್ಬರಿಗೂ ಹೇಗನಿಸಿತು ಎಂಬುದನ್ನು ಗಮನಿಸಿರಿ. (1 ಸಮುವೇಲ 1:22-28) ಅವರ ಉತ್ತಮ ಮಾದರಿಯು ಸಮುವೇಲನಿಗೆ ಸಹಾಯ ಮಾಡಿತೆಂಬುದರಲ್ಲಿ ಸಂದೇಹವೇ ಇಲ್ಲ. ಈ ಕಾರಣ, ಅವನ ಸುತ್ತಲ್ಲಿದ್ದ ಜನರು ಯೆಹೋವನನ್ನು ಸೇವಿಸುವ ಪ್ರತಿಪಾದನೆಯನ್ನು ಮಾಡಿದರೂ, ದೇವರ ಮಾರ್ಗಗಳಿಗೆ ಗೌರವವನ್ನೇ ತೋರಿಸದಿದ್ದಾಗ, ಪಟ್ಟುಬಿಡದೆ ಸರಿಯಾದ ಮಾರ್ಗಕ್ರಮದಲ್ಲಿ ಮುಂದುವರಿಯಲು ಶಕ್ತಗೊಳಿಸಿದ ಗುಣಗಳನ್ನು ವಿಕಸಿಸಿಕೊಳ್ಳಲು ಸಮುವೇಲನಿಗೆ ಸಾಧ್ಯವಾಯಿತು. ಸಕಾಲದಲ್ಲಿ, ಯೆಹೋವನು ಸಮುವೇಲನನ್ನು ತನ್ನ ಪ್ರವಾದಿಯಾಗಿರುವ ಜವಾಬ್ದಾರಿಗೆ ನೇಮಿಸಿಕೊಂಡನು.—1 ಸಮುವೇಲ 2:11, 12; 3:1-21.

9. (ಎ) ಮನೆಯಲ್ಲಿದ್ದ ಯಾವ ಪ್ರಭಾವಗಳು ತಿಮೊಥೆಯನ ಮೇಲೆ ಒಳ್ಳೆಯ ಪರಿಣಾಮವನ್ನು ಬೀರಿದವು? (ಬಿ) ತಿಮೊಥೆಯನು ಯಾವ ರೀತಿಯ ವ್ಯಕ್ತಿಯಾಗಿ ಪರಿಣಮಿಸಿದನು?

⁹ ಯುವಕನಾಗಿದ್ದಾಗ ಅಪೊಸ್ತಲ ಪೌಲನ ಜೊತೆಗಾರನಾದ ತಿಮೊಥೆಯನಂತೆ ನಿಮ್ಮ ಮಗನು ಆಗಬೇಕೆಂದು ನೀವು ಬಯಸುವಿರೊ? ತಿಮೊಥೆಯನ ತಂದೆ ಅವಿಶ್ವಾಸಿಯಾಗಿದ್ದನು, ಆದರೆ ಆತ್ಮಿಕ ವಿಷಯಗಳಿಗಾಗಿ ಗಣ್ಯತೆಯನ್ನು ತೋರಿಸುವುದರಲ್ಲಿ ಅವನ ತಾಯಿ ಮತ್ತು ಅಜ್ಜಿಯು ಉತ್ತಮವಾದ ಮಾದರಿಯನ್ನಿಟ್ಟರು. ಕ್ರೈಸ್ತನೋಪಾದಿ ತಿಮೊಥೆಯನ ಜೀವಿತಕ್ಕೆ ಇದೊಂದು ಒಳ್ಳೆಯ ಅಸ್ತಿವಾರವಾಗಿತ್ತೆಂಬುದರಲ್ಲಿ ಸಂದೇಹವೇ ಇಲ್ಲ. ಅವನ ತಾಯಿಯಾದ ಯೂನೀಕೆ ಹಾಗೂ ಅಜ್ಜಿಯಾದ ಲೋವಿಯಲ್ಲಿ “ನಿಷ್ಕಪಟವಾದ ನಂಬಿಕೆ” ಇತ್ತೆಂದು ನಮಗೆ ಹೇಳಲಾಗಿದೆ. ಕ್ರೈಸ್ತರೋಪಾದಿ ಅವರ ಜೀವಿತಗಳು ಒಂದು ನಾಟಕವಾಗಿರಲಿಲ್ಲ. ತಾವು ಏನನ್ನು ನಂಬಿದರೊ ಅದಕ್ಕನುಗುಣವಾಗಿ ಜೀವಿಸಿದರಲ್ಲದೆ, ಯುವ ತಿಮೊಥೆಯನಿಗೂ ಅದನ್ನೇ ಕಲಿಸಿದರು. ತಾನು ನಂಬಲರ್ಹನೆಂದು ಮತ್ತು ಇತರರ ಕ್ಷೇಮದ ಕುರಿತು ಯಥಾರ್ಥವಾಗಿ ಚಿಂತಿಸುವವನೆಂದು ತಿಮೊಥೆಯನು ನಿರೂಪಿಸಿದನು.—2 ತಿಮೊಥೆಯ 1:5; ಫಿಲಿಪ್ಪಿ 2:20-22.

10. (ಎ) ಮನೆಯ ಹೊರಗಿನ ಯಾವ ಮಾದರಿಗಳು ನಮ್ಮ ಮಕ್ಕಳ ಮೇಲೆ ಪ್ರಭಾವ ಬೀರಬಲ್ಲವು? (ಬಿ) ಈ ಪ್ರಭಾವಗಳು ನಮ್ಮ ಮಕ್ಕಳ ಮಾತುಕತೆ ಇಲ್ಲವೆ ಮನೋಭಾವದಲ್ಲಿ ತೋರಿಬರುವಾಗ, ನಾವು ಹೇಗೆ ಪ್ರತಿಕ್ರಿಯಿಸಬೇಕು?

¹⁰ ನಮ್ಮ ಮಕ್ಕಳನ್ನು ಪ್ರಭಾವಿಸುವ ಮಾದರಿಗಳೆಲ್ಲವೂ ಮನೆಯಲ್ಲಿ ಇರುವುದಿಲ್ಲ. ತಮ್ಮೊಂದಿಗೆ ಶಾಲೆಗೆ ಹಾಜರಾಗುವ ಮಕ್ಕಳು, ಯುವ ಮನಸ್ಸುಗಳನ್ನು ರೂಪಿಸುವ ಜವಾಬ್ದಾರಿಯುಳ್ಳ ಶಿಕ್ಷಕರು, ಆಳವಾಗಿ ಬೇರೂರಿರುವ ಕುಲಸಂಬಂಧಿತ ಇಲ್ಲವೆ ಸಮುದಾಯದ ರೂಢಿಗಳಿಗೆ ಎಲ್ಲರೂ ಬದ್ಧರಾಗಬೇಕೆಂದು ದೃಢವಾಗಿ ಭಾವಿಸುವ ಜನರು, ಸಾಧನೆಗಳ ವ್ಯಾಪಕ ಸ್ತುತಿಗೆ ಒಳಗಾದ ಕ್ರೀಡಾ ತಾರೆಗಳು, ಮತ್ತು ಸುದ್ದಿಸಮಾಚಾರಗಳಲ್ಲಿ ತಮ್ಮ ನಡತೆಯ ನಿರೂಪಣೆಗೆ ಒಳಗಾದ ಸಾರ್ವಜನಿಕ ಅಧಿಕಾರಿಗಳಿದ್ದಾರೆ. ಇನ್ನೂ ಕೋಟಿಗಟ್ಟಲೆ ಮಕ್ಕಳು ಯುದ್ಧದ ಕ್ರೂರತೆಗೆ ಒಡ್ಡಲ್ಪಟ್ಟಿದ್ದಾರೆ. ಈ ಪ್ರಭಾವಗಳು ನಮ್ಮ ಮಕ್ಕಳ ಮಾತುಕತೆ ಇಲ್ಲವೆ ಮನೋಭಾವದಲ್ಲಿ ತೋರಿಬರುವುದಾದರೆ ನಾವು ಆಶ್ಚರ್ಯಗೊಳ್ಳಬೇಕೊ? ಅದು ಸಂಭವಿಸುವಾಗ ನಾವು ಹೇಗೆ ಪ್ರತಿಕ್ರಿಯಿಸುವೆವು? ತೀಕ್ಷ್ಣವಾದ ಗದರಿಕೆ ಇಲ್ಲವೆ ಗಡುಸಾದ ಭಾಷಣವು ಈ ಸಮಸ್ಯೆಯನ್ನು ಬಗೆಹರಿಸುವುದೊ? ನಮ್ಮ ಮಕ್ಕಳ ಕ್ರಿಯೆಗಳಿಗೆ ಕೂಡಲೇ ಪ್ರತಿಕ್ರಿಯಿಸುವ ಬದಲು, ‘ಈ ಸನ್ನಿವೇಶವನ್ನು ಹೇಗೆ ನಿಭಾಯಿಸುವುದೆಂದು ವಿವೇಚಿಸಲು ಸಹಾಯ ಮಾಡಬಹುದಾದ ಯಾವ ವಿಧವಾದರೂ ಯೆಹೋವನ ಮಾರ್ಗಗಳಲ್ಲಿದೆಯೊ’ ಎಂದು ನಮ್ಮನ್ನೇ ಕೇಳಿಕೊಳ್ಳುವುದು ಉತ್ತಮವಾಗಿರಲಾರದೋ?—ಹೋಲಿಸಿ ರೋಮಾಪುರ 2:4.

11. ಹೆತ್ತವರು ತಪ್ಪುಗಳನ್ನು ಮಾಡುವಾಗ, ಇದು ಮಕ್ಕಳ ಮನೋಭಾವವನ್ನು ಹೇಗೆ ಬಾಧಿಸಬಲ್ಲದು?

¹¹ ಅಪರಿಪೂರ್ಣ ಹೆತ್ತವರು ಸನ್ನಿವೇಶಗಳನ್ನು ಯಾವಾಗಲೂ ಅತ್ಯುತ್ತಮವಾದ ವಿಧದಲ್ಲೇ ನಿಭಾಯಿಸಲಾರರೆಂಬುದು ನಿಶ್ಚಿತ. ಅವರು ಖಂಡಿತವಾಗಿಯೂ ತಪ್ಪುಗಳನ್ನು ಮಾಡುವರು. ಮಕ್ಕಳು ಅದನ್ನು ಗ್ರಹಿಸುವಾಗ, ಹೆತ್ತವರ ಕಡೆಗೆ ಅವರಿಗಿರುವ ಗೌರವವನ್ನು ಅದು ಕಡಿಮೆಮಾಡುವುದೊ? ವಿಶೇಷವಾಗಿ ಹೆತ್ತವರು ತಮ್ಮ ಅಧಿಕಾರವನ್ನು ನಿಷ್ಠುರವಾಗಿ ಪ್ರಯೋಗಿಸುವ ಮೂಲಕ ತಮ್ಮ ದೋಷಗಳನ್ನು ಲಘುವಾಗಿ ಪರಿಗಣಿಸಲು ಪ್ರಯತ್ನಿಸುವಾಗ, ಇದು ಸಂಭವಿಸಬಹುದು. ಆದರೆ, ಹೆತ್ತವರು ದೀನರಾಗಿದ್ದು, ತಮ್ಮ ತಪ್ಪುಗಳನ್ನು ಮುಕ್ತವಾಗಿ ಒಪ್ಪಿಕೊಳ್ಳುವಾಗ, ಪರಿಣಾಮವು ಬಹಳ ಭಿನ್ನವಾಗಿರಬಹುದು. ಮಕ್ಕಳು ಕೂಡ ಇದನ್ನೇ ಮಾಡಲು ಕಲಿಯಬೇಕಾದುದರಿಂದ, ಈ ವಿಷಯದಲ್ಲಿ ಹೆತ್ತವರು ಅಮೂಲ್ಯವಾದ ಮಾದರಿಯನ್ನಿಡಸಾಧ್ಯವಿದೆ.—ಯಾಕೋಬ 4:6.

ನಮ್ಮ ಮಾದರಿಯು ಕಲಿಸಬಹುದಾದ ವಿಷಯ

12, 13. (ಎ) ಪ್ರೀತಿಯ ಕುರಿತು ಮಕ್ಕಳು ಏನನ್ನು ಕಲಿಯುವ ಅಗತ್ಯವಿದೆ, ಮತ್ತು ಇದನ್ನು ಅತ್ಯಂತ ಪರಿಣಾಮಕಾರಿಯಾಗಿ ಹೇಗೆ ಕಲಿಸಸಾಧ್ಯವಿದೆ? (ಬಿ) ಮಕ್ಕಳು ಪ್ರೀತಿಯ ಕುರಿತು ಕಲಿತುಕೊಳ್ಳುವುದು ಏಕೆ ಅಷ್ಟು ಪ್ರಾಮುಖ್ಯವಾದದ್ದಾಗಿದೆ?

¹² ಮೌಖಿಕ ಉಪದೇಶದೊಂದಿಗೆ ಒಂದು ಒಳ್ಳೆಯ ಮಾದರಿಯು, ಅನೇಕ ಅಮೂಲ್ಯವಾದ ಪಾಠಗಳನ್ನು ಅತ್ಯಂತ ಪರಿಣಾಮಕಾರಿಯಾಗಿ ಕಲಿಸಸಾಧ್ಯವಿದೆ. ಅವುಗಳಲ್ಲಿ ಕೆಲವೊಂದನ್ನು ಪರಿಗಣಿಸಿರಿ.

¹³ ನಿಸ್ವಾರ್ಥ ಪ್ರೀತಿಯನ್ನು ವ್ಯಕ್ತಪಡಿಸುವುದು: ಮಾದರಿಯ ಮೂಲಕ ಭದ್ರಪಡಿಸಬೇಕಾದ ಅತ್ಯಂತ ಪ್ರಾಮುಖ್ಯವಾದ ಪಾಠಗಳಲ್ಲೊಂದು, ಪ್ರೀತಿಯ ಅರ್ಥವಾಗಿದೆ. “ದೇವರು ಮೊದಲು ನಮ್ಮನ್ನು ಪ್ರೀತಿಸಿದ್ದರಿಂದ ನಾವು ಪ್ರೀತಿಸುತ್ತೇವೆ.” (1 ಯೋಹಾನ 4:19) ಆತನೇ ಪ್ರೀತಿಯ ಮೂಲನೂ ಅದರ ಅತಿಶ್ರೇಷ್ಠ ಮಾದರಿಯೂ ಆಗಿದ್ದಾನೆ. ಈ ತತ್ವಾಧಾರಿತವಾದ ಅಗಾಪೆ ಪ್ರೀತಿಯು, ಬೈಬಲಿನಲ್ಲಿ 100ಕ್ಕಿಂತಲೂ ಹೆಚ್ಚು ಬಾರಿ ಉಲ್ಲೇಖಿಸಲ್ಪಟ್ಟಿದೆ. ಅದು ಸತ್ಯ ಕ್ರೈಸ್ತರನ್ನು ಗುರುತಿಸುವ ಒಂದು ಗುಣವಾಗಿದೆ. (ಯೋಹಾನ 13:35) ಇಂತಹ ಪ್ರೀತಿಯನ್ನು ದೇವರಿಗೆ ಮತ್ತು ಯೇಸು ಕ್ರಿಸ್ತನಿಗೆ ತೋರಿಸಬೇಕಲ್ಲದೆ, ಮಾನವರು ಸಹ ಪರಸ್ಪರ ತೋರಿಸಬೇಕಾಗಿದೆ. ಇವರಲ್ಲಿ, ತಮಗೆ ಇಷ್ಟವಾಗದ ವ್ಯಕ್ತಿಗಳೂ ಸೇರಿದ್ದಾರೆ. (ಮತ್ತಾಯ 5:44, 45; 1 ಯೋಹಾನ 5:3) ಇದನ್ನು ನಮ್ಮ ಮಕ್ಕಳಿಗೆ ಪರಿಣಾಮಕಾರಿಯಾಗಿ ಕಲಿಸುವ ಮೊದಲು, ಈ ಪ್ರೀತಿಯು ನಮ್ಮ ಹೃದಯಗಳಲ್ಲಿರಬೇಕು ಮತ್ತು ನಮ್ಮ ಜೀವಿತಗಳಲ್ಲಿ ವ್ಯಕ್ತವಾಗಬೇಕು. ನುಡಿಗಿಂತ ನಡೆಯು ಹೆಚ್ಚು ಕಾರ್ಯಸಾಧಕವಾಗಿದೆ. ಕುಟುಂಬದೊಳಗೆ, ಮಕ್ಕಳು ಪ್ರೀತಿಯನ್ನು ಮತ್ತು ಅದಕ್ಕೆ ಸಂಬಂಧಿಸಿದ ವಾತ್ಸಲ್ಯದಂತಹ ಗುಣಗಳನ್ನು ನೋಡಬೇಕು ಮತ್ತು ಅನುಭವಿಸಬೇಕು. ಇಲ್ಲದಿದ್ದರೆ, ಒಂದು ಮಗುವಿನ ಬೆಳವಣಿಗೆಯು ಶಾರೀರಿಕವಾಗಿ, ಮಾನಸಿಕವಾಗಿ, ಮತ್ತು ಭಾವನಾತ್ಮಕವಾಗಿ ಕುಂಠಿತಗೊಳ್ಳುತ್ತದೆ. ಕುಟುಂಬದ ಹೊರಗೆ, ಜೊತೆ ಕ್ರೈಸ್ತರ ಕಡೆಗೆ ಪ್ರೀತಿ ಮತ್ತು ವಾತ್ಸಲ್ಯವು ಯೋಗ್ಯವಾಗಿ ಪ್ರದರ್ಶಿಸಲ್ಪಡುವ ವಿಧವನ್ನೂ ಮಕ್ಕಳು ನೋಡಬೇಕಾಗಿದೆ.—ರೋಮಾಪುರ 12:10; 1 ಪೇತ್ರ 3:8.

14. (ಎ) ತೃಪ್ತಿಯನ್ನು ತರುವಂತಹ ಉತ್ತಮ ಗುಣಮಟ್ಟದ ಕೆಲಸವನ್ನು ಮಾಡುವಂತೆ ಮಕ್ಕಳಿಗೆ ಹೇಗೆ ಕಲಿಸಸಾಧ್ಯವಿದೆ? (ಬಿ) ನಿಮ್ಮ ಕುಟುಂಬದ ಸನ್ನಿವೇಶದಲ್ಲಿ ಇದನ್ನು ಹೇಗೆ ಮಾಡಸಾಧ್ಯವಿದೆ?

