Iikal Mwiihang bwa Diifuk dya Yehow

1. I biny bitudy mwa kulong bwa kuhanduk mu diifuk dya Yehow?

HADY Bibl uleeb bwa “diifuk dya Yehow,” uleeleeb bwa ciisang ciiyiiy Yehow kubutul balwiish bindiy ni ciiyiiyey kukuuuloh baat bindiy. Ha kal, Yehow waakady unyook bis kaahand bya baat. (Ye. 13:1, 6; Ezek. 13:5; Sef. 1:8) Mu ciisang ciitut eecy, “Diifuk dya Yehow” ditwaatwaadij hady biin cidiidy batwaadij kulwiish Babiloon Mutam ni bulwiish oobw bwiiyiiy kufik teng ni ku diivit dya Harmakedon. Bwiitut kuhanduk ku “diifuk” aady, bikaam twiilongolol teng kaabaak. Yeez ulongweeshel neey katwiin mwa kwiikal teng bilongolol bwa “ciisang cya mal miimiin” ki cikwaabw bikaam ‘twiikal bihang’ bwa diifuk aady.—Mat. 24:21; Luuk 12:40.

2. I dyambulwiish kaay ditudy mwa kuhetel mu mukand a 1 Biin Tesalonik

² Mu mukand indiy a kuuhal mufundish ku spirit mujilang utuminey biin Tesalonik, mupostol Pool ukadil mudimw ni bileejel bivul bwa kwambulwiish biin Krist bwa kwiikalobw biihang bwa diifuk ditam dya Yehow dya kulumbulwiish baat. Pool waakady mumanyik neey diifuk dya Yehow kadyaakady mwa kwiiy ciisang aacy. (2 Tes. 2:1-3) Cikwaabw, utungunukil ni kwambil baan baabw biin krist bwa kwiilongololobw bwa diifuk aady bilong teng bu neey i muucy, ni tut byeet tudy mwa kukooyel mubel indiy utwaadiley oow. Tukontononaay dyumvwiij ditwaadiley habitaatal myand yiloolond eey: 1) mushind wiikal diifuk dya Yehow mwa kufik, 2) bakiish biiy kuhet mushind a kuhanduk diifuk aady, ni 3) mutudy mwa kwiilongolol bwa kuhanduk.

I MUSHIND KAAY WIIY KWIIY DIIFUK DYA YEHOW?

3. I mushind kaay wiikal diifuk dya Yehow mwa kwiiy bu diib didyaakal mwiivy wiiy bufuk? (Tal cikwaabw cifwaatul.)

³ “Bu mudyaakal mwiivy wiiy bufuk.” (1 Tes. 5:2) Eecy i cileejel cya kuuhal cya bileejel bisat bidyobw bafwanyikij bwa kuleej mwiikal diifuk dya Yehow mwa kwiiy. Bimvy badyaakal balong myand ni lusaas ni bidyaakal teng mukacy mwa bufuk diib didy baat kabayoh bend biibatakamin. Ki mwiikal cifuk dya Yehow mwa kushishimuny byaady baat, diiyiiy kushishimuny baat bavul. Ning biin Krist ba biin-biin bady mwa kwiiy byaabw kushishimuk bwa mwiikal myand mwa kwiiy kulongek. Ki biiyiiy kwiikal bashilangan ni baat babiih, bwaal tut katwaakukaboh bend bwa kubutuk.

4. I mu mushind kaay udy diifuk dya Yehow diikal bu misong yidy naay maam hadyey ukaam kulel?

⁴ “Biiyiiy kwiikal ning mudy misong ya mwaan-mukaj udy ha kat.” (1 Tes. 5:3) Maam udy ni diifw kiin mwa kumanyik diib dijaalal diiyiiyey kulel mwaan. Nook kiin ni miland, ki i mumanyik neey wiiyiiy teng kulel mwaan. Hady ciisang cikumban, wiiyiiy kulel ha diib diib dyaakadyey kay mutakamin diiyiiy kumushishimuny, wiiyiiy kumvw misong, ni kayiy yih. Bya mushind aakaabumw, katwiin bamanyik diifuk ni diib dya twaadij diifuk dya Yehow. Cikwaabw, tudy batwiishibw neey dyendend ni kwiiy ni kulumbulwiish kwa Mawej bwa baat babiih kwiiyiiy kwiibashishimuny ni kabiishoh bend biiy kuhandukomw.

