ಅಧ್ಯಾಯ 103

ದೇವಾಲಯವನ್ನು ಪುನಃ ಸಂದರ್ಶಿಸುವದು

ಯೇಸು ಮತ್ತು ಅವನ ಶಿಷ್ಯರು ಯೆರಿಕೋವಿನಿಂದ ಬಂದಂದಿನಿಂದ ಬೇಥಾನ್ಯದಲ್ಲಿ ಅವರ ಮೂರನೆಯ ರಾತ್ರಿಯನ್ನು ಕಳೆದಿದ್ದರು. ನೈಸಾನ್‌ 10ರ ಸೋಮವಾರದ ಅತಿ ಬೆಳಿಗ್ಗೆಯೇ ಅವರು ಯೆರೂಸಲೇಮಿನ ದಾರಿಯಲ್ಲಿದ್ದರು. ಯೇಸುವು ಹಸಿದಿದ್ದನು. ಈಗ ಅವನು ಎಲೆ ಬಿಟ್ಟಿದ್ದ ಒಂದು ಅಂಜೂರದ ಮರವನ್ನು ದೂರದಲ್ಲಿ ಕಂಡು ಅದರಲ್ಲಿ ಏನಾದರೂ ಹಣ್ಣು ಸಿಕ್ಕೀತೆಂದು ಅಲ್ಲಿಗೆ ಹೋದನು.

ಅಸಾಮಾನ್ಯವಾಗಿ, ಕಾಲಕ್ಕಿಂತ ಮೊದಲು ಮರದ ಎಲೆಗಳು ಚಿಗುರಿದ್ದವು, ಯಾಕಂದರೆ ಅಂಜೂರದ ಹಣ್ಣಿನ ಕಾಲವು ಜೂನ್‌ ತಿಂಗಳಿಗಿಂತ ಮೊದಲು ಅಲ್ಲ, ಮತ್ತು ಈಗ ಅದು ಮಾರ್ಚ್‌ ತಿಂಗಳ ಅಂತ್ಯಭಾಗವಾಗಿತ್ತು. ಆದಾಗ್ಯೂ, ಎಲೆಗಳು ಮೊದಲೇ ಬಂದಿರುವದರಿಂದ, ಅಂಜೂರದ ಹಣ್ಣುಗಳು ಕೂಡ ಮೊದಲೇ ಬರಬಹುದೆಂದು ಯೇಸುವು ಭಾವಿಸಿದ್ದಿರಬೇಕು. ಆದರೆ ಅವನಿಗೆ ನಿರಾಶೆಯಾಯಿತು. ಎಲೆಗಳು ಮರಕ್ಕೆ ಒಂದು ಮೋಸಪಡಿಸುವ ಹೊರ ತೋರಿಕೆಯನ್ನು ಕೊಟ್ಟವು. ಮರವನ್ನು ಶಪಿಸುತ್ತಾ ಯೇಸುವು ಅಂದದ್ದು: “ಇನ್ನು ಮೇಲೆ ಒಬ್ಬರೂ ನಿನ್ನಲ್ಲಿ ಹಣ್ಣನ್ನು ಎಂದೆಂದಿಗೂ ತಿನ್ನದ ಹಾಗಾಗಲಿ.” ಯೇಸುವಿನ ಕೃತ್ಯದ ಪರಿಣಾಮಗಳು ಮತ್ತು ಅದರ ವೈಶಿಷ್ಟ್ಯತೆಯು ಮರುದಿನ ಬೆಳಿಗ್ಗೆ ತಿಳಿದುಬರುತ್ತದೆ.

ಮುಂದುವರಿಯುತ್ತಾ ಯೇಸುವು ಮತ್ತು ಅವನ ಶಿಷ್ಯರು ಬಲುಬೇಗನೆ ಯೆರೂಸಲೇಮನ್ನು ತಲುಪಲಿದ್ದರು. ಅವನು ಮೊದಲನೆಯ ದಿನದ ಮಧ್ಯಾಹ್ನ ಪರೀಕ್ಷಿಸಿದ್ದ ದೇವಾಲಯಕ್ಕೆ ಹೋಗುತ್ತಾನೆ. ಆದಾಗ್ಯೂ, ಇಂದು ಅವನು, ಸುಮಾರು ಮೂರು ವರ್ಷಗಳ ಹಿಂದೆ ಅವನು ಸಾ.ಶ. 30ರ ಪಸ್ಕ ಹಬ್ಬಕ್ಕೆ ಬಂದಾಗ ತೆಗೆದುಕೊಂಡ ಅದೇ ರೀತಿಯ ಕಾರ್ಯವೆಸಗುತ್ತಾನೆ. ಯೇಸುವು ಕೊಳ್ಳುವವರನ್ನೂ ಮಾರುವವರನ್ನೂ ದೇವಾಲಯದಿಂದ ಹೊರಗೆ ದಬ್ಬಿಬಿಡುತ್ತಾನೆ ಮತ್ತು ಚಿನಿವಾರರ ಮೇಜುಗಳನ್ನೂ ಪಾರಿವಾಳ ಮಾರುವವರ ಕಾಲ್ಮಣೆಗಳನ್ನೂ ಕೆಡವಿ ಹಾಕುತ್ತಾನೆ. ಒಬ್ಬನನ್ನಾದರೂ ಸಾಮಾನು ಹೊತ್ತು ಕೊಂಡು ದೇವಾಲಯದೊಳಗೆ ಹಾದುಹೋಗಲು ಅವನು ಬಿಡಲಿಲ್ಲ.