¹⁴ ಕೆಲಸಮಾಡುವ ವಿಧವನ್ನು ಕಲಿತುಕೊಳ್ಳುವುದು: ಕೆಲಸವು ಜೀವಿತದ ಮೂಲಭೂತ ಅಂಶವಾಗಿದೆ. ಸ್ವಗೌರವವನ್ನು ಕಾಪಾಡಿಕೊಳ್ಳಲು, ವ್ಯಕ್ತಿಯೊಬ್ಬನು ಉತ್ತಮ ಗುಣಮಟ್ಟದ ಕೆಲಸವನ್ನು ಮಾಡುವುದು ಹೇಗೆಂದು ತಿಳಿದುಕೊಳ್ಳಬೇಕು. (ಪ್ರಸಂಗಿ 2:24; 2 ಥೆಸಲೊನೀಕ 3:10) ಒಂದು ಮಗುವಿಗೆ ಸಾಕಷ್ಟು ಉಪದೇಶ ನೀಡದೆ ಕೆಲಸಗಳನ್ನು ಮಾಡುವಂತೆ ಹೇಳಿ, ತದನಂತರ ಅವುಗಳನ್ನು ಸರಿಯಾಗಿ ಮಾಡದೆ ಇರುವಾಗ ಬೈಯುವುದಾದರೆ, ಅದು ಗುಣಮಟ್ಟದ ಕೆಲಸವನ್ನು ಮಾಡಲು ಬಹುಶಃ ಕಲಿತುಕೊಳ್ಳಲಾರದು. ಆದರೆ, ಮಕ್ಕಳು ತಮ್ಮ ಹೆತ್ತವರ ಜೊತೆಗೆ ಕೆಲಸಮಾಡುವ ಮೂಲಕ ಕಲಿತುಕೊಳ್ಳುವಾಗ ಮತ್ತು ಸೂಕ್ತವಾದ ಶ್ಲಾಘನೆಯನ್ನು ಪಡೆದುಕೊಳ್ಳುವಾಗ, ತೃಪ್ತಿದಾಯಕ ಕೆಲಸವನ್ನು ಮಾಡಲು ಅವರು ಕಲಿತುಕೊಳ್ಳಬಹುದು. ಹೆತ್ತವರ ಮಾದರಿಯ ಜೊತೆಗೆ ವಿವರಣೆಯು ಸೇರಿದ್ದರೆ, ಒಂದು ಕೆಲಸವನ್ನು ಹೇಗೆ ಮಾಡಿ ಮುಗಿಸುವುದೆಂದು ಮಕ್ಕಳು ಕಲಿಯುತ್ತಾರಲ್ಲದೆ, ಸಮಸ್ಯೆಗಳನ್ನು ಜಯಿಸುವುದು, ಕೆಲಸವು ಪೂರ್ಣಗೊಳ್ಳುವ ತನಕ ಅದಕ್ಕೆ ಅಂಟಿಕೊಂಡಿರುವುದು, ವಿವೇಚಿಸಿ ನಿರ್ಣಯಗಳನ್ನು ಮಾಡುವುದು ಹೇಗೆಂಬುದನ್ನೂ ಕಲಿತುಕೊಳ್ಳುತ್ತಾರೆ. ಈ ರೀತಿಯ ವಾತಾವರಣದಲ್ಲಿರುವ ಮಕ್ಕಳಿಗೆ, ಯೆಹೋವನು ಉತ್ತಮ ಗುಣಮಟ್ಟದ ಕೆಲಸವನ್ನು ಮಾಡುತ್ತಾನೆಂದು, ಮತ್ತು ಯೇಸು ತನ್ನ ತಂದೆಯನ್ನು ಅನುಕರಿಸುತ್ತಾನೆ ಎಂಬುದನ್ನು ಗಣ್ಯಮಾಡುವಂತೆ ಸಹಾಯವು ನೀಡಲ್ಪಡಸಾಧ್ಯವಿದೆ. (ಆದಿಕಾಂಡ 1:31; ಜ್ಞಾನೋಕ್ತಿ 8:27-31; ಯೋಹಾನ 5:17) ಕುಟುಂಬದ ವೃತ್ತಿಯು ವ್ಯವಸಾಯ ಇಲ್ಲವೆ ವ್ಯಾಪಾರವಾಗಿರುವಾಗ, ಕುಟುಂಬ ಸದಸ್ಯರಲ್ಲಿ ಕೆಲವರು ಒಟ್ಟಿಗೆ ಸೇರಿ ಕೆಲಸಮಾಡಬಹುದು. ಅಥವಾ ತಾಯಿಯು ತನ್ನ ಮಗ ಇಲ್ಲವೆ ಮಗಳಿಗೆ ಒಂದು ಹೊತ್ತಿನ ಅಡುಗೆಯನ್ನು ತಯಾರಿಸಲು ಮತ್ತು ತದನಂತರ ಸ್ವಚ್ಛಗೊಳಿಸಲು ಕಲಿಸಿಕೊಡಬಹುದು. ಕೆಲಸದ ನಿಮಿತ್ತ ತಂದೆಯು ಮನೆಯಿಂದ ದೂರವಿರಬೇಕಾದಲ್ಲಿ, ಮನೆಯಲ್ಲಿ ತನ್ನ ಮಕ್ಕಳೊಂದಿಗೆ ಸೇರಿಕೊಂಡು ಮಾಡುವ ಕೆಲಸಗಳನ್ನು ಅವನು ಯೋಜಿಸಬಲ್ಲನು. ಕೆಲಸಗಳನ್ನು ತತ್‌ಕ್ಷಣ ಮಾಡಿಮುಗಿಸುವುದೇ ಹೆತ್ತವರ ಲಕ್ಷ್ಯವಾಗಿರದೆ, ಮಕ್ಕಳನ್ನು ಮುಂದಿನ ಜೀವಿತಕ್ಕಾಗಿ ಸಜ್ಜುಗೊಳಿಸುವುದೇ ಅವರ ಲಕ್ಷ್ಯವಾಗಿರುವಾಗ, ಅದು ಎಷ್ಟು ಪ್ರಯೋಜನಕರವಾಗಿರುವುದು!

15. ಯಾವ ವಿಧಗಳಲ್ಲಿ ನಂಬಿಕೆಯ ಪಾಠಗಳು ಕಲಿಸಲ್ಪಡಬಲ್ಲವು? ದೃಷ್ಟಾಂತಿಸಿರಿ.

¹⁵ ವಿಪತ್ತುಗಳ ಎದುರಿನಲ್ಲಿ ನಂಬಿಕೆಯನ್ನು ಕಾಪಾಡಿಕೊಳ್ಳುವುದು: ನಂಬಿಕೆಯು ಕೂಡ ನಮ್ಮ ಜೀವಿತಗಳ ಅತ್ಯಾವಶ್ಯಕ ಅಂಶವಾಗಿದೆ. ಕುಟುಂಬ ಅಧ್ಯಯನದಲ್ಲಿ ನಂಬಿಕೆಯ ವಿಷಯವಾಗಿ ಚರ್ಚಿಸುವಾಗ, ಅದರ ಅರ್ಥನಿರೂಪಣೆಯನ್ನು ಮಕ್ಕಳು ಕಲಿತುಕೊಳ್ಳಬಹುದು. ತಮ್ಮ ಹೃದಯಗಳಲ್ಲಿ ನಂಬಿಕೆಯನ್ನು ಹೆಚ್ಚಿಸುವ ಪುರಾವೆಗಳ ಅರಿವು ಅವರಿಗಾಗಬಹುದು. ಆದರೆ, ತೀವ್ರವಾದ ಸಂಕಷ್ಟಗಳ ಎದುರಿನಲ್ಲೂ ತಮ್ಮ ಹೆತ್ತವರು ಸ್ಥಿರವಾದ ನಂಬಿಕೆಯನ್ನು ತೋರಿಸುವುದನ್ನು ಮಕ್ಕಳು ನೋಡುವಾಗ, ಆ ಪರಿಣಾಮವು ಅವರ ಜೀವನಪರ್ಯಂತ ಉಳಿಯಬಹುದು. ಪನಾಮದಲ್ಲಿರುವ ಒಬ್ಬ ಬೈಬಲ್‌ ವಿದ್ಯಾರ್ಥಿಯು, ಯೆಹೋವನ ಸೇವೆಯನ್ನು ನಿಲ್ಲಿಸದಿದ್ದಲ್ಲಿ ಮನೆಯಿಂದ ಹೊರಹಾಕಲ್ಪಡುವ ಬೆದರಿಕೆಯನ್ನು ತನ್ನ ಗಂಡನಿಂದ ಎದುರಿಸಿದಳು. ಆದರೂ, ತನ್ನ ನಾಲ್ಕು ಚಿಕ್ಕ ಮಕ್ಕಳೊಂದಿಗೆ ಅವಳು ಹತ್ತಿರದ ರಾಜ್ಯ ಸಭಾಗೃಹಕ್ಕೆ ಹೋಗಲು ಕ್ರಮವಾಗಿ 16 ಕಿಲೊಮೀಟರುಗಳು ನಡೆದು, ತದನಂತರ ಇನ್ನೂ 30 ಕಿಲೊಮೀಟರುಗಳ ಅಂತರವನ್ನು ಆವರಿಸಲು ಬಸ್ಸಿನಲ್ಲಿ ಹೋದಳು. ಆ ಮಾದರಿಯಿಂದ ಉತ್ತೇಜಿತರಾಗಿ, ಅವಳ ಕುಟುಂಬದ 20 ಸದಸ್ಯರು ಸತ್ಯದ ಮಾರ್ಗವನ್ನು ಸ್ವೀಕರಿಸಿದ್ದಾರೆ.

ದೈನಿಕ ಬೈಬಲ್‌ ವಾಚನದ ವಿಷಯದಲ್ಲಿ ಮಾದರಿಯನ್ನಿಡುವುದು

16. ದೈನಿಕ ಕುಟುಂಬ ಬೈಬಲ್‌ ವಾಚನವು ಏಕೆ ಶಿಫಾರಸ್ಸು ಮಾಡಲ್ಪಟ್ಟಿದೆ?

¹⁶ ಯಾವುದೇ ಕುಟುಂಬವು ಸ್ಥಾಪಿಸಸಾಧ್ಯವಿರುವ ಅತ್ಯಮೂಲ್ಯವಾದ ರೂಢಿಗಳಲ್ಲಿ, ಬೈಬಲಿನ ಕ್ರಮವಾದ ವಾಚನವು ಒಂದಾಗಿದೆ. ಇದು ಹೆತ್ತವರಿಗೆ ಪ್ರಯೋಜನವನ್ನು ತರುತ್ತಾ, ಮಕ್ಕಳು ಅನುಕರಿಸಬಹುದಾದ ಒಂದು ಮಾದರಿಯಾಗಿ ಪರಿಣಮಿಸಸಾಧ್ಯವಿದೆ. ಸಾಧ್ಯವಿರುವಲ್ಲಿ, ಪ್ರತಿ ದಿನ ಒಂದಿಷ್ಟು ಬೈಬಲ್‌ ವಾಚನವನ್ನು ಮಾಡಿರಿ. ಎಷ್ಟು ಓದಲಾಗುತ್ತದೆ ಎಂಬುದು ಅತಿ ಪ್ರಾಮುಖ್ಯವಾದ ವಿಷಯವಲ್ಲ. ಕ್ರಮಬದ್ಧತೆ ಮತ್ತು ಅದನ್ನು ಮಾಡುವ ವಿಧಾನವೇ ಹೆಚ್ಚು ಪ್ರಾಮುಖ್ಯವಾದ ವಿಷಯವಾಗಿದೆ. ಬೈಬಲ್‌ ವಾಚನದ ಜೊತೆಗೆ, ಬೈಬಲ್‌ ಕಥೆಗಳ ನನ್ನ ಪುಸ್ತಕದ ಆಡಿಯೊ ಕ್ಯಾಸೆಟ್‌ಗಳು ಮಕ್ಕಳಿಗೆ ಅರ್ಥವಾಗುವ ಭಾಷೆಯಲ್ಲಿ ಲಭ್ಯವಿರುವುದಾದರೆ, ಅವುಗಳನ್ನು ಸಹ ಮಕ್ಕಳು ಆಲಿಸಬಹುದು. ದೇವರ ವಾಕ್ಯವನ್ನು ಪ್ರತಿ ದಿನ ಓದುವುದರಿಂದ, ದೇವರ ವಿಚಾರಗಳಿಗೆ ಪ್ರಥಮ ಸ್ಥಾನವನ್ನು ಕೊಡಲು ನಮಗೆ ಸಾಧ್ಯವಾಗುತ್ತದೆ. ಮತ್ತು ಬೈಬಲ್‌ ವಾಚನವನ್ನು ವ್ಯಕ್ತಿಗಳು ಮಾತ್ರವಲ್ಲ, ಕುಟುಂಬಗಳು ಮಾಡುವಾಗ, ಇಡೀ ಮನೆವಾರ್ತೆಯು ಯೆಹೋವನ ಮಾರ್ಗಗಳಲ್ಲಿ ನಡೆಯುವಂತೆ ಇದು ಸಹಾಯ ಮಾಡಬಲ್ಲದು. ಈ ರೂಢಿಯನ್ನೇ, ಕುಟುಂಬಗಳೇ—ದೈನಿಕ ಬೈಬಲ್‌ ವಾಚನವನ್ನು ನಿಮ್ಮ ಜೀವನದ ರೀತಿಯಾಗಿ ಮಾಡಿರಿ! ಎಂಬ ಡ್ರಾಮಾದ ಮೂಲಕ, ಇತ್ತೀಚಿನ “ದೇವರ ಜೀವನ ಮಾರ್ಗ” ಅಧಿವೇಶನಗಳಲ್ಲಿ ಉತ್ತೇಜಿಸಲಾಯಿತು.—ಕೀರ್ತನೆ 1:1-3.

17. ಎಫೆಸ 6:4ರಲ್ಲಿರುವ ಸಲಹೆಯನ್ನು ಅನ್ವಯಿಸುವುದರಲ್ಲಿ, ಕುಟುಂಬ ಬೈಬಲ್‌ ವಾಚನ ಹಾಗೂ ಮುಖ್ಯ ಶಾಸ್ತ್ರವಚನಗಳನ್ನು ಕಂಠಪಾಠ ಮಾಡುವುದು ಹೇಗೆ ಸಹಾಯ ಮಾಡುತ್ತದೆ?

¹⁷ ಕುಟುಂಬವಾಗಿ ಬೈಬಲನ್ನು ಓದುವುದು, ಅಪೊಸ್ತಲ ಪೌಲನು ಎಫೆಸದಲ್ಲಿದ್ದ ಕ್ರೈಸ್ತರಿಗೆ ತನ್ನ ಪ್ರೇರಿತ ಪತ್ರದಲ್ಲಿ ಬರೆದ ವಿಷಯಕ್ಕೆ ಸುಸಂಗತವಾಗಿದೆ. ಅದೇನೆಂದರೆ: “ತಂದೆಗಳೇ, ನಿಮ್ಮ ಮಕ್ಕಳಿಗೆ ಕೋಪವನ್ನೆಬ್ಬಿಸದೆ ಕರ್ತನಿಗೆ ಮೆಚ್ಚಿಗೆಯಾಗಿರುವ ಬಾಲಶಿಕ್ಷೆಯನ್ನೂ ಬಾಲೋಪದೇಶ [“ಮಾನಸಿಕ ಕ್ರಮಪಡಿಸುವಿಕೆ,” NW]ವನ್ನೂ ಮಾಡುತ್ತಾ ಅವರನ್ನು ಸಾಕಿಸಲಹಿರಿ.” (ಎಫೆಸ 6:4) ಇದು ಏನನ್ನು ಅರ್ಥೈಸುತ್ತದೆ? “ಮಾನಸಿಕ ಕ್ರಮಪಡಿಸುವಿಕೆ”ಯ ಅಕ್ಷರಾರ್ಥವು, “ಮನಸ್ಸನ್ನು ಹಾಕುವುದು” ಎಂದಾಗಿದೆ. ಆದುದರಿಂದ, ಮಕ್ಕಳು ದೇವರ ವಿಚಾರಗಳನ್ನು ತಿಳಿದುಕೊಳ್ಳುವಂತೆ ಸಹಾಯಮಾಡಲು, ಕ್ರೈಸ್ತ ತಂದೆಗಳು ತಮ್ಮ ಮಕ್ಕಳಲ್ಲಿ ಯೆಹೋವ ದೇವರ ಮನಸ್ಸನ್ನು (ಆಲೋಚನೆಗಳನ್ನು) ಹಾಕುವಂತೆ ಪ್ರೇರಿಸಲ್ಪಟ್ಟಿದ್ದಾರೆ. ಮುಖ್ಯ ವಚನಗಳನ್ನು ಮಕ್ಕಳು ಕಂಠಪಾಠ ಮಾಡುವಂತೆ ಉತ್ತೇಜಿಸುವ ಮೂಲಕ, ಇದನ್ನು ಸಾಧಿಸಸಾಧ್ಯವಿದೆ. ಯೆಹೋವನ ವಿಚಾರಗಳು ಮಕ್ಕಳ ಆಲೋಚನೆಯನ್ನು ಮಾರ್ಗದರ್ಶಿಸಬೇಕೆಂಬುದೇ ಇದರ ಉದ್ದೇಶವಾಗಿದೆ. ಇದರಿಂದಾಗಿ, ಹೆತ್ತವರು ಮಕ್ಕಳೊಂದಿಗೆ ಇರಲಿ, ಇಲ್ಲದಿರಲಿ, ಅವರ ಬಯಕೆಗಳು ಮತ್ತು ನಡತೆಯು ಪ್ರಗತಿಪರವಾಗಿ ದೈವಿಕ ಮಟ್ಟಗಳನ್ನು ಪ್ರತಿಬಿಂಬಿಸುವವು. ಇಂತಹ ಆಲೋಚನೆಗೆ ಬೈಬಲು ಆಧಾರವಾಗಿದೆ.—ಧರ್ಮೋಪದೇಶಕಾಂಡ 6:6, 7.

18. ಬೈಬಲನ್ನು ಓದುವಾಗ, (ಎ) ಅದನ್ನು ಸ್ಪಷ್ಟವಾಗಿ ತಿಳಿದುಕೊಳ್ಳಲು, (ಬಿ) ಅದರಲ್ಲಿರುವ ಸಲಹೆಯಿಂದ ಪ್ರಯೋಜನ ಪಡೆದುಕೊಳ್ಳಲು, (ಸಿ) ಯೆಹೋವನ ಉದ್ದೇಶದ ಬಗ್ಗೆ ಅದು ಪ್ರಕಟಪಡಿಸುವ ವಿಷಯಕ್ಕೆ ಪ್ರತಿಕ್ರಿಯಿಸಲು, (ಡಿ) ಜನರ ಮನೋಭಾವಗಳು ಮತ್ತು ಕ್ರಿಯೆಗಳ ಕುರಿತು ಅದು ಹೇಳುವ ವಿಷಯದಿಂದ ಪ್ರಯೋಜನ ಪಡೆಯಲು, ಏನು ಅಗತ್ಯವಿರಬಹುದು?

¹⁸ ಬೈಬಲು ನಮ್ಮ ಜೀವಿತಗಳನ್ನು ಪ್ರಭಾವಿಸಬೇಕಾದರೆ, ಅದು ಹೇಳುವ ವಿಷಯಗಳನ್ನು ನಾವು ಅರ್ಥಮಾಡಿಕೊಳ್ಳುವ ಅಗತ್ಯವಿದೆ. ಇದಕ್ಕಾಗಿ, ಅನೇಕರು ವಾಚನದ ಭಾಗಗಳನ್ನು ಒಂದಕ್ಕಿಂತಲೂ ಹೆಚ್ಚು ಬಾರಿ ಓದಬೇಕಾದೀತು. ಕೆಲವು ಅಭಿವ್ಯಕ್ತಿಗಳನ್ನು ಸ್ಪಷ್ಟವಾಗಿ ಅರ್ಥಮಾಡಿಕೊಳ್ಳಲು, ನಾವು ಪದಗಳ ಅರ್ಥವನ್ನು ಡಿಕ್ಷನೆರಿಯಲ್ಲಿ ಇಲ್ಲವೆ ಶಾಸ್ತ್ರಗಳ ಒಳನೋಟ (ಇಂಗ್ಲಿಷ್‌) ಪುಸ್ತಕದಲ್ಲಿ ನೋಡಬೇಕಾಗಬಹುದು. ವಚನದಲ್ಲಿ ಸಲಹೆ ಇಲ್ಲವೆ ಒಂದು ಆಜ್ಞೆ ಇರುವುದಾದರೆ, ನಮ್ಮ ದಿನದಲ್ಲಿ ಅದಕ್ಕೆ ಹೋಲುವ ಸನ್ನಿವೇಶಗಳ ಕುರಿತು ಮಾತಾಡಲು ಸಮಯವನ್ನು ತೆಗೆದುಕೊಳ್ಳಿರಿ. ತದನಂತರ ನೀವು ಹೀಗೆ ಕೇಳಬಹುದು, ‘ಈ ಸಲಹೆಯನ್ನು ಅನ್ವಯಿಸುವುದರಿಂದ ನಮಗಾಗುವ ಲಾಭವೇನು?’ (ಯೆಶಾಯ 48:17, 18) ಶಾಸ್ತ್ರವಚನವು ಯೆಹೋವನ ಉದ್ದೇಶದ ಯಾವುದೇ ಅಂಶದ ಕುರಿತು ಮಾತಾಡುತ್ತಿರುವುದಾದರೆ, ‘ಇದರಿಂದ ನಮ್ಮ ಜೀವಿತಗಳು ಹೇಗೆ ಪ್ರಭಾವಿಸಲ್ಪಡುತ್ತವೆ?’ ಎಂದು ಕೇಳಿರಿ. ನೀವು ಜನರ ಮನೋಭಾವಗಳು ಮತ್ತು ಕ್ರಿಯೆಗಳ ಕುರಿತು ತಿಳಿಸುವಂತಹ ಒಂದು ವೃತ್ತಾಂತವನ್ನು ಓದುತ್ತಿದ್ದೀರೆಂದು ಭಾವಿಸಿಕೊಳ್ಳಿ. ಜೀವಿತದಲ್ಲಿ ಅವರು ಯಾವ ಒತ್ತಡಗಳನ್ನು ಅನುಭವಿಸಿದರು? ಅವುಗಳನ್ನು ಅವರು ಹೇಗೆ ನಿಭಾಯಿಸಿದರು? ಅವರ ಮಾದರಿಯಿಂದ ನಾವು ಹೇಗೆ ಪ್ರಯೋಜನ ಪಡೆದುಕೊಳ್ಳಸಾಧ್ಯವಿದೆ? ಈ ವೃತ್ತಾಂತವು ಇಂದು ನಮ್ಮ ಜೀವಿತಕ್ಕೆ ಯಾವ ಅರ್ಥವನ್ನು ನೀಡುತ್ತದೆ ಎಂಬುದನ್ನು ಚರ್ಚಿಸಲು ಯಾವಾಗಲೂ ಸಮಯವನ್ನು ಬದಿಗಿಡಿರಿ.—ರೋಮಾಪುರ 15:4; 1 ಕೊರಿಂಥ 10:11.

19. ದೇವರನ್ನು ಅನುಕರಿಸುವವರಾಗಿರುವ ಮೂಲಕ, ನಾವು ನಮ್ಮ ಮಕ್ಕಳಿಗೆ ಏನನ್ನು ಒದಗಿಸುತ್ತಿರುವೆವು?

¹⁹ ದೇವರ ವಿಚಾರಗಳನ್ನು ನಮ್ಮ ಹೃದಮನಗಳ ಮೇಲೆ ಅಚ್ಚೊತ್ತಲು ಇದು ಎಂತಹ ಒಂದು ಉತ್ತಮ ವಿಧಾನ! ಹೀಗೆ, ನಾವು “ದೇವರ ಪ್ರಿಯ ಮಕ್ಕಳಿಗೆ ತಕ್ಕ ಹಾಗೆ ಆತನನ್ನು ಅನುಸರಿಸು”ವವರಾಗಲು ನಮಗೆ ಸಹಾಯವು ದೊರೆಯುವುದು. (ಎಫೆಸ 5:1) ಮತ್ತು ನಮ್ಮ ಮಕ್ಕಳು ಅನುಸರಿಸಲು ಯೋಗ್ಯವಾದ ಮಾದರಿಯನ್ನು ನಾವು ಒದಗಿಸುವೆವು.

