Mushind udy Yehow wiitwambulwiish bwiitut kutaatameen

1. Bwaabiny kabiish biheehel bwa kutaatameen teng ni ku bulekel? Ni i ngany wiikal mwa kwiitwambulwiish? (1 Pyeel 5:10.)

MU MAFUK makasakan ma bulekel aam, baat ba Yehow bady diijing ni kutaatameen. Kudy bady ni lubeel lukiish luh, bakwaabw naabw bakaakab bwaal i bafwiish muut udyobw bakat, bakwaabw biibalwiilwiish kudy biin mu cisak cyaababw eecy kudy biin mbul-matady. (Mat. 10:​18, 36, 37) Iikal mutwiishiibw ney, ning uw ni lutat lwa mushind kaay Yehow wiiyiiy kukwambulwiish bwiibuh kwiilutaatameen.​—Bal 1 Pyeel 5:10.

2. I biny biitwambambulwiish bwiitut kutaatameen?

² Kutaatameen kumvumvwiij kushaal teng ni lulamat kudy Yehow hadyobw biitukabish, biitulwiish eecy biituteet. Ki Yehow yiy wiitwambambulwiish ni “bukash budy buhit bwa ciibidil,” bwiitut kutaatameen. (2 Kor. 4:​7, NWT) Mu ciin-bwaal eecy, twiiyiiy kwiisambil ha myand yinaay yidy Yehow mwiitwaakish yiitwambambulwiish bwiitut kutaatameen. Twiiyiiy kutal cikwaabw citudy mwa kulongel ku myand eey.

DIISAMBIL

3. Bwaabiny tudy mwa kuleeb ney diisambil i mushind a kwiisamb ni Yehow ukeekemesh?

³ Yehow i mwiitwaakish bwaal bukeekemesh budy mwa kwiitwambulwiish bwiitut kutaatameen. Ning mutudy baamulong a mpeekaat, i mwiitwaakish mushind iitut kwiisamb nend. (Ebr. 4:16) Lang ket ney: Udy mwa kwiisamb ni Yehow mu ciisang cyoos ni umwambil myand yoos. Udy mwa kwiitukun mat tut tumusambil mu mwaakul kaay woos, mwaab kaay woos, ha tut kaayeet eecy tut biikal mu bulok. (Jonas 2:1, 2; Myil. 16:25, 26) Tut biikal ni myand yitwiitish mut bikasakan ni bakaakal ni may ma kwambil naam Yehow mushind utwiiyumvumw, tumanyik ney yiy udy ni bukash bwa kumanyik bitukaakaam kuleeb. (Rom 8:26, 27) Biin-biin, diisambil i mushind ukeekemesh wa kwiisamb ni Yehow!

4. Bwaabiny tudy mwa kuleeb ney masambil matuloolomb bwa kutaatameen maheehetangan ni cidy lukat lwa Yehow?

⁴ Yehow wiitujaajaadikil mu Bibl ney, ‘ciit cyoos citumuloolomb bilondeshel cidy lukat lwindiy wiitumvumvw.’ (1 Jah 5:14) Tudy mwa kulombok Yehow bwa iitwambulwiish bwiitut kutaatameen eeny? Ing! Bwaal kulong nook kuheehetangan ni cidy lukat lwindiy. Bwaabiny tuleeleeb naak? Bwaal hatutaataatameen makab, Yehow uheehet mushind wa kwaalabuley Sataan Dyaabol. (Tus. 27:11) Bwaal bukwaabw, Bibl uleeleeb ney Yehow i mukat bwa “kukwanjokey bady bamukat ni mucim aababw woos.” (2 Cifuk 16:9) Nook, bikaam twiikal batwiishiibw ney Yehow udy ni bukash ni diijing dya kwiitwambulwiish bwiitut kutaatameen.​—Ye. 30:18; 41:10; Luuk 11:13.

