Reference nuhke Moul in Christian ac Orekma in Luti Lasr uh
© 2025 Watch Tower Bible and Tract Society of Pennsylvania
SEPTEMBER 1-7
MA SACOHK KE KAHS LUHN GOD SOAKAS 29
Pihlesruh Luhlahlfongi ac Facsin Ma Tiac Lutiyuck in Bible
wp16.06 sra 6, pohk
Mwe Aruhruhma ke Lipufacn suc Tiac Liyeyuck Inkuhsrao
Million sin mwet luhlahlfongi ke alyalu ac sahngweng ke nguhn koluk. Elos luhlahlfongi muh kuhtuh ma oacna mwe lolpo, amulets, ac ono ma oasr magic kac ac fah karihnganuhlos. Tuhsruhktuh, kom tiac enenuh in oruh ma inge ke srihpen Bible uh fahk: Jeova God “el arulana suiya faclu nufon in sang ku nu selos su pwaye insialos nu sel.” (2 Chronicle 16:9) Jeova, suc God pwacye el kuh luhkwel Satan, el ac fah karihngihn kom, kom fin luhlahlfongi nuh sel.
Kom enenuh in lotwelah ma ahkinsewowoyacl Jeova, tuh elan karihngihn kom. Ke sie mwe puhpuhlyuck, mwet Christian in pacl meet ah, suc muhta fin acn Ephesus oracni puk nuhkewa nahtuhlos ma elos orekmakihn in orek magic ac inutnut ac esuhkack ma inge. (Orekma 19:19, 20) Ke inkacnek oacpacna, kom enenuh pac in sislah mwe lolpo, amulets, puk in orek magic, ac kuhtwena ma ma kuhpahsr nuhke orekma luhn demon.
w19.04 sra 17 par. 13
Sruokyac Ma Pwacye ke Misac
13 Kom fin tiac etuh ma ke sie facsin kuh ma mwet uh oruh, puhruhe nuh sin Jeova, siyuck sel ke lahlmwetmwet. (Riti James 1:5.) Tohkohyang kom oruh research ke mwe rit nahtuhsr. Fin enenweyuck, kom siyuck kahsruh sin mwet elder ke congregation lom. Elos ac fah tiac fahk nuh sum ma kom enenuh in oruh, tuhsruhktuh elos kuh in usot nuh sum oakwuck wo in Bible ma kuh in kahsre kom, oacna ma kuht sramsramkihn ke mwe lutlut se inge. Ke kom oruh ohinge, kom ahkpahye kuh luhn nuhnak lom, ac kuh inge ac fah kahsre kom in “akilen inmasrlon ma wo ac ma koluk.”—Heb. 5:14.
w18.11 sra 11 par. 12
“Nga Ac Fah Fahsr Nuhke Ma Pwacye Lom”
12 Facsin ac orekma ma tiac fal nuhke Bible. Sahp mwet in sucu lasr, mwet wi kuht orekma, ac tuhlihk lutlut wiyacsr srihke in suli kuht in weluhlos ke mwe ahkfuhlwact lalos. Fuhkah kuht kuh in lain mwe srihke in kwacfe kuht in wi ke sie facsin kuh mwe ahkfuhlwact ma tiac ahkinsewowoye Jeova? Kuht kuh in oruh ohinge kuht fin nuhnkuh pacl nuhkewa nuhke nuhnak luhn Jeova kac. Ac yohk kahsruh nuh sesr in lutlut ahkwoye mwe rit nahtuhsr ma sramsramkihn muhtwacwaciyen mwe ahkfuhlwact pwengpweng. Ke kuht nuhnkuh yohk ke srihpac pucspucs in ma Suhmuhslah lah efuh kuht tiac wi ke kain in mwe ahkfuhlwact inge, kuht luhlahlfongi lah kuht fahsr ke inkacnek ma “akinsewowoye Leum.” (Eph. 5:10) Luhlahlfongi Jeova ac ke Kahs lal ac fah karihngihn kuht liki “sangeng sin mwet.”—Soa. 29:25.
Mwe Lutlut Sacohk ke Kahs luhn God
it “Kahs in Ahkluhkuhk” par. 1
Kah in Ahkluhkuhk
Orekma in sang kahs in kaksak kikiacp; kahs in kaksak ma tiac pwacye in ahkinsewowoye mwet sahyac. Ma inge kwacna orek in ahkenganye sie mwet suc luhngse in lohng kahs in ahkluhkuhk ma ac kuh in ahkkulukyacl. Ma inge orek in eis ma wo sin mwet sahyac, ac in oruh mwet inge in muh el enenuh in sang nuh sin mwet suc kaksakuhnuhl kuh ahkfuhlwactyacl. Inkaiyen pacl uh ma inge orek in kol mwet se sahyac nuhke sie mwe kwacsrihp. (Soa. 29:5) Orekmakihnyen kahs in kaksak inge ma tiac pwacye tiac mwe ahkpwacyeye ke lahlmwetmwet sin God me; a ma inge ma luhn facluh, mweyen el nuhnkuh kacl sifacna, srisri mwet, ac ohiyac in orek luhmah. (Jas. 3:17) Kahs ma tiac tuhkuh ke inse, kikiacp, ahkfuhlwactye mwet ke kahs in ahkluhkuhk, tiac mwe ahkinsewowoye God.—2Cor. 1:12; Gal. 1:10; Eph. 4:25; Col. 3:9; Fwack. 21:8.
SEPTEMBER 8-14
MA SACOHK KE KAHS LUHN GOD SOAKAS 30
“Oru Tuh Ngan Tia Arulana Kasrup Ku Tia Pac Arulana Sukasrup”
w18.01 sra 24-25 par. 10-12
Kain in Luhngse Fuhkah Use Insewowo Pwacye?
10 Pwacye lah kuht nuhkewa enenuh mani. Mani mwe liyacacng moul. (Ecc. 7:12) Tuhsruhktuh, yac sie mwet el kuh in engan na pwacye fin ma oasr yohrohl ma na fal nuhke mwe enenuh lal? Ahok! (Riti Ecclesiastes 5:12.) Agur wen nahtuhl Jakeh el suhmuhslah: “Oru tuh ngan tia arulana kasrup ku tia pac arulana sukasrup. Ke ma inge ase nu sik lupan mwe mongo ma ac fal nu ke enenu luk.” Kuht kahlwem kac lah efuh el sruhnga in arlacna suhkahsruhp. El ahkuhtweyac lah el sruhnga in srihfeyuck in pihsrapasr mweyen orekma se inge ahkkulukye God. Tuhsruhktuh, efuh el puhruhe in tiac arlacna kahsruhp? El suhmuhslah: “Fin yokna ma oan yuruk, sahp nga ac fahk, ‘Suc Jeova?’” (Soa. 30:8, 9) Sahp oasr mwet kom etuh lah elos luhlahlfongi ke mwe kahsruhp lalos liki na in God.
11 Mwet nuhkewa suc luhngse mani tiac kuh in ahkinsewowoye God. Jesus el fahk: “Wangin mwet kulansap ku in kulansapu leum luo. El ac srunga sie, ac lungse el ngia; el ac pwaye nu sin sie, ac kwase el ngia. Kowos koflana kulansapu God ac mani.” Meet liki ma inge el fahk: “Nimet elosak mwe kasrup nu suwos fin faclu, yen watil ac ras ac kunausla, ac mwet pisrapasr elos ac kunausla acn ma oan we ac pisrala. A kowos in elosak mwe kasrup nu suwos inkusrao, yen watil ac ras tia ku in kunausla, ac mwet pisrapasr elos tia ku in utyak nu we ac pisrala.”—Mt. 6:19, 20, 24.
