KULUPUKA

1 Ano o mazhina a baana ba kwa Isalela baishile mu Ijipita pamo ne Yakoba, yense waishile na ba mu nzubo yanji:+ 2 Lubenyi, Shimeona, Levi, ne Yuda;+ 3 Isakala, Zebuluna, ne Benjamina; 4 Danyi ne Nafitali; Gadi ne Ashela.+ 5 Bonse* basemenwe kwi Yakoba* bajinga bantu* 70, pa kyokya kimye Yosefwa wajinga mu Ijipita.+ 6 Mu kuya kwa moba, Yosefwa wafwile+ ne balongo banji bonse ne bonse bajingamo mu yoya myaka bafwile. 7 Kabiji bena Isalela* basemunwinenga ne kuvula bingi, kabiji bavujijilengakotu ne kukosa bingi kya kuba mu kyalo mwakumbenetu bena Isalela bonka.+

8 Mu kuya kwa moba, paswaine mfumu ungi mu Ijipita wabujile kuyuka Yosefwa. 9 Waambijile bantu banji amba: “Bena Isalela bavula bingi kabiji bakosa kwitukila.+ 10 Twayai twibajimukile. Mambo inge ne, basakuvujilangakotu kabiji umvwe kukabuuke nkondo, bakenunga ku balwanyi betu ne kwitulwisha kabiji bakafumamo mu kyalo.”

11 Onkao mambo, bebatongwejile bakulumpe* kuba’mba bebayanjishenga+ kupichila mu kwibapa mingilo yakosa, kabiji bamushimikijile Felo matala mu mizhi ya Pitomo ne Lamasesa.+ 12 Byo bakijilemo kwibayanjisha, bena Isalela bavujijilengakotu ne kupalañena monse monse, onkao mambo, baakaminwe bingi na mambo a bena Isalela.+ 13 Kabiji bena Ijipita bakanjikizhenga bena Isalela kwingila mingilo ya buzha.+ 14 Balengejile bwikalo bwabo kutama na mambo a mingilo yakosa ya kutobola mulobwe ne kufyatula matafwali, ne mingilo yapusana pusana ya buzha ya kwingijila mu majimi. Kine, bebalengejile kwingila kyakosa mingilo yonse ya buzha.+

15 Palutwe kacheche, mfumu wa Ijipita waambijile basemeshi Bahebelu abo ba Shifula ne Puwa, 16 amba: “Pa kukwasha banabakazhi Bahebelu kusema,+ kabiji mwibamona saka baikala pa kipona kya kusemenapo,* mwafwainwa kwipaya mwana inge kya kuba wa mulume, bino inge wa mukazhi, kechi mwafwainwa kumwipaya ne.” 17 Nangwa byonkabyo, basemeshi baakamwanga Lesa wa kine, kabiji kechi baubile bibabuujile mfumu wa Ijipita ne. Pakuba abo bapulwishenga+ baana ba balume. 18 Mu kuya kwa moba, mfumu wa Ijipita waichile basemeshi ne kwibepuzha amba: “Mambo ka o mwapulwisha baana ba balume?” 19 Basemeshi bamukumbwile Felo amba: “Banabakazhi Bahebelu kechi baji nobe banabakazhi bena Ijipita ne. Abo bakosa, kabiji bapapa musemeshi saka akyangye kufika.”

20 Onkao mambo, Lesa waubijile byawama basemeshi, ne bantu bavujijilengakotu ne kukosa bingi. 21 Kabiji na mambo a kuba basemeshi baakaminwenga Lesa wa kine, nabo wibapele baana. 22 Kyapeleleko Felo wakambizhe bantu banji bonse amba: “Mwafwainwa kutaya mu Mukola wa Nile mwana wa mulume yense wa Bahebelu wasemwa, pakuba mwana wa mukazhi yense mwafwainwa kumuleka na bumi.”+

2 Pa kyokya kimye, muntu umo wa mu kisemi kya kwa Levi, wasongwele mwana wa kwa Levi.+ 2 Kabiji uno mwanamukazhi waimichile ne kusema mwana wa mulume. Byo amwene’mba walamba bingi, wamufile bañondo basatu.+ 3 Byo abujile kukonsha kumufya,+ watolele ntumbe* yo balengele na mambanga ne kushingako manenekela, kabiji wabikile mwana mu ino ntumbe ne kukeibika mu matete ku kitulu kya Mukola wa Nile. 4 Bino nyenga+ ya uno mwana waimene palepa byobya kuba’mba amone kisakumumwekela.

5 Mwana wa mukazhi wa kwa Felo byo aishile na kowa ku Mukola wa Nile, ba mingilo banji ba bakazhi bapitañenenga kunsa kunsa ya Mukola wa Nile. Kepo amwene ntumbe mukachi ka matete. Ponkapo watumine wa mwingilo wanji wa mukazhi kuya na kwiitola.+ 6 Byo azhikwilemo, wataainemo mwana, kakalombwana saka kajila. Byo amumwene, wamumvwijile lusa, bino waambile’mba: “Uno ke mwana wa Bahebelu.” 7 Kepo nyenga yanji ashikishe mwana wa mukazhi wa kwa Felo amba: “Nanchi ngye na kwita mwanamukazhi Muhebelu amishenga uno mwana nyi?” 8 Mwana wa mukazhi wa kwa Felo wamukumbwile’mba: “Yanga!” Ponkapo uno kashimbi wayile lubilo na kwita inanji mwana.+ 9 Kepo mwana wa mukazhi wa kwa Felo amwambijile’mba: “Senda uno mwana ukañamwishishengako ne amiwa nkakufweta.” Kabiji uno mwanamukazhi wasendele uno mwana ne kuya na kumwamisha. 10 Mwana byo akomene, uno mwanamukazhi wamuletele ku mwana wa mukazhi wa kwa Felo kabiji waikele ke mwananji.+ Wamutumbile’mba Mosesa* ne kwamba’mba: “Mambo namwabula mu mema.”+

11 Mu oa moba, Mosesa byo akomene,* wayile na kupempula balongo banji ne kumona mingilo yabo yakosa yo baingijilenga,+ kabiji wamwene mwina Ijipita saka apuma mulongo wanji Muhebelu. 12 Onkao mambo, wakenkentele konse konse ne kumona’mba kafwako muntu ne, waipayile mwina Ijipita ne kumuzhiika mu busenga.+

13 Bino byo abweleleko juba jalondejilepo, wamwene Bahebelu babiji saka balwa. Byonkabyo, washikishe yewa watamishe’mba: “Mambo ka o ubena kupumina mukwenu?”+ 14 Ponkapo naye wamushikishe’mba: “Ñanyi wakutongola kwikala kalama kabiji wa kwituchibila mambo? Nanchi ubena kukeba kungipaya byonka byo waipayile mwina Ijipita nyi?”+ Mosesa waumvwine moyo ne kwamba mu muchima amba: “Kine kino kintu kyayukanyikwa!”

15 Kepo Felo aumvwine ano mambo, kabiji wakebele kwipaya Mosesa; bino Mosesa wanyemene kufuma kwi Felo kabiji wayile na kwikala mu kyalo kya Mijanyi;+ byo afikile mu kino kyalo waikele kwipi na mushima. 16 Kabiji mwajinga ne ñanga mu Mijanyi+ wajinga na baana ba bakazhi batanu na babiji, ne abo baishile na kutapula mema amba bayuzhe mankobele kuba’mba batomeshe jitanga ja shabo. 17 Bino byonka byo kyaikalanga kimye kyonse, bakafunga baishile ne kwibapanga. Ponkapo Mosesa waimene ne kukwasha* banabakazhi ne kutomesha jitanga jabo. 18 Byo bafikile ku nzubo kwi shabo aye Lewela,*+ wibashikishe’mba: “Mambo ka o mwabwelela bukiji lelo?” 19 Abo bamukumbwile’mba: “Mwina Ijipita+ waji kwitupokolola mu maboko a bakafunga, kabiji waji kwitutapwila mema ne kutomesha jitanga.” 20 Washikishe baana banji amba: “Pano aye uji pi? Mambo ka o mwamushila? Yainga mukamwite, kuba’mba tuje nanji.” 21 Mosesa waswile kwikala na uno muntu, ne aye wapaine Zipola+ mwananji wa mukazhi kwi Mosesa kwikala mukazhanji. 22 Ne aye wasemene mwana wa mulume, kabiji Mosesa wamutumbile’mba Geleshoma,*+ mambo waambile’mba: “Naikala bwenyi mu kyalo kingi.”+

23 Byo papichile kimye kyabaya,* mfumu wa Ijipita wafwile,+ bino bena Isalela babinzhilenga na mambo a buzha kabiji bajijilenga, ne kujila kwabo kwa kukeba bukwasho na mambo a buzha bo bajingamo, kwafikile kwi Lesa wa kine.+ 24 Mu kuya kwa moba, Lesa waumvwine kujilakana+ kwabo kabiji wavulukile lulayañano lo alayañene ne Abalahama, Izaka ne Yakoba.+ 25 Onkao mambo, Lesa wamwene kumanama kwa bena Isalela; kabiji wibatele muchima.

3 Mosesa waikele kafunga wa jitanga ja muko wanji aye Yefelo+ ñanga wa ku Mijanyi. Byo atwajilenga jitanga ku muzhika wa kiselebwa, wafikile ku mutumba wa Lesa wa kine, ku Holeba.+ 2 Kepo malaika wa Yehoba amwekele kwi aye mu lubebe lwa mujilo mukachi ka kipupu kya miba.+ Byo atajilenga, wamwene’mba kipupu kya miba kibena kuteema mujilo, bino kechi kyapilenga ne. 3 Onkao mambo, Mosesa waambile’mba: “Nafwainwa kuya mmone kino kintu kya kukumya kuba’mba ngyuke ene mambo kipupu o kibena kubujila kupya.” 4 Yehoba byo amwene’mba waya na kwikimona, Lesa wamwichile mu kipupu amba: “Mosesa! Mosesa!” Ne aye waitabile’mba: “Mwane.” 5 Kepo Lesa amwambijile’mba: “Kange ufwenye kwipi ne. Vuula makwabilo ku maulu obe, mambo pa mpunzha po waimana pazhila.”

6 Wamwambijile’mba: “Amiwa yami Lesa wa bashobe, Lesa wa Abalahama,+ Lesa wa Izaka+ kabiji Lesa wa Yakoba.”+ Ponkapo Mosesa wafile kilungi kyanji, mambo wachiine kutala Lesa wa kine. 7 Kabiji Yehoba waambile’mba: “Kine namona kumanama kwa bantu bami baji mu Ijipita, kabiji naumvwa kujilakana kwabo kwa kukeba kwibakwasha na mambo a boba babena kwibakanjikizha kwingila; nayukishatu bulongo makatazho o babena kupitamo.+ 8 Amiwa nkekila na kwibapokolola ku bena Ijipita+ ne kwibalupulamo mu kyokya kyalo ne kwibatwala ku kyalo kyawama kabiji kyabaya, kyavula mukaka ne buki,+ kyo kyalo kya bena Kenana, bena Hiti, bena Amoli, bena Pelizi, bena Hivi ne bena Yebusi.+ 9 Pano umvwa! Kujila kwa bena Isalela kwafika kwi amiwa kabiji namona ne byo babena kwibayanjisha ku bena Ijipita.+ 10 Pano iya, nsakukutuma kwi Felo, kabiji ukafumya bantu bami bena Isalela mu Ijipita.”+

11 Nangwa byonkabyo, Mosesa waambijile Lesa wa kine amba: “Yami ñanyi kya kuba’mba nkaye kwi Felo ne kukalupula bena Isalela mu Ijipita?” 12 Lesa wamwambijile’mba: “Nkekala ne obewa+ kabiji kino kyo kiyukilo kyo nsakukupa kikamwesha’mba yami nakutumine: Byo ukalupula bantu mu Ijipita, anweba bantu mukengijilanga* Lesa wa kine ku yenka uno mutumba.”+

13 Bino Mosesa washikishe Lesa wa kine amba: “Pano kikekala byepi umvwe nkaye ku bena Isalela ne kwibabuula’mba, ‘Lesa wa bashakulu benu wantuma kwi anweba,’ ne abo bakanshikishe’mba, ‘Jizhina janji ye ñanyi?’+ Nkebakumbula’mba ka?” 14 Ponkapo Lesa wamubuujile Mosesa amba: “Nkekala Monka mo Nkafuukwila*+ Kwikala.”* Kabiji wanungilepo’mba: “Bino byo byo ukabuula bena Isalela amba ‘Nkekala, ye wantuma kwi anweba.’”+ 15 Kabiji Lesa waambijile Mosesa ne jikwabo amba:

“Bino byo byo ukebabuula bena Isalela amba, ‘Yehoba Lesa wa bashakulu benu, Lesa wa Abalahama,+ Lesa wa Izaka+ kabiji Lesa wa Yakoba,+ wantuma kwi anweba.’ Jino jo jizhina jami ja myaka ne myaka+ kabiji bino byo byo mukamvulukanga mu bisemi byonse bikalondelapo. 16 Yanga ukakonkanye pamo bakulumpe ba mu Isalela ne kwibambila’mba, ‘Yehoba Lesa wa bashakulu benu waji kumweka kwi amiwa, aye Lesa wa Abalahama, Lesa wa Izaka kabiji Lesa wa Yakoba, waji kwamba’mba: “Nemumona,+ ne byonse byo babena kwimuba mu Ijipita. 17 Onkao mambo, nalaya namba, nkemupokolola mu lumanamo+ lubena kwimumanyika bena Ijipita ne kwimutwala mu kyalo kya bena Kenana, bena Hiti, bena Amoli,+ bena Pelizi, bena Hivi ne bena Yebusi,+ kyo kyalo kyavula mukaka ne buki.”’+

18 “Abo bakomvwina byo ukamba+ kabiji ukaya, obewa ne bakulumpe ba mu Isalela kwi mfumu wa Ijipita kabiji anweba bantu mwafwainwa kumubuula’mba: ‘Yehoba Lesa wa Bahebelu+ waamba ne atweba. Onkao mambo, tulekai tuye lwendo lwa moba asatu mu kiselebwa kuba’mba tukatapishe kitapisho kwi Yehoba Lesa wetu.’+ 19 Pano bino, amiwa nayukishatu bulongo kuba’mba mfumu wa Ijipita kechi ukemuswisha kuya ne, kanatu bulume bwa Lesa bukamulengele kwimuswisha.+ 20 Onkao mambo, amiwa nkatanyika kuboko kwami ne kupuma kyalo kya Ijipita na bya kukumya byami byonse byo nkoba mu kino kyalo, kepo aye akemuswisha kuya.+ 21 Kabiji nkalengela bena Ijipita kubila bibusa bena Isalela, kabiji byo mukaya, kechi mukaya mabokotu ne.+ 22 Mwanamukazhi yense wafwainwa kulomba bipe bya siliva ne bya ngolode ne bivwalo ku ye ekala nanji kipikipi ne ku mwanamukazhi ye ekala nanji mu nzubo, kabiji mukebivwike baana benu ba balume ne ba bakazhi; kabiji mukapukula bintu bya bena Ijipita.”+

4 Kabiji Mosesa waambile’mba: “Pano kikekala byepi umvwe bakakane kungitabila ne kumvwa byo nkamba,+ mambo bakamba’mba, ‘Yehoba kechi wamwekele kwi obewa ne.’” 2 Kepo Yehoba amushikishe’mba: “Ki ka kyo walama mu kuboko?” Aye wakumbwile’mba: “Kamama.” 3 Lesa wamwambijile’mba: “Kataye panshi.” Ponkapo wikatayile panshi kabiji kaalukile ke muloolo;+ ne Mosesa wanyemeneko. 4 Yehoba waambijile Mosesa amba: “Tanyika kuboko kobe umukwate ku kiminzo.” Ne aye watanyikile kuboko ne kumukwata, ne muloolo waalukile ke kamama mu kuboko kwanji. 5 Kepo Lesa aambile’mba: “Akino kyo kyo bakayukilako’mba, Yehoba Lesa wa bashakulu babo, Lesa wa kwa Abalahama, Lesa wa kwa Izaka kabiji Lesa wa kwa Yakoba,+ wamwekele kwi obewa.”+

6 Kabiji Yehoba wamwambijile jikwabo amba: “Kula kuboko kobe mu kivwalo kyobe.” Ne aye wikukujilemo. Byo ekufumishemo, kuboko kwanji kwatokeletu too na mbumba nobe mabebe!+ 7 Kepo amwambijile’mba: “Kula jikwabo kuboko kobe mu kivwalo.” Ne aye wikukujilemo. Kabiji byo ekulupwilemo, kwaikele ke kutuntulu! 8 Lesa wamwambijile’mba: “Umvwe bakabule kukwitabila nangwa kutako muchima ku kiyukilo kitanshi, ko kuba’mba bakata muchima ku kiyukilo kikalondelapo.+ 9 Kabiji umvwe bakabule kukwitabila na bino biyukilo bibiji ne kukana kukumvwa, ukatapule mema mu Mukola wa Nile kabiji ukeechile pa mushiji wauma, ne mema o ukatapula mu Nile akaluka ke mashi pa mushiji wauma.”+

10 Mosesa waambijile Yehoba amba: “Anweba Yehoba, amiwa kechi ñamba bulongo ne, kufumatu ne kala nangwatu luno lo mubena kwisamba ne amiwa kalume wenu, mambo amiwa nnemenena pa kwamba* kabiji nji na kikukuma.”+ 11 Yehoba wamushikishe’mba: “Ñanyi walengele kanwa ka muntu nangwa ñanyi ulengela muntu kwikala kamaama, washinka matwi, umona bulongo nangwa mpofu? Nanchi kechi amiwa Yehoba nenyi? 12 Onkao mambo, yanga, ne amiwa nkekala ne obewa mu bintu byonse byo ukambanga* kabiji nkakubuula bintu byo wafwainwa kwamba.”+ 13 Bino aye waambile’mba: “Anweba Yehoba, mwane tumaiko muntu mukwabo ye mukeba kutuma.” 14 Kepo Yehoba abuukijile bukaji Mosesa ne kumwambila’mba: “Nanchi Alona mwina Levi kechi kolojobe nenyi?+ Amiwa nayuka namba aye wakonsha kwamba bulongo. Kabiji ubena kwiya na kukutundaila. Inge akumone usakusekela bingi.+ 15 Onkao mambo, wafwainwa kwisamba nanji ne kumubuula byambo byami,+ kabiji amiwa nkekala ne obewa pamo ne aye byo mukambanga+ kabiji anweba bantu nkemubuula bya kuba. 16 Aye ukakwambilangako ku bantu, kabiji ukekala ke kyakwambilamo kyobe, ne obewa ukekala nobe Lesa kwi aye.*+ 17 Kabiji ukashikule kano kamama kaji mu kuboko kobe ne kubilako biyukilo.”+

18 Onkao mambo, Mosesa wabwelele ku muko+ wanji aye Yefelo ne kumubuula’mba: “Mwane mbena kukeba kubwela ku balongo bami baji mu Ijipita nkamone umvwe bakiji bomi.” Yefelo waambijile Mosesa amba: “Yainga mu mutende.” 19 Kepo Yehoba aambijile Mosesa mu Mijanyi amba: “Bwela ku Ijipita, mambo bantu bonse bakebelenga kukwipaya* bafwa.”+

20 Ponkapo Mosesa wakanjizhe mukazhanji ne baana banji ba balume pa mbongolo ne kutendeka kubwela ku kyalo kya Ijipita. Kabiji Mosesa wasendele kamama ka Lesa wa kine mu kuboko kwanji. 21 Kabiji Yehoba waambijile Mosesa amba: “Byo ukafika ku Ijipita, wafwainwa kuba bya kukumya byonse kwi Felo monka mo nakupela bulume bwa kwibyuba.+ Pakuba amiwa nkamuswisha kukosesha muchima+ wanji, kabiji aye ukakanya bantu kuya.+ 22 Obewa wafwainwa kubuula Felo amba, ‘Abino byo byaamba Yehoba amba: “Isalela ye mwanami wa mulume, mubeji wami.+ 23 Nakwambila namba, Muleke mwanami ayenga na kuñingijila. Pano umvwe umukanye kuya, amiwa nsakwipaya mwanobe wa mulume, mubeji wobe.”’”+

24 Byo bafikile mu jishinda pa mpunzha pa kukokolokela, Yehoba+ wamusambakene kabiji wakebelenga kumwipaya.+ 25 Kepo Zipola+ ashikwile jibwe* jatwa ne kuchiba kalomolomo ka mwananji, kabiji kalomolomo kaponejile ku maulu anji ne Zipola waambile’mba: “Ke na mambo a kuba wi musongoshi wami wa mashi.” 26 Onkao mambo, wamulekeleko amba ayenga. Pa kyonkakya kimye, Zipola waambile’mba, “musongoshi wa mashi,” na mambo a mukanda.

27 Kepo Yehoba aambijile Alona amba: “Yanga mu kiselebwa usambakane Mosesa.”+ Ponkapo wayile ne kumutundaila ku mutumba wa Lesa wa kine+ kabiji wamwimwine ne kumufyompa. 28 Kabiji Mosesa wabuujile Alona byambo byonse bya Yehoba yenka wamutumine+ ne biyukilo byonse byo amukambizhe kuba.+ 29 Byo bapwishishe kuba bino, Mosesa ne Alona bayile ne kukonkanya bakulumpe bonse ba mu Isalela.+ 30 Alona wibabuujile byambo byonse bya Yehoba byo aambijile Mosesa, kabiji waubile ne biyukilo+ ku meso a bantu bonse. 31 Bantu byo bamwene kino, baitabijile.+ Byo baumvwine’mba Yehoba wavuluka bantu banji bena Isalela+ ne kuba’mba wamona kumanama kwabo+, bafukamine ne kukinka bilungi byabo panshi.

5 Byo bapwishishe kuba kino, Mosesa ne Alona bayile na kubuula Felo amba: “Abino byo byaamba Yehoba Lesa wa Isalela amba, ‘Leka bantu bami baye, kuba’mba bakekale na kijiilo kyami mu kiselebwa.’” 2 Bino Felo waambile’mba: “Yehoba ye ñanyi,+ kya kuba’mba ñumvwe jiwi janji ne kuswisha bena Isalela kuya?+ Amiwa kechi namuyuka Yehoba ne, kabiji kechi nsakuswisha bena Isalela kuya ne.”+ 3 Bino abo baambile’mba: “Lesa wa Bahebelu waamba ne atweba. Tubena kukeba kuya lwendo lwa moba asatu mu kiselebwa ne kutapisha kitapisho kwi Yehoba Lesa wetu;+ mambo inge ne, usakwitukambula na mwalo nangwa na mpoko.” 4 Mfumu wa Ijipita wibambijile’mba: “Mambo ka anweba Mosesa ne Alona o mubena kukebela kufumya bantu ku mingilo yabo? Bwelai ku mingilo yenu!”+ 5 Kabiji Felo watwajijile kwamba’mba: “Talai bantu byo bavula mu kyalo, kabiji anweba mukebalengela kukokoloka ku mingilo yabo.”

6 Pa jonkaja juba, Felo wakambizhe bakulumpe bapana mingilo ne bakapitao amba: 7 “Kechi mwafwainwa kupanga bantu nsono ya kulengela matafwali+ ne. Mwibaleke bekebelenga abo bene nsono. 8 Bino mwafwainwa kwibatongwela kikonkwanyi kya matafwali kyonka kyo baubangapo kala. Kechi mwafwainwa kwikikepeshako ne, mambo babena kukokolokatu.* O ene mambo o babena kwambila’mba, ‘Tukeba kuya tukatapishe kitapisho kwi Lesa wetu!’ 9 Mwibengijishe kyakosa bingi kabiji kange bekalengatu ne, pa kuba’mba babule kuta muchima ku byambo bya bubela.”

10 Onkao mambo, bakulumpe+ bapana mingilo ne bakapitao balupukile pangye ne kwambila bantu amba: “Abino byo byaamba Felo amba, ‘Kechi nsakwimupa nsono ne. 11 Yainga na kwikebela nsono konse ko musakwiitaana, bino kikonkwanyi kyenu kechi basakwikikepeshako ne.’” 12 Kepo bantu bapalañejile monse mu kyalo kya Ijipita na kukeba nsono. 13 Kabiji bakulumpe bapana mingilo bebakambizhenga amba: “Mwafwainwa kupwisha bikonkwanyi byenu bya pa juba pa juba, byonkatu byo mwaingijilenga kimye kyo bemupelenga nsono.” 14 Kabiji bakapitao ba bena Isalela, bonka bo batongwele ku bakulumpe bapana mingilo ba kwa Felo, bebapuminenga.+ Bebashikishe’mba: “Mambo ka o mwabujila kufikizha bikonkwanyi byenu bya kufyatula matafwali byonka byo mwaubanga kala? Abino byo mwauba lelo, byo byo mwaubile ne kesha.”

15 Onkao mambo, bakapitao ba bena Isalela bayile na kwijizhanya kwi Felo amba: “Mambo ka o mubena kwitubila bibye atweba bakalume benu? 16 Kechi babena kwitupa nsono atweba bakalume benu ne, pano bino babena kwitwambila’mba, ‘Fyatulai matafwali!’ Atweba bakalume benu babena kwitupuma, bino bantu benu bo baji na lukatazho.” 17 Bino aye wibambijile’mba: “Mubena kukokolokatu,* mubena kukokolokatu!*+ O ene mambo o mubena kwambila’mba, ‘Tukeba kuya na kutapisha kitapisho kwi Yehoba.’+ 18 Bwelai mukengilenga! Kechi basakwimupa nsono ne, bino mwafwainwa kufyatula matafwali o bemutongwela.”

19 Bakapitao ba bena Isalela bamwene’mba baji mu lukatazho lukatampe, na mambo a mukambizho wa kuba’mba: “Kechi mwafwainwa kukepeshako kikonkwanyi kya matafwali kya pa juba pa juba ne.” 20 Byo basambakene ne Mosesa ne Alona, baimene na kwibapembelela byo bafuminenga kwi Felo. 21 Ponkapo bebambijile’mba: “Yehoba amone byo mwauba ne kwimuzhachisha, mambo mwalengela Felo ne bakalume banji kwitushikwa* kabiji mwapana mpoko mu kuboko kwabo amba betwipaye.”+ 22 Kepo Mosesa abwelele kwi Yehoba ne kushikisha’mba: “Anweba Yehoba, mambo ka o mwamanyikila bano bantu? Mambo ka o mwantumijile? 23 Kufumatu kimye kyo nayile na kwamba kwi Felo mu jizhina jenu,+ aye wayanjisha bingi bano bantu,+ kabiji anweba kechi mwapokolola bantu benu ne.”+

6 Onkao mambo, Yehoba waambijile Mosesa amba: “Pano usakumona byo nsakumuba Felo.+ Bulume bwami bukamulengela kwibaswisha kuya kabiji bulume bwami bukamulengela kwibapangamo mu kyalo kyanji.”+

2 Kabiji Lesa waambijile Mosesa amba: “Amiwa yami Yehoba. 3 Namwekanga kwi Abalahama, kwi Izaka ne kwi Yakoba amba yami Lesa wa Bulume Bonse,+ bino jizhina jami ja Yehoba+ kechi nebabuujilejo bulongo ne.+ 4 Kabiji nalayañene nabo kuba’mba nkebapa kyalo kya Kenana, kyalo kyo baikelemo bwenyi.+ 5 Pano naumvwa mibinzo ya bena Isalela, bo baikazha buzha ku bena Ijipita kabiji navuluka lulayañano lwami.+

6 “Pano ambila bena Isalela amba, ‘Yami Yehoba kabiji nkemukasulula ku mingilo yakosa ya bena Ijipita ne kwimupokolola mu buzha+ bo mujimo, kabiji nkemukuula na kuboko ko nkatanyika* ne na bintu bikatampe bya kwibakabisha.+ 7 Kabiji nkemutambula ke bantu bami, ne amiwa nkekala ke Lesa wenu,+ ne anweba mukayuka’mba yami Yehoba Lesa wenu wimwamunako ku mingilo yakosa ya mu Ijipita. 8 Kabiji nkemutwala mu kyalo kyo nachipile* namba nkekipana kwi Abalahama, kwi Izaka ne kwi Yakoba; nkekipana kwi anweba kwikala ke kyenu.+ Amiwa yami Yehoba.’”+

9 Ponkapo Mosesa wabuujile bena Isalela bino byambo, bino abo kechi bamumvwijile ne, mambo a kuba balefwilwe ne na mambo a mingilo ya buzha.+

10 Kepo Yehoba aambijile Mosesa amba: 11 “Yanga kwi Felo mfumu wa Ijipita ukamubuule’mba aleke bena Isalela bafume mu kyalo kyanji.” 12 Nangwa byonkabyo, Mosesa waambijile Yehoba amba: “Bena Isalela bakaana kuñumvwina;+ pano Felo ukañumvwina byepi byo kiji kuba’mba amiwa nnemenena pa kwamba?”*+ 13 Bino Yehoba wabuujile Mosesa ne Alona jikwabo mikambizho ya kubuula bena Isalela ne Felo mfumu wa Ijipita, pa kuba’mba akaleke bena Isalela bakafume mu kyalo kya Ijipita.

14 Ino yo mitwe ya ba mu nzubo ya bashabo: Baana ba kwa Lubenyi mubeji+ wa kwa Isalela bajinga Hanoki, Palu, Hezelona ne Kami.+ Abino byo bisemi bya kwa Lubenyi.

15 Baana ba kwa Shimeona bajinga Yemwele, Yamina, Ohada, Yakina, Zohala ne Shaulo mwana wa mulume wa mwanamukazhi mwina Kenana.+ Abino byo bisemi bya kwa Shimeona.

16 Ano o mazhina a baana ba kwa Levi+ monka mwayijile bisemi byabo: Geleshona, Kohati ne Melali.+ Myaka yaikele Levi na bumi yajinga 137.

17 Baana ba kwa Geleshona bajinga Libinyi ne Shimei monka mwayijile bisemi+ byabo.

18 Baana ba kwa Kohati bajinga Amulamu, Izahala, Hebulona ne Uziela.+ Myaka yaikele Kohati na bumi yajinga 133.

19 Baana ba kwa Melali bajinga Mali ne Mushi.

Abino byo bisemi bya bena Levi monka mwayijile bisemi byabo.+

20 Amulamu wasongwele Yokebeda shanjinkazhi.+ Yokebeda wasemene Alona ne Mosesa.+ Myaka yaikele Amulamu na bumi yajinga 137.

