‘Iikalaay nulong cileeleeb Diiy dya Mawej’

1-2. Bilondeshel Jak 1:22-25, i biny biheehetesh biin mudimw ba Mawej musangal?

YEHOW ni Mwaan indiy udyey mukat bakaakaam ney twiikal ni musangal. Mufund a Misambw 119:2 uleeleeb ney: “Bady ni musangal, i biitaatab ku may mindiy, bakaam Mawej ni mucim aababw woos.” Yeez ujaadikil ney: “Bady ni musangal i aab bumvumvw Diiy dya Mawej, biidilond!”—Luuk 11:28.

² Bu mutudy bahambidil ba Yehow, tudy biin dyaakatook. Bwaabiny? Tudy ni tubingil tuvul, ki kabingil kady ni buseeb buvul i ka ney, tubaabal Diiy dya Mawej ha cimbidil, ni twiikashishomw bwa kulong bituloolongomw.—Bal Jak 1:22-25.

3. I musangal kaay utuheehet hatuloolong myand yitubaabal mu Diiy dya Mawej?

³ Tuheehet musangal mu mishind yivul ‘hatuloolong cileeleeb Diiy dya Mawej.’ Cileejel, hatukookooyel ku myand yituloolong mu Diiy dya Mawej, tusaasangej Yehow ni tuheehet byeet musangal. (Mul. 12:13) Hatukookooyel ku Diiy dya Mawej difundish ku bukash bwa spirit indiy, shikacil iitut a mu cisak uleelengel, ni bulund bwiitut ni biin-kweet baan-balum ni baan-bakaj bukaakasakan. Misang yikwaabw ukaady muman kutaloh bwaal oobw mu shikacil iibuh. Cikwaabw, tweeheehuk bilumbw bivul biheehet baat baleelek kulond may ma Yehow. Biin-biin, twiitaatab may maleebel Mukaleng Davih. Kuunyim kwa Davih muman kuteel may mumb, may matum, ni may maswiik ma Yehow, umanyik ney: “Kwiimalam kuheehetesh bulang bulengel.”—Mis. 19:7-11, NWT.

4. Bwaabiny kabiish teng biheehel bwa kukooyel ku myand yitubaabal mu Diiy dya Mawej?

⁴ Biin-biin, kabiish teng biheehel bwiitut kukooyel ku myand yitubaabal mu Diiy dya Mawej. Ning tut biikal ni bivul bya kulong, bikaam twiikashishomw bwa kwiikal ni diib dya kubal ni kulong Bibl bwa kumvw cidy Yehow mukat bwa ney tulong. Tutalaay myand yidy mwa kwiitwambulwiish bwiitut kwiikal kubal Bibl ha cimbidil. Twiiyiiy kukontonon ciikal mwa kwiitwambulwiish bwiitut kulangil ha bitubaabal ni kutal mishind yitudy mwa kukooyel ku bitubaabal mu shikacil iitut.

IITEEKEL DIIB DYA KUBAL DIIY DYA MAWEJ

5. I myand kaay yidyaakal yiitwangat diib divul?

⁵ Baat ba Yehow bavul bady ni bivul bya kulong mu shikacil yaababw. Tuhiihicishil diib divul ku myand yishiil-shiilangan yidy Bibl wiitulomb bwa kulong. Cileejel, bavul ba kutudy ook bakaakal midimw ya bikam bwa kwiiyambulwiish ni kukumbajil biin mu bisak byaababw bikaakaamobw. (1 Tim. 5:8) Biin Krist bavul bady ni balel baababw bakaady bakuluuh eecy babeebeel badyobw batabaleel. Ni bikaam tut boos tutabaleel makand miitut ma nyeet, ni biineeby, biitwangangat diib. Cikwaabw, tudy ni midimw yikwaabw ya buseeb ya kulong mu cisumbw. Ki mudimw a buseeb utudy nend i wa kwiikashishomw bwa kudiil baat musah a bukaleng ni cisumy. Ni myand yoos yitudy naay eey, i mushind kaay utudy mwa kubal Bibl diifuk dyoos, kulangil ha bitubaabal ni kukooyel ku bidyey uleeb?