12 Puhs sin mwet konwacack lah ke srihpen elos moulkihn moul fihsracsr, elos insewowo liki na meet ah ac oasr pacl yohk in kuhlwacnsuhpuh Jeova. Jack, suc muhta fin acn United States, el kuhkwackuhnlah lohm na luhlahp lal ac business tuh el kuh in pioneer wi muhtwacn kiyacl. El fahk: “Ac upac nuh sihk in fuhlwelah lohm na kahto lasr ac ma sahyac lasr. Tuhsruhktuh, ke lusen yac pucspucs nga fohlohk ke lohm sesr ahsor ke srihpen ma upac ke orekma. A muhtwacn kiyuck, suc sie regular pioneer, el engan pacl nuhkewa. El fahk, ‘Oasr boss se suc wo emeet luhk!’ Ingena nga pioneer, kuht kewa kuhlwacnsap nuh sin mwet sefanna, Jeova.”
w87 5/15 sra 30 par. 8
Sahngweng sin Jeova ac Kom ac fah Engan
◆ 30:15, 16—Meac mwe lutlut yohk ke mwe srihkasrak inge?
Ma inge puhpuhlyuckkihnyuck lah mwet rahpkuh el tiac kuh in engan ke ma oasr yohrohl. Wet nihm srah soko el tiac tui in eis srah finne el kihpi tari, oacna ke sie mwet rahpkuh el luhngse in oasr mani ac kuh luhlahp. Ohiyac inge pwacye pac nuhke facl sin mwet misac, kuh inkuclyuck, ma tiac kuh in kihpi, ikack pacl nuhkewa in eis mwet misac pucspucs. Sie muhtwacn tuhlacp el ‘wowoyak’ siyuck ke tuhlihk. (Genesis 30:1) Ke pacl in fol, sie acn paho finne oasr af upac ac sa na in paholah. Ac sie e fihrihr ac fah fihrihrlac ma uh ma sisyucklac nuh kac. Oacpacna ke mwet rahpkuh. Tuhsruhktuh mwet suc kolyuck ke lahlmwetmwet ma tuhkuh sin God ac fah tiac ahkkahlwemye kain in ohiyen rahpkuh inge.
w11 6/1 sra 10 par. 4
Ahkfalye Ma Oasr Yohrohsr—Ac Orek Fuhkah
Kom saviyac mani meet liki kom moli. Finne nuhnkeyuck muh in saviyac mani meet liki in moli ma na in pacl meet ah, tuhsruhktuh pa inge sie inkacnek wo tuh in wacngihn ma upac ke mani. Ke srihpac inge, puhs mwet fahsr liki in oasr misac ac ke mwe kweok tuhkuh kac, oacna yohk kap kac, oruh yohkwelihk molin ma uh. In Bible uh, mahk uh ahkkahlwemyeyuck oacna “lalmetmet” mweyen “elos etuh in elosak mwe mongo nelos” ke pacl in kosracni ma elos ac orekmakihn ke pacl tohkoh.—Soakas 6:6-8; 30:24, 25.
w24.06 sra 13 par. 18
Utyak Nuh Luun Lohm Sin Jeova Ma Pahtpaht!
18 Arlac wo kuht in tuni ahkwoyac nuhnak lasr ke mani. Siyuck sum sifacna: ‘Yac nga kwacna nuhnkuhn mani ac ma nga kuh in moli nuh kac? Nga fin borrow mani, yac nga paht in moli ma inge, mweyen nga nuhnkuh muh mwet suc nga sowemol nuh se tiac enenuh ma inge? Yac nga puhla muh nga yohk srihpac ke srihpen oasr mani luhk? Yac upac nuh sihk in ahkkahlwemye ohiyen kuhlwacng? Yac nga nuhnuhnkuh mwet lili wiyuck muh elos luhngse mani ke srihpen elos kahsruhp? Yac nga orek kawuck nuh sin mwet kahsruhp ac tiac nuh sin mwet suhkahsruhp?’ Kuht eis pacl wowo in utyak nuh luun lohm sin Jeova. Kuht kuh in karihngihn pacl wowo inge ke kuht tiac nuhnkuhn mani. Kuht fin oruh ohinge, Jeova el ac fah tiac siskuhtlac!—Riti Hebrew 13:5.
Mwe Lutlut Sacohk ke Kahs luhn God
w09 4/1 sra 20 par. 7-10
Ma Oreklac uh Ahkkahlwemye ke Lahlmwetmwet luhn Jeova
7 Kuht fin tuni ahkwoye ke inkacnek suc elos oraclah ac ke orekma lalos, finne ke ma pucspucs suc pahngpahng ma “srisrik fwin fwalu” kuh in ahkkahlwemye nuh sesr ke mwe lutlut na wowo. Ke sie mwe puhpuhlyuck, nuhnkuh ke lahlmwetmwet suc oasr yurin mahk.—Riti Soakas 30:24, 25.
8 Kuhtuh mwet suc oruh lutlut yohk lalos elos luhlahlfongi muh arlacna puhkantwen pihsen mahk, pwacnacng elos fahk muh nuh sin kais sie mwet oasr mahk 200,000. Mahk nuhkewa arlacna alken ke orekma lalos fin fohk uh. Oasr oakwuck wowo luhn un mahk nuhkewa. Ke u pucspucs oasr kain in mahk tolu suc konweyuckyak: sie pa mahk kasra kuh queen, mak mukul, ac mahk orekma. Kais sie u inge oasr kunohkohn lalos in karihngihn ma enenuh lun u lalos. Oasr kain in mahk suc arlacna suhmaht in orek imac. Ma oreklac srihsrihk inge el kuh in ikwiye, sang mwe ahkmongo, ac liyacacng sahk srihsrihk pucspucs suc kapwack ke garden lalos suc kuh in ahkyohkye fahko suc elos kuh in kosracni kac. Mwet pucspucs suc oruh research lalos kac elos konwacack lah mahk srihsrihk inge suc kuh in puhpuhlyuckkihnyuck oacna “met imae” suc arlacna suhmaht el ahkfalye orekma lal fal nuhke luhpan mongo suc u lalos enenuh.
9 Kuht kuh in lotwelah ma pucspucs ke mahk uh. Ma oreklac inge el luti kuht lah kwacfeacng yohk enenweyuck kuht fin luhngse in oasr fahko wo pucspucs ke orekma lasr. Bible uh ahkkahlwemye nuh sesr: “Fwala nu yurin mak, kom met alsrangesr; nunku ke inkanek lal, a kom fwa lalmetmet. Su fwinne wangin met fulat, met kol, ku met leum, akola bred la in pal fwol; a esani ma nel in pal kosrani.” (Soakas 6:6-8) Jeova ac Jesus suc mwet Orekma Usrnguck lal, elos alken ke orekma. “Papa Tumuk el orekma, aok nu inge, a Nga orekma,” Jesus el fahk.—Jn. 5:17.