21 Baana ba kwa Izahala bajinga Kola,+ Nefega ne Zikili.

22 Baana ba kwa Uziela bajinga Mishela, Elezafwana+ ne Situli.

23 Alona wasongwele Elisheba mwana wa kwa Aminadaba nyenga ya kwa Nashona.+ Elisheba wasemene Nadaba, Abihu, Eleaza ne Itamala.+

24 Baana ba kwa Kola bajinga Asila, Elekana ne Abiasafwa.+ Abino byo byajinga bisemi bya bena Kola.+

25 Eleaza+ mwana wa mulume wa kwa Alona wasongwele mwana wa kwa Putiela. Ne aye wasemene Finease.+

Ino yo mitwe ya bikota bya bena Levi monka mwayijile bisemi byabo.+

26 Abano bo ba Alona ne Mosesa Yehoba bo aambijile’mba: “Lupulai bena Isalela mu kyalo kya Ijipita, monka mwayila mabumba* abo.”+ 27 Kabiji bo baambilenga kwi Felo mfumu wa Ijipita kuba’mba aleke bena Isalela bafume mu Ijipita. Bajinga bonka bano ba Mosesa ne Alona.+

28 Pa jonkaja juba, Yehoba jo aambile ne Mosesa mu kyalo kya Ijipita, 29 Yehoba waambijile Mosesa amba: “Yami Yehoba. Umubuule Felo mfumu wa Ijipita bintu byonse byo mbena kukubuula.” 30 Kepo Mosesa aambijile Yehoba amba: “Amiwa nnemenena pa kwamba,* pano Felo ukañumvwina byepi?”+

7 Kepo Yehoba aambijile Mosesa amba: “Umvwa, nakwalula kwikala nobe Lesa* kwi Felo, ne Alona kolojobe ukekala ngauzhi+ wobe. 2 Obewa ukambanga byambo byonse byo nkakukambizha, ne Alona kolojobe ukebyambanga kwi Felo ne aye ukaleka bena Isalela kufuma mu kyalo kyanji. 3 Pakuba amiwa, nkaswisha muchima wa kwa Felo kukosa+ kabiji nkavuzha biyukilo byami ne bya kukumya byami mu kyalo kya Ijipita.+ 4 Bino Felo kechi ukemumvwina ne, kabiji nkaleta kuboko kwami kwakosa pa Ijipita ne kufumya mabumba* a bantu bami bena Isalela mu kyalo kya Ijipita na bintu bikatampe bya kwibakabisha.+ 5 Kabiji bena Ijipita bakayuka’mba yami Yehoba+ byo nkengijisha bulume bwami pa kyalo kya Ijipita ne kufumyamo bena Isalela.” 6 Mosesa ne Alona baubile monka Yehoba mo ebakambizhizhe; baubiletu byonkabyo. 7 Mosesa wajinga na myaka 80, kabiji Alona wajinga na myaka 83 kimye kyo baambilenga ne Felo.+

8 Yehoba waambijile Mosesa ne Alona amba: 9 “Umvwe Felo emwambile’mba, ‘Ubaipo kya kukumya,’ wambile Alona amba, ‘Shikula kamama kobe wikataye panshi Felo saka atalako.’ Ne ako kasakwaluka ke muloolo mukatampe.”+ 10 Onkao mambo, Mosesa ne Alona bayile kwi Felo ne kuba monka Yehoba mo ebakambizhizhe. Alona watayile kamama kanji panshi Felo ne bakalume banji saka batalako, ne ako kaalukile ke muloolo mukatampe. 11 Pano bino, Felo waichile ba maana ne balozhi, kabiji bañanga bapanda manga ba mu Ijipita+ nabo baubile kintutu kimo na bingelekezha+ byabo. 12 Nabo batayile tumama twabo panshi, ne ato twaalukile ke miloolo ikatampe; pano bino, kamama ka kwa Alona kamiine tumama twabo. 13 Nangwa byonkabyo, muchima wa kwa Felo watwajijiletu kukosa+ kabiji kechi wibomvwijile ne, byonkatu Yehoba byo aambile.

14 Kepo Yehoba aambijile Mosesa amba: “Muchima wa kwa Felo wakosa.+ Aye wakana kuleka bantu bami kuya. 15 Kesha lukelo ukaye kwi Felo. Aye ukaya ku mema. Kabiji wafwainwa kuya kuba’mba ukamusambakane ku kitulu kya Mukola wa Nile; kabiji ukasende kamama mu kuboko kobe konka kaalukile ke muloolo.+ 16 Kabiji wafwainwa kumubuula’mba, ‘Yehoba Lesa wa Bahebelu wantuma kwi anweba,+ kabiji waamba’mba: “Leka bantu bami baye na kuñingijila mu kiselebwa,” bino anweba kechi mwakookela ne, kufikatu ne luno. 17 Abino byo byaamba Yehoba amba: “Akino kyo kyo usakuyukilako amba yami Yehoba.+ Amiwa nsakupuma pa mema a mu Mukola wa Nile na kamama kaji mu kuboko kwami kabiji mema asakwaluka ke mashi. 18 Kabiji masabi a mu Mukola wa Nile asakufwa ne Mukola wa Nile yense usakununkakana, ne bena Ijipita kechi basakukonsha kutoma mema a mu Nile ne.”’”

19 Kepo Yehoba aambijile Mosesa amba: “Ambila Alona amba, ‘Shikula kamama kobe ne kwikatanyikila pa mema a mu Ijipita,+ pa mikola yanji, mifolo* yanji, bya kulaminamo mema+ byanji ne pa bizhiba byanji byonse kuba’mba aluke ke mashi.’ Mukekala mashi mu kyalo kyonse kya Ijipita ne mu bipetu byo balenga na bichi ne na mabwe.” 20 Ponkapo Mosesa ne Alona baubile monka Yehoba mo ebakambizhizhe. Washikwile kamama ne kwikapuma pa mema a mu Mukola wa Nile, Felo ne bakalume banji saka batalako, ne mema onse ajinga mu mukola aalukile ke mashi.+ 21 Kabiji masabi ajinga mu mukola afwile+ ne mu mukola mwanunkakenetu nuu, kabiji bena Ijipita kechi bakonsheshe kutoma mema a mu Nile+ ne, ne mashi akumbene mu kyalo kyonse kya Ijipita.

22 Nangwa byonkabyo, bañanga bapanda manga ba mu Ijipita nabo baubile kintutu kimo na bingelekezha byabo,+ kya kuba muchima wa kwa Felo watwajijiletu kukosa kabiji kechi wibomvwijile ne, byonkatu Yehoba byo aambile.+ 23 Kepo Felo abwelele ku nzubo yanji kabiji kechi wateleko muchima ku kino kintu ne. 24 Onkao mambo, bena Ijipita bonse batendekele kupoya mishima kunsa ya Mukola wa Nile kuba’mba bataane mema a kutoma, mambo kechi bakonsheshe kutoma mema a mu Nile ne. 25 Kabiji papichile moba atanu na abiji kufuma kimye Yehoba kyo aalwile mema a mu Nile ke mashi.

8 Kepo Yehoba aambijile Mosesa amba: “Yanga kwi Felo ukamubuule’mba, ‘Abino byo byaamba Yehoba amba: “Leka bantu bami baye na kuñingijila.+ 2 Umvwe ukanye bantu bami kuya, nsakuleta mabombwe+ mu kyalo kyobe kyonse. 3 Kabiji Mukola wa Nile ukayulatu na mabombwe, ne ao akeya na kutwela mu nzubo yobe, mo ulaala, pa mwanya wobe, mu mazubo a bakalume bobe ne bantu bobe, mu bitofu byobe ne mu biina* byobe.+ 4 Mabombwe akeya kwi obewa, pa bantu bobe ne pa bakalume bobe bonse.”’”

5 Kabiji Yehoba waambijile Mosesa amba: “Ambila Alona amba, ‘Tanyika kamama kobe na kuboko pa mikola, pa mifolo ya Nile ne pa mishima, ne kulengela mabombwe kwiya mu kyalo kya Ijipita.’” 6 Onkao mambo, Alona watanyikile kuboko kwanji pa mema a mu Ijipita ne mabombwe atuntukile ne kukumbana kyalo kyonse kya Ijipita. 7 Nangwa byonkabyo, bañanga bapanda manga baubile kintutu kimo na bingelekezha byabo, nabo balengele mabombwe kutuntukila mu kyalo kya Ijipita.+ 8 Pa kupitapo kimye, Felo waichile Mosesa ne Alona ne kwibambila’mba: “Musashijilai Yehoba kuba’mba afumye mabombwe kwi amiwa ne ku bantu bami,+ mambo mbena kukeba kwibaleka bano bantu bayenga na kutapisha kitapisho kwi Yehoba.” 9 Kepo Mosesa aambijile Felo amba: “Kiji ko muji mwane kumbuula kimye kyo mukakeba’mba nkemusashijileko kwi Lesa kuba’mba mabombwe akafume kwi anweba, ne ku bakalume benu, ku bantu benu ne mu mazubo enu. Pakuba mabombwe akashalatu mu Mukola wa Nile.” 10 Felo waambile’mba: “Kesha.” Kepo Mosesa aambile’mba: “Kikekela monka mo mwaambila pa kuba’mba mukayuke’mba kafwako nangwa umo waesekana ne Yehoba Lesa wetu ne.+ 11 Mabombwe akafumako kwi anweba, mu mazubo enu, ku bakalume benu ne ku bantu benu. Pakuba akashajilatu mu Mukola wa Nile.”+

12 Onkao mambo, Mosesa ne Alona bafumineko kwi Felo, kabiji Mosesa wamusashijile Yehoba pa mambo a mabombwe o aletele kwi Felo.+ 13 Kabiji Yehoba waubile monka mwaambijile Mosesa ne mabombwe atendekele kufwa mu mazubo, mu bipango ne mu majimi. 14 Bealumbikilenga milumba milumba ya kukankalwa kubala, ne kyalo kyanunkakenetu nuu. 15 Felo byo amwene’mba mabombwe afwa, wakoseshe muchima+ wanji kabiji kechi wibomvwijile ne, byonkatu Yehoba byo aambile.

16 Kepo Yehoba aambijile Mosesa amba: “Ambila Alona amba, ‘Tanyika kamama kobe ne kupuma pa lukungu lwa panshi kabiji lusakwikala ke mbwibwi mu kyalo kyonse kya Ijipita.’” 17 Ne abo baubile byonkabyo. Alona watanyikile kamama na kuboko kwanji ne kupuma pa lukungu lwa panshi ne mbwibwi yaishile pa bantu ne pa banyama. Lukungu lonse lwa panshi lwaalukile ke mbwibwi mu kyalo kyonse kya Ijipita.+ 18 Kabiji bañanga bapanda manga baesekele kuba kintutu kimo kuba’mba balenge mbwibwi na bingelekezha+ byabo, bino bakankelwe. Kabiji mbwibwi yaishile pa bantu ne pa banyama. 19 Onkao mambo, bañanga bapanda manga babuujile Felo amba: “Kino kyaubiwa na bulume bwa Lesa!”+ Bino muchima wa kwa Felo watwajijiletu kukosa, kabiji kechi wibomvwijile ne, byonkatu Yehoba byo aambile.

20 Ponkapo Yehoba waambijile Mosesa amba: “Kesha lukelo ukaye na kumonañana ne Felo. Aye ukeya ku mema! Kabiji wafwainwa kumubuula’mba, ‘Yehoba waamba’mba: “Leka bantu bami baye na kuñingijila. 21 Bino umvwe ukanye bantu bami kuya, nkakutumina malunzhi asumana, obewa, bakalume bobe, bantu bobe ne mu mazubo obe a mu Ijipita; kabiji mu mazubo a mu Ijipita mukayula malunzhi asumana kabiji akakumbana pa mushiji yense po bekala.* 22 Pa joja juba, nkapaatulako mpunzha ya Goshenyi, mubena kwikala bantu bami. Kafwako lunzhi usumana nangwa umo ukekalamo ne,+ ku kino ko ko ukayukila’mba, amiwa Yehoba nji mu ino mpunzha.+ 23 Kabiji nkabanya bantu bami ne bantu bobe. Kino kiyukilo kikamweka kesha.”’”

24 Kabiji Yehoba waubile byonkabyo, ne malunzhi avula asumana aishile mu nzubo ya kwa Felo ne mu mazubo a bakalume banji ne mu kyalo kyonse kya Ijipita.+ Kyalo kyaonaikile na mambo a malunzhi asumana.+ 25 Kepo Felo aichile Mosesa ne Alona ne kwibambila’mba: “Yainga mukatapishe kitapisho kwi Lesa wenu mu kyalo.” 26 Bino Mosesa waambile’mba: “Kechi twakonsha kuba kino ne, mambo kintu kyo tusakutapisha kwi Yehoba Lesa wetu kisakwikala kya bunya ku bena Ijipita.+ Umvwe tutapishe kitapisho kileta bunya ku bena Ijipita, nanchi kechi basakwitwasa mabwe nenyi? 27 Tusakuya lwendo lwa moba asatu mu kiselebwa, kabiji konkakwa ko ko tukatapisha kitapisho kwi Yehoba Lesa wetu, monka mo etubuujile.”+

28 Kepo Felo aambile’mba: “Nsakwimuleka muye na kutapisha kitapisho kwi Yehoba Lesa wenu mu kiselebwa. Pano bino, kechi mwafwainwa kuya kwalepa ne. Nsashijilaiko kwi Lesa.”+ 29 Ponkapo Mosesa waambile’mba: “Pano nsakufumako kwi anweba kabiji nsakwimusashijilako kwi Yehoba, ne malunzhi asumana akafumako kesha kwi anweba ba Felo, ku bakalume benu ne ku bantu benu. Pakuba anweba ba Felo kechi mwitujimbaikenga na mambo a kukanya bantu kuya na kutapisha kitapisho kwi Yehoba ne.”+ 30 Kepo Mosesa afumineko kwi Felo kabiji wamusashijileko kwi Yehoba.+ 31 Kabiji Yehoba waubijile monka mwaambijile Mosesa, ne malunzhi asumana afumineko kwi Felo, ku bakalume banji ne ku bantu banji. Kafwako lunzhi usumana nangwa umo washajilepo ne. 32 Nangwa byonkabyo, Felo wakoseshe muchima wanji jibiji kabiji kechi wibalekele bantu amba bayenga ne.

9 Onkao mambo, Yehoba waambijile Mosesa amba: “Yanga ukabuule Felo amba, ‘Yehoba Lesa wa Bahebelu waamba’mba: “Leka bantu bami baye na kuñingijila.+ 2 Bino umvwe wibakanye kuya ne kwibakosela, 3 kuboko kwa Yehoba+ kukeya pa bilelwa byobe biji mungye. Kabiji kinkunka kikatampe kikeya pa bambili, pa bambongolo, pa bangamela, pa bañombe ne pa mikooko.+ 4 Kabiji Yehoba kine ukabanya banyama ba bena Isalela na banyama ba bena Ijipita, kafwako nyama nangwa umo wa bena Isalela ukafwa ne.”’”+ 5 Kabiji Yehoba watongwele kimye amba: “Amiwa Yehoba, kesha po po nkoba kino kintu mu kino kyalo.”

6 Kabiji Yehoba waubile kino kintu pa juba jalondejilepo, mitundu yonse ya banyama ba mu Ijipita yatendekele kufwa,+ pano bino kafwako kilelwa nangwa kimo kya bena Isalela kyafwile ne. 7 Felo byo akebele kuyuka kyamwekele, wataaine’mba kafwako nyama nangwa umo wa bena Isalela wafwa ne. Nangwa byonkabyo, muchima wa kwa Felo watwajijiletu kukosa kabiji kechi walekele bantu amba baye ne.+

8 Kepo Yehoba aambijile Mosesa ne Alona amba: “Yuzhai maboko enu na buto bwa mu kibili, kabiji Mosesa wafwainwa kwibululwila mu mwela Felo saka amonako. 9 Kabiji buno buto busakwaluka ke lukungu mu kyalo kyonse kya Ijipita, kabiji busakuleta tusungupute ku bantu ne ku banyama mu kyalo kyonse kya Ijipita.”

10 Byonkabyo, bashikwile buto bwa mu kibili ne kukemana kwi Felo, kabiji Mosesa wibululwile mu mwela, ne buto bwaletele tusungupute twatumbile bantu ne banyama. 11 Bañanga bapanda manga bakankelwe kwimana kwi Mosesa na mambo a tusungupute, mambo twatumbile pa mibiji yabo ne pa bena Ijipita bonse.+ 12 Bino Yehoba waswishishe muchima wa kwa Felo kukosa, kabiji kechi wibomvwijile ne, byonkatu Yehoba byo aambijile Mosesa.+

13 Kepo Yehoba aambijile Mosesa amba: “Kesha lukelo ukaye na kumonañana ne Felo ne kumubuula’mba, ‘Abino byo byaamba Yehoba Lesa wa Bahebelu amba: “Leka bantu bami baye na kuñingijila. 14 Mambo mbena kutuma myalo kwi obewa, ku bakalume bobe ne ku bantu bobe pa kuba’mba uyuke’mba kafwako muntu nangwa umo waesakana pamo ne amiwa pano pa ntanda ponse ne.+ 15 Mambo amiwa umvwe natanyikile kuboko kwami pe obewa ne pa bantu bobe ne kukukambula na kinkunka kikatampe, kino kimye inge wazhiya* pano pa ntanda. 16 Na mambo a kino, nakikuleka: namba nkumweshe bulume bwami ne kulengela jizhina jami kuyukanyikwa pano pa ntanda ponse.+ 17 Abya wakitwajijila kukatazha bantu bami byo wakana kwibaleka amba baye nyi? 18 Kesha pa kyonka kino kimye, nkanokesha mvula mukatampe wa mabwe ukyangye kunokapo kala mu Ijipita, kufumatu juba jaikajikilwe kino kyalo kufika ne lelo. 19 Onkao mambo, tuma miluwe kuba’mba batwezhe banyama bobe bonse mu mazubo ne bintu byobe byonse biji mungye. Muntu yense ne nyama yense ukatanwa mungye ye bakabula kutwezha mu nzubo, ukafwa na mvula wa mabwe ukanoka.”’”

20 Bakalume bonse ba kwa Felo baumvwijile byaambile Yehoba, batwezhezhe bakalume babo ne banyama babo mu mazubo, 21 bino yense wabujile kumvwina byaambile Yehoba, washile bakalume banji ne banyama banji mungye.

22 Kepo Yehoba aambijile Mosesa amba: “Tanyika kuboko kobe mwiulu, kuba’mba mvula wa mabwe anokele pa kyalo kyonse kya Ijipita,+ pa bantu, pa banyama ne pa bijimwa byonse bya mu majimi a mu kyalo kya Ijipita.”+ 23 Ponkapo Mosesa watanyikile kamama kanji mwiulu, kabiji Yehoba watumine kutatauka kwa mvula ne mvula wa mabwe ne mujilo* waponejile panshi, kabiji Yehoba wanokeshe mvula wa mabwe pa kyalo kya Ijipita. 24 Kwanokele mvula wa mabwe ne mujilo wabyashishenga mu mvula wa mabwe. Uno mvula wabayile bingi; kechi kwakinokelepo mvula nabiji uno mu kyalo kya Ijipita ne, kufumatu kimye kyo kyaikele ke kyalo.+ 25 Mvula wa mabwe waonawine bintu byonse byajinga mu majimi a mu kyalo kyonse kya Ijipita, kutendekelatu ku bantu kufika ne ku banyama, waonawine bijimwa byonse ne kuchimauna bichi byonse byajinga mungye.+ 26 Kanatu mu Goshenyi mwajinga bena Isalela, mo mwabujile kunoka mvula wa mabwe.+

27 Onkao mambo, Felo waichile Mosesa ne Alona ne kwibambila’mba: “Pano nalenga mambo. Yehoba waoloka, pakuba amiwa ne bantu bami twatamisha. 28 Musashijile Yehoba kuba’mba kutatauka kwa mvula wa Lesa ne mvula wa mabwe bichibike. Kepo nsakwimulekako muyenga kabiji kechi musakwikala ne.” 29 Mosesa wamwambijile’mba: “Byo nsakufumatu mu muzhi, nsakutanyika maboko ami kwi Yehoba. Ne kutatauka kwa mvula kusakwikileka ne mvula wa mabwe usakuleka kunoka, pa kuba’mba muyuke’mba ntanda yo ya kwa Yehoba.+ 30 Pakuba anweba ne bakalume benu, nayuka namba kechi musakwakamwa Yehoba Lesa ne.”

31 Bukusa ne mbaale byaonaikile, mambo mbaale yajinga na mituntu kabiji bukusa bwajinga na buluba. 32 Pakuba wichi ne sepelita kechi byaonaikile ne, mambo kechi kyajinga kimye kipilamo kajo ne. 33 Mosesa wafuminemo mu muzhi ne kwi Felo kabiji watanyikile maboko anji kwi Yehoba ne kutatauka kwa mvula ne mvula wa mabwe byachibikile, kabiji mvula walekele kunoka mu kyalo.+ 34 Felo byo amwene’mba mvula ne mvula wa mabwe ne kutatauka kwa mvula byachibika, walengele mambo jibiji ne kukosesha muchima wanji,+ aye ne bakalume banji. 35 Ne muchima wa kwa Felo watwajijiletu kukosa kabiji kechi walekele bena Isalela kuya ne, byonkatu Yehoba byo aambijile Mosesa.+

10 Kepo Yehoba aambijile Mosesa amba: “Yanga kwi Felo, mambo amiwa namuswisha kukosesha muchima wanji ne michima ya bakalume banji,+ pa kuba’mba mmweshe bino biyukilo kwi abo,+ 2 ne kuba’mba ukabuulenga baana bobe ne bankana bobe byo nauba mu kyalo kya Ijipita ne biyukilo byo nauba kwi abo;+ kabiji bakayuka’mba kine yami Yehoba.”

3 Ponkapo Mosesa ne Alona bayile kwi Felo ne kumubuula’mba: “Abino byo byaamba Yehoba Lesa wa Bahebelu amba, ‘Nanchi ukakana kunkookela kufika kimye ka?+ Leka bantu bami baye na kuñingijila. 4 Mambo umvwe utwajijile kwibakanya kuya, kesha nkaleta nzhiye mu kyalo kyobe. 5 Kabiji nzhiye ikakumbana mu kyalo kyonse, kabiji kechi mukakonsha kumona mushiji ne. Ayo ikaja byonse byabujile konaika na mvula wa mabwe kabiji ikaja bichi byenu byonse byamena mu majimi.+ 6 Ikayula mu mazubo obe, mu mazubo a bakalume bobe bonse ne mu mazubo a bena Ijipita bonse, kya kuba bashenu ne bankambo yenu kechi bamwenepo kintu kya uno mutundu kufuma kimye kyo baikele mu kino kyalo kufika ne lelo jino ne.’”+ Ponkapo Mosesa waalulukile ne kufumako kwi Felo.

7 Kepo bakalume ba kwa Felo bamushikishe’mba: “Nanchi uno muntu ukatwajijilatu na kwituletela bya malwa* nyi? Balekai bano bantu baye na kwingijila Yehoba Lesa wabo. Nanchi kechi mwamona Ijipita byo aonaika nenyi?” 8 Ponkapo Mosesa ne Alona bebabwezhezhe jibiji kwi Felo, ne aye wibambijile’mba: “Yainga mukengijile Yehoba Lesa wenu. Pano bañanyi bakaya?” 9 Mosesa wakumbwile’mba: “Tukaya na baana betu babacheche, bakulumpe, baana betu ba balume ne ba bakazhi, mikooko yetu ne bañombe betu,+ mambo tukekala na kijiilo kwi Yehoba.”+ 10 Felo wibambijile’mba: “Umvwe nnemuleke anweba ne baana benu muye, ko kuba’mba kine Yehoba muji nanji!+ Kyamwekatu patoka kuba’mba mubena kukeba kuba kintu kyatama. 11 Banabalume bonkatu bo basakuya na kwingijila Yehoba, mambo kyo kyo mwakebelenga.” Ponkapo bebapangile kufuma kwi Felo.

12 Kabiji Yehoba waambijile Mosesa amba: “Tanyika kuboko kobe pa kyalo kya Ijipita kuba’mba nzhiye iye mu kyalo kya Ijipita ne kuja bijimwa byonse bya mu kyalo ne byonse byabujile konaika na mvula wa mabwe.” 13 Ponkapo Mosesa watanyikile kamama kanji pa kyalo kya Ijipita, ne Yehoba walengejile mwela wa ku musela kupupila pa kyalo mute yense ne bufuku bonse. Byo bwakile lukelo, mwela wa ku musela waletele nzhiye. 14 Ne nzhiye yaishile pa kyalo kyonse kya Ijipita ne kwikala mu mapunzha onse a Ijipita.+ Yavujile bingi;+ kechi kwajingapo nzhiye yavujile byobya kala ne, kabiji kechi kukekalapo yavula byonkabya ne. 15 Nzhiye yakumbene kyalo kyonse kabiji pa mushiji paubiletu fitu na nzhiye; yajiile bijimwa byonse bya mu kyalo ne bipangwa byonse bya ku bichi byabujile konaika na mvula wa mabwe; kafwako nangwa kimo kyatalala kya ku bichi nangwa kya ku bijimwa bya mu majimi a mu kyalo kyonse kya Ijipita kyashajilepo ne.

16 Ponkapo Felo waichile Mosesa ne Alona ne kwibambila’mba: “Namulenga mambo Yehoba Lesa wenu ne anweba. 17 Pano napopwela, ndekelaiko mambo japelako, kabiji mumusashijile Yehoba Lesa wenu afumye kino kinkunka kyatama pe amiwa.” 18 Byonkabyo, aye* wafumineko kwi Felo ne kumusashijila Yehoba.+ 19 Kepo Yehoba azhalulwile mwela, kabiji waikele ke mwela wa ku muzhika wakosa bingi, kabiji wasendele nzhiye ne kwiitwala mu Kalunga ka Mema Kachila. Kafwako luzhiye nangwa umo washajilepo mu mapunzha onse a Ijipita ne. 20 Nangwa byonkabyo, Yehoba waswishishe muchima wa kwa Felo kukosa,+ kabiji kechi walekele bena Isalela amba baye ne.

21 Kabiji Yehoba waambijile Mosesa amba: “Tanyika kuboko kobe mwiulu kuba’mba mu kyalo kyonse kya Ijipita mwikale mfishi yafitatu bwii.” 22 Ponkapo Mosesa watanyikile kuboko kwanji mwiulu ne mfishi yafitatu bwii yaikele mu kyalo kyonse kya Ijipita pa moba asatu.+ 23 Bakankelwenga kwimona mulwabo kabiji kafwako waimene kufuma po aikele pa moba asatu ne; pakuba bena Isalela bonse bajinga na kyeya ko baikelenga.+ 24 Kepo Felo aichile Mosesa ne kumwambila’mba: “Yainga mukengijilenga Yehoba.+ Pano bino, mikooko yenu ne bañombe benu basakushala. Musende ne baana benu.” 25 Bino Mosesa waambile’mba: “Anweba yenka musakwitupa* ne bitapisho ne milambo ya kusoka, kabiji tukeilambula kwi Yehoba Lesa wetu.+ 26 Tusakusenda ne banyama betu. Kafwako nyama* nangwa umo usakushala ne, mambo bamo tukebengijishanga pa kupopwela Yehoba Lesa wetu kabiji kechi twayuka milambo yo tukalambulanga pa kupopwela Yehoba ne, posotu tukafike konkakwa.” 27 Onkao mambo, Yehoba waswishishe muchima wa kwa Felo kukosa kabiji kechi waswile kwibaleka amba baye ne.+ 28 Felo waambijile Mosesa amba: “Fuma papo! Kange ukamone kilungi kyami jibiji ne, mambo mu juba jo ukamona kilungi kyami, ukafwa.” 29 Mosesa waambile’mba: “Byonkatu byo mwaamba, kechi nkamona kilungi kyenu jibiji ne.”

11 Kepo Yehoba aambijile Mosesa amba: “Kwashala kinkunka kimo kyo nsakuleta kwi Felo ne ku bena Ijipita. Apa bino, ukemuleka’mba muye.+ Byo akemuleka, kine aye ukemupangamo muno.+ 2 Pano buula bantu amba banabalume bonse ne banabakazhi bonse bafwainwa kulomba bipe bya siliva ne bya ngolode ku bo bekala nabo kipikipi.”+ 3 Kabiji Yehoba walengejile bantu kwibobila bibusa ku bena Ijipita. Kabiji Mosesa bamunemekele bingi mu kyalo kya Ijipita ku bakalume ba kwa Felo ne ku bantu.

4 Kepo Mosesa aambile’mba: “Yehoba waamba’mba, ‘Pakachi ka bufuku nsakupita mu Ijipita,+ 5 kabiji babeji bonse ba mu kyalo kya Ijipita basakufwa,+ kutendekelatu ku mubeji wa kwa Felo waikala pa jitanda janji kufika ne ku mubeji wa muzha wanji wa mukazhi ubena kwingijila ku jibwe ja kupelelapo, ne babeji bonse ba banyama.+ 6 Mu kyalo kyonse kya Ijipita mukekala kujila kukatampe kukyangye kumwekapo kala, kabiji kechi kukabwelapo jibiji ne.+ 7 Bino kafwako kabwa nangwa umo ukaboza* bena Isalela nangwa banabalume nangwa bilelwa byabo ne, pa kuba’mba mukayuke’mba bintu Yehoba byo obila bena Ijipita byapusana bingi na byo obila bena Isalela.’+ 8 Kabiji bakalume benu bonse bakeya kwi amiwa ne kumfukamina ne kwamba’mba, ‘Yanga, obewa ne bantu bonse bo uji nabo.’+ Ne amiwa nkaya.” Ponkapo Mosesa wafumineko kwi Felo na bukaji.

