Buku wa Bubiji wa Bamfumu

8 Elisha waambijile mwanamukazhi mwina mwana ye asangwile+ amba: “Imana uyenga, obewa ne ba mu nzubo yobe, mukekale bwenyi konse ko mwakonsha kwikala, mambo Yehoba waamba’mba kukeya kipowe kya nzala,+ kabiji kikekala muno mu kyalo myaka itanu na ibiji.” 2 Byonkabyo, uno mwanamukazhi waimene ne kuba byamwambijile muntu wa Lesa wa kine. Wayile na ba mu nzubo yanji ne kukekala mu kyalo kya bena Filishitiya+ myaka itanu na ibiji.

3 Myaka itanu na ibiji byo yapwile, uno mwanamukazhi wafumineko ku kyalo kya bena Filishitiya ne kuya na kusashijila mfumu na mambo a nzubo yanji ne bujimi bwanji. 4 Kabiji mfumu waambijile Gehazi wa mwingilo wa muntu wa Lesa wa kine amba: “Napopwela, mbuule bintu byonse bikatampe byauba Elisha.”+ 5 Byo akibuujilengatu mfumu, Elisha byo asangwile muntu wafwile,+ mwanamukazhi mwina mwana ye asangwile waishile kwi mfumu, na kumusashijila pa mambo a nzubo yanji ne bujimi bwanji.+ Ponkapo Gehazi waambile’mba: “Anweba nkambo mfumu, awe ye mwanamukazhi, kabiji awe ye mwananji wa mulume, Elisha ye asangwile.” 6 Ponkapo mfumu waipwizhe uno mwanamukazhi, ne aye wamubuujile byonse. Kepo mfumu amupele kapaso ne kumwambila’mba: “Umubwezhezhe bintu byanji byonse ne kumupa mali o afwainwe kumwenamo mu kajo ka mu bujimi bwanji moba onse o afuminepo kufika ne lelo jino.”

7 Elisha wayile ku Damasakasa+ kimye Benehadada+ mfumu wa Silya kyo akolelwe. Onkao mambo, bamubuujile’mba: “Muntu wa Lesa wa kine+ waiya kuno.” 8 Ponkapo mfumu waambijile Hazela+ amba: “Senda bupe uye ukamonañane na muntu wa Lesa wa kine.+ Wipuzhe Yehoba kupichila mwi aye amba, ‘Nanchi nsakupuluka ku kino kikola nyi?’” 9 Hazela wayile na kumumona kabiji wamusendejile bupe bwa bintu byonse byawama bya mu Damasakasa, byakonsha kusenda bangamela 40. Waishile ne kwimana kwi aye ne kwamba’mba: “Mwanenu Benehadada mfumu wa Silya, wantuma kwi anweba na kwimwipuzha’mba, ‘Nanchi nsakupuluka ku kino kikola nyi?’” 10 Elisha wakumbwile’mba: “Yanga ukamubuule’mba, ‘Kine usakukosa,’ pakuba Yehoba wammwesha’mba kine ukafwa.”+ 11 Kabiji aye wamutajilengatu kya kuba waumvwa ne bumvu. Kepo muntu wa Lesa wa kine atendekele kujila. 12 Hazela waipwizhe’mba: “Anweba nkambo mambo ka o mubena kujijila?” Aye wakumbwile’mba: “Mambo nayuka bintu byatama byo ukooba bena Isalela.+ Masakwa abo akosa ukeasoka, ne banabalume babo bakosa ukebepaya na mpoko, ne baana babo ukebasansakanya, ne banabakazhi babo baimita ukebatumbula.”+ 13 Hazela waipwizhe’mba: “Nanchi amiwa kalume wenu, kabwatu, nakonsha kuba byepi kino kintu?” Bino Elisha waambile’mba: “Yehoba wammwesha’mba obewa ukekala mfumu wa Silya.”+