5. I mushind kaay udy ciisang cya mal miimiin ciikal bu kutang kwa diifuk dikwaabw?

⁵ Bu kutang kwa diifuk dihyaadihy. Cileejel ciisaat cya Pool cileeleej cikwaabw bimvy bendend ni kwiib bufuk. Ki Pool ushishintulul mushind indiy a kutal myand ni bimweemweek neey ufwaafwanyikij diifuk dya Yehow ni kutang kwa diifuk dihyaadihy. (1 Tes. 5:4) Bimvy biiyiiy kwiib bufuk ku makand bady mwa kutungunuk teng ni kulong bidyobw balong ni kabiin mwa kutal neey diib dyendend ni kuy. Citookej cya hacyaacyobw cidy mwa kwiibakwaat ciibalam ni cibumb hatook ni baat bady mwa kwiibatal. Ciisang cya mal miimiin ciiyiiy byaacy kumb hatook aab bady, bu bimvy, bwa kushaalobw mu cifuluj hakutungunuk ni kulong myand yikiish yisangeej Mawej. Bwa kwiikal bashilangan naabw, tudy ni bwa kwiikal biihang bwa kulek kwiikal ni biikadil bikiish bisangeej Yehow ni tungunukaay ni kulong “myand yilengel, yiwaakan ni ya biin-biin.” (Ef. 5:8-12) Pool ukaakal cikwaabw ni bileejel bibidy bwa kuleeb bwa baat bakiish biiy kuhanduk.

I BAAT KAAY BIIYIIYOBW KUBUTUL MU DIIFUK DYA YEHOW?

6. I mushind kaay uleeleej neey baat bavul i balaal? (1 Biin Tesalonik 5:6, 7)

⁶ ‘Aab balaalaal tul.’ (Bal 1 Biin Tesalonik 5:6, 7.) Pool i mufwanyikij aab bakiish biiy kuhanduk mu diifuk dya Yehow ni aab bady balaal. Kabiinoh bend bamanyik myand yiloolongek ha cyaab cidyobw bashikacil eecy ciisang cyendend ni kuhit. Nook kabiin bamanyik haloolongel bwaal kaahand bwa buseeb ni kabiin ni cya kulong habitaatal bwaal aabw. Baat bavul leel oow i balaal tul habitaatal myand ya mu spirit. (Rom 11:8) Kabiin biitab bijaadik bileeleej neey tukaady mu “mafuk ma bulekel” ni kabiin biitab cikwaabw neey ciisang cya mal miimiin ciiyiiy kwiiy mu kalung kakeeh oomw. Myand yitam yidy mwa kulongek mu bulongolody oobw yidy mwa kuladish bakwaabw habitaatal myand ya mu spirit ni yidy mwa kusak bakwaabw bwa kulekobw kwangat ni buseeb musah a Bukaleng. cikwaabw, bavul bendend bahing bwa kulalobw cikwaabw hamut a kushaalobw bakazamuk. Cikwaabw bakwaabw bady biitabij neey kwiiyiiy kwiikal diifuk diiyiiyobw kulumbulwiish baat balaalang neey dicidy kuleeh menmen ni kiinoh bend mu kalung kakeeh oomw. (2 Py. 3:3, 4) Nook, tudy bamanyik neey mubel udyobw batwaal oow ku dyambulwiish dya spirit wiitwambambulwiish bwiitut kulong myand lwang-lwang bwa kwiikal teng bakazamuk diifuk dyoos.

7. I mushind kaay udyobw bafwanyikij baat biikal Mawej mwa kwiiy kubutul ni bakanwaay?

⁷ ‘Bakanwaay.’ Mupostol Pool i mufwanyikij baat biikal Mawej mwa kwiiy kubutul ni bakanwaay. Baat bady bakanwaay kabiin mwa kwaalabul bend lwang-lwang bwa kuleeb habitaatal myand yihihitakan ha cyaab cidyobw , ni bangangat mahangadik makiish ma meej. Bya mushind aakaabumw, baat babiih kabiish bend bakun mat ku madimwiij ma Mawej. Banoonoh njil wiiyiiy kwiibafikish ku kubutuk. Ki biin Krist i biibambil bwa kutungunuk ni kwiilamobw, hakutungunuk ni kulang mu mushind mulengel. (1 Tes. 5:6) Muut mukwaabw udy mumanyik diiy dya Mawej uleeleej neey muut udy ni meej malengel bu muut “udy ni micim yibatam mund, ulaalang mu mushind mulengel, ni kiin ububakan. Udy ni mushind a kwangat mahangadik malengel.” Bwabiny bikaam twiikal tubatamij micim ni tulang mu mushind mulengel? I bwa kaay twaatweelakan mu myand ya cidiidy yidyok leel oow eecy mu bilumbw bidyok leel oow mu baat. Kutweelakan kwa mu myand eey kwiiyiiy kuvul mu baat bu mudy diifuk dya Yehow diikal dyend ni kufweej menmen. Cikwaabw, kabiin bikaam twiikal ni kukabakan kwa micim habitaatal citwiikal mwa kwiiy kulong. Spirit A Mawej udy mwa kwiitwambulwiish bwa kwiikal ni micim yibatam mund ni bwiitut kulang mu mushind mulengel ni bwa kwangat mahangadik mady ni meej.—Luuk 12:11, 12.

