Buku wa Bubiji wa Bamfumu

13 Mu mwaka wa bu 23 wa bukalama bwa kwa Yehoashi+ mwana wa kwa Ahaziya+ mfumu wa Yuda, Yehoahaza mwana wa kwa Yehu+ mo mo aikele mfumu wa Isalela mu Samaliya, kabiji myaka 17 yo yo alamine. 2 Waubilenga byatama kwi Yehoba, kabiji watwajijile na kuba bubi Yeloboma mwana wa kwa Nebati bo alengejile bena Isalela kuba.+ Kechi wibulekele ne. 3 Onkao mambo, Yehoba wibazhingijile bingi+ bena Isalela,+ kabiji wibapaine mu kuboko kwa kwa Hazela Mfumu+ wa Silya ne mu kuboko kwa kwa Benehadada+ mwana wa kwa Hazela mu moba abo onse.

4 Mu kuya kwa moba, Yehoahaza wamusashijile* Yehoba amba amubile bibusa, kabiji Yehoba wamumvwine, mambo wamwene mfumu wa Silya byo amanyikilenga bena Isalela.+ 5 Onkao mambo, Yehoba wapele bena Isalela mupulushi+ wa kwibapokolola mu maboko a bena Silya, kabiji bena Isalela baikelenga mu mazubo abo byonka byo baikalanga kala.* 6 (Nangwa byonkabyo, kechi balekele kuba bubi bwa ba mu nzubo ya kwa Yeloboma bo alengejile bena Isalela kuba ne.+ Batwajijile kuba buno bubi,* kabiji kichi kya mulumbulumbu kyazhila*+ kyatwajijile kwikala mu Samaliya.) 7 Yehoahaza washajiletu na nzhita ya banabalume 50 benda pa bambili, makalaki 10, ne bashilikale benda panshi 10,000, mambo mfumu wa Silya wibavizhizhe,+ kabiji wibanyantawiletu nobe lukungu lwikalako pa kupuula.+

8 Bintu bikwabo byapichilemo Yehoahaza, bintu byonse byo aubile ne mingilo yanji ikatampe, nanchi kechi byanembwa mu buku wa bintu byapichilengamo bamfumu ba mu Isalela nenyi? 9 Kepo Yehoahaza bamutwajile na kulaala kwalaala bashakulu banji, kabiji bamuzhiikile mu Samaliya;+ kabiji mwananji aye Yehoashi wamuswaine pa bufumu.

10 Mu mwaka wa bu 37 wa bukalama bwa kwa Yehoashi Mfumu wa Yuda, Yehoashi+ mwana wa kwa Yehoahaza mo mo aikele mfumu wa Isalela mu Samaliya, kabiji walamine pa myaka 16. 11 Waubilenga byatama kwi Yehoba, kabiji kechi wikilekele kuba bubi bonse Yeloboma mwana wa kwa Nebati bo alengejile bena Isalela kuba ne.+ Kabiji watwajijile* mu buno bubi.

12 Bintu bikwabo byapichilemo Yehoashi, bintu byonse byo aubile ne mingilo yanji ikatampe ne byo alwile ne Amaziya Mfumu wa Yuda,+ nanchi kechi byanembwa mu buku wa bintu byapichilengamo bamfumu ba mu Isalela nenyi? 13 Kepo Yehoashi bamutwajile na kulaala kwalaala bashakulu banji, kabiji Yeloboma*+ waikele pa jitanda janji. Kabiji Yehoashi bamuzhiikile mu Samaliya konka ko bazhiikile bamfumu ba mu Isalela.+

14 Elisha+ byo akolelwe kikola kyonka kyamwipayile, Yehoashi mfumu wa Isalela waishile kwi aye ne kujijila pe aye, amba: “Tata, tata! Kalaki wa Isalela ne bantu banji benda pa bambili!”+ 15 Kepo Elisha amwambijile’mba: “Tola buta bwa mukanda ne miketo.” Ne aye watolele buta bwa mukanda ne miketo. 16 Kepo aambijile mfumu wa Isalela amba: “Kwata buta bwa mukanda.” Ne aye wibukwachile, kabiji Elisha watentekele maboko anji pa maboko a mfumu. 17 Kabiji wamwambijile’mba: “Shinkula kipenze ku musela.” Ne aye wikishinkwile. Elisha wamwambijile’mba: “Asa!” Ne aye waashile. Kabiji waambile’mba: “Muketo wa Yehoba wa lushinjilo,* muketo wa kushinda* bena Silya! Ukatapa* bena Silya ku Afeki+ kufikatu ne byo ukebavizha.”

18 Watwajijile kwamba’mba: “Tola miketo,” ne aye wiitolele. Kepo aambijile mfumu wa Isalela amba: “Asa panshi.” Ne aye waashile panshi jisatu ne kwikileka. 19 Ponkapo muntu wa Lesa wa kine wamuzhingijile ne kumwambila’mba: “Waji kufwainwa kwasa panshi jitanu nangwa jitanu na jimo! Inge watapile bena Silya ne kwibavizha, pano bena Silya ukebatapatu jisatu.”+

20 Bino byo byapwile, Elisha wafwile kabiji bamuzhiikile. Kabiji kwajinga mazhita+ a bena Moabu aiyanga mu kyalo ku ntendekelo ya mwaka.* 21 Bantu bamo byo bazhiikilenga muntu wafwa, bamwene nzhita, onkao mambo, awa muntu bamutaile bukiji mu kilende kya kwa Elisha ne kunyema. Uno muntu wafwa byo akunkwile ku bikupa bya kwa Elisha, wasangukile+ ne kwimana.

22 Hazela Mfumu+ wa Silya wamanyikilenga bena Isalela+ moba onse a kwa Yehoahaza. 23 Nangwa byonkabyo, Yehoba wibobijile bibusa ne lusa+ ne kwibata muchima na mambo a lulayañano lwanji lo alayañene ne Abalahama+ ne Izaka+ ne Yakoba.+ Kechi wakebelenga kwibonauna ne, kabiji kechi wibapangile kufuma mu kyenyi kyanji kufika ne lelo jino ne. 24 Hazela Mfumu wa Silya byo afwile, mwananji aye Benehadada wamuswaine pa bufumu. 25 Kabiji Yehoashi mwana wa kwa Yehoahaza wapokolwele kwi Benehadada mwana wa kwa Hazela mizhi yo aangachile mu nkondo kwi Yehoahaza shanji. Yehoashi wamushinjile jisatu,+ kabiji wapokolwele mizhi ya bena Isalela.