Buku Mutanshi wa Bamfumu

12 Lehoboma wayile ku Shekema, mambo bena Isalela bonse baishile ku Shekema+ na kumuswanyika pa bufumu.+ 2 Yeloboma mwana wa kwa Nebati byo aumvwinetu kino (wakijinga mu Ijipita mambo wanyemene Mfumu Solomone kabiji waikelenga mu Ijipita),+ 3 kabiji batumineko ba kumwita. Kepo Yeloboma ne kipwilo kyonse kya bena Isalela baishile kwi Lehoboma ne kumwambila’mba: 4 “Bashenu balengejile kikonkoji kyetu kunema.+ Bino anweba inge mupeezheko mwingilo wa bashenu wakosa ne kupeezhako kikonkoji kyanema* kyo betutwikile, tukemwingijilanga.”

5 Ponkapo wibambijile’mba: “Yainga, mukabwele kwi amiwa pa kupitapo moba asatu.” Byonkabyo, bantu bayile.+ 6 Kepo mfumu Lehoboma aipwizhe bakulumpe baingijilanga Solomone shanji byo akijinga mumi, amba: “Mbuulaiko maana, bano bantu nkebakumbule’mba ka?” 7 Abo bamukumbwile’mba: “Inge lelo mwikale kalume wa bano bantu ne kwibobila byo bemulomba ne kwibakumbula bulongo, bakekala ke bakalume benu kimye kyonse.”

8 Nangwa byonkabyo, walengulwile maana amubuujile bakulumpe, kabiji waipwizhe bansongwalume mo bakomenanga kabiji bonka baikele ba mingilo banji.+ 9 Wibashikishe’mba: “Mbuulaiko maana, tukebakumbule’mba ka bano bantu bañambijile’mba, ‘Peezhaiko kikonkoji kyo betutwikile bashenu’?” 10 Bansongwalume mo bakomenanga bamukumbwile’mba: “Bano bantu bemwambijile’mba, ‘Bashenu balengejile kikonkoji kyetu kunema, bino anweba mwitupeezhezhekyo’; mukebabuule bino amba, ‘Amiwa nkemupa mingilo yakosa kukila imupanga batata.* 11 Batata bemutwikile kikonkoji kyanema, pakuba amiwa nkanungapo pa kikonkoji kyenu. Batata bemukambulanga na bikote, bino amiwa nkemukambulanga na bikote bitanta nobe tuminye.’”

12 Yeloboma ne bantu bonse baishile kwi Lehoboma pa juba ja busatu, byonkatu mfumu byo ebambijile’mba: “Mukabwele kwi amiwa pa juba ja busatu.”+ 13 Bino mfumu wakumbwile bano bantu na bukaji, ne kukana maana amubuujile bakulumpe. 14 Wibambijile monka mwayijile maana amubuujile bansongwalume amba: “Batata balengejile kikonkoji kyenu kunema, pakuba amiwa nkanungapo pa kikonkoji kyenu. Batata bemukambulanga na bikote, bino amiwa nkemukambulanga na bikote bitanta nobe tuminye.” 15 Byonkabyo, mfumu wakaine kwibomvwina bantu, mambo Yehoba ye walengejile bintu kwaluka,+ pa kuba’mba afikizhe byambo Yehoba byo aambijile Yeloboma mwana wa kwa Nebati kupichila mwi Ahiya+ mwina Shilo.

16 Bena Isalela bonse byo bamwene’mba mfumu wakana kwibomvwa, bantu baambijile mfumu amba: “Ñanyi lubaji lo tuji nalo mwi Davida? Kechi tujimo na buswanyi mu mwana wa kwa Yese ne. Anweba bena Isalela, muntu yense abwele ku balesa banji. Pano obewa Davida, lamanga nzubo yobe!” Ponkapo bena Isalela babwelele ku mazubo* abo.+ 17 Bino Lehoboma watwajijile kulama bena Isalela baikelenga mu mizhi ya mu Yuda.+

18 Kepo Mfumu Lehoboma atumine Adolama,+ wajinga mukulumpe wa boba bo bakambizhe kwingijila mfumu, bino bena Isalela bonse bamwashile mabwe ne kufwa wafwile. Mfumu Lehoboma wakanjijile mu kalaki wanji ne kunyemena ku Yelusalema.+ 19 Kabiji bena Isalela batwajijile kusatukila+ ba mu nzubo ya kwa Davida kufika ne lelo jino.