I BINY BITUDY MWA KULONG BWA KWIILONGOLOL BWA DIIFUK DYA YEHOW?

8. I mushind kaay udy mukand a 1 Biin Tesalonik 5:8 uleej biikadil biikal mwa kwiitwambulwiish bwa kushaal ni meej makazamuk? (Tal cikwaabw cifwaatul.)

⁸ ‘Vwaal ngabw . . . ni . . . ciful.” Pool wiitufwaafwanyikij ni basalaay badimuk ni bady biihang bwa kul diivit. (Bal 1 Biin Tesalonik 5:8.) Baat i bamanyik neey musalaay udy ni cya kwiikal mwiihang diib dyoos hadyok diivit. I bya mushind aakaabumw ni tut. Tushaal biihang bwa diifuk dya Yehow hatuvwaavwaal diitabij ni lukat bu ngabw, ni hatuvwaavwaal kutakamin kwa luhand, bu ciful. Biikadil eeby bidy mwa kwiitwmbulwiish menmen.

9. I mushind kaay udy diitabij diitut diitulam?

⁹ Ngabw waakady ulam mucim a musah. Diitabij ni lukat bilaalam mucim iitut a mu ciifwaany. I biikadil biikal mwa kwiitwambulwiish bwiitut kutungunuk ni kukadil Yehow mudimw ni kulond Yeez. Diitabij ditujaajaadikil neey Yehow wiiyiiy kwiituh bulang bwa mutumukaakaam ni mucim iitut woos. (Ebr. 11:6) diitabij diiyiiy kwiitusak bwa kushaal ni lulamat kudy Mulombol iitut Yeez, ning tut biikal ni bwa kutaatameen makab. Tudy mwa kukashish diitabij diitut bwiitut kuhet mushind utudy mwa kutaatameen makab hakulongel ku bileejel bya biin mudimw ba Mawej ba lee oow bady balam mucim aabab mutook hadyobw bibakabish ni biibamweesh mal eecy hadyobw bahet lutat lwa makut. Ni tudy mwa kweehuk butey bwa kutungunuk ni kukaam bikasakan makut ni bihak tut katuy bidikij aab bady baheehej shikacil aabab ha kuteek ha cyaab cya kuuhal myand ya Bukaleng.b

10. Lukat lwiitut bwa Mawej ni bwa muut neet bitwambulwiish bwa kutaatameen bicy?

¹⁰ Lukat i ciikadil cya buseeb bwa kushaal mukazamuk ni bwiitut kwiikal ni meej malengel. (Mat. 22:37-39) Lukat bwa Mawej lwiitwambambulwiish bwa kutaatameen makab mu mudimw a bukajaady ning bwa myand yikwaabw ya lutat yidy mwa kwiitufikil hatuloolong mudimw oow. (2 Tim. 1:7, 8) Bwa mutudy bakat baat ning kudy aab bakiish bakadil Yehow mudimw, tutungunuk ni kwiibadiil musah ni tutungunuk ni kukal mudimw mu teritwaar iitut wa mudimw a bukajaady udyobw biitwaakish, ni tudy mwa kudiil cikwaabw baat musah ku telefon eecy ha kwiibafundil mikand. Katwiinoh bend mwa kujimbaj kutakamin kutudy naak hakumanyik neey diifuk dikwaabw baat biiyiiy kushintuluk, ha kulek myand yibiih bwa kulong yidy yilengel.—Ezek. 18:27, 28.