10 In oacna mwet etahi God ac Jesus Christ, kuht enenuh pac in alken ke orekma. Ke kuhtwena orekma kuh kunohkohn lasr ke congregation luhn God, kuht nuhkewa enenuh in ‘oru orekma puspus nu sin Leum.’ (1 Corinth 15:58) Ke ma inge, kuht enenuh in orekmakihn kahs in kahsruh lal Paul nuh sin mwet Christian in acn Rome: “Ke alken, a tia alsrangesr. Moniyuck in ngunumwos. Orekma nu sin Leum.” (Rome 12:11) Kwacfeacng lasr in oruh ma luhngse luhn Jeova el tiac ma pihlacsr se, mweyen Bible uh ahkkahlwemye nuh sesr: “God el tia sesumwos in mwulkunla orekma lomwos, a lungse su komwos fwakak nu ke el.”—Hebrew 6:10.
SEPTEMBER 15-21
MA SACOHK KE KAHS LUHN GOD SOAKAS 31
Mwe Lutlut Ma Tuhkuh ke Kahs in Kahsruh luhn Sie Ninac
w11 2/1 sra 19 par. 7-8
Luti Ohiyen Moul Nwacsnwacs nuh sin Tuhlihk Nuhtum
Luti ma pwacye ke nuhnak luhn God ke ohsun ke mahno. Kahs in sensen enenweyuck. (1 Cor. 6:18; James 1:14, 15) Bible uh ahkkahlwemye lah ohsun in mahno luhn sie mukul ac sie muhtwacn el sie mwe sang luhn God, ac tiac mwe sruhf se lal Satan. (Soakas 5:18, 19; On Lal Solomon 1:2) Kom fin ac fahk muhkwena mwe sensen kac, ma inge ac fah oruh eltahl sruokyac sie nuhnak tiac suwohs kac ma tiac tuhkuh ke ma suhmuhslah. Sie muhtwacn fuhsr in acn France pahngpahng Corrina el fahk: “Pahpah ac ninac kiyuck ahkuhtweyac yohk ke orekma in kosro, ac ma inge oruh in oasr nuhnak tiac wo luhk ke ohsun in mahno luhn mukul ac muhtwacn.”
Oruh tuh tuhlihk nuhtum eltahl in etuh ma pwacye ke ohsun in mahno. Nadia, sie ninac suc muhta fin acn Mexico el fahk: “Ma nga srihke in luti nuh sin tuhlihk nuhtihk pa ohsun in mahno ma inge wo ac Jeova el sang nuh sin mwet uh tuh elos in engankihn. Tuhsruhktuh, siacnyacn pahyuck muhkwena kuh in oruh ma inge. Ma inge kuh in use nuh sesr insewowo kuh mwe kweok, fal nuhke inkacnek ma kuht orekmakihn ma inge.”
ijwhf mwe lutlut 4 par. 11-13
Sramsram nuh sin Tuhlihk ke Mwe Nihmnihm
Sramsram nuh sin tuhlihk nuhtum ke mwe nihmnihm. Mark, sie pahpah suc muhta fin acn Britain el fahk: “Orekmakihnyen alcohol kuh in mwe ahkfohs nuh sin tuhlihk uh. Nga siyuck sin tuhlihk mukul se nuhtihk suc yac oalkohsr el fin nuhnkuh muh wo kuh koluk in nihm alcohol. Nga sramsram nuh sel ke inkacnek na wo, ac ma inge kahsrel in sukohsohk in ahkkahlwemye nuhnak lal.”
Ma kom ahkuhtweyac ke mwe nihmnihm nuh sin tuhlihk nuhtum ac kuh in sremlah ke nuhnak lal kom fin sramsram nuh sel ke pacl puhs. In fal nuhke matwacn tuhlihk nuhtum, fahk nuh sel pac ma yohk srihpac sahyac ke komtacl sramsramkihn alcohol, oacna in karihngihn kahsruhsrkihn sitosa ke inkacnek uh, ac ke mwe lutlut ke ohsun in mahno.
Ahkkahlwemye mwe srihkasrak. Tuhlihk uh oacna sponges—eltahl kuh in sa sruokyac kuh etahi ma nuhkewa eltahl liye. Kalmac pa kom fin nihm wain in ahkwoye puhlakihn kuh mwe fosrngah lom, tuhlihk nuhtum ac nuhnkuh muh pa inge inkacnek wo in ahkwacngihnyelah mwe fosrngah. Pasis kom in ahkkahlwemye mwe srihkasrak na wo. Kom in ahkpwacyeye lah kom orekmakihn wo mwe nihmnihm.
g17.6 sra 9 par. 5
Luti Inse Puhsisacl nuh sin Tuhlihk
Ahkkweyacl in sang. Ahkpwacyeye nuh sin tuhlihk nuhtum lah “insewowo in sang yok liki insewowo in eis.” (Orekma 20:35) Fuhkah? Sahp komtacl tuhkweni oraclah list luhn mwet suc enenuh kahsruh in som moul, mwe wiwac, kuh ahkwoye sie ma. Oruh tuhlihk nuhtum an in wi kom ke kom sang kahsruh nuh sin kuhtuh selos. Lwelah tuhlihk nuhtum an in liye lah kom engan ke kom karihngihn mwe enenuh luhn mwet sahyac uh. Ke kom oruh ohinge, kom ac fah lotwel ke ohiyen inse puhsisacl ke inkacnek wo emeet—ke mwe srihkasrak.—Oakwuck wo in Bible: Luke 6:38.
Mwe Lutlut Sacohk ke Kahs luhn God
w92 11/1 sra 11 par. 7-8
Lutlut in Pacl luhn Bible
7 In acn Israel, pahpah ac ninac luti tuhlihk nahtuhlos ke eltahl tuhlihk me. (Deuteronomy 11:18, 19; Soakas 1:8; 31:26) Ke Dictionnaire de la Bible ke kahs French, Bible scholar se inge E. Mangenot el suhmuhslah: “Ke pacl ma tuhlihk uh kuh in sramsram, elos lotwelah tari kuhtuh fuhs ke Masap. Ninac kiyacl el ac kalweni fuhs se, ke pacl eltahl etwaclah ma inge, el ac lotwacltahl ke sie pac fuhs sahyac. Tok, ma suhmuhslah nuhkewa ma oasr tari in nuhnak lalos ac fah fihliyac in poun tuhlihk uh. Ke inkacnek ohinge, lutiyuck elos in rit, ac ke elos kapkapwack, elos tahfwelah na lutlut lalos ke alu ke inkacnek in rit ac sifwilpac nuhnkuh ke masap luhn Leum.”
8 Ma inge ahkkahlwemye lah sie inkacnek wo in luti ma orekmakihnyuck pa in kaliyac ke insiac ma pucspucs. Ma elos lotwelah ke masap luhn Jeova ac ohiyac ma el oruh nuh sin mwet lal uh enenuh in sun insiaclos. (Deuteronomy 6:6, 7) Elos enenuh in nuhnkuh yohk kac. (Psalm 77:11, 12) In kahsruh kewa mwet mahtuh ac mwet fuhsr in kaliyac, oasr inkacnek pucspucs ma orekmakihnyuck. Wekuhnacng sin oakwuck inge pa alphabetic acrostics, fuhs in sie psalm ma muhtwacwacack ke sie lwacta, in fal nuhke taklah luhn alphabet (oacna Soakas 31:10-31); sie pac pa alliteration (kahs ma muhtwacwacack ke oacna sie lwacta kuh puhsra); ac orekmakihn nacmpuh, oacna ma oasr ke Soakas sapta 30. Sie sin mwe srihkasrak ma mah emeet ke ma suhmuhslah ke kahs Hebrew pa Gezer Calendar, ac kuhtuh sin scholar fahk muh orekmakihnyuck in kahsruh tuhlihk lutlut in kaliyac mwe lutlut uh.
