I biny bidy cya kukuul naacy baat ciitulongweesh?

1. I myand yilengel kaay yituheehet hatutweetweel mu Civulukil cya lufw lwa Yeez muvw woos?

BIIN-BIIN, udy mutwiishiibw ney cya kukuul naacy baat i cya bukish cya buseeb buvul! (2 Kor. 9:15) Udy mwa kudy bulund ni Yehow leel teng bwaal Yeez utwaadil buumy bwindiy bwa bwaal bwa baat, ni udy cikwaabw mwa kutakamin bwa kuhet buumy bwa mwendelel. Tudy ni tubingil tuvul bwa kufwiijok Yehow utwaadil cya kukuul naacy baat bwaal i mwiitukat bikasakan! (Rom 5:8) Bwa kwiitwambulwiish bwiitut kutungunuk ni kuleej dyanyish bwa kuvuluk cyaakady Yehow ni Yeez biitulongel, Yeez wiitutumin diiy bwiitut kwiikal kutweel mu Civulukil cya lufw lwindiy muvw woos.​—Luuk 22:19, 20.

2. I biny bitwiikal mwa kwiisambil mu ciin-bwaal eecy?

² Muvw oow, Civulukil ciiyiiy kulongek mu Diisambombw dya 12/4/2025. Biin-biin, tut boos twendend ni kulongolol myand bwa kutweelomw. Twiiyiiy kuhet myand yivul tut bangat diib mu ciisang cya Civulukil eecy bwa kulangil ha cidy Yehow ni Mwaan indiy biitulongel. Mu ciin-bwaal eecy, twiiyiiy kwiisambil ha cidy cya kukuul naacy baat ciitulongweesh habitaatal Yehow ni Mwaan indiy. Ciin-bwaal ciloolond ciiyiiy kwiitwambulwiish bwiitut kumvw mushind utudy mwa kuhetel myand yilengel ku cya kukuul naacy baat, ni mutudy mwa kuleej dyanyish diitut.

CIDY CYA KUKUUL NAACY BAAT CIITULONGWEESH BWA YEHOW

3. I mushind kaay udy lufw lwa muut aakaabumw mwa kukuuloh baat bavul? (Tal cikwaabw cifwaatul.)

³ Cya kukuul naacy baat ciituloolongweesh ney Yehow i Mawej a buwaakan. (Mmu. 32:4) Mushind kaay? Lang ket: Haakady Adam mukufwabeel Mawej, tuhyaanyin mpeekaat wiitufiifikij ku lufw. (Rom 5:12) Bwa kwiitukuuloh ku mpeekaat ni ku lufw oolw, Yehow ulongololweel bwa Yeez atwaal cya kukuul naacy baat. Ki i mushind kaay waakady mulambw a muut aakaabumw muwaakan mwa kukuuloh baat bavul? Mupostol Pool umvumvwiij ney: “I mwaakadyeby, bwa kulek kwiitab ku diiy kwa muut aakaabumw [Adam] kufikijil baat bavul ku kwiikalobw baamulong a bibiih, i mudy kwiitab kwa ku diiy kwa muut aakaabumw [Yeez] kufikij baat bavul ku kwiikalobw bawaakan kuuhal kwa Mawej.” (Rom 5:19; 1 Tim. 2:6) Mu may makwaabw tudy mwa kuleeb ney, tudy bahyaan mpeekaat ni lufw ku kulek kukooyel kwa muut aakaabumw muwaakan. Nook, kukooyel kwa muut aakaabumw muwaakan kwiitukuukuuloh ku mpeekaat ni ku lufw oolw.

4. Bwaabiny Yehow kiitabiloh bend bwa baan ba Adam baakady bamukooyel kushaalobw ni buumy buyiil?

⁴ Yeez ufwiil biin-biin bwa kwiitukuuleyoh eeny? Bwaabiny Yehow kaakady mwiitab bituh bwa baan ba Adam baakady bamukooyel kushaalobw ni buumy buyiil? Bwa baat bakiish bawaakan, kulong nook i yiy mushind mulengel waakadyey mwa kuman cilumbw eecy. Ki bwa Yehow, kabyaakady bikumban bwa kulong nook. Bwaal byaakady mwa kumweek bu ney Adam kaakadyoh bend mulong mpeekaat mutam ni baan bindiy kabaakady bahyaan byaabw mpeekaat oow.

