CIIN-BWAAL CYA KULONG CYA 22
MUSAMBW A 15 Tutumbishayi Muanabute wa Yehowa!
Bwaabingany diijin dya Yehow didy ni buseeb buvul kudy Yeez?
“Nady mukumanyikish kudyobw. Nahiihing niiy kukumanyikish cikwaabw.”—JAH 17:26.
BWAAL BUTAM
Mushind waakady Yeez mumanyikish ni mujidil diijin dya Mawej [Yehow], ni mwaakadyey muleebeloh diijin aady.
1-2. a) I biny byaakady Yeez mulong bufuk kuuhal kwa kufwey? b) I majooj kaay matwiikal mwa kukontonon mu ciin-bwaal eecy?
MU DIINAAY ku ma kawul dya mafuk 14 suuny a Nisan mu muvw a 33 B.B., Yeez udiil cyaakudy cya Fumweet ni bapostol bindiy ba lulamat. Waakady mumanyik ney, Yuudas waakady habwiih ni kumuhangil ni baakady mwa kumukabish ni kumuzuh kudy balwiish bindiy. Nook, hamanyinobw kudy, Yeez ukashishil bapostol bindiy ku micim ni may. Haakadyobw habwiih ni kwaaluk mwaab aaw bwa kuyobw, Yeez ulongel diisambil dya buseeb buvul. Mupostol Jah ufundil diisambil eedy. Didy mu Jah shapiitil 17.
2 I biny bidy diisambil dya Yeez diitulongweesh habitaatal myand yaakady yimutond ciisang aacy? I mushind kaay udy diisambil eedy dileej cyaakady ni buseeb buvul kudyey mu mudimw indiy woos wa bukajaady hacyaakadyey ha bulab? Majooj aam, i mam matwiikal mwa kukontonon mu ciin-bwaal eecy.
“NADY MUKUMANYIKISH KUDYOBW”
3. I biny byaakady Yeez muleeb habitaatal diijin dya Yehow, ni byumvumvwiij biny? (Jah 17:6, 26)
3 Yeez uleebel mu diisambil dindiy ney: “Nady mukumanyikish kudyobw.” Tudy bamanyik ney bwaal oobw bwaakady ni buseeb buvul kudy Yeez bwaal uleebel may aam misang yibidy. (Bal Jah 17:6, 26.) May mindiy aam maakady mumvwiij biny? Waakady mwiibaleejok diijin dyaakadyobw kabay bamanyik eeny? Biiyij ba Yeez baakady biin Yuud, nook baakady baman kumanyik ney diijin dya Mawej i Yehow. Diijin eedy didy mu mifund ya ciin Ebreh misang yihit ha 7 000. Nook Yeez kaakadyoh bend ukaam kuleeb ney waakady mwiibalongweesh bituh ney diijin dya Mawej i Yehow, ki waakady mwiibalongweesh cidy diijin eedy dyumvwiij. Yeez ulongweeshel biiyij bindiy bwa kumanyikobw Yehow bilengel menmen, kumanyikobw biihacil bindiy bwa bulab ni baat, myand yikaadyey mulong ni yiikaley mwa kulong, ni biikadil bidyey naaby bwaal teng Yeez ki udy mumanyik Yehow bilengel menmen.
4-5. a) I mushind kaay udy diijin dya muut mwa kufik ku kwiikal ni buseeb buvul kutudy? Twaal cileejel. b) I mushind kaay waakady biiyij ba Yeez bafik ku kumanyik diijin dya Yehow bilengel menmen?
4 Twangat cileejel, lang ket ney mu cisumbw ciinun mudy mukul dindiy David mwiikal dokteer, ni udy mumanyikangan nend kukaady mafuk mavul. Ki diifuk dikwaabw, umb ubeel bikasakan. Hadyobw bay neeb ku opital kudy mwiin-kweet aaw ukal mudimw, umb ukondah ni ukukuuloh. Kaabaak wiiyiiy kukat mwiin-kweet oow bikasakan kuhitok ni kuuhal, ni hawumvumvw bateel diijin dindiy, ulaalangil teng ha byaakadyey mukulongel. Biin-biin, kwiish wiikal utal David bu mukul uwaakady mumanyik koosook, ki wiikaakal umutal cikwaabw bu dokteer udy mukukuuloh.