ನಿಮಗೆ ಜ್ಞಾಪಕವಿದೆಯೊ?

◻ ಯೆಹೋವನ ಮಾದರಿಯಿಂದ ಹೆತ್ತವರು ಹೇಗೆ ಪ್ರಯೋಜನ ಪಡೆದುಕೊಳ್ಳಬಲ್ಲರು?

◻ ಮಕ್ಕಳಿಗೆ ನೀಡುವ ಮೌಖಿಕ ಉಪದೇಶದ ಜೊತೆಗೆ ಹೆತ್ತವರ ಒಳ್ಳೆಯ ಮಾದರಿಯು ಏಕೆ ಅಗತ್ಯವಾಗಿದೆ?

◻ ಹೆತ್ತವರ ಮಾದರಿಯಿಂದ ಅತ್ಯುತ್ತಮವಾಗಿ ಕಲಿಸಲ್ಪಡುವ ಕೆಲವು ಪಾಠಗಳಾವುವು?

◻ ಕುಟುಂಬ ಬೈಬಲ್‌ ವಾಚನದಿಂದ ನಾವು ಹೇಗೆ ಸಂಪೂರ್ಣ ಪ್ರಯೋಜನವನ್ನು ಪಡೆದುಕೊಳ್ಳಸಾಧ್ಯವಿದೆ?

ಒಂದು ಕುಟುಂಬದೋಪಾದಿ ದೇವರ ವಾಕ್ಯವನ್ನು ಕ್ರಮವಾಗಿ ಅಭ್ಯಾಸಿಸಿರಿ

“ಮನುಷ್ಯನು ರೊಟ್ಟಿತಿಂದ ಮಾತ್ರದಿಂದ ಬದುಕುವದಿಲ್ಲ, ದೇವರ ಬಾಯಿಂದ ಹೊರಡುವ ಪ್ರತಿಯೊಂದು ಮಾತಿನಿಂದಲೂ ಬದುಕುವನು.”—ಮತ್ತಾಯ 4:4.

1. ಕುಟುಂಬ ತಲೆಗಳು ತಮ್ಮ ಮಕ್ಕಳಿಗೆ ಯೆಹೋವನ ಮಾರ್ಗಗಳನ್ನು ಕಲಿಸಬೇಕೆಂಬ ಜವಾಬ್ದಾರಿಯ ಕುರಿತು ಬೈಬಲ್‌ ಏನು ಹೇಳುತ್ತದೆ?

ಯೆಹೋವ ದೇವರು ಕುಟುಂಬ ತಲೆಗಳಿಗೆ, ತಮ್ಮ ಮಕ್ಕಳಿಗೆ ಕಲಿಸಬೇಕೆಂಬ ಜವಾಬ್ದಾರಿಯ ಕುರಿತು ಮರುಜ್ಞಾಪನಗಳನ್ನು ಪದೇ ಪದೇ ನೀಡಿದನು. ಇಂತಹ ಉಪದೇಶವು ಮಕ್ಕಳನ್ನು ಸದ್ಯದ ಜೀವಿತಕ್ಕಾಗಿ ಮಾತ್ರ ಸಜ್ಜುಗೊಳಿಸದೆ, ಬರಲಿರುವ ಜೀವಿತಕ್ಕಾಗಿಯೂ ಅವರು ಸಿದ್ಧರಾಗಿರುವಂತೆ ಮಾಡಲು ನೆರವು ನೀಡುವುದು. ದೇವರನ್ನು ಪ್ರತಿನಿಧಿಸಿದ ಒಬ್ಬ ದೇವದೂತನು, ಅಬ್ರಹಾಮನಿಗೆ ಅವನ ಜವಾಬ್ದಾರಿಯ ಕುರಿತು ತಿಳಿಸಿದನು. ತನ್ನ ಮನೆವಾರ್ತೆಯವರು “ಯೆಹೋವನ ಮಾರ್ಗವನ್ನು ಅನುಸರಿಸ”ಸಾಧ್ಯವಾಗುವಂತೆ, ಅವನು ಅವರಿಗೆ ಕಲಿಸಬೇಕಿತ್ತು. (ಆದಿಕಾಂಡ 18:19) ದೇವರು ಇಸ್ರಾಯೇಲ್ಯರನ್ನು ಐಗುಪ್ತದಿಂದ ಬಿಡಿಸಿ, ಹೋರೇಬ್‌ನಲ್ಲಿರುವ ಸೀನಾಯಿ ಬೆಟ್ಟದ ಮೇಲೆ ಧರ್ಮಶಾಸ್ತ್ರವನ್ನು ಹೇಗೆ ನೀಡಿದನೆಂಬುದನ್ನು ಇಸ್ರಾಯೇಲ್ಯ ಹೆತ್ತವರು ತಮ್ಮ ಮಕ್ಕಳಿಗೆ ವಿವರಿಸುವಂತೆ ಹೇಳಲಾಗಿತ್ತು. (ವಿಮೋಚನಕಾಂಡ 13:8, 9; ಧರ್ಮೋಪದೇಶಕಾಂಡ 4:9, 10; 11:18-21) ಕ್ರೈಸ್ತ ಕುಟುಂಬ ತಲೆಗಳು, ತಮ್ಮ ಮಕ್ಕಳಿಗೆ ‘ಯೆಹೋವನಿಗೆ ಮೆಚ್ಚಿಗೆಯಾಗಿರುವ ಬಾಲಶಿಕ್ಷೆಯನ್ನೂ ಮಾನಸಿಕ ಕ್ರಮಪಡಿಸುವಿಕೆಯನ್ನೂ’ ನೀಡುತ್ತಾ ಬೆಳೆಸುವಂತೆ ಹೇಳಲ್ಪಟ್ಟಿದ್ದಾರೆ. (ಎಫೆಸ 6:4) ಹೆತ್ತವರಲ್ಲಿ ಒಬ್ಬರು ಮಾತ್ರ ಯೆಹೋವನನ್ನು ಸೇವಿಸುತ್ತಿದ್ದರೂ, ಅವರು ಮಕ್ಕಳಿಗೆ ಯೆಹೋವನ ಮಾರ್ಗಗಳನ್ನು ಕಲಿಸಲು ಪ್ರಯತ್ನಿಸಬೇಕು.—2 ತಿಮೊಥೆಯ 1:5; 3:14, 15.

2. ಮನೆಯಲ್ಲಿ ಮಕ್ಕಳಿಲ್ಲದಿದ್ದರೆ ಕುಟುಂಬ ಅಧ್ಯಯನದ ಅಗತ್ಯವಿದೆಯೊ? ವಿವರಿಸಿರಿ.

² ದೇವರ ವಾಕ್ಯವನ್ನೊಳಗೊಂಡ ಕುಟುಂಬ ಅಧ್ಯಯನವು, ಮಕ್ಕಳಿರುವ ಕುಟುಂಬಗಳಲ್ಲಿ ಮಾತ್ರ ನಡೆಸಲ್ಪಡಬೇಕೆಂಬುದು ಇದರ ಅರ್ಥವಲ್ಲ. ಮನೆಯಲ್ಲಿ ಮಕ್ಕಳಿರದಿದ್ದರೂ ಪತಿ ಪತ್ನಿಯರು ಒಂದು ಕುಟುಂಬ ಅಧ್ಯಯನವನ್ನು ನಡೆಸುವುದಾದರೆ, ಇದು ಆತ್ಮಿಕ ವಿಷಯಗಳಿಗಾಗಿ ಅವರಲ್ಲಿರುವ ಅತ್ಯತ್ತುಮ ಗಣ್ಯತಾಭಾವವನ್ನು ವ್ಯಕ್ತಪಡಿಸುತ್ತದೆ.—ಎಫೆಸ 5:25, 26.

3. ಕುಟುಂಬ ಅಧ್ಯಯನವನ್ನು ಕ್ರಮವಾಗಿ ನಡೆಸುವುದು ಏಕೆ ಪ್ರಾಮುಖ್ಯವಾಗಿದೆ?

³ ಅತ್ಯಂತ ಹೆಚ್ಚಿನ ಪ್ರಯೋಜನವನ್ನು ಪಡೆಯಲು, ಉಪದೇಶವು ಕ್ರಮವಾಗಿ ನೀಡಲ್ಪಡಬೇಕು. ಇದು ಯೆಹೋವನು ಇಸ್ರಾಯೇಲ್ಯರಿಗೆ ಅರಣ್ಯದಲ್ಲಿ ಕಲಿಸಿದ ಪಾಠಕ್ಕೆ ಅನುಗುಣವಾಗಿದೆ: “ಮನುಷ್ಯರು ಆಹಾರಮಾತ್ರದಿಂದಲ್ಲ, ಯೆಹೋವನ ಬಾಯಿಂದ ಹೊರಡುವ ಪ್ರತಿಯೊಂದು ಮಾತಿನಿಂದಲೂ ಬದುಕುತ್ತಾರೆ.” (ಧರ್ಮೋಪದೇಶಕಾಂಡ 8:3) ಕುಟುಂಬದ ಪರಿಸ್ಥಿತಿಗಳಿಗನುಸಾರ, ಕೆಲವು ಮನೆವಾರ್ತೆಗಳು ಸಾಪ್ತಾಹಿಕ ಅಧ್ಯಯನವನ್ನು ಏರ್ಪಡಿಸಬಹುದು, ಇತರರು ಪ್ರತಿದಿನವೂ ಅಲ್ಪಾವಧಿಯ ಅಧ್ಯಯನವನ್ನು ಏರ್ಪಡಿಸಬಹುದು. ನೀವು ಯಾವ ಏರ್ಪಾಡನ್ನೇ ಆರಿಸಿಕೊಳ್ಳಲಿ, ಬಿಡುವಿರುವಾಗ ಮಾತ್ರ ಅಧ್ಯಯನಕ್ಕಾಗಿ ಒಟ್ಟುಸೇರುವ ನಿರ್ಧಾರವನ್ನು ಮಾಡಬೇಡಿ. ಅದಕ್ಕಾಗಿ ‘ಸಮಯವನ್ನು ಕೊಂಡುಕೊಳ್ಳಿರಿ.’ ಇಂತಹ ಸಮಯಕ್ಕಾಗಿ ಬೇಕಾದ ಬೆಲೆಯನ್ನು ತೆರುವುದು ಪ್ರಯೋಜನಕರವಾದ ಬಂಡವಾಳವಾಗಿದೆ. ಏಕೆಂದರೆ, ನಿಮ್ಮ ಕುಟುಂಬ ಸದಸ್ಯರ ಜೀವಿತಗಳು ಗಂಡಾಂತರದಲ್ಲಿವೆ.—ಎಫೆಸ 5:15-17; ಫಿಲಿಪ್ಪಿ 3:16.

ಮನಸ್ಸಿನಲ್ಲಿಡಬೇಕಾದ ಲಕ್ಷ್ಯಗಳು

4, 5. (ಎ) ತಮ್ಮ ಮಕ್ಕಳಿಗೆ ಕಲಿಸುವುದರ ಮುಖ್ಯ ಲಕ್ಷ್ಯವು ಏನಾಗಿರಬೇಕೆಂದು ಯೆಹೋವನು ಮೋಶೆಯ ಮೂಲಕ ಹೆತ್ತವರಿಗೆ ತಿಳಿಸಿದನು? (ಬಿ) ಅದು ಇಂದು ಏನನ್ನು ಒಳಗೊಳ್ಳುತ್ತದೆ?

⁴ ನೀವು ಕುಟುಂಬ ಅಧ್ಯಯನವನ್ನು ನಡೆಸುವಾಗ, ನಿಮ್ಮ ಮನಸ್ಸಿನಲ್ಲಿ ಸ್ಪಷ್ಟವಾಗಿ ವಿಶದೀಕರಿಸಲ್ಪಟ್ಟ ಲಕ್ಷ್ಯಗಳು ಇರುವುದಾದರೆ, ಇದರಿಂದ ಹೆಚ್ಚಿನ ಒಳಿತಾಗುವುದು. ಕೆಲವು ಲಕ್ಷ್ಯಗಳನ್ನು ಪರಿಗಣಿಸಿರಿ.

⁵ ಪ್ರತಿಯೊಂದು ಅಧ್ಯಯನದಲ್ಲೂ, ಯೆಹೋವ ದೇವರಿಗಾಗಿ ಪ್ರೀತಿಯನ್ನು ಬೆಳೆಸಲು ಪ್ರಯತ್ನಿಸಿರಿ. ಇಸ್ರಾಯೇಲ್ಯರು ವಾಗ್ದತ್ತ ದೇಶವನ್ನು ಪ್ರವೇಶಿಸುವ ಮೊದಲು ಮೋವಾಬಿನ ಬಯಲಿನಲ್ಲಿ ಕೂಡಿಬಂದಾಗ, ಯಾವುದನ್ನು ಯೇಸು ಕ್ರಿಸ್ತನು ತದನಂತರ “ಧರ್ಮಶಾಸ್ತ್ರದಲ್ಲಿ ಮುಖ್ಯವಾದ ಆಜ್ಞೆ” ಎಂದು ಗುರುತಿಸಿದನೊ ಅದರ ಮೇಲೆ ಮೋಶೆಯು ಅವರ ಗಮನವನ್ನು ಕೇಂದ್ರೀಕರಿಸಿದನು. ಅದು ಏನಾಗಿತ್ತು? “ನಿನ್ನ ದೇವರಾಗಿರುವ ಯೆಹೋವನನ್ನು ನಿನ್ನ ಪೂರ್ಣಹೃದಯದಿಂದಲೂ ನಿನ್ನ ಪೂರ್ಣಪ್ರಾಣದಿಂದಲೂ ನಿನ್ನ ಪೂರ್ಣಬುದ್ಧಿಯಿಂದಲೂ ಪ್ರೀತಿಸಬೇಕು.” (ಮತ್ತಾಯ 22:36, 37, NW; ಧರ್ಮೋಪದೇಶಕಾಂಡ 6:5) ಇಸ್ರಾಯೇಲ್ಯರು ಇದನ್ನು ತಮ್ಮ ಹೃದಯಗಳ ಮೇಲೆ ಅಚ್ಚೊತ್ತಿಕೊಂಡ ನಂತರ, ತಮ್ಮ ಮಕ್ಕಳಿಗೆ ಕಲಿಸುವಂತೆ ಮೋಶೆಯು ಉತ್ತೇಜಿಸಿದನು. ಇದು ಪುನರಾವರ್ತನೆಯನ್ನು, ಯೆಹೋವನನ್ನು ಪ್ರೀತಿಸುವುದಕ್ಕಾಗಿರುವ ಕಾರಣಗಳ ಕಡೆಗೆ ಗಮನ ಸೆಳೆಯುವುದನ್ನು, ಇಂತಹ ಪ್ರೀತಿಯ ಪ್ರದರ್ಶನವನ್ನು ತಡೆಯಬಹುದಾದ ಮನೋಭಾವಗಳು ಮತ್ತು ನಡತೆಯೊಂದಿಗೆ ವ್ಯವಹರಿಸುವುದನ್ನು, ಮತ್ತು ಯೆಹೋವನಿಗಾಗಿರುವ ಪ್ರೀತಿಯನ್ನು ತಮ್ಮ ಜೀವಿತಗಳಲ್ಲೇ ತೋರ್ಪಡಿಸುವುದನ್ನು ಕೇಳಿಕೊಂಡಿತು. ನಿಮ್ಮ ಮಕ್ಕಳಿಗೂ ಇದೇ ರೀತಿಯ ಉಪದೇಶದ ಅಗತ್ಯವಿದೆಯೋ? ಹೌದು! ಮತ್ತು ಅವರಿಗೆ ‘ತಮ್ಮ ಹೃದಯದ ಸುನ್ನತಿಮಾಡಿಕೊಳ್ಳಲು’ ಅಂದರೆ, ದೇವರಿಗಾಗಿರುವ ಪ್ರೀತಿಯನ್ನು ಅಡ್ಡಿಮಾಡುವ ಯಾವುದೇ ವಿಷಯವನ್ನು ತೆಗೆದುಹಾಕಲು ಸಹಾಯದ ಅಗತ್ಯವಿದೆ. (ಧರ್ಮೋಪದೇಶಕಾಂಡ 10:12, 16; ಯೆರೆಮೀಯ 4:4) ಇಂತಹ ಅಡೆತಡೆಗಳಲ್ಲಿ, ಲೋಕದ ವಿಷಯಗಳಿಗಾಗಿ ಮತ್ತು ಅದರ ಚಟುವಟಿಕೆಗಳಲ್ಲಿ ತಲ್ಲೀನರಾಗುವ ಅವಕಾಶಗಳಿಗಾಗಿ ಹಾತೊರೆಯುವುದು ಸೇರಿರಬಹುದು. (1 ಯೋಹಾನ 2:15, 16) ಯೆಹೋವನಿಗಾಗಿರುವ ಪ್ರೀತಿಯು ಸಕ್ರಿಯವೂ, ಭಾವಗರ್ಭಿತವೂ ಆಗಿದ್ದು, ನಮ್ಮ ಸ್ವರ್ಗೀಯ ತಂದೆಯನ್ನು ಮೆಚ್ಚಿಸುವಂತಹ ಕೆಲಸಗಳನ್ನು ಮಾಡುವಂತೆ ನಮ್ಮನ್ನು ಪ್ರೇರಿಸಬೇಕು. (1 ಯೋಹಾನ 5:3) ನಿಮ್ಮ ಕುಟುಂಬ ಅಧ್ಯಯನದಿಂದ ದೀರ್ಘ ಕಾಲದ ಪ್ರಯೋಜನಗಳು ಲಭ್ಯವಾಗಬೇಕಾದರೆ, ಪ್ರತಿಯೊಂದು ಅಧ್ಯಯನವು ಈ ಪ್ರೀತಿಯನ್ನು ಬಲಪಡಿಸುವ ವಿಧದಲ್ಲಿ ನಡೆಸಲ್ಪಡಬೇಕು.

6. (ಎ) ನಿಷ್ಕೃಷ್ಟ ಜ್ಞಾನವನ್ನು ನೀಡಲು ಯಾವುದರ ಅಗತ್ಯವಿದೆ? (ಬಿ) ಶಾಸ್ತ್ರಗಳು ನಿಷ್ಕೃಷ್ಟ ಜ್ಞಾನದ ಮಹತ್ವವನ್ನು ಹೇಗೆ ಒತ್ತಿಹೇಳುತ್ತವೆ?

⁶ ದೇವರು ಅಪೇಕ್ಷಿಸುವ ವಿಷಯಗಳ ನಿಷ್ಕೃಷ್ಟ ಜ್ಞಾನವನ್ನು ನೀಡಿರಿ. ಇದರಲ್ಲಿ ಏನು ಒಳಗೂಡಿದೆ? ಒಂದು ಪತ್ರಿಕೆ ಇಲ್ಲವೆ ಪುಸ್ತಕದಿಂದ ಉತ್ತರವೊಂದನ್ನು ಓದಿಹೇಳಲು ಶಕ್ತರಾಗಿರುವುದಕ್ಕಿಂತಲೂ ಹೆಚ್ಚಿನದ್ದು ಇದರಲ್ಲಿ ಸೇರಿದೆ. ಮುಖ್ಯ ಪದಗಳು ಮತ್ತು ಪ್ರಧಾನ ವಿಚಾರಗಳು ಸ್ಪಷ್ಟವಾಗಿ ಅರ್ಥವಾಗಿವೆಯೊ ಎಂಬುದನ್ನು ಖಚಿತಪಡಿಸಿಕೊಳ್ಳಲು, ಸಾಮಾನ್ಯವಾಗಿ ಅವುಗಳನ್ನು ಚರ್ಚಿಸಬೇಕಾಗುತ್ತದೆ. ಹೊಸ ವ್ಯಕ್ತಿತ್ವವನ್ನು ಧರಿಸಲು, ಜೀವಿತದ ಸಮಸ್ಯೆಗಳನ್ನು ನಿಭಾಯಿಸುವಾಗ ಪ್ರಾಮುಖ್ಯವಾದ ವಿಷಯಗಳ ಮೇಲೆ ಮನಸ್ಸನ್ನು ಕೇಂದ್ರೀಕರಿಸಲು, ಮತ್ತು ಹೀಗೆ ದೇವರಿಗೆ ಮೆಚ್ಚಿಗೆಯಾದುದನ್ನು ಮಾಡಲು ನಿಷ್ಕೃಷ್ಟ ಜ್ಞಾನವು ಅತ್ಯಾವಶ್ಯಕವಾಗಿದೆ.—ಫಿಲಿಪ್ಪಿ 1:9-11; ಕೊಲೊಸ್ಸೆ 1:9, 10; 3:10.

7. (ಎ) ಕುಟುಂಬವು ಅಧ್ಯಯನ ವಿಷಯದ ಪ್ರಾಯೋಗಿಕ ಅನ್ವಯವನ್ನು ಮಾಡಿಕೊಳ್ಳುವಂತೆ, ಯಾವ ರೀತಿಯ ಪ್ರಶ್ನೆಗಳ ಬಳಕೆಯು ಸಹಾಯ ಮಾಡಬಹುದು? (ಬಿ) ಇಂತಹ ಒಂದು ಲಕ್ಷ್ಯದ ಮಹತ್ವವನ್ನು ಶಾಸ್ತ್ರಗಳು ಹೇಗೆ ಒತ್ತಿಹೇಳುತ್ತವೆ?

