Kwaakishangan biit kutwaatwaal musangal

1-2. Bwaabiny Yehow waakady mwiitufuk bwa twiikal tumvw musangal hatwaakaakish bakwaabw biit?

HAAKADY Yehow muhang baat, waakady mwiibahang bwa biikal bumvw musangal hadyobw baakishangan biit kuhitok hadyobw biibaakish. (Yil. 20:35) Biineeby byumvumvwiijok ney katwiish tumvw musangal hadyobw biitwaakish ciit eeny? Waakweeh. Tut boos tudyaakal tumvw musangal hadyobw biitwaakish cya bukish. Ki tudyaakal tumvw musangal muvul menmen hatwaakaakishangan biit. Biin-biin, i bwa dyaakatook diitut hady Yehow mwiituhang mushind oow. Bwaabiny?

² Bu mudy Yehow mwiituhang mu mushind oow, tudy mwa kuvudij musangal iitut tut kaayeet. Tudy mwa kuvudij musangal iitut ha kukaam mishind ya kwaakishangan biit. Biloolong musangal bwa mudy Yehow mwiituhang mushind oow.—Mis. 139:14.

3. Bwaabiny tudy mwa kubiikan Yehow ney “Mawej a musangal”?

³ Bibl wiitujaajaadikil ney kwaakishangan biit kutwaatwaal musangal, nook, kabiish biitukemesh hady Bibl ubiikan Yehow ney “Mawej a musangal.” (1 Tim. 1:11, NWT) I yiy mwaakishangan a biit a kuuhal, ni kakwiish muut ning umw waakaakishangan biit kuhitok Yehow. Pool uleebel ney: “tudy ni buumy, twend ni diikand, tudyok,” bwa bwaal bwindiy. (Yil. 17:28) Biin-biin, “Bukish boosolol bwa mulow, ni kuh koosolol kulengel,” byaalaalukil kudy Yehow.—Jak 1:17.

4. I biny biikal mwa kwiitwambulwiish bwiitut kumvw musangal muvul?

⁴ Tut boos tudyaakal bakat misang yikwaabw kuhet musangal waalaalukil ku kwaakishangan biit. Tudy mwa kulong nook ha kwiidikij Yehow mwaakishangan a biit. (Ef. 5:1) Mu ciin-bwaal eecy, twiiyiiy kulong cileejel cindiy cilengel cya kwaakishangan kwa biit, ni twiiyiiy kutal cikwaabw citudy mwa kulong tut batal ney baat kabiish baleej kwaan bwa myand yitwiibaloolongel. Myand eey yiiyiiy kwiitwambulwiish bwiitut kulam ni kuvudij musangal iitut a kwaakishangan biit.

IIKAL WAAKISHANGAN BIIT BU YEHOW

5. I biit kaay bidy Yehow wiitwaakish?

⁵ I biit kaay bidy Yehow wiitwaakish ni musangal? Twangat bileejel bikeeh. Yehow wiitwaakaakish biit bitukaakaam. Ning mutudy katuy teng ni biit bya makut mavul, Yehow wiitwaakaakish bitukaakaam. Cileejel, wiitwambambulwiish bwiitut kuhet byaakudy, bizang, ni cyaab cya kushikacil. (Mis. 4:8; Mat. 6:31-33; 1 Tim. 6:6-8) Yehow kiish wiitwaakish biit eeby bwaal ney bikaam iitwaakisheby. Ki, bwaabiny wiitwaakaakisheby?

6. I biny bituloolongel ku Matewus 6:25, 26?

⁶ Mu kuleeb kulengel, Yehow wiitwaakaakish biit eeby bwaal imwiitukat. Tukontononaay may ma Yeez mady mu Matewus 6:25, 26. (Bal.) Yeez ukadil mudimw ni bileejel bya biit bidy Mawej muhang. Haakadyey wiisamb bwa toony uleebel ney: “Katwiish tukun, katwiish twaanun, katwiish ning tukongakeeny byaanaanunobw ha tutund.” Ki talaak ciiyiley kuleeb: “Taat iinun udy mu diiwul wiitudiidiish.” Nook, Yeez ujoojel ney: “Nun kanwiish ni buseeb buvul bwiituhitok eeny?” Bwaal oobw bwiituloolongweesh biny? Biin mudimw ba Yehow bady ni buseeb buvul ku mees kwindiy kuhitok nyam. Bu mudyeby ney Yehow waakaakish nyam bikaakaamey, twiikal batwiishiibw ney wiiyiiy kwiitwaakish byeet bitukaakaam! Teng bu mudy taat ukumbajil biin mu cisak cindiy bikaakaamobw bwa lukat, ki mudy Yehow wiitwaakish byeet bitukaakaam.—Mis. 145:16; Mat. 6:32.