9 Kepo Yehoba aambijile Mosesa amba: “Felo kechi usakwimumvwina ne,+ pa kuba’mba mvuzhe bya kukumya byami mu kyalo kya Ijipita.”+ 10 Mosesa ne Alona baubile bino byonse bya kukumya kwi Felo,+ pano bino Yehoba waswishishe muchima wa kwa Felo kukosa, kabiji kechi walekele bena Isalela kufuma mu kyalo kyanji ne.+

12 Yehoba waambijile Mosesa ne Alona byo bajinga mu kyalo kya Ijipita amba: 2 “Uno ñondo ukekala ke ñondo mutanshi kwi anweba. Ukekala ke ñondo mutanshi mu mwaka kwi anweba.+ 3 Waambijile jibumba jonse ja bena Isalela amba, ‘Pa juba ja bujikumi ja uno ñondo, muntu yense akasende mukooko+ umo mu nzubo ya bashanji, pa nzubo pa nzubo mukooko umo. 4 Bino umvwe ba mu nzubo imo bakepa kya kuba mukooko wibabayila, abo* ne bo bekala nabo kipikipi bakamwabane monka mwayila kuvula kwa bantu* baji mu mazubo abo. Pa kwabanya nyama ya mukooko, mwafwainwa kumona kitumba kyakonsha kuja muntu yense. 5 Mukooko wenu wafwainwa kwikala wabula bulema,+ mulume wa mwaka umo. Mwafwainwa kumusala mu mikooko ilume yana nangwa mu bambuzhi. 6 Kabiji mwafwainwa kumulama bulongo kufikatu ne ku juba ja bu 14 ja uno ñondo,+ kabiji jibumba jonse ja bena Isalela jikepaye bano banyama kimye kya muntuwa muntuwa.*+ 7 Kabiji bakasendeko mashi ne kwiashinga pa mashiki abiji a pa bibelo ne pa mapulanga aji peulu ya bibelo bya mazubo mo bakajiila bano banyama.+

8 “‘Ne abo bakaje ino nyama bonkabwa bufuku.+ Bafwainwa kwiyosha pa mujilo ne kwiijiila pamo na shinkwa wabula mbizho+ ne na bishu byalula.+ 9 Kange mukaje nyama ibishi nangwa ya kuteeka ne, bino mukoshe, mutwe, mikupa ne bya munda pamo. 10 Kechi mukashepo nyama ya kufika lukelo ne, bino nyama yonse ikashalapo kufika lukelo, mwafwainwa kwiisoka pa mujilo.+ 11 Abino byo byo mwafwainwa kuba pa kuja, mukekase* mishipi, ne kuvwala makwabilo ku maulu enu saka mwalama tumama mu maboko enu; kabiji mwafwainwa kuja bukiji bukiji. Mambo kyo Kijiilo kya Lupitailo kya Yehoba. 12 Mambo amiwa nkapita mu kyalo kya Ijipita abwa bufuku ne kwipaya babeji bonse ba mu kyalo kya Ijipita, kutendekelatu ku bantu kufika ne ku banyama;+ kabiji nkonauna balesa bonse ba mu Ijipita.+ Amiwa yami Yehoba. 13 Mashi akekala ke kayukilo ka pa mazubo mo mukekala; kabiji nkamona mashi ne kwimupitayila, ne kinkunka kechi kikeya pe anweba ne kwimonauna kimye kyo nkepaya bena Ijipita ne.+

14 “‘Jino juba jikekala ja kwimuvululako anweba, kabiji mwafwainwa kwijivuluka kwikala kijiilo kwi Yehoba mu bisemi byenu byonse bikalondelapo. Jino ke jilamuna ja myaka ne myaka, kabiji mwafwainwa kwijilama. 15 Pa moba atanu na abiji mukaje shinkwa wabula mbizho.+ Kabiji pa juba jitanshi mukafumye muvuba muji mbizho mu mazubo enu mambo muntu yense ukaja kintu kiji na mbizho, kufuma pa juba jitanshi kufika ne ku juba ja butanu na bubiji, awo muntu* bakamuchibeko* ku bena Isalela. 16 Pa juba jitanshi mukekale na kushonkena kwazhila, kyo kimotu ne pa juba ja butanu na bubiji mukekale na kushonkena kwazhila. Mu ao moba, kechi mukengijilemo mwingilo ne.+ Kanatu kajo muntu* yense ko afwainwa kuja, ko ko mukanengezhangatu kwapwa.

17 “‘Mwafwainwa kulama Kijiilo kya Bashinkwa Babula Mbizho,+ mambo pa jino juba po po nkafumya mabumba* enu avula mu kyalo kya Ijipita. Kabiji mukavulukenga jino juba mu bisemi byenu byonse bikalondelapo kwikala jilamuna ja myaka ne myaka. 18 Mu ñondo mutanshi, pa juba ja bu 14 ja ñondo, mu kimye kya mabanga mukajenga shinkwa wabula mbizho kufikatu ne ku juba ja bu 21 mu uno ñondo, mabanga.+ 19 Pa moba atanu na abiji, kechi mukekale na muvuba muji mbizho ne, mambo muntu yense ukaja kintu kiji na mbizho, mwenyi nangwa mwina kyalo,+ awo muntu* ukachibiwako* ku jibumba ja bena Isalela.+ 20 Kechi mwafwainwa kuja kintu nangwa kimo kiji na mbizho ne. Mu mazubo enu onse mukajengatu shinkwa wabula mbizho.’”

21 Ponkapo Mosesa waichile bakulumpe ba mu bena Isalela+ ne kwibambila’mba: “Yainga mukasalulule baana ba banyama* mu bisemi byenu ne kwibepaya kwikala ke kitapisho kya Kijiilo kya Lupitailo. 22 Kepo mutumpike kisampulo kya kichi kya isopi mu mashi aji mu nsanyi ne kushinga mashi pa mapulanga aji peulu ya bibelo ne pa mashiki abiji a pa bibelo; kafwako muntu nangwa umo mwi anweba wafwainwa kulupuka mu nzubo yanji ne, kufikatu ne lukelo. 23 Kabiji Yehoba byo akapitanga na kwipaya bena Ijipita, ukamona mashi pa mapulanga aji peulu pa bibelo ne pa mashiki abiji a pa bibelo, kine Yehoba ukapitaila pa bibelo, kechi ukaswisha kinkunka kya lufu* kutwela mu mazubo enu ne.+

24 “Mukekivulukenga kino kintu kwikala jilamuna ja myaka ne myaka kwi anweba ne ku baana benu ba balume.+ 25 Kabiji byo mukekala mu kyalo Yehoba kyo akemupa byonkatu byo aamba, mukavulukenga kino kintu.+ 26 Kabiji umvwe baana benu ba balume bemwipuzha amba, ‘Nanchi kino kintu kyo mubena kuba kyatala muka?’+ 27 Mwafwainwa kwibakumbula’mba, ‘Kino ke kitapisho kya Kijiilo kya Lupitailo kya Yehoba wapitaijile mazubo a bena Isalela mu Ijipita kimye kyo aipayile bena Ijipita na kinkunka, bino kechi waipayile ba mu mazubo etu ne.’”

Kepo bantu bafukamine ne kulaala panshi kinkuvumene. 28 Onkao mambo, bena Isalela bayile ne kuba byonka Yehoba byo akambizhe Mosesa ne Alona.+ Baubiletu byonkabyo.

29 Pakachi ka bufuku, Yehoba waipayile babeji bonse ba mu kyalo kya Ijipita,+ kutendekelatu ku mubeji wa kwa Felo wajinga pa jitanda janji kufika ne ku mubeji wa kaili wajinga mu kaleya* ne babeji bonse ba banyama.+ 30 Felo waimene bufuku, ne bakalume banji bonse ne bena Ijipita bonse, kabiji mu bena Ijipita mwajinga mabingo mambo kafwako nzubo nangwa imo mwabujile kufwa muntu ne.+ 31 Ponkapo Felo waichile Mosesa ne Alona+ bufuku ne kwibambila’mba: “Imanai muyenga, fumai mu bantu bami, anweba ne bakwenu bena Isalela. Yainga mukengijile Yehoba byonka byo mwaambile.+ 32 Musende mikooko yenu ne bañombe benu byonka byo mwaambile.+ Pano bino, mwafwainwa ne kumpesha.”

33 Kabiji bena Ijipita batendekele kwambila bano bantu amba bafumemo bukiji+ mu kyalo, byo baambilenga’mba, “mambo atweba bonse tujitu nobe bantu bafwa!”+ 34 Onkao mambo, bantu basendele muvuba wabo saka akyangye kututumuka, kabiji basendele pa bipuzhi bipe byabo bya kukanjilamo* bunga saka bebikashila mu bisapi. 35 Bena Isalela baubile byonkatu bibabuujile Mosesa, kabiji balombele ku bena Ijipita bipe bya siliva ne bya ngolode ne bivwalo.+ 36 Kabiji Yehoba walengejile bena Ijipita kubila bibusa bena Isalela, kya kuba bebapele bintu byo balombele, onkao mambo, bapukwile bintu bya bena Ijipita.+

37 Kepo bena Isalela baimene lwendo kufuma ku Lamasesa+ ne kuya ku Sukota,+ bajinga banabalume nobe 600,000 baendelenga panshi kufumyako baana.+ 38 Kabiji jibumba*+ ja bantu bapusana pusana najo jayile nabo kuvwangakotu ne mikooko ne bañombe, kyajinga kipanyi kikatampe kya banyama. 39 Kabiji muvuba ye basendele kufuma ku Ijipita balengelemo bashinkwa babula mbizho. Uno shinkwa kechi wajinga na mbizho ne, mambo bebapangilemo bukiji mu Ijipita kya kuba bakankelwe ne kunengezha mpao yabo.+

40 Myaka yaikele bena Isalela+ mu Ijipita yajinga 430.+ 41 Ku mpelo ya myaka 430, pa jonkaja juba, mabumba* onse a bantu ba Yehoba afuminemo mu kyalo kya Ijipita. 42 Abuno bo bwajinga bufuku bo bavulukijilengamo juba Yehoba jo ebafumishe mu kyalo kya Ijipita. Buno bufuku bena Isalela bonse bo bakavulukilangamo Yehoba kufikatu ne ku bisemi byabo byonse bya kulutwe.+

43 Kepo Yehoba aambijile Mosesa ne Alona amba, “Jino jo jilamuna ja Kijiilo kya Lupitailo: Kafwako mwenyi ukajako ne.+ 44 Bino umvwe muntu uji na muzha wa mulume ye apotele na mali, mwafwainwa kumutwala ku mukanda.+ Umvwe mwauba kino, po po akonsha kujako. 45 Kabiji muntu wikalamotu nangwa wa mwingilo kechi wafwainwa kujako ne. 46 Mukajiile kino kijiilo mu nzubo imo. Kechi mwafwainwa kulupula musunyi wa nyama pangye ya nzubo ne, kabiji kechi mwafwainwa kuchimuna bikupa byayo ne.+ 47 Jibumba jonse ja bena Isalela jikekalenga na kino kijiilo. 48 Umvwe mwikala na mwenyi kabiji ubena kukeba kutanwako ku Kijiilo kya Lupitailo kya Yehoba, banabalume bonse bo aji nabo bafwainwa kuya ku mukanda. Umvwe wauba bino, po po afwainwa kujako, ne aye ukekala nobe mwina kyalo. Pakuba mwanamulume wabula kuya ku mukanda kechi akajeko ne.+ 49 Kukekala muzhilo umo ukengila ku mwina kyalo ne ku wafuma ku kyalo kingi ye mwikala nanji.”+

50 Byonkabyo, bena Isalela bonse baubile byonkatu Yehoba byo akambizhe Mosesa ne Alona. Baubile byonkabyo. 51 Pa jonkaja juba, Yehoba wafumishe bena Isalela ne mabumba* abo mu kyalo kya Ijipita.

13 Kabiji Yehoba waambijile Mosesa amba: 2 “Nzhijikile* babeji bonse ba balume* ba bena Isalela. Mwana wa mulume mutanshi ukasemwa ne nyama mulume mutanshi, bo bami.”+

3 Kepo Mosesa abuujile bantu amba: “Mukavulukenga jino juba jo mwafuma mu nzubo ya buzha mu Ijipita,+ mambo Yehoba wimufumya muno na kuboko kwanji kwa bulume.+ Onkao mambo, kechi mwafwainwa kuja kintu kiji na mbizho ne. 4 Pa juba ja lelo, mu ñondo wa Abibi,*+ jojo musakufumamo. 5 Yehoba byo akemutwala mu kyalo kya bena Kenana, bena Hiti, bena Amoli, bena Hivi ne bena Yebusi,+ kyo achipile amba ukekipana ku bashakulu benu,+ kyalo kyavula mukaka ne buki,+ mukajenga kino kijiilo mu yenka uno ñondo. 6 Mu moba atanu na abiji mukajenga shinkwa wabula mbizho,+ kabiji pa juba ja butanu na bubiji mukekalenga na kijiilo kya Yehoba. 7 Mukajenga shinkwa wabula mbizho pa moba atanu na abiji;+ kabiji kechi mwafwainwa kwikala na kintu kiji na mbizho ne,+ kabiji kechi mukekale na muvuba muji mbizho mu nyaunda* yenu yonse ne. 8 Kabiji pa joja juba, mukabuule mwanenu wa mulume amba, ‘Mbena kuba kino na mambo a kintu kyangubijile Yehoba kimye kyo nafumine mu Ijipita.’+ 9 Kabiji kino kijiilo kikekala nobe kayukilo kaji pa kuboko kwenu kabiji nobe kivuluko* kiji pa kilungi* kyenu,+ pa kuba’mba mukambenga pa mizhilo ya Yehoba, mambo Yehoba wimufumya mu Ijipita na kuboko kwanji kwa bulume. 10 Mukekalenga na kino kijiilo mu kimye kyakyo pa mwaka pa mwaka.+

11 “Yehoba byo akemutwala mu kyalo kya Kenana kyo achipile kwimupa anweba ne bashakulu benu,+ 12 mukapane kwi Yehoba mubeji yense wa mulume,* ne mubeji yense wa nyama mulume ye mukekala nanji. Baana ba balume ne banyama balume, bonse ba kwa Yehoba.+ 13 Mbongolo mubeji yense mukamupimpule na mukooko, umvwe mukabule kuba kino, mwafwainwa kumuchimuna nshingo. Kabiji baana benu ba balume babeji bonse mukebakuule.+

14 “Umvwe mwanenu akemushikishe’mba, ‘Nanchi kino kintu kyatala mu ka?’ mwafwainwa kumukumbula’mba, ‘Yehoba witufumishe mu Ijipita mu nzubo ya buzha na kuboko kwanji kwa bulume.+ 15 Felo byo akoseshe muchima wanji ne kwitukanya kuya,+ Yehoba waipayile babeji bonse ba mu kyalo kya Ijipita, kutatwila ku babeji ba bantu kufika ne ku babeji ba banyama.+ O ene mambo o mbena kutapishisha kwi Yehoba babeji ba banyama bonse balume,* kabiji nakuula baana bami ba balume bonse babeji.’ 16 Kabiji kino kikekala nobe kiyukilo kiji pa kuboko kwenu kabiji nobe kintu kyo mwakashila pa kilungi* kyenu,+ mambo Yehoba witufumishe mu Ijipita na kuboko kwanji kwa bulume.”

17 Felo byo alekele bantu amba baye, Lesa kechi wibatwajile mu jishinda jaya ku kyalo kya bena Filishitiya ne, nangwa kya kuba jo jajinga jipi. Mambo Lesa waambile’mba: “Umvwe bantu bakamone nkondo, bakakonsha kupimpula milanguluko yabo ne kubwela ku Ijipita.” 18 Onkao mambo, Lesa walengejile bano bantu kuzhoka kupichila mu kiselebwa kya ku Kalunga ka Mema Kachila.+ Bino bena Isalela byo bafuminenga mu kyalo kya Ijipita, baendelenga mu mabumba nobe mabumba a bashilikale. 19 Kabiji Mosesa wasendele ne bikupa bya kwa Yosefwa, mambo Yosefwa wachipishe baana ba kwa Isalela amba: “Kwa kubula nangwa kuzhinaukatu ne, Lesa ukemuvuluka, onkao mambo, mwafwainwa kusenda bikupa byami kwibifumya kuno.”+ 20 Ponkapo baimene lwendo kufuma ku Sukota ne kukatebelela ku Etama, kwapela kiselebwa.

21 Kabiji mu kimye kya mute, Yehoba watangilangako kulutwe yabo mu jikumbi jaimana mulumbulumbu ne kwibatangijila mu jishinda,+ ne mu kimye kya bufuku wibatangijilanga mu mujilo waimana mulumbulumbu na kwibamunyikila pa kuba’mba bendenga bulongo mute ne bufuku.+ 22 Mu kimye kya mute, jikumbi ja mulumbulumbu kechi jafumangapo pa bantu ne, kabiji mujilo waimana mulumbulumbu naye kechi wazhimanga bufuku ne.+

14 Yehoba waambijile Mosesa amba: 2 “Ambila bena Isalela baluluke ne kukatebelela ku Pi-hahilota pakachi ka Migidolo ne kalunga ka mema kwipi na Baela-zefona.+ Mukatebelele kwipi na kalunga ka mema saka mwikatala. 3 Kepo Felo usakwambila bena Isalela amba, ‘Babena kupitañanatu mu kyalo. Kabiji kechi baji na kwa kuya mu kiselebwa ne.’ 4 Nsakuswisha muchima wa kwa Felo kukosa+ ne aye usakwibapupila kabiji nsakwitumbijika pa kushinda Felo ne nzhita yanji yonse;+ kabiji bena Ijipita kine basakuyuka’mba yami Yehoba.”+ Ne abo baubiletu byonkabyo.

5 Kabiji mfumu wa Ijipita bamubuujile’mba bantu banyema. Ponkapo Felo ne bakalume banji bapimpwile milanguluko yabo pa bano bantu+ ne kwamba’mba: “Mambo ka o twaubila kino kintu ne kukasulula bena Isalela bazha betu?” 6 Onkao mambo, wanengezhezhe makalaki anji a nkondo ne kusenda bantu banji.+ 7 Wasajile makalaki 600 ne makalaki onse akwabo a mu Ijipita, kabiji pa kalaki umo umo pajinga bashilikale. 8 Byonkabyo, Yehoba waswishishe muchima wa kwa Felo mfumu wa Ijipita kukosa, ne aye wapupijile bena Isalela byo balupukilenga saka bachinchika.*+ 9 Bena Ijipita bapupijile bena Isalela,+ ne bambili ba kwa Felo bonse bakokelenga makalaki ne bantu banji benda pa bambili ne nzhita yanji yonse yafwenyenyenga kwipi kimye bena Isalela kyo batebelejile kwipi na kalunga ka mema ku Pi-hahilota, saka batala Baela-zefona.

10 Felo byo afwenyenye kwipi, bena Isalela bainwine bilungi byabo ne kumona bena Ijipita saka bebapupila. Bena Isalela baakaminwe ne kutendeka kujijila Yehoba.+ 11 Baambijile Mosesa amba: “Nanchi na mambo a kubula bilende mu Ijipita kyo kyo mwituletela kuno amba tufwile mu kiselebwa nyi?+ Mambo ka o mwitufumisha mu Ijipita? 12 Nanchi kechi twimubuujile byo twajinga mu Ijipita amba, ‘Tulekai twingijilenga bena Ijipita’ nenyi? Mambo kituwamina kwingijila bena Ijipita kukila kufwila muno mu kiselebwa.”+ 13 Kepo Mosesa aambijile bantu amba: “Kange mwakamwe ne.+ Imanaitu saka mwachinchika ne kumona Yehoba byo asakwimupulusha lelo jino.+ Mambo bena Ijipita bo mubena kumona lelo jino, kine kechi mukebamonapo jibiji ne.+ 14 Yehoba mwine usakwimulwilako,+ kabiji anweba musakuzhindamatu nzoo.”

15 Kepo Yehoba aambijile Mosesa amba: “Mambo ka o ubena kunjijila? Ambila bena Isalela amba bayenga kulutwe. 16 Pakuba obewa ushikule kamama kobe ne kutanyika kuboko kobe pa kalunga ka mema ne kwikabanya pa kuba’mba bena Isalela bapite pakachi ka kalunga ka mema pa mushiji wauma. 17 Bino amiwa nsakuswisha michima ya bena Ijipita kukosa, pa kuba’mba bapupile bena Isalela; onkao mambo nsakwitumbijika pa kushinda Felo, nzhita yanji yonse, makalaki anji a nkondo ne bantu banji benda pa bambili.+ 18 Kabiji bena Ijipita kine basakuyuka’mba yami Yehoba byo nsakwitumbijika pa kushinda Felo, makalaki anji a nkondo ne bantu banji benda pa bambili.”+

19 Kepo malaika wa Lesa+ wa kine watangijilenga jibumba ja bena Isalela kulutwe, afumineko ne kuya kunyuma yabo, kabiji jikumbi jaimene mulumbulumbu jajinga kulutwe yabo, jayile kunyuma ne kwimana kunyuma yabo.+ 20 Byonkabyo, jaimene pakachi ka nzhita ya bena Ijipita ne jibumba ja bena Isalela.+ Ku lubaji lumo lwa jikumbi kwajinga mfishi. Pa kuba ku lubaji lukwabo jasamishe kyeya bufuku.+ Onkao mambo, jibumba jimo kechi jafwenyenye kwipi na jibumba jikwabo bufuku bonse ne.

21 Mosesa watanyikile kuboko kwanji pa kalunga ka mema;+ kabiji Yehoba waletele mwela wakosa wa ku musela bufuku bonse ne kwalula kalunga ka mema ke mushiji wauma,+ ne mema aabenepo.+ 22 Onkao mambo, bena Isalela bapichile pakachi ka kalunga ka mema pa mushiji wauma,+ mema saka aimana ku kilujo kyabo ne ku kipiko kyabo.+ 23 Kabiji bena Ijipita bapupijilenga bena Isalela ne bambili bonse ba kwa Felo, makalaki anji a nkondo ne bantu banji benda pa bambili kufika pa kalunga ka mema.+ 24 Ku makya,* Yehoba watajile nzhita ya bena Ijipita saka aji mu jikumbi+ ne mu mujilo waimene mulumbulumbu ne kuvulañanya nzhita ya bena Ijipita. 25 Wazokawilenga bitanga bya ku makalaki abo kuba’mba bakankalwe kwendesha, ne bena Ijipita baambilenga’mba: “Twayai tunyeme tufume ku bena Isalela, mambo Yehoba ubena kwibalwilako na bena Ijipita.”+

26 Kepo Yehoba aambijile Mosesa amba: “Tanyika kuboko kobe pa kalunga ka mema kuba’mba mema abwele pa bena Ijipita, pa makalaki abo a nkondo ne pa bantu babo benda pa bambili.” 27 Ponkapo Mosesa watanyikile kuboko kwanji pa kalunga ka mema, kabiji byo bwayilenga na kukya, kalunga ka mema kabwelele byonka byo kajinga kala. Kabiji bena Ijipita byo banyemenenga amba bafumemo, Yehoba wibalobeshe bena Ijipita mu kalunga ka mema.+ 28 Mema abwelele ne kulobesha makalaki abo a nkondo, bantu benda pa bambili ne nzhita yonse ya kwa Felo ibapupijilenga pa kalunga ka mema.+ Kafwako nangwa umo wapulukile ne.+

29 Bino bena Isalela baendele pa mushiji wauma pakachi ka kalunga ka mema,+ kabiji mema ejingile ku kilujo kyabo ne ku kipiko kyabo.+ 30 Byonkabyo, pa joja juba Yehoba wapulwishe bena Isalela ku maboko a bena Ijipita,+ kabiji bena Isalela byo bajinga ku kitulu kya kalunga ka mema, bamwene bena Ijipita byo bafwilenga. 31 Kabiji bena Isalela bamwene ne bulume* bukatampe bwa Yehoba bo aingijishe pa bena Ijipita, ne bantu batendekele kwakamwa Yehoba ne kwitabila mwi Yehoba ne mwi Mosesa kalume wanji.+

15 Pa kyonkakya kimye, Mosesa ne bena Isalela baimbile uno lwimbo wa kutota Yehoba amba:+

“Namwimbile Yehoba, mambo aye watumbalala bingi.+

Mbili ne wendapo bebataya mu kalunga ka mema.+

 2 Yehoba bo bulume bwami kabiji yo ngovu yami, mambo lo lupulukilo lwami.+

Uno ye Lesa wami kabiji nkamutotanga;+ Lesa wa batata,+ kabiji nkamutumbijikanga.+

 3 Yehoba ye wa bulume mu nkondo.+ Yehoba jo jizhina+ janji.

 5 Mpoota ya mema ibebizha; baibijile mwine mwazhika nobe jibwe.+

 9 Mulwanyi waambile’mba: ‘Nsakwibapupila! Kabiji nsakwibataana!

Nsakwabanya bipukulwa kufikatu ne byo nsakutondwa!*

Nsakusomona mpoko yami! Kuboko kwami kusakwibonauna!’+

11 Ñanyi mu balesa waesakana ne anweba Yehoba?+

Ñanyi uji nobe anweba, mumwesha bulume mu buzhile bwenu?+

Anweba bo bafwainwa kwakamwa na nyimbo ya kutota, anweba muba bya kukumya.+

12 Mwatanyikile kuboko kwenu kwa kilujo kabiji ntanda ibamiine.+

Bangikazhi bonse ba mu Kenana bakazumba.+

16 Moyo ne kwakamwa bikebafikila.+

18 Yehoba ukekala mfumu myaka ne myaka.+

20 Kepo Milyama ngauzhi wa mukazhi nyenga ya kwa Alona atolele munsakayi, kabiji banabakazhi bonse bamulondejile na minsakayi saka bazha. 21 Kabiji Milyama wawelejile pamo na banabalume amba:

“Mwimbilai Yehoba, mambo aye watumbalala bingi.+

Mbili ne wendapo bebataya mu kalunga ka mema.”+

22 Byonkabyo, Mosesa wafumishe bena Isalela ku Kalunga ka Mema Kachila, ne kuya mu kiselebwa kya Shula kabiji baendele mu kiselebwa pa moba asatu, bino kechi bataaine mema ne. 23 Bafikile ku Mala,*+ bino kechi bakonsheshe kutoma mema a ku Mala ne, mambo alujile. O ene mambo o atumbijile yoya mpunzha amba Mala. 24 Onkao mambo, bantu batendekele kunyinyita Mosesa+ amba: “Pano tusakutoma ka?” 25 Kepo ajijile kwi Yehoba,+ ne Yehoba wamumwesheshe kakichi. Byo ekatayile mu mema, mema atobele.

Konka kuno Lesa koko ebapelejile jilamuna ne muzhilo, kabiji konka kuno koko ebesekejile.+ 26 Waambile’mba: “Umvwe kine mukomvwine jiwi jami amiwa Yehoba Lesa wenu ne kuba byaoloka ku meso ami ne kuta muchima ku mikambizho yami ne kulama malamuna ami onse,+ kechi nkemuletela myalo yo naletejilepo bena Ijipita+ ne, mambo amiwa Yehoba, yami mbena kwimubuka.”+

27 Kepo bayile ku Elimu kwajinga masulo a mema 12 ne bisonga 70. Onkao mambo, batebelejile konkakwa kwipi na mema.

16 Byo bafumineko ku Elimu, jibumba jonse ja bena Isalela jafikile mu kiselebwa kya Shina,+ kiji pakachi ka Elimu ne Sinai, pa juba ja bu 15 mu ñondo wa bubiji kufuma kimye kyo bafumine mu kyalo kya Ijipita.

2 Jibumba jonse ja bena Isalela jatendekele kwibanyinyita ba Mosesa ne Alona monka mu kiselebwa.+ 3 Bena Isalela bebambijilenga amba: “Nanchi inge twafwiletu ku kuboko kwa Yehoba mu kyalo kya Ijipita mo twajanga nyama ne kuja kajo ne kwikuta.+ Pano akitalai, mwituleta muno mu kiselebwa kuba’mba kipwilo kyonse kifwe na kipowe kya nzala.”+

4 Kepo Yehoba aambijile Mosesa amba: “Nsakwimunokeshesha kajo kufuma mwiulu,+ kabiji muntu yense wafwainwa kuya na kuwola kajo ka pa juba pa juba,+ kuba’mba nebeseke kana bakonsha kulondela muzhilo wami nangwa ne.+ 5 Bino pa juba ja butanu na bumo,+ inge banengezha kajo ko bakawola, bafwainwa kuwolelapo kajo kakwabo kwesakana na ko bawola pa juba pa juba.”+

6 Onkao mambo, Mosesa ne Alona baambijile bena Isalela bonse amba: “Mabanga kine musakuyuka’mba Yehoba ye wimufumishe mu kyalo kya Ijipita.+ 7 Lukelo mukamona lukumo lwa Yehoba, mambo Yehoba waumvwa kunyinyita ko mubena kumunyinyita. Atweba yetu bañanyi kya kuba’mba mwitunyinyitenga?” 8 Kabiji Mosesa wanungilepo amba: “Yehoba byo akemupa nyama ya kuja mabanga ne lukelo, byo akemupa kajo ne anweba mwaikuta, po po mukayuka’mba Yehoba waumvwa kunyinyita ko mubena kumunyinyita. Nanchi atweba yetu bañanyi? Mubena kunyinyita Yehoba, kechi atweba ne.”+

9 Kepo Mosesa aambijile Alona amba: “Buula jibumba jonse ja bena Isalela amba, ‘Iyai kwipi kwi Yehoba, mambo waumvwa kunyinyita kwenu.’”+ 10 Alona byo apwishishetu kwamba ku jibumba jonse ja bena Isalela, baalulukile ne kutala ku kiselebwa, kabiji lukumo lwa Yehoba lwamwekele mu jikumbi.+

11 Kabiji Yehoba waambijile Mosesa amba: 12 “Naumvwa kunyinyita kwa bena Isalela.+ Babuule’mba, ‘Na kimye kya muntuwa muntuwa,* musakuja nyama kabiji lukelo mukaja kajo ne kwikuta,+ kabiji kine mukayuka’mba yami Yehoba Lesa wenu.’”+

13 Onkao mambo, mabanga bitentu byaishile ne kukumbana monse mu kampu,+ kabiji lukelo kime kyazhokolokele kampu yense. 14 Kime byo kyapwile, pa mushiji wa mu kiselebwa pashajile kintu kyawama kyapelapela,+ kyamwekelenga nobe mabebe pa mushiji. 15 Bena Isalela byo bamwene kino, beshikishenga bene na bene amba, “Nanchi bi ka bye?” mambo kechi bekiyukile ne. Mosesa wibabuujile’mba: “Kano ko kajo Yehoba ko emupa ka kuja.+ 16 Abino byo byakambizha Yehoba amba, ‘Muntu yense wafwainwa kuwola kajo ko afwainwa kuja. Mwafwainwa kuwola kipimo kya omela*+ kimo pa muntu pa muntu monka mwayila kuvula kwa bantu* bo muji nabo mu tente wenu.’” 17 Bena Isalela batatwile kuba byonkabyo; bawolelenga kajo, bamo bawolelenga kavula, bakwabo nabo bawolelenga kacheche. 18 Byo bekapiminenga na kipimo kya omela, awa wawolele kavula kechi kasubukilepo ne, ne yewa wawolele kacheche kechi kakepele ne.+ Bonse pa muntu pa muntu bawolele kajo kwesakana na ko bakonsheshe kuja.

19 Kabiji Mosesa wibambijile’mba: “Kafwako wafwainwa kushapo kajo kufika lukelo ne.”+ 20 Bino Mosesa kechi bamumvwijile ne. Bantu bamo byo bashilepo kajo kufika lukelo, kajo kaikele na mapila kabiji kanunkilenga, ne Mosesa wibazhingijile. 21 Pa juba pa juba lukelo, muntu yense wawolelenga kajo kwesakana na ko akonsheshe kuja. Juba byo jaubishenga kyuya, kasungulukilenga.

22 Pa juba ja butanu na bumo, bawolele kajo ka moba abiji,+ bipimo bya omela bibiji pa muntu pa muntu. Byonkabyo, bantangi bonse ba jibumba baishile na kubuula Mosesa kino. 23 Kepo ebambijile’mba: “Yehoba byo byo aambile. Kesha kukekala kukokoloka,* ke juba ja sabado jazhila kwi Yehoba.+ Oshai kajo ko mwakonsha kosha ne kuteeka ko mwakonsha kuteeka;+ kepo mushepo ko mwakonsha kusha ne kwikalama kufika lukelo.” 24 Onkao mambo, bashilepo kufika lukelo, monka mo ebakambizhizhe Mosesa, kabiji kajo kechi kanunkile nangwa kwikala na mapila ne. 25 Kepo Mosesa aambile’mba: “Kajai lelo, mambo lelo juba ja sabado kwi Yehoba. Lelo kechi musakwikataana pa mushiji ne. 26 Mukekawole pa moba atanu na jimo, bino pa juba ja butanu na bubiji, jo ja Sabado,+ kechi kakekalako ne.” 27 Nangwa byonkabyo, bantu bamo bayile amba tukawole pa juba ja butanu na bubiji, bino kechi bekataaine ne.

