Mitonyi

18 Mu oa moba kechi mwajingapo mfumu mu Isalela ne.+ Kabiji mu onka a moba, mukoka wa bena Danyi+ wakebelenga mpunzha ya kwikalamo, mambo kufika pa kyokya kimye kechi batambwile buswanyi mukachi ka mikoka ya bena Isalela ne.+

2 Bena Danyi batumine banabalume batanu kufuma mu kisemi kyabo, banabalume bafikilamo kufuma ku Zola ne ku Eshitaola,+ kuya na kwendela kyalo ne kupitañanamo. Bebambijile’mba: “Yainga mukapitañane mu kyalo.” Byo bafikile mu mpunzha ya mitumba ya Efelaimu bayile ku nzubo ya kwa Mika,+ balaajile konkakwa. 3 Byo bafikile kwipi na nzubo ya kwa Mika, baumvwine jiwi* ja nsongwalume mwina Levi ne kwijiyuka, onkao mambo bayile ko ajinga ne kumushikisha’mba: “Ñanyi wakuletele kuno? Ubena kuba ka kuno? Ñanyi mwingilo ye ubena kwingila kuno?” 4 Aye wibakumbwile’mba: “Mika wangubila bikananga ne bikananga, kabiji wantwezhezhe mwingilo wa kwikala ñanga wanji.”+ 5 Kepo bamwambijile’mba: “Mwipuzhe Lesa kana tusakwenda bulongo nangwa ne.” 6 Ñanga wibambijile’mba: “Mwendetu bulongo. Yehoba uji ne anweba pa lwendo lwenu.”

7 Onkao mambo, aba banabalume batanu bayile ne kufika ku Laishi.+ Bamwene bantu baikalangamo byo baikele kwa kubula kuketekela mu bantu bakwabo byonkatu byaikele bena Shidona. Baikeletu ku matwi nzoo kabiji kwa kubula wa kwibakatazha,+ kabiji mu kyalo kechi mwajingapo muntu wakanama wa kwibakabisha ne. Baikelenga kwalepa bingi na bena Shidona, kabiji kechi bapwanañananga na bantu bakwabo ne.

8 Byo babwelele ku balongo babo ku Zola ne ku Eshitaola,+ balongo babo bebashikishe’mba: “Kwajinga byepi ko mwayile?” 9 Abo bakumbwile’mba: “Twayai tukalwe nabo, mambo twamona’mba kyalo kyawama bingi. Mambo ka o mubena kuzhinyazhinya? Kange mubande kuya na kutambula kyalo ne. 10 Byo mukafika, mukataana bantu baikalatu kwa kubula wa kwibakatazha,+ kabiji kyalo kyabaya bingi. Lesa wikipana mu maboko enu, kabiji ke mpunzha muji bintu byonse bya pano pa ntanda.”+

11 Kepo mu kisemi kya bena Danyi mwafumine banabalume 600 benengezhezhe kulwa nkondo, bafumine ku Zola ne ku Eshitaola.+ 12 Bayile ne kutebelela ku Kiliata-yealimu+ mu Yuda. O ene mambo o batelela yoya mpunzha iji ku muzhika wa Kiliata-yealimu amba Mahane-danyi*+ kufika ne lelo jino. 13 Bafumine kokwa ne kuya ku kibunji kya mitumba kya Efelaimu kabiji bafikile ku nzubo ya kwa Mika.+

