Buku wa Bubiji wa Bamfumu

15 Mu mwaka wa bu 27 wa bukalama bwa kwa Yeloboma* Mfumu wa Isalela, Azaliya*+ mwana wa kwa Amaziya Mfumu+ wa Yuda mo mo aikele mfumu.+ 2 Wajinga na myaka ya kusemwa 16 kimye kyo aikele mfumu, kabiji walamine mu Yelusalema myaka 52. Jizhina ja inanji wajinga Yekoliya wa ku Yelusalema. 3 Waubilenga byaoloka kwi Yehoba, byonkatu byaubilenga Amaziya shanji.+ 4 Nangwa byonkabyo, mapunzha atuntama kechi beonawine ne,+ kabiji bantu batapishenga ne kusoka bya kufutumuna pa mapunzha atuntama.+ 5 Yehoba wapumine mfumu, ne aye wakolelwe mbumba+ kufikatu ne juba jo afwile; kabiji waikelenga mu nzubo yajinga kwa bunke,+ kabiji Yotamo+ mwana mfumu ye wajinga mukulumpe wa pa nzubo,* kabiji ye wachibilanga mambo bantu ba mu kyalo.+ 6 Bintu bikwabo byapichilemo Azaliya,+ byonse byo aubile, nanchi kechi byanembwa mu buku wa bintu byapichilengamo bamfumu ba mu Yuda nenyi? 7 Kepo Azaliya bamutwajile na kulaala kwalaala bashakulu banji,+ kabiji bamuzhiikile konka ko bazhiikile bashakulu banji mu Muzhi wa Davida; kabiji mwananji aye Yotamo waswaine pa bufumu.

8 Mu mwaka wa bu 38 wa bukalama bwa kwa Azaliya Mfumu+ wa Yuda, Zekaliya+ mwana wa kwa Yeloboma mo mo aikele mfumu wa Isalela mu Samaliya, kabiji walamine pa bañondo batanu na umo. 9 Waubilenga byatama kwi Yehoba, byonkatu byaubilenga bashakulu banji. Kabiji kechi walekele kuba bubi Yeloboma mwana wa kwa Nebati bo alengejile bena Isalela kuba ne.+ 10 Kepo Shaluma mwana wa kwa Yabeshi amwalukijilemo kabiji wamutapijile+ konka ku Ibeleama.+ Byo amwipayile, wamuswaine pa bufumu. 11 Bintu bikwabo byapichilemo Zekaliya, byanembwa mu buku wa bintu byapichilengamo bamfumu ba mu Isalela. 12 Kino kyafikizhe byambo byaambile Yehoba kwi Yehu amba: “Bisemi bina bya baana bobe+ bikekalanga pa jitanda ja Isalela.”+ Kabiji byo byo kyamwekele byonkabyo.

13 Shaluma mwana wa kwa Yabeshi waikele mfumu mu mwaka wa bu 39 wa bukalama bwa kwa Uzaya Mfumu+ wa Yuda, kabiji walamine mu Samaliya pa ñondo umo. 14 Kabiji Menahema mwana wa kwa Gadi wafumine ku Tiliza+ ne kwiya ku Samaliya na kutapa Shaluma+ mwana wa kwa Yabeshi mu Samaliya. Byo amwipayile, wamuswaine pa bufumu. 15 Bintu bikwabo byapichilemo Shaluma ne byo aalukijilemo mukwabo, byanembwa mu buku wa bintu byapichilengamo bamfumu ba mu Isalela. 16 Kabiji pa kyonkakya kimye Menahema po po afumine ku Tiliza ne kushinda muzhi wa Tifisa ne bonse bajingamo ne manyaunda anji onse, mambo kechi bamushinkwijile binzhilo ne. Wibatapile ne kusaya banabakazhi baimichile bajinga mu muzhi.

17 Mu mwaka wa bu 39 wa bukalama bwa kwa Azaliya Mfumu wa Yuda, Menahema mwana wa kwa Gadi mo mo aikele mfumu wa Isalela, kabiji walamine mu Samaliya pa myaka jikumi. 18 Waubilenga byatama kwi Yehoba. Kabiji mu moba anji onse, kechi walekele kuba bubi bonse Yeloboma mwana wa kwa Nebati bo alengejile bena Isalela kuba ne.+ 19 Pula Mfumu+ wa Asilya waishile mu kyalo, kabiji Menahema wapele Pula matalenta* a siliva 1,000 kuba’mba amukwashe kukosesha bufumu bwanji.+ 20 Onkao mambo, Menahema watambwile uno siliva ku bena Isalela kupichila mu kusonkesha bantu bayile nkuwa kabiji banonshi.+ Wapele mfumu wa Asilya mashekele* a siliva 50 a muntu umo umo. Kepo mfumu wa Asilya abwelelemo kabiji kechi waikele mu kyalo ne. 21 Bintu bikwabo byapichilemo Menahema,+ byonse byo aubile, nanchi kechi byanembwa mu buku wa bintu byapichilengamo bamfumu ba mu Isalela nenyi? 22 Kepo Menahema bamutwajile na kulaala kwalaala bashakulu banji; kabiji mwananji aye Pekahiya wamuswaine pa bufumu.