ಚಿನಿವಾರರನ್ನೂ, ದೇವಾಲಯದಲ್ಲಿ ಪ್ರಾಣಿಗಳನ್ನು ಮಾರುವವರನ್ನೂ ಖಂಡಿಸುತ್ತಾ, ಅವನು ಅಂದದ್ದು: “ನನ್ನ ಆಲಯವು ಎಲ್ಲಾ ಜನಾಂಗಗಳಿಗೂ ಪ್ರಾರ್ಥನಾಲಯವೆನಿಸಿಕೊಳ್ಳುವದು ಎಂದು ಬರೆದಿದೆಯಲ್ಲಾ? ಆದರೆ ನೀವು ಅದನ್ನು ಕಳ್ಳರ ಗವಿ ಮಾಡಿದ್ದೀರಿ.” ಅವರು ಕಳ್ಳರಾಗಿದ್ದರು, ಯಾಕಂದರೆ ಯಜ್ಞಕ್ಕಾಗಿ ಆವಶ್ಯಕವಾದ ಪ್ರಾಣಿಗಳನ್ನು ಖರೀದಿಸಲು ಬೇರೆ ಯಾವ ದಾರಿಯೂ ಇಲ್ಲದ ಜನರಿಂದ ಅವರು ದುಬಾರಿಯಾದ ಬೆಲೆ ಕೇಳುತ್ತಿದ್ದರು. ಆದುದರಿಂದ ಇಂಥಾ ವ್ಯಾಪಾರದ ವ್ಯವಹಾರಗಳನ್ನು ಒಂದು ರೀತಿಯ ಸುಲುಕೊಳ್ಳುವಿಕೆ ಯಾ ಕಳ್ಳತನವೆಂದು ಯೇಸುವು ದೃಷ್ಟಿಸುತ್ತಾನೆ.

ಮಹಾ ಯಾಜಕರೂ, ಶಾಸ್ತ್ರಿಗಳೂ ಮತ್ತು ಜನರ ಮುಖ್ಯಸ್ಥರೂ ಯೇಸುವು ಮಾಡಿದ್ದನ್ನು ಕೇಳಿದಾಗ, ಅವನನ್ನು ಕೊಲ್ಲುವದು ಹೇಗೆ ಎಂಬ ಉಪಾಯವನ್ನು ಹುಡುಕಲು ಪುನೊಮ್ಮೆ ಆಲೋಚಿಸಲಾರಂಭಿಸಿದರು. ಈ ಮೂಲಕ ಅವರು ಸುಧಾರಿತವಾಗದವರು ಎಂದು ಅವರು ರುಜುಪಡಿಸಿದರು. ಆದರೂ, ಯೇಸುವನ್ನು ನಾಶಮಾಡುವದು ಹೇಗೆ ಎಂದು ಅವರಿಗೆ ತಿಳಿದಿರಲಿಲ್ಲ, ಯಾಕಂದರೆ ಅವನ ಉಪದೇಶವನ್ನು ಕೇಳಲು ಯೇಸುವಿನ ಸುತ್ತಲೂ ಜನರು ಯಾವಾಗಲೂ ಇರುತ್ತಿದ್ದರು.