⁷ ಕಲಿತುಕೊಳ್ಳುವ ವಿಷಯದ ಪ್ರಾಯೋಗಿಕ ಅನ್ವಯವನ್ನು ಮಾಡಿಕೊಳ್ಳುವಂತೆ ಸಹಾಯ ಮಾಡಿರಿ. ಈ ಲಕ್ಷ್ಯವನ್ನು ಮನಸ್ಸಿನಲ್ಲಿ ಇಟ್ಟುಕೊಳ್ಳುತ್ತಾ, ಕುಟುಂಬ ಅಧ್ಯಯನವನ್ನು ನಡೆಸುವಾಗಲೆಲ್ಲ ಹೀಗೆ ಕೇಳಿರಿ: ‘ಈ ವಿಷಯವು ನಮ್ಮ ಜೀವಿತಗಳನ್ನು ಹೇಗೆ ಪ್ರಭಾವಿಸಬೇಕು? ನಾವು ಈಗ ಮಾಡುತ್ತಿರುವ ವಿಷಯಗಳಲ್ಲಿ ಯಾವುದೇ ಬದಲಾವಣೆಯನ್ನು ಇದು ಕೇಳಿಕೊಳ್ಳುತ್ತದೊ? ನಾವು ಹೊಂದಾಣಿಕೆಗಳನ್ನು ಏಕೆ ಮಾಡಬಯಸಬೇಕು?’ (ಜ್ಞಾನೋಕ್ತಿ 2:10-15; 9:10; ಯೆಶಾಯ 48:17, 18) ಕಲಿತ ವಿಷಯಗಳ ಪ್ರಾಯೋಗಿಕ ಅನ್ವಯಕ್ಕೆ ಸಾಕಷ್ಟು ಗಮನವನ್ನು ನೀಡುವುದು, ಕುಟುಂಬ ಸದಸ್ಯರ ಆತ್ಮಿಕ ಬೆಳವಣಿಗೆಯಲ್ಲಿ ಒಂದು ಪ್ರಾಮುಖ್ಯ ಅಂಶವಾಗಿರಬಲ್ಲದು.

ಕಲಿಸುವ ಸಾಧನಗಳನ್ನು ವಿವೇಕಯುತವಾಗಿ ಬಳಸಿರಿ

8. ಬೈಬಲ್‌ ಅಧ್ಯಯನಕ್ಕಾಗಿ ಯಾವ ಸಾಧನಗಳನ್ನು ಆಳು ವರ್ಗವು ಒದಗಿಸಿದೆ?

⁸ ಅಧ್ಯಯನಕ್ಕಾಗಿ ಬಳಸಲ್ಪಡಸಾಧ್ಯವಿರುವ ಬೇಕಾದಷ್ಟು ಸಾಧನಗಳನ್ನು ‘ನಂಬಿಗಸ್ತನೂ ವಿವೇಕಿಯೂ ಆದ ಆಳು’ ವರ್ಗವು ಒದಗಿಸಿದೆ. ಬೈಬಲಿನೊಂದಿಗೆ ಉಪಯೋಗಿಸಲ್ಪಡುವ ಕಾವಲಿನಬುರುಜು ಪತ್ರಿಕೆಯು 131 ಭಾಷೆಗಳಲ್ಲಿ ಲಭ್ಯವಿದೆ. ಬೈಬಲ್‌ ಅಧ್ಯಯನಕ್ಕಾಗಿರುವ ಪುಸ್ತಕಗಳು 153 ಭಾಷೆಗಳಲ್ಲಿ, ಬ್ರೋಷರುಗಳು 284 ಭಾಷೆಗಳಲ್ಲಿ, ಆಡಿಯೊಕ್ಯಾಸೆಟ್‌ಗಳು 61 ಭಾಷೆಗಳಲ್ಲಿ, ವಿಡಿಯೊಕ್ಯಾಸೆಟ್‌ಗಳು 41 ಭಾಷೆಗಳಲ್ಲಿ, ಬೈಬಲ್‌ ಸಂಶೋಧನೆಗಾಗಿ ಕಂಪ್ಯೂಟರ್‌ ಕಾರ್ಯಕ್ರಮವು 9 ಭಾಷೆಗಳಲ್ಲಿ ಲಭ್ಯವಿದೆ!—ಮತ್ತಾಯ 24:45-47.

9. ಕುಟುಂಬದಲ್ಲಿ ಕಾವಲಿನಬುರುಜು ಅಧ್ಯಯನವನ್ನು ನಡೆಸುತ್ತಿರುವಾಗ, ಈ ಪ್ಯಾರಗ್ರಾಫಿನಲ್ಲಿ ಉಲ್ಲೇಖಿಸಲ್ಪಟ್ಟ ವಚನಗಳಲ್ಲಿರುವ ಸಲಹೆಯನ್ನು ನಾವು ಹೇಗೆ ಅನ್ವಯಿಸಿಕೊಳ್ಳಬಹುದು?

⁹ ಅನೇಕ ಮನೆವಾರ್ತೆಗಳು ಕುಟುಂಬ ಅಧ್ಯಯನಕ್ಕಾಗಿರುವ ಅವಧಿಯನ್ನು, ಸಭೆಯ ಕಾವಲಿನಬುರುಜು ಅಧ್ಯಯನವನ್ನು ತಯಾರಿಸಲು ಬಳಸುತ್ತವೆ. ಅದು ಎಷ್ಟು ಸಹಾಯಕಾರಿಯಾಗಿರಬಲ್ಲದು! ಲೋಕವ್ಯಾಪಕವಾಗಿರುವ ಯೆಹೋವನ ಜನರ ಭಕ್ತಿವೃದ್ಧಿಮಾಡಲು ಬೇಕಾದ ಪ್ರಧಾನ ಆತ್ಮಿಕ ಆಹಾರವು ಕಾವಲಿನಬುರುಜು ಪತ್ರಿಕೆಯಲ್ಲಿದೆ. ಕಾವಲಿನಬುರುಜು ಪತ್ರಿಕೆಯನ್ನು ಕುಟುಂಬವಾಗಿ ಅಭ್ಯಾಸಿಸುವಾಗ, ಪ್ಯಾರಗ್ರಾಫ್‌ಗಳನ್ನು ಓದಿ, ಮುದ್ರಿತ ಪ್ರಶ್ನೆಗಳನ್ನು ಉತ್ತರಿಸುವುದಕ್ಕಿಂತಲೂ ಹೆಚ್ಚಿನದ್ದನ್ನು ಮಾಡಿರಿ. ವಿಷಯವನ್ನು ತಿಳಿದುಕೊಳ್ಳಲು ಶ್ರದ್ಧಾಪೂರ್ವಕವಾಗಿ ಪ್ರಯತ್ನಿಸಿರಿ. ಅದರಲ್ಲಿ ಉದ್ಧರಿಸಲ್ಪಡದ, ಆದರೆ ಉಲ್ಲೇಖಿಸಲ್ಪಟ್ಟ ವಚನಗಳನ್ನು ತೆರೆದುನೋಡಲು ಸಮಯವನ್ನು ತೆಗೆದುಕೊಳ್ಳಿರಿ. ಈ ವಚನಗಳು ಪರಿಗಣಿಸಲ್ಪಡುತ್ತಿರುವ ಪ್ಯಾರಗ್ರಾಫಿಗೆ ಹೇಗೆ ಸಂಬಂಧಿಸಿವೆ ಎಂಬುದನ್ನು ಕುಟುಂಬ ಸದಸ್ಯರು ಹೇಳುವಂತೆ ಕೇಳಿಕೊಳ್ಳಿರಿ. ಪೂರ್ಣಹೃದಯದಿಂದ ಅಧ್ಯಯನದಲ್ಲಿ ಪಾಲ್ಗೊಳ್ಳಿರಿ.—ಜ್ಞಾನೋಕ್ತಿ 4:7, 23; ಅ. ಕೃತ್ಯಗಳು 17:11.

10. ಮಕ್ಕಳನ್ನು ಅಧ್ಯಯನದಲ್ಲಿ ಒಳಗೂಡಿಸಲು ಮತ್ತು ಅದನ್ನೊಂದು ಆನಂದಮಯ ಸಮಯವನ್ನಾಗಿಸಲು ಏನು ಮಾಡಸಾಧ್ಯವಿದೆ?

¹⁰ ನಿಮ್ಮ ಮನೆವಾರ್ತೆಯಲ್ಲಿ ಮಕ್ಕಳಿರುವುದಾದರೆ, ಅಧ್ಯಯನವನ್ನು ಕೇವಲ ಒಂದು ಕುಟುಂಬ ದಿನಚರಿಯಾಗಿ ಮಾಡದೆ, ಅದನ್ನು ಭಕ್ತಿವೃದ್ಧಿಮಾಡುವ, ಆಸಕ್ತಿಕರವಾದ, ಹಾಗೂ ಸಂತೋಷದ ಸಮಯವನ್ನಾಗಿ ಮಾಡಲು ನೀವು ಏನು ಮಾಡಬಲ್ಲಿರಿ? ಎಲ್ಲರನ್ನೂ ಸೂಕ್ತವಾದ ವಿಧದಲ್ಲಿ ಒಳಗೂಡಿಸಲು ಪ್ರಯತ್ನಿಸಿರಿ, ಹೀಗೆ ಅಧ್ಯಯನದ ವಿಷಯದ ಮೇಲೆಯೇ ಗಮನವು ಕೇಂದ್ರೀಕೃತವಾಗಿರುತ್ತದೆ. ಸಾಧ್ಯವಿರುವಲ್ಲಿ, ಪ್ರತಿಯೊಂದು ಮಗುವು ತನ್ನ ಸ್ವಂತ ಬೈಬಲ್‌ ಹಾಗೂ ಅಧ್ಯಯನ ಪತ್ರಿಕೆಯನ್ನು ಹೊಂದಿರಲಿ. ಯೇಸು ಪ್ರದರ್ಶಿಸಿದ ಮಮತೆಯನ್ನು ಅನುಕರಿಸುತ್ತಾ, ಹೆತ್ತವರು ಮಗುವನ್ನು ತಮ್ಮ ಹತ್ತಿರ ಕೂರಿಸಿಕೊಂಡು ಅದನ್ನು ತಮ್ಮ ಕೈಗಳಿಂದ ಬಳಸಿ ಹಿಡಿದುಕೊಳ್ಳಬಹುದು. (ಹೋಲಿಸಿ ಮಾರ್ಕ 10:13-16.) ಅಧ್ಯಯನದ ವಿಷಯದೊಂದಿಗೆ ಮೂಡಿಬರುವ ಒಂದು ಚಿತ್ರವನ್ನು ಯುವಕನೊಬ್ಬನು ವಿವರಿಸುವಂತೆ ಕುಟುಂಬದ ತಲೆಯು ನೇಮಿಸಬಹುದು. ಮಗುವು ಒಂದು ನಿರ್ದಿಷ್ಟ ವಚನವನ್ನು ಓದುವಂತೆ ಮುಂಚಿತವಾಗಿಯೇ ನೇಮಿಸಬಹುದು. ಅಧ್ಯಯನ ವಿಷಯವನ್ನು ಪ್ರಾಯೋಗಿಕವಾಗಿ ಅನ್ವಯಿಸುವ ಸಂದರ್ಭಗಳನ್ನು ಹಿರಿಯ ಮಕ್ಕಳು ಹೇಳುವಂತೆ ನೇಮಿಸಬಹುದು.

11. ಬೇರೆ ಯಾವ ಕಲಿಸುವ ಸಾಧನಗಳು ಒದಗಿಸಲ್ಪಟ್ಟಿವೆ, ಮತ್ತು ಇವು ಎಲ್ಲಿ ದೊರಕುತ್ತವೆ, ಮತ್ತು ಇವುಗಳನ್ನು ಕುಟುಂಬ ಅಧ್ಯಯನದ ಸಂಬಂಧದಲ್ಲಿ ಹೇಗೆ ಪ್ರಯೋಜನಕರವಾಗಿ ಉಪಯೋಗಿಸಸಾಧ್ಯವಿದೆ?

¹¹ ನಿಮ್ಮ ಚರ್ಚೆಗಾಗಿ ನೀವು ಕಾವಲಿನಬುರುಜು ಪತ್ರಿಕೆಯನ್ನು ಆಧಾರವಾಗಿ ಉಪಯೋಗಿಸುತ್ತಿದ್ದರೂ, ಅನೇಕ ಭಾಷೆಗಳಲ್ಲಿ ಲಭ್ಯವಿರುವ ಇತರ ಅಧ್ಯಯನದ ಸಾಧನಗಳನ್ನು ಮರೆಯಬೇಡಿ. ಒಂದು ಬೈಬಲ್‌ ಅಭಿವ್ಯಕ್ತಿಯ ಹಿನ್ನೆಲೆ ಇಲ್ಲವೆ ವಿವರಣೆಯು ಬೇಕಾಗಿದ್ದಲ್ಲಿ, ಶಾಸ್ತ್ರಗಳ ಒಳನೋಟ (ಇಂಗ್ಲಿಷ್‌) ಪುಸ್ತಕವು ಅದನ್ನು ಒದಗಿಸಬಹುದು. ಇತರ ಪ್ರಶ್ನೆಗಳು, ವಾಚ್‌ ಟವರ್‌ ಪಬ್ಲಿಕೇಷನ್ಸ್‌ ಇಂಡೆಕ್ಸ್‌ ಅನ್ನು ನೋಡುವ ಮೂಲಕ, ಅಥವಾ ಸೊಸೈಟಿಯು ಒದಗಿಸಿರುವ ಕಂಪ್ಯೂಟರ್‌ ರೀಸರ್ಚ್‌ (ಸಂಶೋಧನ) ಕಾರ್ಯಕ್ರಮವನ್ನು ಉಪಯೋಗಿಸುವ ಮೂಲಕ ಉತ್ತರಿಸಲ್ಪಡಬಹುದು. ಈ ಸಾಧನಗಳು ನಿಮ್ಮ ಭಾಷೆಯಲ್ಲಿ ಲಭ್ಯವಿರುವಲ್ಲಿ, ಅವುಗಳನ್ನು ಬಳಸುವ ವಿಧವನ್ನು ನೀವು ಕಲಿತುಕೊಳ್ಳುವುದಾದರೆ, ಅವು ಕೂಡ ಕುಟುಂಬ ಅಧ್ಯಯನದ ಒಂದು ಅಮೂಲ್ಯವಾದ ಭಾಗವಾಗಿ ಪರಿಣಮಿಸಬಲ್ಲವು. ಎಳೆಯರ ಆಸಕ್ತಿಯನ್ನು ಕೆರಳಿಸುವ ಉದ್ದೇಶದಿಂದ, ಸೊಸೈಟಿಯ ಬೋಧಪ್ರದ ವಿಡಿಯೊಗಳಲ್ಲಿ ಒಂದನ್ನು ನೋಡಿ, ಇಲ್ಲವೆ ಆಡಿಯೊಕ್ಯಾಸೆಟ್ಟಿನಲ್ಲಿ ಡ್ರಾಮದ ಒಂದು ಭಾಗವನ್ನು ಕೇಳಿ, ತದನಂತರ ಅದನ್ನು ಚರ್ಚಿಸಲು, ನೀವು ಅಧ್ಯಯನ ಸಮಯದಲ್ಲಿ ಒಂದಿಷ್ಟು ಸಮಯವನ್ನೂ ಬದಿಗಿರಿಸಬಹುದು. ಈ ಅಧ್ಯಯನ ಸಾಧನಗಳ ಒಳ್ಳೆಯ ಬಳಕೆಯು, ನಿಮ್ಮ ಕುಟುಂಬ ಅಧ್ಯಯನವನ್ನು ಆಸಕ್ತಿಕರವಾಗಿ ಮಾಡಲು ಮತ್ತು ಇಡೀ ಕುಟುಂಬಕ್ಕೆ ಪ್ರಯೋಜನಕರವಾಗಿರಲು ಸಹಾಯ ಮಾಡಬಲ್ಲದು.

ನಿಮ್ಮ ಕುಟುಂಬದ ಅಗತ್ಯಗಳಿಗೆ ಸರಿಹೊಂದಿಸಿಕೊಳ್ಳಿರಿ

12. ಕುಟುಂಬದ ತುರ್ತಿನ ಅಗತ್ಯಗಳನ್ನು ನಿಭಾಯಿಸುವುದರಲ್ಲಿ, ಕುಟುಂಬ ಅಧ್ಯಯನವು ಹೇಗೆ ಒಂದು ಪಾತ್ರವನ್ನು ವಹಿಸಸಾಧ್ಯವಿದೆ?

¹² ನಿಮ್ಮ ಕುಟುಂಬವು ವಾರದ ಕಾವಲಿನಬುರುಜು ಪಾಠವನ್ನು ಸಾಮಾನ್ಯವಾಗಿ ಅಭ್ಯಾಸಿಸಬಹುದು. ಆದರೆ, ಕುಟುಂಬದ ಸಮಸ್ಯೆಗಳು ಹಾಗೂ ಅಭಿಪ್ರಾಯಗಳ ಅರಿವೂ ನಿಮಗಿರಲಿ. ತಾಯಿಗೆ ಐಹಿಕ ಕೆಲಸಮಾಡುವ ಅಗತ್ಯವಿರದಿದ್ದಾಗ, ಮಕ್ಕಳು ಶಾಲೆಯಿಂದ ಹಿಂದಿರುಗುವಾಗ, ಪ್ರತಿ ದಿನ ಅವರೊಂದಿಗೆ ಸಮಯ ಕಳೆಯಲು ಅವಳು ಶಕ್ತಳಾಗಿರಬಹುದು. ಕೆಲವು ಸನ್ನಿವೇಶಗಳನ್ನು ಆಗಲೇ ನಿರ್ವಹಿಸಿರಬಹುದಾದರೂ, ಬೇರೆಯವುಗಳಿಗೆ ಹೆಚ್ಚಿನ ಗಮನದ ಅಗತ್ಯವಿರಬಹುದು. ಬಹಳ ತುರ್ತಿನ ಕುಟುಂಬ ಅಗತ್ಯಗಳಿರುವಾಗ, ಅವುಗಳನ್ನು ಕಡೆಗಣಿಸಬೇಡಿರಿ. (ಜ್ಞಾನೋಕ್ತಿ 27:12) ಇದು ಶಾಲೆಯಲ್ಲಿನ ಸಮಸ್ಯೆಗಳನ್ನು ಮಾತ್ರವಲ್ಲ, ಇತರ ಸನ್ನಿವೇಶಗಳನ್ನು ಒಳಗೊಳ್ಳಬಹುದು. ಸೂಕ್ತವಾದ ವಿಷಯವನ್ನು ಆಯ್ದು ತೆಗೆದು, ಅಭ್ಯಾಸಿಸಲ್ಪಡುವ ವಿಷಯದ ಕುರಿತು ಮುಂಚಿತವಾಗಿಯೇ ಕುಟುಂಬಕ್ಕೆ ತಿಳಿಸಿರಿ.

13. ಬಡತನವನ್ನು ಹೇಗೆ ನಿಭಾಯಿಸುವುದು ಎಂಬ ವಿಷಯದ ಕುರಿತಾದ ಕುಟುಂಬ ಚರ್ಚೆಯು ಏಕೆ ಪ್ರಯೋಜನಕರವಾಗಿರಬಹುದು?

¹³ ಉದಾಹರಣೆಗೆ, ಭೂಮಿಯ ಅಧಿಕಾಂಶ ಜನರು ಬಡತನದ ಹಿಡಿತದಲ್ಲಿದ್ದಾರೆ, ಆದುದರಿಂದ ಅದನ್ನು ನಿಭಾಯಿಸುವ ವಿಧವನ್ನು ಚರ್ಚಿಸುವುದು ಅಗತ್ಯವಾಗಿರಬಹುದು. ನಿಜ ಜೀವನದ ಸನ್ನಿವೇಶಗಳು ಮತ್ತು ಬೈಬಲ್‌ ತತ್ವಗಳ ಕುರಿತಾದ ಕುಟುಂಬ ಅಧ್ಯಯನವು ನಿಮ್ಮ ಮನೆವಾರ್ತೆಗೆ ಪ್ರಯೋಜನಕರವಾಗಿರುವುದೋ?—ಜ್ಞಾನೋಕ್ತಿ 21:5; ಪ್ರಸಂಗಿ 9:11; ಇಬ್ರಿಯ 13:5, 6, 18.

14. ಹಿಂಸಾಚಾರ, ಯುದ್ಧ, ಮತ್ತು ಕ್ರೈಸ್ತ ತಾಟಸ್ಥ್ಯದ ಕುರಿತಾದ ಯೆಹೋವನ ನೋಟವನ್ನು, ಯಾವ ಸನ್ನಿವೇಶಗಳು ಸಮಯೋಚಿತ ಕುಟುಂಬ ಚರ್ಚೆಯಾಗಿ ಮಾಡಬಹುದು?