5 Bya mushind aakaabumw, biiyij ba Yeez baakady baman kumanyik kal diijin Yehow, ki diijin eedy diiyil ni buseeb buvul kudyobw, bwaal Yeez wiibambulwiishil bwa kumanyikobw Yehow bilengel menmen. Bwaabiny tuleeleeb naak? Bwaal Yeez waakady uleej buumuut bwa Taat indiy mu myand yoos yaakayey uleeb ni yaakadyey ulong. Nook bapostol ‘bamanyikil’ Yehow bilengel menmen ha kukun mat ku mushind waakady Yeez ulongweesh ni ha kutal mushind waakadyey ulongel baat myand.—Jah 14:9; 17:3.
“DIIJIN DIIBUH DIWUUYAAKISHIL”
6. Yeez waakady ukaam kuleeb biny haleebeley ney Yehow waakady mumwaakish diijin dindiy? (Jah 17:11, 12)
6 Yeez ulombel Mawej bwa biiyij bindiy uleeb ney: “Wiibalam ku bukash bwa diijin diibuh. Diijin diwuuyaakishil.” (Bal Jah 17:11, 12.) Biineeby byumvumvwiijok ney Yeez byend biikaakal bamubiikan ney Yehow eeny? Waakweeh. Manyik ney, haakady Yeez uleeb bwa diijin dya Yehow, uleebel ney “diijin diibuh.” Nook, diijin dya Yehow kadyaakadyoh bend dishaal diijin dya Yeez. Ki i biny byaakady Yeez ukaam kuleeb haleebeley ney baakady bamwaakish diijin dya Mawej? Cya kuuhal, Yeez waakady muleej-hal a Yehow, ni Yehow waakady mumutum bwa kumuleebeley. Wiiyil mu diijin dya Taat indiy ni waalong myand ya kukem mu diijin aady. (Jah 5:43; 10:25) Cikwaabw, diijin dya Yeez dyumvumvwiij ney: “Yehow i luhand.” Biin-biin, diijin dya Mawej diheehetangan ni dya Yeez.
7. Twaal cileejel cileeleej mwaakady Yeez uleeb mu diijin dya Yehow.
7 Twangat cileejel, teng bu mudy kabw-ka-tand mwiikal diis dya mukaleng, uleeleeb mu diijin dya mukaleng. Nook may ma kabw-ka-tand mady ni bujit bwaakaabumw ni ma Mukaleng. Bya mushind aakaabumw, Yeez waakady wambil baat myand mu diijin dya Yehow, bwaal waakady muleej-hal indiy.—Mat. 21:9; Luuk 13:35.
8. Bwaabiny Yehow uleebel ney diijin dindiy dyaakady “mu” Yeez ning kuuhal kwa kwiiyey ha bulab? (Cimwang 23:20, 21)
8 Bibl ubiibiikan Yeez ney “diiy,” bwaal Yehow ukadil nend mudimw bwa kwambil banjel ni baat myand yaakady Yehow mukat bwa ney bamanyik ni balong. (Jah 1:1-3) Misang yikwaabw Yeez i yiy mwanjel waakady Yehow utum bwa kutabaleel biin Izaleel hamwangelobw mu Ejipit. Bwa biin Izaleel kukooyelobw mwanjel oow, Yehow waakady wiibambil ney: “Bwaal uloolong myand mu diijin dya mim.”a (Bal Cimwang 23:20, 21.) Yehow uleebel nook bwaal Yeez i waakutum indiy, ni i yiy muut ujaajaadik ney Yehow i muwaakan ni mujilang.
