Mabenesh matuheehet bwa mudy Yehow mwiitukat

1. I biny bitudy mwa kulong bwa kusangeej Yehow?

LANG KET ney waakaakish muut uwudy mukat cya bukish cya buseeb buvul ni cilengel menmen. Udy mwa kumvw bicy muut aaw yiy mwangat cya bukish aacy mwiiciteek bituh ni mwiicilengulul? Biin-biin, wiiyiiy kumvw bakumb mwanz ku makas! Ki muut aaw yiy mukal mudimw bilengel ni cya bukish aacy ni mukuleej dyanyish, wiiyiiy kumvw biin-biin musangal. I diilongweesh kaay dituheehet? Yehow i mwiitwaakish Mwaan indiy bwa kwiitufwiiley. Nook, umvumvw musangal hatumuleeleej dyanyish bwa cya bukish cya buseeb eecy ni bwa lukat lwaakady lumusak bwa kutwaaley cya kukuul naacy baat!​—Jah 3:16; Rom 5:7, 8.

2. I biny bitwiikal mwa kwiisambil mu ciin-bwaal eecy?

² Bu mudy mafuk mend mahit, tudy mwa kulengulul cya bukish cya cya kukuul naacy baat. Ki tut katuy baleej dyanyish bwa cya kukuul naacy baat, biiyiiy kwiikal teng bu ney tudy bateek cya bukish cilengel cidy Mawej mwiitwaakish eecy ha cyaab citudy katuy mwa kwiicital eecy kulangiloh. Bwiitut kulek kulong naak, bikaam twiikal tuleej Mawej ni Krist dyanyish misang yoos bwa cidyobw biitulongel. Ciin-bwaal eecy cidy mwa kwiitwambulwiish bwiitut kulong naak. Mu ciin-bwaal eecy, twiiyiiy kwiisambil ha mabenesh matuheehet ku dyambulwiish dya cya kukuul naacy baat, ni matwiikal mwa kwiiy kuhet mafuk maciiiyiiy. Twiiyiiy kukontonon cikwaabw citudy mwa kulong bwiitut kuleej dyanyish bwa lukat lwa Yehow nang-nang mu ciisang cya civulukil.

MABENESH MATUHEEHET KAABAAK

3. I dibenesh kaay dituheehet ku dyambulwiish dya cya kukuul naacy baat kaabaak?

³ Tudy ni mabenesh matuheehetel ku mulambw a Krist wa cya kukuul naacy baat. Cileejel, Yehow wiitufwiifwiilok lus bwa mpeekaat yiitut ku dyambulwiish dya cya kukuul naacy baat. I mukat kwiitufwiilok lus yiy kaayend, kabiish bamulongesh ku makand. Mumb a misambw uleejel dyanyish waaleeb ney: “Ki uw, A Yehow Mawej, udy mulengel, ufwiilangan lus.”​—Mis. 86:5; 103:3, 10-13.

4. Yehow utwaadil cya kukuul naacy baat bwa bangany? (Luuk 5:32; 1 Timoteh 1:15)

⁴ Baat bakwaabw bady mwa kulang ney kabiishoh bend bikumban bwa Yehow kwiibafwiileyok lus. Mu kuleeb kulengel, tut boos katwiishoh bend biilukumbanyin. Mupostol Pool uleebel byend ney: “Ciishoh bend mufwaanyin kuubiikanobw ney mupostol.” Ni uleebel cikwaabw ney: “Teng bwa bukish bwa Mawej ki munakaady mwiin munady oomw.” (1 Kor. 15:9, 10) Hatwiifwiifwiij naay ni twaalabul micim bwa mpeekaat yiitut, Yehow wiitufwiifwiilok lus. Bwaabiny? Kabiishoh bend ney tudy bakumbanyin lus aalw, ki bwaal i mwiitukat. Uw mwiikal ulang ney kwiish mukumbanyin bwa kukufwiilobw lus bwa mpeekaat yiibuh, vuluk ney Yehow katwaadiloh bend cya kukuul naacy baat bwa baat bakiish ni mpeekaat, ki bwa baamulong a mpeekaat baalaalabul micim.​—Bal Luuk 5:32; 1 Timoteh 1:15.