6. I mushind kaay uwudy mwa kuteek kubal kwa Bibl ha cyaab cya kuuhal? (Tal cikwaabw cifwaatul.)

⁶ Kubal kwa Bibl, i bumw bwa ku “myand yidy ni buseeb buvul” bwiitut biin Krist, ki bwaabiny, bikaam twiibuteek ha cyaab cya kuuhal. (Fili. 1:10, NWT) Habitaatal muut udy ni musangal, musambw a kuuhal uleeleeb ney: ‘I mukat diilongweesh dya Mawej, wiidibal wambulul bufuk ni munyiny.’ (Mis. 1:1, 2) Biineeby, byumvumvwiij ney bikaam twiikal ni diib dya kubal Bibl. I diib kaay didy dilengel dya kubal Bbil? Dyaalabul didy mwa kwiikal dishiilangan bilondeshel muut. Ki cidy ni buseeb i cya ney bikaam tusungul diib diikal mwa kwiitwambulwiish bwiitut kwiikal kubal Bibl ha cimbidil. Mwiin-kweet dindiy Victor uleeleeb ney: “Nadyaakal mukat kubal Bibl kuhacy a mashik. Ning munadyaakal ciy mwimbidil kubuuk kuhacy ni bweh, i diib dilengel bwaal kakwiish myand yivul yidy mwa kukutacish. Lungeny lucidy lutalal ni nady mwa kulong ni meej moos mateek haakaabumw.” Ki muwuloolong byeeb eeny? Ijooj ney, ‘I diib kaay didy dilengel dya mim kwiikal kubal Bibl?’

LANGIL HA BIWUBAABAL

7-8. I biny bidy mwa kulong bwa kubal kwa Bibl kakulong kwiitwambulwiish? Umvwiij.

⁷ Uw mwiiteekel diib diibuh kwiikal kubal Bibl, bikaam udimukil ciit kaahand. Kudyaakal mwanj kubaloh ciit utal kuunyim kwa kalung kakeeh ukaady mwiicivulamin eeny? Bikaady biitufikiloh naak tut boos. Bidy mwa kwiitulongekel cikwaabw nook hatubaabal Bibl. Cileejel, tudy mwa kwangat dihangadik dya kwiikal kubal Bibl diifuk dyoos. I ciikacil cilengel. Ki bikaam twangat dihangadik dya nook ni twiikashishomw bwa kwiidikumbaj. (1 Kor. 9:26) Bikaam tulong bivul ha kufulok teng kubal kwa Bibl bituh tut biikal tukaam ney bitubaabal aaby biitwambulwiish.

⁸ Langil ha cileejel eecy: Mitond yidyaakal yikat mvul bwa kayilong yuum. Ki hady mvul ukahit buuny, muneet uvuuvul mu bulab. Mvul yikwaabw yivul yiy yitoh, mwanz kiish utweel mu bulab bwa kwambulwiish mitond. Bikaam ney mvul iikal utoh ku bikeeh ku bikeeh bwa mwanz iikal utweel mu bulab bwa mitond kusahukey. Bya mushind aakaabumw, bikaam tulek kubal Bibl lwang-lwang bwaal katwiish mwa kuhet diib dya kulangiloh, ni dya kwiibivuluk bwiitut kwiibikooyel.—Jak 1:24.

9. Tut biikal tubal Bibl lubil-lubil bikaam tulong biny?

⁹ Ukaady mutalok misang yikwaabw ney ubaabal Bibl lubil-lubil eeny? I biny biwudy mwa kulong? Bal bikeeh-bikeeh bwiibuh kulangil ha biwubaabal, eecy angatok diib hawumaaman kubal bwa kulangil ha biwubaabal. Kulong nook kakwiishoh bend kukasakan. Udy mwa kwangat dihangadik dya kuvudijok diib diwiiloolongel bwiibuh kuhet diib dya kulangil ha biwuloolong aaby. Eecy udy mwa kubalok verseh yikeeh, ni kwangat diib dishaashaal aady bwa kulangil ha biwubaabal. Victor utubaaman kuteel uleeleeb ney: “Nakaady nabal teng myand yikeeh bituh mu Bibl, misang yikwaabw, shapiitil umw bituh. Ni bu munabaabal kuhacy a mashik, naheehet mushind a kulangil ha binabaabal aaby mukacy mwa diifuk.” Udy mwa kusungul buuny bwa biit biibuh kubal, ki bidy ni buseeb bwa kubal bikeeh-bikeeh bwiibuh kuhet mushind a kulangil ha biwubaabal.—Mis. 119:97; Tal kazubw ka ney “Majooj mawudy mwa kwiiyiihanguj.”