7. I umw mushind kaay utudy mwa kwiidikij kwaakishangan biit kwa Yehow? (Tal cikwaabw cifwaatul.)

⁷ Teng bu Yehow, tudy mwa kwaakish bakwaabw biit bikaakaamobw bwaal tudy biibakat. Cileejel, udy mumanyikok mwiin-kweet mwaan-mulum eecy mwaan-mukaj ukaakaam byaakudy eecy bizang eeny? Yehow udy mwa kukal neeb mudimw bwa kumwambulwiish. Ibamanyik baat ba Yehow bikasakan bwa mudyaakalobw baakishangan biit hady cihuh cilongek. Cileejel, mu cihuh cya KOVID-19, biin-kweet baan-balum ni baan-bakaj batwaadil byaakudy, bizang, ni biit bikwaabw bwa kwambulwiish baakady naaby diikeng. Baat bakwaabw bavul batwaadil bya bukish bwa kut mudimw iitut a ha bulab butuutul nyam ku mikon. Biineeby byambulwiishil bwiitut kwambulwiish biin-kweet ba ha bulab butuutul baakady mu diikeng bwa cihuh eecy. Bakookooyel ni mucim aakaabumw ku may mady mu Biin Ebreh 13:16 uleeleeb ney: “Kanulong nwaavulaminok bwa kulong myand yilengel ni kukwanjanganok, bwaal i milambw ya bwiin nook yileelengeleel Mawej.”

8. Bilondeshel Biin Filipw 2:13, i mushind kaay udy bukash budy Yehow wiitwaakish bwiitwambulwiish?

⁸ Yehow wiitwaakaakish bukash. Yehow waakaakish bahambidil bindiy ba lulamat bukash bwindiy bukiish ni bulekel ni musangal. (Bal Biin Filipw 2:13.) Kudyaakal mwanj kulomboh bukash bwa kutaatameen diiteet eecy lutat eeny? Misang yikwaabw, udy mwa kwiikal ukaady muman kusambiloh bwa kuhet diikand dya kulong naady myand ya ku diifuk. Biby biikal ney baakady baalabul diisambil diwaakady mulong aady, wiitaatab byeeb may maabwiin maleebel Pool ma ney: “Mu myand yoos, nady ni diikand kuhicil kudy oow wuuyaakaakish bukash.”—Fili. 4:13, NWT

9. I mu mishind kaay mutudy mwa kwiidikij Yehow ha kukal mudimw ni diikand diitut bwa kwambulwiish bakwaabw? (Tal cikwaabw cifwaatul.)

⁹ Ning mutudy baat bakiish bawaakan, tudy mwa kukal mudimw ni diikand diitut bwa kwambulwiish bakwaabw. Biin-biin, katwiish mwa kwaakish baat bakwaabw bukash bwiitut eecy diikand diitut. Ki tudy mwa kukal mudimw ni diikand eedy bwa kwiibambulwiish. Cileejel, tudy mwa kwambulwiish biin-kweet bakaady bakuluuh eecy babeebeel ha kwiibalongolweel mu nzubw eecy kukiibalandil biit mu cisal. Tut biikal ni makand ma nyeet, tudy mwa kushaal biin bukish bwa kwambulwiish mu kulongolol ni kwiiteel kwa Nzubw a Bukaleng. Tut bakal mudimw ni bukash bwiitut bwa kulong myand eey, tudy mwa kwambulwiish biin-kweet bikasakan.

