Danyela
8 Mu mwaka wa busatu wa bukalama bwa Mfumu Beleshaza,+ amiwa Danyela namwene kimwesho kyalondejile pa kyokya kitanshi kyo namwene.+ 2 Namwene kimwesho, kabiji byo natajilenga nabazhimukiletu nji mu kishimikwa* kya mu Shushani,*+ muzhi uji mu kibunji* kya Elama;+ namwene kimwesho kabiji nabazhimukiletu nji kwipi na mukola wa Ulai. 3 Byo nainukile, namwene mukooko mulume+ wajinga na nsengo ibiji+ saka aimana ku mukola. Nsengo yonse ibiji yalepele bingi, pano bino umo walepele kukila mukwabo, kabiji awa walepele ye wapeleleko kumena.+ 4 Namwene awa mukooko mulume saka aya ku muzhika, ku kabeta ka ku buyeke ne ku kabeta ka ku bulenge, kabiji kafwako nyama nangwa umo waimene kwipi na ko ajinga ne, kabiji kafwako nangwa umo wakonsheshe kumupokolola mu bulume* bwa peepe ne.+ Aye waubilengatu bintu byonka byo akeba ne kwitumbijika mwine.
5 Byo nakitajilenga, namwene peepe+ saka afuma ku muzhika* nakukilañanya ntanda yonse kwa kubula kunyanta panshi. Uno peepe wajinga na lusengo wamwekelengatu ntula pa kilungi kyanji.+ 6 Waishilenga kwajinga mukooko mulume wajinga na nsengo ibiji ye namwene waimene ku mukola; kabiji wamupimpukijile na bukaji.
7 Namwene peepe saka eya kwipi na mukooko mulume, kabiji wamuzhingijile bingi. Uno peepe waponeshe mukooko mulume panshi ne kumuchimuna nsengo ibiji kya kuba mukooko kechi wajinga na ngovu ya kulwa nanji ne. Waponeshe mukooko mulume panshi ne kumunyantaula kabiji kafwako nangwa umo wakonsheshe kumupokolola mu bulume* bwa peepe ne.
8 Ponkapo peepe wakijilemo kwitota, pano bino, byo aikele na bulume, lusengo wanji wachimukile; kabiji pa yewa lusengo mutanshi wachimukile, pamenene nsengo ina yamwekelenga konse ku makonka ana a ntanda.+
9 Ku umo pa yoya nsengo ina, kwamenene lusengo mukwabo wa mucheche, wajinga bingi na bulume kufika ne ku kabeta ka ku bulenge, ku musela* ne ku kyalo Kyawama.*+ 10 Waikele bingi na bulume kufika ne mwiulu, kabiji walengejile bya mwiulu bimo ne tubangabanga tumo kuponena pano pa ntanda kabiji wibinyantawile. 11 Uno lusengo witumbijikile ne ku Mfumu wa bya mwiulu kya kuba wamwangachile ne bitapisho byo bamupanga kimye kyonse, kabiji wamukundwijile ne nzubo yanji yazhila.+ 12 Na mambo a bubi bwanji, uno lusengo bamupele bya mwiulu ne bitapisho byo bapananga kimye kyonse; kabiji watwajijile kutaya bukine pano pa ntanda, kabiji waubilenga bintu byo akebelenga mwine ne kumona byawama.
13 Kepo naumvwine wazhila saka amba, kabiji mukwabo wazhila washikishe yewa waambilenga’mba: “Nanchi kimwesho kya bitapisho byo bapana kimye kyonse ne bubi buleta lonaiko mu nzubo yazhila ne kya kulengela nzubo yazhila ne bya mwiulu kwibinyantaula, kikatwajijila kufika ñanyi kimye?”+ 14 Aye wakumbwile’mba: “Pakapita mabanga ne lukelo 2,300; kabiji nzubo yazhila ikabwela byonka byo yajinga kala.”
15 Amiwa Danyela byo nakimwenenga kimwesho ne kulanguluka mo kyatala, ponkapo namwene wamwekelenga nobe muntu saka aimana kulutwe yami. 16 Kabiji naumvwine jiwi ja muntu mu mukola wa Ulai,+ wabijikile’mba: “Obewa Ngabaliela,+ mulumbulwile awo muntu bintu byo aji kumona.”+ 17 Ponkapo aye waishile kwipi ko naimene, pano bino, byo aishile naumvwine bingi moyo ne kupona panshi kinkuvumene. Wañambijile’mba: “Obewa mwana muntu, umvwa, kino kimwesho kya bintu bikamweka mu moba a kupelako.”+ 18 Bino byo akyambilenga ne amiwa, nakinkile kilungi kyami panshi ne kuponena mu tulo. Ponkapo wansunsunyinye ne kuñimika ponka po naimene.+ 19 Kabiji wañambijile’mba: “Amiwa mbena kukubuula bintu bikamweka Lesa byo akazhingila, mambo bino bikamweka ku mpelo pa kimye kyatongolwa.+
20 “Mukooko mulume wa nsengo ibiji ye wamwene, wimenako mfumu wa Media ne wa Pelisha.+ 21 Peepe wa boya bwavula, wimenako mfumu wa Gilisi;+ kabiji lusengo mukatampe wamenene pa kilungi kyanji, wimenako mfumu mutanshi.+ 22 Pakuba awa lusengo wachimukile, kabiji pe aye pamenene ina,+ kibena kulumbulula’mba, mu kisaka kyanji mukafuma bufumu buna, pano bino, kechi bukekala na bulume bo ajipo nabo ne.
23 “Kabiji bantu babi byo bakakizhamo* kuba byatama mu moba akapelako a bufumu bwabo, kukeya mfumu wakanama ukwatakanya byafyamika.* 24 Bulume bwanji bukabaya, pano bino kechi bukekala bulume bwanji mwine ne. Aye ukonauna ne kuba bintu mu jishinda ja kukumya,* kabiji ukoba bintu monka mo akebela. Ukonauna babilobo ne bantu bazhila.+ 25 Kabiji mu bujimuku bwanji ukongola bantu bavula; uketumbijikanga mu muchima wanji; ne mu kimye kya mutende* ukonauna bantu bavula. Aye ukakebanga ne kulwa na Mfumu wa bamfumu, pano bino, bakamonauna kechi ku muntu ne.
26 “Bintu byo baambapo mu kimwesho pa mambo a mabanga ne lukelo bya kine, pano bino, kechi wafwainwa kusolola kimwesho ne, mambo kibena kwamba pa bintu bikamweka kulutwe.”*+
27 Pakuba amiwa Danyela, nakookeletu zubulu kabiji nakolelwe moba avula.+ Byo nakosele, natendekele kwingila mingilo ya mfumu;+ bino bintu byo namwene byampezhezhe maana, kabiji kafwako nangwa umo wakonsheshe kuyuka mo byatala ne.+