CIIN BWAAL CYA KULONG CYA 43
MUSAMBW A 90 Tukoleshangane
Cidy mwa kwiitwambulwiish bwiitut kulek kweelakan
“Teetaay bwa kujingunun myand yoos.”—1 TES. 5:21.
BWAAL BUTAM
Ciwudy mwa kulong uw mwiikal weelakan ney Yehow ukutaatabaleel, eecy uw mwiikal weelakan bwa mahangadik mawangacil bwa kumukadil mudimw.
1-2. a) I majooj kaay mady bamw biin mudimw ba Yehow mwa kwiiyiihanguj? b) I biny bitwiikal mwa kukontonon mu ciin-bwaal eecy?
BIDY mwa kwiitufikil tut boos bwa kutang kweelakan.a Cileejel, kajaady mwaan mutofw wiiyiihaahanguj ning Yehow umutaatabaleel biin-biin. Udy mwa kutang kweelakan bwa kuhetey baatiisumw. Eecy lang ket bwa taat waakady musungul kacy ku bwaan bwindiy bwa kuteek myand ya Mawej ha cyaab cyaakuuhal hamut a kulongey midimw mu bulongolody oobw. Ki kaabaak ukaady mukuluuh ni kiish ni mushind a kukumbajil biin mu cisak cindiy bikaakaamobw, udy mwa kweelakan ney kaakady mwangat diihangadik dilengel. Eecy lang bwa mwiin-kweet mwaan-mukaj ukaady mukuluuh kaciy ni makand ma nyeet. Udy mwa kwiiyumvw mukooyel mu mabok bwaal kaciish ni mushind a kulong myand yaakadyey ulong kuuhal. Ukaady wiiyiihangujok ney: ‘Yehow udyaakal uutabaleelok eeny? Midimw yinaloolongel Yehow yidy ni buseeb eeny? Nacidy ni buseeb ku mees kwa Yehow eeny?’
2 Tut balek kuhet maalabul ku majooj ma nook, bidy mwa kukooyesh diitabij diitut ni tut kulek kuhambidil Yehow. Mu ciin-bwaal eecy, twiiyiiy kukontonon mudy may matam ma mu Bibl mwa kwiitwambulwiish tut tweelakan ney 1) Yehow kiish wiitutabaleel, 2) mahangadik matwaakady bangat kamiish malengel, eecy ney, 3) katwiish ni buseeb ku mees kwa Yehow.
CIDY MWA KUKWAMBULWIISH UW MWIIKAL WEELAKAN
3. I umw mushind kaay utudy mwa kulek kweelakan?
3 Umw mushind utudy mwa kulek kweelakan i wa kukaam maalabul ma majooj matudy naam mu Diiy dya Mawej. Tut balong nook, diitabij diitut kudy Yehow ni bulund bwiitut nend biiyiiy kukasakan, ni twiiyiiy kwiikal bakumban bwa ‘kukasakan mu diitabij.’—1 Kor. 16:13.
4. Bilondeshel 1 Biin Tesalonik 5:21, i mushind kaay utudy mwa “kujingunun myand yoos?”
4 Bal 1 Biin Tesalonik 5:21. Manyik ney Bibl wiitukaakashish bwa “kujingunun myand yoos.” I mushind kaay utudy mwa kulong nook? Bwiitut kutwiishiibw ney myand yitudy biitabij i ya biin-biin, bikaam twiiyifwaanyikij ni cidy Bibl uleeb. Cileejel, lang bwa sand udy kay mutwiishiibw ney Yehow umutaatabaleel biin-biin. Udy mwa kwiitab bituh ney bwaal oobw i bwa biin-biin eeny? Waakweeh, bikaam “ajingunun myand yoos” ha kulong Bibl bwa kumanyik mushind udy Yehow umutal.
5. I mushind kaay utudy mwa kuhet maalabul ma majooj miitut kudy Yehow?
5 Hatubaabal Bibl, bidy teng bu ney Yehow wiisaasamb neet. Ki bwiitut kumanyik cidy Yehow ulang ha bwaal busunguluk, bikaam twiikashishomw. Bikaam tukaam verseh yiheehetangan ni bwaal butudy naabw. Bwiitut kulong nook, tudy mwa kukaamunun myand habitaatal bwaal oobw mu mikand yiitut. (Tus. 2:3-6) Tudy mwa kusambil Yehow bwa kwiitwambulwiishey bwiitut kuhet maalabul ma majooj miitut. Ni tudy mwa kukaam may matam ma mu Bibl ni myand yikwaabw biheehetangan ni bwaal butudy naabw. Tudy mwa kubal cikwaabw miisamb ya mu Bibl ya biin mudimw ba lulamat baakady bahet myand ya mwaamumw eey.