23 Mu mwaka wa bu 50 wa bukalama bwa kwa Azaliya Mfumu wa Yuda, Pekahiya mwana wa kwa Menahema mo mo aikele mfumu wa Isalela mu Samaliya, kabiji walamine pa myaka ibiji. 24 Waubilenga byatama kwi Yehoba. Kechi walekele kuba bubi Yeloboma mwana wa kwa Nebati bo alengejile bena Isalela kuba ne.+ 25 Kepo Peka+ mukulumpe wanji wa nzhita mwana wa kwa Lemaliya amwalukijilemo kabiji wamutapijile mu Samaliya mu kyamba kyakosa kya ku nzubo* ya mfumu pamo ne Alagoba ne Aliye. Wajinga na banabalume 50 ba ku Gileada; kabiji byo amwipayile, wamuswaine pa bufumu. 26 Bintu bikwabo byapichilemo Pekahiya, bintu byonse byo aubile, byanembwa mu buku wa bintu byapichilengamo bamfumu ba mu Isalela.

27 Mu mwaka wa bu 52 wa bukalama bwa kwa Azaliya Mfumu wa Yuda, Peka+ mwana wa kwa Lemaliya mo mo aikele mfumu wa Isalela mu Samaliya, kabiji walamine pa myaka 20. 28 Waubilenga byatama kwi Yehoba, kabiji kechi walekele kuba bubi Yeloboma mwana wa kwa Nebati bo alengejile bena Isalela kuba ne.+ 29 Mu moba a kwa Peka Mfumu wa Isalela, Tigilata-pilesa Mfumu+ wa Asilya walukukile ne kushinda muzhi wa Iyonyi, ne Abela-betemaaka,+ ne Yanoa, ne Kedeshi,+ ne Hazola, ne Gileada,+ ne Ngalilea—kyalo kyonse kya Nafitali+—kabiji bangikazhi wibatwajile mu buzha ku Asilya.+ 30 Kepo Hosheya+ mwana wa kwa Ela aalukijilemo Peka mwana wa kwa Lemaliya, kabiji wamutapile ne kumwipaya; kabiji wamuswaine pa bufumu mu mwaka wa bu 20 wa bukalama bwa kwa Yotamo+ mwana wa kwa Uzaya. 31 Bintu bikwabo byapichilemo Peka, byonse byo aubile, byanembwa mu buku wa bintu byapichilengamo bamfumu ba mu Isalela.

32 Mu mwaka wa bubiji wa bukalama bwa kwa Peka mwana wa kwa Lemaliya mfumu wa Isalela, Yotamo+ mwana wa kwa Uzaya Mfumu+ wa Yuda mo mo aikele mfumu. 33 Wajinga na myaka ya kusemwa 25 kimye kyo aikele mfumu, kabiji walamine mu Yelusalema myaka 16. Jizhina ja inanji wajinga Yelusha mwana wa kwa Zadoka.+ 34 Waubilenga byaoloka ku meso a Yehoba, byonkatu byaubanga Uzaya shanji.+ 35 Nangwa byonkabyo, mapunzha atuntama kechi beonawine ne, kabiji bantu batapishenga ne kusoka bya kufutumuna pa mapunzha atuntama.+ Ye washimikile kibelo kya peulu kya nzubo ya Yehoba.+ 36 Bintu bikwabo byapichilemo Yotamo ne byo aubile, nanchi kechi byanembwa mu buku wa bintu byapichilengamo bamfumu ba mu Yuda nenyi? 37 Mu oa moba Yehoba watendekele kutuma Lezina mfumu wa Silya ne Peka+ mwana wa kwa Lemaliya kuya na kulwa na bena Yuda.+ 38 Kepo Yotamo bamutwajile na kulaala kwalaala bashakulu banji kabiji bamuzhiikile konka ko bazhiikile bashakulu banji mu Muzhi wa Davida mushakulu wanji. Kabiji mwananji aye Ahaza waswaine pa bufumu.