Mitonyi

19 Mu oa moba, byo kwabujile mfumu mu Isalela,+ mwina Levi waikelenga kwalepa mu kibunji kya mitumba kya Efelaimu,+ wasendele ntombo kufuma ku Betelema+ mu Yuda kwikala mukazhanji. 2 Bino ntombo wanji kechi wajinga wa kishinka kwi aye ne, kabiji wamushile mwatawanji ne kubwela ku nzubo ya bashanji ku Betelema mu Yuda. Waikele kokwa bañondo bana. 3 Mwatawanji wamulondejile na kumusashijila amba abwele ku nzubo; wajinga na kalume wanji ne bambongolo babiji. Kabiji mwanamukazhi wamutwezhezhe mu nzubo ya bashanji. Bashanji uno mwanamukazhi byo bamumwene, batemenwe bingi. 4 Onkao mambo, bako banji, bashanji uno nsongwakazhi, bamwambijile’mba ekale nabo moba asatu; kabiji bajiilenga ne kutoma, ne kulaala walaajilenga konkakwa.

5 Pa juba ja buna, byo babuukile lukelokelo amba bayenga, bashanji yewa nsongwakazhi baambijile muko wabo amba: “Jaipo tukajo mwikale na bulume,* apa bino muyenga.” 6 Byonkabyo, baikele kabiji bonse babiji bajiile ne kutomena pamo; kepo bashanji uno nsongwakazhi baambijile uno mwanamulume amba: “Mwane mulaale kuno ne lelo ne kusangalala.”* 7 Uno mwanamulume byo aimene’mba ayenga, bako banji batwajijiletu na kumusashijila, onkao mambo walaajile jikwabo.

8 Byo abuukile lukelokelo pa juba ja butanu amba ayenga, bashanji nsongwakazhi bamwambijile’mba: “Mwane, jaipo tukajo kuba’mba mwikale na bulume.”* Kabiji baikele kufikatu ne mabanga, kabiji bonse babiji batwajijile kuja. 9 Uno mwanamulume byo aimene’mba ayenga na ntombo wanji ne kalume wanji, bako banji, bashanji nsongwakazhi bamwambijile’mba: “Talai bwaila kala. Mwane laalai. Juba jazhika kala. Laalai kuno ne lelo ne kusangalala. Kesha mukabuuke lukelokelo mukayenga kwenu.”* 10 Nangwa byonkabyo, uno mwanamulume wakaine kulaala jikwabo, byonkabyo waimene ne kukafika ku Yebusi, ko kuba’mba Yelusalema.+ Wajinga na bambongolo babiji po bakashijile kya kwikalapo, ne ntombo wanji ne kalume wanji.

11 Byo bafikile kwipi na Yebusi, patendekele kufiita. Onkao mambo, kalume washikishe nkambo yanji amba: “Tusendukile mu uno muzhi wa bena Yebusi ne kulaala monka nyi?” 12 Bino nkambo yanji wamukumbwile’mba: “Kechi twafwainwa kusendukila mu muzhi wa bantu bangi babula bena Isalela ne. Tusakupitaila ne kuya ku Gibea.”+ 13 Kepo aambijile kalume wanji amba: “Twaya tweseke kufika ku mpunzha imo ya kokwa; tusakulaajila mu Gibea nangwa mu Lama.”+ 14 Onkao mambo, batwajijile lwendo lwabo, ne juba jatatwile kuzhika byo bajinga kwipi na Gibea, muzhi wa bena Benjamina.

15 Kabiji basendukijile monka amba balaajile mu Gibea. Byo bajinga mukachi, baikele mu lubanza, bino kechi kwajinga nangwa umo wibatwezhezhe mu nzubo amba balaalemo ne.+ 16 Kepo mabanga a bufuku, mwanamulume mukote aishile kufuma ko ayile na kwingila mu bujimi. Wajinga wa mu kibunji kya mitumba kya Efelaimu,+ kabiji pa kyo kya kimye waikelenga mu Gibea; bino bena yewa muzhi bajinga bena Benjamina.+ 17 Byo ainukile ne kumona mwenyi mu lubanza wa muzhi, uno mwanamulume mukote, wamushikishe’mba: “Ubena kuya kwepi, kabiji wafuma kwepi?” 18 Aye wakumbwile’mba: “Twafuma ku Betelema mu Yuda, tubena kuya kwalepa ku kibunji kya mitumba kya Efelaimu, ko nafumine. Nayile ku Betelema mu Yuda,+ kabiji mbena kuya ku nzubo ya Yehoba,* bino kafwako nangwa umo wantwezha mu nzubo yanji ne. 19 Tuji na nsono ne kajo kakupa bambongolo betu,+ kabiji amiwa, mwanamukazhi ne kalume wetu, tuji na shinkwa+ ne binyu. Kechi twakajilwa kintu nangwa kimo ne.” 20 Nangwa byonkabyo, uno mwanamulume mukote waambile’mba: “Mutende ekale pe anweba! Nsakwimupa bintu byonse byo musakukeba. Pano kange mulaale mu lubanza ne.” 21 Onkao mambo, wamutwajile mu nzubo yanji ne kujiisha bambongolo. Kepo baowele ku maulu ne kuja ne kutoma.

22 Abo byo basangalelenga, banabalume bancha ba mu yewa muzhi, bazhokolokele nzubo kabiji bakokawilenga ku kinzhilo, kabiji bamwambijilenga awa mwanamulume mukote mwina nzubo amba: “Mulupule awo mwanamulume wafikila mu nzubo yobe, kuba’mba twilaale nanji.”+ 23 Ponkapo mwina nzubo walupukile pangye ne kwibambila’mba: “Ine balongo bami, kange mube kintu kyatama ne. Napopwela, uno muntu mwenyi mu nzubo yami. Kange mube kino kintu kya bunya ne. 24 Nji na mwana wa mukazhi kisungu ne ntombo wa uno mwanamulume. Lekai nebalupule ne anweba mwilaale nabo inge mwakeba.*+ Bino kange mumube kino kintu kya bunya uno muntu ne.”

25 Bino aba banabalume bakaine kumvwa byo aambile, onkao mambo, awa mwanamulume wakwachile ntombo wanji+ ne kwibalupwilaye pangye. Bamulaajile ne kumutamisha bufuku bonse kufika ne lukelo. Kepo ku makya bamulekele’mba ayenga. 26 Lukelokelo, mwanamukazhi waishile ne kuponena ku kibelo kya nzubo ya yewa muntu mwajinga nkambo yanji ne kulaala konkakwa poso ne byo patokele. 27 Nkambo yanji byo abuukile lukelo ne kushinkula binzhilo bya nzubo kuba’mba atwajijile lwendo lwanji, wamwene mwanamukazhi ntombo wanji saka alaala pangye ya nzubo ne maboko saka akwata panshi pa kibelo. 28 Kepo amwambijile’mba: “Buuka; twaya tuyenga.” Bino kechi wakumbwile ne. Uno mwanamulume wamushikwile ne kumubika pa mbongolo ne kuya kwanji.

29 Byo afikile ku nzubo yanji, washikwile mupenyi ne kuchibaula ntombo wanji bipimvwa 12 ne kutuma kipimvwa kimo kimo mu manyaunda onse a bena Isalela. 30 Bonse bamwene kino baambile’mba: “Kintu kya uno mutundu kikyangye kubiwapo nangwa kumwekapo kala kufuma juba bena Isalela jo bafumine mu kyalo kya Ijipita kufika lelo jino. Langulukaipo pa kino,* teshaiko muchima+ ne kwitubuula bya kuba.”