ಮಾಂಸಿಕ ಯೆಹೂದ್ಯರ ಹೊರತಾಗಿ, ಅನ್ಯಜನರೂ ಪಸ್ಕ ಹಬ್ಬಕ್ಕೆ ಬರುತ್ತಿದ್ದರು. ಅವರು ಪರಿವರ್ತಿತರಾದವರು ಅಂದರೆ ಯೆಹೂದ್ಯರ ಧರ್ಮಕ್ಕೆ ಮತಾಂತರ ಹೊಂದಿದವರಾಗಿದ್ದರು. ಮತಾಂತರಿಗಳಾಗಿರ ಬಹುದಾದ ನಿರ್ದಿಷ್ಟ ಗ್ರೀಕರು, ಈಗ ಫಿಲಿಪ್ಪನ ಬಳಿಗೆ ಬಂದು, ಯೇಸುವನ್ನು ನೋಡಬೇಕೆಂದು ವಿನಂತಿಸುತ್ತಾರೆ. ಫಿಲಿಪ್ಪನು ಅಂದ್ರೆಯನ ಬಳಿಗೆ ಹೋಗಿ, ಪ್ರಾಯಶಃ ಅಂಥ ಭೇಟಿಯು ಯೋಗ್ಯವೋ ಎಂದು ಕೇಳುತ್ತಿರಬಹುದು. ಯೇಸುವು ಇನ್ನೂ ದೇವಾಲಯದಲ್ಲಿ ಇದ್ದನು. ಅಲ್ಲಿ ಗ್ರೀಕರು ಅವನನ್ನು ನೋಡಲು ಶಕ್ತರಾದರು.

ಜೀವಿತದ ಕೆಲವೇ ದಿನಗಳು ಮಾತ್ರ ತನಗೆ ಉಳಿದವೆ ಎಂದು ಯೇಸುವು ಬಲ್ಲವನಾಗಿದ್ದುದರಿಂದ ಅವನು ತನ್ನ ಸನ್ನಿವೇಶವನ್ನು ಬಹಳ ಉತ್ತಮವಾಗಿ ಉದಾಹರಿಸುತ್ತಾನೆ: “ಮನುಷ್ಯ ಕುಮಾರನು ತನ್ನ ಮಹಿಮೆಯ ಪದವಿಯನ್ನು ಹೊಂದುವ ಸಮಯ ಬಂದದೆ. ನಿಮಗೆ ನಿಜನಿಜವಾಗಿ ಹೇಳುತ್ತೇನೆ, ಗೋದಿಯ ಕಾಳು ಭೂಮಿಯಲ್ಲಿ ಬಿದ್ದು ಸಾಯದಿದ್ದರೆ ಒಂದೇಯಾಗಿ ಉಳಿಯುವದು; ಸತ್ತರೆ ಬಹಳ ಫಲಕೊಡುವದು.”

ಒಂದು ಗೋದಿಕಾಳಿಗೆ ಇರುವ ಬೆಲೆ ಕೊಂಚವೇ. ಆದರೂ, ಅದನ್ನು ಮಣ್ಣಿನಲ್ಲಿ ಹಾಕುವದಾದರೆ ಮತ್ತು ಅದು “ಸತ್ತರೆ”, ಆ ಮೂಲಕ ಬೀಜದೋಪಾದಿ ತನ್ನ ಜೀವಿತವನ್ನು ಕೊನೆಗೊಳಿಸುವದಾದರೆ ಆಗ ಏನು? ಅದು ಆಗ ಚಿಗುರುತ್ತದೆ ಮತ್ತು ಸಮಯ ಕಳೆದಂತೆ ಅದು ದಂಟಾಗಿ ಬೆಳೆಯುತ್ತದೆ, ಅದರಲ್ಲಿ ಗೋದಿಯ ಅನೇಕಾನೇಕ ಗೊಂಚಲುಗಳಿರುತ್ತವೆ. ತದ್ರೀತಿಯಲ್ಲಿ, ಯೇಸುವು ಒಬ್ಬನೇ ಪರಿಪೂರ್ಣ ಮಾನವನಾಗಿದ್ದನು. ಆದರೆ ಅವನು ದೇವರಿಗೆ ನಂಬಿಗಸ್ತನಾಗಿ ಸಾಯುವುದಾದರೆ, ಅವನಲ್ಲಿದ್ದಂಥಾ ಸ್ವ-ತ್ಯಾಗದ ಆತ್ಮವಿರುವ ನಂಬಿಗಸ್ತರಿಗೆ ನಿತ್ಯಜೀವವನ್ನು ನೀಡುವ ಸಾಧನವಾಗುವನು. ಆದಕಾರಣ ಯೇಸುವು ಹೇಳುವದು: “ತನ್ನ ಪ್ರಾಣದ ಮೇಲೆ ಮಮತೆಯಿಡುವವನು ಅದನ್ನು ಕಳಕೊಳ್ಳುವನು, ಇಹಲೋಕದಲ್ಲಿ ತನ್ನ ಪ್ರಾಣವನ್ನು ಹಗೆಮಾಡುವವನು ನಿತ್ಯಜೀವಕ್ಕಾಗಿ ಅದನ್ನು ಕಾಪಾಡಿಕೊಳ್ಳುವನು.”

