Ekitsweka 11
Omusingi ow’Ekihugho Kihya-kihya Lino Anemukolhwa
1, 2. Omw’ibererera ly’obuminyereri bwe Biblia, ni kyahi ekya thukalhangira ikine mubererera?
KANDI eyindi nzumwa mbuya yiri yithi omusingi ow’ekihugho kya Nyamuhanga ekihya-kihya ane mukolhwa lino, ekihugho ekikulhu-kulhu ekya Sitani nakyo kine musenzeghethekerera. Ngoku thune mulhangira, Nyamuhanga ane mukuma-kuma abandu erilhua omwa bihanda byosi n’eribakolha mw’omusingi ow’ekithunga ky’ekihugho ekihya-kihya ekikendi syasuba omwa mwanya w’ekihugho kino ekithe omwa bughuma. Omwa Biblia, omwa 2 Petero 3:13, ekithunga ekihya-kihya eki kikahulhawa mwa “kihugho kihya-kihya.”
2 Kandi obuminyereri bwe Biblia bukabugha buthi: “Okwa biro by’enyuma [obuthuku obwa thulimu] . . . , ebihanda bingyi byasya bugha bithi: ‘mwase, thuhethukire okwa kithwe ky’Omwami Mukulhu [eriramya liwe ery’ekwenene], . . . nayo athoke erithukangirirya esyonzira siwe, nethu ithwa thoka erilendera omwo syombalhu siwe.’”—Isaya 2:2-3.
3. (a) Obuminyereri bwa Isaya bune mubererera oku bahi? (b) Ekitabu ky’erighunzerera ekye Biblia kikakanaya kithi ki okw’eki?
3 Obuminyereri obu bune mubererera lino okw’abo abakaligha ‘esyonzira sya Nyamuhanga n’erilendera omwa syombalhu siwe.’ Ekitabu ky’erighunzerera omwa Biblia kikakanaya okwa kithunga ky’abandu eky’ekihugho kyosi ekyanzire obuholho nge ‘ndeko nene erilhua omwa buli kithunga, n’ebihanda byosi, n’abandu bosi, n’emibughe yosi,’ olhughanda lhw’abalikyethu olhw’ekwenene olhw’omwa kihugho kyosi olhukakolera Nyamuhanga omwa bughuma. Kandi e Biblia yikabugha yithi: “Aba ni bandu abakalhua omw’endererya linene.” Eki kikamanyisaya kithi bakendi syalhama enduli ey’omughulhu mubi ono.—Eribisulirwa 7:9, 14; Matayo 24:3.
Olhughanda lhw’Ekwenene olhw’Abalikyethu olhw’Ekihugho Kyosi
4, 5. Ekikaleka olhughanda olhw’abalikyethu olhw’ekihugho kyosi olhw’Abema ba Yehova ilhwa thokekana niki?
4 Esyomiliyoni sy’Abema ba Yehova banemulengaho kutsibu erighendera okwa bihano n’esyonzira sya Nyamuhanga. Amaha abu aw’engebe y’erikotha aseghemere okwa kihugho kya Nyamuhanga ekihya-kihya. Bakabya bakaghendera okwa bihano bya Nyamuhanga omwa syongebe syabu buli kiro, bakabya ibakamukanganaya ngoku banzire eribya omwisi sy’emithabalire yiwe lino n’omwa kihugho kihya-kihya. Ehosi-hosi, nomubangabya ini b’ekindi kihanda kutse rangi ey’omubiri, bakakenga emisingi iyane mighumerera—eya Nyamuhanga abirihira omwa Kinywe kiwe. Kya kikaleka ibabya lhughanda lhw’ekwenene olhw’abalikyethu olhw’ekihugho kyosi, ekithunga eky’ekihugho kihya-kihya ekya Nyamuhanga akakolha.—Isaya 54:13; Matayo 22:37, 38; Yoane 15:9, 14.
5 Abema ba Yehova sibali yihalhamba ahabw’eribya ibali omwa lhughanda olhw’embaghane olhw’abalikyethu olhw’ekihugho kyosi. Bakyasi ngoku eki kikabya busana n’obuthoki obw’omulimu wa Nyamuhanga ow’akalhangirika omw’abandu abakaghondera ebihano biwe. (Emibiri 5:29, 32; Abanya Galatia 5:22, 23) Nyamuhanga yukakikolha. Ngoku Yesu abugha, “emyatsi eyitha thokekana okw’abandu, yikathokekana oku Nyamuhanga.” (Luka 18:27) Kwesi Nyamuhanga oyuwaleka obuhangwa bwosi ibwa thokekana yukaleka n’ekithunga eky’ekihugho kihya-kihya ikya thokekana.