6. I mushind kaay udy bisangil biitwambulwiish bwiitut kulek kweelakan?
6 Tumvumvw cikwaabw mudy Yehow wiisamb neet mu bisangil biitut. Tut biikal tutweel mu bisangil ha cimbidil, tudy mwa kumvw bwaal kaahand mu mwiisamb eecy mu dyaalabul dya mwiin-kweet budy mwa kwiitwambulwiish bwiitut kulek kweelakan. (Tus. 27:17) Tutalaay cidy mwa kwiitwambulwiish bwiitut kulek kweelakan mu myand kaahand yisunguluk.
CIWUDY MWA KULONG UW MUTAL NEY YEHOW KIISH UKUTABALEEL
7. I diijooj kaay didy bamw mwa kwiiyiihanguj?
7 Ukaady muman kwiiyiihangujok ney, ‘Yehow uutaatabaleelok biin-biin eeny?’ Uw mwiikal kuy wiiyumvw ni buseeb, udy mwa kulang ney i bikasakan bwiibuh kwiikal mulund nend a cyaakahang a biit byoos. Mukaleng Davih wiiyumvwiil byend mushind oow. Ukemen bwa kumanyik ney Yehow udyaakal utabaleel baat ni wiihangujil ney: “A Mawej [Yehow], muut naabw i ngany bwiibuh kwiikal umutal? Muut wa nyeet naabw i ngany, bwiibuh kwiikal umulangil meej?” (Mis. 144:3) I kweeh kuwudy mwa kuhetel maalabul ma majooj aam?
8. Bilondeshel 1 Samweel 16:6, 7, 10-12, i biny bidy Yehow utal kudy baat?
8 Tuloolong mu Bibl ney, Yehow utaatabaleel baat bamweemweek kabay ni buseeb ku mees kwa bakwaabw. Cileejel, Yehow utumin Samweel kwa Jeseh bwa kuy kashingey umw wa ku baan bindiy diisaby bwa kushaaley mukaleng a Izaleel. Jeseh ubiikeen baan bindiy baan-balum cisambwiibidy mu baan muwand, ki Davih ucyaakady mwan mutofw menmen, kaakadyoh.b Ki Davih naabw i yiy waakady Yehow musungul. (Bal 1 Samweel 16:6, 7, 10-12.) Yehow utadil cyaakady mund mwa Davih. Waakady mumanyik ney mwaan oow waakady mumukat bikasakan.
9. Bwaabiny bikaam wiikal mutwiishiibw ney Yehow udyaakal ukutabaleel? (Tal cikwaabw cifwaatul.)
9 Langil ha myand yikaady Yehow mukulongel yikujaajaadikil ney ukutaatabaleel. Ukwaakaakish mibel yilengel yiheehetangan ni shikacil iibuh. (Mis. 32:8) I mushind kaay udyey mwa kulong nook yiy mwiikal kay mukumanyik bilengel ang? (Mis. 139:1) Hawukookooyel ku mubel a Yehow ni utal mudyey ukwambulwiish, wiiyiiy kwiikal mutwiishiibw ney Yehow ukutaatabaleel. (1 Cif. 28:9; Yil. 17:26, 27) Yehow i mutal byoos biwuloolong. Yehow i mutal biikadil bilengel biwudy naaby ni ukaakaam bwa kwiikal mulund neeb. (Jer. 17:10) Wiikaakal ni musangal uw mwiitab byeeb bwiibuh kushaal mulund nend.—1 Jah 4:19.
“Awiikal umukaam [Yehow], wiiyiiy kumuhet.”—1 Cif. 28:9 (Tal cikos cya 9)c
CIWUDY MWA KULONG UW WEELAKAN NEY MAHANGADIK MAWANGACIL MAAKADY MALENGEL
10. Hatulaalangil ha mahangadik matwaakady bangat, i majooj kaay matudy mwa kwiiyiihanguj?
10 Misang yikwaabw, bamw bady mwa kulangil ha mahangadik mangacilobw kal ni biiyiihanguj ning maakady mahangadik ma meej. Misang yikwaabw bangacil diihangadik dya kulek kulong midimw ya fwalang, bwa kukadilobw Yehow mudimw bikasakan. Ki kuunyim kwa mafuk bady mwa kutal baat bakwaabw bangacil mahangadik mashiilangan ni maababw biikal kaabaak ni fwalang ni shikacil mulengel. Nook, bady mwa kwiiyiihanguj ney: ‘Mahangadik manangacil bwa kukadil Yehow mudimw maakady malengel eeny? Eecy maakady maakaakeesh bwa mim kukal mudimw mukasakan ni kwiikal ni fwalang yivul leeloow?’