ಯೇಸುವು ಕೇವಲ ತನ್ನ ವಿಷಯವಾಗಿ ಮಾತ್ರ ಯೋಚಿಸುತ್ತಿರಲಿಲ್ಲ, ಯಾಕಂದರೆ ಅವನು ಅನಂತರ ವಿವರಿಸುವದು: “ಯಾವನಾದರೂ ನನ್ನ ಸೇವೆಯನ್ನು ಮಾಡುವವನಾದರೆ ನನ್ನ ಹಿಂದೆ ಬರಲಿ; ಮತ್ತು ಎಲ್ಲಿ ನಾನು ಇರುತ್ತೇನೋ ಅಲ್ಲಿ ನನ್ನ ಸೇವಕನು ಸಹ ಇರುವನು. ಯಾವನಾದರೂ ನನ್ನ ಸೇವೆಯನ್ನು ಮಾಡುವವನಾದರೆ ತಂದೆಯು ಅವನಿಗೆ ಬಹುಮಾನ ನೀಡುವನು.” ಯೇಸುವನ್ನು ಹಿಂಬಾಲಿಸಿ, ಅವನ ಸೇವೆ ಮಾಡುವವನಾದರೆ ಅವನಿಗೆ ಎಂಥಾ ಅದ್ಭುತಕರವಾದ ಬಹುಮಾನ ಇದಾಗಿರುತ್ತದೆ! ಅದು ರಾಜ್ಯದಲ್ಲಿ ಯೇಸುವಿನೊಂದಿಗೆ ಜೊತೆಯಾಗಿ ಇರುವ ಬಹುಮಾನದಿಂದ ತಂದೆಯು ಗೌರವಿಸುವದೇ ಆಗಿದೆ.

ಅವನಿಗಾಗಿ ಕಾದಿಟ್ಟಿರುವ ಮಹಾ ಬಾಧೆ ಮತ್ತು ಸಂಕಟಮಯ ಮರಣದ ಕುರಿತು ಯೋಚಿಸುತ್ತಾ ಯೇಸುವು ಮುಂದರಿಸುವದು: “ಈಗ ನನ್ನ ಪ್ರಾಣವು ತತ್ತರಿಸುತ್ತದೆ; ಮತ್ತು ನಾನೇನು ಹೇಳಲಿ? ತಂದೆಯೇ, ಈ ಕಾಲದೊಳಗಿಂದ ನನ್ನನ್ನು ತಪ್ಪಿಸು.” ಅವನಿಗಾಗಿ ಯಾವದು ಕಾದಿಡಲ್ಪಟ್ಟಿದೆಯೋ, ಅದನ್ನು ಪಾರುಗೊಳಿಸಶಕ್ಯವಾಗಿದ್ದರೆ! ಆದರೆ, ಇಲ್ಲ, ಅವನು ಹೇಳುವದು: “ಆದರೆ ಇದಕ್ಕಾಗಿಯೇ ಈ ಕಾಲ ಸೇರಿದೆನು.” ತನ್ನ ಸ್ವಂತ ಯಜ್ಞಾರ್ಪಿತ ಮರಣದ ಸಹಿತ, ದೇವರ ಪೂರ್ಣ ಏರ್ಪಾಡಿನೊಂದಿಗೆ ಯೇಸುವು ಸಹಮತದಲ್ಲಿದ್ದನು. ಮತ್ತಾಯ 21:12, 13, 18, 19; ಮಾರ್ಕ 11:12-18; ಲೂಕ 19:45-48; ಯೋಹಾನ 12:20-27.

▪ ಹಣ್ಣಿನ ಕಾಲವದಲ್ಲದಿದ್ದರೂ, ಯೇಸುವು ಅಂಜೂರವನ್ನು ಕಾಣಲು ನಿರೀಕ್ಷಿಸಿದ್ದೇಕೆ?

▪ ದೇವಾಲಯದಲ್ಲಿ ಮಾರುವವರನ್ನು ಯೇಸುವು “ಕಳ್ಳರು” ಎಂದು ಕರೆದದ್ದು ಯಾಕೆ?

▪ ಸಾಯುವ ಒಂದು ಗೋದಿಕಾಳಿನಂತೆ ಯೇಸುವು ಇದ್ದದ್ದು ಹೇಗೆ?

▪ ಅವನಿಗಾಗಿ ಕಾದಿಡಲ್ಪಟ್ಟಿರುವ ಬಾಧೆ ಮತ್ತು ಮರಣದ ಕುರಿತು ಯೇಸುವಿನ ಭಾವನೆಯೇನಾಗಿತ್ತು?

