Amasomo Agho Thwang’igha Omwa Syobaruha Ibiri sya Petero

1. Buthuku buke omukwenda Petero athali aholha, ni kyahi ekyo asondolibawa erikolha?

OMUKWENDA Petero mwaminya ngoku akisiya iniaholha. Omwa myaka yiwe mingyi inianemukolha buthaleghulha, mwalendera na Yesu, mwatsukisya amalhambu mahyaka w’erithuliramu, kandi mwakolha ng’omughuma w’okwa kathunga akakasondolha. Aliwe omubiiri wa Petero abya isyali ahwa. Omwa myaka ng’eya 62-64 E.K., mwasondolibwa erihandika esyobaruha ibiri—ekitabu kye Biblia ekya 1 Petero n’owa 2. Mwakangania kw’awithe amaha ngoku esyobaruha esyo syanga wathikirye Abakristayo enyuma w’olhuholho lhwiwe.—2 Pet. 1:12-15.

2. Busana naki esyobaruha esyo Petero ahandika musyasira okwa buthuku?

² Petero asondolibawa erihandika esyobaruha siwe omughulhu abikirirya balikyabo babya bawithe ‘erilengwako misindo-misindo.’ (1 Pet. 1:6) Abandu babi babya ibanemulengaho eringirya esyongangirirya sy’amabehi n’emitse mibi omwa kithunga. (2 Pet. 2:1, 2, 14) Abakristayo ababya bikere e Yerusalemu babya ibakayalhangira “enduli y’emyatsi yosi”—amahe we Roma akathoghothya omuyi oyo n’erighunzaho emighulhu y’Ekiyuda. (1 Pet. 4:7) Ahathe erithika-thika esyobaruha sya Petero musyawathikya Abakristayo erilhangira ebya bangakolire eriyiyinirya ebitsibu by’omughulhu oyo n’eriyitheghekera eby’obuthuku bw’embere.b

3. Busana naki thutholere ithwayithendya okwa syobaruha esya Petero asondolibawa erihandika?

³ Nomwakine indi Petero ahandikira esyobaruha esi sy’Abakristayo b’omwa kighana ky’erimbere, Yehova mwalhangira athi ebisakango ebi nabyo bikahirawa omwa Kinywe Kiwe. Neryo nethu lino thwangana ghasirwa omwa syobaruha esyo. (Abar. 15:4) Kundi thuli omwa kihugho ekikakulha-kulhanaya emitse mibi, nethu thukabana ebitsibu ebyangaleka ikyathukalira erikolera Yehova. Eryongera okw’ekyo, thukisiya ithwabana ebitsibu ebikalire kwilhaba ebyakolhaya okw’ihwaho ly’Emighulhu y’Ekiyuda. Thukabana ebibukyo birebe bikulhu omwa syobaruha ibiri sya Petero. Ebi bikendi thuwathikya eribya ithunalindirire ekiro kya Yehova, erisingura eryubaha abandu, n’erikulha-kulhania omubere w’erianzana kutsibu. Ebibukyo ng’ebyo byangana wathikya n’abasyakulhu erilhangira ngoku banga tsomana ndeke ebiyithawa by’ekihangulho.

LHOLHA EMBERE ERILINDIRIRA

4. Ngoku kiro omu 2 Petero 3:3, 4, ni kyahi ekyanga tsingya-tsingya erikirirya lyethu?

⁴ Thuthimbirweko n’abandu abath’ikirirye omwa maminyereri we Biblia. Abahakani bangana thusekererya kundi thwabirilindirira kutsibu enduli ahabw’emyaka mingyi. Abandi basininguli bakabugha bathi siyendi syasa. (Soma 2 Petero 3:3, 4.) Thwam’owa omwinye nyumba, oyo thukakolha nayu, kutse omuhughu akabugha ebinywe ng’ebyo, erikirirya lyethu iryangana tsinga-tsinga. Petero mwasoborera ekyanga thuwathikya.