28 Onkao mambo, Yehoba washikishe Mosesa amba: “Nanchi bimye binga byo mukakananga kulama mikambizho yami ne mizhilo yami?+ 29 Yukai’mba Yehoba wimupa Sabado.+ O ene mambo o abena kwimupela kajo ka moba abiji pa juba ja butanu na bumo. Muntu yense wafwainwa kwikala ponka po aji; kafwako wafwainwa kufuma pa mpunzha yanji pa juba ja butanu na bubiji ne.” 30 Onkao mambo, bantu baikelenga na Sabado* pa juba ja butanu na bubiji.+

31 Bena Isalela batumbile kano kajo amba “manna.”* Ajinga atoka nobe ntetele itoka yakepa, kabiji pa kwiaja atobele nobe shinkwa wapapakana ye babikako buki.+ 32 Kepo Mosesa aambile’mba: “Abino byo byakambizha Yehoba amba, ‘Yuzhai kipimo kya omela ne kwikilama mu bisemi byenu byonse+ pa kuba’mba bakamone amba kano ko kajo ko nemupele ka kuja mu kiselebwa kimye kyo nemufumishe mu kyalo kya Ijipita.’” 33 Onkao mambo, Mosesa waambijile Alona amba: “Shikula kapuki ne kubikamo kipimo kya omela kya manna ne kwiatula kwi Yehoba amba bakealame kufikatu ne ku bisemi byenu byonse.”+ 34 Byonkatu Yehoba byo akambizhe Mosesa, Alona wiabikile mu Jikwachi ja Lushimuno,+ kuba’mba bealame. 35 Bena Isalela bajiilenga manna pa myaka 40,+ posotu ne byo bafikile mu kyalo mwaikelenga bantu.+ Bajiilenga manna kufikatu ne byo bafikile ku mupaka wa kyalo kya Kenana.+ 36 Kipimo kya omela kitwelamo jikumi mu kipimo kya efa.*

17 Jibumba jonse ja bena Isalela jafumine mu kiselebwa kya Shina+ saka benda mateko mateko monka mwibakambizhizhe Yehoba,+ kabiji batebelejile ku Lefidimu.+ Pano bino, kechi kwajinga mema a kutoma bantu ne.

2 Onkao mambo, bantu batendekele kumutobosha Mosesa+ ne kumwambila’mba: “Tupe mema tutome.” Bino Mosesa wibambijile’mba: “Mambo ka o mubena kuntobwesha? Mambo ka o mwesekela Yehoba?”+ 3 Bino bantu bafwile bingi kilaka, kabiji bamunyinyichilenga Mosesa+ ne kumwambila’mba: “Mambo ka o witufumisha mu Ijipita ne kwitwipaya atweba ne baana betu ba balume ne banyama betu na kilaka?” 4 Ponkapo Mosesa wajijiile Yehoba ne kwamba’mba: “Nanchi nsakuba byepi na bano bantu? Katatakatu bangase mabwe!”

5 Kepo Yehoba aambijile Mosesa amba: “Pichila kulutwe ya bantu, usendepo bakulumpe bamo ba bena Isalela ne kamama ko wapumine pa Mukola wa Nile.+ Wikasende mu kuboko kobe uyenga. 6 Amiwa nsakwimana kulutwe yobe pa jibwe ku Holeba. Kabiji wafwainwa kupuma kamama pa jibwe ne mema asakupokomoka ne bantu basakutoma mema.”+ Mosesa waubile kino, bakulumpe ba bena Isalela saka bamonako. 7 Onkao mambo, watumbile yoya mpunzha amba Masa*+ ne Meliba,*+ na mambo a kutoboka na bena Isalela ne na mambo a kuba bamwesekele+ Yehoba byo baambile’mba: “Nanchi Yehoba uji mukachi ketu nyi, inyi ufwamo?”

8 Kabiji bena Amaleki+ baishile na kulwa na bena Isalela ku Lefidimu.+ 9 Ponkapo Mosesa waambijile Yoshua+ amba: “Salapo banabalume ba kuya na kulwa na bena Amaleki. Kesha amiwa nkemana peulu ya mutumba na kamama ka Lesa wa kine mu kuboko kwami.” 10 Kepo Yoshua aubile byonka byamubuujile Mosesa,+ kabiji walwile na bena Amaleki. Kabiji Mosesa, Alona ne Hula+ bakanjijile peulu ya mutumba.

11 Mosesa byo asuntwilenga maboko anji mwiulu, bena Isalela bakoselenga, bino umvwe waponesha maboko anji panshi, bena Amaleki bakoselenga. 12 Maboko a kwa Mosesa byo akookele, bashikwile jibwe kuba’mba ekalepo kabiji waikele ponka. Kepo Alona ne Hula bakwachijile maboko anji, awe ku lubaji lumo ne mukwabo ku lubaji lukwabo, kya kuba maboko anji akosele kufikatu ne juba byo jazhikile. 13 Byonkabyo, Yoshua washinjile Amaleki ne bantu banji na mpoko.+

14 Kepo Yehoba aambijile Mosesa amba: “Nemba kino mu buku kikekale kivuluko* kabiji umubuule Yoshua amba, ‘Nkavizha bena Amaleki pano pa ntanda kabiji kechi bakebavulukapo jibiji ne.’”+ 15 Kabiji Mosesa washimikile kya kusokelapo bitapisho ne kwikitumba’mba Yehoba kyo kiyukilo kya lupulukilo lwami,* 16 ne kwamba’mba: “Mambo bantu baimena jitanda ja kwa Yehoba,+ kabiji Yehoba ukalwanga na Amaleki myaka ne myaka.”+

18 Yefelo ñanga wa ku Mijanyi muko wa kwa Mosesa,+ waumvwine bintu byonse Lesa byo aubijile Mosesa ne bantu banji bena Isalela ne kumvwa Yehoba byo alupwile bena Isalela mu kyalo kya Ijipita.+ 2 Yefelo muko wa kwa Mosesa wasendele Zipola muka Mosesa ye babwezhezhe kwi aye, 3 pamo na baana banji ba balume babiji.+ Umo bamutumbile amba Geleshoma,*+ mambo Mosesa waambile’mba, “Naikala bwenyi mu kyalo kingi,” 4 ne mukwabo bamutumbile amba Elieza,* mambo waambile’mba, “Lesa wa batata ye nkwasho wami, wampokolwele ku mpoko ya kwa Felo.”+

5 Kabiji Yefelo muko wa kwa Mosesa, waishile pamo na baana ba kwa Mosesa babiji ne mukazhanji, baishile kwi Mosesa mu kiselebwa ko baikele ku mutumba wa Lesa wa kine.+ 6 Kepo Yefelo atumine jiwi kwi Mosesa amba: “Amiwa Yefelo muko wenu,+ mbena kwiya kwi anweba pamo na mwinakwenu ne baana benu ba balume babiji.” 7 Ponkapo Mosesa wayile na kutundaila muko wanji kabiji wafukamine panshi ne kumufyompa. Bonse beimwine ne kutwela mu tente.

8 Mosesa wabuujile muko wanji bintu byonse byaubile Yehoba kwi Felo ne ku bena Ijipita na mambo a bena Isalela,+ ne makatazho onse o bapichilemo byo bajinga pa lwendo+ ne Yehoba byo ebapokolwele. 9 Yefelo wasekejile na mambo a bintu byonse byawama Yehoba byo aubijile bena Isalela pa kwibapokolola mu Ijipita.* 10 Kepo Yefelo aambile’mba: “Atotwe Yehoba wimupokolwele mu Ijipita ne kwi Felo, aye wapokolwele bano bantu ku bena Ijipita. 11 Pano nayuka namba Yehoba wakila balesa bonse ba bubela,+ na mambo a kintu kyo aubile ku boba bakatezhenga bantu banji.” 12 Kepo Yefelo muko wa kwa Mosesa apaine mulambo wa kusoka ne bitapisho kwi Lesa, kabiji Alona ne bonse bakulumpe ba bena Isalela baishile na kujiila pamo kajo na muko wa kwa Mosesa kwi Lesa wa kine.

13 Kabiji pa juba jalondejilepo, Mosesa waikele panshi byonka byo akelwanga kuba na kuchibila bantu mambo, ne bantu baishilenga kwi Mosesa kufuma lukelo kufika ne mabanga. 14 Muko wa kwa Mosesa byo amwene bintu byonse Mosesa byo aubijilenga bantu, wamushikishe’mba: “Nanchi mubena kuba ka na bano bantu? Mambo ka o mwaikela bunke na bano bantu bonse saka baimana kwi anweba kufuma lukelo kufika ne mabanga?” 15 Mosesa wakumbwile muko wanji amba: “Mambo bantu beya kwi amiwa kuba’mba nebepwizhengako kwi Lesa. 16 Umvwe kwaikala mambo, bealeta kwi amiwa ne amiwa nafwainwa kwibachibila mambo abo bonse babiji, ne kwibabuula bintu byafuukulapo Lesa wa kine ne mizhilo yanji.”+

17 Muko wa kwa Mosesa wamwambijile’mba: “Kintu kyo mubena kuba kechi kyawama ne. 18 Kine mukakooka, anweba ne bano bantu bo muji nabo, mambo uno mwingilo wakosa bingi kabiji kechi mwakonsha kumwingila bunke bwenu ne. 19 Pano umvwai. Amiwa nsakwimubuulako bya kuba, kabiji Lesa usakwikala ne anweba.+ Anweba mwikale bakwimenako bantu kwi Lesa wa kine,+ kabiji mwafwainwa kutwala mambo kwi Lesa wa kine.+ 20 Mwafwainwa kwibabuula malamuna ne mizhilo byo iji,+ ne kwibabuula jishinda jo bafwainwa kuyamo ne mwingilo ye bafwainwa kwingila. 21 Onkao mambo, salai mu bantu banabalume bafikilamo+ bakamwa Lesa, ba kishinka kabiji bashikwa nsubu ya kumwena mu bujimbijimbi,+ kabiji mwafwainwa kutongola bano bantu kwikala bantangi ba pa biumbi, bantangi ba pa bitota ne bantangi ba pa makumi atanu ne bantangi ba pa makumi.+ 22 Bakachibilenga bantu mambo,* kabiji mambo akatazha bakealetenga kwi anweba,+ pakuba mambo onse acheche bakeachibenga abo bene. Ipezhezhaiko mingilo kupichila mu kwibapapo mingilo.+ 23 Umvwe mube kino, ne Lesa emwitabizhe, ko kuba’mba mukepezhezhako mingilo kabiji bantu bonse bakayanga ku mazubo abo na lusekelo.”

24 Ponkapo Mosesa walondejile byamubuujile muko wanji, kabiji waubile bintu byonse byo aambile. 25 Mosesa wasajile banabalume bafikilamo kufuma mu bena Isalela bonse ne kwibatongola kwikala bakulumpe ba pa bantu, bakulumpe ba pa biumbi, bakulumpe ba pa bitota, bakulumpe ba pa makumi atanu ne bakulumpe ba pa makumi. 26 Onkao mambo, bachibijilenga bantu mambo. Mambo akatazha bealetelenga kwi Mosesa,+ pakuba mambo onse acheche beachibilenga abo bene. 27 Byo apwishishe kuba bino, Mosesa washinjikinyeko muko wanji+ wabwelelenga ku kyalo kyanji.

19 Mu ñondo wa busatu kufuma kimye bena Isalela kyo bafumine mu kyalo kya Ijipita, pa jonkaja juba, bafikile mu kiselebwa kya Sinai. 2 Bafumineko ku Lefidimu+ ne kuya ku kiselebwa kya Sinai ne kutebelela mu kiselebwa. Kabiji bena Isalela bapopele matente konkakwa saka batalañana na mutumba.+

3 Kepo Mosesa ayile kwi Lesa wa kine, kabiji Yehoba wamwambijile kufuma mu mutumba+ amba: “Abino byo byo usakubuula ba mu nzubo ya kwa Yakoba kabiji wambile bena Isalela amba, 4 ‘Mwimwena anwe bene bintu byo naubile ku bena Ijipita+ pa kuba’mba nemusende pa byapi bya mpungu ne kwimuleta ko nji.+ 5 Onkao mambo, umvwe mukakookele jiwi jami ne kulama lulayañano lwami, kine mukekala kya bunonshi* bwami kyo nkasalapo mu bisaka bya bantu bonse,+ mambo ntanda yonse yo yami.+ 6 Mukekala kwi amiwa ke bufumu bwa bañanga kabiji kisaka kyazhila.’+ Bino byambo byo byo usakubuula bena Isalela.”

7 Onkao mambo, Mosesa wayile ne kwita bakulumpe ba pa bantu ne kwibabuula bino byambo byonse Yehoba byo amukambizhe.+ 8 Byo apwishishe kuba kino bantu bonse bakumbwile’mba: “Byonse byaamba Yehoba twaswa kwibyuba.”+ Ponkapo Mosesa wabwelele na kubuula Yehoba byaambile bantu. 9 Kabiji Yehoba waambijile Mosesa amba: “Nkeya kwi obewa mu jikumbi jafinda kuba’mba bantu bakomvwe byo nkambanga ne obewa, pa kuba’mba ne obewa bakakumvwinenga.” Kepo Mosesa abuujile Yehoba byambo byaambile bantu.

10 Kabiji Yehoba waambijile Mosesa amba: “Yanga ku bantu wibazhijike lelo ne kesha, kabiji bafwainwa kuchapa bivwalo byabo. 11 Kabiji bafwainwa kwinengezha kupembelela juba ja busatu, mambo pa juba ja busatu Yehoba ukekila pa Mutumba wa Sinai ku bantu bonse. 12 Wafwainwa kubika mipaka ku bantu kuzhokoloka mutumba yense, ne kwibabuula’mba, ‘Kechi mwafwainwa kuya ku mutumba nangwa kufika ku mupaka wanji ne. Mambo muntu yense ukakwata ku mutumba, kine ukafwa. 13 Kafwako wafwainwa kukwata yewo muntu ne, bino bakamwase mabwe nangwa kilwilo.* Inge nyama nangwa muntu, wafwainwa kufwa.’+ Bino bakonsha kwiya ku mutumba umvwe baumvwa lusengo wa mukooko+ mulume wavuma.”

14 Kepo Mosesa akunkulukile kufuma ku mutumba ne kwiya ku bantu kabiji watendekele kwibazhijika, ne abo bachapile bivwalo byabo.+ 15 Mosesa wabuujile bantu amba: “Inengezhai ne kupembelela juba ja busatu. Kabiji kechi mwafwainwa kulaala* na bakazhi benu ne.”

16 Lukelo pa juba ja busatu, kwajinga kutatauka kwa mvula ne kubesha, kabiji kwajinga jikumbi jafinda+ pa mutumba ne kuvuma kukatampe kwa lusengo, ne bantu bonse bajinga mu kampu batendekele kuzakama.+ 17 Kepo Mosesa alupwile bantu mu kampu kuba’mba bamonañane ne Lesa wa kine, ne abo baimene munshi ya mutumba. 18 Mutumba wa Sinai yense wafutumukilenga bwishi, mambo Yehoba waishijile mu mujilo pa mutumba;+ ne bwishi bwajinga nobe bwishi bwa mu kibili ne mutumba yense wajikiminenga bingi.+ 19 Kuvuma kwa lusengo byo kwakijilemo, Mosesa waambile kabiji Lesa wa kine wamukumbwile.

20 Onkao mambo, Yehoba waikijile peulu ya Mutumba wa Sinai. Kepo Yehoba aichile Mosesa peulu ya mutumba, ne aye wakanjijile.+ 21 Ponkapo Yehoba waambijile Mosesa amba: “Kunkuluka ukebajimune bantu amba kechi bafwainwa kwikanjikizha amba beye na kumona Yehoba ne, inge bauba bino, bavula basakufwa. 22 Kabiji bañanga beya kwi amiwa Yehoba kimye kyonse bezhijike kuba’mba amiwa Yehoba mbule kwibakambula.”*+ 23 Kepo Mosesa aambijile Yehoba amba: “Bantu kechi bakonsha kwiya ku Mutumba wa Sinai ne, mambo mwitujimwijile jimo amba, ‘Bika mipaka kuzhokoloka mutumba ne kumuzhijika.’”+ 24 Nangwa byonkabyo, Yehoba wamwambijile’mba: “Kunkuluka, yanga kabiji ubwele kuno, obewa pamo ne Alona, bino kange uleke bañanga ne bantu bekanjikizhe’mba beye kwi amiwa Yehoba ne, pa kuba’mba mbule kwibakambula.”+ 25 Onkao mambo, Mosesa wakunkulukile kuya ku bantu ne kwibabuula.

20 Kepo Lesa aambile bino byambo byonse amba:+

2 “Amiwa yami Yehoba Lesa wenu, yenka wimufumishe mu kyalo kya Ijipita mu nzubo ya buzha.+ 3 Kechi mwafwainwa kwikala na balesa bakwabo kununga pe amiwa ne.*+

4 “Kechi mwafwainwa kwilengela kipashañano kya kusonga, nangwa kintu kyapasha kintu kiji mwiulu, nangwa kiji pano pa ntanda nangwa kiji mu mema ne.+ 5 Kechi mwafwainwa kwibilambila nangwa kwibingijila ne,+ mambo amiwa, Yehoba Lesa wenu, yami Lesa ukeba bantu kuñingijilatu bunke bwami,+ kabiji na mambo a bubi bwa bashabo, nkabisha baana, bankana ne bankanununa ba boba banshikwa, 6 bino mmwesha butemwe bubula kwaluka kufika ne ku bisemi biumbi bya boba bantemwa ne kulama mikambizho yami.+

7 “Kechi mwafwainwa kwingijisha jizhina ja Yehoba Lesa wenu mu jishinda jabula kufwainwa ne,+ mambo amiwa Yehoba nkakabisha yense wingijisha jizhina jami mu jishinda jabula kufwainwa.+

8 “Saka muvuluka amba juba ja Sabado jazhila.+ 9 Mukengilenga mingilo yenu yonse mu moba atanu na jimo,+ 10 bino juba ja butanu na bubiji jo ja sabado kwi Yehoba Lesa wenu. Kechi mwafwainwa kwingila mwingilo nangwa umo, anweba, mwanenu wa mulume nangwa wa mukazhi, muzha wenu wa mulume nangwa wa mukazhi, nyama wenu wa kulela nangwa muntu wafuma ku kyalo kingi wikala mu mizhi* yenu ne.+ 11 Mambo mu moba atanu na jimo, Yehoba mo mo alengele jiulu ne ntanda, kalunga ka mema ne byonse bijimo, kabiji pa juba ja butanu na bubiji watendekele kukokoloka.+ O ene mambo Yehoba o apesheshe juba ja Sabado ne kwijizhijika.

12 “Nemeka bashobe ne bainobe,+ pa kuba’mba ukekale moba avula mu kyalo kyo abena kukupa Yehoba Lesa wobe.+

13 “Kechi wafwainwa kwipayañana ne.+

14 “Kechi wafwainwa kuba bukende ne.+

15 “Kechi wafwainwa kwiba ne.+

16 “Kechi wafwainwa kwikala kamonyi wa bubela ne kushiina mukwenu ne.+

17 “Kechi wafwainwa kukumbwa nzubo ya mukwenu ne. Kechi wafwainwa kukumbwa muka mukwenu,+ nangwa wa mwingilo wanji wa mulume, nangwa wa mwingilo wanji wa mukazhi, nangwa ñombe wanji mulume, nangwa mbongolo wanji, nangwatu kintu kyonse kya mukwenu ne.”+

18 Bantu bonse baumvwinenga kutatauka kwa mvula, kuvuma kwa lusengo ne kumona kubesha ne mutumba saka afutumuka bwishi; kabiji kino kibalengejile kuzakama bingi ne kwimana palepa byobya.+ 19 Onkao mambo, baambijile Mosesa amba: “Anweba mwambenga ne atweba, ne atweba tusakwimutelekanga, bino kange muleke Lesa ambenga ne atweba ne, kuchina’mba twakafwa.”+ 20 Byonkabyo, Mosesa wabuujile bantu amba: “Kange muchine ne, mambo Lesa wa kine waiya na kwimweseka pa kuba’mba mutwajijile kumwakamwa,+ kuchina’mba mwakalenga mambo.”+ 21 Byonkabyo, bantu baubiletu monka baimena palepa byobya, bino Mosesa wafwenyenye kwipi na jikumbi jafinda mwajinga Lesa wa kine.+

22 Kepo Yehoba aambijile Mosesa amba: “Abino byo byo usakubuula bena Isalela amba, ‘Mwimwena anwe bene amba nesamba ne anweba kufuma mwiulu.+ 23 Kechi mwafwainwa kulenga balesa ba siliva kununga pe amiwa ne, kabiji kechi mwafwainwa kwilengela balesa ba ngolode ne.+ 24 Mwafwainwa kundengela kya kusokelapo bitapisho kya maloba, kabiji mukatapishishengapo bitapisho byenu bya kusoka, bitapisho byenu bya mutende,* bya mikooko ne bya bañombe benu. Mu mapunzha onse o nkasala a kuvulukilamo jizhina jami,+ nkeya ko muji ne kwimupesha. 25 Umvwe mwandengela kya kusokelapo bitapisho kya mabwe, kechi mwafwainwa kwikishimika na mabwe o bachiba na bingijisho* ne.+ Mambo umvwe mukengijishe chezulu, mukekizhilulula. 26 Kabiji kechi mwafwainwa kukanjila pa kya kusokelapo bitapisho kyami na kya kukanjijilapo ne, kuchina’mba binungwa* byenu bya lusemo byakamweka.’

21 “Ino yo mizhilo yo wafwainwa kwibabuula:+

2 “Umvwe wapota muzha Muhebelu,+ wafwainwa kwikala muzha wobe myaka itanu na umo, bino mu mwaka wa butanu na bubiji, wafwainwa kumukasulula kwa kubula kukufweta kintu nangwa kimo ne.+ 3 Umvwe waishile bunke bwanji, ukabwela bunke bwanji. Inge wasongola, wafwainwa kuya na mukazhanji. 4 Umvwe nkambo yanji wamupa mukazhi ne aye wasema baana ba balume ne baana ba bakazhi, mukazhanji ne baana banji bakekala ba nkambo yanji kabiji aye muzha ukabwelatu bunke bwanji.+ 5 Pakuba umvwe muzha wakosakotu ne kwamba’mba, ‘Natemwa nkambo yami, mukazhami ne baana bami; kabiji kechi mbena kukeba’mba munkasulule ngyenga ne,’+ 6 nkambo yanji wafwainwa kumuleta kwi Lesa wa kine. Kepo akamuleta ku kibelo nangwa ku jishiki ja kibelo, kabiji nkambo yanji akamusabe kutwi na kyela kya kusabilako, kabiji ukekala muzha wanji kikupu.

7 “Umvwe muntu wapotesha mwananji wa mukazhi kwikala muzha, mwananji kechi ukakasuluka ne kuya byonka bikasuluka muzha wa mulume ne. 8 Umvwe nkambo yanji kechi wamutemwa ne, kabiji wabula kumusongola kwikala ntombo wanji, bino wamulengela kumupota ku muntu mukwabo,* kechi ukekala na luusa lwa kumupotesha ku bantu ba ku byalo bingi ne, mambo aye wamwalukamo. 9 Inge wamupana ku mwananji wa mulume, wafwainwa kumulama nobe mwananji wa mukazhi. 10 Umvwe wasongola mwanamukazhi ungi, kechi wafwainwa kuleka kumupa kajo, bya kuvwala nangwa kuleka kumupa bintu byafwainwa mukazhi mutanshi ne.+ 11 Umvwe wabula kumupa bino bintu bisatu, ko kuba’mba uno muzha wafwainwa kukasuluka ne kuya kwa kubula kupana mali.

12 “Inge muntu wapuma mukwabo ne kufwa wafwa, naye bafwainwa kumwipaya.+ 13 Bino umvwe wauba kino kya mapuso, kabiji Lesa wa kine waswisha kino kumweka, ko kuba’mba nkakubuula mpunzha ko akonsha kunyemena.+ 14 Umvwe muntu wazhingijila mukwabo ne kumwipaya kyanshijitu,+ uno muntu wafwainwa kufwa nangwa kya kuba uji ku kya kusokelapo bitapisho kyami.+ 15 Yense upuma bashanji nangwa bainanji, bafwainwa kumwipaya.+

16 “Umvwe muntu wabombola muntu mukwabo+ ne kumupotesha nangwa bamutaana saka amukwata,+ bafwainwa kumwipaya.+

17 “Yense ufinga* bashanji nangwa bainanji, bafwainwa kumwipaya.+

18 “Abino byo byo kikekala umvwe bantu batoboka, kabiji umvwe umo waasa mukwabo jibwe nangwa wamupuma jikofi* ne aye wabula kufwa, bino walaalatu pa mwanya: 19 Umvwe wakonsha kubuukapo ne kulupuka pangye ne kwendela ku mukombo, ko kuba’mba awa wamukozhezhe kechi bakamukambula ne. Bino muntu ye akozhezhe ukamufuta pa mambo a kimye kyo abujilenga kwingila kufikatu ne byo akakosa.

20 “Umvwe muntu wapuma muzha wanji wa mulume nangwa wa mukazhi na kichi ne aye wafwila mu kuboko kwanji, uno muntu bafwainwa kushinkanya nanji.+ 21 Nangwa byonkabyo, umvwe waikala juba jimo nangwa moba abiji, kechi bafwainwa kushinkanya nanji ne, mambo bamupotele na mali a nkambo yanji.

22 “Umvwe banabalume babena kulwa kabiji basakula mwanamukazhi uji na jimi, ne aye wasema mwana mubishi,*+ bino kafwako wafwa* ne, awo wasakulañana wafwainwa kupana kintu kyonse kyo bakamutongwela ku mwine mwina mukazhi; kabiji kintu kyo bakamutongwela wafwainwa kwikipana ku bamitonyi.+ 23 Bino umvwe pamweka lufu, mwafwainwa kupana bumi pa bumi,*+ 24 wasaba mukwabo jiso naye bafwainwa kumusaba jiso, wazokola mukwabo jiino naye bafwainwa kumuzokola jiino, wachimuna mukwabo kuboko naye bafwainwa kumuchimuna kuboko, wamokola mukwabo kulu naye bafwainwa kumumokola kulu,+ 25 wasoka mukwabo naye bafwainwa kumusoka, wakozha mukwabo naye bafwainwa kumukozha ne wapuma mukwabo naye bafwainwa kumupuma.

26 “Umvwe muntu wapuma pa jiso ja muzha wanji wa mulume nangwa wa mukazhi ne jiso jasabika, wafwainwa kumukasulula ne kuya na mambo a jiso janji.+ 27 Kabiji umvwe wazokola jiino ja muzha wanji wa mulume nangwa wa mukazhi, wafwainwa kumukasulula ne kuya na mambo a jiino janji.

28 “Umvwe ñombe wakozha mwanamulume nangwa mwanamukazhi ne yewo muntu wafwa, awo ñombe bafwainwa kumwasa mabwe ne kumwipaya,+ kabiji kechi bafwainwa kuja nyama yanji ne; pakuba mwine mwina ñombe kechi bakamukambula ne. 29 Bino umvwe ñombe uji na kisela kya kukozhañana kabiji mwina ñombe bamubuujile pa kino, bino aye wabula kumulama bulongo kabiji waipaya mwanamulume nangwa mwanamukazhi, uno ñombe bakamwase mabwe ne mwina ñombe naye bakamwipaye. 30 Umvwe bamutongwela kupana bukuzhi, wafwainwa kupana mali onse o bakamutongwela a kukuujilamo bumi* bwanji. 31 Inge ñombe wakozhezhe mwana wa mulume nangwa mwana wa mukazhi, mwina ñombe bakamubila monka mwayila mizhilo. 32 Umvwe ñombe wakozha muzha wa mulume nangwa wa mukazhi, mwina ñombe ukapana mali a mashekele* 30 kwi nkambo ya yewo muzha kabiji ñombe bakamwipaye na mabwe.

33 “Umvwe muntu washa kimbo kya kyashi nangwa wapoya kimbo ne kuzhiikapo ne, kabiji ñombe nangwa mbongolo waponenamo, 34 wapoyile kimbo ukapana mali a kufuta.+ Kabiji wafwainwa kupana mali ku mwinaye, ne nyama wafwa ukekala ke wanji. 35 Umvwe ñombe wa muntu umo wakozha ñombe wa muntu mukwabo ne kufwa wafwa, bafwainwa kupotesha ñombe mumi ne kwabana mali; kabiji bafwainwa ne kwabana nyama wafwa. 36 Bino umvwe ñombe uji na kisela kya kukozhañana kabiji mwina ñombe wabula kumulama bulongo, wafwainwa kupingakenyapo ñombe pa ñombe, kabiji awa wafwa ukekala ke wanji.

22 “Umvwe muntu waiba ñombe nangwa mukooko kabiji wamwipaya nangwa kumupotesha, ukapingakenyapo bañombe batanu pa yewo ñombe ne mikooko ina pa yewo mukooko.+

2 (“Umvwe ngivi+ bamutaana na kulala nzubo kabiji bamupuma ne kufwa wafwa, kechi bakekala na mambo a mashi anji ne. 3 Bino umvwe bamwipaya juba saka jasama, bakekala na mambo a mashi anji.)

“Wafwainwa kufuta. Umvwe kechi uji na bintu bya kufuta ne, bafwainwa kumupotesha na mambo a bintu byo aibile. 4 Umvwe bamutaana na bintu byo aibile, nangwa ñombe nangwa mbongolo nangwa mukooko, wafwainwa kupana banyama babiji kupingakenya pa nyama umo.

5 “Umvwe muntu waya na kujiisha banyama banji mu bujimi bwa kajo nangwa bwa miñanzañanza, kabiji wibaleka na kujiila mu bujimi bwa mukwabo, wafwainwa kupana kajo kawamisha ka mu bujimi bwanji nangwa miñanzañanza yawamisha ya mu bujimi bwanji.

6 “Umvwe mujilo waambuka ne kusoka kiswa, kabiji wasoka bikuta bya kajo nangwa kajo ko bakyangye kunowa nangwa kusoka bujimi, ko kuba’mba awa wasokele mujilo wafwainwa kufuta pa bintu byo asoka.