ಅಧ್ಯಾಯ 104

ಮೂರನೆಯ ಬಾರಿ ದೇವರ ವಾಣಿಯು ಕೇಳಲ್ಪಟ್ಟದ್ದು

ದೇವಾಲಯದಲ್ಲಿ ಯೇಸುವು, ಅವನು ಶೀಘ್ರದಲ್ಲಿ ಎದುರಿಸಲಿಕ್ಕಿರುವ ಮರಣದ ಕುರಿತು ಸಂಕಟ ಪಡುತ್ತಾ ಇದ್ದನು. ಅವನ ಮುಖ್ಯ ಚಿಂತೆಯು ಅವನ ತಂದೆಯ ಸತ್ಕೀರ್ತಿಯು ಹೇಗೆ ಬಾಧಿಸಲ್ಪಡಲಿದೆ ಎಂದಾಗಿತ್ತು, ಆದುದರಿಂದ ಅವನು ಪ್ರಾರ್ಥಿಸುವದು: “ತಂದೆಯೇ, ನಿನ್ನ ಹೆಸರನ್ನು ಮಹಿಮೆ ಪಡಿಸಿಕೋ.”

ಆ ಸಮಯದಲ್ಲಿ, ಪರಲೋಕದಿಂದ ಒಂದು ಗಟ್ಟಿಯಾದ ವಾಣಿಯು ಕೇಳಬಂತು, ಅದು ಪ್ರಕಟಿಸಿದ್ದು: “ಮಹಿಮೆ ಪಡಿಸಿದ್ದೇನೆ, ತಿರಿಗಿ ಮಹಿಮೆ ಪಡಿಸುವೆನು.”

ಸುತ್ತಲೂ ನಿಂತುಕೊಂಡಿದ್ದ ಜನರು ದಿಗ್ಭ್ರಾಂತಿಗೊಂಡರು. “ದೇವದೂತನು ಈತನ ಸಂಗಡ ಮಾತಾಡಿದನು,” ಎಂದು ಕೆಲವರು ಹೇಳಿದರು. ಇನ್ನಿತರರು ಗುಡುಗಿತು ಎಂದು ವಾದಿಸಿದರು. ಆದರೆ ನೈಜತೆಯಲ್ಲಿ ಅದು ಯೆಹೋವ ದೇವರು ಮಾತಾಡಿದ್ದಾಗಿತ್ತು! ಆದಾಗ್ಯೂ, ಯೇಸುವಿನ ಕುರಿತಾಗಿ ದೇವರ ವಾಣಿಯನ್ನು ಕೇಳಿದ್ದು ಇದು ಮೊದಲ ಬಾರಿಯಲ್ಲ.

ಸುಮಾರು ಮೂರುವರೆ ವರ್ಷಗಳ ಮುಂಚೆ, ಯೇಸುವಿನ ದೀಕ್ಷಾಸ್ನಾನದಲ್ಲಿ, ದೇವರು ಯೇಸುವಿನ ಕುರಿತು ಹೇಳಿದ್ದನ್ನು ಸ್ನಾನಿಕನಾದ ಯೋಹಾನನು ಕೇಳಿದ್ದನು: “ಈತನು ಪ್ರಿಯನಾಗಿರುವ ನನ್ನ ಮಗನು, ಈತನನ್ನು ನಾನು ಮೆಚ್ಚಿದ್ದೇನೆ.” ಅನಂತರ, ಇದರ ಮೊದಲಿನ ಪಸ್ಕ ಹಬ್ಬದ ನಂತರ, ಯೇಸುವು ಯಾಕೋಬ, ಯೋಹಾನ ಮತ್ತು ಪೇತ್ರನ ಮುಂದೆ ಪ್ರಕಾಶರೂಪ ಧರಿಸಿದಾಗ, ಅವರು ದೇವರು ಹೇಳಿದ್ದನ್ನು ಕೇಳಿದ್ದರು: “ಈತನು ಪ್ರಿಯನಾಗಿರುವ ನನ್ನ ಮಗನು; ಈತನನ್ನು ನಾನು ಮೆಚ್ಚಿದ್ದೇನೆ; ಈತನ ಮಾತನ್ನು ಕೇಳಿರಿ.” ಮತ್ತು ಈಗ ಮೂರನೆಯ ಬಾರಿ, ನೈಸಾನ್‌ 10ರಲ್ಲಿ, ಯೇಸುವಿನ ಮರಣದ ನಾಲ್ಕು ದಿನಗಳ ಮೊದಲು ದೇವರ ವಾಣಿಯು ಮನುಷ್ಯರಿಂದ ಪುನಃ ಕೇಳಲ್ಪಟ್ಟಿತು. ಆದರೆ ಈ ಬಾರಿ ಯೆಹೋವನು ಮಾತಾಡಿದಾಗ, ಜನರ ಸಮೂಹವೇ ಕೇಳಶಕ್ತವಾಯಿತು!