10. Bilondeshel 1 Biin Tesalonik 5:17, 18, twaal cileejel cileeleej mushind uwudy mwa kukooyel ku biwuloolong?

¹⁰ Hawubaabal verseh kaahand, lang bwa mushind uwudy mwa kwiiyikooyel. Hawubaabal cituh kaahand cya mu Diiy dya Mawej, ijooj ney: ‘I mushind kaay unady mwa kukooyel bwaal oobw kaabaak eecy mu mafuk maciiyiiy?’ Cileejel, lang ket ney udy mubal 1 Biin Tesalonik 5:17, 18. (Bal.) Kuunyim kwa uw muman kubal verseh yibidy eey, udy mwa kwanj kwiimanakan, ni kulang bwa buuny bwa misang ni mushind uwudyaakal usambil. Cikwaabw, udy mwa kulangil ha myand yiwudyaakal wanyish. Misang yikwaabw, udy mwa kwangat dihangadik dya kufwiijok Yehow bwa myand yisat yisunguluk. Ning uw mwiikal ulangil bituh minit yikeeh ha malongweesh ma mu Bibl, biiyiiy kukwambulwiish bwiibuh kumvw Diiy dya Mawej ni kulong cileeleebedy! Uw mwiikal ukooyel diifuk dyoos ku biwubaabal mu Bibl, mu buuny bwa mafuk wiiyiiy kwiikal mwiin mudimw a Yehow mulengel. Ki bikaam ulong biny uw mutal ney udy ni bivul bya kulong?

IFUNDIL BIIHACIL BIWUDY MWA KUKUMBAJ

11. Bwaabiny udy mwa kwiiyumvw mukooy misang yikwaabw? Twaal cileejel.

¹¹ Hawubaabal Bibl, udy mwa kwiiyumvw misang yikwaabw mukooyel mu mikon bwaal udy mutal ney kucidy myand yivul yiwudy mwa kulongolol mu shikacil iibuh. Langil ha bwaal oobw: Leeloow, kubal kwiibuh kwa Bibl i kwiimanyin ha mubel habitaatal kabow. (Jak 2:​1-8) Utaatal ney bikaam ulongolol mushind uwuloolongel bakwaabw myand, ni wangat dihangadik dya kushintuluk. Kulong nook, i kulengel. Diifuk diloolond, ubal verseh yileeleej buseeb bwa kudimukil biwuleeleeb. (Jak 3:1-12) Umb uvuluk ney misang yikwaabw waakady muhatul may mady kamay makashish bakwaabw. Ni wangat dihangadik dya kwiikal kuleeb may makaakashish bakwaabw. Kubal kwiibuh kwa Bibl kwa diifuk diloolond kwiiy kukudimush bwa kulek kukat myand ya ha bulab. (Jak 4:4-12) Umb utal ney bikaam udimukil bikasakan myand yiwubaabal, yiwutaatal, ni yiwumvumvw. Diifuk diloolond, udy mwa kulang ney i bikasakan bwiibuh kukumbaj myand eey.

12. Bwaabiny kabiish bikaam ukooyel mu mikon uw mutal ney, hawubaabal Bibl uheehet teng myand kaahand yiibuh kushintulul? (Tal cikwaabw dimanyish dya kuush kwa diibij.)

¹² Biby biikal bikaam ney ushintulul yimw myand, kulongoh bend waakooyel mu mikon. Biineeby bileeleej ney udy ni mucim a mund mulengel ni kwiihweekesh. Muut mwiin kwiihweekesh, ubaabal Bibl ni lungeny lwa kutal myand yidyey mwa kushintulul mu shikacil indiy.a Vuluk kabidy ney, kuvwaal “buumuut buhyaabuhy,” i bwaal budy kabuy ni bulekel. (Kol. 3:10) I biny biikal mwa kukwambulwiish bwiibuh kutungunuk ni kulong biwubaabal mu Diiy dya Mawej?