“A TAAT, TUMBISH DIIJIN DIIBUH”
9. I mushind kaay waakady diijin dya Yehow diikal ni buseeb kudy Yeez? Umvwiij.
9 Teng mutubaaman kwiibital, kuuhal kwa Yeez kwiiy ha bulab, diijin dya Yehow dyaakady ni buseeb kudyey. Haakadyey ha bulab, uleejel mwaakady diijin eedy ni buseeb kudyey kuhicil ku myand yaakadyey ulong! Ku bulekel kwa mudimw indiy a bukajaady, Yeez wambil Yehow ney: “A Taat, tumbish diijin diibuh.” Musang aakaabumw Taat indiy waalabwiil ni diiy dikasakan dyaalukil mwiiwul ney: “Namanyin kal kwiiditumbish nahiihing niiy kwiiditumbish cikwaabw.”—Jah 12:28.
10-11. a) I mushind kaay waakady Yeez mutumbish diijin dya Yehow? (Tal cikwaabw cifwaatul.) b) Bwaabiny bikaam kujidil ni kuleebeloh diijin dya Yehow?
10 Yeez byend utumbishil diijin dya Taat indiy. Mushind kaay? Ulongel nook hambiiley baat biikadil bilengel bya Yehow, ni myand yikeekemesh yidyey ulong. Ki ulongel myand yikwaabw bwa kutumbish diijin eedy. Byaakady bikaam bwa Yeez ajidil diijin dya Yehow ni iidileebeloh.b Yeez uleejel mwaakady bwaal oobw ni buseeb halongweesheley biiyij bindiy mushind a kusambilobw. Uleebel ney: “Taat iitut udy mu diiwul, diijin diibuh dijilang biidimanyik kudy boos.”—Mat. 6:9.
11 Bwaabiny bikaam kujidil ni kuleebeloh diijin dya Yehow? Bwaal mu budimy bwa Eden, Sataan dyaabol waakady mudingilomw Yehow Mawej makos. Sataan waakady ulang ney Yehow waakady mwiin makos ni waakady musokok Adam ni Eev ciit kaahand cilengel. (Kbwa. 3:1-5) Sataan uleejel cikwaabw ney mushind a kulong myand wa Yehow kaakadyoh bend muwaakan. Makos ma Sataan aam manyangil luumw lwa diijin dya Yehow. Kuunyim, mu mafuk ma Yoobw, Sataan uleebel ney baat bakaakadil Yehow mudimw baloolong nook teng bwa biit bidyey wiibaakish. Mwiin makos oow uleebel cikwaabw ney, baat kabiishoh bend mwa kukadil Yehow mudimw hadyobw bahet makab, bwaal kabiishoh bend bamukat biin-biin. (Yoobw 1:9-11; 2:4) Byaakady bikaam kuhitok ciisang bwa kujaadik ney waakady mwiin makos i Yehow eecy i Sataan.
Yeez waakady mulongweesh biiyij bindiy buseeb budy naabw kujidil diijin dya Mawej (Tal cikos cya 10)
“NATWAATWAAL BUUMY BWA MIM”
12. I biny bilongel Yeez bwa lukat lwaakadyey mukat diijin dya Yehow?
12 Bu mudy Yeez mukat Yehow, waakady mukat kulong cyoos cyaakadyey mwa kulong bwa kujidil ni kuleebeloh diijin dya Yehow. Yeez uleebel ney: “Natwaatwaal buumy bwa mim.” (Jah 10:17, 18, NWT) Waakady habwiih bwa kufwey bwa diijin dya Yehow.c Baat babidy bawaakan ba kuuhal Adam ni Eev, batombokel Yehow baalamat Sataan. Ki Yeez waakady habwiih bwa kwiiy ha bulab, bwa kuleej mwaakadyey mukat Yehow. Yeez ulongel nook ha kwiikal ni shikacil muwaakan ni lulamat. (Ebr. 4:15; 5:7-10) Ushaadil teng ni lulamat mu shikacil indiy woos teng ni mufwiiley ha mutond a makab ni mal. (Ebr. 12:2) Mu mushind oow, uleejel mwaakadyey mukat Yehow ni diijin Dindiy.
