Buku Mutanshi wa Bamfumu

6 Mu mwaka wa bu 480 kufuma pafumijile bena Isalela* mu kyalo kya Ijipita,+ mu mwaka wa buna kufuma Solomone po aikejile mfumu wa bena Isalela, mu ñondo wa Zivi*+ (ko kuba’mba mu ñondo wa bubiji), Solomone watendekele kushimika nzubo ya Yehoba.*+ 2 Nzubo ya Yehoba yashimikile Mfumu Solomone yajinga makyubichi 60* mu bula, makyubichi 20 mu bwipi ne makyubichi 30 mu kimino.+ 3 Kulutwe ya nzubo ya Lesa kwajinga kibamba*+ kya pa kibelo kyalepele* makyubichi 20, kyaesakene na bwipi bwa nzubo* ine. Mu bwipi kyajinga makyubichi jikumi kufuma kulutwe ya nzubo.

4 Kabiji mu nzubo washilemo bipenze bya mafulemu+ acheche. 5 Washimikile ne kishimikwa kikwabo kyalamachile ku lubumbulu wa nzubo; kyazhokolokele lubumbulu yense wa nzubo, ne wa nzubo ya Lesa yazhila ne wa kibamba kya mukachi,+ kabiji wachibawilemo ne tubibamba kuzhokolosha konse.+ 6 Nzubo ya panshi yajinga na tubibamba twa kwapela, yajinga makyubichi atanu mu bwipi, ya pakachi yajinga makyubichi atanu na umo mu bwipi, ne ya peulu yajinga makyubichi atanu na abiji mu bwipi, kabiji washileko mpunzha kuzhokoloka nzubo yonse, pa kuba’mba kintu nangwa kimo kibule kulamankana na lubumbulu wa nzubo.+

7 Nzubo beishimikile na mabwe o bawamishisha jimo,+ kya kuba mu nzubo kechi mwaumvwanyikilengapo kyongo kya misense nangwa kya tupasa nangwa kya byela bya kapotwe kimye kyo beishimikilenga ne. 8 Kibelo kya kutwelelamo mu nzubo ya panshi yajinga na kakibamba ka kwapela, kyaikejile ku kabeta ka ku bulenge bwa nzubo,*+ kabiji kwajinga kya kukanjijilapo pa kuya mu nzubo ya pakachi, ne kufuma mu nzubo ya pakachi kuya mu nzubo ya peulu. 9 Watwajijile kushimika nzubo ne kwiipwisha+ kabiji peulu ya nzubo wabikilepo myamba ya bichi bya sida ne kwiivweta na mapulanga a bichi bya sida.+ 10 Washimikile tubibamba twa kwapela kuzhokolosha nzubo yonse,+ tubibamba tonse twajinga makyubichi atanu mu kimino, kabiji betulamankenye ku nzubo na bichi bya sida.

11 Kabiji byambo bya Yehoba byaishile kwi Solomone amba: 12 “Pa mambo a ino nzubo yo ubena kushimika, inge ukalamenga malamuna ami ne kulondela mizhilo yami ne kulama mikambizho yami,+ ne amiwa nkafikizha mulaye kwi obewa ye nalayile shobe Davida,+ 13 kabiji nkekalanga mukachi ka bena Isalela,+ kabiji kechi nkebalekelela bantu bami bena Isalela ne.”+

14 Solomone watwajijile kushimika nzubo kuba’mba eipwishe. 15 Washimikile lubumbulu wa mukachi ka nzubo na mapulanga a sida. Walamikile mapulanga ku lubumbulu wa mukachi, kufumatu panshi kufika ne mu myamba ya palafu, kabiji panshi ya nzubo waajilepo mapulanga a yunipa.+ 16 Mu nzubo na kunyuma washimikilemo kibamba kya mapulanga a sida kya makyubichi 20, kufuma panshi kukafika ne mu myamba, kabiji mukachi* washimikilemo kibamba kya mwine mukachi,+ Mwazhijisha.+ 17 Kabiji kibamba*+ kyajinga mu nzubo ya Lesa yazhila, kyajinga kulutwe ya Mwazhijisha, kyajinga makyubichi 40. 18 Bichi bya sida byajinga mu nzubo bebisongele nobe bainamunwa+ ne mituntu ya maluba.+ Byonse byajinga bya bichi bya sida; kechi mwamwekelengapo jibwe nangwa jimo ne.