6. Busana naki olhughanda lhw’abalikyethu olhw’Abema ba Yehova lhukahulhawa mw’ekithiko-thiko omwa buthuku obwa munabwire?
6 Busana n’ekyo, emithabalire ya Yehova ey’omwa kihugho kihya-kihya yangana lhangirwa lino omwa ebya ane muhulhukya omwa musingi ow’ekihugho kihya-kihya owane mukolhwa lino. Kandi ekyabirikolha omw’Abema biwe, okwa lhulengo lhulebe, ni kithiko-thiko ekya munabwire. Busana naki? Kundi abirikolha Abema ba Yehova mw’olhughanda olhw’abalikyethu olhw’ekihugho kyosi, olhuthe lhwanga ghabanisibwa busana n’erilhua omwa bihanda, erangi, kutse amadini muthina-muthina. Nomwakine indi Abema ni syomiliyoni kandi bali omwa bihugho ebilhabire omu 235, bali omwa bughuma obuthe bwanga thwika. Olhughanda olhw’abalikyethu olhu olhw’ekihugho kyosi olhw’embaghane omw’ibyaho ly’omundu, kwenene ni kithiko-thiko omwa buthuku obwa munabwire—Nyamuhanga yukalhukolha.—Isaya 43:10, 11, 21; Emibiri 10:34, 35; Abanya Galatia 3:28.
Eriminyikalya Abandu ba Nyamuhanga
7. Yesu mwabugha athi ekyanga minyikerye abigha biwe ni kyahi?
7 Thwang’ongera thuthi eriminyikalya abandu aba Nyamuhanga akakolesaya ng’omusingi ow’ekihugho kihya-kihya kiwe? Mbwino, ni bahi abakaberereraya ebinywe bya Yesu ebiri omu Yoane 13:34, 35? Mwabugha athi: “Ngabaha ekihano kihya-kihya nyithi, mwanzane, ngoku nabiribanza, nenyu mwanzane muthya. Neryo mwamabya n’olhwanzo, omughuma busana n’owundi, abandu abosi basyaminya kwa muli bigha baghe.” Abema ba Yehova bakaligha ebinywe bya Yesu kandi bakaghendera kubyo. Ngoku Ekinywe kya Nyamuhanga kikahana, ‘banzene kutsibu.’ (1 Petero 4:8) Bawithe “omuthima w’olhwanzo olhukahikanaya ebyosi haghuma omwa bughuma.” (Abanya Kolosai 3:14) Kwesi olhwanzo ye “gamu” eyikabamathanaya haghuma omwa kihugho kyosi.
8. 1 Yoane 3:10-12 hakathasy’ongera hathi eriminyikalya abandu ba Nyamuhanga?
8 Kandi, 1 Yoane 3:10-12 hakabugha hathi: “Abaana ba Nyamuhanga n’abaana ba Sitani baminyikere. Oyuthe kolha ebithunganene, kutse omundu oyuthanzire mulikyabu, abo si baana ba Nyamuhanga! Kusangwa omwatsi owa mwowa eritsuka erimbere w’oyu: Thwanganzana. Sithubye nga Kaina, oyuwabya w’omubi oyo, neryo mwitha mulhumuna wiwe.” Kwesi, abandu ba Nyamuhanga ng’olhughanda olhw’abalikyethu olhw’ekihugho kyosi sibatsururu.
Ekindi Kindu Ekikabaminyikalhaya
9, 10. (a) Ni mubiiri wahi owangabere iniakaminyikalhaya abaghombe ba Nyamuhanga omwa biro by’enyuma-nyuma? (b) Abema ba Yehova babiriberererya bathi Matayo 24:14?
9 Hane ekindi kindu ekikaminyikalhaya abaghombe ba Nyamuhanga. Omwa buminyereri bwa Yesu obuhambire okwa nduli y’ekihugho kino, mwakania okwa bindu binene ebyanga kanganirye obuthuku buno ng’ebiro by’enyuma-nyuma. (Lebaya Ekitsweka 9.) Ekindu kikulhu omwa buminyereri obu mwakikaniako omu Matayo 24:14: “Engulhu yuwene y’obwami eyi yasyatsuka erithulhughanibwa omwa kihugho kyosi busana n’eriminyisya ebihanda byosi, neryo enduli yasyahika.”