10. I mushind kaay utudy mwa kukashish bakwaabw ni bituleeleeb?

¹⁰ Kuvulaminoh bend ney udy mwa kukashish bakwaabw ni may miibuh. Udy muvulukok muut uwudy mwa kukashish ha kumwambil ney wanyanyish bidyey ulong eeny? Udy mumanyikok muut ukaakaam bwa kumukashishobw ku micim eeny? Biby biikal naak, kwiish mwa kulongok bwa muut oow atal ney umutaatacil eeny? Udy mwa kuy kamutal ku cibel, kumubiikan ku telefon, kumutumin meesaaj eecy kumufundil mukand. Kulong wiitacishoh bend bikasakan bwa biwiikal mwa kuleeb. May makeeh mateeteng ku micim, mady mwa kwiikal bwaal budy mwiin Krist neeb aaw ukaam bwa kushaaley ni lulamat diifuk dikwaabw ni kwiiyumvwey bilengel.—Tus. 12:25; Ef. 4:29.

11. I mushind kaay udy Yehow waakish bakwaabw meej mindiy?

¹¹ Yehow waakaakishangan meej. Mwiiyij Jak ufundil ney: “Biikal muut mukacy mwiinun mubul meej ma buumuut, alomb Mawej, wiiyiiy kumwaakishem, bwaal Mawej waakaakish baat boos ni mucim mutook kay utal myand yibiih ya muut.” (Jak 1:5.) May aam maleeleej ney, Yehow kiish mwiilamin meej mindiy teng kaayend. Waakaakishoh bakwaabw ni mucim mutook. Jak uleeleeb cikwaabw ney hady Yehow waakishangan meej, “kiish utal myand yibiih ya muut.” Kiish ukaam bwiitut kwiiyumvw bibiih hatukaakaam bwa kwiitulomboley. Ki wiituloolomb bwiitut kwiikal kulong nook misang yoos.—Tus. 2:1-6.

12. I mishind kaay yitudy naay ya kulongweesh bakwaabw myand yitudy bamanyik?

¹² Tudy mwa kuleeb bicy bwiitut? Tudy mwa kwiidikijok byeet mushind udy Yehow waakishangan meej eeny? (Mis. 32:8) Baat ba Yehow bady ni mishind yivul ya kulongweesh bakwaabw myand yidyobw bamanyik. Cileejel, tuloolongweesh biin-kweet bahyaabahy mwa kudiil baat musah. Bakul bambambulwiish bakwanjok ba mudimw ni biin-kweet baan-balum bakaady bahet baatiisumw bwa kukumbajobw midimw yaababw mu cisumbw ni lutuul loos. Biin-kweet baan-balum ni baan-bakaj bady bamanyik midimw ya kwiibak ni kulongolol mazubw, bambambulwiish biin-kweet bady kabay bamanyik mudimw oow mwa kwiibakobw Mazubw ma myand ya Mawej.

13. I mushind kaay utudy mwa kwiidikij mushind udy Yehow waakishangan meej?

¹³ Iikashishomw bwa kwiidikij mushind udy Yehow waakishangan meej hawuloolongweesh bakwaabw. Vuluk ney, Yehow waakaakishangan meej ni mucim mutook. Tut byeet tudy bakat kulongweesh aab baciloolong myand yitudy bamanyik ni mucim mutook. Katwiish mwa kulek kulongweesh bakwaabw myand yoos tuciin ney muut utuloolongweesh aaw udy mwa kwiiy kuhing ha cyaab ciitut. Katwiish ni lungeny lwa ney: ‘Bu mudyobw kabay biitulongweesh, tut byeet katwiish mwa kulongweesh bakwaabw!’ Baat ba Yehow kabiish ni meej ma nook. Ki tuloolong cyoos citudy mwa kulong ni twambil muut utuloolongweesh aaw myand yoos ni musangal. (1 Tes. 2:8) Tudy batakamin ney, “bady mwa kulongweesh byaabw baat bakwaabw.” (2 Tim. 2:1, 2) Tut biikal tulongweeshangan ni musangal, twiikaakal tut boos ni meej ni musangal.