5. Kudyok muut wa kutudy ookw udy mukumbanyin lus lwa Yehow eeny? Umvwiij.

⁵ Katwiish mwa kulang ney bikaam Yehow iitufwiilok lus teng bwaal tudy bamukadil mudimw mukacy mwa mivw yivul. Biin-biin, Yehow waanaan lulamat lwiitut. (Ebr. 6:10) I mwiitwaakish Mwaan indiy bu cya bukish cya bituh, ki kiish ney i diifut bwa midimw yitudy bamulongel. Tut tuleeb ney tudy bakumbanyin lus oolw, i bilong teng bu ney tuleeleeb biin-biin ney Krist i mufw bya bituh.​—Fwaanyikij ni Biin Kalatih 2:21.

6. Bwaabiny Pool waakady mukadil Yehow mudimw bikasakan?

⁶ Pool waakady mumanyik ney ning yiy mwiikal mulong biny Yehow kaakady mwa kumufwiiloh bend lus. Ki, bwaabiny waakady mukadil Yehow mudimw bikasakan? Kalongeloh bend nook bwa kuleejey ney waakady mukumbanyin lus oolw, ki bwaakady bwa kuleejey dyanyish bwa bukish bwa Yehow. (Ef. 3:7) Teng bu Pool, tutuutungunuk ni kukadil Yehow mudimw ni cisumy kiish bwiitut kuwaakanyin lus lwindiy, ki bwiitut kumuleej dyanyish.

7. I mushind kaay mukwaabw utuheehet mabenesh ku dyambulwiish dya cya kukuul naacy baat kaabaak? (Biin Rom 5:1; Jak 2:23)

⁷ Mabenesh makwaabw matuheehet ku dyambulwiish dya cya kukuul naacy baat i ma ney, tudy mwa kudy bulund bulengel bwa sung’a sung ni Yehow.a Teng mudyeby bileej mu ciin-bwaal cishaal, haakadyobw biitulel katwaakadyoh bend mu bulund ni Mawej. Ki ku dyambulwiish dya cya kukuul naacy baat, tudy mwa “kushikat nend talal” ni kufweej nend habwiih.​—Bal Biin Rom 5:1; Jak 2:23.

8. Bwaabiny bikaam tuleej Yehow dyanyish bwa dyaakatook didyey mwiitwaakish dya kusambil?

⁸ Kusambil Yehow i bwaal bwa buseeb butudy mwa kulong bu mutudy nend mu bulund bulengel. Yehow kiish ukun mat teng ku masambil ma baat bindiy hadyobw bakongakeen, ki ukuukun cikwaabw mat ku masambil ma muut ni muut woos. Diisambil didy mwa kubatamij micim yiitut ni kwiitwaakish diitalal dya mu meej. Kadiish diitwambulwiish teng mushind aakaabumw. Didy mwa kukashish cikwaabw bulund bwiitut ni Mawej. (Mis. 65:2; Jak 4:8; 1 Jah 5:14) Haakady Yeez ha bulab, waakady teng usambil bwaal waakady mumanyik ney Yehow waakady mumukun mat ni diisambil dyaakady mwa kulam bulund bwindiy ni Taat indiy bukasakan. (Luuk 5:16) Tudy ni dyanyish divul, bwaal kuhicil ku mulambw a Yeez tudy mwa kushaal balund ba Yehow ni tudy mwa kwiisamb nend mu diisambil!

MUSHIND UTWIIKAL MWA KUHET ABENESH MU MAFUK MACIIYIIY

9. I mushind kaay wiikal cya kukuul naacy baat mwa kuhetesh bahambidil ba Yehow ba lulamat mabenesh mu mafuk maciiyiiy?

⁹ I mushind kaay wiikal cya kukuul naacy baat mwa kuhetesh bahambidil ba Yehow ba lulamat mabenesh mu mafuk maciiyiiy? Yehow wiiyiiy kwiibaakish buumy bwa mwendelel. Baat bavul balaalang ney kabiish mwa kulongek nook bwaal baat bavul bakaady bafw ni bacifwaafw teng kufw kukaady mivw yivul. Ki kiihacil ka Yehow ka ku butambwiil kaakady ka ney, baat biikal ni buumy buyiil. Bu Adam kay mulong mpeekaat, muut ning waakaabumw kaakady mwa kulang ney kwiikal ni buumy buyiil i bwaal bukasakan. Nook, bu mudyeby bimweek ney i bikasakan bwiitut kuhet buumy bwa mwendelel mafuk aam, bileeleej ney buseeb budy Yehow mufut; i bwiin kuleeb ney, cya bukish cya Mwaan indiy udyey mukat bikasakan cidyey mutwaal bwiitut kwiikal ni kutakamin, cidy ni buseeb buvul menmen.​—Rom 8:32.

