Erisomo 10

Ebikakolhawa Ebya Yehova Aponire

Wangalhangira uthi ebindu ebya Yehova akabugha athi ni bibi? (1)

Ni lhuthetho lhusosire lhuthi olhuthatholere? (2)

Omukristayo akalhangira athi amabehi? (3) erisatha ejara? (3) eriba? (3) obwithi? (4)

obukumu? (5) obuthamiri? (6)

Neryo omundu anganaleka athi emitse mibi eyi? (7)

1. Abaghombe ba Yehova banzire e bibuya. Aliriryo batholere erigha eripona n’ebibi. (Esyonyimbo 97:10) Kikamanyisaya eriyihighulha okwa mitse eya Yehova aponire. Ni nga mitse yahi eyo?

2. Obusingiri: Erilhalha no mundu wuthe wathahya, oburaghane, erilhalha n’ekisoro, erilhalha n’omuhughu wawu, kandi n’abalhume kutse abakali abakathethana ebyosi ebi nibibi kutsibu eyiri Yehova. (Abalawi 18:6; Abanya Roma 1:26, 27; 1 Abanya Korinto 6:9, 10) Omulhume n’omukali bamabya ibikere haghuma omwa nyumba kandi isiba lungire, anguli ibalekangana kutse bithe bithya ibalunga ng’ebiraghiro kwa bibughire.—Abaebrania 13:4.

3. Amabehi, Ejara, Obwibi: Yehova syangayitheba. (Tito 1:2) Abandu abanzire erikiriribwa nayu anguli ibayihighulha okw’amabehi. (Emisyo 6:16-19; Abanya Kolosai 3:9, 10) Obuli jara yosi yosi yiri mwomururu. Litya Abakristayo sibalisatha jara yosi yosi eye’syasente, ng’obululu, amalingwatha w’esabayiri, n’akarata. (Abanya Efeso 5:3-5) Kandi Abakristayo sibaliba. Sibalighulha ebindu by’obwibi bamakiminya kutse erithwalha bindu byosi byosi bathalyahamulhawa.—Eriluayo 20:15; Abanya Efeso 4:28.

4. Erihithana, Obwithi: Erihithana lyamathindikakiribwa lyangakolya okwitha. (Enzuko 4:5-8) Omundu w’obwithi syangabya munywani wa Yehova. (Esyonyimbo 11:5; Emisyo 22:24, 25) Sikyowene erithuhulya kutse eriliha ekibi habwebibi ebyabandi bangathukolha.—Emisyo 24:29; Abanya Roma 12:17-21.

5. Erilhogha n’Obusaki: Abandi bandu bakakolesaya akaghalha k’ebirimu erilengaho erilhamya amalhwere. Abandi bakalhogha esyonzighu syabo eribalhwalya kutse n’eribitha. Obuthoki obuli enyuma w’ebikakolhawa ebi ni Sitani. Busananeki Abakristayo sibatholere eriyingirya omwa bindu ebyo. (Eryibuka Ebihano 18:9-13) Eriyithunda hakuhi na Yehova bwa bulindi obusingireyo kutsibu abandi bamanza erithulhogha.—Emisyo 18:10.

6. Obuthamiri: Si kibi omundu amanywa okwa wayini, ebiya, kutse okwa byangathamirya ebindi. (Esyonyimbo 104:15; 1 Timoteo 5:23) Aliriryo erinywa kutsibu n’obuthamiri ni bibi embere sya Yehova. (1 Abanya Korinto 5:11-13; 1 Timoteo 3:8) Erinywa kutsibu lyanganatsandya engebe yaghu kandi n’erisambulha amaka aghu. Kandi lyanganaleka iwawa lhuba omw’irengwako erindi.—Emisyo 23:20, 21, 29-35.

7. Abandu abakakolha ebindu ebya Yehova akabugha athi nibibi “sibendisyingira omwa bwami bwa Nyamuhanga.” (Abanya Galatia 5:19-21) Wamabya iwunanzire Yehova kwenene, kand-iwunanzire erimutsemesya, wanganaleka emitse eyi. (1 Yoane 5:3) Igha eripona ebya Yehova akabugha athi nibibi. (Abanya Roma 12:9) Siba n’abandu abakanza erikolha Yehova byanzire. (Emisyo 13:20) Abakristayo abakulire bunyakirimu banganabya nzuko yerikuwathikya. (Yakobo 5:14) Erilhaba ebyosi, yeghemeraye obuwathikya bwa Yehova erilhabira omwisaba.—Abanya Filipi 4:6, 7, 13.

[Ebisasani okwa lhupapura 20]

Yehova aponire obuthamiri, eriba, ejara n’emibiri y’obwithi