Masalamo
148 Totai Yehoba!*
Mutotai Yehoba anweba muji mwiulu;+
Mutotai, anweba mwikala mwiulu mwine.
2 Mutotai, anweba bamalaika banji bonse.+
Mutotai, anweba jibumba janji jonse.+
3 Mutotai, anweba juba ne ñondo.
Mutotai, anweba tubangabanga tonse twa kyeya.+
4 Mutotai, anweba meulu alepesha*
Ne anweba makumbi a mvula.
5 Byonse bitote jizhina ja Yehoba,
Mambo aye wakambizhe, kabiji byalengelwe.+
7 Mutotai Yehoba pano pa ntanda,
Anweba bilengwa bikatampe bya mu kalunga ka mema ne mu mazhiba onse,
8 Anweba kubesha, mvula wa mabwe, mabebe ne makumbi afiita,
Anweba kinkunkwila mutwala byambo byanji,+
9 Anweba mitumba ne tutumbatumba tonse,+
Anweba bichi bipanga bipangwa ne anweba bichi byonse bya sida,+
10 Anweba banyama ba mungye+ ne ba kulela,
Bikalaba panshi ne bañonyi,
11 Anweba bamfumu ba pano pa ntanda ne anweba bisaka byonse bya bantu,
Anweba babinemanga ne anweba bamitonyi bonse ba pano pa ntanda,+
12 Anweba bansongwalume ne bansongwakazhi,*
Bakote ne banyike pamo.
13 Bonse batote jizhina ja Yehoba,
Mambo jizhina janji jo jonkatu jatumbalala.+
Lukumo lwanji lwakila ntanda ne jiulu.+
14 Aye ukatumbijika bulume* bwa bantu banji,
Kuba’mba bantu banji bonse ba kishinka bakatotwe,
Bonka bena Isalela, bantu baji kwipi ne aye.
Totai Yehoba!*