SEPTEMBER 22-28
MA SACOHK KE KAHS LUHN GOD ECCLESIASTES 1-2
Tahfwelah in Ahkpahye Fihl Se Tok Uh
w17.01 sra 27-28 par. 3-4
“Ma Inge Ituckyang nuh sin Mwet Suc Luhlahlfongiyuck”
3 Inkaiyacsr luhngse orekma ma kuht oruh ac kuht ke in tahfwelah na oruh nwe tok. Tuhsruhktuh, sie mwe ahsor mweyen muhtwacwacack in pacl lal Adam, mwet in fihl nuhkewa kapwack mahtuh, wacngihnlac, ac sie pac fihl tuhkuh. (Ecc. 1:4) Ma inge oraclah mwe enenweyuck yohk nuh sin mwet Christian pwacye ke pacl inge. Orekma luhn mwet luhn Jeova yohkwelihk na pwacye. Ke kuht oruh projects sasuc, kuht orekmakihn oakwuck sasuc, inkaiyen pacl uh ke inkacnek luhn technology sasuc. Kuhtuh sin mwet mahtuh upac nuh selos in orekmakihn ma inge. (Luke 5:39) Elos fin lotwelah in orekmakihn, mwet lili suc fuhsr oasr kuh lalos liki mwet mahtuh. (Soa. 20:29) Ke ma inge, arlac wo nuh sin mwet mahtuh inge in luti ac ahkpahye mwet fuhsr inge in oruh kunohkohn yohk srihpac pucspucs.—Riti Psalm 71:18.
4 Sahp upac nuh sin mwet liyacacng inge in sang kunohkohn lalos nuh sin mukul lili suc fuhsr luhkwelos. Kuhtuh elos sahngweng in muh kunohkohn ma elos luhngse in oruh ac tuhlac luhkwelos. Kuhtuh elos sahngweng muh fin mwet fuhsr pa oruh, sahp elos nuhnkuh muh kunohkohn inge ac fah tiac orek ke inkacnek wo. Kuhtuh elos fahk muh wacngihn pacl lalos in sang ahkpah nuh sin mwet fuhsr. Ke luhmah sahyac, mwet fuhsr tiac enenuh in nuhnkuh muh arlac pahtlac mwet elder in sang ahkpah ac kunohkohn nuh selos.
Mwe Lutlut Sacohk ke Kahs luhn God
Meac Bible uh Fahk ke Orekma
God el luhngse kuht in engankihn orekma lasr. Bible uh fahk lah “wacngihn kuhtwena ma wo nuh sin sie mwet liki . . . in engan ke ma wo in orekma lal.” (Ecclesiastes 2:24, BMK) Jeova el arlacna alken. Ke kuht etahel, kuht kuh in ahkenganyacl ac kuht ac puhlakihn insewowo ke orekma lasr.
Orekma uh yohk srihpac. Tuhsruhktuh, kuht tiac lwelah ma inge in pa ma yohk srihpac emeet liki kuhlwacnsap lasr nuh sin Jeova. (John 6:27) El wuhlelah lah kuht fin oruh orekma in kuhlwacnsap lasr nuh sel in pa ma yohk srihpac emeet ke moul lasr, el ac fah acse nuh sesr ma kuht enenuh ke moul.
SEPTEMBER 29–OCTOBER 5
MA SACOHK KE KAHS LUHN GOD ECCLESIASTES 3-4
Ahkkweye Moul in Pahyuck Lom
ijwhf mwe lutlut 10 par. 2-8
Orekmakihn Technology Fuhkah nuhke Inkacnek Wo
● Orekmakihnyen technology ke inkacnek wo kuh in kahsruh sie siacnyacn pahyuck. Ke sie mwe srihkasrak, kuhtuh sin mukul ac muhtwacn pahyuck elos orekmakihn ma inge in sramsram ac pahng ke lwen ma elos tiac tuhkweni nuh sie.
“Sie text message ma fahk ‘I love you’ kuh ‘Nga nuhnkuh keim’ ac kuh in ahkkweye sie sin sie.”—Jonathan.
● Orekmakihnyen technology ke inkacnek tiac wo ac kuh in ahkmuhnahsye sie moul in pahyuck. Ke sie mwe puhpuhlyuck, kuhtuh mwet elos orekmakihn tablet kuh cellphone nahtuhlos pacl nuhkewa, ke srihpac inge wacngihnlac pacl lalos nuh sin muhtwacn kiyaclos kuh mukul tuhmwaclos.
“Nga etuh lah puhs pacl mukul tuhmuhk el luhngse in sramsram nuh sihk fin nga tiac na orekmakihn phone nuhtihk.”—Julissa.
● Kuhtuh mwet elos fahk muh ac oasr sramsram wo lalos nuh sin mukul kuh muhtwacn kiyaclos ac ke pacl sepacna elos orekmakihn device nahtuhlos. In fal nuh sin sociologist se inge, Sherry Turkle, el fahk muh pa inge “oakwuck in oruh ma pucspucs ke pacl sefanna.” Tuhsruhktuh, kain in oakwuck inge tiac arlac wo. El fahk muh pwacyeiyac pa, “orekma lasr tiac arlac wo ke kuht oruh kain in ma pucspucs ke pacl sefanna.”
“Arlacna wo ke pacl nga ac mukul tuhmuhk asramsrami, tuhsruhktuh sramsram lasr uh tiac wo ke el oruh ma pucspucs sahyac. Nga puhla muh el fin orekmakihn gadget nahtuhl, ac oacna nga tiac muhta yohrohl, el tiac sramsram nuh sihk.”—Sarah.
Mwe lutlut: Inkacnek ma kom orekmakihn technology kuh in kahsruh kuh ahkkulukye moul in pahyuck lom.
w23.05 sra 23-24 par. 12-14
Oruh ‘E Firrir luhn Jeova’ in Oasr Pacl Nuhkewa
12 Siacnyacn pahyuck uh kuh in etahel Aquila ac Priscilla fuhkah? Nuhnkuh ke ma kom ac muhtwacn kiyom enenuh in oruh. Yac komtacl kuh in tuhkweni oruh kuhtuh sin orekma inge? Ke sie mwe puhpuhlyuck Aquila ac Priscilla tuhkweni fahkwack pweng wo. Sahp kom ac mukul tomom uh tiac oacna sie orekma lowos, tuhsruhktuh yac kowos kuh in tuhkweni oruh orekma ke lohm suwos? (Ecc. 4:9) Kowos fin kahsruh sie sin sie in oruh sie orekma, kowos ac puhla lah kowos oacna sie team ac oasr pacl wowo lowos in sramsram. Robert ac Linda elos pahyuck ke lusen yac 50 kuhtuh. El fahk: “Pwacye, wacngihn pacl yohk lasr in tuhkweni oruh mwe ahkengan. Tuhsruhktuh, ke nga owo aluh ac muhtwacn kiyuck el ahkpahoyelah ma inge, kuh ke nga fuf mah lihkihnum uh ac el tuhkuh in kahsre yuc, nga arlac engan. Ke kuht tuhkweni oruh ma pucspucs ma inge oruh kuht in ma sefanna. Luhngse lasr yohkyohkwelihk.”