5. I mushind kaay udy diisambil mwa kwiitwaakish diitatal dya mu meej? (Yeshaay 26:3)

⁵ Bibl wiitwambambil ney hatusaasambil ni mucim aakaabumw bwa myand yitudy naay, “Kushikat talal kwaakaakish Mawej baat, kudy kuhitok meej moos malaalang baat, kwiiyiiy kufikij micim [yiitut] ku kwiikal ha yikwaabw ni meej [miitut] ku kwiikal ha makwaabw.” (Fili. 4:7) Tutalaay cidy bwaal oobw bumvwiij. Hady baat bakiish bahambidil Yehow bahet makab, bakaakaam mishind yishiil-shiilangan bwa kuhet diitalal dya mu meej. Cileejel, Baat bakwaabw biikaakashishomw bwa kuful myand yoos mu mut bwa kuhetobw diitalal dya mu meej ni kweehuk kaakunying. Ki kulong nook kudy mwa kunyang buumuut bwiitut bwa mu spirit. (Fwanyikij ni Matewus 12:43-45.) Diitalal didy Yehow wiitwaakish hatumusaasambil i dihitok diitalal dyoos didy muut mwa kuhet hadyey ulang nook. Hatusaasambil Yehow, tuleeleej ney tudy bamuteekel micim ni wiiyiiy kwiitwaakish “diitalal dya buyiil.” (Bal Yeshaay 26:3, NWT) Mushind udy Yehow wiitwaakish diitalal eedy i hadyey wiitwambulwiish bwiitut kuvuluk myand ya biin-biin yitudy balong mu Diiy dindiy. Myand ya biin-biin eey yibuubutamij meej ni micim yiitut bwaal tudy bamanyik ney Yehow wiitutaatabaleel ni i mukat bwa ney tuhet dyaakatook.​—Mis. 62:1, 2.

6. I biny biwudy mwa kulong bwa diisambil dikwambulwiish? (Tal cikwaabw cifwaatul.)

⁶ Ciwudy mwa kulong. Hawudy ni makab, ambil Yehow mushind uwiiyumvumvw ni “mwiihwiil bujit buwudy naabw” ni mulomb bwa akwaakish diitalal. (Mis. 55:22, NWT) Sambil cikwaabw Yehow bwa akwaakish meej bwiibuh kumanyik cya kulong hawutataatameen makab. (Tus. 2:10, 11) Hawusaasambil Yehow bwa akwambulwiish bwiibuh kutaatameen, kulong bend waavulaminok bwiibuh kumufwiijok bwa myand yoos yilengel yikaadyey mukulongel. (Fili. 4:6) Langil ha mishind yidy Yehow mukwambulwiish diifuk dyoos bwa kutaatameen, mufwiijok bwa biit bilengel bidyey ukwaakish. Kulekoh bend makab miibuh makukaakesh bwiibuh kutal mushind udy Yehow mukubenesh.​—Mis. 16:5, 6.

DIIY DYA MAWEJ

7. I mushind kaay mudy kulong kwa Bibl kwiitwambulwiish bwiitut kutaatameen?

⁷ Yehow i mwiitwaakish Diiy dindiy bwa kwiitwambulwiish bwiitut kutaatameen. Mu Bibl mudy verseh yivul yiitujaajaadikil ney Yehow wiiyiiy kwiitwambulwiish. Tutalaay cileejel eecy. Matewus 6:8 uleeleeb ney: “Taat iinun i mumanyik cinukaakaam kuuhal kwiinun kumulombecy.” Yeez i yiy uleebel may aam, ni i mumanyik Yehow bilengel menmen. Nook, twiikal batwiishiibw ney hatuheehet makab, Yehow i mumanyik bitudy naaby diijing ni wiiyiiy kwiitwambulwiish. Mu Bibl mudy milay ya Yehow yidy mwa kwiitwaakish bukash butudy naabw diijing bwiitut kutaatameen makab.​—Mis. 94:19.