5. Ni kyahi ekyanga thuwathikya eribya ithune n’amalengekania awatholere bikahika okwa nduli y’omughulhu ono? (2 Petero 3:8, 9)

⁵ Okwa bandi, kyangana lhangirika Yehova ng’amamalha erighunzaho omughulhu mubi ono. Ebinywe bya Petero byangana thuwathikya eribya ithune n’amalengekania awatholere, erithw’ibukya ngoku amalengekania agho Yehova awithe okwa buthuku ali mbaghane kutsibu okwa w’abandu. (Soma 2 Petero 3:8, 9.) Oku Yehova emyaka rukumi yiri ng’ekiro kighuma. Yehova akaghumisirizaya, isyanzire n’omughuma akathoghothibwa. Nomwabine, ekiro kiwe kikendibya kikahika, omughulhu mubi ono akendihwaho. Thuwithe olhusunzo lhw’erikolesya obuthuku obusighereyo eriha obwema okwa bandu b’ebihanda byosi.

6. Ni mwanzira yahi thukabya ithun’ibukire ekiro kya Yehova? (2 Petero 3:11, 12)

⁶ Petero akathubwira athi thubye ‘ithunemuhathania [“ithun’ibukire,” NWT]’ ekiro kya Yehova. (Soma 2 Petero 3:11, 12.) Thuthi? Thukakolha ndeke thukaghanirya okwa mighisa y’omwa kihugho kihya-kihya, kyamathokekana obuli kiro. Thathera akasasani iwunemuhumulha omuka owahenirye, erirya ebyalya by’ekirisya, erithangirira abanze bawu ababiriholha bakalhubukibwa, n’erikangirirya abandu ababyaho bighana bingyi kera ebihambire okw’ibererera ly’amaminyereri we Biblia. Erighanirya ng’eri likendi leka iwalholha embere erilinda kandi iryakutheya okw’ibya n’amalengekania awathatholere okwa buthuku obwa thulimu. ‘Omw’iminya emyatsi eyi’ ey’obuthuku bwethu obukasa, ithukendi ‘yitheya okw’ihekwa’ n’abakangirirya b’amabehi.—2 Pet. 3:17.

SINGURA ERYUBAHA ABANDU

7. Eryubaha abandu lyanga thuhambako lithi?

⁷ Thun’ibukire ekiro kya Yehova, thukahirawa mw’omuhwa w’eribwira abandi okwa ngulhu yuwene. Nomwabine, omwa mibere mirebe thwangana sagha eribugha. Busana naki? Thwangan’ubaha abandu habw’akathuku kake. Ekyo mukyabya oku Petero. Omw’ithumbi ly’erilengwako lya Yesu, Petero mwalemwa eriyiminyikalya ng’omughuma w’okwa bigha ba Yesu kandi ngendo nyingyi mwamuyighana. (Mt. 26:69-75) Aliwe omukwenda iya n’oyo, enyuma waho mwabugha inianakakasirye athi: “Simubahe eryubahya lyabo, kandi simuhaghukaye emithima.” (1 Pet. 3:14) Ebinywe bya Petero bikathukakasaya ngoku thwangana singura eryubaha abandu.

8. Ni kyahi ekyanga thuwathikya erisingura eryubaha abandu? (1 Petero 3:15)

⁸ Ni kyahi ekyanga thuwathikya erisingura eryubaha abandu? Petero akathubwira athi: “Omwa mithima yenyu mukenge Kristo ng’Omukama wenyu.” (Soma 1 Petero 3:15.) Eki mwamuli erighanirya okwa kitsumbi n’obuthoki by’Omukama wethu kandi Omwami, Kristo Yesu. Wamakwa engitsi kutse eryubaha hakabya akaghisa k’eribwira abandi okwa ngulhu yuwene, ibuka Omwami wethu. Thera akasasani inianemuthabalha elhubulha inianathimbirweko n’abamalaika bangyi. Ibuka ngoku awithe “ehamuli yosi . . . omo lhubulha n’omo kihugho” kandi ngoku akendisyabya iniane “haghuma nenyu ebiro byosi erihika okw’ihwererera ly’emighulhu.” (Mt. 28:18-20) Petero akathubwira athi thubye ‘ithunasikire endambi yosi’ erilhwira okw’ikirirya lyethu. Mbwino wangananza eriha obwema okwa mubiiri, okwa sukuru, kutse ehandi hosi-hosi? Sangwa walengekania nga ni mughulhu wahi wangathoka erikolha ekyo, neryo thegheka ebya wukendi bugha. Saba obuthubaha iwunayikethere ngoku Yehova akendi kuwathikya erisingura eryubaha abandu.—Emib. 4:29.

