Buku wa Bubiji wa Bamfumu

1 Ahaba byo afwile, bena Moabu+ basatukijile bena Isalela.

2 Kyo kimye Ahaziya kyo aponene panshi kupita mu jilozo po baajile tubichi to bapikwile jajinga mu kibamba kyanji kya peulu kyajinga mu Samaliya ne kwikozha bingi. Ponkapo watumine baluwe ne kwibambila’mba: “Yainga mukepuzhe Baela-zebuba lesa wa ku Ekelona+ emubuule kana nsakukosa nangwa ne.”+ 3 Bino malaika wa Yehoba waambijile Elaija*+ mwina Tishibe amba: “Imana uye na kutundaila baluwe ba mfumu wa Samaliya ne kwibashikisha’mba, ‘Nanchi mu Isalela kafwamo Lesa byo mubena kuya na kwipuzha Baela-zebuba lesa wa ku Ekelona nyi?+ 4 Onkao mambo, Yehoba waamba’mba: “Pa mwanya po walaala kechi ukabuukapo ne, mambo kine ukafwa.”’” Ponkapo Elaija wayile.

5 Baluwe byo babwelele kwi mfumu, ponkapo wibashikishe’mba: “Mambo ka o mwabwelelamo?” 6 Abo bamukumbwile’mba: “Kwajinga muntu umo waji kwiya na kwitutundaila, kabiji waji kwitwambila’mba, ‘Bwelai kwi mfumu waji kwimutuma mukamubuule’mba, “Yehoba waamba’mba: ‘Nanchi mu Isalela kafwamo Lesa byo watuma bakwipuzha Baela-zebuba lesa wa ku Ekelona nyi? Onkao mambo, pa mwanya po walaala kechi ukabuukapo ne, mambo kine ukafwa.’”’”+ 7 Ponkapo aye wibashikishe’mba: “Awo muntu waji kwiya na kwimusambakana ne kwamba bino byambo waji kumwekanga byepi?” 8 Abo bamukumbwile’mba: “Waji kuvwala kivwalo kya boya ne mushipi wa kiseba+ mu lubunda wanji.”+ Ponkapo waambile’mba: “Ye Elaija mwina Tishibe.”

9 Kepo mfumu atumineko kwi aye mukulumpe wa pa bashilikale 50 pamo na bashilikale banji 50. Byo ayile wataaine Elaija saka aikala peulu ya mutumba. Wamwambijile’mba: “Obewa muntu wa Lesa wa kine,+ ba mfumu baamba’mba, ‘Kunkulukila muno munshi.’” 10 Bino Elaija waambijile awa mukulumpe wa pa bashilikale 50 amba: “Inge yami muntu wa Lesa wa kine, mujilo afume mwiulu+ akusoke obewa ne bashilikale bobe 50.” Kabiji mujilo wafumine mwiulu ne kumusoka pamo na bashilikale banji 50.

11 Kabiji mfumu watumineko kwi aye jibiji mukulumpe mukwabo wa pa bashilikale 50 ne bashilikale banji 50. Aye wayile ne kumwambila’mba: “Obewa muntu wa Lesa wa kine, mfumu waamba’mba, ‘Kunkulukila muno munshi bukiji.’” 12 Bino Elaija wibambijile’mba: “Inge yami muntu wa Lesa wa kine, mujilo afume mwiulu akusoke obewa ne bashilikale bobe 50.” Kabiji mujilo wa Lesa wafumine mwiulu ne kumusoka pamo na bashilikale banji 50.

13 Kepo mfumu atumine mukulumpe wa pa bashilikale 50 wa busatu ne bashilikale banji 50. Bino uno mukulumpe wa pa bashilikale 50, watuntukile ne kufukama kwi Elaija ne kutendeka kumusashijila’mba: “Anweba muntu wa Lesa wa kine, napopwela, bumi bwami ne bumi* bwa bano bakalume benu 50 bwikale bwanema kwi anweba. 14 Mujilo wafumine mwiulu ne kusoka bakulumpe babiji ba pa bashilikale 50 ne mabumba abo a bashilikale 50, pano bumi* bwami buneme kwi anweba.”

15 Ponkapo malaika wa Yehoba waambijile Elaija amba: “Yanga nanji. Kange umuchine ne.” Kepo aimene ne kuya nanji kwi mfumu. 16 Kabiji Elaija waambijile mfumu amba, “Yehoba waamba’mba: ‘Obewa watumine baluwe kuya na kwipuzha Baela-zebuba lesa wa ku Ekelona.+ Nanchi mu Isalela kafwamo Lesa nyi?+ Mambo ka o wabujile kumwipuzha? Onkao mambo, pa mwanya po walaala kechi ukabuukapo ne, mambo kine ukafwa.’” 17 Byonkabyo, wafwile monka mwayijile byambo bya Yehoba byaambile Elaija; na mambo a kuba kechi wajingapo na mwana wa mulume ne, Yeholama*+ ye wamuswaine pa bufumu, mu mwaka wa bubiji wa bukalama bwa kwa Yeholama+ mwana wa kwa Yehoshafwata mfumu wa Yuda.

18 Bintu bikwabo byapichilemo Ahaziya+ ne byo aubile, nanchi kechi byanembwa mu buku wa bintu byapichilengamo bamfumu ba mu Isalela nenyi?