5. Bwaabiny bikaam twiikal batwiishiibw ney Yehow wiiyiiy kulong teng cidy ciwaakan?

⁵ I biny byaakady mwa kulongek bu Yehow mulek kutwaal cya kukuul naacy baat ki mwiitabil baan ba Adam bwa kushaalobw ni buumy bwa mwendelel ning mwaakadyobw baat bakiish bawaakan? Yiy mwiikal mulong nook, baat baakady mwa kalang misang yikwaabw ney Mawej udy mwa kuvulaminok buwaakan bwindiy mu myand yikwaabw. Cileejel, baat baakady mwa kweelakan ney Yehow kiish wiiy kukumbaj myand yoos yidyey mulay. Ki kabiish bikaam twiikal twiitish mut bwa ciikal mwa kulongek. Bu mwaakady Yehow mulong cidy ciwaakan ning haakadyeby bikasakan ni mutwaal Mwaan indiy waakadyey mukat bikasakan, biitujaajaadikil ney wiiyiiy kulong teng cidy ciwaakan. Nook, twiikal batwiishiibw ney, wiiyiiy kulong teng cidy ciwaakan.

6. I mushind kaay udy cya kukuul naacy baat cileej lukat lwa Yehow? (1 Jah 4:9, 10)

⁶ Cya kukuul naacy baat ciitwambambulwiish bwiitut kumvw ney Yehow i muwaakan, ni ciitwambambulwiish nang-nang bwiitut kumvw bunen bwa lukat lwindiy. (Jah 3:16; bal 1 Jah 4:9, 10.) Diilongweesh dya cya kukuul naacy baat dileeleej ney Yehow kiish ukaam ney tuhet teng buumy bwa mwendelel bituh, ki ukaakaam cikwaabw bwiitut kwiikal biin mu cisak cindiy. Lang ket: Haakady Adam mulong mpeekaat, Yehow umwiihacil mu cisak cya bahambidil bindiy. Nook, tut boos i biitulelel hanj ha cisak cya Mawej. Ki kuhicil ku cya kukuul naacy baat, Yehow wiitufwiifwiilok lus bwa mpeekaat yiitut, ni wiiyiiy bulekel bwa byoos kutweej baat boos bady ni diitabij ni bamukookooyel mu cisak cindiy. Ning kaabaak, tudy mwa kudy bulund bulengel ni Yehow ni biin Krist neet. Biin-biin, Yehow i mwiitukat bikasakan!​—Rom 5:10, 11.

7. I mushind kaay udy makab ma Yeez miitwambulwiish bwiitut kumvw mudy Yehow mwiitukat bikasakan?

⁷ Tudy mwa kumvw mushind udy Yehow mwiitukat bikasakan menmen tut balangil ha mushind waakadyeby bimwiit ku micim haakadyey mutal Mwaan indiy ukab. Sataan ulaalang ney mwiin mudimw a Mawej kiish mwa kushaal ni lulamat kudy Mawej hadyeby bikasakan bwa kulong nook. Bwa kuleej ney Sataan i mwiin makos, Yehow ulekel Yeez ukab kuuhal kwa kufwey. (Yoobw 2:1-5; 1 Py. 2:21) Yehow utadil mwaakadyobw basek Yeez kudy balwiish, mwaakady basalaay bamukushil, ni mwaakadyobw bamuhoohel ha mutond a makab ni mal. Nook, Yehow utadil mwaakady Mwaan indiy udyey mukat ufw lufw lubiih. (Mat. 27:28-31, 39) Yehow waakady ni bukash bwa kwiimanyik myand eey bwa kayilong yaalongek. Cileejel, haakady baat baleeb ney: “Tutalaak kaabaak, Mawej ning umukuukuuloh,” es i cicy cyaakady Yehow mwa kulong. (Mat. 27:42, 43) Ki bu Mawej mwiikal mulong naak, kabaakadyoh bend mwa kutwaal cya kukuul naacy baat, ni twaakady mwa kushaal katuy ni citudy batakamin. Nook, Yehow wiitabil bwa Mwaan indiy kutaatameeney makab aam teng ni hatuudiley micim.

