Buku wa Bubiji wa Bamfumu
19 Mfumu Hezekiya byo aumvwinetu kino, watabwile bivwalo byanji ne kwinyinga bisapi bya majila kabiji wayile mu nzubo ya Yehoba.+ 2 Ponkapo watumine Eliakima wajinga mukulumpe wa pa nzubo* ya mfumu, ne Shebina munembeshi, ne bakulumpe ba bañanga saka benyinga bisapi bya majila kuya kwi ngauzhi Isaya+ mwana wa kwa Amozi. 3 Bamwambijile’mba: “Hezekiya waamba’mba, ‘Jino ke juba ja malwa, ja kulengululwa* kabiji ja kwimulengesha bumvu; mambo baana baji pepi kusemwa,* pakuba ngovu ya kwibasema kafwako.+ 4 Kampe Yehoba Lesa wenu usakumvwa byambo byonse bya kwa Labashake, ye batuma kwi nkambo yanji aye mfumu wa Asilya kwiya na kwendeleka Lesa mumi,+ ne aye ukamutotolwesha pa byambo Yehoba Lesa wenu byo aumvwa. Onkao mambo, lombelaiko+ bantu bashalapo bonka bapuluka.’”
5 Byonkabyo, bakalume ba Mfumu Hezekiya bayile kwi Isaya,+ 6 kabiji Isaya wibambijile’mba: “Mukabuule nkambo yenu amba, ‘Yehoba waamba’mba: “Kange mube moyo+ na mambo a byambo byo mwaumvwa, byambo bya kunnena ku ba mingilo ba mfumu wa Asilya ne.+ 7 Amiwa nsakubika byambo mu milanguluko* yanji, ne aye usakumvwa sawakya ne kubwela ku kyalo kyanji; kabiji nkamulengela kufwa ku mpoko monka mu kyalo kyanji.”’”+
8 Labashake byo aumvwine’mba mfumu wa Asilya wafumako ku Lakishi,+ wayile kwi aye ne kumutaana ubena kulwa na ba mu muzhi wa Libina.+ 9 Mfumu waumvwine byambo byo baambilenga pe Tilahaka Mfumu wa Etiopya amba: “Waiya na kulwa ne obewa.” Onkao mambo, watumine baluwe+ jibiji kwi Hezekiya ne kwibambila’mba: 10 “Mukabuule Hezekiya Mfumu wa Yuda amba, ‘Kange uleke Lesa wobe ye waketekelamo akujimbaike byo abena kwamba’mba: “Yelusalema kechi basakumupana mu kuboko kwa mfumu wa Asilya ne.”+ 11 Umvwai! Anweba mwaumvwa bintu byaubile bamfumu ba Asilya ku byalo byonse pa kwibyonauna.+ Nanchi anweba yenu bonkatu bo bakapokolola nyi? 12 Abya balesa ba bisaka bya bantu, bashakulu bami byo baonawine bebipokolwele nyi? Nanchi Gozani, ne Halana,+ ne Lezefwa ne bena Edena baikalanga mu Telasa baji pi? 13 Nga mfumu wa Hamata, ne mfumu wa Alapada ne mfumu wa mizhi ya Sefwabaimu, ne Hena ne Iva, baji pi?’”+
14 Hezekiya watambwile makalata ku baluwe ne kwiatanga. Kepo Hezekiya ayile ku nzubo ya Yehoba ne kwiavungulwila kwi Yehoba.+ 15 Kepo Hezekiya alombele+ kwi Yehoba ne kwamba’mba: “Anweba Yehoba, Lesa wa Isalela, anweba mwaikala peulu* ya bakelubi,+ anweba yenu Lesa yenka wa kine wa bufumu bonse bwa pano pa ntanda.+ Mwalengele jiulu ne ntanda. 16 Anweba Yehoba, telekai ne kumvwa!+ Anweba Yehoba labai+ ne kumona! Umvwai byambo byatuma Senakelibu bya kwendeleka anweba Lesa mumi. 17 Anweba Yehoba, kine bamfumu ba Asilya baonauna bisaka bya bantu ne byalo byabyo.+ 18 Kabiji bataya balesa babo mu mujilo, mambo kechi bajinga balesa ne,+ bino bajingatu mingilo ya maboko a bantu,+ bichi ne mabwe. O ene mambo o bebonawijile. 19 Pano anweba Yehoba Lesa wetu, twapopwela tupokololai mu kuboko kwanji, pa kuba’mba bufumu bonse bwa pano pa ntanda buyuke’mba anweba yenu Lesa bunketu, anweba Yehoba.”+
20 Kepo Isaya mwana wa kwa Amozi atumine ano mawi kwi Hezekiya amba: “Yehoba Lesa wa Isalela waamba’mba, ‘Naumvwa lulombelo lobe lo wandomba+ pa mambo a kwa Senakelibu Mfumu wa Asilya.+ 21 Yehoba waamba pe aye amba:
“Kisungu mwana wa mukazhi Ziona wakulengulula, kabiji wakuseka.