8. a) Twaal cileejel dya diiy ditam dya mu Bibl didy mwa kwiitwambulwiish bwiitut kutaatameen makab. b) I biny bidy mwa kwiitwambulwiish bwiitut kwiikal tuvuluk may matam ma mu Bibl hatudy naam diijing?

⁸ May matam ma mu Bibl mady mwa kwiitwambulwiish bwiitut kutaatameen. May aam mady mwa kwiitwambulwiish bwiitut kwangat mahangadik ma meej. (Tus. 2:6, 7) Cileejel, Bibl uleeleeb ney katulong twiitish mut bwa myand ya mafuk maciiyiiy, ki bikaam tuteekel Yehow micim diifuk dyoos. (Mat. 6:34) Tut biikal ni ciibidil cya kubal Bibl ni tulangiloh, biiyiiy kwiikal biheehel bwiitut kuvuluk may matam ma mu Bibl diib ditudy naam diijing.

9. I mushind kaay udy miisamb ya mu Bibl yikashish kuteekel dyambulwish dya Yehow mucim?

⁹ Mu Bibl mudy cikwaabw miisamb ya biin-biin ya mu shikacil ya baat baakady bateekel Yehow micim ni bahet dyambulwiish dindiy. (Ebr. 11:32-34; Jak 5:17) Hatulaalangil a myand eey tukaakashish kutwiishiibw kwiitut kwa ney Yehow “i cyaab cyaakusokotel ni diikand diitut, i ciikuul iitut udyok diib dyoos ditudy mu makab ni mal.” (Mis. 46:1) Langil a mushind waakady biin mudimw ba Yehow ba lulamat ba kal baleej diitabij ni batungunuk ni kumukadil mudimw mu biisang bya makab, biitusaasak bwiitut kwiibiidikij.​—Jak 5:10, 11.

10. I biny biwudy mwa kulong bwa Bibl akwambulwiish?

¹⁰ Ciwudy mwa kulong. Iikal ubal Bibl diifuk dyoos, ni ufundok verseh yiwudy mutal ney yidy mwa kukwambulwiish ha diibij. Baat bavul i biiy kumanyik ney kukontonon mufund a ku diifuk i mushind mulengel wiibambambulwiish bwa kutangombw diifuk bilengel ni wiibakashish. Mwiin-kweet Mariea ujingunwiin ney biin-biin kulong naak i kulengel ciisang cyaakadyobw bakwaat balel bindiy lubeel lwa kanseer. I biny byaakady bimwambulwiish bwa kutaatameeney ciisang cyaakadyey utabaleel baledy bindiy baakady habwiih ni kufw? Uleeleeb ney: “Diifuk dyoos naakady nabal verseh wa mu Tukontononaay Miifund Diifuk dyoos ni nalangiloh. Kulong nook kuuyambulwiishil bwa kulangil ha myand yilengel yidy Yehow wiitulongweesh hamut a kulangil ha myand yinaakady naay.”​—Mis. 61:2.

BIIN KRIST NEET

11. Bwaabiny bitukaakashish hatumaamanyik ney katwiish kaayeet hatutataatameen makab?

¹¹ Yehow i mwiitwaakish biin Krist neet diib ditutaataatameen makab. Kumanyik ney: ‘Biin-kweet bady bahalal ha bulab butuutul bahiihicil teng mu makab ni mal ma bwiin miinaam,’ kwiitujaajaadikil ney katwiishoh bend kaayeet. (1 Py. 5:9) Nook, bikaam twiikal batwiishiibw ney biin-kweet bady ni makab ma bwiin matudy naam ni batuutungunuk ni kushaal ni lulamat teng kudy Yehow. Nook tut byeet tudy mwa kutaatameen!​—Myil. 14:22.

