5 Endambi n’Omwanya Nina Kikulhu?

AHATHE ERITHIKA-THIKA wabirilhangira ngoku amadini mangyi akahira omuwatho okw’isabira omwa manyumba awapambire n’endambi ndebe y’erisabiramo. Mbwino e Biblia yikanahira omuwatho w’okw’isabira omwa myanya mirebe n’endambi ndebe?

Ni kwenene e Biblia yikanakanganaya ngoku hane endambi iwabya iwutholere erisaba. Ng’eky’erileberyako, Yesu abere athali alya n’abigha biwe, mwasima Nyamuhanga omwa musabe. (Luka 22:17) Kandi abigha biwe babere bakahindana haghuma okw’iramya, mubasaba. Neryo mubalholha embere n’omubere w’erisaba owanabya inianemukolhwa omwa syosinagogi esy’Abayuda n’omwa hekalu e Yerusalemu. Nyamuhanga inianzire ehekalu iyabya “nyumba y’erisabiramo busana n’ebihanda byosi.”​—Mariko 11:17.

Abaghombe ba Nyamuhanga bakabya bakahindana n’erisaba haghuma, emisabe yabu iyangana lhwiririra mw’ebibuya. Bamabya ibane bughuma kandi erisaba lyabu irinemukangania emisingyi y’Amasako, Nyamuhanga akatsema. Emisabe ng’eyo iyangana leka Nyamuhanga iniakolha ekyo athe angakolire. (Abaebrania 13:18, 19) Abema ba Yehova bakasaba mughulhu wosi okwa mihindano yabu. Thukakukokaya n’ebitsange eryasa okwa Kisenge ky’Obwami ekiri hakuhi nawu nuku wuyowire emisabe ng’eyo.

Aliwe, e Biblia siyiri bugha yithi erisaba litholere iryabya okwa ndambi kutse omwanya mulebe. Omwa Biblia, muli abaghombe ba Nyamuhanga abasaba okwa ndambi yosi-yosi, n’omwanya wosi-wosi. Yesu mwabugha athi: “Omughulhu wukasaba, wingire omwa kisenge kyawu, neryo wabikinga olhuyi, iwasaba Thatha wawu oyuli mo bubiso-biso. Na Thatha wawu oyukalhangira omo bubiso-biso, asyakuhemba.”​—Matayo 6:6.

Mbwino eki sikiritsemesaya? Wangana kania n’Omuthabali w’obuhangwa bwosi okwa ndambi yosi-yosi, iwune iwuwene, kandi iwabya iwunayikethere ngoku akendi kwowa. Kwesi, ky’ekyaleka Yesu iniabya akanza eribya iyuwene akasaba! Buthuku bughuma, mwaghunza erithumbi lyosi inianemusaba Nyamuhanga, ahathe erithika-thika, akasaba obusondoli okw’ithwamu eririthohire.​—Luka 6:12, 13.

Abandi balhume n’abakali abali omwa Biblia mubasaba bakabana erithwamu erikalire kutse ebitsibu ebikalire. Ahandi ibakanasaba omwa mulenge owakowika n’ahandi ibasaba kikuthu-kuthu; ibakasaba ibane omwa gurupu kandi ibane ibobene. Ekikulhu kiri kithi mubasaba. Nibya Nyamuhanga akabwira abaghombe biwe athi: “Musabe butsira eriumbya.” (1 Abanya Tesalonika 5:17) Mughulhu wosi anayitheghekire erihulikirira abakakolha erisonda liwe. Mbwino eri si kokya ery’olhwanzo?

Ni kwenene, omwa kihugho ekitsandire kino, abangyi bakabulha omughaso w’omusabe. Iwangana bulya, ‘Kwenene omusabe iniana nyiwathikya?’