13. Bwaabiny Yeez i yiy waakady mukumban bwa kujaadik ney Sataan i mwiin makos? (Tal cikwaabw cifwaatul.)
13 Kuhicil ku shikacil indiy, Yeez uleejel hatook ney Sataan i yiy mwiin makos, ki kiishoh bend Yehow! (Jah 8:44) Kakwiish muut ning waakaabumw udy mumanyik Yehow bilengel bu Yeez. Bu biby biikal ney myand yaakady Sataan udingilomw Yehow eey yaakady ya biin-biin, Yeez waakady mwa kwiikal mwiiyimanyik. Ki Yeez ushaadil teng mwiiswiik bwa kuleebeloh luumw lwa diijin dya Yehow. Ning haakadyeby bimweek bu ney Yehow kaakady mumulam, Yeez ushaadil teng ni lulamat ni mwiikal habwiih bwa kufwey.—Mat. 27:46.d
Myand yoos yilongel Yeez mu shikacil indiy, yileejel ney Sataan i yiy mwiin makos, ki kiishoh bend Yehow! (Tal cikos cya 13)
“NAMANYIN MUDIMW UWAAKADY MUUYAAKISH BWA MIM KUKAL”
14. I mushind kaay waakady Yehow mufut Yeez bwa lulamat lwindiy?
14 Mu diisambil dilongeley bufuk kuuhal kwa kufwey, Yeez uleebel ney: “Namanyin mudimw uwaakady muuyaakish bwa mim kukal.” Waakady mujaadik ney Yehow waakady mwa kwiiy kumufut bwa lulamat lwindiy. (Jah 17:4, 5) Yeez waakady ni kabingil ka kuteekeley Taat indiy micim. Yehow kiitabiloh bend bwa kushaaley mu lukit buyiil. (Myil. 2:23, 24) Usangwiil Yeez ku lufw ni waamwaakish cyaab citam mu diiwul. (Fili. 2:8, 9) Bulekel bwa byoos, Yeez utangil kulombol bu Mukaleng a Bukaleng bwa Mawej. I biny biikal bukaleng oobw mwa kulong? Mu cituh ciibiidy cya diisambil dya cileejel biitwambambilomw ney: “Bukaleng bwiibuh bwiiy; biwudy mukat biibilong ha bulab bu mwiibiloolongobw mwiiwul.”—Mat. 6:10.
15. I biny bikwaabw biikal Yeez mwa kulong?
15 Mu mafuk makeeh oomw, Yeez wiiyiiy kulwiish balwiish ba Mawej ni wiiyiiy kubutul baat babiih mu diivit dya Armakedoh. (Myis. 16:14, 16; 19:11-16) Kuunyim kwa myand eey, wiiyiiy kumb Sataan mu “cind cileeh menmen,” mwiikaley kay mwa kuhatuk bwa kulong bwaal ning bwaakaabumw. (Myis. 20:1-3, NWT) Yeez wiiyiiy kukookesh mivw cinun, ni wiiyiiy kwaakish baat diitalal ni wiiyiiy kwiibambulwiish bwa kushaalobw bawaakan. Wiiyiiy kubuush bafw, ni wiiyiiy kushiy bulab paradiiz. Nook kiihacil ka Yehow bwa bulab kiiyiiy kukumban!—Myis. 21:1-4.
16. I biny biikal mwa kulongek ku bulekel bwa bukookesh bwa mivw cinun?
16 I biny biikal mwa kulongek ku bulekel kwa bukookesh bwa mivw cinun? Baat biiyiiy kushaal bawaakan, ni mpeekaat yaababw yiiyiiy kujimban. Baat kabaakwiikaloh bend balomb cikwaabw lus bwa mpeekaat yaababw ku dyambulwiish dya cya kukuul naacy baat, ni kabaakwiikaloh bend diijing ni balambul ba milambw binun 144, eecy Yeez mutam a balambul ba milambw bwa kwiikalobw mu bulund bulengel ni Yehow. Ni “mulwiish wa bulekel wiikalobw mwa kubutul i lufw, [ludy lukaamish kudy Adam.]” Biiyiiy kubuush baat bakaady bafw, ni mu nkit mwiiyiiy kushaal mutuh. Baat boos ha bulab biiyiiy kwiikal bawaakan.—1 Kor. 15:25, 26.
17-18. a) I biny biikal mwa kulongek ku buleekel bwa mivw cinun? b) I biny biikal Yeez mwa kulong hiikaley muman kukookesh? (1 Biin Korent 15:24, 28) (Tal cikwaabw cifwaatul.)