¹⁴ ಚರ್ಚಿಸಬೇಕಾದ ಮತ್ತೊಂದು ಸಂಗತಿಯು ಹಿಂಸಾಚಾರದ ವಿಷಯವಾಗಿದೆ. ಯೆಹೋವನ ದೃಷ್ಟಿಕೋನವನ್ನು ನಮ್ಮ ಹೃದಮನಗಳ ಮೇಲೆ ಬಲವಾಗಿ ಅಚ್ಚೊತ್ತುವ ಅಗತ್ಯ ನಮಗೆಲ್ಲರಿಗೂ ಇದೆ. (ಆದಿಕಾಂಡ 6:13; ಕೀರ್ತನೆ 11:5) ಈ ವಿಷಯದ ಕುರಿತಾದ ಕುಟುಂಬ ಅಧ್ಯಯನವು, ಶಾಲೆಯಲ್ಲಿರುವ ಪೀಡಕರನ್ನು ಹೇಗೆ ನಿಭಾಯಿಸುವುದು ಎಂಬುದನ್ನು, ಯುದ್ಧೋಚಿತ ಕಲೆಗಳಲ್ಲಿ ತರಬೇತಿ ಪಡೆಯಬೇಕೊ ಬೇಡವೊ ಎಂಬುದನ್ನು, ಮತ್ತು ಯೋಗ್ಯವಾದ ಮನೋರಂಜನೆಯನ್ನು ಆರಿಸಿಕೊಳ್ಳುವುದು ಹೇಗೆಂಬುದನ್ನು ಚರ್ಚಿಸುವುದಕ್ಕಾಗಿ ಒಂದು ಅವಕಾಶವನ್ನು ಒದಗಿಸಬಲ್ಲದು. ಹಿಂಸಾತ್ಮಕ ಕ್ಷೋಭೆಗಳು ಸಾಮಾನ್ಯವಾಗಿವೆ. ಪ್ರತಿಯೊಂದು ದೇಶವು ಆಂತರಿಕ ಯುದ್ಧದಿಂದಾಗಲಿ, ರಾಜಕೀಯ ಇಲ್ಲವೆ ಕುಲಸಂಬಂಧಿತ ಕಲಹದಿಂದಾಗಲಿ, ಗ್ಯಾಂಗ್‌ ಹೋರಾಟಗಳಿಂದಾಗಲಿ ಪೀಡಿತವಾಗಿದೆ. ಫಲಸ್ವರೂಪವಾಗಿ, ಯುದ್ಧಮಾಡುವ ಪಕ್ಷಗಳಿಂದ ಸುತ್ತುವರಿಯಲ್ಪಟ್ಟಾಗ, ಕ್ರೈಸ್ತ ನಡತೆಯನ್ನು ಕಾಪಾಡಿಕೊಳ್ಳುವುದರ ಕುರಿತಾದ ಚರ್ಚೆಯ ಅಗತ್ಯ ನಿಮ್ಮ ಕುಟುಂಬಕ್ಕಿರಬಹುದು.—ಯೆಶಾಯ 2:2-4; ಯೋಹಾನ 17:16.

15. ಲೈಂಗಿಕತೆ ಮತ್ತು ವಿವಾಹದ ಕುರಿತಾದ ಉಪದೇಶವು ಮಕ್ಕಳಿಗೆ ಹೇಗೆ ನೀಡಲ್ಪಡಬೇಕು?

¹⁵ ಮಕ್ಕಳು ಬೆಳೆದಂತೆ, ಅವರ ವಯಸ್ಸಿಗೆ ಅನುಗುಣವಾಗಿ ಲೈಂಗಿಕತೆ ಮತ್ತು ವಿವಾಹದ ಕುರಿತಾದ ಉಪದೇಶವು ಅವರಿಗೆ ಅಗತ್ಯವಾಗಿದೆ. ಕೆಲವು ಸಂಸ್ಕೃತಿಗಳಲ್ಲಿ, ಹೆಚ್ಚಿನ ಹೆತ್ತವರು ತಮ್ಮ ಮಕ್ಕಳೊಂದಿಗೆ ಲೈಂಗಿಕತೆಯ ಕುರಿತು ಚರ್ಚಿಸುವುದೇ ಇಲ್ಲ. ಏನೂ ಅರಿಯದ ಮಕ್ಕಳು ಇತರ ಯುವಕರಿಂದ ವಿಕೃತವಾದ ವಿಚಾರಗಳನ್ನು ಕೇಳಿಸಿಕೊಂಡಾಗ, ಪರಿಣಾಮಗಳು ವಿಪತ್ಕಾರಕವಾಗಿರಬಲ್ಲವು. ಬೈಬಲಿನಲ್ಲಿ ಈ ವಿಷಯದ ಕುರಿತು ನೇರವಾದ ಹಾಗೂ ಹಿತಕರವಾದ ಸಲಹೆಯನ್ನು ನೀಡುವ ಯೆಹೋವನನ್ನು ಅನುಕರಿಸುವುದು ಉತ್ತಮವಾಗಿರಲಾರದೋ? ನಮ್ಮ ಮಕ್ಕಳು ಸ್ವಗೌರವವನ್ನು ಕಾಪಾಡಿಕೊಳ್ಳುವಂತೆ ಮತ್ತು ವಿರುದ್ಧ ಲಿಂಗದವರನ್ನು ಮರ್ಯಾದೆಯಿಂದ ಕಾಣುವಂತೆ ದೈವಿಕ ಸಲಹೆಯು ಸಹಾಯ ಮಾಡುವುದು. (ಜ್ಞಾನೋಕ್ತಿ 5:18-20; ಕೊಲೊಸ್ಸೆ 3:5; 1 ಥೆಸಲೊನೀಕ 4:3-8) ಈ ವಿಷಯಗಳನ್ನು ನೀವು ಈಗಾಗಲೇ ಚರ್ಚಿಸಿದ್ದರೂ, ಅದನ್ನು ಮತ್ತೊಮ್ಮೆ ಚರ್ಚಿಸಲು ಹಿಂಜರಿಯಬೇಡಿ. ಹೊಸ ಸನ್ನಿವೇಶಗಳು ಏಳುವಾಗ, ಪುನರಾವರ್ತನೆಯು ಅತ್ಯಾವಶ್ಯಕವಾಗಿದೆ.

16. (ಎ) ವಿವಿಧ ಮನೆವಾರ್ತೆಗಳಲ್ಲಿ, ಕುಟುಂಬ ಅಧ್ಯಯನವು ಯಾವಾಗ ನಡೆಸಲ್ಪಡುತ್ತದೆ? (ಬಿ) ಕ್ರಮವಾದ ಕುಟುಂಬ ಅಧ್ಯಯನವನ್ನು ನಡೆಸಲಿಕ್ಕಾಗಿ ಯಾವ ಅಡೆತಡೆಗಳನ್ನು ನೀವು ಎದುರಿಸಿದ್ದೀರಿ?

¹⁶ ಕುಟುಂಬ ಅಧ್ಯಯನವನ್ನು ಯಾವಾಗ ಮಾಡಸಾಧ್ಯವಿದೆ? ಲೋಕದ ಸುತ್ತಲೂ ಇರುವ ಬೆತೆಲ್‌ ಕುಟುಂಬಗಳನ್ನು ಅನುಕರಿಸುತ್ತಾ, ಅನೇಕ ಮನೆವಾರ್ತೆಗಳು ತಮ್ಮ ಕುಟುಂಬ ಅಧ್ಯಯನವನ್ನು ಸೋಮವಾರದಂದು ಸಂಜೆಯ ವೇಳೆಯಲ್ಲಿ ನಡೆಸುತ್ತವೆ. ಇತರರಿಗೆ ಅದು ಭಿನ್ನವಾಗಿದೆ. ಅರ್ಜೆಂಟೀನದಲ್ಲಿರುವ 9 ಮಕ್ಕಳುಳ್ಳ 11 ಜನರ ಒಂದು ಕುಟುಂಬವು, ತಮ್ಮ ಕುಟುಂಬ ಅಧ್ಯಯನವನ್ನು ನಡೆಸಲು ಪ್ರತಿದಿನ ಬೆಳಗ್ಗೆ ಐದು ಗಂಟೆಗೆ ಕ್ರಮವಾಗಿ ಎದ್ದಿತು. ಕೆಲಸದ ವೈವಿಧ್ಯಮಯ ವೇಳಾಪಟ್ಟಿಯ ಕಾರಣ, ಬೇರೆ ಯಾವ ಸಮಯವೂ ಅನುಕೂಲಕರವಾಗಿರಲಿಲ್ಲ. ಇದು ಸುಲಭವಾಗಿರದಿದ್ದರೂ, ಮಕ್ಕಳ ಹೃದಮನಗಳ ಮೇಲೆ ಕುಟುಂಬ ಅಧ್ಯಯನದ ಮಹತ್ವವನ್ನು ಇದು ಅಚ್ಚೊತ್ತಿತು. ಫಿಲಿಪ್ಪೀನ್ಸ್‌ನಲ್ಲಿರುವ ಒಬ್ಬ ಹಿರಿಯನು, ತನ್ನ ಹೆಂಡತಿ ಹಾಗೂ ಬೆಳೆಯುತ್ತಿದ್ದ ಮೂವರು ಮಕ್ಕಳೊಂದಿಗೆ ಕ್ರಮವಾದ ಕುಟುಂಬ ಅಧ್ಯಯನವನ್ನು ನಡೆಸಿದನು. ವಾರದ ಬೇರೆ ಸಮಯಗಳಲ್ಲಿ, ಹೆತ್ತವರು ಪ್ರತಿಯೊಂದು ಮಗುವಿನೊಂದಿಗೆ ವೈಯಕ್ತಿಕ ಅಧ್ಯಯನವನ್ನು ನಡೆಸಿದರು, ಇದರಿಂದ ಮಕ್ಕಳಲ್ಲಿ ಪ್ರತಿಯೊಬ್ಬರೂ ಸತ್ಯವನ್ನು ತಮ್ಮದಾಗಿ ಮಾಡಿಕೊಳ್ಳಲು ಸಾಧ್ಯವಾಯಿತು. ಅಮೆರಿಕದಲ್ಲಿ, ಯಾರ ಗಂಡನು ಸಾಕ್ಷಿಯಾಗಿಲ್ಲವೊ ಆ ಸಹೋದರಿಯು, ತನ್ನ ಮಕ್ಕಳೊಂದಿಗೆ ಪ್ರತಿದಿನ ಬೆಳಗ್ಗೆ ಶಾಲೆಯ ಬಸ್ಸಿಗಾಗಿ ನಡೆಯುತ್ತಾಳೆ. ಬಸ್ಸಿಗಾಗಿ ಕಾಯುತ್ತಿರುವಾಗ, ಸೂಕ್ತವಾದ ಶಾಸ್ತ್ರೀಯ ಅಧ್ಯಯನ ವಿಷಯವನ್ನು ಅವರು ಹತ್ತು ನಿಮಿಷಗಳ ವರೆಗೆ ಒಟ್ಟಿಗೆ ಓದುತ್ತಾರೆ ಮತ್ತು ಚರ್ಚಿಸುತ್ತಾರೆ. ತದನಂತರ, ಮಕ್ಕಳು ಬಸ್ಸನ್ನೇರುವ ಮುಂಚೆ ತಾಯಿಯು ಅವರೊಂದಿಗೆ ಚಿಕ್ಕದಾದ ಪ್ರಾರ್ಥನೆಯನ್ನು ಮಾಡುತ್ತಾಳೆ. ಡೆಮೋಕ್ರ್ಯಾಟಿಕ್‌ ರಿಪಬ್ಲಿಕ್‌ ಆಫ್‌ ಕಾಂಗೊವಿನಲ್ಲಿರುವ ಒಬ್ಬ ಸ್ತ್ರೀಯ ಅವಿಶ್ವಾಸಿ ಗಂಡನು ಕುಟುಂಬವನ್ನು ತೊರೆದುಬಿಟ್ಟಿದ್ದಾನೆ. ಆಕೆ ತನ್ನ ಸೀಮಿತ ಶಿಕ್ಷಣದ ಕಾರಣ ಅಧ್ಯಯನಕ್ಕಾಗಿ ಬಹಳಷ್ಟು ಪ್ರಯಾಸಪಡಬೇಕಾಗಿದೆ. ಆಕೆಯ ಹಿರಿಯ ಮಗನು ಪ್ರತಿ ವಾರ ಕುಟುಂಬವನ್ನು ಸಂದರ್ಶಿಸಿ, ತನ್ನ ತಾಯಿ ಹಾಗೂ ತಮ್ಮಂದಿರಿಗೆ ಅಧ್ಯಯನವನ್ನು ನಡೆಸುವುದರಲ್ಲಿ ನಾಯಕತ್ವ ವಹಿಸುತ್ತಾನೆ. ತನ್ನ ಶ್ರದ್ಧಾಪೂರ್ವಕ ತಯಾರಿಯ ಮೂಲಕ ತಾಯಿಯು ಉತ್ತಮವಾದ ಮಾದರಿಯನ್ನಿಡುತ್ತಾಳೆ. ನಿಮ್ಮ ಮನೆವಾರ್ತೆಯಲ್ಲಿ ಕ್ರಮವಾದ ಕುಟುಂಬ ಅಧ್ಯಯನವನ್ನು ಕಷ್ಟಕರವಾಗಿ ಮಾಡುವಂತಹ ಯಾವ ಸನ್ನಿವೇಶವಾದರೂ ಇದೆಯೋ? ಹತಾಶರಾಗುತ್ತಾ, ಬಿಟ್ಟುಕೊಡಬೇಡಿ. ಕ್ರಮವಾದ ಕುಟುಂಬ ಅಧ್ಯಯನವನ್ನು ನಡೆಸಲು ನೀವು ಮಾಡುವ ಎಲ್ಲ ಪ್ರಯತ್ನಗಳ ಮೇಲೆ ಯೆಹೋವನ ಆಶೀರ್ವಾದಗಳನ್ನು ಶ್ರದ್ಧಾಪೂರ್ವಕವಾಗಿ ಕೋರಿರಿ.—ಮಾರ್ಕ 11:23, 24.

ಪಟ್ಟುಹಿಡಿಯುವಿಕೆಯ ಪ್ರತಿಫಲಗಳು

17. (ಎ) ಕ್ರಮವಾದ ಕುಟುಂಬ ಅಧ್ಯಯನವನ್ನು ನಡೆಸಲು ಯಾವುದರ ಅಗತ್ಯವಿದೆ? (ಬಿ) ಯೆಹೋವನ ಮಾರ್ಗಗಳ ಕುರಿತಾದ ಕ್ರಮವಾದ ಕುಟುಂಬ ಉಪದೇಶದ ಮಹತ್ವವನ್ನು ಯಾವ ಅನುಭವವು ದೃಷ್ಟಾಂತಿಸುತ್ತದೆ?

¹⁷ ಇದಕ್ಕೆ ಯೋಜನೆ ಮಾಡುವುದು ಮತ್ತು ಪಟ್ಟುಹಿಡಿಯುವಿಕೆಯು ಅಗತ್ಯವಾಗಿದೆ. ಆದರೆ, ಕ್ರಮವಾದ ಕುಟುಂಬ ಅಧ್ಯಯನದಿಂದ ಬರುವ ಪ್ರಯೋಜನಗಳು ಸಾರ್ಥಕವಾಗಿವೆ. (ಜ್ಞಾನೋಕ್ತಿ 22:6; 3 ಯೋಹಾನ 4) ಜರ್ಮನಿಯಲ್ಲಿರುವ ಫ್ರಾನ್ಸ್‌ ಮತ್ತು ಹಿಲ್ಡಾ, 11 ಮಕ್ಕಳುಳ್ಳ ಕುಟುಂಬವನ್ನು ಬೆಳೆಸಿದರು. ಅನೇಕ ವರ್ಷಗಳ ತರುವಾಯ ಅವರ ಮಗಳಾದ ಮ್ಯಾಗ್‌ಡಲೇನಾ ಹೇಳಿದ್ದು: “ಯಾವ ರೀತಿಯಲ್ಲಾದರೂ ಒಂದಿಷ್ಟು ಆತ್ಮಿಕ ಉಪದೇಶವನ್ನು ನಾವು ಪಡೆದುಕೊಳ್ಳದ ದಿನವೇ ಇರಲಿಲ್ಲ ಎಂಬ ವಿಷಯವನ್ನೇ ನಾನು ಇಂದು ಅತ್ಯಂತ ಮಹತ್ವದ ಸಂಗತಿಯಾಗಿ ಪರಿಗಣಿಸುತ್ತೇನೆ.” ಅಡಾಲ್ಫ್‌ ಹಿಟ್ಲರನ ಆಳ್ವಿಕೆಯ ಕೆಳಗೆ, ರಾಷ್ಟ್ರೀಯತೆಯ ಆತ್ಮವು ತೀವ್ರಗೊಂಡಾಗ, ಬರಲಿರುವ ಪರೀಕ್ಷೆಗಳಿಗಾಗಿ ತನ್ನ ಕುಟಂಬವನ್ನು ತಯಾರಿಸಲು ಮ್ಯಾಗ್‌ಡಲೇನಾಳ ತಂದೆ ಬೈಬಲನ್ನು ಉಪಯೋಗಿಸಿದರು. ಸಕಾಲದಲ್ಲಿ, ಕುಟುಂಬದ ಸದಸ್ಯರಲ್ಲಿ ಎಳೆಯರನ್ನು ಮನೆಯಿಂದ ಕೊಂಡೊಯ್ದು, ಒಂದು ಸುಧಾರಣೆ ಶಾಲೆಯಲ್ಲಿ ಸೇರಿಸಲಾಯಿತು. ಕುಟುಂಬದ ಇತರ ಸದಸ್ಯರು ದಸ್ತಗಿರಿ ಮಾಡಲ್ಪಟ್ಟು, ಸೆರೆಮನೆಗಳಲ್ಲಿ ಮತ್ತು ಕೂಟ ಶಿಬಿರಗಳಲ್ಲಿ ಹಾಕಲ್ಪಟ್ಟರು. ಕೆಲವರು ವಧಿಸಲ್ಪಟ್ಟರು. ಅವರೆಲ್ಲರ ನಂಬಿಕೆಯು, ಆ ಉಗ್ರವಾದ ಹಿಂಸೆಯ ಸಮಯದಲ್ಲಿ ಮಾತ್ರವಲ್ಲ, ಯಾರು ಬದುಕಿ ಉಳಿದರೋ ಅವರಿಗೆ ತದನಂತರದ ವರ್ಷಗಳಲ್ಲೂ ದೃಢವಾಗಿತ್ತು.

18. ಒಂಟಿ ಹೆತ್ತವರ ಪ್ರಯತ್ನಗಳು ಹೇಗೆ ಬಹುಮಾನಿಸಲ್ಪಟ್ಟಿವೆ?

¹⁸ ಅನೇಕ ಒಂಟಿ ಹೆತ್ತವರು ಮತ್ತು ಒಂದೇ ನಂಬಿಕೆಯನ್ನು ಅನುಸರಿಸದ ಸಂಗಾತಿಗಳುಳ್ಳವರು ಸಹ, ತಮ್ಮ ಮಕ್ಕಳಿಗೆ ಕ್ರಮವಾದ ಬೈಬಲ್‌ ಉಪದೇಶವನ್ನು ನೀಡಿದ್ದಾರೆ. ಭಾರತದಲ್ಲಿ ವಿಧವೆಯಾಗಿರುವ ಒಬ್ಬ ಒಂಟಿ ತಾಯಿಯು, ತನ್ನ ಇಬ್ಬರು ಮಕ್ಕಳಲ್ಲಿ ಯೆಹೋವನಿಗಾಗಿ ಪ್ರೀತಿಯನ್ನು ಬೆಳೆಸಲು ಕಷ್ಟಪಟ್ಟು ದುಡಿದಳು. ಆದರೆ, ಅವಳ ಮಗನು ಯೆಹೋವನ ಜನರೊಂದಿಗೆ ಸಹವಾಸಿಸುವುದನ್ನು ಬಿಟ್ಟುಬಿಟ್ಟಾಗ, ಅವಳು ಎದೆಗುಂದಿಹೋದಳು. ತನ್ನ ಮಗನ ತರಬೇತಿಯಲ್ಲಿ ತಾನು ಮಾಡಿರುವ ಯಾವುದೇ ಕುಂದುಕೊರತೆಗಳನ್ನು ಯೆಹೋವನು ಕ್ಷಮಿಸಬೇಕೆಂದು ಅವಳು ಬೇಡಿಕೊಂಡಳು. ಆದರೆ ತಾನು ಕಲಿತಿದ್ದ ವಿಷಯಗಳನ್ನು ಮಗನು ಮರೆತಿರಲಿಲ್ಲ. ಒಂದು ದಶಕದ ನಂತರ ಅವನು ಹಿಂದಿರುಗಿ, ಒಳ್ಳೆಯ ಆತ್ಮಿಕ ಪ್ರಗತಿಯನ್ನು ಮಾಡಿ, ಸಭಾ ಹಿರಿಯನಾದನು. ಈಗ ಅವನೂ ಅವನ ಪತ್ನಿಯೂ ಪೂರ್ಣ ಸಮಯದ ಶುಶ್ರೂಷಕರಾಗಿ ಸೇವೆ ಸಲ್ಲಿಸುತ್ತಾರೆ. ಕುಟುಂಬ ವೃತ್ತದೊಳಗೆ ಕ್ರಮವಾದ ಬೈಬಲ್‌ ಉಪದೇಶವನ್ನು ನೀಡಬೇಕೆಂದು ಯೆಹೋವನಿಂದ ಮತ್ತು ಆತನ ಸಂಸ್ಥೆಯಿಂದ ಬರುವ ಸಲಹೆಯನ್ನು ಪಾಲಿಸಿದ ಹೆತ್ತವರು ಎಷ್ಟು ಆಭಾರಿಗಳಾಗಿದ್ದಾರೆ! ನಿಮ್ಮ ಮನೆವಾರ್ತೆಯಲ್ಲಿ ನೀವೂ ಆ ಸಲಹೆಯನ್ನು ಅನ್ವಯಿಸುತ್ತಿದ್ದೀರೋ?