8. Yehow umvwiilok kaakunying hatadiley Mwaan indiy ukab eeny? Umvwiij. (Tal cikwaabw cifwaatul.)

⁸ Katulong twaalang ney Mawej kadyaakaloh bend wiiyuumvw mu mushind kaahand bwaal ney yiy i wa bukash boos. Uhangil baat ni mushind aababw kwiikal biiyumvw mu mushind kaahand. Ni bu mudy Bibl uleeb ney i mwiituhang mu cinfwaany cindiy, bileeleej ney yiy byend udyaakal wiiyumvw mu mushind kaahand. Bibl uleeleeb bwindiy ney, baakady “bamufuluj mund” ni “bamunyingalaj.” (Mis. 78:40, 41) Tukontononaay kabidy bwaal bwa Abraham ni Izak. Yehow wambiil Abraham bwa kutwaaley mwaan indiy aakaabumw bu mulambw. (Kbwa. 22:9-12; Ebr. 11:17-19) Katwiish mwa kumanyik mushind waakady Abraham mwiiyumvw haakadyey ulongolol Izak bwa kumuzuhey ni keel. Ki tudy mwa kuleeb bicy bwa mushind waakadyeby bitah Yehow haakadyey mutal mwaakadyobw bakabish Mwaan indiy ni cikis ni bamuzuh kudy baat babiih!​—Tal mu jw.org film a ney, Imitez leur foi: Abraham (partie 2)

9. I mushind kaay udy Biin Rom 8:32, 38, 39 ukwambulwiish bwiibuh kumvw bunen bwa lukat ludy Yehow mukukat naalw uw ni biin Krist neeb?

⁹ Cya kukuul naacy baat ciituloolongweesh ney, muut ning waakaabumw kiish mwiitukat kuhitok mudy Yehhow mwiitukat; ning balel biitut eecy balund neet ba ha micim. (Bal Biin Rom 8:32, 38, 39.) Biin-biin, Yehow i mwiitukat bikasakan kuhitok ni mutudy biikat tut kaayeet. Udy mukat kushaal ni buumy bwa mwendelel eeny? I cicy cidy Yehow ukaam byend kukuhitok ni uw. Ukaakaam bwa kukufwiilobw lus bwa mpeekaat yiibuh eeny? Yehow byend i mukat bikasakan bwa kukufwiilok lus bwa mpeekaat eey. Cyoos cidy Yehow ukaam bwiitut kulong, i kuleej teng dyanyish bwa cya bukish cya buseeb cidyey mwaiitwaakish ni kumukooyel. Cya kukuul naacy baat i cya bukish cya buseeb cileeleej mudy Yehow mwiitukat bikasakan. Ni mu bulongolody buhyaabuhy, twiiyiiy kulong myand yivul habitaatal lukat lwa Yehow.​—Mul. 3:11.

CIDY CYA KUKUUL NAACY BAAT CIITULONGWEESH HABITAATAL YEEZ

10. a) Bwaabiny Yeez waakady mumvw kaakunying bwa lufw lwindiy? b) I mushind kaay waakady Yeez muleebeloh diijin dya Yehow? (Tal ni kazubw ka ney, “Lulamat lwa Yeez lutumbishil diijin dya Yehow.”)