20 Bena Isalela byo baumvwinetu amba Yeloboma wabwela, bamwichile kwajinga jibumba ne kumutongola kwikala mfumu wa bena Isalela bonse.+ Kafwako muntu nangwa umo walondejilenga ba mu nzubo ya kwa Davida ne, kanatu mukoka wa bena Yuda.+

21 Lehoboma byo afikile mu Yelusalema, ponkapotu wakonkenye bonse ba mu nzubo ya kwa Yuda ne ba mu mukoka wa bena Benjamina, bashilikale bayuka* kulwa nkondo 180,000, amba balwe na bena Isalela pa kuba’mba babwezhe bufumu kwi Lehoboma mwana wa kwa Solomone.+ 22 Kepo byambo bya Lesa wa kine byaishile kwi Shemaya+ muntu wa Lesa wa kine amba: 23 “Umubuule Lehoboma mwana wa kwa Solomone mfumu wa bena Yuda ne bonse ba mu nzubo ya kwa Yuda ne bena Benjamina ne bantu bonse bashala amba, 24 ‘Yehoba waamba’mba: “Kechi mwafwainwa kuya na kulwa na bena Isalela balongo benu ne. Muntu yense wafwainwa kubwela ku nzubo yanji, mambo yami nalengela kino amba kyubiwe.”’”+ Byonkabyo, bakookejile byambo bya Yehoba ne kubwela ku mazubo, byonkatu Yehoba byo ebabuujile.

25 Yeloboma washimukulwile* Shekema+ mu mpunzha ya mitumba ya Efelaimu ne kwikala monka. Kabiji wafumine kokwa ne kuya na kushimika* Penwela.+ 26 Yeloboma waambilenga mu muchima wanji amba: “Pano bufumu busakubwela ku ba mu nzubo ya kwa Davida.+ 27 Bano bantu inge batwajijile kuya na kutapisha ku nzubo ya Yehoba mu Yelusalema,+ michima ya bano bantu nayo ikabwela kwi nkambo yabo, Mfumu wa ku Yuda aye Lehoboma. Kine, bakangipaya ne kubwela kwi Mfumu wa ku Yuda aye Lehoboma.” 28 Byo apwishishe kwipuzhaipuzha, mfumu walengele baana bañombe babiji ba ngolode+ ne kwambila bantu amba: “Mwamanama bingi na kuya ku Yelusalema. Anweba bena Isalela, uno ye Lesa wenu, yenka wimufumishe mu kyalo kya Ijipita.”+ 29 Kabiji umo wamubikile mu Betele+ ne mukwabo wa mubikile mu Danyi.+ 30 Kabiji kino kibalengejile kulenga mambo,+ ne bantu bayanga ku Danyi na kupopwela mwana ñombe wajinga kokwa.

31 Kabiji washimikile mazubo a kupopwelamo pa mapunzha atuntama ne kutongola bantutu babujile bena Levi kwikala bañanga.+ 32 Kabiji Yeloboma wabikileko ne kijiilo mu ñondo wa butanu na busatu pa juba ja bu 15 ja uno ñondo, byonka byajinga kijiilo kya mu Yuda.+ Pa kya kusokelapo bitapisho kyo alengele ku Betele,+ watapishepo bitapisho ku baana ba bañombe bo alengele, kabiji ku Betele watongwejileko bañanga ba pa mapunzha atuntama o alengele. 33 Kabiji watendekele kulambula milambo pa kya kusokelapo bitapisho kyo alengele ku Betele pa juba ja bu 15 ja ñondo wa butanu na busatu, mu ñondo ye asajile aye mwine; kabiji wabikileko kijiilo kya bena Isalela, ne kuya ku kya kusokelapo bitapisho na kulambula milambo ne kusoka bya kufutumuna.