ಯೇಸುವು ವಿವರಿಸುವದು: “ಈ ಆಕಾಶವಾಣಿಯು ನನಗಾಗಿ ಆಗಲಿಲ್ಲ; ನಿಮಗಾಗಿ ಆಯಿತು.” ಯೇಸುವು ಖಂಡಿತವಾಗಿಯೂ ದೇವರ ಮಗನೂ, ವಾಗ್ದಾನಿತ ಮೆಸ್ಸೀಯನೂ ಎಂದು ರುಜುವಾತನ್ನು ಒದಗಿಸಿತು. “ಈಗ ಈ ಲೋಕಕ್ಕೆ ತೀರ್ಪು ಆಗುತ್ತದೆ,” ಯೇಸುವು ಮುಂದರಿಸುವದು. “ಈಗ ಇಹ ಲೋಕಾಧಿಪತಿಯು ಹೊರಗೆ ನೂಕಲ್ಪಡುವನು.” ಯೇಸುವಿನ ನಂಬಿಗಸ್ತ ಜೀವಿತದ ನಮೂನೆಯ ಫಲಿತಾಂಶವಾಗಿ, ಇಹಲೋಕಾಧಿಪತಿಯಾದ, ಪಿಶಾಚನಾದ ಸೈತಾನನು “ಹೊರಗೆ ನೂಕಲ್ಪಡಲು” ಯಾ ನಾಶಹೊಂದಲು ಯೋಗ್ಯನಾಗಿರುತ್ತಾನೆಂದು ಸ್ಥಿರೀಕರಿಸಿತು.

ಸಮೀಪಿಸುತ್ತಿರುವ ಅವನ ಮರಣದ ಫಲಿತಾಂಶಗಳ ಕಡೆಗೆ ತೋರಿಸುತ್ತಾ, ಯೇಸುವು ಅಂದದ್ದು: “ಆದರೆ ನಾನು ಭೂಮಿಯಲ್ಲಿಂದ ಮೇಲಕ್ಕೆ ಎತ್ತಲ್ಪಟ್ಟಾಗ ಎಲ್ಲರನ್ನೂ ನನ್ನ ಬಳಿಗೆ ಎಳಕೊಳ್ಳುವೆನು.” ಅವನ ಮರಣವು ಯಾವುದೇ ರೀತಿಯಲ್ಲಿ ಒಂದು ಸೋಲಾಗಿರಲಿಲ್ಲ, ಬದಲು ಅದರ ಮೂಲಕ, ಅವನು ಇತರರನ್ನು ತನ್ನೆಡೆಗೆ ಎಳೆದುಕೊಳ್ಳುವನು, ಅದರಿಂದ ಅವರು ನಿತ್ಯ ಜೀವದಲ್ಲಿ ಆನಂದಿಸಲಾಗುವಂತೆ ಆಗುತ್ತದೆ.

ಆದರೆ ಜನರ ಗುಂಪು ಪ್ರತಿರೋಧಿಸುವದು: “ಕ್ರಿಸ್ತನು ಸದಾಕಾಲವೂ ಇರುತ್ತಾನೆಂದು ಧರ್ಮಶಾಸ್ತ್ರದಲ್ಲಿ ಕೇಳಿದ್ದೇವೆ; ಹಾಗಾದರೆ ಮನುಷ್ಯ ಕುಮಾರನು ಮೇಲಕ್ಕೆ ಎತ್ತಲ್ಪಡಬೇಕೆಂದು ನೀನು ಹೇಳುವದು ಹೇಗೆ? ಆ ಮನುಷ್ಯ ಕುಮಾರನು ಯಾರು?”

ದೇವರ ಸ್ವಂತ ವಾಣಿಯ ಸಹಿತ ಎಲ್ಲಾ ರುಜುವಾತುಗಳ ಹೊರತಾಗಿಯೂ, ಬಹುಮಂದಿ ಯೇಸುವು ನಿಜ ಮನುಷ್ಯ ಕುಮಾರನೂ, ವಾಗ್ದಾನಿತ ಮೆಸ್ಸೀಯನೂ ಎಂದು ನಂಬುವದಿಲ್ಲ. ಆದರೂ, ಆರು ತಿಂಗಳುಗಳಷ್ಟು ಹಿಂದೆ ಪರ್ಣ ಶಾಲೆಗಳ ಹಬ್ಬದಲ್ಲಿ ಹೇಳಿದಂತೆ, ಯೇಸುವು ಸ್ವತಃ ತನ್ನ ಕುರಿತಾಗಿ “ಬೆಳಕು” ತಾನೆಂದು ಪುನಃ ಹೇಳುತ್ತಾ, ತನ್ನನ್ನು ಆಲಿಸುವವರಿಗೆ ಉತ್ತೇಜಿಸುವದು: “ನಿಮಗೆ ಬೆಳಕು ಇರುವಾಗಲೇ ಬೆಳಕನ್ನು ನಂಬಿರಿ; ನಂಬಿದರೆ ನೀವು ಬೆಳಕಿನವರಾಗುವಿರಿ.” ಈ ಸಂಗತಿಗಳನ್ನು ಹೇಳಿದ ನಂತರ, ಯೇಸುವು ಅವರನ್ನು ಬಿಟ್ಟು ಹೋಗಿ ಅಡಗಿಕೊಳ್ಳುತ್ತಾನೆ, ಯಾಕಂದರೆ ಅವನ ಪ್ರಾಣವು ಅಪಾಯದಲ್ಲಿತ್ತೆಂಬದು ವ್ಯಕ್ತ.