¹⁰ Yeez waakady wiitacish bikasakan bwa luumw lwa Taat indiy. (Jah 14:31) Yeez waakady mumvw kaakunying kavul bwa mwaakady baat bamufundomw ney waakady mutuk Mawej ni waakady musak baat bwa kumutombokelobw, bwaal, bwaal oobw bwaakady mwa kunyang luumw lwa diijin dya Taat indiy. Ki bwaabiny usambidil ney: “Taat, biwiikal mukat, fweejelaany kuleeh diikoh dya makab ni mal eedy.” (Mat. 26:39) Ki bu mushaadil Yeez ni lulamat teng ni ku lufw, uleejel biin-biin ney myand yaakady Sataan muleeb bwa Taat indiy kayaakadyoh bend ya biin-biin.

11. I mushind kaay uleejel Yeez ney waakady mukat baat bikasakan? (Jah 13:1)

¹¹ Cya kukuul naacy baat cileeleej ney Yeez wiitaatacish bikasakan bwa baat, ki nang-nang bwa biiyij bindiy. (Tus. 8:31; bal Jah 13:1.) Cileejel, Yeez waakady mumanyik ney myand yikwaabw ya mu mudimw indiy ha bulab yaakady mwa kwiikal yikasakan, nang-nang lufw lubiih lwaakadyey mwa kufw. Yeez ulongel myand yikasakan yoos eey kiish ney bwaal Yehow waakady mumulomb bwa kwiiyilong, ki bwaal waakady mukat baat. Yeez uleejel mwaakadyey mukat baat bikasakan hakwiibalongweesh ni kwiibambulwiish. Ning diib dya lufw lwindiy, Yeez wangacil diib dya kwiiteel bapostol bindiy ku makas ni kwiibakashishey ni may mindiy ma bulekel ni mibel. (Jah 13:12-15) Ning haakadyey ha mutond a makab ni mal, Yeez waakishil mulong a bibiih waakady ha butamb hindiy kutakamin hamwambiiley ney wiiyiiy kwiikal naany mu Paradiiz, ni waalomb Jah bwa kushaal kulamey maam indiy. (Luuk 23:42, 43; Jah 19:26, 27) Biin-biin, lukat lukasakan lwaakady naalw Yeez kalumweekeloh teng bwa lufw lwindiy, ki lumweekel cikwaabw mu shikacil indiy woos ha bulab.

12. I mushind kaay udy Yeez mutungunuk ni kwiitwambulwiish ni kaabaak?

¹² Ning mufwiil Yeez “cikuuk teng cyaakaabumw kumb kwaah,” ucituutungunuk teng ni kwiitwambulwiish. (Rom 6:10) Mushind kaay? Ucituutungunuk ni kukal mudimw bwa kwiitwaakishey biit bivul bilengel bituheehet leeloow ku dyambulwiish dya cya kukuul naacy baat. Tukontononaay myand yidyey wend ni kulong. Ukaakal mudimw bu Mukaleng iitut, Matam a Balambul ba milambw, ni Fumw a cisumbw. (1 Kor. 15:25; Ef. 5:23; Ebr. 2:17) Udy ni mudimw a kukongakany bashing diisaby ni biin mu cisumbw citam, ni mudimw oow wiiyiiy kuh kuuhal kwa bulekel bwa mal miimiin.a (Mat. 25:32; Mark 13:27) Utaatal cikwaabw mudimw a kudiish biin mudimw bindiy ba lulamat bilengel mu mafuk ma bulekel aam. (Mat. 24:45) Ni mu bukookesh bwindiy bwa mivw cinun, wiiyiiy kutungunuk ni kwiitwambuwliish. Biin-biin, Yehow utwaadil Mwaan indiy bwiitut!

TUNGUNUK TENG NI KULONG

13. I mushind kaay uwudy mwa kumanyik myand yivul habitaatal lukat ludy Mawej ni Krist biituleej?

¹³ Udy mwa kumanyik bivul habitaatal lukat ludy Yehow Mawej ni Yeez Krist biituleej uw mutungunuk ni kulangiloh. Misang yikwaabw, mu ciisang cya Civulukil cya muvw oow, udy mwa kubalok mukand aakaabumw eecy yivul ya ku Misah Yilengel. Kulongoh bend wiikashishomw bwa kubal shapitil yivul musang aakaabumw, ki bal bikeeh-bikeeh ni kaam tubingil tuleeleej ney bikaam tukat Yehow ni Yeez. Ni ambiloh bakwaabw myand yiwuloolong.