ನೀವು ವಿವರಿಸಬಲ್ಲಿರೊ?

◻ ಕ್ರಮವಾದ ಕುಟುಂಬ ಅಧ್ಯಯನವು ಏಕೆ ಪ್ರಾಮುಖ್ಯವಾಗಿದೆ?

◻ ಪ್ರತಿಯೊಂದು ಕುಟುಂಬ ಅಧ್ಯಯನದಲ್ಲಿ ನಮ್ಮ ಲಕ್ಷ್ಯಗಳು ಏನಾಗಿರಬೇಕು?

◻ ಕಲಿಸಲಿಕ್ಕಾಗಿ ಯಾವ ಸಾಧನಗಳು ನಮಗೆ ಲಭ್ಯಗೊಳಿಸಲ್ಪಟ್ಟಿವೆ?

◻ ಅಧ್ಯಯನವನ್ನು ಕುಟುಂಬದ ಅಗತ್ಯಗಳಿಗೆ ಹೇಗೆ ಹೊಂದಿಸಸಾಧ್ಯವಿದೆ?

[ಪುಟ 15 ರಲ್ಲಿರುವ ಚಿತ್ರ]

ನಿಶ್ಚಿತ ಲಕ್ಷ್ಯಗಳು ನಿಮ್ಮ ಕುಟುಂಬ ಅಧ್ಯಯನದ ಗುಣಮಟ್ಟವನ್ನು ಹೆಚ್ಚಿಸುವವು

ಕುಟುಂಬಗಳೇ, ದೇವರ ಸಭೆಯ ಭಾಗದೋಪಾದಿ ಆತನನ್ನು ಸ್ತುತಿಸಿರಿ

“ಕೂಡಿದ ಸಭೆಗಳಲ್ಲಿ ಯೆಹೋವನನ್ನು ಕೊಂಡಾಡುವೆನು.”—ಕೀರ್ತನೆ 26:12.

1. ಮನೆಯಲ್ಲಿ ಅಧ್ಯಯನ ಹಾಗೂ ಪ್ರಾರ್ಥನೆಯ ಜೊತೆಗೆ, ಸತ್ಯಾರಾಧನೆಯ ಪ್ರಮುಖವಾದ ಭಾಗವು ಯಾವುದಾಗಿದೆ?

ಯೆಹೋವನ ಆರಾಧನೆಯು, ಮನೆಯಲ್ಲಿ ಪ್ರಾರ್ಥನೆ ಮತ್ತು ಬೈಬಲಿನ ಅಧ್ಯಯನವನ್ನು ಮಾತ್ರವಲ್ಲ, ದೇವರ ಸಭೆಯ ಭಾಗದೋಪಾದಿ ಚಟುವಟಿಕೆಯನ್ನೂ ಒಳಗೊಳ್ಳುತ್ತದೆ. ಪುರಾತನ ಇಸ್ರಾಯೇಲ್ಯರು ದೇವರ ನಿಯಮವನ್ನು ಕಲಿತು, ಆತನ ಮಾರ್ಗದಲ್ಲಿ ನಡೆಯಲು ಸಾಧ್ಯವಾಗುವಂತೆ, ಜನರೆಲ್ಲರನ್ನು, ಅಂದರೆ “ಸ್ತ್ರೀಪುರುಷರನ್ನೂ ಮಕ್ಕಳನ್ನೂ . . . ಕೂಡಿಸ”ಬೇಕೆಂದು ಆಜ್ಞಾಪಿಸಲ್ಪಟ್ಟರು. (ಧರ್ಮೋಪದೇಶಕಾಂಡ 31:12; ಯೆಹೋಶುವ 8:35) ಯೆಹೋವನ ನಾಮವನ್ನು ಸ್ತುತಿಸುವುದರಲ್ಲಿ ವೃದ್ಧರು ಮತ್ತು ‘ಪ್ರಾಯಸ್ಥರಾದ ಸ್ತ್ರೀಪುರುಷರು,’ ಹೀಗೆ ಎಲ್ಲರೂ ಪಾಲ್ಗೊಳ್ಳುವಂತೆ ಉತ್ತೇಜಿಸಲ್ಪಟ್ಟರು. (ಕೀರ್ತನೆ 148:12, 13) ತದ್ರೀತಿಯ ಏರ್ಪಾಡುಗಳು ಕ್ರೈಸ್ತ ಸಭೆಗೆ ಅನ್ವಯಿಸುತ್ತವೆ. ಭೂಮಿಯಾದ್ಯಂತವಿರುವ ರಾಜ್ಯ ಸಭಾಗೃಹಗಳಲ್ಲಿ, ಸಭಿಕರ ಭಾಗವಹಿಸುವಿಕೆಯನ್ನು ಅವಶ್ಯಪಡಿಸುವ ಕೂಟಗಳಲ್ಲಿ ಸ್ತ್ರೀಪುರುಷರು ಮತ್ತು ಮಕ್ಕಳು ಮುಕ್ತವಾಗಿ ಭಾಗವಹಿಸುತ್ತಾರಲ್ಲದೆ, ಅದರಲ್ಲಿ ಭಾಗವಹಿಸಲು ಸಾಧ್ಯವಾದುದಕ್ಕಾಗಿ ಬಹಳವಾಗಿ ಸಂತೋಷಿಸುತ್ತಾರೆ.—ಇಬ್ರಿಯ 10:23-25.

2. (ಎ) ಎಳೆಯರು ಕೂಟಗಳಲ್ಲಿ ಆನಂದಿಸುವಂತೆ ಸಹಾಯ ಮಾಡುವುದರಲ್ಲಿ, ತಯಾರಿಯು ಏಕೆ ಒಂದು ಮುಖ್ಯ ಅಂಶವಾಗಿದೆ? (ಬಿ) ಯಾರ ಮಾದರಿಯು ಪ್ರಾಮುಖ್ಯವಾಗಿದೆ?

² ನಿಜ, ಸಭಾ ಚಟುವಟಿಕೆಯ ಹಿತಕರವಾದ ನಿಯತಕ್ರಮವನ್ನು ಎಳೆಯರು ಅನುಸರಿಸುವಂತೆ ಸಹಾಯ ಮಾಡುವುದು ಒಂದು ಪಂಥಾಹ್ವಾನವಾಗಿರಬಲ್ಲದು. ತಮ್ಮ ಹೆತ್ತವರೊಂದಿಗೆ ಹಾಜರಾಗುವ ಕೆಲವು ಮಕ್ಕಳು ಕೂಟಗಳಲ್ಲಿ ಆನಂದಿಸದಿದ್ದರೆ, ಸಮಸ್ಯೆಯು ಏನಾಗಿರಬಹುದು? ಹೆಚ್ಚಿನ ಮಕ್ಕಳು ದೀರ್ಘ ಸಮಯದ ವರೆಗೆ ಗಮನಹರಿಸಲು ಅಸಮರ್ಥರಾಗಿರುವುದರಿಂದ, ಅವರು ಸುಲಭವಾಗಿ ಬೇಸರಗೊಳ್ಳುತ್ತಾರೆ. ಈ ಸಮಸ್ಯೆಯನ್ನು ನಿಭಾಯಿಸಲು ಪೂರ್ವತಯಾರಿಯು ಸಹಾಯ ಮಾಡಬಲ್ಲದು. ತಯಾರಿಯಿಲ್ಲದೆ ಮಕ್ಕಳು ಕೂಟಗಳಲ್ಲಿ ಅರ್ಥಭರಿತವಾಗಿ ಭಾಗವಹಿಸಲು ಸಾಧ್ಯವಿಲ್ಲ. (ಜ್ಞಾನೋಕ್ತಿ 15:23) ತಯಾರಿಯಿಲ್ಲದೆ, ತೃಪ್ತಿದಾಯಕವಾದ ಆತ್ಮಿಕ ಪ್ರಗತಿಯನ್ನು ಮಾಡುವುದು ಅವರಿಗೆ ಕಷ್ಟಕರವಾಗಿರುವುದು. (1 ತಿಮೊಥೆಯ 4:12, 15) ಇದಕ್ಕಾಗಿ ಏನು ಮಾಡಸಾಧ್ಯವಿದೆ? ಹೆತ್ತವರಾದ ತಾವು ಮೊದಲಾಗಿ ಕೂಟಗಳಿಗಾಗಿ ತಯಾರಿಸುತ್ತೇವೊ ಎಂದು ತಮ್ಮನ್ನೇ ಕೇಳಿಕೊಳ್ಳುವ ಅಗತ್ಯವಿದೆ. ಅವರ ಮಾದರಿಯು ಒಂದು ಶಕ್ತಿಶಾಲಿ ಪ್ರಭಾವವಾಗಿದೆ. (ಲೂಕ 6:40) ಕುಟುಂಬ ಅಧ್ಯಯನವನ್ನು ಜಾಗರೂಕವಾಗಿ ಯೋಜಿಸುವುದು ಕೂಡ ಒಂದು ಪ್ರಮುಖ ಅಂಶವಾಗಿರಬಲ್ಲದು.

ಹೃದಯವನ್ನು ಬಲಪಡಿಸುವುದು

3. ಕುಟುಂಬ ಅಧ್ಯಯನದ ಸಮಯದಲ್ಲಿ, ಹೃದಯಗಳನ್ನು ಬಲಪಡಿಸಲು ವಿಶೇಷವಾದ ಪ್ರಯತ್ನವು ಏಕೆ ಮಾಡಲ್ಪಡಬೇಕು, ಮತ್ತು ಇದು ಏನನ್ನು ಅಗತ್ಯಪಡಿಸುತ್ತದೆ?

³ ಕುಟುಂಬ ಅಧ್ಯಯನವು, ಕೇವಲ ತಲೆಯೊಳಗೆ ಜ್ಞಾನವನ್ನು ತುಂಬಿಸುವ ಸಮಯವಾಗಿರದೆ, ಹೃದಯಗಳನ್ನು ಬಲಪಡಿಸುವ ಸಮಯವೂ ಆಗಿರಬೇಕು. ಇದಕ್ಕೆ, ಕುಟುಂಬ ಸದಸ್ಯರು ಎದುರಿಸುವ ಸಮಸ್ಯೆಗಳ ಅರಿವು ಮತ್ತು ಪ್ರತಿಯೊಬ್ಬರಿಗಾಗಿ ಪ್ರೀತಿಪರ ಚಿಂತೆಯು ಅಗತ್ಯ. ಯೆಹೋವನು “ಹೃದಯವನ್ನು ಶೋಧಿಸುವವ”ನಾಗಿದ್ದಾನೆ.—1 ಪೂರ್ವಕಾಲವೃತ್ತಾಂತ 29:17.

4. (ಎ) “ಬುದ್ಧಿಹೀನ”ರಾಗಿರುವುದರ ಅರ್ಥವೇನು? (ಬಿ) “ಹೃದಯವನ್ನು ಸಂಪಾದಿಸು”ವುದರಲ್ಲಿ ಏನು ಒಳಗೂಡಿದೆ?

⁴ ಯೆಹೋವನು ನಮ್ಮ ಮಕ್ಕಳ ಹೃದಯಗಳನ್ನು ಶೋಧಿಸುವಾಗ ಏನನ್ನು ಕಂಡುಕೊಳ್ಳುತ್ತಾನೆ? ಮಕ್ಕಳಲ್ಲಿ ಹೆಚ್ಚಿನವರು, ತಾವು ದೇವರನ್ನು ಪ್ರೀತಿಸುವುದಾಗಿ ಹೇಳುವರು. ಇದು ಪ್ರಶಂಸನೀಯ. ಆದರೂ, ಒಬ್ಬ ಯುವ ಪ್ರಾಯದವನು ಇಲ್ಲವೆ ಯೆಹೋವನ ಕುರಿತು ಹೊಸದಾಗಿ ಕಲಿಯುತ್ತಿರುವವನು, ಯೆಹೋವನ ಮಾರ್ಗಗಳಲ್ಲಿ ಸೀಮಿತ ಅನುಭವವುಳ್ಳವನಾಗಿದ್ದಾನೆ. ಅವನು ಅನನುಭವಿಯಾಗಿರುವುದರಿಂದ, ಬೈಬಲು ಹೇಳುವಂತೆ “ಬುದ್ಧಿಹೀನ”ನಾಗಿರಬಹುದು. ಅವನ ಎಲ್ಲ ಉದ್ದೇಶಗಳು ಕೆಟ್ಟವು ಎಂಬುದು ಇದರ ಅರ್ಥವಲ್ಲ, ಬದಲಿಗೆ ದೇವರನ್ನು ನಿಜವಾಗಿಯೂ ಮೆಚ್ಚಿಸುವಂತಹ ಸ್ಥಿತಿಗೆ ಒಬ್ಬನ ಹೃದಯವನ್ನು ತರಲು ಸಮಯದ ಅಗತ್ಯವಿದೆ. ಇದು, ಅಪರಿಪೂರ್ಣ ಮಾನವರಿಗೆ ಸಾಧ್ಯವಿರುವಷ್ಟರ ಮಟ್ಟಿಗೆ ತಮ್ಮ ವಿಚಾರಗಳು, ಬಯಕೆಗಳು, ಆಸೆಗಳು, ಭಾವನೆಗಳು, ಮತ್ತು ಜೀವಿತದ ಗುರಿಗಳನ್ನು ದೇವರು ಸಮ್ಮತಿಸುವ ವಿಷಯಕ್ಕೆ ಸರಿಹೊಂದಿಸುವುದನ್ನು ಅಗತ್ಯಪಡಿಸುತ್ತದೆ. ವ್ಯಕ್ತಿಯೊಬ್ಬನು ದೈವಿಕ ಮಾರ್ಗಕ್ಕನುಸಾರ ತನ್ನ ಆಂತರಿಕ ವ್ಯಕ್ತಿತ್ವವನ್ನು ರೂಪಿಸುವಾಗ, ಅವನು “ಬುದ್ಧಿಯನ್ನು [“ಹೃದಯವನ್ನು,” NW] ಸಂಪಾದಿಸುತ್ತಿದ್ದಾನೆ.”—ಜ್ಞಾನೋಕ್ತಿ 9:4; 19:8.

5, 6. ತಮ್ಮ ಮಕ್ಕಳು ‘ಹೃದಯವನ್ನು ಸಂಪಾದಿಸುವಂತೆ’ ಹೆತ್ತವರು ಹೇಗೆ ಸಹಾಯ ಮಾಡಬಲ್ಲರು?

⁵ ತಮ್ಮ ಮಕ್ಕಳು ‘ಹೃದಯವನ್ನು ಸಂಪಾದಿಸುವಂತೆ’ ಹೆತ್ತವರು ಸಹಾಯ ಮಾಡಬಲ್ಲರೊ? ಯಾವ ಮನುಷ್ಯನೂ ಮತ್ತೊಬ್ಬನಲ್ಲಿ ಹೃದಯದ ಒಳ್ಳೆಯ ಸ್ಥಿತಿಯನ್ನು ಹಾಕಲಾರನೆಂಬುದು ನಿಜ. ನಮ್ಮಲ್ಲಿ ಪ್ರತಿಯೊಬ್ಬರಿಗೆ ಇಚ್ಛಾ ಸ್ವಾತಂತ್ರ್ಯವಿದೆ, ಮತ್ತು ನಾವು ಏನನ್ನು ಯೋಚಿಸುವಂತೆ ಅನುಮತಿಸುತ್ತೇವೊ ಅದರ ಮೇಲೆ ಹೆಚ್ಚಿನದ್ದು ಅವಲಂಬಿಸುತ್ತದೆ. ಆದರೂ, ವಿವೇಚನೆಯನ್ನು ಉಪಯೋಗಿಸುತ್ತಾ ಹೆತ್ತವರು ತಮ್ಮ ಮಗುವಿನ ಹೃದಯದಲ್ಲಿ ಏನಿದೆ ಮತ್ತು ಸಹಾಯದ ಅಗತ್ಯ ಎಲ್ಲಿದೆ ಎಂಬುದನ್ನು ತಿಳಿದುಕೊಳ್ಳಬಲ್ಲರು. ‘ಇದರ ಕುರಿತು ನಿನಗೇನು ಅನಿಸುತ್ತದೆ?’ ಮತ್ತು ‘ನೀನು ನಿಜವಾಗಿಯೂ ಏನನ್ನು ಮಾಡಬಯಸುವೆ?’ ಎಂಬಂತಹ ಪ್ರಶ್ನೆಗಳನ್ನು ಉಪಯೋಗಿಸಿರಿ. ತದನಂತರ, ತಾಳ್ಮೆಯಿಂದ ಆಲಿಸಿರಿ. ಅತಿಯಾಗಿ ಪ್ರತಿಕ್ರಿಯಿಸಬೇಡಿರಿ. (ಜ್ಞಾನೋಕ್ತಿ 20:5) ಹೃದಯವನ್ನು ತಲಪಬೇಕಾದರೆ, ದಯೆ, ತಿಳುವಳಿಕೆ, ಮತ್ತು ಪ್ರೀತಿಯ ವಾತಾವರಣವು ಪ್ರಾಮುಖ್ಯವಾಗಿದೆ.

⁶ ಹಿತಕರವಾದ ಪ್ರವೃತ್ತಿಗಳನ್ನು ಬಲಪಡಿಸಲು, ಆತ್ಮದ ಪ್ರತಿಯೊಂದು ಫಲವನ್ನು ಆಗಿಂದಾಗ್ಗೆ ಚರ್ಚಿಸಿ, ಅದನ್ನು ವಿಕಸಿಸಿಕೊಳ್ಳಲು ಕುಟುಂಬವಾಗಿ ಪ್ರಯತ್ನಿಸಿರಿ. (ಗಲಾತ್ಯ 5:22, 23) ಯೆಹೋವ ಮತ್ತು ಯೇಸು ಕ್ರಿಸ್ತನಿಗಾಗಿ ಪ್ರೀತಿಯನ್ನು ಬೆಳೆಸಿಕೊಳ್ಳಿರಿ. ಕೇವಲ ಅವರನ್ನು ಪ್ರೀತಿಸಬೇಕೆಂದು ಹೇಳುವ ಮೂಲಕವಲ್ಲ, ಬದಲಿಗೆ ನಾವು ಏಕೆ ಅವರನ್ನು ಪ್ರೀತಿಸಬೇಕೆಂಬ ಕಾರಣಗಳನ್ನು ಮತ್ತು ಆ ಪ್ರೀತಿಯನ್ನು ಹೇಗೆ ವ್ಯಕ್ತಪಡಿಸಸಾಧ್ಯವಿದೆ ಎಂಬುದನ್ನು ಚರ್ಚಿಸುವ ಮೂಲಕವೇ. (2 ಕೊರಿಂಥ 5:14, 15) ಪ್ರತಿಫಲವಾಗಿ ಸಿಗಬಹುದಾದ ಪ್ರಯೋಜನಗಳ ಕುರಿತು ವಿವೇಚಿಸುವ ಮೂಲಕ, ಸರಿಯಾದುದನ್ನು ಮಾಡಬೇಕೆಂಬ ಬಯಕೆಯನ್ನು ಬಲಗೊಳಿಸಿರಿ. ತಪ್ಪಾದ ಆಲೋಚನೆಗಳು, ಮಾತುಕತೆ, ಮತ್ತು ನಡತೆಯ ಕೆಟ್ಟ ಪರಿಣಾಮಗಳನ್ನು ಚರ್ಚಿಸುವ ಮೂಲಕ, ಅವುಗಳನ್ನು ತ್ಯಜಿಸಿಬಿಡುವ ಬಯಕೆಯನ್ನು ಮೂಡಿಸಿರಿ. (ಆಮೋಸ 5:15; 3 ಯೋಹಾನ 11) ನಮ್ಮ ವಿಚಾರಗಳು, ಮಾತುಕತೆ, ಮತ್ತು ನಡತೆಯು ಒಳ್ಳೆಯದಾಗಿರಲಿ ಕೆಟ್ಟದ್ದಾಗಿರಲಿ, ಯೆಹೋವನೊಂದಿಗಿನ ನಮ್ಮ ಸಂಬಂಧವನ್ನು ಅದು ಹೇಗೆ ಬಾಧಿಸಬಲ್ಲದು ಎಂಬುದನ್ನು ತೋರಿಸಿರಿ.

7. ಮಕ್ಕಳು ಸಮಸ್ಯೆಗಳನ್ನು ನಿಭಾಯಿಸುವಂತೆ, ಮತ್ತು ಅವರು ಯೆಹೋವನೊಂದಿಗೆ ನಿಕಟ ಸಂಬಂಧವನ್ನು ಇಟ್ಟುಕೊಳ್ಳುವ ನಿರ್ಣಯಗಳನ್ನು ಮಾಡುವಂತೆ ನೆರವು ನೀಡಲು ಏನು ಮಾಡಸಾಧ್ಯವಿದೆ?

