Buku wa Bubiji wa Bamfumu

24 Mu moba a bukalama bwa kwa Yehoyakimu, Nebukaneza Mfumu+ wa Babilona waishile na kulwa nanji, kabiji Yehoyakimu waikele ke kalume wanji myaka isatu. Nangwa byonkabyo, wamwalukijilemo ne kumusatukila. 2 Kabiji Yehoba watendekele kumutumina mazhita a bena Kalodeya,+ a bena Silya, a bena Moabu ne a bena Amonyi. Wiatuminenga kuya na kulwa na Yuda ne kumonauna, monka mwayijile byambo bya Yehoba+ byo aambile kupichila mu bakalume banji bangauzhi. 3 Kya kine, kino kyamwekele kwi Yuda monka mwayijile mukambizho wa Yehoba, wa kwibafumya ku meso anji+ na mambo a bubi bonse bwaubile Manase,+ 4 ne na mambo a mashi a bantu babula mambo o aichijile,+ mambo wayuzhizhe Yelusalema na mashi a bantu babula mambo, kabiji Yehoba kechi waswile kumulekelako mambo ne.+

5 Bintu bikwabo byapichilemo Yehoyakimu, byonse byo aubile, nanchi kechi byanembwa mu buku wa bintu byapichilengamo bamfumu ba mu Yuda nenyi?+ 6 Kepo Yehoyakimu bamutwajile na kulaala kwalaala bashakulu banji;+ kabiji mwananji aye Yehoyakina waswaine pa bufumu.

7 Mfumu wa Ijipita kechi wabwezhezhepo kufuma mu kyalo kyanji ne, mambo mfumu wa Babilona waangachile bintu byonse byajinga bya mfumu wa Ijipita,+ kufuma ku Kakola* ka Ijipita+ kukafika ne ku Mukola wa Ufelata.+

8 Yehoyakina+ wajinga na myaka ya kusemwa 18 kimye kyo aikele mfumu, kabiji walamine mu Yelusalema bañondo basatu.+ Inanji wajinga Nehushita mwana wa kwa Elenatana wa mu Yelusalema. 9 Waubilenga byatama kwi Yehoba, ne kuba bintu byonse byaubilenga shanji. 10 Pa kyokya kimye, bakalume ba kwa Nebukaneza Mfumu wa Babilona baishile na kulwisha Yelusalema, ne muzhi yense bamuzhokolokele.+ 11 Nebukaneza Mfumu wa Babilona waishile mu muzhi, bakalume banji saka bashinkila muzhi.

12 Yehoyakina mfumu wa Yuda walupukile ne kuya kwi mfumu wa Babilona,+ pamo ne inanji, ne bakalume banji, ne babitumbafumu banji, ne babinemanga banji; kabiji mu mwaka wa butanu na busatu wa bukalama bwanji,+ mfumu wa Babilona wamutwajile mu buzha.+ 13 Kepo asendele bya buneme byonse byajinga mu nzubo ya Yehoba ne bya buneme byajinga mu nzubo* ya mfumu.+ Wachibawile mu bipimvwa pimvwa bipe byonse bya ngolode byalengele Solomone mfumu wa bena Isalela byajinga mu nzubo ya Yehoba,+ monka mwaambijile Yehoba. 14 Watwajile mu buzha ba mu Yelusalema bonse, babitumbafumu bonse,+ babilobo bonse, ne basendwe ba byela bonse ne basendwetu bakwabo,+ watwajile bantu 10,000 mu buzha. Kafwako nangwa umo washajile ne, kanatu bene bayanji ba mu kyalo.+ 15 Byonkabyo, watwajile Yehoyakina+ mu buzha ku Babilona;+ kabiji wasendele ne ina mfumu, ne bakazhi ba mfumu, ne babinemanga banji, ne bantangi ba mu kyalo, wibafumishe mu Yelusalema ne kwibatwala mu buzha ku Babilona. 16 Kabiji mfumu wa Babilona watwajile bashilikale bonse 7,000 mu buzha ku Babilona, pamo na basendwe ba byela 1,000 ne basendwetu bakwabo, abano bonse bajinga banabalume bakosa bayuka kulwa nkondo. 17 Mfumu wa Babilona waswanyikile Mataniya shanji Yehoyakina wa mwanyike+ pa bufumu kabiji wamupimpwile jizhina ke Zedekiya.+

18 Zedekiya wajinga na myaka ya kusemwa 21 kimye kyo aikele mfumu, kabiji walamine mu Yelusalema myaka 11. Inanji wajinga Hamutali+ mwana wa kwa Yelemiya wa ku Libina. 19 Waubilenga byatama kwi Yehoba byonkatu byaubilenga Yehoyakimu.+ 20 Abino bintu byamwekele mu Yelusalema ne mu Yuda na mambo a bukaji bwa Yehoba, kufikatu ne byo ebafumishe ku meso anji.+ Kabiji Zedekiya wasatukijile mfumu wa Babilona.+