10 Thune thwalhangira obuminyereri obu bukabererera? Ee. Erilhua ah’ebiro by’enyuma-nyuma bikathatsukira omwa 1914, Abema ba Yehova babirithulha engulhu yuwene ey’Obwami bwa Nyamuhanga erithimba omwa kihugho kyosi ngoku Yesu alhaghira, ni bugha mbu, erighenda okw’amanyumba w’abandu. (Matayo 10:7, 12; Emibiri 20:20) Esyomiliyoni esy’Abema sikaghendera abandu omwa bihanda byosi eribakanirya omwatsi owahambire okwa kihugho kihya-kihya. Eki kyabirileka nawu iwabana akatabu kano, kundi omubiiri ow’Abema ba Yehova mwamuli erihulhukya n’erighaba esyobbiliyoni esy’ebitabu ebihambire okw’Obwami bwa Nyamuhanga. Wunasi abandi bandu abosi-bosi abakathulhughanaya Obwami bwa Nyamuhanga nyumba kwa nyumba erithimba omwa kihugho kyosi? Na Mariko 13:10, NW, hakakanganaya hathi omubiiri ow’erithulhughania n’erikangirirya oyu atholere “iniatsuka” erikolhwa enduli yithe yahika.
Erisubirya Omwatsi Mukulhu Owakabiri
11. Ni kindi kindu kyahi eky’Abema ba Yehova bakaberereraya bakaghondera obuthabali bwa Nyamuhanga?
11 Abema ba Yehova erighondera ebihano n’emisingi ya Nyamuhanga, bakabya ibakaberereraya ekindi kindu. Bakakanganaya ngoku Sitani abiha akabugha athi abandu sibangabya bathaleghulha bamalengwako, omwa nzira eyi thukabya ithukasubiraya okw’omwatsi mukulhu owakabiri owahambire okwa buthaleghulha bw’abandu. (Yobu 2:1-5) Kundi ni kithunga eky’esyomiliyoni sy’abandu erilhua omwa bihanda byosi, ng’ekithunga kighuma, Abema bakakanganaya obuthaleghulha okwa buthabali bwa Nyamuhanga. Nomwakine indi ni bandu abathahikene, bakasighika olhuhandi lhwa Nyamuhanga omw’omwatsi ow’erithabalha ebihangwa byosi, nomuhane amathebo wa Sitani.
12. Abema bakagherereraya ndi omw’ikirirya lyabu?
12 Munabwire, esyomiliyoni esy’Abema ba Yehova erikangania obuthaleghulha bakayongera okw’omulhondo muli-muli ow’abema ab’omwa buthuku obw’enyuma abakanganaya obuthaleghulha bwabu oku Nyamuhanga. Abaghuma b’okw’aba ni Abeli, Noa, Yobu, Abrahamu, Sara, Isaka, Yakobo, Debora, Ruta, Dawudi, na Danieli. (Abaebrania, sura 11) Bali, nge Biblia kwa yikabugha, “endeko nene y’abalhangiri [abema]” abathaleghulha. (Abaebrania 12:1) Aba n’abandi imwamuli abigha ba Yesu mubathaleghulha oku Nyamuhanga. Na Yesu eyuwene-wene mwahira h’eky’erileberyako ekilengireyo eky’erilholha embere erikangania obuthaleghulha obuhikene.
13. Ni binywe byahi ebya Yesu akanaya ebihambire oku Sitani ebyabiri lhangirika ngoku ni by’ekwenene?
13 Eki kikakakasaya ebya Yesu akaniraya abasondoli b’edini ebihambire oku Sitani ngoku ni kwenene: “Ingye nabiribabwira omwatsi w’ekwenene owa Nyamuhanga ambwira. Nikwa mukasonda-sonda erinyitha. . . . Inywe muli baana bathatha wenyu Sitani, kandi esyongumbu sya thatha wenyu, syo mwanzire erikolha. Iyo ni mwithi. Syali mw’omwatsi w’ekwenene, kusangwa sihali mwatsi w’ekwenene omwa muthima wiwe. Omughulhu akabugha amabehi, akabugha ebiwe iyuwene, kusangwa ni mubehi, kandi ni ise w’amabehi.”—Yoane 8:40, 44.
Erithwamu Lyawu Ni Ryahi?
14. Ni kyahi ekine mubya okwa musingi ow’ekihugho kihya-kihya lino?
14 Omusingi ow’ekihugho kihya-kihya owa Nyamuhanga ane mukolha lino omwa kithunga eky’ekihugho kyosi eky’Abema ba Yehova ane mwongera erighuma kutsibu. Obuli mwaka esyonkumi sy’abandu bane mukolesya obwiranda bwabu obw’eriyithwiramu, obuseghemere okw’iminya erihikire, eriligha obuthabali bwa Nyamuhanga. Bakabya baghuma b’okwa kithunga eky’ekihugho kihya-kihya, bakasighika olhuhandi lhwa Nyamuhanga omw’omwatsi mukulhu ow’erithabalha ebihangwa byosi, n’erikangania Sitani kwa ni mubehi.