ಯೇಸುವಿನಲ್ಲಿ ಯೆಹೂದ್ಯರ ನಂಬಿಕೆಯ ಕೊರತೆಯು, ‘ಸ್ವಸ್ಥತೆಯನ್ನು ಅವರು ಹೊಂದದಂತೆ ಆತನು ಜನರ ಕಣ್ಣುಗಳನ್ನು ಕುರುಡುಮಾಡಿ, ಹೃದಯವನ್ನು ಕಠಿಣಮಾಡಿದನು’ ಎಂಬ ಯೆಶಾಯನ ಮಾತುಗಳನ್ನು ನೆರವೇರಿಸಿದವು. ಯೆಹೋವನೊಂದಿಗೆ ಅವನ ಮಾನವ-ಪೂರ್ವದ ಅಸ್ತಿತ್ವದಲ್ಲಿನ ಮಹಿಮೆಯಲ್ಲಿ ಯೇಸುವಿನ ಸಹಿತ, ಯೆಹೋವನ ಸ್ವರ್ಗೀಯ ಆಸ್ಥಾನದ ದರ್ಶನವನ್ನು ಯೆಶಾಯನು ಕಂಡಿದ್ದನು. ಆದರೂ, ಯೆಶಾಯನು ಏನು ಬರೆದನೋ ಅದರ ನೆರವೇರಿಕೆಯಲ್ಲಿ ಯೆಹೂದ್ಯರು ಮೊಂಡತನದಿಂದ ಅವರ ವಾಗ್ದಾನಿತ ವಿಮೋಚಕನಾದ ಇವನ ರುಜುವಾತನ್ನು ನಿರಾಕರಿಸುತ್ತಾರೆ.

ಇನ್ನೊಂದು ಪಕ್ಕದಲ್ಲಿ, ಅಧಿಪತಿಗಳಲ್ಲಿ ಕೂಡ ಕೆಲವರು (ಯೆಹೂದ್ಯರ ಮುಖ್ಯ ನ್ಯಾಯಾಲಯ, ಸನ್ಹೇದ್ರಿನ್‌ ಸದಸ್ಯರು ಎಂದು ವ್ಯಕ್ತವಾಗುತ್ತದೆ) ನಿಜವಾಗಿಯೂ ಯೇಸುವನ್ನು ನಂಬಿದರು. ಇಂಥ ಅಧಿಪತಿಗಳಲ್ಲಿ ನಿಕೊದೇಮನು ಮತ್ತು ಅರಿಮಥಾಯದ ಯೋಸೇಫನು ಇಬ್ಬರಾಗಿದ್ದರು. ಆದರೆ ಅಧಿಪತಿಗಳು ಸದ್ಯಕ್ಕೆ ತಮ್ಮ ನಂಬಿಕೆಯನ್ನು ಬಹಿರಂಗವಾಗಿ ಹೇಳಲು, ಸಭೆಯ ಸ್ಥಾನಗಳಿಂದ ಬಹಿಷ್ಕಾರವಾದೀತೆಂದು ಅಂಜಿಕೊಂಡು ಹಿಂಜರಿದರು. ಇಂಥವರು ಎಷ್ಟೊಂದು ಸಂಗತಿಗಳನ್ನು ಕಳಕೊಳ್ಳಲಿದ್ದರು!

ಯೇಸುವು ಗಮನಿಸುತ್ತಾ ಹೋದದ್ದು: “ನನ್ನನ್ನು ನಂಬಿದವನು ನನ್ನನ್ನೇ ನಂಬುವವನಲ್ಲ; ನನ್ನನ್ನು ಕಳುಹಿಸಿಕೊಟ್ಟಾತನನ್ನು ನಂಬುವವನಾಗಿದ್ದಾನೆ. ಮತ್ತು ನನ್ನನ್ನು ನೋಡುವವನು ನನ್ನನ್ನು ಕಳುಹಿಸಿಕೊಟ್ಟಾತನನ್ನು ನೋಡುವವನಾಗಿದ್ದಾನೆ. . . . . ಯಾವನಾದರೂ ನನ್ನ ಮಾತುಗಳನ್ನು ಕೇಳಿದರೂ ಕೈಕೊಂಡು ನಡೆಯದೆ ಹೋದರೆ ನಾನೇ ಅವನಿಗೆ ತೀರ್ಪುಮಾಡುವದಿಲ್ಲ; ಲೋಕಕ್ಕೆ ತೀರ್ಪುಮಾಡುವದಕ್ಕಾಗಿ ನಾನು ಬಂದಿಲ್ಲ; ಲೋಕವನ್ನು ರಕ್ಷಿಸುವದಕ್ಕಾಗಿ ಬಂದಿದ್ದೇನೆ. . . . ನಾನು ಆಡಿದ ಮಾತು ಅವನಿಗೆ ಕಡೇ ದಿನದಲ್ಲಿ ತೀರ್ಪುಮಾಡುವದು.”