“MUKWE OMUHWA W’ERIANZANA KUTSIBU”

9. Buthuku bughuma, Petero mwalemwa athi erikangania olhwanzo? (Lebaya n’ekisasani.)

⁹ Petero mw’igha ngoku angathoka erikangania olhwanzo. Abya inianeho Yesu akabugha athi: “Ngabaha ekihano kihya-kihya nyithi, mwanzane. Ngoku nabiribanza, nenyu mwanzane muthya.” (Yn. 13:34) Nomubyanabya bithya, enyuma waho Petero mubaha kandi mwaghana erirya n’abalikyabo Abanya Bihanda. Omukwenda Paulo mwahulha ekya Petero akolha ‘mw’eriyithendererya,’ kutse obuthebya. (Gal. 2:11-14) Petero mwaligha erikunga eryo kandi mw’ighira kulyo. Omwa syobaruha siwe syosi ibiri, mwahandika athi sithutholere thukasubulira okw’iyowa ithwanzire balikyethu aliwe kandi thutholere ithwabakangania olhwanzo olho.

10. “Olhwanzo olhuthe n’eritheba” lhukasa busana naki? Soborera. (1 Petero 1:22)

¹⁰ Petero akabugha athi thutholere ithwabya “n’olhwanzo olhuthe n’eritheba busana n’abalikyethu.” (Soma 1 Petero 1:22.) Olhwanzo ng’olho lhukasa busana ‘n’eriowa omwatsi w’ekwenene.’ Ekwenene eyi mwamuli engangirirya y’eribugha indi “Nyamuhanga syawithe ebithagha [akasolholho].” (Emib. 10:34, 35) Sithwanga bugha thuthi thukaghondera ekihano kya Yesu ekihambire oko lhwanzo thwamakangania balikyethu balebe omwa kithunga b’olhwanzo aliwe ithuthalhukangania abandi. Ni kwenene, thwangana thunga obunywani bw’ahakuhi n’abandi kwilhaba abandi, nga Yesu kw’akolha. (Yn. 13:23; 20:2) Aliwe Petero akathw’ibukaya ngoku thutholere ithwalengaho eribya ‘n’olhwanzo busana n’abalikyethu’—olhwanzo olhukamathire ng’olhwa b’omwa famile—busana n’abalikyethu abosi.—1 Pet. 2:17.

11. Erianza abandi “n’emithima yethu yosi n’omuhwa” mwamuliki?

¹¹ Petero mwathubwira athi ‘thwanzana n’emithima yethu yosi n’omuhwa.’ Hano, erianza ‘n’omuhwa’ mwamuli erilengaho kutsibu erianza omundu nomukyangabya ikikalire kithi. Ng’eky’erileberyako, ibbwa mulikyethu amathuponesya kutse erithukolha nabi omwa nzira ndebe? Okw’itsuka iwangananza erithuhulya omwakanya k’erikangania olhwanzo. Aliwe, Petero mw’ighira oku Yesu ngoku erithuhulya siriritsemesaya Nyamuhanga. (Yn. 18:10, 11) Petero mwahandika athi: “Simuthuhulhaye ekibi busana n’ekibi, kutse eritsuma busana n’eritsuma, nikwa kumbe mutsumulebo.” (1 Pet. 3:9) Leka erianza n’omuhwa likusukume eribya w’olhukeri kandi oyukatsomana nibya n’abangabya ibabirikuhithania.