11. I biny byaakady bikooyesh mufund a Musambw a 73 mu mabok?
11 Biby biikal ney wiijoojooj byeeb nook, kontonon mwaakady mufund a Musambw a 73 mwiiyumvw. Utadil baat baakady kabay bakadil Yehow mudimw bu biikal ni makand ma nyeet, biikal ni fwalang ni bu kabay ni myand yidy yiibatond. (Mis. 73:3-5, 12) Haakadyey wiibatal bamweek bu biikal ni musangal, ulangil ney byoos byaakadyey ulong bwa kukadil Yehow mudimw, kabyaakady ni buseeb. Waakady ‘ukab diifuk dyoos’ ni meej maakady mamukooyesh mu mabok aam. (Mis. 73:13, 14) I biny bilongeley ni meej maakadyey ulang aam?
12. Bilondeshel Misambw 73:16-18, i biny byambulwiishil mufund a misambw bwa kulekey meej mabiih maakadyey naam?
12 Bal Misambw 73:16-18. Mumb a misambw utweelel mu nzubw a Mawej. Ha cyaab aacy mukacy mwa bahambidil ba Mawej, waakady mwa kulang meej bilengel. Umanyikil ney, ning mwaakady shikacil ya bakwaabw yimweek bu yiheehel, kabaakadyoh bend ni kutakamin mu mafuk macyaakady miiy. Muman kumanyik nook, uhetel diitalal dya mu lungeny, mumanyik ney kuteek myand ya mu spirit ha cyaab cyaakuuhal, dyaakady diihangadik dilengel menmen. Nook, wiiswiikil bikasakan bwa kutungunuk ni kukadil Yehow mudimw.—Mis. 73:23-28.
13. I biny biwudy mwa kulong uw mwiikal unyingalal bwa mahangadik mawangacil kal? (Tal cikwaabw cifwaatul.)
13 Udy mwa kuhet byeeb diitalal dya mu lungeny ku dyambulwiish dya Diiy dya Mawej. Mushind kaay? Langil ha biit bilengel biwudy naaby ni ha mabenesh mawudy muhet, ni vuluk ney baat bakiish bakadil Yehow mudimw kabiish bahet dyambulwiish dindiy. Bwa baat bakiish bakadil Yehow mudimw, kwiikal ni mudimw mulengel ni shikacil mulengel i bubw bwaal budy ni buseeb bwaal kabiish ni ciit cikwaabw cidyobw batakamin. Ki uw, udy ni mabenesh mavul ma mwendelel mady Yehow mukulay mu mafuk maciiyiiy. (Mis. 145:16) Langil cikwaabw ha bwaal oobw: Tudy mwa kumanyikok cyaakady mwa kwiikal shikacil iitut leeloow tut biikal bangat mahangadik makwaabw eeny? Aab bangangat mahangadik mashimatil ha lukat ludyobw bakat Mawej ni baat naab, biiyiiy kuhet teng myand yiikal mwa kwiibasangej mu shikacil aababw.
Langil ha mabenesh miikal Yehow mwa kukwaakish mafuk maciiyiiy (Tal cikos cya 13)d
CIWUDY MWA KULONG UW ULANG NEY KWIISH NI BUSEEB KU MEES KWA YEHOW
14. I shikacil kaay udy bamw biisangan nend, ni i diijooj kaay didyobw mwa kwiiyiihanguj?
14 Bamw biin mudimw ba Yehow kabiish mwa kulong byoos bidyobw bakat kulong mu mudimw a Yehow, bwa bukuluuh, mabenj eecy bulem. Biineeby bidy mwa kwiibafikij kukulang ney kabiish ni buseeb ku mees kwa Yehow. Bady mwa kwiiyiihanguj ney, ‘nacidyok ni buseeb ku mees kwa Yehow eeny?’
15. Mufund a Musambw a 71 waakady mutwiishiibw bwa bwaal kaay?
15 Mufund a Musambw a 71 ulangil byend mushind aakaabumw oow. Usambiil ney: “Kuuyumb bend man hanj, diib diniikal ciciy ni diikand.” (Mis. 71:9, 18) Ki naabw mufund a misambw ushaadil mutwiishiibw ney yiy mwiikal mukadil Mawej mudimw ni lulamat, Yehow waakady mwa kumulombol ni kumwambulwiish. Teng bu mumb a misambw, Yehow usaasangal ni aab baloolong mwaababw moos bwa Kumukadil mudimw ning mudyobw ni mikal.—Mis. 37:23-25.