19 Kabiji mu nzubo wachibilemo kibamba kya mwine mukachi+ mwa kubika jikwachi ja lulayañano lwa Yehoba.+ 20 Kibamba kya mwine mukachi kyajinga makyubichi 20 mu bula, makyubichi 20 mu bwipi ne makyubichi 20 mu kimino;+ kabiji wikishingile ngolode yawamisha; ne ku kya kusokelapo bitapisho+ walamikileko mapulanga a sida. 21 Solomone washingile ngolode yawamisha+ monse mukachi ka nzubo, kabiji kulutwe ya kibamba kya mwine mukachi+ kyo bashingile ngolode, wakimbakenyeko minyololo ya ngolode. 22 Nzubo yonse wiishingile ngolode kufikatu ne nzubo yonse byo yapwile; kabiji washingile ngolode ku kya kusokelapo bitapisho kyonse+ kyajinga kwipi na kibamba kya mwine mukachi.

23 Mu kibamba kya mwine mukachi walengejilemo bakelubi babiji+ na kichi kya paini,* bakelubi balepele makyubichi jikumi mu kimino.+ 24 Kyapi kya kelubi umo kyalepele makyubichi atanu, ne kyapi kikwabo makyubichi atanu. Kufuma kwapelele kyapi kimo kufika kwapelele kyapi kikwabo pajinga makyubichi jikumi. 25 Kelubi wa bubiji naye walepele makyubichi jikumi. Bano bakelubi babiji bajingatu kimino kimo ne mutundu umotu. 26 Kimino kya kelubi umo kyajinga makyubichi jikumi, ne kelubi mukwabo naye kimotu. 27 Kepo abikile bano bakelubi+ mu nzubo* mu kibamba kya mukachi. Byapi bya bakelubi byatanamine kya kuba kyapi kimo kya kelubi kyakwachile ku lubumbulu umo ne kyapi kya kelubi mukwabo kyafikile ku lubumbulu mukwabo, kabiji byapi byabo byafikile pakachi ka nzubo, ne byapi byabo byasambakene. 28 Kabiji bakelubi wibashingile ngolode.

29 Kabiji pa lubumbulu yense wa nzubo ne mu bibamba* bya mukachi ne bya pangye byonse, walengejilepo byapasha bakelubi,+ ne bya bisonga+ ne bya mituntu ya maluba.+ 30 Panshi mu nzubo washingilepo ngolode ne mu bibamba bya mukachi ne bya pangye. 31 Kabiji mu kibelo kya mwine mukachi walengejilemo binzhilo bya kichi kya paini ne mashiki a kwapela ne myamba ya pa bibelo kwikala lubaji lwa butanu.* 32 Binzhilo bibiji byajinga bya kichi kya paini, kabiji wasongejilepo bakelubi, ne bisonga, ne mituntu ya maluba, kabiji wibishingile ngolode; kabiji washindaikile ngolode pa bakelubi ne pa bisonga. 33 Abino byo byo alengele ne myamba ya kichi kya paini ya pa kibelo kya ku nzubo* yazhila, yajinga ya ku lubaji lwa buna.* 34 Kabiji walengele ne binzhilo bibiji bya kichi kya yunipa. Kinzhilo kimo kyajinga na pa kuchimpukila, ne kikwabo kyajinga na pa kuchimpukila.+ 35 Walengele bakelubi ne bisonga ne mituntu ya maluba, kabiji washingileko ngolode ku bino byo alengele.

36 Washimikile lubumbulu wa kipango kya mukachi+ wa mikuku isatu ya mabwe a kusonga ne mukuku umo wa myamba ya bichi bya sida.+

37 Mu mwaka wa buna, mu ñondo wa Zivi,* baajile kitendekesho kya nzubo ya Yehoba;+ 38 kabiji mu mwaka wa bujikumi na bumo, mu ñondo wa Bulu* (ko kuba’mba, mu ñondo wa butanu na busatu), nzubo yapwile ne tunkobwankobwa twayo tonse monka mwayijile mutanchi.+ Papichile myaka itanu na ibiji pa kuba’mba apwishe kwiishimika.