EKITSWEKA 5
Ngoku Mwangabya Buholho n’Abahughu Benyu
‘Muyire omuthima w’erighanyira, ow’eriyikehya, ow’obwolho, n’ow’eriyibombeka.’—Abanya Kolosai 3:12
Eringira omwa butheke, nawu wukabya iwamatsuka eka eyawu. Nomwakine indi wukendi syabya iwunasikirye n’eryanza ababuthi bawu, omwanze wawu lino yulengire owundi mundu wosi-wosi okwa kihugho omwa ngebe yawu. Eki kyangana kalira abandi bahughu bawu eriligha. Aliriryo emisingyi ye Biblia yangana kuwathikya erithoka eribya iwune n’obuholho nabu omughulhu wunemuhira h’akaghalha kanene erighumya obughuma omw’eka eya wamatsuka.
1 IBYA IWUNE N’AMALENGEKANIA AWUWENE OKWA BAHUGHU BAWU
EKYA BIBLIA YIKABUGHA: ‘Wusikaye thatha wawu na koyo wawu.’ (Abanya Efeso 6:2) Mbulha wabirikulha bungahi, wutholere iwabya iwunasikirye ababuthi bawu. Kiminye wuthi omwanze wawu nayu atholere iniasikya ababuthi biwe. ‘Olhwanzo silhulibya n’obuha,’ neryo engolangana eya mwanze wawu awithe n’ababuthi biwe isiyaleka wukayilhalikirira.—1 Abanya Korinto 13:4; Abanya Galatia 5:26.
EKYA WANGA KOLHA:
Yihighule okwa binywe nga bino: “Ingye ab’okw’iwe mughulhu wosi bakandemesaya” kutse “Mughulhu wosi mama wawu syalisima ebya nga kolha”
Lengaho erilhangira emyatsi ngoku omwanze wawu akalhangirayo
2 KANGANAYA EMIMANIRE YAWU KYAMAYITHAGHISIBWA
EKYA BIBLIA YIKABUGHA: ‘Omundu asyasighania ise wiwe na nyinya, asyalhanda oko mukali wiwe neryo basyabya mughuma.’ (Enzuko 2:24) Omughulhu wukingira omwa butheke, ababuthi bawu banganabya ibakinayowa nga batholere erikusondolha, neryo ibangananza eringira kutsibu omwa myatsi y’obutheke bwawu kwilhaba ngoku batholere.
Kiri okw’inywe babiri erithwamu aha babuthi benyu banga subulirya omwa butheke bwenyu, neryo omwa bwolho-bwolho imwababwira. Iwangana babwira ekya wimanireko isiwuthatabuka. (Emisyo 15:1) Eriyikehya, obwolho, n’eriyibombeka kutse erighumisirizya, bikendi kuwathikya eribya iwunawithe obughuma n’ab’okwiwe n’erilholha embere ‘erighanyirana omwa lhwanzo’ kutse erighumisirizania.—Abanya Efeso 4:2.
EKYA WANGA KOLHA:
Wamayowa abahughu ibam’ingira kutsibu omwa butheke bwenyu, mukikanayeko n’omwanze wawu imunathekene
Mulighirane ndeke okwa kya mwanga kolha okwa mwatsi oyu