7 “Umvwe muntu wapana mali anji ku mukwabo nangwa bintu kuba’mba amulamineko, kabiji bebibila mu nzubo yanji, inge ngivi bamutaana wafwainwa kupana bibiji kupingakenya pa kimo.+ 8 Umvwe ngivi babula kumutaana, ko kuba’mba mwina nzubo bafwainwa kumuleta kwi Lesa wa kine,+ kuba’mba bayuke umvwe ye waibile bintu bya mukwabo nangwa ne. 9 Pa mambo onse a bintu bya kwiba, nabiji ñombe, mbongolo, mukooko, bivwalo nangwa kintu kyonse kyaeleka kyo akonsha kwamba’mba, ‘Akye kyami!’ bonse babiji bafwainwa kwibaleta kwi Lesa wa kine.+ Muntu ye bakataana kwi Lesa amba uji na mambo, ukapana bibiji ku mukwabo kupingakenya pa kimo.+

10 “Umvwe muntu wapa mukwabo mbongolo nangwa ñombe nangwa mukooko nangwa nyama wa kulela kuba’mba amulaminengako, kabiji wafwa nangwa walemana nangwa bamusenda kwa kubula muntu kumonako, 11 wafwainwa kuchipa ku mukwabo ku meso a Yehoba kuba’mba kechi wakwachilepo pa bintu bya mukwabo ne, kabiji mwinabyo wafwainwa kuswa. Mukwabo kechi akamufute ne.+ 12 Bino umvwe bamwibila nyama ye alaminenga, wafwainwa kufuta mwinaye. 13 Umvwe bamutabawile ku nyama wa mungye, akamulete kwikala kishiino. Kechi wafwainwa kufuta pa nyama ye batabaula ku nyama wa mungye ne.

14 “Bino umvwe muntu wasenga nyama ku mukwabo kabiji walemana nangwa wafwa kwa kubula mwinaye kuyuka, muntu wasengele wafwainwa kumufuta. 15 Kabiji umvwe mwinaye uji nanji, kechi ukamufuta ne. Inge wapaine mali pa kumusenda, mali o apaine o akekala mali akumufuta.

16 “Umvwe muntu waongola kamwale ye babula kwipanguzha kabiji walaala nanji, wafwainwa kupana mali a masongola pa kuba’mba ekale mukazhanji.+ 17 Umvwe shanji wakana kumupana kwi aye, wafwainwa kupana mali aesakana na mali a masongola.

18 “Mwanamukazhi yense mulozhi, bafwainwa kumwipaya.+

19 “Muntu yense ukalaala na nyama, kine mwafwainwa kumwipaya.+

20 “Muntu yense ukatapisha bitapisho kwi lesa ungi ne kubula kutapisha kwi Yehoba, mwafwainwa kumwipaya.+

21 “Kechi wafwainwa kuyanjisha nangwa kumanyika muntu wafuma ku kyalo kingi ne,+ mambo ne anweba mwajinga benyi mu kyalo kya Ijipita.+

22 “Kechi mwafwainwa kuyanjisha mwanamukazhi wafwilwa nangwa mwana wabula bashanji* ne.+ 23 Umvwe mukamuyanjishe ne aye akanjijile, kine nkomvwa kujila kwanji;+ 24 ne bukaji bwami bukemubuukila kabiji nkemwipaya na mpoko ne bakazhi benu bakekala banabakazhi bafwilwa ne baana benu bakekala baana babula bashabo.

25 “Umvwe wakongwesha mali ku umo wa mu bantu bami bayanji* bo ubena kwikala nabo, kechi wafwainwa kumukongwesha kaloba ne. Kechi mwafwainwa kumwambila kunungapo mali akwabo ne.+

26 “Umvwe wakwachilamo kivwalo kya mukwenu na mambo a nkongole,+ wafwainwa kwikibwezha juba saka jikyangye kuzhika. 27 Mambo kyo kyonkatu kyo evweta kabiji kyo kyo ekumbakanya pa mubiji;* umvwe wamusendela, ukalaala pa ka?+ Inge akanjijile, kine nkamumvwa, mambo nji na lusa.*+

28 “Kechi wafwainwa kufinga* Lesa+ nangwa kinemanga* wa mu bantu bobe ne.+

29 “Kechi wafwainwa kuzhinyazhinya pa kupana mulambo wa mu byavula byo uji nabyo, binyu ne manyi azunzuluka mu bya kufiinamo*+ ne. Ukapane mwanobe mubeji kwi amiwa.+ 30 Abino byo byo wafwainwa kuba na ñombe mulume ne mukooko wobe:+ Pa moba atanu na abiji akekale na inanji. Pa juba ja butanu na busatu, wafwainwa kumupana kwi amiwa.+

31 “Mwafwainwa kwikala bantu bazhila kwi amiwa,+ kabiji kechi mwafwainwa kuja nyama uji mungye ye batabaula ku nyama mukaji ne.+ Mukatayile bakabwa.

23 “Kechi wafwainwa kusampanya* byambo bya bubela ne.+ Kechi wafwainwa kukwatankana na muntu mubi ne kwikala kamonyi wa bujimbijimbi ne.+ 2 Kechi wafwainwa kulondela jibumba mu kuba bubi ne, kabiji kechi wafwainwa kutwala mambo mungi kupichila mu kushimuna bukamonyi bwa bubela na mambo a kulondela bantu* bavula ne. 3 Kechi wafwainwa kuba misalululo pa kuchiba mambo a muntu muyanji ne.+

4 “Umvwe wataana ñombe wa mulwanyi wobe nangwa mbongolo wanji ubena kuya mungi, wafwainwa kumubwezha kwi nkambo yanji.+ 5 Umvwe wamona’mba mbongolo wa muntu wakushikwa wapona na mambo a kipe kyo asenda, kechi wafwainwa kumupitayilatu ne. Wafwainwa kumukasulwishapo nyama wanji.+

6 “Pa kuchiba mambo a muntu muyanji ye wikala nanji, kechi wafwainwa kwiatwala mungi ne.+

7 “Kechi wafwainwa kuta muchima ku byambo bya bubela ne, kabiji kechi wafwainwa kwipaya muntu wabula mambo ne waoloka ne, mambo mubi kechi nkamubingisha ne.+

8 “Kechi wafwainwa kutambula mazhikakanwa ne, mambo mazhikakanwa akonsha kutwala mungi bamitonyi bachiba mambo bulongo. Kabiji akonsha kutwala mungi milanguluko ya muntu waoloka.+

9 “Kechi mwafwainwa kumanyika muntu wafuma ku kyalo kingi ne. Anweba mwayuka byo kyumvwanyika kwikala bwenyi,* mambo mwajinga benyi mu kyalo kya Ijipita.+

10 “Pa myaka itanu na umo, ukajime bujimi bobe ne kubungizha kajo.+ 11 Bino mu mwaka wa butanu na bubiji kechi ukajimemo ne, ukebuleke bukalaaletu, ne bantu bayanji baji mu bantu bobe bakajemo, kabiji kajo ko bakashamo, banyama ba mungye bakekaje. Abino byo byo wafwainwa kuba na bujimi bobe bwa miñanzañanza ne bwa maolivi.

12 “Mu moba atanu na jimo, mwafwainwa kwingila mingilo yenu; bino pa juba ja butanu na bubiji kechi mwafwainwa kwingila ne, pa kuba’mba ñombe wenu mulume ne mbongolo wenu bakakokoloke ne mwana wa muzha wenu ne muntu wafuma ku kyalo kingi bakakokoloke.+

13 “Mwafwainwa kutako muchima kuba byonse byo nemubuula,+ kabiji kechi mwafwainwa kutela pa mazhina a balesa bangi ne; kechi mwafwainwa kwibatela na byatunwa* byenu ne.+

14 “Mukekalenga na kijiilo kyami bimye bisatu mu mwaka.+ 15 Mukekalenga na Kijiilo kya Bashinkwa Babula Mbizho.+ Mukajenga bashinkwa babula mbizho pa moba atanu na abiji, byonkatu byo nemukambizhe pa kimye kyatongolwa mu ñondo wa Abibi,*+ mambo pa kyonkakya kimye po po mwafumine mu Ijipita. Kafwako muntu nangwa umo wafwainwa kwiya kwi amiwa mabokotu ne.+ 16 Kabiji mukekalenga na Kijiilo kya Kunowa* kya bipangwa bitanshi bya mingilo yenu, byo mwabyajile mu bujimi;+ ne na Kijiilo kya Kubungizha* ku mpelo ya mwaka byo mukabungizha bya mu bujimi byo mwajimine.+ 17 Bimye bisatu mu mwaka, banabalume benu bonse bafwainwa kwiya na kwimana kwi Nkambo wa kine, aye Yehoba.+

18 “Kechi mwafwainwa kulambula kwi amiwa kitapisho kya mashi pamo na bintu biji na mbizho ne. Bitapisho byanuna bya kupana pa bijiilo byami, kechi byafwainwa kulaala bufuku bonse kufika lukelo ne.

19 “Mukalete ku nzubo ya Yehoba Lesa wenu bipangwa byawamisha bya mu bujimi bwenu bitanshi kupya.+

“Kechi mwafwainwa kuteeka mwana mbuzhi mu mukaka wa inanji ne.+

20 “Mbena kutuma malaika kulutwe yenu+ kuba’mba emulame pa lwendo ne kwimutwala ku mpunzha yo nanengezha.+ 21 Mwafwainwa kumumvwina ne kukookela jiwi janji. Kange mukamusatukile ne,+ mambo kechi ukemulekelako mizhilulwila yenu ne, mambo jizhina jami jiji pe aye. 22 Bino umvwe kine mwaumvwina jiwi janji ne kuba byonse byo nemukambizha, amiwa nkemena balwanyi benu ne boba bemwimena ne amiwa nkebemena. 23 Mambo malaika wami ukatangilako kulutwe yenu ne kwimutwala ku bena Amoli, bena Hiti, bena Pelizi, bena Kenana, bena Hivi ne bena Yebusi, kabiji nkebonauna.+ 24 Kechi mwafwainwa kufukamina balesa babo nangwa kongolwa ne kwibengijila ne, kabiji kechi mwafwainwa kulondela byubilo byabo ne.+ Pakuba anweba mwafwainwa kukundaula ne kulalaula mashiki abo azhila.+ 25 Mwafwainwa kwingijila Yehoba Lesa wenu,+ kabiji aye ukapesha kajo ne mema enu.+ Amiwa nkafumyapo bikola pe anweba.+ 26 Banabakazhi ba mu kyalo kyenu kechi bakapulumunanga nangwa kwikala bañumba ne,+ kabiji nkemulengela kwikala myaka yavula.*

27 “Nkatuma moyo wa kungakamwa kulutwe yenu,+ nkavulañanya bantu bonse bo mukataana, kabiji nkalengela balwanyi benu bonse kwimunyema byo mukebashinda.*+ 28 Nkatuma moyo wa kwimuchina* kulutwe yenu+ kabiji uno moyo ukalengela bena Hivi, bena Kenana ne bena Hiti kwimunyema.+ 29 Kechi nkebapanga mu mwaka umo ne, pa kuba’mba kyalo kikabule kwikala ke masala ne banyama ba mungye bakabule kwimuvujila.+ 30 Nkebapanganga pachepache kufikatu ne byo mukasemununa ne kutambula kyalo.+

31 “Nkakuchibila mupaka kufuma ku Kalunga ka Mema Kachila kukafika ne ku kalunga ka mema ka bena Filishitiya; ne kufuma ku kiselebwa kukafika ne ku Mukola;*+ mambo bangikazhi ba mu kyokya kyalo nkebapana mu maboko enu, ne anweba mukebapanga.+ 32 Kechi mwafwainwa kulayañana nabo lulayañano nangwa na balesa babo ne.+ 33 Kabiji kechi bafwainwa kwikala mu kyalo kyenu ne, pa kuba’mba bakabule kwimulengela kundenga mambo. Umvwe mukengijilenga balesa babo, kine kikekala ke kitewa kwi anweba.”+

24 Kepo Yehoba aambijile Mosesa amba: “Yanga ku mutumba, obewa ne Alona, Nadaba ne Abihu,+ ne bakulumpe ba bena Isalela 70, kabiji mukafukame palepa byobya. 2 Mosesa bunke ye wafwainwa kwiya kwi amiwa Yehoba; pakuba abo kechi bafwainwa kufwenya pepi ne, kabiji bantu kechi bafwainwa kukanjila nanji ne.”+

3 Kepo Mosesa abwelele ne kubuula bantu byambo byonse byaambile Yehoba ne mizhilo yonse,+ ne bantu bonse baambile na jiwi jimotu amba: “Byambo byonse byaamba Yehoba twaswa kwibyuba.”+ 4 Onkao mambo, Mosesa wanembele byambo byonse byaambile Yehoba.+ Kepo abuukile lukelokelo ne kushimika kya kusokelapo bitapisho munshi ya mutumba ne kwimika mashiki 12 monka mwayijile mikoka 12 ya bena Isalela. 5 Byo apwishishe kuba bino, watumine bansongwalume bena Isalela ne abo balambwile milambo ya kusoka ne kutapisha bañombe balume kwikala milambo ya mutende kwi Yehoba.+ 6 Kepo Mosesa atolele kichika kya mashi ne kwiabika mu masanyi afukumana, kabiji kichika kya mashi akwabo wiasanshile pa kya kusokelapo bitapisho. 7 Kabiji watolele buku wa lulayañano ne kumutanga ku bantu na jiwi ja peulu.+ Kepo bantu baambile’mba: “Byonse byaamba Yehoba twaswa kwibyuba, kabiji tukakookelanga.”+ 8 Onkao mambo, Mosesa washikwile mashi ne kusansa bantu+ ne kwibambila’mba: “Ano o mashi a lulayañano Yehoba lo alayañana ne anweba monka mwayila bino byambo byonse.”+

9 Mosesa, Alona, Nadaba, Abihu ne bakulumpe ba bena Isalela 70 bakanjijile, 10 kabiji bamwene Lesa wa Isalela.+ Munshi ya maulu anji mwajinga kintu kyamwekelenga nobe kyalanta kya jibwe ja safila kabiji kyakengubukile nobe jiulu.+ 11 Aye kechi wibobile kintu kyatama babinemanga ba bena Isalela ne,+ ne abo bamwene kimwesho kya Lesa wa kine kabiji bajiilenga ne kutoma.

12 Kepo Yehoba aambijile Mosesa amba: “Kanjila kuno ko nji ku mutumba ne kwikala konka kuno. Amiwa nsakukupa mabwe apapakana paji mizhilo ne mikambizho yo nsakunemba ya kwibafunjisha.”+ 13 Ponkapo Mosesa ne kalume wanji aye Yoshua baimene ne kuya,+ kabiji Mosesa wakanjijile ku mutumba wa Lesa wa kine.+ 14 Bino bakulumpe wibambijile’mba: “Tupembelelainga ponka pano kufikatu ne byo tukabwela kwi anweba.+ Musakushala ne Alona ne Hula.+ Muntu yense uji na mambo, wakonsha kuya kwi abo.”+ 15 Kepo Mosesa ayile ku mutumba, jikumbi saka javweta mutumba.+

16 Kabiji lukumo lwa Yehoba+ lwajinga pa Mutumba wa Sinai,+ kabiji jikumbi javwetele mutumba pa moba atanu na jimo. Pa juba ja butanu na bubiji, Lesa waichile Mosesa mu jikumbi. 17 Ku bena Isalela bamwenengako, lukumo lwa Yehoba lwamwekelenga nobe mujilo usokañana peulu ya mutumba. 18 Kepo Mosesa atwelele mu jikumbi ne kukanjila pa mutumba.+ Kabiji Mosesa waikele ku mutumba moba 40 mute ne bufuku.+

25 Kepo Yehoba aambijile Mosesa amba: 2 “Buula bena Isalela bandetele bya bupe; untambwile bya bupe ku muntu yense waswa kupana.+ 3 Abino byo bya bupe byo ukatambula kwi abo: ngolode,+ siliva,+ mukuba,+ 4 tonge wafituluka, wachiluluka, wachijisha, kisapi kya linenyi kyawamisha, boya bwa bambuzhi, 5 myayi ya mikooko ilume yo basombesha na musombelo uchila, myayi ya banyama bakatampe ba mu kalunga ka mema, bichi bya mwiba wa kaseele,+ 6 manyi a mu malampi,+ manyi a balasama a kushinga+ ne bya kufutumuna binunka bulongo,+ 7 mabwe a onika+ ne mabwe akwabo a kulamika pa kajilaya kabula maboko ne pa fukuta wa pa kyaji.+ 8 Bakandengele nzubo yazhila, ne amiwa nkekala nabo.+ 9 Mukalenge ino nzubo, ko kuba’mba tente wa lusambakeno na bintu byanji, monka mwayila kimwesho kyo mbena kukumwesha.+

10 “Bakalenge jikwachi* na kichi kya mwiba wa kaseele, mu bula makyubichi abiji ne kichika, mu bwipi kyubichi* umo ne kichika ne mu kimino kyubichi umo ne kichika.+ 11 Ukejishinge ngolode yawamisha.+ Kabiji ukashinge ngolode mukachi ne pangye, ne kwijizhokolosha na momeno wa ngolode.+ 12 Ukalenge makosa a ngolode ana ne kwialamika ku makonka ana a jikwachi, makosa abiji ku lubaji lumo ne makosa akwabo abiji ku lubaji lukwabo lwa jikwachi. 13 Kabiji ukalenge mibanda na kichi kya mwiba wa kaseele ne kwiishinga ngolode.+ 14 Ukakule ino mibanda mu makosa aji mu mbavu ya Jikwachi pa kuba’mba bakasendelengako Jikwachi. 15 Mibanda ikekale monka mu makosa a Jikwachi; kabiji kechi bafwainwa kwiifumyamo ne.+ 16 Ukabike mu Jikwachi Mabwe a Lushimuno o nsakukupa.+

17 “Ukalenge kizhiko kya ngolode yawamisha, mu bula makyubichi abiji ne kichika ne mu bwipi kyubichi umo ne kichika.+ 18 Ukalenge bakelubi babiji ba ngolode; ukabunde bakelubi, ne kwibabika umo kwapela ne mukwabo kwapela kizhiko.+ 19 Ukabike bakelubi ku mbaji yonse ibiji, umo kwapela ne mukwabo kwapela kizhiko. 20 Bakelubi bakatanyike byapi byabo bibiji peulu ne kuvweta pa kizhiko na byapi byabo,+ kabiji baketale. Bilungi byabo bikatale pa kizhiko. 21 Ukazhikepo kizhiko peulu ya Jikwachi,+ kabiji ukabike mu Jikwachi Mabwe a Lushimuno o nsakukupa. 22 Nkeya konkakwa kwi obewa ne kwisamba nobe peulu ya kizhiko.+ Pakachi ka bakelubi babiji baji peulu ya jikwachi ja Lushimuno, po po nkakubuujila bintu byonse byo nkakukambizha kubuula bena Isalela.

23 “Kabiji ukalenge tebulu+ na kichi kya mwiba wa kaseele, mu bula makyubichi abiji, mu bwipi kyubichi umo ne mu kimino kyubichi umo ne kichika.+ 24 Ukamushinge ngolode yawamisha, kabiji ukamuzhokoloshe na momeno wa ngolode. 25 Ukazhokolosheko tumapulanga twapapakana twalepa nobe mu lupi* umo mu bwipi ne kuzhokoloshako momeno wa ngolode ku tumapulanga. 26 Ukalengeleko makosa ana a ngolode, ne kwiabika ku makonka ana kuji mikupa ina. 27 Makosa akekale kwipi na tumapulanga twapapakana akukulamo mibanda ya kusendelako tebulu. 28 Ukalenge mibanda na kichi kya mwiba wa kaseele ne kwiishinga ngolode ne kwiingijisha kusendelako tebulu.

29 “Kabiji ukalenge masanyi anji, makapu anji, milondo yanji ne bya kutomenamo byanji, mo baketulwilanga milambo ya binyu. Ukebilenge na ngolode yawamisha.+ 30 Kabiji ukabike pa tebulu bashinkwa ba kupana kwi amiwa kimye kyonse.+

31 “Ukalenge kya kutulapo malampi+ kya ngolode yawamisha. Kino kya kutulapo malampi kikekale kya kubunda. Kitako kyakyo, mukupa wakyo, misampi yakyo, makapu akyo, mituntu yakyo ne maluba akyo, bikanungakane.+ 32 Kabiji misampi itanu na umo ikafuma mu mbaji ya kya kutulapo malampi, misampi isatu ikekala ku lubaji lumo ne ikwabo isatu ikekala ku lubaji lukwabo. 33 Makapu asatu apasha maluba a amonde akekala ku lubaji lumo lwa misampi saka aji na mituntu ne maluba apusana pusana, kabiji makapu asatu apasha maluba a amonde akekala ku lubaji lukwabo lwa misampi saka aji na mituntu ne maluba apusana pusana. Abino byo bikekala misampi itanu na umo ku mukupa wa kya kutulapo malampi. 34 Ku mukupa wa kya kutulapo malampi kukekale makapu ana apasha maluba a amonde saka aji na mituntu yao ne maluba apusana pusana. 35 Mutuntu umo akekale munshi ya misampi ibiji itanshi yafuma ku mukupa, ne mutuntu mukwabo munshi ya misampi ikwabo ibiji ne mutuntu mukwabo munshi ya misampi ikwabo ibiji, yonse pamo ikekale misampi itanu na umo yafuma ku mukupa. 36 Mituntu ne misampi ne kyonse kya kutulapo malampi bikekale bya ngolode yawamisha yo batubula bulongo.+ 37 Kabiji ukalenge malampi atanu na abiji, umvwe malampi ateema, akatokesha mpunzha iji kulutwe yakyo.+ 38 Tubimano twakyo ne pa kuponena buto bufuma ku muzhinge, twafwainwa kwikala twa ngolode yawamisha.+ 39 Kyafwainwa kulengwa pamo na bino bipe byonse, kufuma ku talenta* umo wa ngolode yawamisha. 40 Wafwainwa kwibilenga monka mwayila kimwesho kyo bakumwesheshe ku mutumba.+

26 “Ukalenge tente wa lusambakeno+ na bisapi jikumi bya kisapi kya linenyi wa kuzhinga kyawamisha, na tonge wafituluka ne wachijisha ne wachiluluka. Wafwainwa kusonenapo+ ne bakelubi.+ 2 Kisapi kimo kimo kya ku tente kikekale mu bula makyubichi* 28 ne mu bwipi makyubichi ana. Bisapi byonse bya ku tente byafwainwa kwikala kipimo kimotu.+ 3 Bisapi bitanu bya ku tente byafwainwa kunungakana pamo na bisapi bikwabo kwikala kisapi kimo, kabiji bisapi bikwabo bitanu bya ku tente bakebinungakanye kwikala kisapi kimo. 4 Ukalenge tumeso na tonge wafituluka kunsa ya kisapi kya ku tente kwapela kisapi kitanshi kyo banungakanya, kabiji ukobe kintutu kimo ne kunsa ya kisapi kikwabo kyo banungakanya. 5 Kabiji ukalenge tumeso 50 ku kisapi kimo kya ku tente ne tumeso 50 kunsa ya kisapi kikwabo kya ku tente, pa kuba’mba tukatalañane na tukwabo po tukanungakena. 6 Ukalenge tukobelo twa ngolode 50 ne kunungakanya pamo bisapi bya ku tente na tuno tukobelo, kabiji tente wa lusambakeno ukekalatu ke umo.+

7 “Kabiji ukalenge bisapi bikwabo bya ku tente wa lusambakeno na boya bwa bambuzhi.+ Ukalenge bisapi 11 bya ku tente.+ 8 Kisapi kyonse kya ku tente kikekale mu bula makyubichi 30 ne mu bwipi makyubichi ana. Bisapi byonse 11 bikekale kipimo kimotu. 9 Ukanungakanye pamo bisapi bitanu bya ku tente kabiji ukanungakanye pamo bisapi bikwabo bitanu na kimo ne kuchimpa kisapi kya butanu na kimo kulutwe ya tente. 10 Kabiji ukalenge tumeso 50 kwapela kisapi kya ku tente, ko kuba’mba kisapi kyo banungakanya, ne tumeso 50 kunsa ya kisapi kikwabo kya ku tente po byanungakena. 11 Ukalenge tukobelo twa mukuba 50 ne kwitukobeka mu tumeso ne kusambakanya pamo tente, ne tente ukekalatu ke umo. 12 Akya kisapi kya ku tente kikashalako kyo kisapi kikazenzumuka. Mutamba umo wa kisapi kya ku tente ukashalako ye ukazenzumukila kunyuma ya tente wa lusambakeno. 13 Kabiji bula bwa kisapi kikashalako kya ku tente kyazenzumukila ku tente wa lusambakeno kyubichi umo umo ku mbaji yonse kuba’mba bakamuvwete.

14 “Ukalenge kya kuvweta pa tente na myayi ya mikooko ilume yo basombesha na musombelo uchila, kabiji ukamuvwete ne na myayi ya banyama bakatampe ba mu kalunga ka mema.+

15 “Ukalenge mafulemu+ aimana a ku tente wa lusambakeno na kichi kya mwiba wa kaseele.+ 16 Fulemu umo akekale mu kimino makyubichi jikumi ne mu bwipi kyubichi umo ne kichika. 17 Fulemu umo umo wafwainwa kwikala na tumikupa tubiji twaimana pamo. Abino byo byo wafwainwa kulenga mafulemu onse a tente wa lusambakeno. 18 Ukalenge mafulemu 20 a tente wa lusambakeno a ku kabeta ka ku bulenge akatale ku kabeta ka ku bulenge.

19 “Ukalenge bitako bya kusokekamo+ bya siliva 40 ne kwibibika kunshi ya mafulemu 20: bitako bibiji bya kusokekamo kunshi ya fulemu umo mwa kubika tumikupa tubiji twa fulemu, ne bitako bibiji bya kusokekamo kunshi ya fulemu mwa kubika tumikupa tubiji twa fulemu.+ 20 Kabiji ukalenge mafulemu 20 a ku lubaji lukwabo lwa tente wa lusambakeno ku kabeta ka ku buyeke, 21 ne bitako bya kusokekamo bya siliva 40, bitako bibiji bya kusokekamo kunshi ya fulemu umo ne bitako bibiji bya kusokekamo kunshi ya fulemu mukwabo. 22 Ukalenge mafulemu atanu na umo+ a kunyuma ya tente wa lusambakeno ku muzhika. 23 Ukalenge mafulemu abiji akekale ku makonka kunyuma ya tente wa lusambakeno. 24 Ukealamankanye kufuma panshi kufika peulu, kufika ne ku jikosa jitanshi. Abino byo byo ukoba ne ku onse abiji kabiji akekala ku makonka abiji. 25 Kabiji kukekala mafulemu atanu na asatu ne bitako byao bya kusokekamo bya siliva 16, bitako bibiji bya kusokekamo kunshi ya fulemu umo ne bitako bibiji bya kusokekamo kunshi ya fulemu mukwabo.

26 “Ukalenge myamba na kichi kya mwiba wa kaseele, mafulemu atanu a ku lubaji lumo lwa tente wa lusambakeno,+ 27 myamba itanu ya ku mafulemu a ku lubaji lumo lwa tente wa lusambakeno ne myamba itanu ya ku mafulemu a ku lubaji lukwabo lwa tente wa lusambakeno kunyuma ku muzhika. 28 Mwamba wa pakachi wakimbakana pa mafulemu wafwainwa kupulankana kunsa ne kunsa.

29 “Ukashinge ngolode ku mafulemu,+ kabiji makosa a kukulamo myamba ukealenge na ngolode, kabiji myamba ukeishinge ngolode. 30 Wafwainwa kwimika tente wa lusambakeno monka mwayila mutundu ye bakumwesheshe ku mutumba.+

31 “Ukalenge kipembe+ na tonge wafituluka ne wachijisha, ne na boya bwachiluluka ne na kisapi kya linenyi wa kuzhinga kyawamisha. Ukasonenepo ne bakelubi. 32 Ukekikobeke pa mashiki ana a kichi kya mwiba wa kaseele o bashingako ngolode. Nkobelo yao yafwainwa kwikala ya ngolode. Mashiki bakeemike pa bitako bina bya kusokekamo bya siliva. 33 Ukakobeke kipembe na tukobelo ne kutwezha jikwachi ja Lushimuno+ ku kipembe. Kipembe kyo kikabanya Mwazhila+ ne Mwazhijisha.+ 34 Wafwainwa kubikapo kizhiko pa jikwachi ja Lushimuno monka Mwazhijisha.

35 “Ukabike tebulu pangye ya kipembe, ne kya kutulapo malampi+ ukekibike saka kyatalañana na tebulu ku kabeta ka ku bulenge ku lubaji lwa tente wa lusambakeno; kabiji tebulu ukamubike ku lubaji lwa ku kabeta ka ku buyeke. 36 Kabiji ukalenge kipembe* kya kubika mu kibelo kya tente na tonge wafituluka ne wachijisha, ne na boya bwachiluluka ne na kisapi kya linenyi wa kuzhinga kyawamisha, byo bapikwila pamo.+ 37 Ukalenge mashiki atanu a ku kipembe* na kichi kya mwiba wa kaseele ne kwiashinga ngolode. Nkobelo yao yafwainwa kwikala ya ngolode, kabiji ukalenge bitako bya mukuba bitanu bya kwiasokekamo.

27 “Ukalenge kya kusokelapo bitapisho na kichi kya mwiba wa kaseele;+ kikesakane mu bula makyubichi* atanu ne mu bwipi makyubichi atanu. Kino kya kusokelapo bitapisho kikesakane monse, mu kimino kikekale makyubichi asatu.+ 2 Ukabike nsengo+ ku makonka akyo ana; kabiji ino nsengo ikekale konka ku kya kusokelapo bitapisho, kabiji ukashingeko mukuba ku kya kusokelapo bitapisho.+ 3 Kabiji ukalenge bibekete mwa kuwolela buto,* mafosholo, masanyi afukumana, mafoloko ne mwa kwapwila mujilo, bipe byonse bya ku kya kusokelapo bitapisho byafwainwa kwikala bya mukuba.+ 4 Ukalengeleko ku kya kusokelapo bitapisho kyela kya mesomeso kiji nobe bukonde; kabiji ku makonka ana a ku kino kyela ukalengeleko makosa a mukuba. 5 Ukekibike munshi ya tumapulanga twapapakana tuji ku kya kusokelapo bitapisho kabiji kino kyela kya mesomeso kikafika panshi ya kya kusokelapo bitapisho. 6 Ukalenge mibanda ya ku kya kusokelapo bitapisho na kichi kya mwiba wa kaseele ne kwiishinga mukuba. 7 Mibanda bakeikule mu makosa pa kuba’mba ikekale ku mbaji yonse ibiji ya kya kusokelapo bitapisho byo bakekisendanga.+ 8 Kabiji ukekilenge na mapulanga saka kyaasama peulu ne panshi. Wafwainwa kwikilenga byonkatu byo a kumwesheshe ku mutumba.+

9 “Kabiji ukalenge kipango+ kya ku tente wa lusambakeno. Ku lubaji lwa ku kabeta ka ku bulenge, lwatala ku kabeta ka ku bulenge, kipango kikekale na bipembe byazenzumuka bya kisapi kyawamisha kya linenyi wa kuzhinga, mu bula mukekale makyubichi 100 ku lubaji lumo.+ 10 Kikekale na mashiki 20 ne bitako bya mukuba 20 bya kusokekamo. Nkobelo ya mashiki ne tumyamba twao bikekale bya siliva. 11 Kabiji bipembe byazenzumuka bya ku kabeta ka ku buyeke nabyo bikekale mu bula makyubichi 100 pamo na mashiki abyo 20, ne bitako bya mukuba 20 bya kwiasokekamo, ne nkobelo ya siliva ne tumyamba twa pa mashiki. 12 Kukekale bipembe byazenzumuka ku lubaji lwa ku muzhika byalepa makyubichi 50 mu bwipi bwa kipango, pamo na mashiki jikumi ne bitako bya kwiasokekamo jikumi. 13 Mukekale makyubichi 50 mu bwipi bwa kipango ku musela kusamina juba. 14 Ku lubaji lumo kukekale bipembe byazenzumuka byalepa makyubichi 15 pamo na mashiki abyo asatu ne bitako bya kwiasokekamo bisatu.+ 15 Kabiji ku lubaji lukwabo kukekale bipembe byazenzumuka byalepa makyubichi 15 pamo na mashiki abyo asatu ne bitako bya kwiasokekamo bisatu.