13 Tuhsruhktuh, finne kowos tuhkweni ke pacl pucspucs tiac kalmac pa kowos fototo nuh sie. Sie muhtwacn pahyuck fin acn Brazil el fahk: “Ke pacl inge, ma kuht arlacna kahfofo, sahp kuht ac nuhnkuh muh oasr pacl lasr nuh sin sie sin sie mweyen kuht tuhkweni muhta ke lohm sefanna. Oasr pac ma sahyac ma enenweyuck, nga enenuh in sang pacl nuh sin mukul tuhmuhk.” Bruno ac muhtwacn kiyacl, Tays, elos sang pacl nuh sin sie sin sie. El fahk: “Ke kuht tuhkweni nuh sie, kuht tiac orekmakihn cell phone, kuht engankihn pacl lasr nuh sin sie sin sie.”
14 Tuhsruhktuh, na fuhkah fin kom ac muhtwacn kiyom tiac engankihn pacl komtacl tuhkweni nuh sie? Sahp tiac oacna sie ma komtacl luhngse in oruh, kuh ahkkasrkuhsrakye sie sin sie. Meac komtacl kuh in oruh? Nuhnkuh ke sie bonfire. Ke muhtwacwacack tiac fokoko e kac. Kom ac sang etong na srihsrihk nuh kac ac kais kuhtuh srihsrihk kom ac sang ip ma luhlahp kuhtuh. Ke ma inge, ke muhtwacwacack srihke in orekmakihn kihtin pacl na ke kais sie lwen. Komtacl in kwacfeacng in oruh ma se ma komtacl tuhkweni engankihn in oruh, ac tiac ma ma oruh komtacl in akuhkuhin nuh kac. (Jas. 3:18) Ke komtacl oruh ma na srihsrihk, komtacl kuh in sifwilpac ahkkweye luhngse lowos nuh sin sie sin sie.
w23.05 sra 21 par. 3
Oruh ‘E Firrir luhn Jeova’ in Oasr Pacl Nuhkewa
3 In oruh “e firrir” luhn Jeova in oasr pacl nuhkewa, mukul ac muhtwacn enenuh kwacfeacng in oasr fototo wowo lalos nuh sin Jeova. Efuh? Fin yohk srihpac nuh selos fototo lalos nuh sin God, elos ac fah ahkos kahs in kolyuck lal. Ma inge ac fah kahsrelos in fahsr liki ma upac ma ac oruh luhngse lalos nuh sin sie sin sie in muhnahslah. (Riti Ecclesiastes 4:12.) Mwet suc fokoko ke ma luhn nguhn elos kwacfeacng in etahel Jeova ac ahkwoye ohiyac wowo lal, oacna kuhlwacng, mongfihsracsr, ac nuhnak muhnahs. (Eph. 4:32–5:1) Siacnyacn se suc ahkkahlwemye ohiyac inge, luhngse lalos nuh sie ac fah yohkwelihk. Lena suc pahyuck ke lusen yac 25 kuhtuh el fahk, “Fihsracsr in luhngse ac suhnakihn mwet se suc fototo nuh sin Jeova.”
Mwe Lutlut Sacohk ke Kahs luhn God
w22.12 sra 4 par. 7
7 Jeova el orekuhtlac ac oasr kena yohk lasr in tahfwelah na in moul. Bible uh fahk lah God el “fihliyac ma patpat insielos [mwet uh].” (Ecc. 3:11) Pa inge srihpac pwacnacng kuht nuhnkuh misac oacna mwet lokoalok. (1 Cor. 15:26) Ke pacl kuht sun mas upac, yac kuht tiac suk kahsruh ac soano na nwe kuht misac? Moh. Inkaiyen pacl uh, kuht som nuh yurin taktuh. Pwacye lah kuht suk inkacnek nuhkewa tuh kuht in moul. Ac ke pacl mwet suc kuht luhngse el misac, finne tuhlihk kuh mwet mahtuh, kuht arlacna ahsor. (John 11:32, 33) Ahok, God suc orekuhtlac el ac tiac acse nuh sesr kena ac kuh in moul ma pahtpaht fin wacngihn ke oakwuck lal lah mwet uh in tahfwelah in moul. Tuhsruhktuh, oasr pac srihpac sahyac tuh kuht in luhlahlfongi lah kuht kuh in moul ma pahtpaht. Kuht ac fah sramsramkihn kuhtuh ma Jeova el oraclah in pacl meet ah ac ke pacl inge ma ahkkahlwemye lah oakwuck lal tiacna ekyek.
OCTOBER 6-12
MA SACOHK KE KAHS LUHN GOD ECCLESIASTES 5-6
Kuht Ahkkahlwemye Fuhkah Suhnak Yohk Nuh Sin God Fuhlwactlana Lasr
w08 8/15 sra 15-16 par. 17-18
Ahkfuhlwactye Jeova Ke Inkacnek In Ahkkahlwemye Mwe Suhnak
17 Kuht enenuh in lohacng ahkwoyac ke pacl se kuht oruh orekma lasr in alu nuh sin Jeova. Ecclesiastes 5:1 el ahkkahlwemye: “Liaung niom ke kom som nu ke loom sin God.” Oasr ma sapkihnyuck nuh sel Moses ac Joshua elos in oruh in eislah sori kuh fahluhk lalos ke pacl se elos oasr ke acn muhtahl. (Exo. 3:5; Jos. 5:15) Elos enenuh in oruh ma inge in ahkkahlwemye suhnak ac ahkfuhlwact lalos nuh sin God. Mwet tol pucspucs fin acn Israel elos sapkihnyuck in nokomacng tarasis linen “in afwunye ikwe koflufol lalos.” (Exo. 28:42, 43) Masap se inge oruh elos in nukomacng nuknuk wowo in afunye mahnolos ke elos kuhlwacnsap ke altar in tempuhl. Mwet tol nuhkewa elos enenuh in orekmakihn pacl nuhkewa oakwuck luhn God ke ohiyen mwe suhnak.
18 Ke ma inge, mwe suhnak nuhke alu lasr kalmackihn lah kuht enenuh in ahkkahlwemye ahkfuhlwact ac ohiyac wowo nuh kac. Kuht fin luhngse in ahkfuhlwactyeyuck ac suhnakihnyuck, kuht enenuh in ahkkahlwemye ohiyac wowo suc fal nuhke mwe suhnak. Mwe suhnak suc kuht ahkkahlwemye el enenuh in pwacye ac tiac mwe luhmah muhkwena. Ohiyac wo inge enenuh in wo liki ma mwet uh elos kuh in liye kacsr ac enenuh in oasr ke insiacsr suc God el kuh in liye. (1 Sam. 16:7; Soa. 21:2) Mwe suhnak enenuh in oan ke insiacsr ac nuhnak lasr ac sang kahsruh nuhke ellah lasr, ohiyac lasr, nuhke fototo lasr nuh sin mwet pucspucs, ke inkacnek suc kuht nuhnkuh kacsr sifacna. Ahok, mwe suhnak enenuh in kahlwem na pwacye pacl nuhkewa ac ke ma nuhkewa suc kuht fahk ac oruh. Ke ohiyacsr, ellah lasr, ac nuknuk ac mwe yun lasr, kuht enenuh in orekmakihn kahs in kahsruh suc mwet sap Paul el suhmuhslah: “Ke kut tiac oru kutena me tukulkul in kutena ma, tu in wangin metin orekma lasr; a in ma nukewa fwakak kesr sifwana oana met orekma lun God.” (2 Cor. 6:3, 4) Kuht “yunala luti lun God, Met Lango lasr, in ma nukewa.”—Titus 2:10.
