7 Nyamuhanga Anemwendiowa n’Erisubirya Emisabe Yethu?

EKIBULYO ekiri ahighulhu eki kikahamba kutsibu okwa bandu n’erileka ibanza eriminya eky’erisubirya. E Biblia yikakanganaya ngoku namunabwire Yehova akowa emisabe. Iyo eriowa kutse erithendi owa emisabe yethu, kutsibu-tsibu kikasighikira okw’ithwe.

Yesu mwatsweba abakangirirya b’edini ab’omwa buthuku bwiwe ababya bakasaba omwa buthebya; ibatsomene erilhangirwa n’abandu lisa. Mwabugha athi abalhume ng’abo bangabwene “olhuhembo lhwabu lhwosi,” erimanyisya athi bangabwene ekya banzire kutsibu kisa, eripipwa n’abandu butsira ekya babya bakayithagha, Nyamuhanga eribowa. (Matayo 6:5) Kuthya namunabwire, abangyi bakasaba erikwamana n’erisonda lyabu butsira erya Nyamuhanga. Busana n’erigheghena emisingyi ye Biblia eya thwamabirikaniako, Nyamuhanga syalyowa emisabe yabu.

Kandi ibbwa iwe? Nyamuhanga anemwendi owa n’erisubirya emisabe yawu? Eky’erisubirya sikiseghemere okwa rangyi yawu, ekihugho, kutse eya wulhuire. E Biblia yikathukakasaya yithi: “Nyamuhanga syawithe ebithagha [akasolholho]. Nikwa omo buli kihanda omundu oyukubaha Nyamuhanga, n’erikolha ebithunganene akalighawa nayu.” (Emibiri 10:34, 35) Mbwino nawu kwa wune wuthya? Wamabya iwuk’ubaha Nyamuhanga, wukamusikaya kutsibu, erisagha erikolha ebikamuponesaya. Wamabya iwukakolha ebithunganene, iwukendi lengaho erikolha ebya Nyamuhanga akabugha athi bya bihikire mwa kanya k’erikolha erikwamana n’erisonda lyawu kutse ery’abandu. Mbwino kwenene wunanzire Nyamuhanga iniowa emisabe yawu? E Biblia yikakusondolha ngoku wanga hika okwa kilhubirirwa ekyo.

Ni kwenene, abangyi banzire Nyamuhanga iniasubirya emisabe yabu omwa nzira y’ekithiko-thiko. Nibya n’omwa buthuku bwe Biblia, Nyamuhanga isyalibera erikolha ekyo. Ihakanayira ihalhaba ebighana by’emyaka ekithiko-thiko kighuma kyalikolirwe ekindi imukyakolhwa. Eryongera okw’ekyo, e Biblia yikakanganaya yithi obuthuku bw’ebithiko-thiko mubwaho omwa biro by’abakwenda. (1 Abanya Korinto 13:8-10) Neryo mbwino eki kikamanyisaya kithi Nyamuhanga syakisubiraya emisabe munabwire? Kwabithe bithya! Thalengekania okwa misabe eyo akasubiraya.

Nyamuhanga akaha amenge. Yehova ya Ngununuko y’amenge wosi aw’okwenene. Abakanza obusondoli bwiwe n’abakanza eribyaho erikwamana nagho, akabahagho ahathe eriyikukumirira kandi ahathe erithuha.—Yakobo 1:5.

Nyamuhanga akathuha omulimu wiwe abuyirire n’emighisa yagho yosi. Omulimu abuyirire ni kaghalha ka Nyamuhanga akakakolha. Sihali akaghalha akalengiregho. Angana thuwathikya erighumira ebitsibu. Angana thuha obuholho omughulhu thuli omwa bitsibu. Angana thuwathikya erikulha-kulhania eyindi mibere eyuwene kandi eyikatsemesaya. (Abanya Galatia 5:22, 23) Yesu mwakakasya abigha biwe athi Nyamuhanga akaha ekihembo kiwe eki ahathe eriyikukumirira.—Luka 11:13.

Nyamuhanga akaha eriminya okwa bakamusonda-sonda. (Emibiri 17:26, 27) Erithimba omwa kihugho kyosi, mune abandu ab’emithima myolho abakasondekanaya ekwenene. Banzire eriminya erina lya Nyamuhanga, ekighendererwa kiwe busana n’ekihugho n’abandu, kandi ngoku banga yithunda hakuhi nayu. (Yakobo 4:8) Mughulhu mungyi Abema ba Yehova bakabana abandu ng’abo kandi banzire kutsibu eribabwira eby’erisubirya bye Biblia okwa bibulyo ng’ebyo.

Mbwino ekyo ky’ekiryaleka iwimya egazeti eno? Wunemusondya Nyamuhanga? Obundi eno y’enzira ey’akasubirayamu erisaba lyawu.