13. I mushind kaay uwudy mwa kwiifundil biihacil biwudy mwa kukumbaj? (Tal cikwaabw cifwaatul.)

¹³ Hamut hiibuh kuteet bwa kukooyel ku myand yoos yiwudy mubal, udy mwa kutwaadij ni bwaal bumw eecy myand yibidy. (Tus. 11:2) Anj teet kulong nook, fund myand yiwukaakaam kulong ha diibij, ni usungul bwaal bumw eecy myand yibidy yiwukaakaam kwanj kukumbaj, ushiy bikwaabw biibuh kwiiy kukumbaj kuunyim. Udy mwa kutangil kweeh?

14. I biihacil kaay biwudy mwa kutang naaby?

¹⁴ Udy mwa kutang ni kiihacil kady kaheehel bwiibuh kukumbaj. Eecy udy mwa kusungul bwa kushintulul nang-nang bwaal buwudy mutal ney bikaam wiibushintulul mu shikacil iibuh. Uw muman kumanyik kiihacil kiibuh, kaamunun myand mu mikand yiitut, kal mudimw ni Index des publications des Témoins de Jéhovah eecy Mukanda wa makebulula wa Bantemu ba Yehowa. Sambil Yehow bwiibuh kufik ‘ku kukat ni ku kulong myand’ bilondeshel kiihacil kiibuh. (Fili. 2:13) Ni tang kwiikashishomw bwa kukooyel ku biwuloolong. Uw mukumbaj kiihacil kiibuh kaakuuhal, wiiyiiy kuhet diikand bwiibuh kukumbaj kiihacil kakwaabw. Biin-biin, uw mulengej shikacil iibuh a bwiin Krist eecy ciikadil cya bwiin Krist, biiyiiy kwiikal biheehel misang yikwaabw bwiibuh kushintulul biikadil bikwaabw.

LEKAAY DIIY DYA MAWEJ ‘DIKAL MUDIMW MUND MWIINUN’

15. Bilondeshel 1 Biin Tesalonik 2:13, i mushind kaay udy baat ba Yehow bashiilangan menmen ni baat bakwabw babaabal Bbil?

¹⁵ Bamw baat baleeleeb ney bakaady babal Bibl mutuutul misang yivul. Ki biitaatabok bidy Bibl ulongweesh eeny? Biibikookooyelok eecy biibaabambulwiishok mu shikacil aababw eeny? Waakweeh, baat bavul kabiishoh bend bakooyel ku mibel ya mu Bibl. Ki baat ba Yehow i bashiilangan naab! Teng bu biin Krist ba mu siyekel a kuuhal, twiitaatab ney Bibl i “diiy dya Mawej teng mudyedy biin-biin.” Ni twiikaakashishomw bwa kukooyel ku mibel ya mu Bibl mu shikacil iitut.—Bal 1 Biin Tesalonik 2:13.

16. I biny bidy mwa kwiitwambulwiish bwiitut kwiikal kulong cidy Diiy dya Mawej dileeb?

¹⁶ Kabidyaakal teng biheehel bwa kubal ni kukooyel ku Diiy dya Mawej. Bidy mwa kwiitukasakeen bwa kuhet diib dya kubal. Eecy tudy mwa kwiikal tubal lwang-lwang ni tukaakal bwa kulangil ha bitubaabal. Eecy tudy mwa kwiiyumvw bakooyel mu mikon bwa myand yoos yitukaakaam kulongolol. Ning lutat lwiibuh lwiikal lwa bicy, kalwiish mwa kukuhit diikand. Ku dyambulwiish dya Yehow, udy mwa kwiilucimun. Twiikalaay biiswiik bwa kwiitab dyambulwiish dindiy ni bwa kwiikal kulong cidy Diiy dya Mawej dileeb hamut iitut kwiikal kwiidyumvw bituh ni kwiidivulamin. Biin-biin, tut biikal tubal Diiy dya Mawej ni twiidikooyel mu shikacil iitut, twiiyiiy kwiikal ni musangal.—Jak 1:25.