w09 11/1 sra 17 par. 21
Ahkkweye Ohiyen Puhruhe Lom ke Inkacnek in Lutlut Bible
21 Jesus el kwacfeacng in puhruhe wi luhlahlfongi yohk lal. Ke sie mwe puhpuhlyuck, meet liki el ahkmoulyelack Lazarus, “Jesus el ngetak, ac fwak: ‘Papa, Nga sot kulo nu sum tu kom long yu. Ac Nga etu tu kom long yuc pal e nukewa.’” (John 11:41, 42) Yac kahlwem pac ke puhruhe lom kain in suhnak ac luhlahlfongi inge? Kom in lutlutkihn puhruhe wowo luhn Jesus suc etweyuck pac oacna Puhruhe luhn Leum, ac kom kuh in liye kac lah arlacna yohk srihpac in ahkmuhtahlye en Jeova, ke tuhkuh luhn Tohkohsrahi lal, ac in ahkpwacyeye ma luhngse lal. (Mt. 6:9, 10) Srihke nuhnkuh ahkwoye ke puhruhe lom sifacna. Yac ma inge ahkkahlwemye pac lah kom ahksacohkye na pwacye Tohkohsrahi luhn God, in oruh ma luhngse lal, ac in ahkmuhtahlye inel? Ahok enenuh in ohinge.
w17.04 sra 6 par. 12
“Oruh ma kom wulela kac”
12 Bacptais pa muhtwacwaciyen kuhlwacnsap lasr. Tukun ma inge, kuht luhngse in tahfwelah in moulkihn moul in fal nuhke wuhlelah lasr ke kuht oaru in kuhlwacnsap nuh sin God. Ke ma inge, kuht kuh in siyuck sesr: ‘Fototo luhk nuh sin God kapwack fuhkah muhtwacwacack ke pacl se ma nga bacptaislac? Yac nga tahfwelah na in kuhlwacnsuhpuh God ke insiuck nohfohn? (Col. 3:23) Yac nga puhruhe, riti Kahs luhn God, wi ke miting luhn congregation, ac wi fahkwack pweng wo? Kuh srihkeni pacl luhk in wi ke kain in orekma inge nuh sin God?’ Mwet sap Peter el ahkuhtweyac lah kuht ac fahsr liki in tui in wi ke orekma in kuhlwacnsap lasr, kuht fin tahfwelah in ahkyohkye luhlahlfongi lasr ke etwacack, mongfihsracsr ac luhngse nuh sin God.—Riti 2 Peter 1:5-8.
Mwe Lutlut Sacohk ke Kahs luhn God
w20.09 sra 31 par. 3-5
Kihsen Siyuck Luhn Mwet Rit
Ecclesiastes 5:8 ahkkahlwemye nuhke sie mwet kol suc ahkkulukye mwet sekahsruhp ac tiac oruh ma suwohs nuh selos. Mwet kol inge enenuh in esam lah oasr sie mwet kol suc fuhlwact luhkwel suc liye orekma lal. Pwacye lah oasr mwet sahyac suc wal ac kuh lalos fuhlwact liki. Sie mwe ahsor, mweyen ke government luhn mwet, mwet kol nuhkewa inge sahp elos kuhtasrihk, pwacnacng mwet sekahsruhp elos enenuh in muhtweng ke inkacnek tiac suwohs inge in kol mwet uh.
Ke kain in ohiyac inge, kuht ac fah ahkkweyeyuck kuht fin nuhnkuh lah ‘kais sie mwet kol [ke government luhn mwet] liyeyuckyang’ sin Jeova. Kuht kuh in siyuck kahsruh sin God ac sislah mwe toasr lasr yohrohl. (Psa. 55:22; Phil. 4:6, 7) Kuht etuh lah “El arulana suiya faclu nufon in sang ku nu selos su pwaye insialos nu sel.”—2 Chr. 16:9.
Ahok, Ecclesiastes 5:8 ahkacsmakihnye kuht lah oasr mwet suc fuhlwact liki mwet kol ke government inge. Yohk liki nuhkewa, fuhs se inge kahsre kuht in esam pacl nuhkewa lah Jeova pa Kuh suc Fuhlwactlacna. El oruh kolyuck lal ingena ke el orekmakihn Wen se nahtuhl, Jesus Christ, suc Tohkohsrah ke Tohkohsrahi uh. God suc Kuhlacna, suc liye ma nuhkewa, el suwohs ac kuhlwacng, ac oasr pac yurin Wen nahtuhl ohiyac wowo inge.
OCTOBER 13-19
MA SACOHK KE KAHS LUHN GOD ECCLESIASTES 7-8
“Som Nuke Sie Lohm Ma Oasr Tung ac Mwemelil We”
it “Mwemwelihl” par. 9
Mwemwelihl
Sie Pacl in Mwemwelihl. Ecclesiastes 3:1, 4 ahkkahlwemye lah “oasr pacl in tung, ac pacl in israsr, oasr pacl in mwemelil, ac pacl in onsrosro.” Ke srihpen mwet nuhkewa misac, pwacnacng insiacn mwet lahlmwetmwet fahk muh oasr in “lohm ma oasr tung ac mwemelil we” tiac nuhke sie lohm ma mwet uh orek kuhfa we. (Ecc. 7:2, 4; liye pac Soa. 14:13.) Mwet lahlmwetmwet el orekmakihn pacl na wowo inge in ahkwoye ac ahkkweye mwet suc mwemwelihl inge, ac el tiac nuhnkuh muhkwena in suk mwe ahkengan. Ma inge kahsrel in esam lah el kuh pac in misac ac in sruokyac sie ohiyac wowo nuh sin God suc Oracllah.
w19.06 sra 23 par. 15
Kahsruh Mwet Sahyac in Kuhtanglah Mwe Ahsor Yohk
15 William, suc muhtwacn kiyacl el misac yac ekahsr somlah ah, el fahk: “Nga engan ke mwet sahyac uh sruhmuhn ke ohiyac wowo luhn muhtwacn kiyuck, mweyen ma inge kalmackihn lah elos ahksacohkyacl ac suhnakuhnuhl. Ma inge mwe kahsruh yohk nuh sihk. Oruh ngan insewowo mweyen nga luhngse na pwacye muhtwacn kiyuck ac el arlac sacohk sihk.” Muhtwacn katinmas se inge Bianca, el ahkuhtweyac: “Nga ahkkweyeyuck ke mwet sahyac uh wi yuc puhruhe ac riti fuhs se kuh luo nuh sihk. Ke pacl elos sruhmuhn ma ke mukul tuhmuhk ac porongo ke ma nga fahk uh, ma inge kahsre yuc na pwacye.”
w17.07 sra 16 par. 16
“Tung Yorolos Su Tung”
16 Yohk srihpac in puhruhe ke mwet lili suc ahsor ke misac luhn mwet in sucu lal. Finne upac in oruh mweyen sahp kom tuhng pac ac puhsrem rahrrahr, puhruhe lom ma tuhkuh ke insiom kuh in ahkkweyel na pwacye. Dalene el esam, “Kuhtuh pacl uh, muhtwacn lili elos tuhkuh in ahkwoye yuc, nga siyuck selos fin elos luhngse in puhruhe. Elos muhtwacwacack in puhruhe, finne upac nuh selos ke muhtwacwacack, tuhsruhktuh tukun sentence luo kuh tolu, ac yohkwelihk puhsraclos ac ma elos fahk tuhkuh na pwacye ke insiaclos. Luhlahlfongi lalos, luhngse lalos, ac mwe karihngihn lalos arlacna ahkkweye luhlahlfongi luhk.”
w17.07 sra 16 par. 17-19
“Tung Yorolos Su Tung”
17 Mwemwelihl ac ahsor luhn mwet tiac oacna sie. Ke ma inge, orekmakihn pacl tiac ke lwen ekahsr muhkwena ke mwet kawuck ac mwet in sucu lal oasr we, a nwe ke mahlwem ekahsr ke wacngihnlac mwet sahyac yohrohl ac moulkihn moul lal ke lwen nuhkewa. “Sie met kawuk el lungse pal e nu kemwa; a sie met lili el isusla tu lan met kasru in pal in ongoiyac.” (Soa. 17:17, BMK) Kuht kuh in sang mwe ahkkweye nuh sin mwet inge suc ahsor ke misac luhn mwet lal nwe ke na el kuh in muhtwacnglah nuhke ahsor yohk lal.—Riti 1 Thessalonica 3:7.