14. Bilondeshel Misambw 119:97, i mushind kaay udy kukaamunun kwa myand mwa kwiitwambulwiish bwiitut kutungunuk ni kumanyik myand yivul habitaatal cya kukuul naacy baat ni malongweesh makwaabw? (Tal cikwaabw cifwaatul.)

¹⁴ Biby biikal ney ukaady ni mivw yivul mu bulongolody bwa Mawej, udy mwa kwiiyiihanguj ning kucidy teng malongweesh makwaabw mahyaamahy mawudy mwa kuhet mu biin-bwaal biwudy mwimbidilangan naaby bu mudy: Buwaakan bwa Mawej, lukat lwindiy, ni cya kukuul naacy baat. Manyik ney myand yitudy mwa kulong habitaatal biin-bwaal eeby eecy bikwaabw, kayiish ni bulekel. Nook, i biny biwudy mwa kulong? Bal ni long myand yilengel ya mu Bibl yidy mu mikand yiitut. Hawuheehet verseh uwudy kuy mumvw bilengel, kaamunun myand. Ni mukacy mwa diifuk aady dituutul, langil ha myand yiwudy muhet ni cidyey yikulongweesh habitaatal Yehow, Mwaan indiy, ni lukat ludyobw bakuleej.​—Bal Misambw 119:97.

15. Bwaabiny bikaam tutungunuk ni kukaam bihak bya mu Diiy dya Mawej?

¹⁵ Kukooyeloh bend mu mikon uw mutal ney kwiish teng uhet bwaal kaahand buhyaabuhy eecy bwa musangal misang yoos yiwukaakaamunun myand. Mu mushind mukwaabw, udy bu muut ukaakaam or. Muut ukaakaam or bikaam along meeb mavul eecy mafuk bwa kuhetey or ning mukeeh bituh. Ki utuutungunuk teng ni kukaam, bwaal or ning mukeeh bituh udy ni buseeb kudyey. Bihak byoos bituheehet mu Bibl bidy ni buseeb buvul kuhitok or! (Mis. 119:127; Tus. 8:10) Nook, iikal mutuukij ni tungunuk ni kulond program iibuh a kubal kwa Bibl.​—Mis. 1:2.

16. I mushind kaay utudy mwa kwiidikij Yehow ni Yeez?

¹⁶ Hawendend ni kwiilongel, kaam mishind yiwudy mwa kukooyel ku myand yiwuloolong. Cileejel, iidikij buwaakan bwa Yehow hakulongel bakwaabw myand kuy wiibasungulul. Iidikij lukat lwaakady Yeez mukat Taat indiy ni baat bakwaabw hakwiikal habwiih bwa kukab bwa diijin dya Yehow, ni hakwangat diib diibuh bwa kwambulwiish biin Krist neeb. Cikwaabw, iidikij Yeez hakudiil bakwaabw musah bwa ney bahet byaab mushind a kwiitabobw cya bukish cya buseeb cidy Yehow mwiitwaakish.

17. I biny bitwiikal mwa kukontonon mu ciin-bwaal ciloolond?

¹⁷ Tut bumvw ni banyish bikasakan cya kukuul naacy baat, twiiyiiy kukat Yehow ni Mwaan indiy bikasakan. Tut balong nook, bab byaab biiyiiy kwiitukat bikasakan menmen. (Jah 14:21; Jak 4:8) Tukalaay mudimw ni byoos bidy Yehow wiitwaakish bwiitut kutungunuk ni kulong myand habitaatal cya kukuul naacy baat. Mu ciin-bwaal ciloolond, twiiyiiy kukontonon mishind yikwaabw yidy mwa kwiitwambulwiish bwiitut kuhet mabenesh maalaalukil ku cya kukuul naacy baat ni mutudy mwa kuleej dyansh kudy Yehow bwa lukat lwindiy.