11. Bilondeshel 1 Biin Tesalonik 5:11, i mushind kaay udy kukat biin-kweet baan-balum ni baan-bakaj kwiitwambambulwiish?

¹¹ Tudy bakat cikwaabw biin kweet baan-balum ni baan-bakaj. Twiileeleej mutudy ni lukat ool ‘hatukaakashishangan ku micim ni tukashishangan mu mabok.’ (Bal 1 Biin Tesalonik 5:11.) Teng bu basalaay badyaakal bambulwiishangan mu diivit, tukashishanganaay umw ni mukwaabw. Cya biin, musalaay udy mwa kutah musalaay mukwaabw cit mu luhit-hit, ki kaakady mwa kulong nook ku lukat lwindiy. Teng bu musalaay oow, katwiin mwa kulongeloh bend biin-kweet baan-balum ni baan-bakaj myand yibiih ku makand eecy kuhingijil mwiin-kweet bubiih ha bubiih. (1 Tes. 5:13, 15) Tuleeleej cikwaabw lukat ha kuneemek biin kweet biituloolombol mu cisumbw. (1 Tes. 5:12) Hafundil Pool mukand oow, cisumbw cya ku Tesalonik kacyaakadyoh bend cyanj kukumbaj muvw aakaabumw. Baat bateekelobw bwa kulombol kabaakadyoh bend banj kwiikal bashimat menmen ni baakady balongok bilem. Ki bakumbeen kaneemw. Bu mudy ciisang cya mal miimiin cyend cifweej, bikaam tulond bikasakan bishilangan ni mutuloolong kaabaak buludik butwaatwaal bakul ba ha cyaab citudy. Tut katuy ni mushind a kuhet buludik kudy kudy biin-kweet bady ku biro biitut bya ha bulab butuutul eecy bwa biin-kweet ba ku biro bya filiyal iitut; nook, bidy ni buseeb bwiitut kulong bwa kumanyik bwa kukat ni bwa kuneemek bakul biitut teng kaabaak. Ning bwaal kaay mwa kwiitufikil, tutungunukaay ni kwiikal ni meej malengel, katwiikaloh bend tutal teng bilem byaababw, ki twiimanyinaay bikasakan ha citudy bamanyik neey Yehow uloolombol baat ba lulamat aab ku dyambulwiish dya Krist.

12. I mushind kaay udy kutakamin kwiitut kulam meej miitut?

¹² Teng bu ciful cilaalam mut a musalaay, kutakamin kwiitut kwa luhand kulaalam meej miitut ni kwiitwambambulwiish bwa kulang bilengel. Ni kutakamin kukasakan, tudy bamanyik neey biit byoos bya mu mu bulongolody oobw i bya bituh. (Fili. 3:8) Kutakamin kwiitut kwiitwambambulwiish bwa kwiikal ni micim yibatam mund ni biihang. Ki mwaakadyeby bwa Wallace ni Laurinda, bakaakal mudimw mu Afrik. Mu mbing yisat, woos wa kudyobw ufwiishil mulel. Bwa cihuh cidy cilongek ha bulab butuutul cya COVID-19, baakadyoh bend ni mushind a kuhingobw hanj bwa kwiikal haakaabumw ni bisak byaababw. Wallace ufundil neey: “Kutakamin kwa kusanguk kwa baat ku lufw i kuuyambulwiish bwa kwiibalang, kiin mu mushind a kulangil ha shikacil waakadyobw nend mu mafuk maabab ma bulekel ha bulab, ki nalaalangil habitaatal mafuk maabab ma kuuhal mu bulongolody buhyaabuhy. Kutakamin ook kubuubutamij micim yaam hanalwaal diivit ni kaakunying eecy kwiit kwaam kwa micim bwa munady mujimbaj.”

13. I biny bitudy mwa kulong bwa kuhet spirit mujilang?

¹³ ‘Kanunyang bend mudimw ukakalobw kudy spirit mujilang.’ (1 Tes. 5:19) Pool i mufwanyikij spirit mujilangan ni mudil udy mund mwiitut. Hatudy ni spirit a Mawej, tudy ni cisumy ni musangeel bwa kulong myand yilengel ni tudy ni diikand bwa kukadil Yehow mudimw. (Rom 12:11) I biny bitudy mwa kulong bwa kuhet spirit mujilang? Tudy mwa kusambil bwa kumuhet, kulong Diiy dya Mawej difundish ku dyambulwiish dya spirit mujilang, haakaabumw ni bulongolody bwindiy budy bulombol ku dyambulwiish dya spirit mujilang. Kulong nook kwiiyiiy kwiitwambulwiish bwa kwiikal ni “diimum dya spirit.”—Kal. 5:22, 23, NWT.