Mwana wa mukazhi Yelusalema wapukunya mutwe wanji ne kukuseka.
22 Ñanyi ye waendeleka ne kuba mwenga?+
Ñanyi ye ubena kupaachila+
Ne kumutala na meso obe a bwitote?
Wazhila wa Isalela ye ye ubena kubila bino!+
23 Obewa waendelekele Yehoba+ kwingijisha baluwe bobe+ ne kwamba’mba,
‘Na makalaki ami a nkondo avula
Nkakanjila peulu ya mitumba,
Ku mapunzha a kwalepa a mu Lebanoni.
Nkatema bichi byanji bya sida byalepesha, ne bichi byanji bya yunipa byawamisha.
Nkatwela mu nkonkoso mwanji, monka mu mavunda anji.
24 Nkapoya mishima ne kutoma mema a mu kyalo kingi;
Nkomisha tukola* tonse twa mu Ijipita na maulu ami.’
25 Nanchi kechi mwaumvwa nenyi? Kino kyafuukwijilwe* jimo kufumatu ne ku kala.+
Nekinengezhezhe* kufumatu ku moba a kala.+
Pano nsakwikifikizha.+
Obewa ukalula mizhi ya masakwa akosa ke milumba ya bikulukulu.+
26 Bangikazhi kechi bakekala na wa kwibakwasha ne;
Bakebalengesha moyo ne bumvu.
Bakekala nobe nsono ya mungye kabiji nobe munyemvu,+
Nobe nsono yamena pa musemi yo basoka ku mwela wa ku musela.
27 Bino amiwa ngyuka inge waikala, inge walupuka, inge watwela,+
Kabiji ngyuka inge wanzhingijila,+
28 Mambo bukaji bobe bo wanzhingijila+ ne kupatauka kobe nebyumvwa.+
Onkao mambo, nkakukoba kanda mu moona ne kukukasa lutambo+ ku byatunwa,
Kabiji nkakubwezha mu jishinda monka mo waishijile.”+
29 “‘Kino kyo kyo ukayukilako:* Uno mwaka ukajanga kajo ka mulakata;* kabiji mu mwaka wa bubiji ukajanga kajo ka mukoko;+ pakuba mu mwaka wa busatu ukabyala nkunwa ne kunowa kajo, kabiji ukajima miñanzañanza ne kujako bipangwa.+ 30 Aba ba mu nzubo ya kwa Yuda bakapuluka, aba bakashalapo,+ bakekizha mizhazhi panshi ne kupanga bipangwa kwiulu. 31 Mambo bakashalapo bakafuma mu Yelusalema ne bakapuluka bakafuma ku Mutumba wa Ziona. Mukoyo wa Yehoba wa mabumba ye ukoba kino.+
32 “‘Onkao mambo, Yehoba waamba pe mfumu wa Asilya+ amba:
“Aye kechi ukeya mu uno muzhi+
Nangwa kwasamo muketo ne
Nangwa kulwa nanji na jikebo ne
Nangwa kutuchika mishime ya kulwilapo nanji ne.+
33 Mu jishinda mo aishijile mo mo akabwelela;
Kechi ukatwela mu uno muzhi ne,” byo byaamba Yehoba.
34 “Nkalamawizha uno muzhi+ ne kumupokolola na mambo a jizhina jami+
Ne na mambo a kalume wami Davida.”’”+
35 Bonkabwa bufuku malaika wa Yehoba wayile mu kampu wa bena Asilya ne kwipaya banabalume 185,000.+ Bantu byo babuukile lukelokelo, bamwene mibiji yonse ya bantu bafwa.+ 36 Onkao mambo, Senakelibu Mfumu wa Asilya wafumineko ne kubwela ku Ninevwa+ ne kukekala konkakwa.+ 37 Kabiji byo afukamine ku nzubo ya kwa Nishiloka lesa wanji, baana banji ba kwisemena ba Adalameleki ne Shaleza bamutapile na mpoko+ kabiji banyemejile ku kyalo kya Alalata.+ Mwananji aye Eshadona+ waswaine pa bufumu.