12. (a) Erianzana kutsibu likendi thusukuma erithasyakolhaki? (b) Wanzire iwalengaho erikolhaki, ngoku kikanganibwe omwa vidiyo Theghaya Ekihembo ky’Obughuli eky’Obughuma?

¹² Omwa baruha yiwe ey’erimbere, Petero mwakolesya ekinywe ekiri ng’ekyo ekya “omuhwa w’erianzana kutsibu.” Olhwanzo ng’olho silhulisubulira okw’ikuningira ebibi bike, aliwe “ebibi bingyi.” (1 Pet. 4:8) Obundi Petero mw’ibuka erisomo erihambire okw’ighanyira eryo Yesu abya iniabirimukangirirya myaka mirebe enyuma. Okwa buthuku obo, Petero angabya iniabya akalengekania athi abya mundu mubuya akabugha athi iniakendi aghanyira mulikyabu “esyongendo sirinda [musanju].” Aliwe Yesu mwamukangirirya—nethu imwathune—erighanyira “esyongendo makumi alinda ngendo sirinda,” ni bugha ambu ahathe lhubibi. (Mt. 18:21, 22) Kyamabya ikyabirikukalira erighendera okw’ihabulha eri, isiwahwa amani! Obuli mughombe wa Yehova oyuthahikene hanabiriyira ikyamukalira erighanyira. Ekindu kikulhu ekya wangakolha lino ly’erithwa ekiika kyosi-kyosi ekikayithaghisibawa erighanyira mulikyenyu n’erihiraho obuholho.c

ABASYAKULHU MULISAYE EKIHANGULHO

13. Ni kyahi ekyanga leka ikyakalira abasyakulhu eritheya balikyabo?

¹³ Omo kwenene, Petero mwath’ibirirwa ekya Yesu amubwira abilhubuka: “Wutheghaye esyombuli syaghe.” (Yn. 21:16) Wamabya iwuli musyakulhu, wunasi ngoku erihabulha eryo nawu likakuhambako. Aliwe kyangana kalira omusyakulhu eribana obuthuku bw’eriberereryamo olhusunzo lhukulhu olhu. Abasyakulhu batholere ibatsuka eritsomana esyofamile syabu kinyamubiri, omw’iyowa, na bunyakirimu. Kandi bakasondolha omubiiri w’erithulira kuthya n’erithegheka n’erilhabya ebitsweka okwa mihindano n’okwa mihindano minene-minene. N’abandi bawithe esyongwamirwa sy’erikolha ng’abaghuma b’okwa Hithunga Ehikakolongana n’Amathambiriro kutse bakaligha esyonzunzo sy’erikolha omwa dipatimenti y’eby’obuhimbe. Omo kwenene, abasyakulhu ni balhume abali bbize!

14. Ni kyahi ekyanga hira omwa basyakulhu mw’omuhwa w’erilisya ekihangulho? (1 Petero 5:1-4)

¹⁴ Petero mwahira omwa basyakulhu balikyabo mw’omuhwa ‘w’erilisya esyombuli sya Nyamuhanga.’ (Soma 1 Petero 5:1-4.) Wamabya iwuli musyakulhu, thunasi ku wanzire balikyethu kandi kuwanzire eribalisya. Aliwe hanganayira iwayowa iwuli bbize kutse iwulhuhire kutsibu ikyaleka iwuthaberererya olhukwamirwa olho. Wanga kolhaki? Bwira Yehova y’ebyosi ebikakulyambaya. Petero mwahandika athi: “Oyukakolha omubiiri, akolegho omo maaka agho Nyamuhanga akamuha.” (1 Pet. 4:11) Balikyenyu banganabya ibanemulhaba omwa bitsibu ebithe byangahwaho omwa mughulhu mubi ono. Aliwe w’ibuke ngoku “Omulisya mukulhu,” Yesu Kristo, angana bawathikya kwilhaba ngoku wangakolha. Anganakolha ekyo lino n’omwa kihugho kihya-kihya. Ekya Nyamuhanga akanza okwa basyakulhu ly’erianza balikyabo, erilisya abalikyabo, n’eribya “bisosekanio [eky’erileberyako] busana n’ekihangulho.”