16 “Ku kibelo kya kipango kukekale kipembe* kyalepa mu bula makyubichi 20 kyo baluka na tonge wafituluka ne wachijisha, ne na boya bwachiluluka ne na kisapi kya linenyi wa kuzhinga kyawamisha kyo batungila pamo,+ ne mashiki akyo ana ne bitako byakyo bina bya kusokekamo.+ 17 Mashiki onse akazhokoloka kipango kyonse, akekale na twa kukashilako twa siliva ne nkobelo ya siliva, pano bino, bitako byao bya kwiasokekamo bikekale bya mukuba.+ 18 Kipango kikekale mu bula makyubichi 100,+ mu bwipi makyubichi 50, ne mu kimino makyubichi 5 kyo balenga na kisapi kyawamisha kya linenyi wa kuzhinga, kabiji kyafwainwa kwikala na bitako bya kusokekamo bya mukuba. 19 Bipe byonse ne bintu bya kwingijisha ku tente wa lusambakeno pamo na mpopo ya ku tente ne mpopo yonse ya ku kipango, byafwainwa kwikala bya mukuba.+

20 “Obewa ukakambizhe bena Isalela kuleta manyi awamisha a maolivi o bakama a kubika mu malampi, pa kuba’mba malampi akabulenga kuzhima.+ 21 Mu tente wa lusambakeno, pangye ya kipembe kiji kwipi na Jikwachi ja Lushimuno,+ Alona ne baana banji ba balume bakanengezhenga malampi kuba’mba akateemengatu kufuma mabanga kufika ne lukelo ku meso a Yehoba.+ Jino ke jilamuna ja myaka ne myaka ku bisemi byabo byonse, bena Isalela jo bakalamanga.+

28 “Ukasale mu bena Isalela, Alona+ kolojobe pamo na baana banji ba balume+ abo ba Nadaba, Abihu,+ Eleaza ne Itamala+ kuba’mba bakañingijilenga mwingilo wa buñanga.+ 2 Ukasonene Alona kolojobe bivwalo byazhila bya buneme kabiji bya buya.+ 3 Ukambile basendwe* bonse bo napa maana,+ kabiji bafwainwa kusonena Alona bivwalo bya kumuzhijikilamo, pa kuba’mba akañingijilenga mwingilo wa buñanga.

4 “Abino byo bivwalo byo bakasona: fukuta wa pa kyaji,+ kajilaya kabula maboko,+ mukangyo wabula maboko,+ munkukumba wa mabala mabala,+ kitambala ne mushipi wa kisapi;+ bakasonene Alona kolojobe ne baana banji bino bivwalo byazhila, pa kuba’mba bakañingijilenga mwingilo wa buñanga. 5 Basendwe bakengijishe ngolode, tonge wafituluka ne wachijisha, wachiluluka ne kisapi kyawamisha kya linenyi.

6 “Bakalenge kajilaya kabula maboko na ngolode, na tonge wafituluka ne wachijisha, na boya bwachiluluka ne na kisapi kyawamisha kya linenyi wa kuzhinga, kabiji bafwainwa kwikasona bulongo.+ 7 Kabiji kakekale na matepe abiji pa bipuzhi ne kwiasonena peulu. 8 Mushipi wa kupikula+ wa kunyinga pa kajilaya kabula maboko wafwainwa kwikala wa kisapi kimotu: wa ngolode, wa tonge wafituluka ne wachijisha, wa boya bwachiluluka kabiji wa kisapi kyawamisha kya linenyi wa kuzhinga.

9 “Ukashikule mabwe a onika+ abiji ne kunembapo mazhina a baana ba kwa Isalela,+ 10 mazhina atanu na jimo ukeanembe pa jibwe jimo kabiji akwabo atanu na jimo ukeanembe pa jibwe jikwabo monka mwayila kusemwa kwabo. 11 Sendwe unemba pa mabwe akanembe mazhina a baana ba kwa Isalela pa mabwe abiji byonkatu muntu byo akonsha kunemba pa shitampa.+ Kepo ukeabike mu tubintu to balenga na ngolode. 12 Kabiji ukabike mabwe abiji pa matepe abiji aji peulu ya kajilaya kabula maboko kwikala a kuvulukilako baana ba kwa Isalela,+ kabiji Alona wafwainwa kusenda ano mazhina abo pa matepe anji abiji aji pa bipuzhi ku meso a Yehoba kwikala kya kwibavululako. 13 Ukalenge tubintu twa ngolode, 14 ne minyololo ibiji ya ngolode yawamisha yo bazhinga nobe muzhinge,+ kabiji wafwainwa kukasa ino minyololo ya kupikula ku tuno tubintu to balenga na ngolode.+

15 “Ukasone fukuta wa pa kyaji wa kuchibilamo mambo.+ Wafwainwa kumulenga byonka biji kajilaya kabula maboko: ko balenga na ngolode, na tonge wafituluka ne wachijisha, na boya bwachiluluka ne na kisapi kyawamisha kya linenyi wa kuzhinga.+ 16 Wafwainwa kwesakana monsetu pa kumuchimpa, mu bula ne mu bwipi nobe mu kuboko.* 17 Wafwainwa kutanchikamo mabwe, mikuku ina ya mabwe. Mu mukuku mutanshi mwafwainwa kwikala jibwe ja lubi, ja topaze ne ja emalode. 18 Mu mukuku wa bubiji mwafwainwa kwikala jibwe ja takozi, ja safila ne ja yasipa. 19 Mu mukuku wa busatu mwafwainwa kwikala jibwe ja lishama, ja akate ne ja ametesete. 20 Mu mukuku wa buna mwafwainwa kwikala jibwe ja kisolite, ja onika ne ja jedi. Bafwainwa kwiabika mu tubintu to balenga na ngolode. 21 Ano mabwe afwainwa kwesakana na mazhina 12 a baana ba kwa Isalela. Mazhina onse afwainwa kunembwa nobe shitampa, jizhina jimo jimo jafwainwa kwimenako mukoka umo pa mikoka 12.

22 “Ukapikule minyololo ya pa fukuta wa pa kyaji iji nobe mizhinge ya ngolode yawamisha.+ 23 Ukalenge tumakosa tubiji twa ngolode twa ku fukuta wa pa kyaji ne kubika tuno tumakosa tubiji kunsa konse kubiji kwa fukuta wa pa kyaji. 24 Ukatwezhe mizhinge ibiji ya ngolode mu tumakosa tubiji tuji kunsa ya fukuta wa pa kyaji. 25 Ukatwezhe kwapela mizhinge ibiji mu tubintu tubiji to balenga na ngolode, kabiji wafwainwa kwitukashila pa matepe aji pa bipuzhi bya kajilaya kabula maboko palutwe. 26 Kabiji ukalenge tumakosa tubiji twa ngolode ne kwitubika kunsa ya fukuta wa pa kyaji saka twatentakana pa kajilaya kabula maboko.+ 27 Kabiji wafwainwa kulengelapo tumakosa tukwabo tubiji twa ngolode ne kwitubika palutwe ya kajilaya kabula maboko, munshi ya matepe abiji apa bipuzhi kwipi na po kanungakena, peulu ya mushipi wa kupikula wa pa kajilaya kabula maboko.+ 28 Fukuta wa pa kyaji bafwainwa kumukwata na muzhinge wa kifufya, ne kukashila tumakosa tuji ku tumakosa tuji ku kajilaya kabula maboko. Tuno tukalengela fukuta wa pa kyaji kwikala pa kajilaya kabula maboko, peulu ya mushipi wa kupikula.

29 “Alona wafwainwa kusenda mazhina a baana ba kwa Isalela pa fukuta wa pa kyaji wa kuchibilamo mambo ponka pa muchima wanji umvwe watwela Mwazhila kwikala kya kumuvululako kya kikupu ku meso a Yehoba. 30 Kabiji ukabike Ulimu ne Tumimu*+ mu fukuta wa pa kyaji wa kuchibilamo mambo, kabiji byafwainwa kwikala ponka pa muchima wa kwa Alona byo akeya ku meso a Yehoba, Alona wafwainwa kusenda uno fukuta wa kuchibilamo mambo bena Isalela pa muchima wanji kwi Yehoba kimye kyonse.

31 “Ukalenge mukangyo wabula maboko wa kuvwala mukachi ya kajilaya kabula maboko uji na musombelo wa kifufya.+ 32 Kwiulu* na pakachi kwafwainwa kwasama. Kabiji akwa kwaasama kwafwainwa kuzhokoloka mufumo wa kupikula. Kwafwainwa kwasama nobe jilaya ja nkondo kuchina’mba kwakatabuka. 33 Kunshi ya uno mukangyo wafwainwa kuzhokoloshako mapomegulanchi a tonge wa kifufya ne wachijisha, ne na boya bwachiluluka pamo na tumangengele twa ngolode pakachi kao. 34 Wafwainwa kubika apo kangengele ka ngolode apo mpomegulanchi kabiji apo kangengele ka ngolode apo mpomegulanchi kuzhokoloka kunshi ya mukangyo wabula maboko. 35 Alona wafwainwa kuvwalanga uno mukangyo pa kwingila, kabiji ukomvwanyikanga umvwe keatwele mwazhila ku meso a Yehoba ne byo akalupukanga, kuchina’mba wakafwa.+

36 “Ukalenge kyela kibekauka na ngolode yawamisha ne kunembapo byonkatu muntu byo akonsha kunemba pa shitampa, amba: ‘Buzhile bo bwa kwa Yehoba.’+ 37 Wafwainwa kwikikasa ku kitambala+ na muzhinge wafituluka; kyafwainwa kwikala kulutwe ya kino kitambala. 38 Kikekale pa kilungi kya kwa Alona, kabiji Alona ukatwikwa mambo umvwe muntu walenga mambo ku bintu byazhila,+ bena Isalela byo bakazhijika kimye kyo bakebipananga kwikala bya bupe byazhila. Kyafwainwa kwikala pa kilungi kyanji kimye kyonse, pa kuba’mba Yehoba akebobile bibusa.

39 “Ukapikule munkukumba wa mabala mabala na kisapi kyawamisha kya linenyi, ukalenge kitambala na kisapi kyawamisha kya linenyi ne kupikula mushipi wa kisapi.+

40 “Kabiji ukasone ne minkukumba, mishipi ya bisapi ne bisochi bya baana ba kwa Alona+ bya buneme kabiji bya buya.+ 41 Ukavwike Alona kolojobe ne baana banji, ukebashinge manyi,+ kwibatongola*+ ne kwibazhijika ne abo bakañingijilenga mwingilo wa buñanga. 42 Kabiji ukebasonene tuputula* twa kisapi kya linenyi twa kuvweta pa binungwa byabo bya lusemo.+ Twafwainwa kulepa kufuma mu musana kufika pa mambwata. 43 Alona ne baana banji bo bafwainwa kwituvwala kimye kyo bakatwelanga mu tente wa lusambakeno nangwa byo bakeyanga ku kya kusokelapo bitapisho na kwingijila mu mpunzha mwazhila, kuchina’mba bakazhatwa ne kufwa. Jino ke jilamuna ja myaka ne myaka kwi aye ne ku baana* banji bakamulondela panyuma yanji.

29 “Abino byo byo wafwainwa kuba pa kwibazhijika pa kuba’mba bakañingijilenga mwingilo wa buñanga: Ukashikule mwana ñombe mulume, mikooko ilume ibiji yabula bulema,+ 2 bashinkwa babula mbizho, bashinkwa banzhingwile babula mbizho bavwangakana na manyi ne bibebulwa byabula mbizho byo bashingako manyi.+ Ukebilenge na bunga bwalamba bwa wichi 3 ne kwibibika mu ntumbe kabiji ukebiletele monka mu ntumbe+ kabiji ukalete ne ñombe mulume ne mikooko ilume ibiji.

4 “Ukalete Alona ne baana banji ba balume ku kibelo kya tente wa lusambakeno+ kabiji ukebovwe na mema.+ 5 Kabiji ukatole bivwalo+ ne kuvwika Alona munkukumba, mukangyo wabula maboko wa kuvwala mukachi ya kajilaya kabula maboko, kajilaya kabula maboko ne fukuta wa pa kyaji, kabiji ukakase mushipi wa kupikula wa pa kajilaya kabula maboko mu musana wanji.+ 6 Ukamukase kitambala ku mutwe ne kubikapo kayukilo kazhila* ka kwipana;+ 7 kabiji ukashikule manyi a kushinga+ ne kumwitulwilao pa mutwe wanji ne kumushinga.+

8 “Kepo ukalete baana banji ba balume kulutwe ne kwibavwika minkukumba+ 9 ne kwibanyinga mishipi ya bisapi Alona ne baana banji ba balume ne kwibavwika bisochi; kabiji buñanga bukekala bwabo kwikala jilamuna ja myaka ne myaka.+ Abino byo byo wafwainwa kutongola Alona ne baana banji ba balume kwingila mwingilo wa buñanga.*+

10 “Ukalete ñombe mulume ku tente wa lusambakeno kabiji Alona ne baana banji ba balume bakatenteke maboko abo pa mutwe wa ñombe mulume.+ 11 Ukepaye ñombe mulume ku meso a Yehoba konka ku kibelo kya tente wa lusambakeno.+ 12 Ukashikulepo mashi amo a ñombe mulume ne kwiakompola na nkompola musunga wobe ne kwiashinga ku nsengo ya ku kya kusokelapo bitapisho,+ kabiji mashi onse ashala ukeechile kunshi ya kya kusokelapo bitapisho.+ 13 Kepo ukakaabule mafuta+ aji ku mila, ne oa aji peulu ya jichima ne mafyo abiji ne mafuta ajipo kabiji ukeasoke kuba’mba akafutumukenga pa kya kusokelapo bitapisho.+ 14 Bino nyama ya ñombe mulume ne mwayi ne busobe bwanji, ukebisoke mu mujilo pangye ya kampu. Ye mulambo wa bubi.

15 “Ukashikule mukooko mulume umo, kabiji Alona ne baana banji ba balume bakatenteke maboko abo pa mutwe wa mukooko.+ 16 Ukepaye uno mukooko mulume kabiji ukashikule mashi anji ne kwiasansa konse konse pa kya kusokelapo bitapisho.+ 17 Ukatetaule mukooko mulume bipimvwa bipimvwa ne kovwa mila yanji+ ne mikupa yanji, ne kwibilumbika pamo na mutwe wanji. 18 Wafwainwa kusoka uno mukooko mulume yense, pa kuba’mba akafutumukenga pa kya kusokelapo bitapisho. Ke mulambo wa kusoka kwi Yehoba, wa bwema bwawama.*+ Ye mulambo wa kusoka kwi Yehoba.

19 “Kabiji ukashikule mukooko mulume mukwabo, Alona ne baana banji ba balume bakatenteke maboko abo pa mutwe wa mukooko.+ 20 Ukepaye uno mukooko mulume ne kushikulapo mashi anji amo ne kwiashinga ku kalebelebe ka ku kutwi kwa kwa Alona kwa kilujo ne ku tulebelebe twa ku matwi a baana banji ba balume twa ku kilujo ne pa byala byabo bya ku maboko a kilujo ne pa byala byabo bya ku kulu kwa kilujo ne kwiasansa konse konse pa kya kusokelapo bitapisho. 21 Kepo ukashikule mashi amo aji pa kya kusokelapo bitapisho ne manyi amo a kushinga+ ne kusansa Alona, bivwalo byanji, baana banji ba balume ne pa bivwalo byabo, pa kuba’mba aye ne bivwalo byanji ne baana banji ba balume ne bivwalo byabo bikekale byazhila.+

22 “Ukakaabule mafuta mu mukooko mulume, aji ku mukila wanuna, mafuta aji ku mila, mafuta aji ku machima, mafyo abiji ne mafuta ajiko+ ne mukupa wa kilujo, mambo ye mukooko mulume wa kwibazhijikila.+ 23 Kabiji ukashikule ne shinkwa wabuluñana ne shinkwa wanzhingwile uji na manyi ne bibebulwa mu ntumbe muji bashinkwa babula mbizho baji ku meso a Yehoba. 24 Wafwainwa kwibibika byonse mu maboko a kwa Alona ne mu maboko a baana banji ba balume, kabiji ukebipepezhe kwikala mulambo wa kupepezha kwi Yehoba. 25 Apa bino, ukebitambule kufuma mu maboko abo ne kwibisoka pa kya kusokelapo bitapisho peulu ya mulambo wa kusoka kwikala bwema bwawama* kwi Yehoba. Ye mulambo wa kusoka kwi Yehoba.

26 “Kabiji ukashikule kakuji ka mukooko wa kuzhijikila+ Alona, ne kwikapepezha kwikala mulambo wa kupepezha kwi Yehoba kabiji kakekale ke kyobe kya kukwabilapo. 27 Wafwainwa kuzhijika kakuji ka mulambo wa kupepezha ne mukupa wa mulambo wazhila ye bapepezhezhe ne ye bafumishe ku mukooko wa kuzhijikilamo+ Alona ne baana banji ba balume. 28 Wafwainwa kwikala wa kwa Alona ne baana banji ba balume kwikala jilamuna ja myaka ne myaka jikalondelanga bena Isalela, mambo ke mulambo wazhila, kabiji ukekala wazhila ukapananga bena Isalela.+ Ke mulambo wabo wazhila kwi Yehoba kufuma ku milambo yabo ya mutende.+

29 “Bivwalo byazhila+ bya kwa Alona bakebingijishenga ku baana banji ba balume+ bakamulondelanga kimye kyo bakebashinganga manyi ne kwibatongola kwingila mwingilo wa buñanga. 30 Ñanga ukafuma mu baana banji ba balume ukamuswana ne kutwela mu tente wa lusambakeno na kwingijila mu mpunzha mwazhila, wafwainwa kwibivwala pa moba atanu na abiji.+

31 “Ukashikule mukooko mulume wa kwibazhijikila, ne kuteekela nyama yanji mu mpunzha mwazhila.+ 32 Alona ne baana banji ba balume bakaje+ nyama ya mukooko mulume ne bashinkwa baji mu ntumbe konka ku kibelo kya tente wa lusambakeno. 33 Bakaje bino bintu byo baingijishe kufuchilamo mambo pa kwibatongola kwikala bañanga* ne kwibazhijika. Pano bino, muntu* ye babula kuswisha kechi wafwainwa kujako ne, mambo ke bintu byazhila.+ 34 Umvwe nyama imo ya mulambo ne shinkwa wa kwibazhijikila byashalapo kufika ne lukelo, wafwainwa kwibisoka mu mujilo.+ Kechi bakebije ne, mambo ke bintu byazhila.

35 “Abino byo byo ukoba kwi Alona ne ku baana banji ba balume, monka mwayila bintu byonse byo nakukambizha. Ukekale moba atanu na abiji a kwibatongola kwikala bañanga.*+ 36 Ukapane ñombe mulume kwikala ke mulambo wa bubi wa kulambula pa juba pa juba wa kufuchila mambo kabiji ukatokeshe kya kusokelapo bitapisho ku bubi kupichila mu kwikifuchila mambo, kabiji wafwainwa kwikishinga manyi a kwikizhijika.+ 37 Ukekale moba atanu na abiji a kufuchilamo mambo kya kusokelapo bitapisho, kabiji wafwainwa kwikizhijika pa kuba’mba kikekale ke kyazhila.+ Yense ukengijilanga ku kya kusokelapo bitapisho, wafwainwa kuzhila.

38 “Abino byo byo ukalambulanga pa kya kusokelapo bitapisho: ukalambulenga mikooko ilume ibiji ya mwaka umo pa juba pa juba kwa kubula kuleka.+ 39 Lukelo ukalambulenga mwana mukooko mulume umo, kabiji kimye kya muntuwa muntuwa* ukalambulenga mukooko mulume mukwabo.+ 40 Kabiji ukalambulenga pamo na mwana mukooko mulume mutanshi, kipimo kimo kya bunga bwalamba kya mu bipimo jikumi bitwela mu efa* bwavwangakana na manyi o baengula a kipimo kimo mu bipimo bina bitwela mu hini* ne mulambo wa binyu wa kipimo kimo mu bipimo bina bitwela mu hini. 41 Ukalambule mwana mukooko mulume wa bubiji pamo na kajo kantutu kamo kimye kya muntuwa muntuwa* pamo na mulambo wa binyu byonka byo ukobanga lukelo. Ukamulambule kwikala bwema bwawama,* kwikala mulambo wa kusoka kwi Yehoba. 42 Ukekalanga ke mulambo wa kusoka kimye kyonse ku bisemi byenu byonse konka ku kibelo kya tente wa lusambakeno ku meso a Yehoba, konka ko nkemananga na kwisamba ne anweba.+

43 “Akuno ko ko nkemana ku bena Isalela ne kwibazhijika na lukumo lwami.+ 44 Nkazhijika tente wa lusambakeno ne kya kusokelapo bitapisho, kabiji nkazhijika Alona ne baana banji ba balume+ pa kuba’mba bakañingijilenga mwingilo wa buñanga. 45 Nkekala mu bena Isalela kabiji nkekala Lesa wabo.+ 46 Ne abo kine bakayuka’mba yami Yehoba Lesa wabo wibafumishe mu kyalo kya Ijipita kuba’mba nkekale mukachi kabo.+ Yami Yehoba Lesa wabo.

30 “Ukalenge kya kusokelapo bitapisho kikekale pa kusokela bya kufutumuna;+ ukekilenge na kichi kya mwiba wa kaseele.+ 2 Kyafwainwa kwesakana monse, mu bula kyubichi umo, mu bwipi kyubichi* umo ne mu kimino makyubichi abiji. Kabiji nsengo yakyo ukeilengele konka.+ 3 Ukekishinge ngolode yawamisha: peulu yakyo ne mu mbaji monse ne ku nsengo yakyo; kabiji ukazhokolosheko momeno wa ngolode. 4 Kabiji ukalenge makosa abiji a ngolode panshi ya momeno wakyo mu mbaji yakyo yonse ibiji, kabiji abino bikakwate mibanda ya kwikisendelako. 5 Ukalenge mibanda na kichi kya mwiba wa kaseele ne kwiishinga ngolode. 6 Kabiji ukekitule kwipi na kipembe kiji kwipi na jikwachi ja Lushimuno+ kyatalañana na kizhiko kiji pa jikwachi ja Lushimuno, konka ko nkemana kwi obewa.+

7 “Alona+ akasokelengapo bya kufutumuna binunka bulongo,+ bikafutumukenga pa kya kusokelapo bitapisho byo akawamishanga malampi+ lukelo. 8 Kabiji Alona byo akambulanga malampi kimye kya muntuwa muntuwa,* akasokenga bya kufutumuna. Abino bya kufutumuna bakebifutumunenga kwi Yehoba kimye kyonse ku bisemi byenu byonse bikeya kulutwe. 9 Kechi mwafwainwa kufutumwinangapo bya kufutumuna bingi+ nangwa kulambwilapo mulambo wa kusoka nangwa mulambo wa kajo ne, kabiji kechi mwafwainwa kwitulwilapo mulambo wa binyu ne. 10 Alona wafwainwa kufuchila mambo pa nsengo yakyo jimo pa mwaka.+ Na mashi akwabo a mulambo wa bubi wa kufuchila mambo,+ akekifuchilenga mambo jimo pa mwaka mu bisemi byenu byonse bikeya kulutwe. Ke kintu kyazhijisha kwi Yehoba.”

11 Kepo Yehoba aambijile Mosesa amba: 12 “Byo ukakonkanyanga bena Isalela ne kwibabala, mwina Isalela+ yense wafwainwa kupana kwi Yehoba kya kukuula bumi* bwanji kimye kya kwibabala. Bafwainwa kuba bino, kuchina’mba pa kwibabala kinkunka kyakeya pe abo. 13 Abino byo bikapananga bonse bo bakabala: kichika kya shekele* mwayila kipimo kya shekele wa pa mpunzha yazhila.*+ Magela* makumi abiji aesakana na shekele. Kichika kya shekele ke kya bupe bya kupana kwi Yehoba.+ 14 Muntu yense ye babala uji na myaka 20 ne kukilapo akapane bya bupe kwi Yehoba.+ 15 Nonshi kechi wafwainwa kupana byavujisha ne, kabiji muyanji naye kechi wafwainwa kupana byakepesha byabula kufikila mu kichika kya shekele* kwikala bya bupe kwi Yehoba bya kwimufuchila mambo a bumi* bwenu ne. 16 Ukatambule ku bena Isalela mali a siliva a kufuchila mambo ne kwiapana kwikala a kwingijisha ku mwingilo wa ku tente wa lusambakeno, kuba’mba kikekale kya kuvulukilako bena Isalela ku meso a Yehoba mu kwimufuchila mambo a bumi* bwenu.”

17 Kabiji Yehoba waambijile Mosesa amba: 18 “Ukalenge shomeka wa mukuba ne kya kumutentekapo;+ kepo ukamubike pakachi aku tente wa lusambakeno aku kya kusokelapo bitapisho ne kubikamo mema.+ 19 Alona ne baana banji ba balume bakowengamo ku maboko ne ku maulu.+ 20 Byo bakatwelanga mu tente wa lusambakeno nangwa byo bakeyanga kwipi na kya kusokelapo bitapisho kuba’mba bengile ne kulambula milambo na mujilo ne kwibifutumuna ku meso a Yehoba, bakowenga mema kuchina’mba bakafwa. 21 Bafwainwa kowa ku maboko ne ku maulu kuchina’mba bakafwa, kabiji kino kikekala ke jilamuna ja myaka ne myaka kwi abo, kwi aye, ku baana banji ne ku bisemi byabo byonse bya kulutwe.”+

22 Kabiji Yehoba waambijile Mosesa amba: 23 “Ukashikule binunka bulongo byawamisha: bipimo 500 ne kichika bya mola wachimba ununka bulongo, bipimo 250 bya kinamonyi ununka bulongo, bipimo 250 bya museke ununka bulongo, 24 bipimo 500 bya kasiya bya mwayila kipimo kya shekele wa pa mpunzha yazhila*+ pamo na kipimo kya hini* ne kya manyi a maolivi. 25 Kepo ukalengeko manyi azhila a kushinga; wafwainwa kwiavwangakanya pamo bulongo.+ Ano akekala ke manyi azhila a kushinga.

26 “Ano manyi ukeashinge ku tente wa lusambakeno+ ne ku jikwachi ja Lushimuno, 27 ku tebulu ne ku bipe byonse bya ku tebulu, ku kya kutulapo malampi ne bipe byakyo byonse, ku kya kusokelapo bya kufutumuna, 28 ku kya kusokelapo bitapisho bya kusoka ne ku bipe byakyo byonse, ku shomeka ne pa kumutenteka. 29 Wafwainwa kwibizhijika kuba’mba bikekale ke byazhijisha.+ Muntu yense ukebingijisha, wafwainwa kwikala wazhila.+ 30 Kabiji ukashinge Alona+ ne baana banji ba balume+ manyi ne kwibazhijika kuba’mba bakañingijilenga mwingilo wa buñanga.+

31 “Ukabuule bena Isalela amba, ‘Ano akekala ke manyi ami azhila a kushinga kufika ne ku bisemi byenu byonse bikeya kulutwe.+ 32 Kechi mukeashinge pa mibiji ya bantutu ne, kabiji kechi mukalenge akwabo apasha ano ne. Mambo azhila. Akatwajijila kwikala azhila kwi anweba. 33 Muntu yense ukalenga manyi aesakana na ano ne kwiashinga pa muntu* ye babula kuswisha, bafwainwa kumuchibako* ku balongo banji.’”+

34 Kepo Yehoba aambijile Mosesa amba: “Ukashikule bipimo bimotu bya binunka bulongo:+ bya shitakite, bya onyicha, binunka bulongo bya galabano ne binunka bulongo byawamisha. 35 Kabiji ukebilenge kwikala bya kufutumuna;+ abino binunka bulongo wafwainwa kwibivwangakanya bulongo na mukele+ kabiji bikekale byawamisha ne kuzhila. 36 Ukatwepo bimo ne kwibitula kwipi na Jikwachi ja Lushimuno jiji mu tente wa lusambakeno konka ko nkemana kwi obewa. Bikekala byazhijisha kwi anweba. 37 Kechi wafwainwa kwilengela bya kufutumuna byaesakana na bino ne.+ Wafwainwa kwibimonanga’mba byazhila ku meso a Yehoba. 38 Muntu yense ukalenga byaesakana na bino kuba’mba akomvwenga bwema bwabyo bwawama, bafwainwa kumuchibako* ku balongo banji.”

31 Yehoba watwajijile kwambila Mosesa amba: 2 “Umvwa, nasala* Bezalela+ mwana wa mulume wa kwa Uli mwana wa mulume wa kwa Hula wa mu mukoka wa bena Yuda.+ 3 Nkamuyuzha na mupashi wa Lesa, nkamupa maana, milangwe ne maana a kuyuka bintu byonse bya busendwe, 4 kuba’mba akalengenga bintu na manono kwingijisha ngolode, siliva ne mukuba, 5 kuchiba mabwe ne kwiabika bulongo+ ne kulenga bintu byapusana pusana kufuma ku bichi.+ 6 Kabiji natongola muntu wa kumukwashako aye Oholyaba+ mwana wa mulume wa kwa Ahisamaka wa mu mukoka wa bena Danyi kabiji nkapana maana ku basendwe* bonse kuba’mba bakalenge bintu byonse byo nakukambizha:+ 7 tente wa lusambakeno,+ jikwachi ja Lushimuno+ ne kizhiko kya kuzhika+ peulu yajo, ne bipe byonse bya ku tente, 8 tebulu+ ne bipe bya ku tebulu, kya kutulapo malampi kya ngolode yawamisha ne bipe byakyo,+ kya kusokelapo bya kufutumuna,+ 9 kya kusokelapo bitapisho bya mulambo wa kusoka+ ne bipe byakyo, shomeka ne kya kumutentekapo,+ 10 bivwalo byawama bya kupikula, bivwalo byazhila bya kwa Alona ñanga, bivwalo bya baana banji ba balume bya kwingijilamo mwingilo wa buñanga,+ 11 manyi a kushinga ne bya kufutumuna binunka bulongo bya ku nzubo yazhila.+ Bakebyube byonse monka mo nakukambizhizha.”