16. Bilondeshel Misambw 92:12-15, i mu mishind kaay mudy baat bakuluuh biikal ni buseeb ku mees kwa Yehow?
16 Nun baat bakuluuh, iikalaay nutal shikacil iinun mudy Yehow umutal. Udy mwa kwiinwambulwiish bwiinun kuy kuuhal mu myand ya mu Spirit ning nun biikal ni makand ma nyeet miinutacish. (Bal Misambw 92:12-15.) Hamut a kwiimanyin ha myand yiwudy kuy mwa kulong, hiimanyin ha yiwudy mwa kulong. Cileejel, udy mwa kukashish bakwaabw ku cileejel ciibuh cya lulamat, ni mushind uwiibataatabaleel. Udy mwa kwiibambil mudy Yehow mukukwanjok mukacy mwa mivw yivul ni milay ya mu Bibl yiwudy mutakamin. Ni kulong waavulamin ney masambil mawuloolong bwa bakwaabw, mady ni bukash buvul. (1 Py. 3:12) Ning tut biikal ni shikacil wa bicy, tut boos tudy teng ni ciit cya kwaakish Yehow ni baat bakwaabw.
17. Bwaabiny bikaam tweehuk lungeny lwa kwiifwaanyikij ni bakwaabw?
17 Uw wiiyumvw ney kwiish mulong bivul mu mudimw a Yehow, iikal mutwiishiibw ney byoos biwuloolong bidy ni buseeb kudyey. Udy mwa kwiikal ni lungeny lwa kufwaanyikij biwuloolong ni bidy bakwaabw balong. Ki lek lungeny lwa nook! Bwaabiny? Bwaal Yehow kadyaakaloh bend ufwaanyikij myand nook. (Kal. 6:4) Cileejel, Marih ushingil Yeez diisaby dya buseeb buvul. (Jah 12:3-5) Ki mukaj a mu lufwiil umbil tuufwalang tubidy twa buseeb bukeeh ku tempel. (Luuk 21:1-4) Ki hamut a Yeez kufwaanyikij baan-bakaj babidy aab, uleebel ney boos baakady baleej diitabij dyaabab. Bu muwudy mukat Yehow ni mwiitwaal kudyey, iikal mutwiishiibw ney wangangat byoos biwuloolong ni buseeb ning biby biikal bikeeh ku mees kwiibuh.
18. I biny biikal mwa kwiitwambulwiish bwiitut kulek kweelakan? (Tal cikwaabw kazubw ka ney, “Diiy dya Yehow didy mwa kukwambulwiish bwiibuh kuful meej ma kweelakan.”)
18 Tut boos tudyaakal tweelakan misang yikwaabw. Ki Bibl udy mwa kwiitwambulwiish bwiitut kulek kweelakan. Hamut iibuh kwiikal weelakan, long mwiibuh moos bwa kuhet maalabul ku myand yiwudy naay. Yehow i mukumanyik bilengel. Waanyanyish byoos biwuloolong ni i mulongolol bwa kwiiy kukufut. Iikal mutwiishiibw ney, Yehow i mukat ni utaatabaleel biin mudimw bindiy boos ba lulamat.
MUSAMBW A 111 Malu atudi ne bua kusankila
a MWAAK UDYOBW BUMWIIJ: Mu ciin-bwaal eecy, twiiyiiy kwiisambil ha kweelakan kuloolong bwa twiital twiiyumvw katuy ni buseeb ku mees kwa Yehow eecy bwa mahangadik ma meej matudy mwa kwangat. Katwiish tuleeb bwa kweelakan kwa miland yiileeleeb Bibl, yiileeleej kukaakal kwa diitabij kudy Yehow ni mu milay yindiy.
b Davih ucyaakady mwaan mutofw ning mudy Bibl kay wiitujaadikil biin-biin bukol bwaakadyey hakady Yehow mu musungul.—Tal Cimbumb cya Muteetekel cya diifuk dya 1/9/2011 diib. 29 cik. 2 (mu Tshiluba).
c DYUMVWIIJ DYA BIFWAATUL: Temw a Yehow ucidy mwaan mutofw ukaam mibel ya Yehow mu Bibl.
d DYUMVWIIJ DYA CIFWAATUL: Mwiin-kweet mwaan-mulum wend ni kulong mudimw a bikam wa kwiiteelelangan mween bwa kwambulwiish biin mu cisak cindiy, ki meej mindiy iimatum mu Paradiiz wiikal mwa kwiiy.