3 “Mwayukishatu bulongo kuba’mba batata ba Davida kechi bashimikile nzubo ya kutumbijikilamo jizhina ja Yehoba Lesa wabo ne, na mambo a makondo o balwanga na balwanyi babo bebazhokolokele konse konse kufikatu ne Yehoba byo ashinjile balwanyi babo.+

17 Kabiji batata ba Davida bakebeshe bingi kushimika nzubo ya kutumbijikilamo jizhina ja Yehoba Lesa wa Isalela.+ 18 Bino Yehoba waambijile batata ba Davida amba, ‘Muchima wobe wakebeshe bingi kushimika nzubo ya kutumbijikilamo jizhina jami, kabiji waubile bingi bulongo kukebesha kino mu muchima wobe. 19 Pano bino, kechi ukashimika nzubo ne, mwanobe ye ukasema* ye ukashimika nzubo ya kutumbijikilamo jizhina jami.’+

4 “Yanga ukamubuule kalume wami Davida amba, ‘Yehoba waamba’mba: “Obewa kechi yobe ukanshimikila nzubo ya kwikalamo ne.+ 5 Mambo nkyangye kwikalapo mu nzubo kufuma juba jo naletele bena Isalela kufikatu ne lelo jino, bino nafuminenga mu tente umo kuya mu tente mukwabo ne kufuma ku mpunzha imo kuya ku mpunzha ikwabo.+ 6 Kimye kyonse kyo naendelenga na bena Isalela bonse, nanchi naambilepo kyambo nangwa kimo ku umo wa mu bamitonyi ba bena Isalela bo natongwele kulama bantu bami byonka byuba kafunga ne kwamba’mba, ‘Mambo ka o mwabujile kunshimikila nzubo ya bichi bya sida nyi?’”’

7 Davida waambijile Solomone mwananji amba: “Muchima wami wakebeshe bingi kushimika nzubo mwa kutumbijikila jizhina ja Yehoba Lesa wami.+ 8 Bino jiwi ja Yehoba jaishile kwi amiwa amba, ‘Waichila mashi avula bingi ne kulwa makondo akatampe. Kechi ukanshimikila nzubo mwa kutumbijikila jizhina jami ne,+ mambo waichila mashi avula bingi pano pa ntanda ku meso ami.