12. I mushind kaay udy biin krist neet biitwambulwiish, ni i biny bitudy mwa kwiibalongel byeet? (2 Biin Korent 1:3, 4)

¹² Biin Krist neet bady mwa kwiitukashish diib ditutaataatameen. ki mwaakady biin-kweet balongel mupostol Pool. Ufwiijilok biin-kweet baakady bamwambulwiish haakadyey mu bulok hakwiibateel mu majiin maababw. Biin-kweet aab bakashishil Pool mu may ni bamuheel cikwaabw biit baakadyey naaby diijing. (Fili. 2:25, 29, 30; Kol. 4:10, 11) Leeloow biin-kweet bady mwa kwiitukashish ni kwiitwambulwiish bwa kutaatameen mu biisang bikasakan. Ni tut byeet tudy mwa kwiibambulwiish byaabw hadyobw bakab.​—Bal 2 Biin Korent 1:3, 4.

13. I biny byambulwiishil mwiin-kweet Maya bwa kutaatameeney?

¹³ Biin-kweet bakashishil mwiin-kweet mwaan-mukaj Maya wa mu Russie bilengel menmen. Mu muvw 2020, bampulush ba mu Russie batweedyel mu nzubw mwa Maya ni baakalukomw biit, ni kuunyim uyiil kutumilaady bwa kaleebeloh myand yaakadyey wiitabij. Maya uleeleeb ney: “Mu ciisang cikasakan eecy biin-kweet baakady baabiikan, baafundil mikand ni baajaadikil ney baakady baakat. Koosook naakady mumanyik ney biin-kweet baakady baakat. Ki bwa kaabaak bwaal oobw buujaadikil ney baakady baakat bikasakan.”

14. I biny biwudy mwa kulong bwa kuhet dyambulwiish dya biin Krist neeb ciisang ciwutaataatameen? (Tal cikwaabw cifwaatul.)

¹⁴ Ciwudy ma kulong. Uw utaatameen lutat kaahand iikal habwiih ni biin Krist neeb. Kweelakanoh bend bwa kulomb dyambulwiish kudy bakul, bwaal bady bu “cyaab cya kweeyet ciheeh, bu cyaab cya kubutam diib dya mvul a ciheeh.” (Ye. 32:2) Manyik ney biin Krist neeb bataataatameen byaabw makab. Hawuloolongel muut bwaal kaahand bulengel budyey naabw diijing, wiiyiiy kuhet musangal ni biiyiiy kukwambulwiish bwiibuh kutaatameen makab mawudy naam.​—Myil. 20:35.

KUTAKAMIN KWIITUT KWA MAFUK MACIIYIIY

15. I mushind kaay waakady kutakamin kwa mafuk maciiyiiy kuuhal kwambulwiish Yeez, ni i mushind kaay udyeek mwa kwiitwambulwiish byeet? (Biin Ebreh 12:2)

¹⁵ Yehow i mwiitwaakish kutakamin bwa kwiitwambulwiish bwiitut kutaatameen. (Rom 15:13) Tuvulukaay ney kutakamin kwambulwiishil Yeez bwa kutaatameeney myand yikasakan ya mu shikacil indiy a ha bulab. (Bal Biin Ebreh 12:2.) Yeez waakady mumanyik ney lulamat lwindiy lwaakady mwa kubingish diijin dya Yehow. Yeez waakady ni mucim kwiiwul-kwiiwul bwa kuhingomw kudy Taat indiy mu diiwul ni kwiiy kukal mudimw haakaabumw ni bashing diisaby mu Bukaleng bwa mu diiwul. Bya mushind aakaabumw, kutakamin kwiitut kwa kwiiy kushikat buyiil mu bulab buhyaabuhy bwa Mawej kwiitwambambulwiish bwa kutaatameen makab matudy naam mu bulongolody bwa Sataan oobw.

16. I mushind kaay udy kutakamin kwambulwiish mwiin-kweet mwaan-mukaj kaahand bwa kutaatameen ni i biny biwuloolongel ku bwaal oobw?