18 Esam lah mwet se inge el kuh in puhlakihn ahsor ke srihpen lwen in pahyuck lahltahl, on, petsac, orekma, kuh folin ma se, puhsra, kuh puhlanpacl se. Sahp oasr ma pucspucs ma mwet ahsor inge ac upac nuh sel in oruh ke pacl se meet, oacna in wi ke sie assembly kuh Memorial. Mukul lili se el fahk: “Nga etuh lah wedding anniversary lasr tukun muhtwacn kiyuck el misac arlac upac nuh sihk. Tuhsruhktuh, oasr kuhtuh mwet lili suc oraclah oakwuck in oasr party srihsrihk, ac mwet kawuck suc fototo nuh sihk oasr pac we, tuh tiac nga muhkwena pa oruh anniversary lasr inge.”
19 Lwelah kuht in esam pac lah mwet suc ahsor inge enenuh mwe ahkkweye tiac ke pacl ma oasr anniversary muhkwena. “Inkaiyen pacl uh mwe kahsruh ac asruoki arlac ahkkweye yuc finne wacngihn special anniversary,” Junia el ahkuhtweyac. “Nga ahksacohkye na pwacye ma orek inge ac use mwe ahkwoye nuh sihk.” Pwacye, kuht tiac kuh in ahkwacngihnyelah mwe ahsor nuhkewa ke srihpen misac luhn mwet suc el luhngse, tuhsruhktuh kuht kuh in ahkwoye ac ahkkweye mwet suc ahsor inge. (1 John 3:18) Gaby el esam: “Nga kuloh na pwacye nuh sin Jeova ke srihpen mwet elder suc kahsreyuc ke pacl upac. Elos oruh ngan puhla ac liye kuhlwacng ac luhngse luhn Jeova.”
Mwe Lutlut Sacohk ke Kahs luhn God
w23.03 sra 31 par. 18
“Mwet Nukewa Ac Fah Etu Lah Kowos Mwet Tumuk Lutlut”
18 Sahp kuhtuh pacl uh, kuht ke in sramsram nuh sin mwet lili se suc ahktoasrye kuht. Tuhsruhktuh meet liki kuht oruh ohinge, siyuck sesr sifacna: ‘Yac nga etuh na pwacye ma sikyak nuhkewa?’ (Soa. 18:13) ‘Yac ma inge orek ke srihpen ninihkihn lal?’ (Ecc. 7:20) ‘Yac nga oruh pac ohinge nuh sin mwet sahyac uh?’ (Ecc. 7:21, 22) ‘Nga fin sramsram nuh sel, yac ma inge ahkwoyelah ma upac kuh oruh in upac liki na meet ah?’ (Riti Soakas 26:20.) Ke kuht sislah pacl in nuhnkuh ke kihsen siyuck inge, sahp luhngse lasr nuh sin mwet lili se ac mokle kuht in tiac lohacng nuhke ma tahfonglac lal.
OCTOBER 20-26
MA SACOHK KE KAHS LUHN GOD ECCLESIASTES 9-10
Sruokyac Sie Nuhnak Wo Ke Ma Upac Lom
w13 8/15 sra 14 par. 20-21
‘Nikmet Sis Mwacta nuh Fin Jeova’
20 Esam ke sropon ma upac lasr uh. Efuh kuht enenuh in oruh? Kuhtuh pacl kuht sifacna pa oruh ma upac lasr uh. Kuht enenuh in akihlen ma pwacye inge. (Gal. 6:7) Nimet srihke in sis mwacta nuh fin Jeova ke ma upac lasr uh. Efuh kuh ohiyac inge tiac wo? Nuhnkuh ke mwe srihkasrak se inge: Soko sitosa ac kuh in kahsruhsr arlacna muhi. Srihke nuhnkuh muh mwet se suc ituck sitosa soko inge el lihksreni na kahsruhsr finne ke inkacnek ma kurulac, pasis el sun accident. Yac mwet suc oraclah sitosa inge pa srihpen ongaiyac ma sikyak inge? Moh, tiac! Ke inkacnek oacpacna, Jeova el orekuhtlac ke inkacnek ma oasr sukohsohk lasr in oruh sulaclah. Tuhsruhktuh el acse pac nuh sesr masap lah kuht ac oruh fuhkah sulaclah wo. Na efuh kuht ac sis mwacta nuh fin God suc orekuhtlac ke ma tahfonglac lasr sifacna?
21 Ahok, tiac ma upac nuhkewa lasr sikyak ke srihpen ma tahfonglac kuh orekma suhtuhuh lasr. Kuhtuh ma sikyak ke srihpen “ma ongla ouiya uh sikyak nu sin mwet nukewa.” (Ecc. 9:11) Lwelah kuht in tiac muhlkuhnlah lah Satan pa sropon ma koluk nuhkewa. (1 John 5:19; Fwack. 12:9) El pa mwet lokoalok lasr—ac tiac Jeova!—1 Pet. 5:8.
w19.09 sra 5 par. 10
Jeova El Ahksacohkye Mwet Lal Suc Inse Puhsisacl
10 Mwe fosrngah uh srihkeni kuht fin inse puhsisacl. Pwacye lah, sahp oasr ma kuht kuh in liye muh luhman tiac wo kuh suwohs. Tohkohsrah Solomon suc lahlmwetmwet el akihlen: “Nga liye tari ke mwet kohs uh kasrusr fin horse, ac mwet leum elos fahsrna oana mwet kohs uh.” (Ecc. 10:7) Mwet suc utuftuf tiac eis mwe kaksak pacl nuhkewa. Kuhtuh pacl mwet suc tiac arlac wo ke orekma la kwacna kaksakihnyuck. Tuhsruhktuh, Solomon el fahk muh wo nuh sesr in tiac toasr fin ohiyac ma luhman tiac suwohs inge sikyak. (Ecc. 6:9) Kuht fin inse puhsisacl, ac fihsracsr nuh sesr in tiac ahsor kac finne kuht tiac luhngse ma inge.
Yac Mwe Ahkengan Lom Wo Ac Ahkkweyac Kom?