⁷ ಮಗುವಿಗೆ ಒಂದು ಸಮಸ್ಯೆಯಿರುವಾಗ, ಇಲ್ಲವೆ ಅದೊಂದು ಪ್ರಾಮುಖ್ಯವಾದ ನಿರ್ಣಯವನ್ನು ಮಾಡಬೇಕಾದಾಗ, ನಾವು ಹೀಗೆ ಕೇಳಬಹುದು: ‘ಇದನ್ನು ಯೆಹೋವನು ಹೇಗೆ ವೀಕ್ಷಿಸುತ್ತಾನೆಂದು ನೀನು ನೆನಸುತ್ತೀ? ಯೆಹೋವನ ಕುರಿತಾದ ಯಾವ ವಿಷಯವು ನೀನು ಹೀಗೆ ಉತ್ತರಿಸುವಂತೆ ಮಾಡಿತು? ಇದರ ಬಗ್ಗೆ ನೀನು ಆತನಲ್ಲಿ ಪ್ರಾರ್ಥಿಸಿರುವಿಯೊ?’ ಸಾಧ್ಯವಾದಷ್ಟು ಬೇಗನೆ ಆರಂಭಿಸುತ್ತಾ, ಯಾವಾಗಲೂ ದೇವರ ಚಿತ್ತವು ಏನಾಗಿದೆ ಎಂಬುದನ್ನು ಅರಿತು, ಅದಕ್ಕನುಸಾರ ಜೀವಿಸಲು ಶ್ರದ್ಧಾಪೂರ್ವಕ ಪ್ರಯತ್ನವನ್ನು ಮಾಡುವ ಜೀವಿತದ ನಮೂನೆಯನ್ನು ನಿಮ್ಮ ಮಕ್ಕಳು ಬೆಳೆಸಿಕೊಳ್ಳುವಂತೆ ಸಹಾಯ ಮಾಡಿರಿ. ಯೆಹೋವನೊಂದಿಗೆ ಅವರೊಂದು ಆಪ್ತವಾದ ಹಾಗೂ ವೈಯಕ್ತಿಕ ಸಂಬಂಧವನ್ನು ಬೆಳೆಸಿಕೊಂಡಂತೆ, ಆತನ ಮಾರ್ಗಗಳಲ್ಲಿ ನಡೆಯುವುದನ್ನು ಅವರು ಆನಂದಕರವಾದದ್ದಾಗಿ ಕಂಡುಕೊಳ್ಳುವರು. (ಕೀರ್ತನೆ 119:34, 35) ಇದು, ಸತ್ಯ ದೇವರ ಸಭೆಯೊಂದಿಗೆ ಸಹವಾಸಿಸುವ ಸುಯೋಗಕ್ಕಾಗಿ ಅವರಲ್ಲಿ ಗಣ್ಯತೆಯನ್ನು ಮೂಡಿಸುವುದು.

ಸಭಾ ಕೂಟಗಳಿಗಾಗಿ ತಯಾರಿಸುವುದು

8. (ಎ) ಗಮನಕ್ಕೆ ಯೋಗ್ಯವಾದ ಎಲ್ಲವನ್ನು ನಮ್ಮ ಕುಟುಂಬ ಅಧ್ಯಯನದಲ್ಲಿ ಸೇರಿಸಲು ಯಾವುದು ನಮಗೆ ಸಹಾಯ ಮಾಡಬಹುದು? (ಬಿ) ಈ ಅಧ್ಯಯನವು ಎಷ್ಟು ಪ್ರಾಮುಖ್ಯವಾಗಿದೆ?

⁸ ಕುಟುಂಬ ಅಧ್ಯಯನದ ಸಮಯದಲ್ಲಿ ಗಮನಹರಿಸಬೇಕಾದ ಹಲವಾರು ವಿಷಯಗಳಿವೆ. ನೀವು ಇವೆಲ್ಲವನ್ನು ಅದರಲ್ಲಿ ಹೇಗೆ ಸರಿಯಾಗಿ ಹೊಂದಿಸುವಿರಿ? ಒಂದೇ ಸಮಯದಲ್ಲಿ ಎಲ್ಲವನ್ನು ಮಾಡುವುದು ಅಸಾಧ್ಯವೇ ಸರಿ. ಒಂದು ತಾಳೆಪಟ್ಟಿ (ಚೆಕ್‌ಲಿಸ್ಟ್‌)ಯನ್ನು ಮಾಡುವುದು ಸಹಾಯಕರವಾಗಿದೆಯೆಂದು ನೀವು ಕಂಡುಕೊಳ್ಳಬಹುದು. (ಜ್ಞಾನೋಕ್ತಿ 21:5) ಆಗಿಂದಾಗ್ಗೆ ಅದನ್ನು ಪುನರ್ವಿಮರ್ಶಿಸಿ, ಯಾವ ವಿಷಯಕ್ಕೆ ವಿಶೇಷವಾದ ಗಮನವು ಅಗತ್ಯವೆಂದು ಪರಿಗಣಿಸಿರಿ. ಕುಟುಂಬದ ಪ್ರತಿಯೊಬ್ಬ ಸದಸ್ಯರ ಪ್ರಗತಿಯಲ್ಲಿ ಹೆಚ್ಚಿನ ಆಸಕ್ತಿಯನ್ನು ವಹಿಸಿರಿ. ಕುಟುಂಬ ಅಧ್ಯಯನಕ್ಕಾಗಿರುವ ಈ ಏರ್ಪಾಡು, ಕ್ರೈಸ್ತ ಶಿಕ್ಷಣದ ಒಂದು ಮುಖ್ಯ ಭಾಗವಾಗಿದ್ದು, ನಮ್ಮನ್ನು ಸದ್ಯದ ಜೀವಿತಕ್ಕೆ ಹಾಗೂ ಬರಲಿರುವ ಅನಂತ ಜೀವಿತಕ್ಕೆ ಸಜ್ಜುಗೊಳಿಸುತ್ತದೆ.—1 ತಿಮೊಥೆಯ 4:8.

9. ನಮ್ಮ ಕುಟುಂಬ ಅಧ್ಯಯನಗಳಲ್ಲಿ, ಕೂಟಗಳಿಗಾಗಿ ತಯಾರಿಸುವ ಯಾವ ಗುರಿಗಳ ಸಂಬಂಧದಲ್ಲಿ ನಾವು ಕ್ರಮೇಣ ಕೆಲಸಮಾಡಬಹುದು?

⁹ ನಿಮ್ಮ ಕುಟುಂಬ ಅಧ್ಯಯನವು ಸಭಾ ಕೂಟಗಳ ತಯಾರಿಯನ್ನು ಒಳಗೊಳ್ಳುತ್ತದೋ? ನೀವು ಒಟ್ಟಿಗೆ ಅಧ್ಯಯನ ಮಾಡಿದಂತೆ, ಪ್ರಗತಿಪರವಾಗಿ ಕೆಲಸಮಾಡಬಹುದಾದ ಹಲವಾರು ಯೋಜನೆಗಳಿರಬಹುದು. ಇವುಗಳಲ್ಲಿ ಕೆಲವನ್ನು ಪೂರ್ತಿಗೊಳಿಸಲು ವಾರಗಳು, ತಿಂಗಳುಗಳು, ಇಲ್ಲವೆ ವರ್ಷಗಳೂ ಹಿಡಿಯಬಹುದು. ಈ ಗುರಿಗಳನ್ನು ಪರಿಗಣಿಸಿರಿ: (1) ಕುಟುಂಬದಲ್ಲಿರುವ ಪ್ರತಿಯೊಬ್ಬರೂ ಸಭಾ ಕೂಟಗಳಲ್ಲಿ ಉತ್ತರಗಳನ್ನು ಕೊಡಲು ಸಿದ್ಧರಾಗಿರುವುದು, (2) ಪ್ರತಿಯೊಬ್ಬರೂ ಸ್ವಂತ ಮಾತುಗಳಲ್ಲಿ ಉತ್ತರ ಕೊಡಲು ಪ್ರಯತ್ನಿಸುವುದು, (3) ಉತ್ತರಗಳಲ್ಲಿ ವಚನಗಳನ್ನು ಸೇರಿಸುವುದು, ಮತ್ತು (4) ವೈಯಕ್ತಿಕ ಅನ್ವಯವನ್ನು ಮಾಡುವ ಉದ್ದೇಶದಿಂದ ವಿಷಯವನ್ನು ವಿಶ್ಲೇಷಿಸುವುದು. ವ್ಯಕ್ತಿಯೊಬ್ಬನು ಸತ್ಯವನ್ನು ತನ್ನದಾಗಿ ಮಾಡಿಕೊಳ್ಳುವಂತೆ ಈ ಎಲ್ಲ ವಿಷಯಗಳು ಸಹಾಯ ಮಾಡಬಲ್ಲವು.—ಕೀರ್ತನೆ 25:4, 5.

10. (ಎ) ನಮ್ಮ ಸಭಾ ಕೂಟಗಳಲ್ಲಿ ಪ್ರತಿಯೊಂದಕ್ಕೆ ಹೇಗೆ ಗಮನವನ್ನು ಕೊಡಬಹುದು? (ಬಿ) ಇದು ಏಕೆ ಸಾರ್ಥಕವಾಗಿದೆ?

¹⁰ ನಿಮ್ಮ ಕುಟುಂಬ ಅಧ್ಯಯನದಲ್ಲಿ ಸಾಮಾನ್ಯವಾಗಿ ಆ ವಾರಕ್ಕಾಗಿರುವ ಕಾವಲಿನಬುರುಜು ಅಭ್ಯಾಸ ಲೇಖನವನ್ನು ಅಭ್ಯಾಸಿಸುವುದಾದರೂ, ವ್ಯಕ್ತಿಗತವಾಗಿ ಇಲ್ಲವೆ ಕುಟುಂಬವಾಗಿ, ಸಭಾ ಪುಸ್ತಕ ಅಭ್ಯಾಸಕ್ಕಾಗಿ, ದೇವಪ್ರಭುತ್ವ ಶುಶ್ರೂಷಾ ಶಾಲೆಗಾಗಿ, ಮತ್ತು ಸೇವಾ ಕೂಟಕ್ಕಾಗಿ ತಯಾರಿಸುವ ಮಹತ್ವವನ್ನು ಕಡೆಗಣಿಸಬೇಡಿ. ಏಕೆಂದರೆ, ಯೆಹೋವನ ಮಾರ್ಗದಲ್ಲಿ ನಡೆಯುವಂತೆ ನಮಗೆ ಕಲಿಸುವ ಕಾರ್ಯಕ್ರಮದ ಭಾಗಗಳಲ್ಲಿ ಇವು ಕೂಡ ಪ್ರಾಮುಖ್ಯವಾಗಿವೆ. ಒಂದು ಕುಟುಂಬವಾಗಿ ಎಲ್ಲ ಕೂಟಗಳಿಗಾಗಿ ತಯಾರಿಸಲು ನಿಮಗೆ ಆಗಿಂದಾಗ್ಗೆ ಸಾಧ್ಯವಾಗಬಹುದು. ಹೀಗೆ ಒಟ್ಟಾಗಿ ಅಭ್ಯಾಸಿಸುವಾಗ, ಅಧ್ಯಯನಾ ಕೌಶಲಗಳು ಉತ್ತಮಗೊಳ್ಳುತ್ತವೆ. ಫಲಸ್ವರೂಪವಾಗಿ, ಕೂಟಗಳಿಂದ ಹೆಚ್ಚಿನ ಪ್ರಯೋಜನವು ದೊರಕಬಲ್ಲದು. ಬೇರೆ ವಿಷಯಗಳ ಚರ್ಚೆಯಲ್ಲಿ, ಈ ಕೂಟಗಳ ಕ್ರಮವಾದ ತಯಾರಿಯಿಂದ ಬರುವ ಪ್ರಯೋಜನ ಮತ್ತು ಅದಕ್ಕಾಗಿ ಒಂದು ನಿಗದಿತ ಸಮಯವನ್ನು ಬದಿಗಿರಿಸುವುದರ ಮಹತ್ವವನ್ನು ಸೇರಿಸಿರಿ.—ಎಫೆಸ 5:15-17.

11, 12. ಸಭೆಯಲ್ಲಿ ಹಾಡಲಿಕ್ಕಾಗಿ ತಯಾರಿಸುವುದು ಹೇಗೆ ನಮಗೆ ಪ್ರಯೋಜನವನ್ನು ತರುವುದು, ಮತ್ತು ಇದನ್ನು ಹೇಗೆ ಮಾಡಬಹುದು?

¹¹ “ದೇವರ ಜೀವನ ಮಾರ್ಗ” ಅಧಿವೇಶನಗಳಲ್ಲಿ, ನಮ್ಮ ಕೂಟಗಳ ಮತ್ತೊಂದು ವೈಶಿಷ್ಟ್ಯವಾದ ಹಾಡುವಿಕೆಗಾಗಿ ತಯಾರಿಸುವಂತೆ ನಾವು ಉತ್ತೇಜಿಸಲ್ಪಟ್ಟೆವು. ನೀವು ಅದನ್ನು ಮಾಡಲು ಪ್ರಯತ್ನಿಸಿದ್ದೀರೊ? ಹಾಗೆ ಮಾಡುವುದರಿಂದ, ಬೈಬಲ್‌ ಸತ್ಯಗಳನ್ನು ನಮ್ಮ ಹೃದಮನಗಳ ಮೇಲೆ ಕೆತ್ತುವಂತೆ ಮತ್ತು ಅದೇ ಸಮಯದಲ್ಲಿ ಸಭಾ ಕೂಟಗಳಿಂದ ನಮಗೆ ಸಿಗುವ ಆನಂದವನ್ನು ಹೆಚ್ಚಿಸುವಂತೆ ಅದು ಸಹಾಯ ಮಾಡುವುದು.

¹² ಶೆಡ್ಯೂಲಿನಲ್ಲಿರುವ ಕೆಲವು ಗೀತೆಗಳಲ್ಲಿನ ಪದಗಳ ಅರ್ಥವನ್ನು ಓದಿ ಚರ್ಚಿಸುವುದನ್ನು ಒಳಗೊಳ್ಳುವ ತಯಾರಿಯು, ಮನದಾಳದಿಂದ ಹಾಡುವಂತೆ ನಮಗೆ ಸಹಾಯ ಮಾಡುವುದು. ಪುರಾತನ ಇಸ್ರಾಯೇಲಿನಲ್ಲಿ, ಸಂಗೀತ ವಾದ್ಯಗಳು ಆರಾಧನೆಯಲ್ಲಿ ಪ್ರಧಾನವಾಗಿ ಬಳಸಲ್ಪಟ್ಟವು. (1 ಪೂರ್ವಕಾಲವೃತ್ತಾಂತ 25:1; ಕೀರ್ತನೆ 28:7) ನಿಮ್ಮ ಕುಟುಂಬದಲ್ಲಿ ಯಾರಾದರೂ ಒಂದು ಸಂಗೀತ ವಾದ್ಯವನ್ನು ನುಡಿಸುತ್ತಾರೋ? ವಾರಕ್ಕಾಗಿರುವ ರಾಜ್ಯ ಗೀತೆಗಳಲ್ಲೊಂದನ್ನು ಅಭ್ಯಾಸಿಸಲು ಆ ವಾದ್ಯವನ್ನು ಉಪಯೋಗಿಸಿ, ತದನಂತರ ಆ ಹಾಡನ್ನು ಕುಟುಂಬವಾಗಿ ಏಕೆ ಹಾಡಬಾರದು? ಗೀತೆಗಳ ಕ್ಯಾಸೆಟ್ಟುಗಳನ್ನು ಉಪಯೋಗಿಸುವುದು ಮತ್ತೊಂದು ಸಾಧ್ಯತೆಯಾಗಿದೆ. ಕೆಲವು ದೇಶಗಳಲ್ಲಿರುವ ನಮ್ಮ ಸಹೋದರರು, ಸಂಗೀತ ವಾದ್ಯಗಳಿಲ್ಲದೆ ಸುಂದರವಾಗಿ ಹಾಡುತ್ತಾರೆ. ಅವರು ದಾರಿಯಲ್ಲಿ ನಡೆದಂತೆ, ಇಲ್ಲವೆ ಹೊಲಗಳಲ್ಲಿ ಕೆಲಸಮಾಡಿದಂತೆ, ಆ ವಾರಕ್ಕಾಗಿ ಸಭಾ ಕೂಟಗಳಲ್ಲಿ ಶೆಡ್ಯೂಲ್‌ ಮಾಡಲ್ಪಟ್ಟ ಗೀತೆಗಳನ್ನು ಹಾಡುವುದರಲ್ಲಿ ಅನೇಕವೇಳೆ ಆನಂದಿಸುತ್ತಾರೆ.—ಎಫೆಸ 5:19.

ಕ್ಷೇತ್ರ ಸೇವೆಗಾಗಿ ಕುಟುಂಬದ ತಯಾರಿ

13, 14. ನಮ್ಮ ಹೃದಯಗಳನ್ನು ಕ್ಷೇತ್ರ ಶುಶ್ರೂಷೆಗಾಗಿ ತಯಾರಿಸುವ ಕುಟುಂಬ ಚರ್ಚೆಗಳು ಏಕೆ ಅಮೂಲ್ಯವಾಗಿವೆ?

¹³ ಇತರರಿಗೆ ಯೆಹೋವನ ಮತ್ತು ಆತನ ಉದ್ದೇಶದ ಕುರಿತು ಸಾಕ್ಷಿನೀಡುವುದು, ನಮ್ಮ ಜೀವಿತಗಳ ಪ್ರಾಮುಖ್ಯ ಭಾಗವಾಗಿದೆ. (ಯೆಶಾಯ 43:10-12; ಮತ್ತಾಯ 24:14) ಯುವಕರಾಗಿರಲಿ ವೃದ್ಧರಾಗಿರಲಿ ನಾವು ತಯಾರಿಯನ್ನು ಮಾಡಿರುವಲ್ಲಿ, ಈ ಚಟುವಟಿಕೆಯಲ್ಲಿ ಬಹಳಷ್ಟು ಆನಂದಿಸುತ್ತೇವೆ ಮತ್ತು ಹೆಚ್ಚಿನ ಒಳಿತನ್ನು ಸಾಧಿಸುತ್ತೇವೆ. ಇದನ್ನು ಕುಟುಂಬದೊಳಗೆ ಹೇಗೆ ಮಾಡಸಾಧ್ಯವಿದೆ?

¹⁴ ನಮ್ಮ ಆರಾಧನೆಗೆ ಸಂಬಂಧಿಸಿದ ಎಲ್ಲ ವಿಷಯಗಳಲ್ಲಿ ಸತ್ಯವಾಗಿರುವಂತೆಯೇ, ನಾವು ನಮ್ಮ ಹೃದಯಗಳನ್ನು ತಯಾರಿಸುವುದು ಪ್ರಾಮುಖ್ಯವಾಗಿದೆ. ನಾವು ಏನು ಮಾಡಲಿದ್ದೇವೆ ಎಂಬುದು ಮಾತ್ರವಲ್ಲ, ಏಕೆ ಅದನ್ನು ಮಾಡಲಿದ್ದೇವೆ ಎಂಬುದನ್ನೂ ಚರ್ಚಿಸಬೇಕಾಗಿದೆ. ರಾಜ ಯೆಹೋಷಾಫಾಟನ ದಿನಗಳಲ್ಲಿ, ಜನರಿಗೆ ದೈವಿಕ ನಿಯಮದಲ್ಲಿ ಉಪದೇಶವು ಕೊಡಲ್ಪಟ್ಟಿತಾದರೂ, ಅವರು ‘ಇನ್ನೂ ತಮ್ಮ ಹೃದಯಗಳನ್ನು ಸಿದ್ಧಗೊಳಿಸಿರಲಿಲ್ಲ’ ಎಂದು ಬೈಬಲ್‌ ನಮಗೆ ಹೇಳುತ್ತದೆ. ಈ ಕಾರಣ, ಸತ್ಯಾರಾಧನೆಯಿಂದ ಅವರನ್ನು ವಿಮುಖಗೊಳಿಸಬಹುದಾದ ಅಪಕರ್ಷಣೆಗಳಿಗೆ ಅವರು ಸುಲಭಭೇದ್ಯರಾದರು. (2 ಪೂರ್ವಕಾಲವೃತ್ತಾಂತ 20:33; 21:11) ನಮ್ಮ ಗುರಿಯು ಕ್ಷೇತ್ರ ಸೇವೆಯಲ್ಲಿ ಕಳೆದ ತಾಸುಗಳನ್ನು ವರದಿಸುವುದಾಗಲಿ, ಇಲ್ಲವೆ ಸಾಹಿತ್ಯವನ್ನು ನೀಡುವುದಾಗಲಿ ಆಗಿರುವುದಿಲ್ಲ. ನಮ್ಮ ಶುಶ್ರೂಷೆಯು, ಯೆಹೋವನಿಗಾಗಿ ಮತ್ತು ಜೀವವನ್ನು ಆರಿಸಿಕೊಳ್ಳುವ ಅವಕಾಶದ ಅಗತ್ಯವಿರುವ ಜನರಿಗಾಗಿರುವ ಪ್ರೀತಿಯ ಅಭಿವ್ಯಕ್ತಿಯಾಗಿರಬೇಕು. (ಇಬ್ರಿಯ 13:15) ನಾವು “ದೇವರ ಜೊತೆಕೆಲಸದವರು” ಆಗಿರುವ ಚಟುವಟಿಕೆಯು ಇದೇ ಆಗಿದೆ. (1 ಕೊರಿಂಥ 3:9) ಎಂತಹ ಒಂದು ಸುಯೋಗ! ನಾವು ಶುಶ್ರೂಷೆಯಲ್ಲಿ ಪಾಲ್ಗೊಳ್ಳುವಾಗ, ಪವಿತ್ರ ದೇವದೂತರ ಸಹಕಾರದೊಂದಿಗೆ ಹಾಗೆ ಮಾಡುತ್ತೇವೆ. (ಪ್ರಕಟನೆ 14:6, 7) ಕುಟುಂಬ ಚರ್ಚೆಗಳಲ್ಲಿ ನಾವು ನಮ್ಮ ಸಾಪ್ತಾಹಿಕ ಅಧ್ಯಯನವನ್ನು ಮಾಡುವಾಗ ಇಲ್ಲವೆ ಪ್ರತಿನಿತ್ಯ ಶಾಸ್ತ್ರಗಳನ್ನು ಪರೀಕ್ಷಿಸುವುದು ಎಂಬ ಪುಸ್ತಿಕೆಯಿಂದ ಸೂಕ್ತವಾದ ವಚನವನ್ನು ಚರ್ಚಿಸುವಾಗ, ಇದಕ್ಕಾಗಿ ಗಣ್ಯತೆಯನ್ನು ಬೆಳೆಸಿಕೊಳ್ಳುವುದಕ್ಕಿಂತಲೂ ಉತ್ತಮವಾದ ಬೇರೊಂದು ಸಮಯವು ಇರಲಾರದು!