14. I biny bitudy mwa kulek kulong bwiitut kutungunuk ni kuhet spirit a Mawej? (Tal cikwaabw cifwaatul.)

¹⁴ Hady Mawej wiitwaakish spirit indiy mujilang, bikaam twiikal badimuk bwa “katunyangoh bend mudimw ukakalobw kudy spirit mujilang.” Mawej utwaatwaal spirit indiy mujilang teng kudy baat bady meej malengel ni bady ni bilong bilongel. Kakutungunukoh bend ni kwiitwaakish spirit indiy tut tutungunuk ni kulangil ha myand yibiih ni twiiyilong. (1 Tes. 4:7, 8) Bwiitut kuhet spirit mujilang, bikaam tulek cikwaabw ‘kudingulul maay maleebelobw kudy baprofet.” (1 Tes. 5:20) “May maleebelobw kudy baprofet” mu verseh oow, umvumvwiij misah ya Yehow yidyey wiitwaakish ku dyambulwiish dya spirit indiy, mudy cikwaabw misah yikwaabw yitaatal diifuk dya Yehow ni myand yitudy mwa kulong lwang-lwang mu mafuk miitut aam. Katwiin mwa kulangoh bend neey diifuk dya Yehow, eecy Harmakedon kiin wiiy kukumban mu mafuk matucidy ni buumy ha bulab aah. Hamut a kulang nook, tudy batakamin neey diifuk aady diiyiiy kwiiy mu kalung kakeeh oomw, eecy twiidilaalam mu meej hakutungunuk ni kwiikal ni bivul bya kulong ni diifuk dyoos ‘kushikat bu baat bajilang bimweek ney tudy balamat Mawej.’—2 Py. 3:11, 12.

“TEETAAY BWA KUJINGUNUN MYAND YOOS”

15. Bilondeshel 1 Biin Tesalonik 5:21, i mushind kaay udyobw kabay mwa kwiidingomw ni myand ya makos kudy baat ni ku makos ma bademoh?

¹⁵ Kuuhal ook, balwiish ba Mawej biiyiiy kuleeb mu mushind kaahand neey: “Tudy bashikat talal, bavulaminok!” (1 Tes. 5:3) May ma bukoy maleeb kudy bademoh miiyiiy kumwangalal bikasakan ha bulab, ni may ma makos aam miiyiiy kuhambwiish baat bavul menmen. (Yis. 16:13, 14) Ki tut naabw? Kabakwiitudingomw tut ‘bateet bwa kukontonon [eecy, “kuteet bwa kujingunun”] myand yoos.” (Bal 1 Biin Tesalonik 5:21) Mwaak a ciin Krek udyobw baalabul neey “teetaay kujingunun” baakady bakal nend mudimw mu dyumvungan ni mushind waakady baat bateet byaamw bu mudy or ni Arjah bwa kujaadik neey i biby menmen. Nook, bikaam twiikal tuteet bwa kujingunun myand yitumvumvw eecy yitubaabal bwiitut kujaadik neey i yiy menmen. Ki bwaal bwa buseeb bwaakady naabw biin Tesalonik, ni biiyiiy kwiikal cikwaabw bya buseeb menmen bwiitut mu mudy ciisang cya mal miimiin ciikal cyend ni kufweej. Hamut a kwiitaboh bituh bidy baat bakwaabw baleeb, bikaam tukal mudimw ni meej miitut bwa kufwanyikij myand yitubaabal eecy yitumvumvw ni cileeleeb Bibl ni cileeleeb bulongolody bwa Yehow. Tut balong nook, kabakwiitudingom bend ni makos ma kudy bademoh.—Tus. 14:15; 1 Tim. 4:1.

16. I kutakamin kwa biin-biin kaay kutudy naak, ni tudy biiswiik bwa kulong biny?

¹⁶ Tudy bamanyik neey, biin mudimw ba Mawej biiyiiy kuhanduk mu ciisang cya mal miimiin. Nook, muut woos wa kutudy kiin mumanyik ciikal ciikal mwa kumufikil muucyaaw. (Jak 4:14) Cikwaabw, ning tut bashaal ni buumy mu ciisang cya diikeng ditam eecy tut bafw kuuhal kwa ciisang aacy, Mawej wiiyiiy wiituh bulang bwiitut mkwiikal ni buumy bwa mwendelel tut bashaal ni lulamat. Bashing diisaby biiyiiy kwiikal ni Krist mu diiwul. Mikook yikwaabw yiiyiiy kwiikal mu Paradiiz ha bulab. Bikaam tutum boos meej miitut ku kutakamin kwiitut kulengel kutudy naak ni twiikal bihang bwa diifuk dya Yehow!