14 Kepo afumineko kwi Elisha ne kubwela kwi nkambo yanji, kabiji wamwipwizhe’mba: “Elisha waji kukubuula’mba ka?” Aye wakumbwile’mba: “Waji kumbuula’mba kine musakukosa.”+ 15 Bino juba jalondejilepo, Hazela washikwile kisapi kya kwanshika pa mwanya ne kwikitumpika mu mema, kabiji wamukupikilekyo* pa meso kufikatu ne byo afwile.+ Kabiji Hazela wamuswaine pa bufumu.+

16 Mu mwaka wa butanu wa bukalama bwa kwa Yeholama+ mwana wa kwa Ahaba mfumu wa Isalela, kimye Yehoshafwata kyo ajinga mfumu wa Yuda, Yeholama+ mwana wa kwa Yehoshafwata Mfumu wa Yuda waikele ke mfumu. 17 Wajinga na myaka ya kusemwa 32 kimye kyo aikele mfumu, kabiji walamine mu Yelusalema myaka itanu na isatu. 18 Waendelenga mu jishinda ja bamfumu ba mu Isalela,+ byonkatu byaubanga boba ba mu nzubo ya kwa Ahaba,+ mambo wasongwele mwana wa kwa Ahaba;+ kabiji waubilenga byatama kwi Yehoba.+ 19 Bino Yehoba kechi wakebelenga konauna Yuda ne, na mambo a kalume wanji Davida,+ mambo walayile kumupa lampi kikupu aye+ ne baana banji pamo.

20 Mu moba anji, bena Edomu basatukijile bena Yuda+ kabiji betongwejile bene mfumu.+ 21 Onkao mambo, Yeholama waabukijile ku Zaila na makalaki anji onse, kabiji waimene bufuku ne kuya na kushinda bena Edomu bamuzhokolokele ne bakulumpe ba bashilikale benda pa makalaki; kabiji bashilikale banyemejile ku matente abo. 22 Bino bena Edomu batwajijiletu kusatukila bena Yuda kufika ne lelo jino. Libina+ naye wasatukile pa kyonkakya kimye.

23 Kabiji bintu bikwabo byapichilemo Yeholama, bintu byonse byo aubile, nanchi kechi byanembwa mu buku wa bintu byapichilengamo bamfumu ba mu Yuda nenyi? 24 Kepo Yeholama bamutwajile na kulaala kwalaala bashakulu banji ne kumuzhiika ko bazhiikile bashakulu banji mu Muzhi wa Davida.+ Kabiji mwananji aye Ahaziya+ wamuswaine pa bufumu.

25 Mu mwaka wa bu 12 wa bukalama bwa kwa Yeholama mwana wa kwa Ahaba mfumu wa bena Isalela, Ahaziya mwana wa kwa Yeholama Mfumu wa Yuda waikele ke mfumu.+ 26 Ahaziya wajinga na myaka ya kusemwa 22 kimye kyo aikele mfumu, kabiji walamine mu Yelusalema mwaka umo. Inanji wajinga Ataliya+ munkana* wa kwa Omuli Mfumu+ wa Isalela. 27 Waendelenga mu jishinda ja ba mu nzubo ya kwa Ahaba+ kabiji waubilenga byatama kwi Yehoba, byonkatu byaubilenga ba mu nzubo ya kwa Ahaba, mambo wasongwele mu kisemi kya kwa Ahaba.+ 28 Onkao mambo, wayile ku nkondo pamo ne Yeholama mwana wa kwa Ahaba na kulwa ne Hazela Mfumu wa Silya ku Lamota-gileada,+ bino Yeholama bamukozhezhe ku bena Silya.+ 29 Onkao mambo, Mfumu Yeholama wabwelele ku Yezelela+ kuba’mba bilonda bikapwe byo bamukozhezhe ku bena Silya ku Lama kimye kyo alwilenga ne Hazela Mfumu wa Silya.+ Ahaziya mwana wa kwa Yeholama mfumu wa Yuda wayile ku Yezelela na kumona Yeholama mwana wa kwa Ahaba, mambo bamukozhezhe.*