15. ಕುಟುಂಬವಾಗಿ ನಾವು ಯಾವಾಗ ಕ್ಷೇತ್ರ ಸೇವೆಗಾಗಿ ತಯಾರಿಸಬಹುದು?

¹⁵ ನಿಮ್ಮ ಮನೆವಾರ್ತೆಯ ಸದಸ್ಯರು ವಾರದ ಕ್ಷೇತ್ರ ಸೇವೆಗಾಗಿ ತಯಾರಿಸುವಂತೆ ಸಹಾಯ ಮಾಡಲು, ನೀವು ನಿಮ್ಮ ಕುಟುಂಬ ಅಧ್ಯಯನದ ಸಮಯವನ್ನು ಕೆಲವೊಮ್ಮೆ ಉಪಯೋಗಿಸುತ್ತೀರೊ? ಹಾಗೆ ಮಾಡುವುದು ತುಂಬ ಪ್ರಯೋಜನಕರವಾಗಿರಬಲ್ಲದು. (2 ತಿಮೊಥೆಯ 2:15) ಕುಟುಂಬದವರೆಲ್ಲರ ಸೇವೆಯು ಅರ್ಥಭರಿತವೂ ಫಲಪ್ರದವೂ ಆಗಿರುವಂತೆ ಅದು ಸಹಾಯ ಮಾಡುವುದು. ಕೆಲವೊಮ್ಮೆ ನೀವು ಸಂಪೂರ್ಣ ಅಧ್ಯಯನ ಅವಧಿಯನ್ನು ಇಂತಹ ತಯಾರಿಗಾಗಿ ಬದಿಗಿಡಬಹುದು. ಹೆಚ್ಚಿನ ವೇಳೆ, ನೀವು ಕುಟುಂಬ ಅಧ್ಯಯನದ ಕೊನೆಯಲ್ಲಿ ಅಥವಾ ವಾರದ ಬೇರೊಂದು ಸಮಯದಲ್ಲಿ ಕ್ಷೇತ್ರ ಶುಶ್ರೂಷೆಯ ವಿಷಯಗಳನ್ನು ಸ್ವಲ್ಪ ಸಮಯಕ್ಕಾಗಿ ಚರ್ಚಿಸಬಹುದು.

16. ಪ್ಯಾರಗ್ರಾಫಿನಲ್ಲಿ ಪಟ್ಟಿಮಾಡಲ್ಪಟ್ಟ ಕ್ರಮಗಳಲ್ಲಿ ಪ್ರತಿಯೊಂದರ ಮಹತ್ವವನ್ನು ಚರ್ಚಿಸಿರಿ.

¹⁶ ಈ ಕೆಳಗೆ ಹೇಳಲ್ಪಟ್ಟಂತೆ, ಕುಟುಂಬದ ಅಧ್ಯಯನಾ ಅವಧಿಗಳು ಹಲವಾರು ಹೆಜ್ಜೆಗಳ ಮೇಲೆ ಕೇಂದ್ರೀಕರಿಸಸಾಧ್ಯವಿದೆ: (1) ಚೆನ್ನಾಗಿ ಪೂರ್ವಾಭಿನಯಿಸಿದ ನಿರೂಪಣೆಯನ್ನು ತಯಾರಿಸಿರಿ. ಸಮಯವು ಅನುಮತಿಸುವಲ್ಲಿ, ಅದರೊಂದಿಗೆ ಬೈಬಲಿನಿಂದ ಒಂದು ವಚನವನ್ನು ಓದಿರಿ. (2) ಸಾಧ್ಯವಾದಲ್ಲಿ ಪ್ರತಿಯೊಬ್ಬರಿಗೆ ತಮ್ಮದೇ ಆದ ಕ್ಷೇತ್ರ ಸೇವೆಯ ಬ್ಯಾಗ್‌, ಬೈಬಲ್‌, ನೋಟ್‌ಪುಸ್ತಕ, ಪೆನ್‌ ಇಲ್ಲವೆ ಪೆನ್ಸಿಲ್‌, ಕಿರುಹೊತ್ತಗೆಗಳು, ಮತ್ತು ಸುಸ್ಥಿತಿಯಲ್ಲಿರುವ ಇತರ ಸಾಹಿತ್ಯವು ಇದೆಯೊ ಎಂಬುದನ್ನು ಖಚಿತಪಡಿಸಿಕೊಳ್ಳಿರಿ. ಕ್ಷೇತ್ರ ಸೇವೆಯ ಬ್ಯಾಗು ದುಬಾರಿಯದ್ದಾಗಿರದಿದ್ದರೂ, ನೀಟಾಗಿರಬೇಕು. (3) ಎಲ್ಲಿ ಮತ್ತು ಹೇಗೆ ಅನೌಪಚಾರಿಕ ಸಾಕ್ಷಿಕಾರ್ಯವನ್ನು ಮಾಡುವುದೆಂಬುದನ್ನು ಚರ್ಚಿಸಿರಿ. ಕ್ಷೇತ್ರ ಸೇವೆಯಲ್ಲಿ ನೀವು ಒಟ್ಟಿಗೆ ಕೆಲಸಮಾಡಿದಂತೆ, ಈಗಾಗಲೇ ಚರ್ಚಿಸಿದ ಎಲ್ಲ ಸೂಚನೆಗಳನ್ನು ಕಾರ್ಯರೂಪಕ್ಕೆ ಹಾಕಿರಿ. ಸಹಾಯಕರ ಸೂಚನೆಗಳನ್ನು ನೀಡಿರಿ, ಆದರೆ ಅನೇಕ ವಿಷಯಗಳ ಬಗ್ಗೆ ಸಲಹೆ ನೀಡಬೇಡಿರಿ.

17, 18. (ಎ) ಕುಟುಂಬವಾಗಿ ಮಾಡಲ್ಪಡುವ ಯಾವ ರೀತಿಯ ತಯಾರಿಯು, ನಮ್ಮ ಕ್ಷೇತ್ರ ಶುಶ್ರೂಷೆಯನ್ನು ಹೆಚ್ಚು ಫಲಪ್ರದವಾಗಿ ಮಾಡಲು ಸಹಾಯಕರವಾಗಿರುವುದು? (ಬಿ) ಈ ತಯಾರಿಯ ಯಾವ ಅಂಶವನ್ನು ಪ್ರತಿ ವಾರ ಮಾಡಸಾಧ್ಯವಿದೆ?

¹⁷ ಯೇಸು ಕ್ರಿಸ್ತನು ತನ್ನ ಹಿಂಬಾಲಕರಿಗೆ ನೇಮಿಸಿದ ಕೆಲಸದ ಒಂದು ಪ್ರಧಾನ ಭಾಗವು ಶಿಷ್ಯರನ್ನು ಮಾಡುವ ಕೆಲಸವಾಗಿದೆ. (ಮತ್ತಾಯ 28:19, 20) ಶಿಷ್ಯರನ್ನು ಮಾಡುವುದು, ಪ್ರಚಾರ ಮಾಡುವುದಕ್ಕಿಂತಲೂ ಹೆಚ್ಚಿನದ್ದನ್ನು ಒಳಗೊಳ್ಳುತ್ತದೆ. ಅದು ಬೋಧಿಸುವುದನ್ನು ಅಗತ್ಯಪಡಿಸುತ್ತದೆ. ಇದನ್ನು ಮಾಡುವುದರಲ್ಲಿ ನೀವು ಪರಿಣಾಮಕಾರಿಯಾಗಿರುವಂತೆ ನಿಮ್ಮ ಕುಟುಂಬ ಅಧ್ಯಯನವು ಹೇಗೆ ಸಹಾಯ ಮಾಡಬಲ್ಲದು?

¹⁸ ಯಾರನ್ನು ಪುನಃ ಭೇಟಿಮಾಡುವುದು ಒಳ್ಳೆಯದು ಎಂಬುದನ್ನು ಕುಟುಂಬವಾಗಿ ಚರ್ಚಿಸಿರಿ. ಕೆಲವರು ಸಾಹಿತ್ಯವನ್ನು ಸ್ವೀಕರಿಸಿರಬಹುದು, ಇನ್ನೂ ಕೆಲವರು ಕೇವಲ ಆಲಿಸಿರಬಹುದು. ಅವರು ಮನೆ ಮನೆಯ ಸಾಕ್ಷಿಕಾರ್ಯದಲ್ಲಿ ಭೇಟಿಯಾಗಿರಬಹುದು ಇಲ್ಲವೆ ಮಾರುಕಟ್ಟೆಯಲ್ಲಿ ಅಥವಾ ಶಾಲೆಯಲ್ಲಿ ಅನೌಪಚಾರಿಕ ಸಾಕ್ಷಿಕಾರ್ಯದಲ್ಲಿ ಸಂಧಿಸಿರಬಹುದು. ಏನೇ ಆಗಲಿ, ದೇವರ ವಾಕ್ಯವು ನಿಮ್ಮನ್ನು ಮಾರ್ಗದರ್ಶಿಸಲಿ. (ಕೀರ್ತನೆ 25:9; ಯೆಹೆಜ್ಕೇಲ 9:4) ಪ್ರತಿಯೊಬ್ಬರೂ ಆ ವಾರದಲ್ಲಿ ಯಾರನ್ನು ಭೇಟಿ ಮಾಡಲು ಬಯಸುತ್ತೀರೆಂಬುದನ್ನು ನಿರ್ಧರಿಸಿರಿ. ಯಾವ ವಿಷಯದ ಕುರಿತು ಮಾತಾಡುವಿರಿ? ಅದಕ್ಕಾಗಿ ಪ್ರತಿಯೊಬ್ಬ ಸದಸ್ಯನು ತಯಾರಿಸುವಂತೆ ಕುಟುಂಬ ಚರ್ಚೆಯು ಸಹಾಯ ಮಾಡಬಲ್ಲದು. ಆಸಕ್ತರೊಂದಿಗೆ ಹಂಚಿಕೊಳ್ಳಲು ನಿರ್ದಿಷ್ಟವಾದ ವಚನಗಳನ್ನು ಮತ್ತು ದೇವರು ನಮ್ಮಿಂದ ಏನನ್ನು ಅಪೇಕ್ಷಿಸುತ್ತಾನೆ? ಎಂಬ ಬ್ರೋಷರಿನಿಂದ ಇಲ್ಲವೆ ನಿತ್ಯಜೀವಕ್ಕೆ ನಡೆಸುವ ಜ್ಞಾನ ಎಂಬ ಪುಸ್ತಕದಿಂದ ಸೂಕ್ತವಾದ ವಿಷಯಗಳನ್ನು ಪಟ್ಟಿಮಾಡಿಕೊಳ್ಳಿರಿ. ಒಂದೇ ಭೇಟಿಯಲ್ಲಿ ಬಹಳಷ್ಟು ವಿಷಯವನ್ನು ಆವರಿಸಲು ಪ್ರಯತ್ನಿಸಬೇಡಿ. ಮುಂದಿನ ಭೇಟಿಯಲ್ಲಿ ಉತ್ತರಿಸಲ್ಪಡುವ ಪ್ರಶ್ನೆಯನ್ನು ಮನೆಯವರಲ್ಲಿ ಬಿಟ್ಟುಬನ್ನಿರಿ. ಪ್ರತಿಯೊಬ್ಬರೂ ಯಾವ ಪುನರ್ಭೇಟಿಗಳನ್ನು ಮಾಡುವರು, ಯಾವಾಗ ಮಾಡುವರು, ಮತ್ತು ಏನನ್ನು ಸಾಧಿಸಲು ನಿರೀಕ್ಷಿಸುವರು ಎಂಬುದನ್ನು ಪ್ರತಿವಾರ ಕುಟುಂಬವಾಗಿ ಏಕೆ ಚರ್ಚಿಸಬಾರದು? ಹೀಗೆ ಮಾಡುವುದರಿಂದ, ಇಡೀ ಕುಟುಂಬದ ಕ್ಷೇತ್ರ ಶುಶ್ರೂಷೆಯು ಹೆಚ್ಚು ಫಲಪ್ರದವಾಗಲು ಇದು ಸಹಾಯ ಮಾಡುವುದು.

ಅವರಿಗೆ ಯೆಹೋವನ ಮಾರ್ಗವನ್ನು ಕಲಿಸುತ್ತಾ ಇರಿ

19. ಕುಟುಂಬ ಸದಸ್ಯರು ಯೆಹೋವನ ಮಾರ್ಗದಲ್ಲಿ ನಡೆಯುತ್ತಾ ಮುಂದುವರಿಯುವುದಾದರೆ, ಅವರು ಏನನ್ನು ಅನುಭವಿಸುವರು, ಮತ್ತು ಇದಕ್ಕೆ ಯಾವುದು ನೆರವು ನೀಡುವುದು?

¹⁹ ಈ ದುಷ್ಟ ಲೋಕದಲ್ಲಿ ಕುಟುಂಬ ತಲೆಯಾಗಿರುವುದು ಒಂದು ಪಂಥಾಹ್ವಾನವಾಗಿದೆ. ಸೈತಾನನು ಮತ್ತು ಅವನ ದೆವ್ವಗಳು ಯೆಹೋವನ ಸೇವಕರ ಆತ್ಮಿಕತೆಯನ್ನು ನಾಶಗೊಳಿಸಲು ಪ್ರಯತ್ನಿಸುತ್ತಿವೆ. (1 ಪೇತ್ರ 5:8) ಅಲ್ಲದೆ, ಇಂದು ಹೆತ್ತವರಾದ ನಿಮ್ಮ ಮೇಲೆ, ವಿಶೇಷವಾಗಿ ಒಂಟಿ ಹೆತ್ತವರಾದ ನಿಮ್ಮ ಮೇಲೆ ಬಹಳಷ್ಟು ಒತ್ತಡವಿದೆ. ನೀವು ಮಾಡಬಯಸುವ ಎಲ್ಲ ವಿಷಯಗಳನ್ನು ಮಾಡಿಮುಗಿಸಲು ಸಮಯವನ್ನು ಕಂಡುಕೊಳ್ಳುವುದು ಕಷ್ಟಕರವಾಗಿದೆ. ಆದರೂ, ಎಲ್ಲ ಸಲಹೆಗಳನ್ನು ಒಮ್ಮೆಲೇ ಅನ್ವಯಿಸದೆ, ಒಂದೊಂದಾಗಿ ಅನ್ವಯಿಸಿ, ನಿಮ್ಮ ಕುಟುಂಬ ಅಧ್ಯಯನ ಕಾರ್ಯಕ್ರಮವನ್ನು ಕ್ರಮೇಣ ಸುಧಾರಿಸುವಾಗ ಅದು ಸಾರ್ಥಕವಾಗಿರುವುದು. ನಿಮ್ಮ ಆಪ್ತರು ಯೆಹೋವನ ಮಾರ್ಗದಲ್ಲಿ ನಿಷ್ಠಾವಂತರಾಗಿ ನಡೆಯುವುದನ್ನು ನೋಡುವುದು ತಾನೇ, ಹೃದಯಕ್ಕೆ ಉಲ್ಲಾಸವನ್ನು ನೀಡುವ ಪ್ರತಿಫಲವಾಗಿದೆ. ಯೆಹೋವನ ಮಾರ್ಗದಲ್ಲಿ ಯಶಸ್ವಿಕರವಾಗಿ ನಡೆಯಲು, ಕುಟುಂಬ ಸದಸ್ಯರು ಸಭಾ ಕೂಟಗಳಲ್ಲಿ ಉಪಸ್ಥಿತರಾಗಿರುವುದರಲ್ಲಿ ಮತ್ತು ಕ್ಷೇತ್ರ ಶುಶ್ರೂಷೆಯಲ್ಲಿ ಭಾಗವಹಿಸುವುದರಲ್ಲಿ ಸಂತೋಷವನ್ನು ಕಂಡುಕೊಳ್ಳಬೇಕು. ಅದು ನಿಜವಾಗಿ ಪರಿಣಮಿಸಬೇಕಾದರೆ, ಹೃದಯವನ್ನು ಬಲಪಡಿಸುವ ಹಾಗೂ ಒಂದು ಅರ್ಥಭರಿತ ಪಾಲನ್ನು ಪ್ರತಿಯೊಬ್ಬರೂ ಹೊಂದಿರುವಂತೆ ಸಜ್ಜುಗೊಳಿಸುವ ತಯಾರಿಯು ಅಗತ್ಯವಾಗಿದೆ.

20. ಇನ್ನೂ ಅನೇಕ ಹೆತ್ತವರು 3 ಯೋಹಾನ 4ರಲ್ಲಿ ವ್ಯಕ್ತಪಡಿಸಲ್ಪಟ್ಟ ಆನಂದವನ್ನು ಅನುಭವಿಸಲು ಯಾವುದು ಸಹಾಯ ಮಾಡುವುದು?

²⁰ ತಾನು ಯಾರಿಗೆ ಆತ್ಮಿಕ ನೆರವನ್ನು ನೀಡಿದ್ದನೋ ಅವರ ಕುರಿತು ಅಪೊಸ್ತಲ ಯೋಹಾನನು ಬರೆದುದು: “ನನ್ನ ಮಕ್ಕಳು ಸತ್ಯವನ್ನನುಸರಿಸಿ ನಡೆಯುವವರಾಗಿದ್ದಾರೆಂದು ಕೇಳುವದಕ್ಕಿಂತ ಹೆಚ್ಚಾದ ಸಂತೋಷವು ನನಗಿಲ್ಲ.” (3 ಯೋಹಾನ 4) ಮನಸ್ಸಿನಲ್ಲಿ ಸ್ಪಷ್ಟವಾದ ಲಕ್ಷ್ಯಗಳನ್ನಿಟ್ಟುಕೊಂಡು ನಡೆಸಲ್ಪಡುವ ಕುಟುಂಬ ಅಧ್ಯಯನಗಳು ಮತ್ತು ಕುಟುಂಬ ಸದಸ್ಯರ ವ್ಯಕ್ತಿಗತ ಅಗತ್ಯಗಳನ್ನು ದಯೆಯಿಂದ, ಸಹಾಯಕರ ವಿಧದಲ್ಲಿ ನಿಭಾಯಿಸುವ ಕುಟುಂಬ ತಲೆಗಳು, ತಮ್ಮ ಕುಟುಂಬವು ಇಂತಹ ಆನಂದದಲ್ಲಿ ಪಾಲ್ಗೊಳ್ಳುವಂತೆ ಹೆಚ್ಚನ್ನು ಮಾಡಶಕ್ತರಾಗಿರುವರು. ದೇವರ ಜೀವನ ಮಾರ್ಗಕ್ಕಾಗಿ ಗಣ್ಯತೆಯನ್ನು ಬೆಳೆಸಿಕೊಳ್ಳುವ ಮೂಲಕ, ಕುಟುಂಬವು ಅತ್ಯುತ್ತಮವಾದ ಜೀವಿತ ಮಾರ್ಗದಲ್ಲಿ ಆನಂದಿಸುವಂತೆ ಹೆತ್ತವರು ಸಹಾಯ ಮಾಡುತ್ತಿರುವರು.—ಕೀರ್ತನೆ 19:7-11.

ನೀವು ವಿವರಿಸಬಲ್ಲಿರೊ?

◻ ನಮ್ಮ ಮಕ್ಕಳು ಕೂಟಗಳಿಗೆ ತಯಾರಿಸಬೇಕಾದದ್ದು ಏಕೆ ಅಷ್ಟೊಂದು ಪ್ರಾಮುಖ್ಯವಾಗಿದೆ?

◻ ತಮ್ಮ ಮಕ್ಕಳು ‘ಹೃದಯವನ್ನು ಸಂಪಾದಿಸುವಂತೆ’ ಹೆತ್ತವರು ಹೇಗೆ ಸಹಾಯ ಮಾಡಬಲ್ಲರು?

◻ ಎಲ್ಲ ಕೂಟಗಳಿಗಾಗಿ ತಯಾರಿಸುವುದರಲ್ಲಿ ನಮ್ಮ ಕುಟುಂಬ ಅಧ್ಯಯನವು ಹೇಗೆ ಸಹಾಯ ಮಾಡಬಲ್ಲದು?

◻ ಕ್ಷೇತ್ರ ಸೇವೆಗಾಗಿ ಕುಟುಂಬವಾಗಿ ತಯಾರಿಸುವುದು, ನಾವು ಹೆಚ್ಚು ಪರಿಣಾಮಕಾರಿಯಾಗಿರಲು ಹೇಗೆ ಸಹಾಯ ಮಾಡಬಹುದು?