Nkalata ya Bubiji ku Bena Kolinda
3 Nanchi tubena kutendeka kwilumbulula jibiji atwe bene nyi? Abya tukeba makalata a kuleta kwi anweba nangwa a kufuma ko muji a kwitulumbulula byonka byuba bantu bakwabo nyi? 2 Anweba yenu nkalata yetu,+ yanembwa pa michima yetu kabiji yayukanyikwa ne kutangwa ku bantu bonse. 3 Mambo bemumwesha’mba yenu nkalata ya kwa Kilishitu yanembele atweba ba mingilo,+ kechi yanembelwe na inki ne, poso na mupashi wa Lesa mumi, kechi yanembelwe pa mabwe apapakana ne,+ bino yanembelwe pa mabwe apapakana a mubiji, pa michima.+
4 Tuji na luno luketekelo mwi Lesa kupichila mwi Kilishitu. 5 Kechi kuba’mba atwe bene yetu twilengela kufikilamo bulongo mu kwilangulukila kintu amba kyafuma kwi atweba ne, bino kufikilamo bulongo kwetu kufuma kwi Lesa,+ 6 ye witulengela kufikilamo bulongo mu kwikala ba mingilo ba lulayañano lupya,+ kechi ba mizhilo yanembwa ne,+ bino ba mupashi; mambo mizhilo yanembwa izhachisha ku lufu,+ pakuba mupashi upana bumi.+
7 Kabiji umvwe kya kuba mizhilo yanembwa izhachishisha ku lufu yo banembele kya kukololola pa mabwe+ yaishile na lukumo kya kuba bena Isalela bakankelwe kutajisha kilungi kya Mosesa,+ lukumo lo bafwainwe kufumyapo, 8 nanchi kwingila kwa mupashi+ kechi kwakonsha kukilapo kwikala na lukumo nenyi?+ 9 Mambo umvwe mizhilo yanembwa ileta luzhachisho+ yajinga na lukumo,+ ko kuba’mba bololoke bukakijishamo kwikala na lukumo!+ 10 Kabiji akya kyajinga na lukumo bekyangata lukumo na mambo a lolwa lukumo lwikikila.+ 11 Mambo umvwe akya kyo bafwainwe konauna kyaishile na lukumo,+ ko kuba’mba akya kikekala kikupu kyakilamo kwikala na lukumo!+
12 Onkao mambo, byo tuji na luno luketekelo,+ tubena kwamba saka twakasuluka bingi, 13 kabiji kechi tuji nobe Mosesa wivwetele kitambala ku meso+ kuchina’mba bena Isalela bakatajisha ku kyokya kyafwainwe konaunwa ne. 14 Bino michima yabo yakosele.+ Mambo kufikatu ne ku kino kimye kitambala kintutu kimo kyatwajijila kubula kuvwetulwa umvwe kebatange lulayañano lwa kala,+ mambo bekivwetulapotu kupichila mwi Kilishitu.+ 15 Kufikatu ne lelo jino, kimye kyonse kyo batanga mabuku a kwa Mosesa,+ kitambala kiji pa michima yabo.+ 16 Bino umvwe muntu waalulukila kwi Yehoba,* kino kitambala bekivwetulapo.+ 17 Yehoba* ye Mupashi,+ kabiji paji mupashi wa Yehoba* po paji ne bwana bwa bene.+ 18 Atweba bonse, byo tuji na bilungi byo bavwetula tumwesha lukumo lwa Yehoba* nobe kimbonyi, twaaluluka mu kipasha kimo kyonka kufuma mu lukumo lumo kufika ku lukwabo,* monka mo elulengela kumweka aye Yehoba,* Mupashi.*+