10. Bashing diisaby ni mikook yikwaabw i batakamin biny?

¹⁰ Ning mudy buumy bwa mwendelel bwiikal bwaal butwiikal mwa kwiiy kuhet, Yehow ukaakaam ney twiikal tulangiloh teng kaabaak. Bashing diisaby i batakamin bwa kwiikal ni buumy bulengel mu diiwul, ni bwa kukookeshobw bulab haakaabumw ni Krist. (Myis. 20:6) Mikook yikwaabw i yitakamin bwa kushikat mu paradiiz ha bulab mwiikal kamuy kukabakan ni biitiit. (Myis. 21:3, 4) Udyok mu mikook yikwaabw yiikal mwa kuhet buumy bwa mwendelel ha bulab eeny? Yehow wiituhangil bwiitut kushikat ha bulab aah! Nook, kushikat ha bulab aah lwa mwendelel kwiiyiiy kwiitusangeej bikasakan.

11-12. I mabenesh kaay matudy mwa kutakamin mu paradiiz? (Tal cikwaabw bifwaal.)

¹¹ Lang ket mwiikal shikacil iibuh mu paradiiz ha bulab. Kwiish wiikal wiitish mut bwa mabenj eecy bwa lufw. (Ye. 25:8; 33:24) Yehow wiiyiiy kukwaakish biit byoos bilengel biwukaakaam. Udy mukat kumanyikok bivul habitaatal nyam eeny? Udy mukat kumanyik mwa kumb misambw eeny?, eecy udy mukat kumanyik mwa kuzol? Biin-biin, baat bady bamanyik kutwaal lungeny bwa kulong biit, ni bady bamanyik kwiibak mazubw, biiyiiy kwiikal ni buseeb buvul mu paradiiz. Ning baat bady bamanyik kwiihik byaakudy, kuhung biit bya kukal naaby mudimw, ni kukun hang ya bilong ni kwiiyilam biiyiiy kwiikal byaab ni buseeb. (Ye. 35:1; 65:21) Diib diwiikal mwa kushaal ni buumy buyiil, wiiyiiy kwiikal ni diib dya kulong myand yoos eey, ni yikwaabw yivul.

¹² Twiiyiiy kwiikal ni musangal muvul bwa kwaak biin-kweet biikal mwa kusanguk! (Myil. 24:15) Cikwaabw, lang ket muwiikal ni musangal bwa kulong myand yivul hakukontonon biit bivul bidyey muhang. (Mis. 104:24; Ye. 11:9) Bwaal bulengel menmen budy ney twiiyiiy kwiikal ni musangal a kuhambidil Yehow katuciy tulongoh mpeekaat! Udy mukatok kujimbaj mabenesh moos aam bwa “myand yibiih ya cilung cikeeh” bituh eeny? (Ebr. 11:25) Waakweeh! Shikacil mulengel utwiikal mwa kuhet, wiiyiiy kwiikal mulengel menmen kuhitok ciit kaay cyoos citudy mwa kuhet mu bulab oobw. Paradiiz a ha bulab wiiyiiy bulekel bwa byoos kushaal bwaal bwa biin-biin. Myand yoos eey kayaakadyoh bend mwa kulongek bu Yehow kay mwiitukat bikasakan ni mwiitwaakish Mwaan indiy bu cya bukish!

KULEEJ DYANYISH BWA LUKAT LWA YEHOW

13. I mushind kaay utudy mwa kuleej dyanyish bwa lukat lwa Yehow? (2 Kor. 6:1)

¹³ I mushind kaay utudy mwa kuleej dyanyish kudy Yehow bwa mudyey mutwaal cya kukuul nacy baat? Tudy mwa kumuleej dyanyish ha kuteek mudimw indiy ha cyaab cya kuuhal mu shikacil iitut. (Mat. 6:33) Yeez mwiin, “ufwiidiil baat boos bwa ney bady ni buumy kabiibutal bu bwaababw, ki biibutal ney i bwa oow ufwiil ni usangukil bwa hamut haababw.” (2 Kor. 5:15) Yehow i mwiitulongel myand yivul yilengel ni i mwiitufwiilok lus. Hatuloolong cyoos citudy mwa kulong bwa kumukadil mudimw, tuleejleej ney tudy batal mudyey mwiitulongel myand yivul ni tuleej mutudy ni dyanyish.​—Bal Biin 2 Korent 6:1.