HADY BAAT BATWAAKAAKISH BIIT KABAY BAAN

14. I biny bidy baat bavul balong hatwiibaakaakish biit?

¹⁴ Hatwaakaakishangan biit, amanaaman hatwaakaakish biin-kweet, badyaakal biitufwiijok. Bady mwa kwiitutumin kamukand kady ni may ma kwiitufwiijok naam eecy bady mwa kwiituleej mudyobw ni dyaanyish mu mushind mukwaabw. (Kol. 3:15) Hatuheehet may maleeleej mudyobw baan aam, biitusaasak bwa twiikal ni musangal muvul.

15. I biny bitudy ni bwa kuvuluk diib didy baat bakwaabw kabay baleej kwaan?

¹⁵ Ki misang yikwaabw, baat bakwaabw kabadyaakal teng baleej kwaan bwa myand yitwiibaloolongel. Cileejel, bakwaabw kabadyaakal balangiloh bend ha diib, ha bukash, ni biit biitut bitudy biibaakish. Iikaleby naak, i mushind kaay utudy mwa kutungunuk ni kwiikal teng ni musangal? Vuluk may mady mu verseh mutam wa ciin-bwaal cituloolong mady mu Myand yilongel Bapostol 20:35. Musangal iitut kiish waalukil teng ku mushind udy baat baan bwa biit bitwiibaakaakish. Tudy mwa kutungunuk ni kwiikal ni musangal a kwaakishangan biit ning baat bakwaabw kabay ni dyaanyish. I biny bidy mwa kwiitwambulwiish? Tukontononaay yimw mishind.

16. I biny bidy mwa kwiitwambulwiish bwiitut kutungunuk ni kutwaal ni musangal?

¹⁶ Iidikij Yehow ha kwaakish bakwaabw biit. Waakaakish baleeleej kwaan biit, ni bady kabay baleej kwaan. (Mat. 5:43-48) Yehow ulaalay cikwaabw ney, diib ditwaakaakishangan biit ‘katuy tutakamin bwa kwiituhingijilobw,’ twiiyiiy “kuhet bulang butam.” (Luuk 6:35) ‘Ciit cidyobw mwa kwiituhingijilobw’ cidy mwa kwiikal kwaan kudyobw biituleej. Ning baat biitufwiijok eecy kabay balong naak, tuvuluk ney Yehow wiiyiiy kwiitufut bwa myand yilengel yituloolong ni ‘kutwaal bu mutudy balongolol.’—Tus. 19:17; 2 Kor. 9:7.

17. Bilondeshel Luuk 14:12-14, i kabingil kaay katam kiitusaasak bwa kwambulwiish bakwaabw?

¹⁷ Bwaal bukwaabw butudy mwa kulong bwa kulond mu diikas dya Yehow hatwaakaakish bakwaabw biit, i kulond diiy dya Yeez didy mu Luuk 14:12-14. (Bal.) Kabiishoh bend bibiih bwa kwaakish baat biit bady ni mushind a kwiitwaakishoh byeet biit. Ki, i biny bitudy mwa kulong biby biikal ney twaakaakish teng bakwaabw biit ni batakamin ney biiyiiy kwiitwaakish byeet? Twiiyiiy kulong bilengel tut balond cidy Yeez muleeb. Tudy mwa kwaak muut ning yiy mwiikal kay ni mushind a kwiitwaak byeet. Tut balong nook, twiiyiiy kwiikal ni musangal bwaal kulong nook i kulond mu diikas dya Yehow. Kwiikal ni meej ma nook kwiiyiiy kwiitwambulwiish bwiitut kwiikal teng ni musangal diib didy bakwaabw kabay baleej kwaan bwa myand yitwiibaloolongel.

18. I biny bidy mwa kwiitwambulwiish bwiitut kwiikal ni lutuul ni bakwaabw?

¹⁸ Lek kulang bibiih bwa bakwaabw. (1 Kor. 13:7) Biby biikal ney baat bakwaabw kabiin baleej kwaan, tudy mwa kwiiyiihanguj ney: ‘I baat bakiish baleej kwaan biin-biin, eecy i bavulamin bituh bwa kulejobw mudyobw ni kwaan eeny?’ Misang yikwaabw kudy mwa kwiikal tubingil tudy mwa kwiikal tulong bwa balek kulong myand mu mushind utudy mwa kwiikal batakamin. Bakwaabw bady mwa kwiikal ni kwaan kuvul mu micim ki biikal ni lutat lwa kuleej kwaan kwaababw hatook. Bady mwa kwiikal biiyumvw kabay ni buseeb bwa dyambulwiish didyobw bahet, nang-nang biby biikal ney i bab baakady bambulwiish bakwaabw. Ki, tut biikal ni lukat bwa biin-kweet biin Krist, katwaakulangoh bend bibiih bwaababw, ni twiiyiiy kutungunuk ni kwiibah biit ni musangal.—Ef. 4:2.