12 Kabiji Yehoba waambijile Mosesa amba: 13 “Ubuule bena Isalela amba, ‘Mwafwainwa kulama masabado ami,+ mambo kyo kiyukilo kiji pakachi kami ne anweba kufika ne ku bisemi byenu bikeya kulutwe kuba’mba mukayuke’mba amiwa Yehoba, yami mbena kwimuzhijika. 14 Mwafwainwa kulama Sabado, mambo ke juba jazhila kwi anweba.+ Muntu yense ukejizhilulula, bafwainwa kumwipaya. Umvwe muntu akengile mwingilo pa jino juba, awo muntu* bafwainwa kumuchibako* ku balongo banji.+ 15 Mukengilenga mingilo mu moba atanu na jimo, bino pa juba ja butanu na bubiji, jikekale ja sabado ja kukokolokelamo.+ Ke juba jazhila kwi Yehoba. Muntu yense ukengila mwingilo pa juba ja Sabado, bafwainwa kumwipaya. 16 Bena Isalela bakalamenga Sabado; bakalamenga Sabado ne mu bisemi byabo byonsetu bikeya kulutwe. Kino kintu ke lulayañano lwa myaka ne myaka. 17 Akino ke kiyukilo kya myaka ne myaka kiji pakachi kami ne bena Isalela,+ mambo mu moba atanu na jimo, Yehoba mo mo alengejile jiulu ne ntanda, kabiji pa juba ja butanu na bubiji wakokolokele ne kupemenwa.’”+

18 Byo apwishishetu kwamba nanji ku Mutumba wa Sinai, Lesa wapele Mosesa mabwe abiji apapakana a Lushimuno,+ Lesa mwine o anembelepo na munwe wanji.+

32 Bantu bamwene’mba Mosesa wabanda bingi ku mutumba.+ Onkao mambo, bakonkene pamo kwi Alona ne kumwambila’mba: “Tulengele lesa etutangijile,+ mambo kechi twayuka kintu kyamwekela uno Mosesa muntu witufumishe mu kyalo kya Ijipita ne.” 2 Ponkapo Alona wibambijile’mba: “Fumyai mashikiyo a ngolode+ aji ku tulebelebe twa ku matwi a bakazhi benu, baana benu ba balume ne baana benu ba bakazhi mundetelebyo.” 3 Byonkabyo, bantu bonse batatwile kufumya mashikiyo a ngolode a ku tulebelebe twa ku matwi abo ne kwiapana kwi Alona. 4 Kepo Alona atambwile ngolode kwi abo ne kwiilenga na kyela kya kupokwelako ne kulengako kipashañano* kya mwana ñombe mulume.+ Kabiji bantu batatwile kwamba’mba: “Anweba bena Isalela, uno ye Lesa wenu wimufumishe mu kyalo kya Ijipita.”+

5 Alona byo amwene kino, washimikile kya kusokelapo bitapisho kwipi na uno mwana ñombe mulume. Kepo Alona abijikile’mba: “Kesha kukekala kijiilo kwi Yehoba.” 6 Onkao mambo, pa juba jalondejilepo bantu babuukile lukelokelo ne kutendeka kulambula milambo ya kusoka ne milambo ya mutende. Byo apwishishe kuba bino, bantu baikele na kuja ne kutoma. Kepo baimene ne kusangalala.+

7 Ponkapo Yehoba waambijile Mosesa amba: “Kunkuluka, mambo bantu bobe bo wafumishe mu kyalo kya Ijipita batamisha.+ 8 Basenduka mu jishinda jo nebakambizhe kuyamo.+ Belengela abo bene kipashañano* kya mwana ñombe mulume, kabiji babena kwikilambila ne kwikitapishisha bitapisho ne kwamba’mba, ‘Anweba bena Isalela, uno ye Lesa wenu wimufumishe mu kyalo kya Ijipita.’” 9 Yehoba wabuujile Mosesa amba: “Namona kuba’mba bano ke bantu bakosa* michima.+ 10 Pano akindeke, na mambo a bukaji bwami mbena kwibavizha kabiji obewa nkakwalula ke kisaka kikatampe.”+

11 Kepo Mosesa asashijile* Yehoba Lesa wanji+ ne kumushikisha’mba: “Mambo ka anweba Yehoba, o musakuzhingijila bantu benu bo mwafumishe mu kyalo kya Ijipita na bulume bukatampe ne na kuboko kwenu kwakosa?+ 12 Nanchi bena Ijipita kechi bakamba’mba, ‘Wajinga na mulanguluko watama pa kwibalupulamo, aye wakebelengatu kwibepayila mu mitumba ne kwibazhiya pano pa ntanda nenyi?’+ Tontololai bukaji bwenu ne kubwezhamo muchima* pa kuba’mba mubule kuleta kino kya malwa pa bantu benu. 13 Vulukai bakalume benu ba Abalahama, Izaka ne Isalela bo mwachipileko ne kwamba’mba: ‘Nkalengela baana* benu kuvula nobe tubangabanga twa mwiulu,+ kabiji kino kyalo kyonse kyo natongola nkekipana ku baana* benu kuba’mba bakekitambule kwikala ke kyabo myaka ne myaka.’”+

14 Onkao mambo, Yehoba wabwezhezhemo muchima* ne kubula kwiboba bantu banji kintu kyatama kyo aambile.+

15 Kepo Mosesa aalulukile ne kukunkuluka kufuma ku mutumba saka asenda mu kuboko kwanji+ mabwe apapakana abiji a Lushimuno.+ Ano mabwe beanembele bushiya ne bushiya; banembelepo kunyuma ne kulutwe. 16 Ano mabwe apapakana bealengele kwi Lesa, ne bintu byo banembelepo Lesa ye wibinembele kya kukololola.+ 17 Yoshua byo aumvwine mawi a bantu babijikilenga, waambijile Mosesa amba: “Mu kampu mubena kumvwanyika kiwowo kya nkondo.” 18 Bino Mosesa wamwambijile’mba:

19 Kabiji Mosesa byo anangijilenga kwipi na kampu ne kumona mwana ñombe+ ne bantu saka bazha, wazhingijile bingi ne kutaya panshi mabwe apapakana ajinga mu kuboko kwanji ne kwialalaula munshi ya mutumba.+ 20 Washikwile mwana ñombe ye balengele ne kumusoka mu mujilo ne kumuvingakanya yense ke bungatu;+ kepo ebusukumwijile mu mema ne kwibatomeshao bena Isalela.+ 21 Kabiji Mosesa washikishe Alona amba: “Nanchi bano bantu bemujimbaikile byepi pa kuba’mba mwibaletele buno bubi bukatampe?” 22 Alona wakumbwile’mba: “Nkambo, kange munzhingijile ne. Anweba mwayukishatu bulongo amba bano bantu bakeba bingi kuba byatama.+ 23 Byonkabyo, bañambijile’mba, ‘Tulengele lesa etutangijile, mambo kechi twayuka kintu kyamwekela uno Mosesa muntu witufumishe mu kyalo kya Ijipita ne.’+ 24 Onkao mambo, amiwa nebambijile namba, ‘Muntu yense uji na bintu bya ngolode ebivuule ne kwibileta kwi amiwa.’ Kepo nebitayile mu mujilo ne abyo byaalukile ke mwana ñombe.”

25 Mosesa wamwene’mba bantu bezhilulula, mambo Alona wibalengejile kwizhilulula, kabiji akino kibalengejile kwibalengulula ku balwanyi babo. 26 Kepo Mosesa aimene ku kibelo kya kampu ne kwamba’mba: “Ñanyi uji ku lubaji lwa Yehoba? Eye ko nji!”+ Kabiji bena Levi bonse bakonkene konka ko ajinga. 27 Ponkapo wibambijile’mba: “Abino byo byaamba Yehoba Lesa wa Isalela amba, ‘Muntu yense akase mpoko yanji mu lubunda ne kupitañana monse mu kampu ku kibelo ku kibelo ne kwipaya mulongo wanji, kwipaya ye ekala nanji kipikipi ne mulunda nanji.’”+ 28 Bena Levi baubile monka mwibabuujile Mosesa. Onkao mambo, banabalume nobe 3,000 bebepayile pa joja juba. 29 Kepo Mosesa aambile’mba: “Lelo mwizhijike* kwi Yehoba, mambo muntu yense waipaya mwananji wa mulume ne mulongo wanji;+ lelo Lesa usakumupesha.”+

30 Pa juba jalondejilepo, Mosesa waambijile bantu amba: “Mwalenga mambo akatampe, pano nsakuya kwi Yehoba ne kumubuula umvwe usakwimulekelako mambo enu.”+ 31 Onkao mambo, Mosesa wabwelele kwi Yehoba ne kumubuula’mba: “Bano bantu balenga mambo akatampe! Belengejile abo bene lesa wa ngolode!+ 32 Pano umvwe mwaswa, balekelaiko mambo abo;+ pakuba umvwe mwakana, mufuute jizhina jami mu buku wenu ye mwanemba.”+ 33 Nangwa byonkabyo, Yehoba waambijile Mosesa amba: “Amiwa nkafuuta mu buku wami muntu yenka wandenga mambo. 34 Pano obewa yanga ukatangijile bantu ne kwibatwala ku mpunzha yo nakubuujile. Umvwa! Malaika wami ukatangilako kulutwe yobe+ kabiji pa juba jo nkebatotolwesha, nkebakabisha na mambo a bubi bwabo.” 35 Kepo Yehoba atumine kinkunka pa bantu na mambo a kuba balengele mwana ñombe, yenka Alona ye ebalengejile.

33 Kabiji Yehoba waambijile Mosesa amba: “Fuma kuno na bantu bo wafumishe mu kyalo kya Ijipita. Yanga ku kyalo kyo nachipile kwi Abalahama, Izaka ne Yakoba amba, ‘Kino kyalo nkekipana ku baana* bobe.’+ 2 Nkatuma malaika kulutwe yobe+ kabiji ukapangamo bena Kenana, bena Amoli, bena Hiti, bena Pelizi, bena Hivi ne bena Yebusi.+ 3 Yanga ku kyalo kyavula mukaka ne buki.+ Pano bino, kechi nkayanga nenu ne, mambo mwi bantu bakosa* michima,+ kuchina’mba nakemwipayila mu jishinda.”+

4 Bantu byo baumvwine uno sawakya watama, batendekele kujila, kabiji kafwako muntu nangwa umo wavwajile bya kwikobaika ne. 5 Yehoba waambijile Mosesa amba: “Buula bena Isalela amba, ‘Mwi bantu bakosa* michima.+ Mu kimyetu kicheche, nsakupita mukachi kenu ne kwimwipaya.+ Onkao mambo, kange muvwale bya kwikobaika ne, kimye kyo mbena kulanguluka bya kwimuba.’” 6 Onkao mambo, bena Isalela balekele kuvwala* bya kwikobaika konkakwa ku Mutumba wa Holeba kuya ne kulutwe.

7 Ponkapo Mosesa wasendele tente wanji ne kukamupopela pangye ya kampu palepeleko na kampu, kabiji wamutumbile’mba tente wa lusambakeno. Muntu yense wakebanga kwamba ne Yehoba,+ walupukanga ne kuya ku tente wa lusambakeno wajinga pangye ya kampu. 8 Mosesa byo ayanga ku tente, bantu bonse baimananga ku bibelo bya ku matente abo saka batala Mosesa kufikatu ne byo atwela mu tente. 9 Mosesa byo atwelanga mu tente, jikumbi ja mulumbulumbu+ jaikijilenga ne kwimana ku kibelo kya tente, Lesa saka abena kwisamba ne Mosesa.+ 10 Bantu bonse byo bamwene jikumbi saka jaimana mulumbulumbu ku kibelo kya tente, muntu yense waimene ne kufukama ku kibelo kya tente wanji. 11 Yehoba wisambile ne Mosesa kilungi na kilungi+ byonkatu muntu byo esamba na muntu mukwabo. Byo abwelele mu kampu, Yoshua+ mwana wa kwa Nuni wa mwingilo wanji kabiji kalume wanji,+ kechi wafumangako ku tente ne.

12 Kepo Mosesa aambijile Yehoba amba: “Anweba mwañambila’mba, ‘Twala bano bantu,’ bino kechi mwambuula ye nsakuya nanji ne. Kabiji mwaamba’mba, ‘Amiwa nakuyuka jizhina,* kabiji nakubila bibusa.’ 13 Mwane umvwe mwangubila bibusa, mbuulai mashinda enu,+ pa kuba’mba nemuyuke ne kutwajijila kubilwa bibusa kwi anweba. Kabiji vulukai’mba kino kyo kisaka kya bantu benu.”+ 14 Aye waambile’mba: “Amiwa* nkaya ne obewa+ kabiji nkakukokolosha.”+ 15 Kepo Mosesa amwambijile’mba: “Umvwe anweba* kechi musakuya ne atweba ne, kange mwitufumye kuno ne. 16 Pano nkayuka byepi namba mwangubila bibusa pamo na bantu benu? Nanchi kechi kuya ne atweba+ ko kukalengela amiwa ne bantu benu kupusanako na bantu bakwabo bonse baji pano pa ntanda nenyi?”+

17 Yehoba watwajijile kwambila Mosesa amba: “Nkoba kino kintu kyo walomba, mambo waubilwa bibusa kabiji nakuyuka jizhina.” 18 Kepo Mosesa aambile’mba: “Mwane mmweshai lukumo lwenu.” 19 Bino aye wamwambijile’mba: “Nkapisha buwame bwami bonse ku meso obe kabiji nkakubuula jizhina jami ja Yehoba;+ kabiji nkobila bibusa yense ye nkeba kubila bibusa ne kubila lusa yense ye nkeba kubila lusa.”+ 20 Bino wanungilepo amba: “Obewa kechi wafwainwa kumona kilungi kyami ne, mambo kafwako muntu wakonsha kumona kilungi kyami ne kwikala na bumi ne.”

21 Kabiji Yehoba wanungilepo amba: “Kuno ko nji kuji mpunzha iji kwipi ne amiwa. Wimane pa jibwe. 22 Lukumo lwami byo lusakupitanga, nsakukutwezha mu mulala wa jibwe kabiji nsakukuzhika kuboko kwami poso napita. 23 Apa bino, mfumyepo kuboko kwami, ne obewa usakumonakotu nyuma yami. Bino kechi usakumona kilungi kyami ne.”+

34 Kepo Yehoba aambijile Mosesa amba: “Songa mabwe apapakana abiji aesakana na mabwe atanshi,+ kabiji nsakunembapo pa mabwe apapakana abiji byambo byonka byajinga pa mabwe atanshi+ o walalawile.+ 2 Ukenengezhe lukelo, mambo lonka lukelo ukaya ku Mutumba wa Sinai ne kwimana konkakwa kwi amiwa peulu ya mutumba.+ 3 Bino kafwako muntu nangwa umo wafwainwa kuya ne obewa ne, kabiji kafwako nangwa umo wafwainwa kumweka ku mutumba ne. Kechi kwafwainwa kutanwa mikooko nangwa bañombe na kujiila kwipi na mutumba ne.”+

4 Onkao mambo, Mosesa wasongele mabwe apapakana abiji aesakenetu na mabwe atanshi ne kwimana lukelo kuya ku Mutumba wa Sinai monka mwamubuujile Yehoba, kabiji Mosesa wasendele mabwe apapakana abiji mu kuboko kwanji. 5 Kepo Yehoba aikijile+ mu jikumbi ne kwimana kwi aye ne kwamba jizhina janji ja Yehoba.+ 6 Yehoba wapichilenga kwi Mosesa ne kwamba’mba: “Yehoba, Yehoba, Lesa wa lusa+ ne kifyele,*+ ubanda kuzhingila,+ wavula butemwe* bubula kwaluka+ ne bukine,*+ 7 umwesha butemwe bubula kwaluka ku biumbi bya bantu,+ ulekela mambo bantu balubankanya,+ mizhilulwila ne bundengamambo bwabo,+ bino kechi ukabula kukabisha muntu uji na mambo ne, kabiji na mambo a bubi bwa bashabo, ukabisha baana, bankana ne bankanununa.”+

8 Ponkapo Mosesa wanyeñamine ne kukunyika kilungi kyanji panshi ne kumulambila. 9 Kepo Mosesa aambile’mba: “Mwane, anweba Yehoba umvwe mwangubila bibusa, nalomba namba anweba Yehoba muye ne atweba+ nangwa kya kuba twi bantu bakosa* michima,+ kabiji mwitulekeleko kulubankanya kwetu ne mambo etu,+ mwitutambule kwikala bunonshi bwenu.” 10 Aye wamwambijile’mba: “Mbena kulaya lulayañano: Nkoba bintu bya kukumya ku bantu bobe bonse, byo nkyangye kubapo* pano pa ntanda ponse ne mu bisaka byonse bya bantu,+ kabiji bantu bonse bo uji nabo bakamona mingilo ya Yehoba, mambo kyo kintu kilenga moyo kyo nsakuba kwi obewa.+

11 “Utesheko muchima ku bintu byo mbena kukukambizha lelo.+ Nkakupangilako bena Amoli, bena Kenana, bena Hiti, bena Pelizi, bena Hivi ne bena Yebusi.+ 12 Wafwainwa kujimuka ne kumona’mba kechi walayañana lulayañano na bantu ba mu kyalo kyo ubena kuyamo ne,+ mambo kino kikekala kitewa kyobe.+ 13 Bino mukakundaule bya kusokelapo bitapisho byabo, mukealalaule mashiki abo azhila, kabiji mukatetaule bichi* byabo bya milumbulumbu byazhila.+ 14 Kechi wafwainwa kupopwela lesa ungi ne,+ mambo Yehoba ukeba* kumwingijilatu bunke bwanji.* Kine, aye ye Lesa ukeba kumwingijilatu bunke bwanji.+ 15 Wafwainwa kujimuka ne kumona’mba kechi walayañana lulayañano na bantu ba mu kyalo ne, mambo umvwe abo bakobe bupite na balesa babo ne kutapishisha balesa babo bitapisho,+ umo ukeya na kukwita ne obewa ukaja ku kitapisho kyanji.+ 16 Kepo obewa ukapana baana bobe ba balume ku baana babo ba bakazhi,+ ne baana babo ba bakazhi bakoba bupite na balesa babo ne kulengela baana bobe ba balume kuba bupite na balesa babo.+

17 “Kechi wafwainwa kulenga balesa ba kyela ne.+

18 “Ukekalenga na Kijiilo kya Bashinkwa Babula Mbizho.+ Ukaje bashinkwa babula mbizho byonkatu byo nakukambizhe; ukobenga kino mu moba atanu na abiji pa kimye kyatongolwa mu ñondo wa Abibi,*+ mambo wafumine mu Ijipita mu yenka uno ñondo wa Abibi.

19 “Mubeji yense wa mulume* ukekala ke wami+ kuvwangakotu ne banyama bobe bonse ba kulela nangwa ñombe mulume mubeji nangwa mubeji wa mukooko.+ 20 Mubeji yense wa mbongolo ukamupimpule na mukooko. Bino umvwe ukabule kumupimpula, ukamuchimune nshingo. Babeji bonse ba mu baana bobe ukebakuule.+ Kafwako wafwainwa kwiya kwi amiwa mabokotu ne.

21 “Ukengilenga mingilo mu moba atanu na jimo, bino pa juba ja butanu na bubiji ukakokolokenga.*+ Nangwatu mu kimye kya kujima ne kunowa, ukakokolokenga.

22 “Kabiji ukavulukenga Kijiilo kya Milungu na bya nsomo pa kunowa wichi ne Kijiilo kya Kubungizha* ku mpelo ya mwaka.+

23 “Bimye bisatu mu mwaka, banabalume bonse bafwainwa kwiya kwi Nkambo wa kine Yehoba, Lesa wa Isalela.+ 24 Mambo nkapanga bisaka bya bantu kwi obewa+ kabiji nkabaisha nyaunda yobe, kafwako muntu nangwa umo ukakwangata kyalo kyobe kimye kyo ukaya na kwimana kwi Yehoba Lesa wobe bimye bisatu mu mwaka ne.

25 “Kechi wafwainwa kulambula mashi a kitapisho kyami pamo na bintu biji na mbizho ne.+ Kabiji bitapisho bya Kijiilo kya Lupitailo, kechi byafwainwa kulaala bufuku bonse kufika lukelo ne.+

26 “Ukalete ku nzubo ya Yehoba Lesa wobe bipangwa byawamisha bya mu bujimi bobe bitanshi kupya.+

“Kechi wafwainwa kuteka mwana mbuzhi mu mukaka wa inanji ne.”+

27 Kabiji Yehoba waambijile Mosesa amba: “Unembe bino byambo,+ mambo monka mwayila bino byambo, mo mo mbena kulayañena ne obewa ne bena Isalela.”+ 28 Mosesa waikele konkakwa pamo ne Yehoba moba 40 mute ne bufuku. Kechi wajiilepo kajo nangwa kutoma mema ne.+ Kabiji Lesa wanembele byambo bya lulayañano pa mabwe apapakana, Mikambizho Jikumi.*+

29 Kepo Mosesa akunkulukile kufuma ku Mutumba wa Sinai saka asenda ne mabwe abiji a Lushimuno mu kuboko kwanji.+ Mosesa byo akunkulukilenga kufuma ku mutumba, kechi wayukile’mba kilungi kyanji kibena kusama ne, mambo wisambile ne Lesa. 30 Alona ne bena Isalela bonse byo bamwene Mosesa, bamwene’mba kilungi kyanji kibena kusama kabiji bachiine kufwenya kwipi ne aye.+

31 Bino Mosesa wibechile. Alona ne bantangi bonse ba jibumba baishile kwi aye, kabiji Mosesa wisambile nabo. 32 Byo apwishishe kuba bino, bena Isalela bonse baishile kwipi ne aye, kabiji wibapele mikambizho yonse Yehoba yo amupele ku Mutumba wa Sinai.+ 33 Mosesa byo apwishishe kwisamba nabo, wivwetele kitambala ku meso.+ 34 Bino Mosesa byo ayanga na kwimana kwi Yehoba na kwisamba nanji, wavuulanga kitambala posotu ne byo afumako.+ Kabiji wafumangako ne kuya na kubuula bena Isalela mikambizho yo atambulanga.+ 35 Kabiji bena Isalela bamwene’mba kilungi kya kwa Mosesa kyasama; kepo Mosesa evwetele kitambala ku meso jibiji posotu ne byo abwelele na kwisamba ne Lesa.*+

35 Kabiji Mosesa wakonkenye pamo jibumba jonse ja bena Isalela ne kwibambila’mba: “Abino byo bintu Yehoba byo akambizha kuba:+ 2 Mukengilenga mingilo mu moba atanu na jimo, bino pa juba ja butanu na bubiji, jikekale jazhila kwi anweba, jo juba ja sabado ja kukokolokelamo kwi Yehoba.+ Muntu yense ukengila mwingilo pa jino juba, bafwainwa kumwipaya.+ 3 Kechi mwafwainwa kubanza mujilo mu mapunzha mo mukekalanga pa juba ja Sabado ne.”

4 Kepo Mosesa aambijile jibumba jonse ja bena Isalela amba: “Abino byo byakambizha Yehoba, 5 ‘Mushikulepo bintu byo muji nabyo ne kwibipana kwi Yehoba.+ Muntu yense waswa apane+ bya bupe kwi Yehoba: ngolode, siliva, mukuba, 6 tonge wafituluka ne wachijisha, boya bwachiluluka, kisapi kyawamisha kya linenyi, boya bwa bambuzhi,+ 7 myayi ya mikooko yo basombesha na musombelo uchila, myayi ya banyama bakatampe ba mu kalunga ka mema, bichi bya mwiba wa kaseele, 8 manyi a mu malampi, balasama kwikala manyi a kushinga ne bya kufutumuna binunka bulongo,+ 9 mabwe a onika, ne mabwe akwabo a kubika pa kajilaya kabula maboko+ ne a kubika mu fukuta wa pa kyaji.+

10 “‘Basendwe*+ bonse bo muji nabo beye ne kulenga bintu byonse byakambizha Yehoba, 11 ko kuba’mba tente wa lusambakeno ne tente wanji ne kya kuvwetapo, tukobelo ne mafulemu akyo, myamba yakyo, mashiki akyo, ne bitako byakyo bya kusokekamo; 12 Jikwachi+ ne mibanda yajo,+ kizhiko+ ne kipembe+ kya kuzhitako; 13 tebulu+ ne mibanda yanji ne bipe byanji byonse ne bashinkwa ba kupana kwi Lesa;+ 14 kya kutulapo malampi+ wa kusamisha kyeya ne bipe byakyo ne malampi akyo ne manyi a kubika mu malampi;+ 15 kya kusokelapo bya kufutumuna+ ne mibanda yakyo; manyi a kushinga ne bya kufutumuna binunka bulongo;+ ne kipembe* kya kushinka mu kibelo kya ku tente wa lusambakeno; 16 kya kusokelapo bitapisho bya mulambo wa kusoka+ ne kyela kyakyo kya mesomeso kya mukuba, mibanda yakyo ne bipe byakyo byonse; shomeka ne kya kumutentekapo;+ 17 bipembe+ byazenzumuka bya ku lubanza, mashiki akyo ne bitako byakyo bya kusokekamo; kipembe* kya kushinka mu kibelo kya ku kipango; 18 mpopo ya ku tente wa lusambakeno ne mpopo ya ku kipango ne mizhinge yayo;+ 19 bivwalo byawamisha bya kupikula+ bya kwingijilamo mwingilo wa ku nzubo yazhila, bivwalo byazhila bya kwa Alona+ ñanga ne bivwalo bya baana banji ba balume bakengilanga mwingilo wa buñanga.’”

20 Onkao mambo, jibumba jonse ja bena Isalela jafumineko kwi Mosesa. 21 Bonse bajinga na muchima wa kupana+ ne bajinga na mupashi wa bumpanyi baishile ne kuleta bya bupe kwi Yehoba kuba’mba bebingijishe ku tente wa lusambakeno, ku mingilo yayo yonse ne ku bivwalo byazhila. 22 Banabalume ne banabakazhi baswile mu michima yabo baishilenga ne kuleta tumapengele, mashikiyo, tumbalaminwe ne bintutu bikwabo bya kwikobaika pamo na mitundu yonse ya bintu bya ngolode. Bonse bapaine milambo* yabo ya ngolode kwi Yehoba.+ 23 Kabiji bonse bajinga na tonge wafituluka ne wachijisha, boya bwachiluluka, kisapi kyawamisha kya linenyi, boya bwa bambuzhi, myayi ya mikooko yo basombesha na musombelo uchila, myayi ya banyama bakatampe ba mu kalunga ka mema, bebiletele. 24 Bonse bajinga na siliva ne mukuba, bebiletele kwikala bya bupe kwi Yehoba, kabiji aba bajinga na bichi bya mwiba wa kaseele nabo bebiletele kwikala bya kwingijisha mu mwingilo.

25 Banabakazhi bonse basendwe+ bazhingile mizhinge na maboko abo kabiji baletele byo bazhingile: bya tonge wafituluka ne wachijisha, bya boya bwachiluluka ne bya kisapi kyawamisha kya linenyi. 26 Kabiji banabakazhi bonse basendwe bajinga na muchima wa kupana, bazhingile boya bwa bambuzhi.

27 Kabiji bantangi baletele mabwe a onika ne mabwe akwabo a kubika pa kajilaya kabula maboko ne mu fukuta wa pa kyaji,+ 28 ne balasama, manyi a kubika mu malampi, manyi a kushinga+ ne a bya kufutumuna binunka bulongo.+ 29 Banabalume ne banabakazhi bonse bajinga na muchima wa kupana, baletele bintu bya kwingijisha ku mwingilo Yehoba ye akambizhe kwingila kupichila mwi Mosesa; bena Isalela baletele bino bintu kwikala bya bupe bya kupana kwi Yehoba.+

30 Kepo Mosesa aambijile bena Isalela amba: “Umvwai, Yehoba wasala Bezalela mwana wa mulume wa kwa Uli, Uli mwana wa mulume wa kwa Hula wa mu mukoka wa Yuda.+ 31 Wamuyuzha na mupashi wa Lesa, wamupa maana, milangwe ne maana a kuyuka bintu byonse bya busendwe 32 kuba’mba akalengenga bintu na manono, kwingijisha ngolode, siliva ne mukuba, 33 kuchiba mabwe ne kwiabika bulongo ne kulenga bintu byapusana pusana kufuma ku bichi. 34 Kabiji Lesa wapa Bezalela ne Oholyaba+ mwana wa mulume wa kwa Ahisamaka wa mu mukoka wa bena Danyi maana a kufunjisha bakwabo. 35 Wibayuzha na maana* a kwingila mingilo yonse ya busendwe, + ya kusona, ya kupikula tonge wafituluka ne wachijisha, boya bwachiluluka, kisapi kyawamisha kya linenyi ne mingilo ya kuluka. Bano banabalume bakengila mingilo yonse ne kunengezha mingilo byo ikekala.

36 “Bezalela ukengijilanga pamo ne Oholyaba ne sendwe yense* Yehoba ye apa maana ne milangwe pa kuba’mba bayuke bya kwingila mingilo yonse yazhila, byonkatu byakambizha Yehoba.”+

2 Kepo Mosesa aichile Bezalela ne Oholyaba ne sendwe yense Yehoba ye apele muchima wa maana+ ne yense wipaine na muchima yense kwingila uno mwingilo.+ 3 Ne abo batambwile bya bupe byonse kufuma kwi Mosesa+ byapaine bena Isalela bya kwingijilamo uno mwingilo wazhila. Nangwa byonkabyo, bena Isalela batwajijile na kuleta milambo kwi Mosesa lukelo pa juba pa juba.

4 Aku batendekatu kwingila mwingilo wazhila, basendwe bonse baishilenga, 5 kabiji baambijile Mosesa amba: “Bintu byaleta bantu byavujisha kukila bibena kukebewa kwingijisha ku uno mwingilo wakambizha Yehoba.” 6 Onkao mambo, Mosesa wibabuujile’mba babijike ku bantu bonse mu kampu amba: “Anweba banabalume ne banabakazhi, lekai kuleta bya bupe byazhila.” Ponkapo bantu bebambijile kuleka kwibileta. 7 Bintu byo baletele byafikijilemo kwingijisha ku uno mwingilo kabiji byavujishe.

8 Onkao mambo, basendwe+ bonse balengele tente wa lusambakeno+ wa bisapi jikumi bya kisapi kyawamisha kya linenyi wa kuzhinga, na tonge wa kifufya ne na boya bwachiluluka ne na tonge wachijisha; wibilengele* saka asonenapo bakelubi.+ 9 Kisapi kyonse kya ku tente kyajinga mu bula makyubichi* 28 ne mu bwipi makyubichi ana. Bisapi byonse bya ku tente byajinga kipimotu kimo. 10 Kepo anungakenye bisapi bitanu bya ku tente, ne bisapi bikwabo bitanu nabyo wibinungakenye pamo. 11 Kabiji walengele tumeso na tonge wa kifufya kunsa ya kisapi kya ku tente kwapela kisapi kitanshi kwa kunungakenya. Kabiji waubile kintutu kimo ne kunsa ya kisapi kikwabo kya ku tente kwa kunungakenya. 12 Kabiji walengele tumeso 50 ku kisapi kimo kya ku tente ne tumeso 50 ku kisapi kikwabo kya ku tente kwa kunungakenya, pa kuba’mba tumeso tukatalañane pamo po tukanungakena. 13 Byonkabyo, walengele tukobelo twa ngolode 50 ne kunungakanya pamo bisapi bya ku tente na tuno tukobelo, kabiji tente wa lusambakeno waikele ke kisapi kimo.

