Eriaghalhwa Lyosi Likisiya Iryahwa!

Okwa buthuku bulebe omwa ngebe yawu, obundi wabiri yibulya wuthi, ‘Busana naki hali eriaghalhwa lingi?’ Ahabw’esyankumi sy’emyaka, abandu babiriaghalhwa kutsibu omwa syonyuhi, obusama, ebihunzo, erithwa ebilhaghiro, obuthe bulingirirania, amalhwere, n’olhuholho. Emyaka kikumi eyihwere abandu babiri bana eriaghalhwa lingi kwilhaba enyuma. Mbwino, eriaghalhwa lyosi eri lina mwendi syahwa?

Erisubirya erikahumulikanaya ni ee, kandi liri hakuhi n’erihwaho! Ekinywe kya Nyamuhanga e Biblia kikabugha kithi: ‘Ababi basyabulirana. Nikwa abakayikehaya basyikalha ndeke omwa kihugho, basyayitsemera omwa buholho bunene.’ Habw’omughulhu mungahi? ‘Abathunganene basyikalha omwa kihugho mwa buholho n’erisighalya kyo kera na kera.’​—Esyonyimbo 37:10, 11, 29.

Nyamuhanga akendi syabya abirihaho obubi n’eriaghalhwa, ekihugho kikendi syabindulhwa mwa paradiso. Neryo abandu basyathoka er’ikalha omw’amaghalha awuwene n’omwa butseme. Ekinywe kya Nyamuhanga kikalhaghulha kithi: ‘Asyasangulha emisoni yosi okw’ameso wabu kandi olhuholho silhwendi syaswabyaho, erisusumana kutse eririra kutse eriaghalhwa.’​—Eribisulirwa 21:4.

Omwa kihugho kihya-kihya ekyo, abaholi nabu bakendi syasuba okwa ngebe nuku nabu babane okwa mighisa eyo: ‘Hasyabya erilhubuka ly’abathunganene abathathunganene.’ (Emibiri 24:15) Kyakyaleka Yesu Kristo inyabwira omukolha nabi oyuwa mw’ikiriraya athi: “Wukendi syabya haghuma nayi omwa Paradiso.”​—Luka 23:43, New World Translation.

Ekyaleka Eriaghalhwa Iryatsuka Niki?

Nyamuhanga amabya imwa theghekera abandu eribya omwa mughulhu mubuya owakayasa, busana naki mwalekerera eriaghalhwa litsuke? Ekyalekire inya lekerera lyo ahabw’omughulhu muli niki?

Omughulhu Nyamuhanga ahangika Adamu na Eva, Mwa bahangika ibahikene omwa mubiri n’omw’amenge. Mwabahira omw’irima paradiso n’eribaha omubiiri ow’erikolha owuwene. E Biblia yikabugha yithi: ‘Nyamuhanga mwalhangira obuli kindu ahangika, thalebaya kwa kyuwene kutsibu!’ (Enzuko 1:31) Kwa bwowa Nyamuhanga, banga buthire abaana abahikene, n’ekihugho kyosi ky’angabere ikya biribya paradiso, aho abandu bang’ikere kera na kera omwa buholho n’etseme.

Nyamuhanga mwahira omu Adamu na Eva mw’ekihembo ekyuwene eky’obughabe bw’eriyithwiramu ng’ekindu ky’obuhangwa omwa mundu. Sibangabere ng’egadi-gadi eyithe n’amenge eyikalholha aha bakasukumayo hasa. Aliriryo, etseme yabu eyithabahwa yabya yisighikire okw’ikolesya ndeke obughabe bwabu obw’eriyithwiramu—erikenga ebihano bya Nyamuhanga. Nyamuhanga akabugha athi: ‘Ingye indi Mwami Mukulhu Nyamuhanga wawu, oyukakukangiriraya wubane endundi, oyukakusondolha omwa nzira eyo wanga lenderamu.’ (Isaya 48:17) Erithendi kolesya ndeke obughabe bwabu bw’eriyithwiramu kyanga lhwiririre mw’akabi, kusangwa abandu mubatha hangikwa erisingura ibana yighabwire oku Nyamuhanga. E Biblia yikabugha yithi: ‘Nyinasi kw’enzira y’omundu siyiri omwisi wiwe, kandi siyiri omwisi w’omundu oyukalendera erisondolha olhughendo lhwiwe.’​—Yeremia 10:23.

Eky’obulighe, ababuthi bethu ab’erimbere mubayowa nga bangana yighabulha oku Nyamuhanga kandi ibasingura omwi yisondolha. Aliriryo babere baghana obuthabali bwa Nyamuhanga, mwa lekeraho eritheya emibere eya babyamu eyihikene. Neryo mubatsuka eritsotsobera erihika aho bakekelhuhira n’eriholha. Kusangwa thuli baana babu, thwabiri sighalya obuthahikana obwo n’olhuholho.​—Abanya Roma 5:12.

