Buku Mutanshi wa Bamfumu
5 Hilama mfumu wa Tila+ byo aumvwine’mba Solomone bamushinga manyi amba ekale mfumu wa kuswana pe shanji, watumine bakalume banji kwi Solomone, mambo Hilama wajinga mulunda wa kwa Davida.*+ 2 Solomone naye watumine jiwi kwi Hilama amba:+ 3 “Mwayukishatu bulongo kuba’mba batata ba Davida kechi bashimikile nzubo ya kutumbijikilamo jizhina ja Yehoba Lesa wabo ne, na mambo a makondo o balwanga na balwanyi babo bebazhokolokele konse konse kufikatu ne Yehoba byo ashinjile balwanyi babo.+ 4 Pano Yehoba Lesa wami wandengela kukokoloka ku balwanyi bami bonse banzhokoloka.+ Kafwako nangwa umo ubena kulwa ne amiwa ne, kabiji kafwako kintu kyatama kibena kubiwa ne.+ 5 Onkao mambo, mbena kukeba kushimika nzubo ya kutumbijikilamo jizhina ja Yehoba Lesa wami, byonkatu Yehoba byo alayile batata ba Davida amba: ‘Mwanobe ye nkatongola kuswana pa jitanda jobe, ye ukashimika nzubo ya kutumbijikilamo jizhina jami.’+ 6 Pano kambizhai bantu benu bantemeneko bichi bya sida bya ku Lebanoni.+ Bakalume bami bakengijila pamo na bakalume benu, kabiji bakalume benu nkebafweta mfweto monka mo mukatongwela, mambo anweba mwayukishatu bulongo amba kafwako nangwa umo mwi atweba wayuka kutema bichi nobe bena Shidona ne.”+
7 Hilama byo aumvwine byambo bya kwa Solomone, wasekejile bingi ne kwamba’mba: “Yehoba atotwe lelo jino, mambo wapa Davida mwana wa maana wa kulama bano bantu bavula!”+ 8 Onkao mambo, Hilama watumine mawi kwi Solomone amba: “Naumvwa mawi o wantumina. Nsakuba byonse byo ubena kukeba ne kunengezha bichi bya sida ne bya yunipa.+ 9 Bakalume bami bakebisenda kufuma ku Lebanoni ne kwibitwala ku kalunga ka mema, kabiji nkebikasa nobe bikwepe pa kuba’mba bikaye na mema ku mpunzha yo ukantongwela. Amiwa nkebikasulwila konkakwa, ne obewa ukebisende. Kabiji obewa ukampako kajo ka ba mu nzubo yami.”+
10 Byonkabyo, Hilama wapaine bichi byonse bya sida ne bya yunipa Solomone byo akebelenga. 11 Kabiji Solomone wapele Hilama makolo* 20,000 a wichi kwikala kajo ka ba mu nzubo yanji ne makolo 20 a manyi awamisha* a maolivi. Abino Solomone byo byo apelenga Hilama pa mwaka pa mwaka.+ 12 Kabiji Yehoba wapele Solomone maana, byonkatu byo amulayile.+ Hilama ne Solomone baikelenga mu mutende, kabiji bano babiji balayañene lulayañano.
13 Mfumu Solomone wakambizhe bantu bamo mu bena Isalela bonse ba kumwingijila; bajinga 30,000.+ 14 Wibatumanga ku Lebanoni mu mabumba a bantu 10,000 pa ñondo pa ñondo. Baikalanga ku Lebanoni ñondo umo ne bañondo babiji ku mazubo abo; kabiji Adonyilama+ ye watangijilanga aba bo bakambizhe kwingijila mfumu. 15 Solomone wajinga na bantu 70,000 baingilangatu mingilo ikwabo* ne bantu 80,000 bachibanga mabwe+ ku mitumba,+ 16 kabiji Solomone wajinga na bakapitao 3,300 basopanga+ aba baingijilenga. 17 Monka mwibakambizhizhe mfumu, bachibile mabwe akatampe a mutengo,+ kuba’mba baale kitendekesho+ kya nzubo na mabwe a kusonga.+ 18 Byonkabyo, bantu ba kwa Solomone bayuka kushimika ne ba kwa Hilama ne bena Gebala+ bachibile mabwe, kabiji banengezhezhe bichi ne mabwe a kushimikila nzubo.