15. Omusyakulhu mughuma mwalisya athi ekihangulho? (Lebaya n’ekisasani.)

¹⁵ William, oyuwamabirighunza myaka mingyi inianemukolha ng’omusyakulhu, akayitheghereraya omughaso w’erilisya ekihangulho. Ekihunzo ky’ekorona (COVID-19) kyabere kyatsuka, iyo n’abandi basyakulhu balikyabo obuli mughuma mwalhangira ini kikulhu eribya inianemukanirania n’abali omwa gurupu yiwe obuli wiki. Akasoborera ekyaleka athi: “Balikyethu bangyi babya ewabu ibobene kandi ibanawithe ebitunturo, neryo ebitunturo ebyo byangalhuireho ibyahinduka mw’amalengekania awathatholere.” Omughulhu omwikirirya mulikyabu awithe ebitsibu, William akamuhulikirira ndeke eriminya ebiyithawa biwe n’ebikamulyambaya. Neryo akabana ekyonyine-nyine ekikendi wathikya, mughulhu mungyi esyovidiyo erilhua okwa muthahulha wethu, eriwathikya mulikyabo. Akabugha athi: “Erilisya ekihangulho likayithaghisibawa lino kwilhaba kera. Thukahiraho akaghalha kanene eriwathikya abandu erigha oku Yehova; thutholere ithwahiraho akaghalha ng’ako erilisya ekihangulho, eriwathikya esyombuli sya Yehova erisighalha omo kwenene.”

LIGHIRA YEHOVA AGHUNZERERE ERIKUTHENDEKA

16. Ni mwanzira syahi thwangakolesya amasomo agho thwamabir’igha omwa syobaruha sya Petero?

¹⁶ Thwamabirikania okwa masomo make buyira erilhua omwa syobaruha ibiri esyo Petero asondolibawa erihandika. Obundi wamabirilhangira aho wutholere iwuwania. Ng’eky’erileberyako, wunanzire eryongera erighanirya okwa mighisa y’omwa kihugho kihya-kihya eyikayasa? Wanabiriyihiriraho ekilhubirirwa ky’erithulira okwa mubiiri, okwa sukuru, kutse ehandi hosi-hosi? Wanamalhangira esyonzira esyo wang’ongereramo erianza balikyethu ba kutsibu? Abasyakulhu, mwanamathwamu erilisya esyombuli sya Yehova ahathe erikakwa kandi imunanzire? Eriyilebya eritholere lyangana bisulha obutseke bulebe obwa wuwithe, aliwe isiwahwa amani. Omukama ni mubuya, kandi akendi kuwathikya erikolha esyombinduka. (1 Pet. 2:3) Petero akathukakasaya athi: “Nyamuhanga . . . asyabahikania [“asyaghunzerera erikangiriribwa lyenyu,” NWT], n’eribasikya, n’eribaha amaaka, n’eribahangania ndeke.”—1 Pet. 5:10.

17. Thwamathendi bikyako kandi thukalighira Yehova athuthendeke, imukendilhwiririraki?

¹⁷ Petero mwanayowa isyatholere eribya embere sya Mughalha wa Nyamuhanga. (Lk. 5:8) Aliwe busana n’obuwathikya obw’olhwanzo obwa Yehova na Yesu, Petero mwalholha embere erikwama Yesu. Neryo Petero mwalighirwa “er’ingira omo Bwami bw’erikotha bw’Omukama Omulhamya wethu Yesu Kristo.” (2 Pet. 1:11) Olhu ka lhwabya lhuhembo lhubuyanga! Nga Petero, wamathendi bikyako kandi wukalighira Yehova erikuthendeka, nawu iwukendi syabana engebe y’erikotha. Wukendi syabana ‘enduli y’erikirirya lyawu, omulhamu w’omuthima wawu.’—1 Pet. 1:9.