19-20. I biny bidy mwa kwiitwambulwiish bwiitut kwiikal ni musangal hatwaakakish bakwaabw biit? (Tal cikwaabw cifwaatul.)

¹⁹ Kutakaminoh bend bwa baat bakwaabw baleej kwaan teng musang umw. Habitaatal kwaakishangan biit, Mukaleng a meej Salomon ufundil ney: “Umb mukat iibuh ha mwanz, bwaal wiiyiiy kumuhet mafuk kuuhal.” (Mul. 11:1, NWT) May aam miituloolongweesh ney, misang yikwaabw baat bady mwa kwiiy kuleej kwaan teng “kuunyim kwa mafuk mavul.” Bwaal oobw bwaakady bufikil mwiin-kweet mwaan-mukaj mukwaabw.

²⁰ Kukaady mivw yivul, mukaj a mulombol a cijeng mukwaabw utumiin mwiin-kweet mwaan-mukaj muhyaamuhy ucyaakady uheteloh batiisumw mukand umukashish bwa kutungunukey ni kushaal ni lulamat kudy Yehow. Kuman kuhit mivw mwandamukul, mwiin-kweet mwaan mukaj aaw umwaalabwiil mukand indiy uleeb ney: “Niinwambambil ney nudy baayambulwiish bikasakan mivw yishaal eey mu mushind unudy kanuy bamanyik.” Uleeleeb cikwaabw ney: “[Mukand iibuh] waakady muusangej bikasakan, ki mwaakady verseh uutengel ku micim, ni ciishoh bend mwa kumuvulamin ning bicy.”a Kuunyim kwa yiy muman kumumvwiij makab maheteley, mwiin-kweet oow uleebel ney: “Misang yikwaabw naakady nakaam kulek myand yoos ni kulek buutemw. Ki naakady teng navuluk verseh uwaakady muufundil ni waakady uyaakish diikand dya kushaal ni lulamat.” Uleeleeb cikwaabw ney: “Mu mivw mwandamukul eey, kakwiishoh bend ciit ning cyaakaabumw cidy ciikashish bikasakan bu mukand ni verseh biwaakady muufundil.” Lang ket bwa musangal waakady mukaj a mulombol a cijeng mumvw aheteley mukand “kuunyim kwa mafuk mavul!” Tut byeet bady mwa kwiituleej kwaan bwa bwaal bulengel butudy balongel muut kuunyim kwa mafuk mavul.

21. Bwaabiny udy mwiiswiik bwa kutungunuk ni kwiidikij Yehow mwaakishangan a biit?

²¹ Teng mutubaman kuleeb, Yehow wiituhangil ni ciheel cya habwaah. Yehow wiituhangil bwiitut kwiikal ni musangal hatwaakaakishangan biit kuhitok hadyobw biitwaakish. Twiiyumvumvw bilengel hatwambambulwiish biin-kweet baan-balum ni baan-bakaj. Tudy ni musangal hadyobw baleej kwaan. Ning utudy baakish muleej kwaan eecy kay muleej kwaan, tudy mwa kwiikal ni musangal bwaal tudy balong bwaal bulengel. Ning uw mwaakishangan biny, kuvulaminoh bend ney, ‘Mawej udy mwa kukuh bikwaabw bivul bihitok ni biinaaby.’ (2 Cif. 25:9) Nook Yehow wiiyiiy kukufut teng bivul! Ni hady Yehow wiitufut, witufuufut diifut dilengel menmen. Twiikalaay biiswiik bwa kutungunuk ni kwiidikij Taat iitut a mu diiwul waakaakishangan biit.