15. Ni mubiiri wahi ow’erisolholha owakendi kolhwa omwa buthuku bwethu?
15 Kundi babirisombolha obuthabali bwa Nyamuhanga, bakendi syahirwa okwa ‘byalha by’amalya’ ebya Kristo akasolholha “esyombuli” sy’okwa “syombene-hene.” Omwa buminyereri bwa Yesu obuhambire okwa biro by’enyuma-nyuma, mwalhaghulha athi: “Ebihanda byosi byasyahindanibwa embere siwe; kandi asyasolholhabo ng’omulisya kw’akasolholha esyombuli omwa mbene-hene. Asyahira esyombuli okwa byalha biwe by’amalya, n’esyombene-hene okw’amalembe.” Esyombuli b’abandu ab’omuthima mwolho ababiriwathikya n’erisighika baghalha babu Kristo kandi babakaghondera obuthabali bwa Nyamuhanga. Esyombene-hene b’abandu abathyowa ababirighana baghalha babu Kristo n’erighana erisighika obuthabali bwa Nyamuhanga. Ekikendi syalhwiririramu ni kyahi? Yesu mwabugha athi: “Aba [esyombene] basyaghenda omw’isuyirwa ly’erikotha, nikwa abathunganene [esyombuli] basyaya omwa ngebe y’erikotha.”—Matayo 25:31-46.
16. Ni kyahi ekya wutholere erikolha wamabya wanzire erisyabya omwa Paradiso eyikayasa?
16 Omwa kwenene, Nyamuhanga athutsomene! Omwa buthuku obuthe bwahali akendi thuha ekihugho paradiso ekikatsemesaya. Wunanzire erisyabya omwa Paradiso eyo? Wamabya iwunanzire, kanganaya ngoku wukasima esyondegheka sya Yehova omw’igha ebimuhambireko n’erikolesya ebya wuk’igha. ‘Musonda-sondaye Yehova omughulhu akina banika; mumulhakire omughulhu akine hakuhi. Omubi aleke enzira yiwe, n’omundu athathunganene aleka amalengekania wiwe. Asube oku Yehova, nayu asyamughanyira.’—Isaya 55:6, 7.
17. Busana naki sihakiri endambi ey’eritsandya wukasombolha oyo wukendi kolera?
17 Sihakiri endambi ey’eritsandya. Enduli ey’omughulhu mubi ono yiri hakuhi-kuhi. Ekinywe kya Nyamuhanga kikahabulha kithi: “Simwanze ekihugho, kutse emyatsi ey’ekihugho. Omundu amanza ekihugho syawithe olhwanzo lhwa Thatha . . . N’ekihugho n’esyongumbu syakyo byasyahwa. Nikwa oyukakolha erisonda lya Nyamuhanga asyakotha kera na kera.”—1 Yoane 2:15-17.
18. Ni kyahi ekya wangakolha nuku wulindirire ahathe erithika-thika erisyabya omwa kihugho kya Nyamuhanga ekihya-kihya eky’eriswekya?
18 Abandu ba Nyamuhanga bane mukangiriribwa lino busana n’eribana engebe y’erikotha omwa kihugho kihya-kihya. Bane mwigha emyatsi ey’obunyakirimu n’eyindi mibiiri eyikayithaghisibawa eryuwania e paradiso. Thukakuhabulha thuthi wusombole Nyamuhanga ng’Omuthabali kandi wusighike omubiiri owakalhamaya esyongebe owa akabugha athi akolhawe munabwire omwa kihugho kyosi. Igha e Biblia n’Abema ba Yehova, neryo wanaminya Nyamuhanga oyukutsomene kundu n’oyukendi syaghunza h’eriaghalhwa. Wamakolha eki iwanganabya mughuma w’okwa musingi ow’ekihugho kihya-kihya. Neryo iwangana lindirira ahathe erithika-thika ngoku wukendi bana emighisa ya Nyamuhanga n’erisyabyaho kera na kera omwa kihugho kihya-kihya eky’eriswekya.
[Ekisasani okwa lhupapura 31]
Abema ba Yehova bawithe olhughanda lhw’ekwenene olhw’abalikyethu olhw’ekihugho kyosi
[Ekisasani okwa lhupapura 32]
Omusingi ow’ekihugho kya Nyamuhanga ekihya-kihya lino ane mukolhwa