17 I biny bikwaabw biikal mwa kulongek ku bulekel kwa bukokesh bwa mivw cinun? Kudy bwaal bukwaabw bwa habwaah bwiikal mwa kulongek. Cilumbw citaatal kushiy diijin dya Yehow dijilang ciiyiiy kuh. Mushind kaay? Mu budimy bwa Eden, Sataan uleebel ney Yehow i mwiin makos, ni kiishoh bend mukaleng mulengel, bwaal kiish ni lukat. Kacy teng ciisang aacy, baat bakaakadil Yehow mudimw ni bamuneeneemek i baleej ney diijin dindiy i dijilang. Nook, ku bulekel bwa bukookesh bwa mivw cinun, biiyiiy kuleebeloh luumw lwa Yehow buyiil. Wiiyiiy kuleej biin-biin ney, i yiy Taat wa mu diiwul udy ni lukat.
18 Baat boos biiyiiy kumanyik ney myand yaakady Sataan muleeb habitaatal Yehow i ya makos. I biny biikal Yeez mwa kulong hiikaley muman kukookesh? Wiiyiiy kulondok cileejel cya Sataan ni utombokel Yehow eeny? Waakweeh! (Bal 1 Biin Korent 15:24, 28.) Yeez wiiyiiy kuhingijil Taat indiy Bukaleng. Ni wiiyiiy kukooyel ku bukookesh bwindiy. Bishiilangan ni Sataan, Yeez udy biin-biin habwiih bwa kulek myand kaay yoos bwa lukat ludyey mukat Yehow.
Yeez uhingijil Yehow bukaleng ni mucim indiy woos ku bulekel kwa bukookesh bwindiy bwa mivw cinun (Tal cikos cya 18)
19. I mushind kaay udy diijin dya Yehow diikal ni buseeb kudy Yeez?
19 Kabiishoh bend biitukemesh bwa mwaakady Yehow mwaakish Yeez diijin dindiy! Yeez uleejel biin-biin mwaakadyey muleej-hal a Taat indiy. Diijin dya Yehow dyumvumvwiij biny bwa Yeez? Didy ni buseeb buvul kuhitok ciit kaay cyoos. Wiitabil bwa kufwey bwa diijin eedy, ni wiiyiiy kwiikal habwiih bwa kuhingijey biit byoos mu bikam bya Yehow ku bulekel kwa bukookesh bwa mivw cinun. I mushind kaay utudy mwa kwiidikij cileejel cya Yeez? Twiiyiiy kwaalabul diijooj eedy mu ciin-bwaal ciloolond.
MUSAMBW A 16 Tumbishayi Yah bua Muanende Muela Manyi!
a Misang yikwaabw, banjel byaabw baakady baleej-hal ba Yehow haakadyobw badiil baat misah mu diijin dindiy. Ki bwaabiny byaab bikwaabw mu Bibl hady mwanjel wiisamb, i bilong teng bu ney Yehow kaayend kend i yiy waakady wiisamb. (Kbwa. 18:1-33) Ning mudy mifund yileeb ney Moyiiz uhetel may ma kudy Yehow, verseh yikwaabw yileeleej ney Yehow ukadil mudimw ni banjel bwa kumwaakish May aam mu Diijin dindiy.—Lv. 27:34; Myil. 7:38, 53; Kal. 3:19; Ebr. 2:2-4.
b MYAAK YIDYOBW BUMVWIIJ: “Kujidil” kumvumvwiij kwaakish lutumb, kutal ciit bu cijilang, ni kwiicineemek bikasakan. “Kuleebeloh” kumvumvwiij kujaadik myand bwa kulongolol luumw lwa muut bwa myand ya makos yidyobw bamudingilomw bwa kuleej ney kiish ni bwaal.
c Lufw lwa Yeez luheel baat mushind a kuhetobw buumy bwa mwendelel.
d Tal ciin-bwaal cya ney “Nkonko ya Babadi,” mu Cibumb cya muteetekel cya suuny 4/2021, diib. 30-31.