¹⁶ Tutalaay mushind waakady kutakamin kwa myand ya Bukaleng kwambulwiish mwiin-kweet mwaan-mukaj Alla wa mu Russie, mwiin mbaayend waakadyobw bumb mu bulok ni mushaal mwiindil bwa ku mulumbulwiishobw. Uleeleeb ney: “Bwa bwaal oobw nasambiil Yehow bwa kuyambulwiishey bwa kulangil ha kutakamin kudyey muyaakish ni bwa mim kulek kukooyel mu mikon. Namanyikil ney kuunyim kwa lutat oolw niiyiiy kuhet myand yilengel. Yehow wiiyiiy kubutul balwiish bindiy ni wiiyiiy kwiitubenesh.”

17. I biny biwudy mwa kulong bwa kuleej dyanyish bwa kutakamin kudy Yehow mwiitwaakish? (Tal cikwaabw cifwaatul.)

¹⁷ Ciwudy mwa kulong. Langil a myand yilengel yidy Yehow mukulay bwa mafuk maciiyiiy. Iifwanyikij mwiikal mu bulab buhyaabuhy bwa Mawej ni mabenesh mawiikal mwa kuhet. Makeng matudy naam kaabaak i ma “ciilung ciihiih” ha twiimafwafwanyikij ni musangal wutwiikaakal nend buyiil mu paradiiz. (2 Kor. 4:17) Nook, long cyoos ciwudy mwa kulong bwa kwambiloh baat bakwaabw myand yiwudy mwiitabij. Langil ha mushind udyobw bataatameen makab mu bulongolody bwa Sataan oobw ni mudyobw kabay bamanyik kiihacil ka Mawej bwa mafuk maciiyiiy. Udy mwa kukok meej maababw bwa kutakamin kwiitut kwa myand ya Bukaleng hakutang naab miisamb yiihiih.

18. Bwaabiny bikaam tuteekel milay ya Yehow micim?

¹⁸ Kuunyim kwa Yoobw muman kutaatameen makab mavul, wambiil Yehow ney: ‘Nady mumanyik ney uloolong byoos, kakwiish bwaal buwukaady muhangadik budy mwa kukukasakeen bwiibuh kwiibulong.’ (Yoobw 42:2) Teng bu mumanyikil Yoobw, kakwiish ciit ning cyaakaabumw cidy mwa kukaakeesh Yehow bwa kukumbajey kiihacil kindiy. Bwaal oobw budy mwa kwiitukakashish hatwended ni kutaatameen. Cileejel, lang ket ney maam kaahand ubeebeel ni mukooyel mu mikon bwaal ba docteer bavul kabiish bakokesh bwa kumondah. Ki hady docteer udy mumanyik bilengel lubeel lwindiy wumujaadikil ney wiiyiiy kumondah, maam oow umvumvw bilengel ning mudy lubeel lwindiy mwa kwiiy kuh kuunyim kwa mafuk mavul. Utaataatameen kaabaak mutakamin ney wiiyiiy kumvw bilengel. Bya mushind aakaabumw, tudy mwa kutungunuk ni kutaatameen bwaal tudy bajaadik ney milay ya Mawej habitaatal paradiz yiiyiiy kukumban biin-biin.

19. I myand kaay yitudy naay diijing bwiitut kutaatameen?

¹⁹ Teng mutubiibital, Jehow wiitwambambulwiish bwiitut kutaatameen makab miitut kuhicil ku diisambil, Diiy dindiy, biin Krist neet, ni kutakamin kwa mafuk maciiyiiy. Tut bakal mudimw bilengel ni biit bidy Yehow mwiitwaakish, wiiyiiy kwiitutabaleel mu makab moos matudy mwa kuhet mu bulongolody bwa sataan oobw teng ni hiikaley mwa kwiiy kwiibubutul.​—Fili. 4:13.