14 Kepo banabalume batanu bayile na kwendela kyalo kya Laishi,+ baambijile balongo babo amba: “Nanchi mwayuka’mba mu ano mazubo muji kajilaya kabula maboko, bankishi,* kipashañano kya kusonga ne kya kyela nyi?+ Langulukaipo pa byo mwafwainwa kuba.” 15 Onkao mambo, basendukijile kokwa ne kwiya ku nzubo ya nsongwalume mwina Levi+ yajinga kwipi na nzubo ya kwa Mika ne kumwimuna. 16 Bino banabalume 600 bena Danyi+ bavwajile bya nkondo baimenetu ku kibelo. 17 Banabalume batanu bayile na kwendela kyalo+ batwelele mukachi na kusenda kipashañano kya kusonga, kajilaya kabula maboko,+ bankishi*+ ne kipashañano kya kyela.+ (Ñanga+ waimene pa kibelo na banabalume 600 bavwajile bya nkondo.) 18 Batwelele mu nzubo ya kwa Mika ne kusenda kipashañano kya kusonga, kajilaya kabula maboko, bankishi* ne kipashañano kya kyela. Ñanga wibashikishe’mba: “Mubena kuba ka?” 19 Abo bamukumbwile’mba: “Zhindamapo. Kwata pa kanwa, uye ne atweba kuba’mba wikale shetu* kabiji ñanga wetu. Kyepi kyawama, obewa kwikala ñanga mu nzubo ya muntu umo nyi,+ inyi kwikala ñanga wa mukoka kabiji wa kisemi kya mu Isalela?”+ 20 Onkao mambo, ñanga kyamutokejile ku muchima, kabiji washikwile kajilaya kabula maboko, bankishi* ne kipashañano kya kusonga+ ne kuya na boba bantu.

21 Kepo baalulukile ne kutwajijila na lwendo lwabo, kabiji batangizheko baana, bilelwa byabo ne bintu byabo bya buneme. 22 Byo baendele kufika palepa kufuma ku nzubo ya kwa Mika, bantu baikalanga mu mazubo ajinga kwipi na nzubo ya kwa Mika bakonkene pamo ne kupupila bena Danyi ne kwibataana. 23 Byo babijikile bena Danyi, abo baalulukile ne kwibatala ne kushikisha Mika amba: “Kwapya ka? Mambo ka o mwakonkena pamo?” 24 Aye wibakumbwile’mba: “Mwansendela balesa bo nalengele kabiji mwasenda ne ñanga. Ñanyi kintu kyo nashala nakyo? Pano mwakonsha kunshikisha byepi amba, ‘Kwapya ka?’” 25 Bena Danyi bamwambijile’mba: “Kange witupachilenga ne; mambo inge utwajijile, banabalume* bazhingila basakukuba kyatama, kabiji usakufwa,* obewa ne ba mu nzubo yobe.” 26 Bena Danyi batwajijile lwendo lwabo; kabiji Mika byo amwene’mba bakosa bingi kukila aye, waalulukile ne kubwelamo ku nzubo yanji.

27 Byo basendele balesa balengele Mika ne ñanga wanji, bayile ku Laishi+ ku bantu baikele ku matwi nzoo kabiji kwa kubula wa kwibakatazha.+ Bebatapile na mpoko ne kusoka muzhi na mujilo. 28 Kechi kwajinga wa kupokolola muzhi ne, mambo waikejile kwalepa bingi na Shidona ku musanza wajinga ku Bete-lehoba,+ kabiji bantu bajingamo kechi bapwanañananga na bakwabo ne. Kepo bamushimukulwile muzhi ne kwikala monka. 29 Kabiji batumbile yewa muzhi amba Danyi,+ jizhina ja mushakulu wabo Danyi mwana wa kwa Isalela.+ Bino uno muzhi kala bamutelanga’mba Laishi.+ 30 Kepo bena Danyi beimikijile kipashañano kya kusonga,+ kabiji Yonafwanyi+ mwana wa kwa Geleshoma,+ Geleshoma mwana wa kwa Mosesa, ne baana banji ba balume baikele bañanga ba mukoka wa bena Danyi kufikatu ne juba bangikazhi ba mu kyokya kyalo jo bebatwajile mu buzha. 31 Kabiji baimikile kipashañano kya kusonga kyalengele Mika, kabiji kyaikelenga konkakwa pa moba onse nzubo ya Lesa wa kine o yaikele mu Shilo.+