Omwatsi Mukulhu Owahambire okw’Oyuwithe Ehamuli y’Erithabalha

Ekyaleka Nyamuhanga inyathathoghothya Adamu na Eva neryo akatsuka erihangika abandi bandu babiri niki? Kusangwa obuthabali bwa Nyamuhanga obw’erithabalha ebihangikwa byosi, ni bugha ambu, ehamuli yiwe ey’erithabalha, muya hakanisibwa. Ekibulyo kyabya kithi, Nindi oyuwithe ehamuli ey’erithabalha, kandi obuthabali bwandi bwa butholere? Mbwino, Abandu banganabere ndeke bathalya thabalhawa na Nyamuhanga? Omw’ibaha obuthuku obukaghunza balengesaye eriyithabalhako ndeke, Nyamuhanga anga hirireho eky’erisubirya murundi mughuma musa erihika kera na kera, nga bangabere ndeke omwisi sy’obuthabali bwiwe kutse ibo eriyithabalhako. Obuthuku obwa lighirawa bwabya butholere ibwabya buuli ndeke nuku abandu balengesaye obuli miringo yosi ey’obuthabali, ey’obusubure, n’ey’ekidini ebithe omwa busondoli bwa Nyamuhanga.

Ekya lhwiririremu niki? Ebyafayo by’abandu ahabw’esyankumi sy’emyaka bikathubwira indi hamabiribya eriaghalhwa linene kutsibu. Omwa kighonye ekihwere, abandu babiribana eriaghalhwa erikalire kutsibu kwilhaba enyuma. Obukekulhu bw’abandu mub’ithibwa omwa Lhuhi olhwa kabiri olhw’ekihugho kyosi. Abandu abalhabire omwa bukekulhu 100 babiri kwira omwa syonyuhi. Erithwa ebilhayiro n’ebikorwa by’obwithi byabiri kanyirira kutsibu. Erikolesya emibatsi ya nabi lyabiri kanyirira omwa kihugho. Amalhwere awakalethawa n’obusingiri akongera eriyitsatsanga. Obukekulhu bungi obw’abandu bakaholha buli mwaka busana n’esyonzalha n’esyondwalha. Amaka n’esyangeso esyuwene byabiri tsotsobera ehosi-hosi. Sihali obuthabali bw’abandu obwanga ghunzaho ebitsibu ebi. Sihali obuthabali n’obughuma obwabiri ghunzaho erikekelhuha, erilhwalha n’olhuholho.

Emibere y’abandu yiri ngokwa e Biblia ya lhaghulha busana n’obuthuku bwethu. Ekinywe kya Nyamuhanga kikabisulha obuthuku bwethu nge “biro by’enyuma-nyuma” eby’emighulhu eno, omughulhu ‘hangabere emighulhu eyikalire.’ kandi ngokwa e Biblia yabugha, ‘abandu babi n’abathebya babirikanyirira eribya babi’ kutsibu.​—2 Timoteo 3:1-5, 13.

Eriaghalhwa Likisiya Irya Hwaho

Obwema bwosi bukakanganaya buthi thuli hakuhi n’enduli ey’erilengesya ly’abandu ery’akabi ery’eriyighabulha oku Nyamuhanga. Kyamabiri kanganibwa ndeke-ndeke indi obuthabali bw’abandu obuyithahwire oku Nyamuhanga si bwanga thoka erisingura. Obuthabali bwa Nyamuhanga busa bwa bwanga letha obuholho, obutseme, amaghalha awuwene, n’engebe y’erikotha. Busana n’ekyo Yehova erilekereraho obubi n’eriaghalhwa liri hakuhi n’erihwaho. Nyamuhanga akisiya iny’ingira omwa myatsi y’abandu akathoghothya emighulhu eno eyithe mw’eritsema.

Obuminyereri bwe Biblia buka bugha buthi: ‘N’okwa biro by’abami abo, Nyamuhanga w’elhubulha asayahangania obwami obuthendi syaheribwa na kera. Nikwa bwasyathulhanga mwa bihandi-bihandi n’eribugha amami wosi aya n’abu bwasyahangana kera na kera.’ (Danieli 2:44) Erihamya obuthabali bwa Yehova, ehamuli yiwe y’erithabalha, erilhabira omwa Bwami bwiwe bw’elhubulha ya ngangirirya nkulhu ye Biblia eyosi. Akalhaghulha omwatsi mukulhu ow’okwa kiminyikalho ekye “biro by’enyuma-nyuma,” Yesu mwabugha athi: ‘Engulhu yuwene ey’obwami eyi yasya tsuka erithulhughanibwa omwa kihugho kyosi busana n’eriminyisya ebihanda byosi, neryo enduli yasyahika.’​—Matayo 24:14.

Enduli yikendibya yasa, abakendi syalhama ni bahi? E Biblia yikasubamu yithi: ‘Abathunganene basy’ikalha omwa kihugho, n’abahikene basyasighalha mukyo, nikwa ababi basyithirwa hali erilhua omwa kihugho. N’abaghobya basyimurwa mukyo.’ (Emisyo 2:21, 22) Abahikene b’abak’igha erisonda lya Yehova n’erikolhalyo. Yesu Kristo mwabugha athi: ‘Eyi ni ngebe y’erikotha abandu bakuminye iwe Nyamuhanga mughuma na Yesu Kristo oyuwathuma.’ (Yoane 17:3) Inga, ‘ekihugho n’esyongumbu syakyo byasyahwa, nikwa oyukakolha erisonda lya Nyamuhanga asyakotha kera na kera.’​—1 Yoane 2:17.

Erilhusyako ikinalyakanganibawa, Amasako wosi alhwire omwa mbindulha eye Biblia ye Kinandi eya 1980.