14. I mushind kaay utudy mwa kuteekel Yehow micim ni kulond buludik bwindiy?

¹⁴ Tudy mwa kuleej cikwaabw dyanyish bwa lukat lwa Yehow a kumuteekel micim ni kulond buludik bwindiy. Mushind kaay? Hatudy ni mahangadik ma kwangat habitaatal tulaas tutukaakaam kulong eecy mushind wa mudimw utukaakaam kwiitab, bikaam tukontonon cidy Yehow mukat bwa ney tulong. (1 Kor. 10:31; 2 Kor. 5:7) Hatwangangat mahangadik mashimacil a ditabiij diitut kudy Yehow, ditabiij ni bulund bwiitut nend biiyiiy kukasakan. Ni kutakamin kwa buumy bwa mwendelel Kwiikaakal bwaal biin-biin kutudy.​—Biin Rom 5:3-5; Jak 2:21, 22.

15. I mushind kaay utudy mwa kuleej dyanyish diitut mu ciisang cya Civulukil?

¹⁵ Mushind mukwaabw utudy mwa kuleej dyanyish bwa lukat lwa Yehow, i kukal mudimw mu ciisang cya Civulukil bwa kuleej Yehow mushind utudy ni dyanyish bwa cya kuukul naacy baat. Ni kulongolol myand bwiitut kwiikaloh mu Civulukil, ni kubiikan baat bakwaabw bwa kwiiy kutweelebomw byaabw. (1 Tim. 2:4) Umvwiij baat bawubiibiikan myand iikal mwa kulongek mu Civulukil. Biiyiiy kwiikal ni buseeb uw mwiibaleej film ya mu jw.org ya ney Yeez ufwiil bwaabiny? Ni wa ney, Vuluk lufw lwa Yeez. Bikaam bakul batabaleel bwa kubiikan baat bakaady balek kutweel mu Bisangil. Lang ket musangal wiikal mwiiwul ni ha bulab hady mikook ya Yehow yidy yijimban yihingomw mu cisumbw! (Luuk 15:4-7) Mu Civulukil, katulong twiimunangan teng tut kayeet, ki twiimun nang-nang baat bahyaabahy ni aab bakaady balek kutweelomw kukaady mafuk. Tukaakaam ney twiibaak bilengel!​—Rom 12:13.

16. Bwaabiny bikaam tuvudij mudimw iitut a bukajaady mu ciisang cya Civulukil?

¹⁶ Udy mwa kuvudijok midimw yiibuh ya mu spirit mu ciisang cya Civulukil eeny? Kulong nook i mushind mulengel a kuleej dyanyish kudy Mawej ni Krist bwa byoos bidyobw biitulongel. Hatwiitwaatwaal bikasakan mudimw a Yehow, twiiyiiy kutal mudyey wiitwambulwiish, ni twiiyiiy kumuteekel bikasakan micim. (1 Kor. 3:9) Cikwaabw long mwiibuh moos, bwa kulond kubal kwa Bibl kwa Civulukil teng mudyeby bileej mu mukand a Tukontononaay mifund diifuk dyoos eecy mu kayeh ka cisangil cya mukacy mwa luming. Udy mwa kusungul bwa kukal mudimw ni verseh ya mu Bibl eey mu program iibuh wa kwiilongel.

17. I biny bisaasangeej Yehow? (Tal ni kazubw ka ney “Mishind ya kuleej dyanyish bwa lukat lwa Yehow.”)

¹⁷ Biin-biin, shikacil iibuh udy mwa kuukukakesh misang yikwaabw bwa kulong myand yoos yidyobw baleeb mu ciin-bwaal eecy. Ki vuluk ney, Yehow kiish ufwaanyikij myand yiwuloolong ni yidy bakwaabw balong, ki utaatal cidy mu micim yiibuh. Usaasangal hadyey utal muwudy ni dyanyish bwa cya bukish cya buseeb cya cya kukuul naacy baat cidyey mwiitwaakish.​—1 Sam. 16:7; Mark 12:41-44.

18. Bwaabiny tudy ni dyanyish kudy Yehow ni Yeez Krist?

¹⁸ Biitufwiifwiilok lus bwa mpeekaat yiitut, tudy mwa kushaal balund nend ba Yehow, ni tudy ni kutakamin kwa buumy bwa mwendelel teng ku dyambulwiish dya cya kukuul naacy baat. Twiikalaay teng tuleej dyanyish bwa lukat lwa Yehow lwaakady lumusak bwa kwiitwaakishey mabenesh aam. (1 Jah 4:19) Twiikalaay cikwaabw tuleej dyanyish kudy Yeez udy mwiitukat bikasakan ni utwaadil buumy bwindiy bwa kwiitukuuloh!​—Jah 15:13.