ಮಾನವ ಕುಲದ ಲೋಕಕ್ಕೋಸ್ಕರ ಯೆಹೋವನಿಗಿದ್ದ ಪ್ರೀತಿಯು ಯೇಸುವನ್ನು ಕಳುಹಿಸುವಂತೆ ಅವನನ್ನು ನಡಿಸಿತು, ಆ ಮೂಲಕ ಅವನಲ್ಲಿ ನಂಬಿಕೆಯನ್ನಿಡುವವರು ರಕ್ಷಣೆಹೊಂದಶಕ್ತರಾಗುವರು. ಯೇಸುವು ಮಾತಾಡುವಂತೆ ದೇವರು ಆಜ್ಞಾಪಿಸಿದ ವಿಷಯಗಳಿಗೆ ಅವರು ವಿಧೇಯರಾಗುವದರ ಮೇಲೆ ಜನರು ರಕ್ಷಿಸಲ್ಪಡುವರೋ ಇಲ್ಲವೋ ಎನ್ನುವದು ಆತುಕೊಂಡಿದೆ. ನ್ಯಾಯತೀರ್ಪು “ಕಡೇದಿನದಲ್ಲಿ” ಅಂದರೆ ಕ್ರಿಸ್ತನ ಸಾವಿರ ವರ್ಷದ ಆಳಿಕ್ವೆಯಲ್ಲಿ ನಡೆಯುವದು.

ಯೇಸುವು ಇದನ್ನು ಹೇಳುವದರ ಮೂಲಕ ಸಮಾಪ್ತಿಗೊಳಿಸುತ್ತಾನೆ: “ನನ್ನಷ್ಟಕ್ಕೆ ನಾನೇ ಮಾತಾಡಿದವನಲ್ಲ; ನನ್ನನ್ನು ಕಳುಹಿಸಿಕೊಟ್ಟ ತಂದೆಯೇ—ನೀನು ಇಂಥಿಂಥದನ್ನು ಹೇಳಬೇಕು. ಹೀಗೆ ಹೀಗೆ ಮಾತಾಡಬೇಕು ಎಂಬದಾಗಿ ನನಗೆ ಆಜ್ಞೆ ಕೊಟ್ಟಿದ್ದಾನೆ. ಆತನ ಆಜ್ಞೆ ನಿತ್ಯಜೀವವಾಗಿದೆ ಎಂದು ಬಲ್ಲೆನು. ಆದದರಿಂದ ನಾನು ಮಾತಾಡುವದನ್ನೆಲ್ಲಾ ತಂದೆ ನನಗೆ ಹೇಳಿದ ಮೇರೆಗೆ ಮಾತಾಡುತ್ತೇನೆ.” ಯೋಹಾನ 12:28-50; 19:38, 39; ಮತ್ತಾಯ 3:17; 17:5; ಯೆಶಾಯ 6:1, 8-10.

▪ ಯೇಸುವಿನ ಕುರಿತಾಗಿ ಯಾವ ಮೂರು ಸಂದರ್ಭಗಳಲ್ಲಿ ದೇವರ ವಾಣಿಯು ಕೇಳಬಂತು?

▪ ಯೇಸುವಿನ ಮಹಿಮೆಯನ್ನು ಪ್ರವಾದಿ ಯೆಶಾಯನು ನೋಡಿದ್ದು ಹೇಗೆ?

▪ ಯೇಸುವಿನ ಮೇಲೆ ನಂಬಿಕೆಯನ್ನಿಟ್ಟ ಅಧಿಪತಿಗಳು ಯಾರು, ಆದರೆ ಅವರು ಬಹಿರಂಗವಾಗಿ ಹಾಗೆ ಯಾಕೆ ಹೇಳಿಕೊಳ್ಳಲಿಲ್ಲ?

▪ “ಕಡೇ ದಿನ” ಎಂದರೆ ಏನು, ಮತ್ತು ಆಗ ಜನರನ್ನು ಯಾವುದರ ಮೇಲೆ ತೀರ್ಪು ಮಾಡಲಾಗುವದು?