Kubala
34 Kabiji Yehoba waambijile Mosesa jikwabo amba: 2 “Buula bena Isalela ino mikambizho amba: ‘Mukatwela mu kyalo kya Kenana,+ kabiji kikekala ke kyenu kya buswanyi. Ino yo ikekala mipaka ya kyalo kya Kenana.+
3 “‘Mupaka wenu wa ku kabeta ka ku bulenge ukafika ne ku kiselebwa kya Zini kyatalañana na Edomu, kabiji mupaka wenu wa ku kabeta ka ku bulenge na ku musela ukafika kwapelela Kalunga* ka Mukele.+ 4 Mupaka wenu akachimpuke ne kupita ku kabeta ka ku bulenge kwatuntukila Akalabimu+ kukafika ne ku Zini, kabiji ukapelela ku kabeta ka ku bulenge bwa Kadeshi-balaneya.+ Kabiji ukafika ku Hazalada+ ne kukapita ku Azimona. 5 Kabiji mupaka akachimpukile ku Azimona kupita ku Kimpachiko* kya Ijipita ne kukapelela ku Kalunga* ka Mema.+
6 “‘Kalunga* ka Mema Kakatampe ne musezho wako ko kakekala mupaka wenu wa ku muzhika. Uno ye ukekala mupaka wenu wa ku muzhika.+
7 “‘Mupaka wenu wa ku kabeta ka ku buyeke ukekala bino: Kufuma ku Kalunga ka Mema Kakatampe, mukachibe mupaka wenu kukafika ne ku Mutumba wa Hola.+ 8 Kufuma ku Mutumba wa Hola mukachibe mupaka kukafika ne ku Lebo-Hamata,*+ kabiji mupaka akapelele ku Zedada.+ 9 Kabiji uno mupaka ukafika ku Zifilona ne kupelela ku Hazala-enana.+ Uno ye ukekala mupaka wenu wa ku kabeta ka ku buyeke.
10 “‘Kabiji mukachibe mupaka wenu ku musela kufuma ku Hazala-enana kukafika ku Shefwama. 11 Uno mupaka ukafuma ku Shefwama kukafika ne ku Libula ku musela wa Aina, kabiji mupaka ukakunkuluka ne kukilañanya mukolo uji ku musela wa Kalunga ka Kineleta.*+ 12 Uno mupaka ukafika ku Yodano ne kupelela ku Kalunga ka Mukele.+ Kino kyo kikekala kyalo kyenu+ ne mipaka ikizhokoloka.’”
13 Byonkabyo, Mosesa wakambizhe bena Isalela amba: “Kino kyo kyalo kyo mukabanya kupichila mu kuta bubale+ byonkatu Yehoba byo akambizha kwikipana ku mikoka itanu na ina ne kichika. 14 Mambo mukoka wa bena Lubenyi monka mwayila bikota byabo, mukoka wa bena Gadi monka mwayila bikota byabo, ne kichika kya mukoka wa bena Manase, batambula kala kya buswanyi kyabo.+ 15 Mikoka ibiji ne kichika yatambula kala kya buswanyi kyayo ku musela mu mpunzha ya Yodano kwipi na Yeliko, konka kuselela juba.”+
16 Yehoba waambijile Mosesa jibiji amba: 17 “Ano o mazhina a banabalume bakemwabenya kyalo kyo mukekalamo; Eleaza+ ñanga ne Yoshua+ mwana wa kwa Nuni. 18 Mu mukoka yense mukasalemo mukulumpe umo wa kwimukwasha kwabanya kyalo kwikala kyenu kya buswanyi.+ 19 Ano o mazhina a banabalume: mu mukoka wa bena Yuda,+ mukafume Kaleba+ mwana wa kwa Yefune; 20 mu mukoka wa bena Shimeona,+ mukafume Shemwela mwana wa kwa Amihuda; 21 mu mukoka wa bena Benjamina,+ mukafume Elidada mwana wa kwa Kishilona; 22 mu mukoka wa bena Danyi,+ mukafume Buki mwana wa kwa Yongili, mukulumpe wabo; 23 mu baana ba kwa Yosefwa,+ mu mukoka wa bena Manase,+ mukafume Haniela mwana wa kwa Efodi, mukulumpe wabo; 24 mu mukoka wa bena Efelaimu,+ mukafume Kemwela mwana wa kwa Shifitanyi, mukulumpe wabo; 25 mu mukoka wa bena Zebuluna,+ mukafume Elizafwana mwana wa kwa Panaka, mukulumpe wabo; 26 mu mukoka wa bena Isakala,+ mukafume Palatiela mwana wa kwa Azana, mukulumpe wabo; 27 mu mukoka wa bena Ashela,+ mukafume Ayihuda mwana wa kwa Shelomi, mukulumpe wabo; 28 mu mukoka wa bena Nafitali,+ mukafume Pedahela mwana wa kwa Amihuda, mukulumpe wabo.” 29 Abano bo banabalume Yehoba bo akambizhe kwabenya bena Isalela kyalo kya Kenana.+