BIBLE uh ahkkahlwemye kahlwem lah Jeova el luhngse kuht in engankihn moul lasr. Ke sie mwe puhpuhlyuck, Psalm 104:14, 15 el ahkkahlwemye lah Jeova el “wise mongo liki fwalu, a wain su akinsemwomwoye insien met, a oil su oru mutal in saromrom, a bred su akkeye insien met.” Pwacye lah, Jeova pa acse mwe mongo suc kuht enenuh tuh kuht in moul. El ahkkapye sahk uh in oraclah mwe mongo, oil, a wain. Wain tiac arlac enenweyuck tuh kuht in moul, tuhsruhktuh wain kuh in “akinsemwomwoye insien met.” (Ecc. 9:7; 10:19) Ahok, Jeova el luhngse kuht in engan, sesseslah insiesr ke “insemwomwo.”—Orekma 14:16, 17.
2 Ke ma inge, kuht tiac enenuh in nuhnkuh muh tiac wo in orekmakihn kuhtuh pacl lasr in “liye mwon yen engyengu” a ke “kiuf in imae.” Kain in orekma inge kuh in ahkkweye kuht a oruh moul lasr in engan. (Mt. 6:26, 28; Psa. 8:3, 4) Sie moul wowo a engan el sie “me sang lun God.” (Ecc. 3:12, 13) Pacl suc kuht orekmakihn nuhke mwe ahkengan el mwe sang pa suc God el acse nuh sesr. Ke ma inge kuht enenuh in orekmakihn ma inge ke sie ohiyac ma ahkinsewowoye God.
Mwe Lutlut Sacohk ke Kahs luhn God
Meac sikyak ke pacl se kuht misac?
Jesus el luhmahlah misac nuhke mutul fulosuwohs. Misac ac mutul oacna sie fuhkah? Sie mwet suc mutul fulosuwohs el nihkihn ke ma sikyak uh. Pa pacna ke pacl se mwet se misac, el tiac etuh kuhtwena ma. El tiac puhla ahsor, finne el luhngse na pwacye mwet in sucu lal ac kawuck lal uh. Bible uh fahk, “Mwet misac wacngihn ma elos etuh.”—Riti Ecclesiastes 9:5.
OCTOBER 27–NOVEMBER 2
MA SACOHK KE KAHS LUHN GOD ECCLESIASTES 11-12
Engankihn Sie Moul Insewowo ac Kuh in Mahno
g 3/15 sra 13 par. 6-7
Fresh Air ac Kahlwem luhn Fahtuh—Orekma oacna “Antibiotics”?
Kahlwem luhn fahtuh kuh in kuhnahoslah virus ac wet srihsrihk. Mwe rit se inge Journal of Hospital Infection ahkuhtweyac lah “inkaiyen microbes ma oasr ke eng uh ma oraclah mas ac kuh in misac ke kahlwem luhn faht uh.”
Meac kom ac oruh? Kom kuh in som nuh lihkihnum uh tuh kahlwem luhn faht uh sreyac nuh sum ac momongkihn fresh air. Ma inge ac wo nuh sum.
w23.02 sra 21 par. 6-7
Ahksacohkye Moul Ma God El Use
6 Bible uh tiac sie puk ma ahkkahlwemye ke karihngihnyen mahno ac ke mongo, ne ohinge el fahk ke nuhnak luhn Jeova kac. Ke sie mwe puhpuhlyuck, el fahk nuh sesr in eislah kuhtwena ma kuh “mwe ahkngalye” ma kuh in kuhnahoslah mahnosr. (Ecc. 11:10) Kainmongo ac sruhi ac kuh in srihpen misac, ac Bible uh selngawi orekma inge. (Soa. 23:20) Pwacnacng ke pacl kuht oruh sulaclah lah meac, ac luhpa fuhkah kuht ac nihm ac kang Jeova el luhngse kuht in ahkkahlwemye sifacna leum facsr.—1 Cor. 6:12; 9:25.
7 Kuht kuh in ahkkahlwemye lah kuht ahksacohkye moul ma God el acse nuh sesr kuht fin orekmakihn kuhiyen nuhnak lasr ke kuht oruh sulaclah. (Psa. 119:99, 100; riti Soakas 2:11.) Ke sie mwe puhpuhlyuck, finne kuht luhngse na pwacye sie mwe mongo tuhsruhktuh tiac wo nuh sesr, kuht enenuh in fahsr liki kang ma inge. Kuht enenuh pac in mutul ke lusen pacl ma fal ac in ahsrosr pacl nuhkewa, in karihngihn mahnosr ac lohm sesr in nwacsnwacs pacl nuhkewa.
w24.09 sra 2 par. 2-3
“Oruh Oacna Kahs luhn God uh Fahk”
2 Efuh kuh mwet suc alu nuh sin Jeova elos engan? Oasr srihpac wo pucspucs ma kuht kuh in nuhnkuh. Tuhsruhktuh kuht in tiac muhlkuhnlah lah sie sin srihpac inge pa kuht in rit Kahs luhn God pacl nuhkewa ac kuht kwacfeacng in moulkihn ma kuht lotwelah uh.—Rit James 1:22-25.
3 Oasr ma wo pucspucs nuh sesr kuht fin “oru oana Kas lun God uh fahk.” Ke sie mwe srihkasrak, kuht fin moulkihn ma kuht riti, kuht ahkenganye Jeova. Pwacnacng ma inge oruh kuht in insewowo. (Ecc. 12:13) Ma inge oruh pac fototo lasr nuh sin sucu lasr ac nuh sin mwet lili wiyacsr in wo liki meet ah. Sahp ma inge pwacye pac nuhke moul lom. Sahyen ma inge, kuht fahsr liki ma upac ma ac tuhkuh kuht fin tiac ahkos masap luhn Jeova. Pa sis kuht insese ke ma Tohkohsrah David el fahk. Tukun el fahk ke on soko ke masap, oakwuck, ac nuhnuhnkuh luhn Jeova, el fahk ohinge: “Ke nga akos, nga eis mwe insewowo lulap.”—Psa. 19:7-11.
Mwe Lutlut Sacohk ke Kahs luhn God
it “Tuhkuh Sin God Me” par. 10
“Tuhkuh Sin God Me”
Mwe ahkpwacyeye ahkkahlwemye lah mwet suc God el orekmakihn in suhmuhslah Bible uh tiac oacna robot ma suhmuhslah na ma fwackyuck nuh selos. Kuht rit kacl mwet sap John lah ke el suhmuhslah Fwackyuk, el fahkwack ma nuhkewa el liye, suc pa inge “kas ma tuku sin God me ac ke ma pwaye su fwackyuk sin Jesus Christ.” (Fwack. 1:1, 2) Ma inge tuhkuh ke kahsruh luhn ‘nguhn luhn God’ ke “len lun Leum” ac sapkihnyuck nuh sel elan: “Simusla ma el liye” in sie puk lihmlihm. (Fwack. 1:10, 11) Kahlwem lah God el lwelah mwet sihm luhn Bible inge in orekmakihn kuhiyen nuhnak lalos in sulaclah kahs lalos sifacna in ahkuhtweyac aruhruhma ma elos liye (Hab. 2:2), ac God el kahsrelos ac kololos tuh ma elos suhmuhslah uh suwohs, pwacye ac fal nuhke oakwuck luhn God. (Soa. 30:5, 6) In oacna ke ma Ecclesiastes 12:9, 10 ahkkahlwemye, mwet sihm inge enenuh in kwacfeacng mweyen elos enenuh in tiac tui in nuhnkuh yohk, lutlutkihn ac in sokak “kahs in ahkwoyac” ac in suhmuhslah kahs ma arlacna pwacye.—Liye pac Lk. 1:1-4.