14 Kepo alengele kisapi kya ku tente na boya bwa bambuzhi kya kuvweta pa tente wa lusambakeno. Kabiji walengele bisapi 11 bya ku tente.+ 15 Kisapi kyonse kya ku tente mu bula kyajinga makyubichi 30 ne mu bwipi makyubichi ana. Bisapi byonse 11 bya ku tente byajinga kipimotu kimo. 16 Kepo anungakenye pamo bisapi bitanu bya ku tente kabiji wanungakenye pamo bisapi bikwabo bitanu na kimo. 17 Kabiji walengele tumeso 50 ku tente kwapela po kyanungakena, kabiji walengele tumeso 50 kunsa ya kisapi kikwabo kya ku tente po kyanungakena. 18 Kabiji walengele tukobelo twa mukuba 50 twa kunungakenya tente kwikala ke umo.

19 Walengele kya kuvweta pa tente na myayi ya mikooko yo basombesha na musombelo uchila ne kya kuvwetapo kya myayi ya banyama bakatampe ba mu kalunga ka mema.+

20 Kabiji walengele mafulemu a ku tente wa lusambakeno na kichi kya mwiba wa kaseele+ kyaoloka.+ 21 Fulemu umo umo mu kimino wajinga makyubichi jikumi ne mu bwipi kyubichi umo ne kichika. 22 Fulemu yense wajinga na tumikupa tubiji twaimena pamo. Abino byo byo alengele mafulemu a ku tente wa lusambakeno. 23 Byonkabyo, walengele mafulemu a ku lubaji lwa ku kabeta ka ku bulenge bwa tente wa lusambakeno, mafulemu 20, atala ku kabeta ka ku bulenge. 24 Kepo alengele bitako bya kusokekamo bya siliva 40 ne kwibibika kunshi ya mafulemu 20, bitako bibiji bya kusokekamo kunshi ya fulemu umo ku tumikupa twao tubiji, ne bitako bibiji bya kusokekamo kunshi ya mafulemu onse ku tumikupa twao tubiji.+ 25 Kabiji ku lubaji lukwabo lwa tente wa lusambakeno ku kabeta ka ku buyeke, walengeleko mafulemu 20 ne 26 bitako bya kusokekamo bya siliva 40, bitako bibiji bya kusokekamo kunshi ya fulemu umo ne bitako bibiji bya kusokekamo kunshi ya mafulemu akwabo.

27 Kunyuma ya tente wa lusambakeno ku muzhika, walengejileko mafulemu atanu na umo.+ 28 Kabiji walengele mafulemu abiji kwikala mashiki a ku makonka abiji kunyuma ya tente wa lusambakeno. 29 Walamankenye mashiki abiji kufuma panshi kufika peulu ne kufika ku jikosa jitanshi. Abino byo byo aubile ne ku mashiki a ku makonka abiji. 30 Onkao mambo, mafulemu onse ajinga atanu na asatu ne bitako byao bya kusokekamo bya siliva 16, bitako bibiji bya kusokekamo kunshi ya fulemu yense.

31 Kepo alengele myamba na kichi kya mwiba wa kaseele, myamba itanu ya ku mafulemu a ku lubaji lumo lwa tente wa lusambakeno+ 32 ne myamba itanu ya ku mafulemu a ku lubaji lukwabo lwa tente wa lusambakeno ne myamba itanu ya ku mafulemu a ku lubaji lumo lwa tente wa lusambakeno kunyuma ku muzhika. 33 Kabiji walengele mwamba wa pakachi wapulankene pa mafulemu a pakachi kufuma kunsa ne kunsa. 34 Mafulemu wiashingile ngolode kabiji walengele makosa na ngolode a kukulamo myamba kabiji myamba wiishingile ngolode.+

35 Kabiji walengele kipembe+ na tonge wafituluka ne wachijisha, wachiluluka ne na kisapi kyawamisha kya linenyi wa kuzhinga. Kabiji wasonejilepo+ ne bakelubi.+ 36 Kepo alengele mashiki ana a kichi kya mwiba wa kaseele ne kwiashinga ngolode pamo na tukobelo twa ngolode ne kwiemika pa bitako bya kusokekamo bina bya siliva. 37 Kabiji walengele kipembe* kya kubika mu kibelo kya ku tente na tonge wa kifufya ne na boya bwachiluluka ne na tonge wachijisha, ne na kisapi kyawamisha kya linenyi wa kuzhinga, kyo bapikwila pamo,+ 38 ne mashiki akyo atanu ne tukobelo twao. Washingile ngolode peulu ne pa twakunungakenyako,* bino bitako byao bya kusokekamo bitanu byajinga bya mukuba.

37 Bezalela+ walengele Jikwachi+ na kichi kya mwiba wa kaseele. Mu bula jajinga makyubichi* abiji ne kichika, mu bwipi kyubichi umo ne kichika ne mu kimino kyubichi umo ne kichika.+ 2 Wijishingile ngolode yawamisha mukachi ne pangye kabiji wazhokolwesheko momeno wa ngolode.+ 3 Byo apwishishe kuba bino, wabikileko makosa a ngolode ana, peulu ya mikupa ina ya Jikwachi, ku lubaji lumo wabikileko makosa abiji ne ku lubaji lukwabo wabikileko makosa abiji. 4 Kabiji walengele mibanda na kichi kya mwiba wa kaseele ne kwiishinga ngolode.+ 5 Kepo akujile mibanda mu makosa ajinga mu mbaji ya Jikwachi ya kusendelako Jikwachi.+

6 Kabiji walengele kizhiko na ngolode yawamisha.+ Mu bula kyajinga makyubichi abiji ne kichika, ne mu bwipi kyubichi umo ne kichika.+ 7 Kepo alengele bakelubi babiji+ ba ngolode ba kubunda konse kubiji kwapela kizhiko.+ 8 Wabikile kelubi umo kwapela ne mukwabo ku lubaji lukwabo kwapela. Walengele bakelubi konse kubiji kwapela kizhiko. 9 Bakelubi babiji batanyikile byapi byabo peulu, saka bavweta kizhiko na byapi byabo.+ Kabiji betajile, ne bilungi byabo byatajile pa kizhiko.+

10 Kepo alengele tebulu na kichi kya mwiba wa kaseele.+ Mu bula wajinga makyubichi abiji, mu bwipi kyubichi umo ne mu kimino kyubichi umo ne kichika.+ 11 Kabiji washingileko ngolode yawamisha ne kuzhokoloshako momeno wa ngolode. 12 Kepo azhokolwesheko tumapulanga twapapakana twalepele nobe mu lupi* umo kabiji ku tumapulanga wazhokolwesheko momeno wa ngolode. 13 Kabiji wabikileko makosa a ngolode ana ne kwiabika ku makonka ana panungakena mikupa ina. 14 Makosa a kukulamo mibanda ya kusendelako tebulu ajinga kwipi na tumapulanga. 15 Kabiji walengele mibanda na kichi kya mwiba wa kaseele ya kusendelako tebulu ne kwiishinga ngolode. 16 Byo apwishishe kulenga bino, walengele bipe bya ku tebulu na ngolode yawamisha, masanyi, makapu, masanyi afukumana ne milondo ya kwitulwilamo milambo ya binyu.+

17 Kepo alengele kya kutulapo malampi+ na ngolode yawamisha. Walengele kya kutulapo malampi kya kubunda. Kitako kyakyo, mukupa wakyo, makapu akyo, mituntu yakyo ne maluba akyo byajinga byanungakana.+ 18 Kabiji ku mukupa wakyo kwafumine misampi itanu na umo, misampi isatu ku lubaji lumo ne ikwabo isatu ku lubaji lukwabo. 19 Makapu asatu apasha maluba a amonde ajinga ku lubaji lumo lwa misampi saka aji na mituntu ne maluba apusana pusana, kabiji makapu asatu apasha maluba a amonde ajinga ku lubaji lukwabo lwa misampi saka aji na mituntu ne maluba apusana pusana. Abino byo byo aubile ne na misampi ikwabo itanu na umo yajinga ku mukupa wa ku kya kutulapo malampi. 20 Kabiji ku mukupa wa kya kutulapo malampi kwajinga makapu ana apasha maluba a amonde, saka aji na mituntu ne maluba apusana pusana. 21 Kwajinga mutuntu munshi ya misampi ibiji itanshi ya ku mukupa, ne mutuntu umo munshi ya misampi ibiji yalondejilepo, ne mutuntu umo munshi ya misampi ibiji ikwabo, misampi yajinga ku mukupa wa kya kutulapo malampi yajinga itanu na umo. 22 Mituntu ne misampi ne kya kutulapo malampi kyonse bekilengele kyanungakana kya ngolode ye batubula bulongo. 23 Kepo alengele malampi atanu na abiji+ ne tubimano ne pa kuponena buto bufuma ku muzhinge na ngolode yawamisha. 24 Kabiji wikilengejile pamo na bipe byakyo byonse na talenta* umo wa ngolode yawamisha.

25 Kabiji walengele kya kusokelapo bitapisho+ na kichi kya mwiba wa kaseele. Kyaesakene monse monse, mu bula kyajinga kyubichi umo, mu bwipi kyubichi umo ne mu kimino makyubichi abiji. Kabiji nsengo yakyo beilengejile kumo nakyo.+ 26 Peulu yakyo, mu mbaji yakyo ne ku nsengo yakyo washingileko ngolode yawamisha, wazhokolwesheko ne momeno wa ngolode. 27 Walengele makosa abiji a ngolode panshi ku mbaji yakyo ibiji, a kukulamo mibanda ya kwikisendelako. 28 Byo apwishishe kuba bino, walengele mibanda na kichi kya mwiba wa kaseele kabiji wiishingile ngolode. 29 Walengele ne manyi azhila a kushinga+ ne awamisha ne binunka bulongo,+ byo bavwangakenye bulongo.

38 Walengele kya kusokelapo bitapisho bya mulambo wa kusoka na kichi kya mwiba wa kaseele. Kyaesakene monse monse, mu bula kyajinga makyubichi* atanu, mu bwipi makyubichi atanu ne mu kimino makyubichi asatu.+ 2 Kabiji walengele nsengo yakyo ku makonka ana. Nsengo walengejileko kumo nakyo. Kabiji wiishingile mukuba.+ 3 Kepo alengele bipe byonse bya ku kya kusokelapo bitapisho, bikopo, mafosholo, masanyi afukumana, mafoloko ne bya kwapwilamo mujilo. Bipe byakyo byonse wibilengele na mukuba. 4 Kabiji walengele ne kyela kya mesomeso kya ku kya kusokelapo bitapisho kya mukuba, kya kubika munshi ya tumapulanga twapapakana pakachi kakyo. 5 Walengejileko makosa ana ku makonka ana kwipi na kyela kya mesomeso kya mukuba mwa kukula mibanda. 6 Kabiji walengele mibanda na kichi kya mwiba wa kaseele ne kwiishinga mukuba. 7 Wakujile mibanda mu makosa ajinga mu mbaji ya kya kusokelapo bitapisho ya kwikisendelako. Walengele kya kusokelapo bitapisho nobe kibokoshi kya mapulanga kyaasama peulu ne panshi.

8 Kepo alengele shomeka wa mukuba+ ne kya kumutentekapo kya mukuba; waingijishe tutajilo* twa banabakazhi baingijilenga mingilo ku kibelo kya ku tente wa lusambakeno.

9 Kabiji walengele kipango.+ Ku lubaji lwatala ku kabeta ka ku bulenge bwa kipango, kutala ku kabeta ka ku bulenge, walengejileko bipembe byazenzumuka makyubichi 100 bya kisapi kyawamisha kya linenyi wa kuzhinga.+ 10 Kwajinga mashiki 20 ne bitako bya kwiasokekamo bya mukuba 20, ne nkobelo ya ku mashiki ne tumyamba twao byajinga bya siliva. 11 Kabiji ku lubaji lwa ku kabeta ka ku buyeke kwajinga bipembe byazenzumuka makyubichi 100. Mashiki abyo 20 ne bitako byao bya kwiasokekamo 20, byajinga bya mukuba. Kabiji nkobelo ya ku mashiki ne tumyamba twao twajinga twa siliva. 12 Bino ku lubaji lwa ku muzhika, bipembe byazenzumuka byajinga makyubichi 50. Kwajinga mashiki jikumi ne bitako bya kwiasokekamo jikumi, kabiji nkobelo ya ku mashiki ne tumyamba twao byajinga bya siliva. 13 Lubaji lwa ku musela mu bwipi, lwajinga makyubichi 50 kuselela juba. 14 Kwajinga bipembe byazenzumuka makyubichi 15 ku lubaji lumo lwa ku kibelo ne mashiki asatu ne bitako bya kwiasokekamo bisatu. 15 Kabiji ku lubaji lukwabo lwa ku kibelo kya ku kipango, kwajinga bipembe byazenzumuka makyubichi 15 ne mashiki asatu ne bitako bya kwiasokekamo bisatu. 16 Bipembe byonse byazenzumukile kuzhokoloka kipango, byajinga bya kisapi kyawamisha kya linenyi wa kuzhinga. 17 Bitako bya kusokekamo mashiki byajinga bya mukuba, nkobelo ya ku mashiki ne tumyamba twao byajinga bya siliva, peulu bashingilepo siliva, kabiji kwajinga twa kukashilako twa siliva twa ku mashiki onse a ku kipango.+

18 Kipembe* kya ku kibelo kya ku kipango kyajinga kya kisapi kya kupikula na tonge wafituluka ne wachijisha, na boya bwachiluluka ne na kisapi kyawamisha kya linenyi wa kuzhinga. Mu bula kyajinga makyubichi 20, mu kimino makyubichi 5, pamotu na kimino kya bipembe byazenzumuka bya ku kipango.+ 19 Mashiki akyo ana ne bitako bya kwiasokekamo bina, byajinga bya mukuba. Nkobelo yakyo yajinga ya siliva, peulu yakyo ne tumyamba twakyo bebishingile siliva. 20 Mpopo yonse ya ku tente wa lusambakeno ne kuzhokoloka kipango kyonse, yajinga ya mukuba.+

21 Abino byo bintu byajinga mu tente wa lusambakeno, tente wa Lushimuno,+ byo batanchikile monka mwibakambizhizhe Mosesa kwikala mwingilo wa bena Levi+ ye baingijilenga na lutangijilo lwa kwa Itamala+ mwana wa mulume wa kwa Alona ñanga. 22 Bezalela+ mwana wa mulume wa kwa Uli, Uli mwana wa mulume wa kwa Hula wa mu mukoka wa bena Yuda, waubile byonse Yehoba byo akambizhe Mosesa. 23 Wajinga ne Oholyaba+ mwana wa mulume wa kwa Ahisamaka wa mu mukoka wa bena Danyi, sendwe kabiji wayukile kusona ne kupikula na tonge wafituluka ne wachijisha, wachiluluka ne na kisapi kyawamisha kya linenyi wa kuzhinga.

24 Ngolode yonse yo baingijishe ku mwingilo wa pa mpunzha yazhila yaesakene pamo na ngolode ya mulambo wa kupepezha, yafikile matalenta*+ 29, ne mashekele* 730 monka mwayijile kipimo kya shekele wa pa mpunzha yazhila.* 25 Kabiji siliva wa bantu bo babajile ba mu jibumba wajinga matalenta 100 ne mashekele 1,775 monka mwayijile kipimo kya shekele wa pa mpunzha yazhila.* 26 Kichika kya shekele wapaine muntu umo umo kyajinga kichika kya shekele monka mwayijile kipimo kya shekele wa pa mpunzha yazhila.* Banabalume bonse bajinga pa boba bo babajile bajinga na myaka 20 ne kukilapo,+ bafikile 603,550.+

27 Bitako bya kusokekamo bya pa mpunzha yazhila ne bitako bya kusokekamo bya kipembe byafikile matalenta 100. Bitako bya kusokekamo 100 byaesakene pamo na matalenta 100. Talenta umo wajinga wa ku kitako kya kusokekamo kimo kimo.+ 28 Ku mashekele 1,775 walengeleko nkobelo ya ku mashiki kabiji wiishingile peulu ne kwiilamankanya pamo.

29 Mulambo* wa mukuba wajinga matalenta 70 ne mashekele 2,400. 30 Ku bino bintu, walengeleko bitako bya kusokekamo bya ku kibelo kya ku tente wa lusambakeno, kya kusokelapo bitapisho kya mukuba ne kyela kyakyo kya mesomeso kya mukuba, bipe byonse bya ku kya kusokelapo bitapisho, 31 bitako bya kusokekamo byazhokolokele kipango, bitako bya kusokekamo bya ku kibelo kya ku kipango, mpopo yonse ya ku tente wa lusambakeno ne mpopo+ yonse yazhokolokele kipango.

39 Ku tonge wa kifufya ne ku boya bwachiluluka ne ku tonge wachijisha,+ bapikwileko bivwalo byawama bya kwingijilamo mwingilo wa pa mpunzha yazhila. Basonejile Alona+ bivwalo byazhila byonkatu Yehoba byo akambizhe Mosesa.

2 Walengele kajilaya kabula maboko+ ka ngolode na tonge wa kifufya, boya bwachiluluka, tonge wachijisha ne na kisapi kyawamisha kya linenyi wa kuzhinga. 3 Babunjile ngolode ne kumupapakanya kwikala nobe tumalata, kabiji wituchibawile nobe tonge ne kwitupikwila pamo na tonge wa kifufya ne na boya bwachiluluka ne na tonge wachijisha ne na kisapi kya linenyi kyawamisha, kabiji bebisonene. 4 Balengele matepe a pa bipuzhi a kubika peulu ya kajilaya kabula maboko, bekanungijile ku makonka ako abiji. 5 Kabiji mushipi wa kupikula, ye basonejile ku kajilaya kabula maboko wajinga wa kunyinga pa kajilaya kabula maboko,+ bamulengele na bisapi bintutu bimo, bya ngolode, tonge wa kifufya, boya bwachiluluka ne na tonge wachijisha ne na kisapi kyawamisha kya linenyi wa kuzhinga, byonkatu Yehoba byo akambizhe Mosesa.

6 Kepo babikile mabwe a onika mu tubintu twa ngolode kabiji banembelepo mazhina a baana ba kwa Isalela byonkatu byo banemba shitampa.+ 7 Wiabikile pa matepe a pa bipuzhi a pa kajilaya kabula maboko kwikala mabwe a kuvulukilako baana ba kwa Isalela,+ byonkatu Yehoba byo akambizhe Mosesa. 8 Kepo alengele fukuta wa pa kyaji+ ne kumusona bulongo, byonka byo asonene bulongo kajilaya kabula maboko na ngolode, na tonge wafituluka ne wachijisha, na boya bwachiluluka ne na kisapi kyawamisha kya linenyi wa kuzhinga.+ 9 Pa kumuchimpa waesakene monse monse. Balengele fukuta wa pa kyaji, pa kumuchimpa mu bula ne mu bwipi wajinga nobe mu kuboko.* 10 Batanchikilepo mikuku ina ya kubikamo mabwe. Mu mukuku mutanshi mwajinga jibwe ja lubi, ja topaze ne ja emalode. 11 Mu mukuku wa bubiji mwajinga jibwe ja takozi, ja safila ne ja yasipa. 12 Mu mukuku wa busatu mwajinga jibwe ja lishama, ja akate ne ja ametesete. 13 Kabiji mu mukuku wa buna mwajinga jibwe ja kisolite, ja onika ne ja jedi. Beabikile mu tubintu twa ngolode. 14 Ano mabwe ajinga monka mwayila mazhina 12 a baana ba kwa Isalela, ne ano mazhina beanembele nobe na shitampa, jizhina jimo jimo jaimenejilengako mikoka 12.

15 Kepo bapikwile minyololo ya pa fukuta wa pa kyaji nobe mizhinge ya ngolode yawamisha.+ 16 Kabiji balengele tubintu twa ngolode tubiji ne tumakosa tubiji twa ngolode ne kubika tuno tumakosa tubiji pa tumakonka tubiji twa pa fukuta wa pa kyaji. 17 Byo bapwishishe kuba bino, batwezhezhe mizhinge ibiji ya ngolode mu tumakosa tubiji twajinga pa makonka abiji a pa fukuta wa pa kyaji. 18 Kepo batwezhezhe mizhinge ibiji mu tubintu tubiji twa ngolode ne kwiibika pa matepe a pa bipuzhi bya kajilaya kabula maboko kulutwe. 19 Kabiji balengele makosa abiji a ngolode ne kwiabika ku makonka abiji mukachi kwapela fukuta wa pa kyaji saka atala ku kajilaya kabula maboko.+ 20 Kepo balengele tumakosa twa ngolode tubiji ne kwitubika kulutwe ya kajilaya kabula maboko, munshi ya matepe a pa bipuzhi na peulu ya mushipi wa kupikula po anungakena na kajilaya kabula maboko. 21 Kabiji bakashile fukuta wa pa kyaji na muzhinge wafituluka wapichile mu makosa a pa kajilaya kabula maboko. Pa kuba’mba fukuta wa pa kyaji ekale ponka po ekala pa kajilaya kabula maboko na peulu ya mushipi wa kupikula, byonkatu Yehoba byo akambizhe Mosesa.

22 Kepo alengele mukangyo wabula maboko wa kuvwala mukachi ya kajilaya kabula maboko ye bapikwile yense na tonge wafituluka.+ 23 Kwiulu ya mukangyo wabula maboko na pakachi kwaasamine byonkatu bikala jilaya ja nkondo. Bazhokolwesheko mufumo kuchina’mba wakatabuka. 24 Kabiji kunshi ya mukangyo wabula maboko bazhokolwesheko mapomegulanchi a tonge wafituluka ne wachijisha ne boya bwachiluluka byo bapikwijile pamo. 25 Kabiji balengele tumangengele twa ngolode yawamisha ne kubika tuno tumangengele pakachi ka mapomegulanchi kuzhokoloka kunshi ya mukangyo wabula maboko pakachi ka mapomegulanchi; 26 babikile apo kangengele ka ngolode apo mpomegulanchi kabiji apo kangengele ka ngolode apo mpomegulanchi kuzhokoloka kunshi ya mukangyo wabula maboko ye bavwalanga kwingijilamo mingilo, byonkatu Yehoba byo akambizhe Mosesa.

27 Kabiji basonejile Alona ne baana banji ba balume bivwalo byalepa na kisapi kya linenyi kyawamisha kya kupikula,+ 28 ne kitambala+ kya kisapi kya linenyi kyawamisha, ne bisochi+ bya kisapi kya linenyi kyawamisha ne tuputula*+ twa kisapi kya linenyi wa kuzhinga kyawamisha, 29 ne mushipi wa kisapi kyawamisha kya linenyi wa kuzhinga, tonge wa kifufya, boya bwachiluluka, ne na wachijisha byo bapikwila pamo, byonkatu Yehoba byo akambizhe Mosesa.

30 Kepo balengele kyela kibekauka na ngolode yawamisha kwikala kayukilo kazhila* ka kwipana ne kunembapo amba: “Buzhile bo bwa kwa Yehoba,” byonkatu muntu byo akonsha kunemba pa shitampa.+ 31 Bekikashile na muzhinge wa kifufya ku kitambala, byonkatu Yehoba byo akambizhe Mosesa.

32 Onkao mambo, mwingilo yense wa ku tente wa lusambakeno wapwile, kabiji bena Isalela baubile bintu byonse Yehoba byo akambizhe Mosesa.+ Baubiletu byonkabyo.

33 Kepo baletele tente wa lusambakeno+ kwi Mosesa, tente+ ne bipe byajingamo byonse: tukobelo twanji,+ mafulemu anji,+ myamba yanji,+ mashiki anji, bitako byanji bya kusokekamo;+ 34 kya kuvwetapo kyanji kya myayi ya mikooko yo basombesha na musombelo uchila,+ kya kuvwetapo kyanji kya myayi ya banyama bakatampe ba mu kalunga ka mema ne kipembe kya kuzhika mu kibelo;+ 35 jikwachi ja Lushimuno ne mibanda yajo+ ne kizhiko kyajo;+ 36 tebulu ne bipe byanji+ ne bashinkwa ba kupana kwi Lesa; 37 kabiji baletele kya kutulapo malampi+ kya ngolode yawamisha, malampi akyo ko kuba’mba o batanchika, bipe byakyo byonse+ ne manyi a kubika mu malampi;+ 38 kya kusokelapo bitapisho+ kya ngolode,+ manyi a kushinga,+ bya kufutumuna binunka bulongo, kipembe*+ kya kuzhika mu kibelo kya tente; 39 kya kusokelapo bitapisho kya mukuba+ ne kyela kyakyo kya mesomeso kya mukuba, mibanda yakyo,+ bipe byakyo byonse,+ shomeka ne kya kumutentekapo;+ 40 bipembe byazenzumuka bya ku kipango, mashiki akyo ne bitako byakyo bya kusokekamo,+ kipembe* kya kuzhika mu kibelo kya ku kipango,+ mizhinge yakyo ya ku tente, mpopo yakyo+ ne bipe byakyo byonse bya kwingijisha ku tente wa lusambakeno; 41 Kepo baletele ne bivwalo byawamisha bya kupikula bya kwingijilamo mingilo ku nzubo yazhila, bivwalo byazhila bya kwa Alona ñanga+ ne bivwalo bya baana banji ba balume bya kwingijilamo mwingilo wa buñanga.

42 Byonkabyo, bena Isalela baingijile mingilo yonse, byonkatu Yehoba byo akambizhe Mosesa.+ 43 Mosesa byo apikichile mingilo yabo yonse, wamwene’mba baubijiletu monka Yehoba mo akambizhizhe; kabiji Mosesa wibapesheshe.

40 Kepo Yehoba aambijile Mosesa amba: 2 “Pa juba jitanshi mu ñondo mutanshi, ukafiike tente wa lusambakeno.+ 3 Ukabikemo jikwachi ja Lushimuno+ ne kupembekako kipembe ku Jikwachi.+ 4 Ukatwezhemo tebulu+ ne kubikamo bipe bya pa tebulu kabiji ukatwezhemo kya kutulapo malampi+ ne kwambula malampi akyo.+ 5 Kabiji ukabike kya kusokelapo bya kufutumuna+ kya ngolode kwipi na jikwachi ja Lushimuno ne kubika kipembe* kya kuzhika mu kibelo kya tente wa lusambakeno.+

6 “Ukabike kya kusokelapo bitapisho bya mulambo wa kusoka+ kwipi na kibelo kya tente wa lusambakeno, 7 ne kubika shomeka pakachi aku tente wa lusambakeno aku kya kusokelapo bitapisho, kabiji ukabikemo ne mema.+ 8 Kepo ukalenge kipango+ kuzhokoloka tente wa lusambakeno ne kubikako kipembe*+ ku kibelo kya ku kipango. 9 Kabiji ukashikule manyi a kushinga+ ne kwiashinga ku tente wa lusambakeno yense ne ku bintu byonse bijimo,+ kabiji ukamuzhijike ne bipe bijimo byonse, ne tente wa lusambakeno ukekala wazhila. 10 Ukashinge ku kya kusokelapo bitapisho bya mulambo wa kusoka ne ku bipe byakyo byonse ne kuzhijika kya kusokelapo bitapisho, ne akyo kikekala kyazhijisha.+ 11 Kabiji ukashinge shomeka ne kya kumutentekapo ne kumuzhijika.

12 “Kepo ukalete Alona ne baana banji ba balume kwipi na kibelo kya ku tente wa lusambakeno ne kwibovwa na mema.+ 13 Ukavwike Alona bivwalo byazhila+ kabiji ukamushinge+ manyi ne kumuzhijika, ne aye ukañingijilanga mwingilo wa buñanga. 14 Apa bino, ukalete baana banji ba balume ku bwipi ne kwibavwika minkukumba.+ 15 Ukebashinge manyi byonka byo ukashinga shabo,+ ne abo bakañingijilenga mwingilo wa buñanga, kabiji kushingwa kwabo kukatwajijila kwikala ke buñanga bwa myaka ne myaka kufikatu ne ku bisemi byabo bya kulutwe.”+

16 Mosesa waubile bintu byonse byamukambizhe Yehoba.+ Waubiletu byonkabyo.

17 Mu ñondo mutanshi mu mwaka wa bubiji pa juba jitanshi ja ñondo, bafiikile tente wa lusambakeno.+ 18 Mosesa byo afiikile tente wa lusambakeno,+ wabikile panshi bitako bya kusokekamo, waimikile mafulemu,+ wakujilemo myamba+ ne kwimika mashiki anji. 19 Mosesa watandubwijile tente+ peulu ya tente wa lusambakeno ne kubikapo kya kuvweta+ peulu ya tente, byonkatu Yehoba byo amukambizhe.

20 Byo apwishishe kuba bino, washikwile mabwe a Lushimuno+ ne kwiabika mu Jikwachi,+ kabiji wakujile mibanda+ ku Jikwachi ne kuzhikapo kizhiko+ peulu ya Jikwachi.+ 21 Mosesa wabikile Jikwachi mu tente wa lusambakeno ne kubika kipembe+ kya kuzhita ku jikwachi ja Lushimuno,+ byonkatu Yehoba byo amukambizhe.

22 Kabiji Mosesa wabikile tebulu+ mu tente wa lusambakeno ku lubaji lwa ku kabeta ka ku buyeke bwa tente wa lusambakeno pangye ya kipembe. 23 Kabiji watanchikile bashinkwa+ pa tebulu kwi Yehoba, byonkatu Yehoba byo akambizhe Mosesa.

24 Wabikile kya kutulapo malampi+ mu tente wa lusambakeno kulutwe ya tebulu ku lubaji lwa ku kabeta ka ku bulenge bwa tente wa lusambakeno. 25 Kabiji waambwile malampi+ ku meso a Yehoba, byonkatu Yehoba byo akambizhe Mosesa.

26 Kabiji Mosesa wabikile kya kusokelapo bitapisho kya ngolode+ mu tente wa lusambakeno kwipi na kipembe, 27 pa kuba’mba asokelepo bya kufutumuna binunka bulongo,+ byonkatu Yehoba byo akambizhe Mosesa.+

28 Kepo abikile kipembe*+ mu kibelo kya tente wa lusambakeno.

29 Mosesa wabikile kya kusokelapo bitapisho bya mulambo wa kusoka+ ku kibelo kya tente wa lusambakeno, pa kuba’mba alambwilepo mulambo wa kusoka+ ne mulambo wa kajo, byonkatu Yehoba byo amukambizhe.

30 Kepo abikile shomeka pakachi aku tente wa lusambakeno aku kya kusokelapo bitapisho ne kubikamo mema a kowa.+ 31 Mosesa ne Alona ne baana banji ba balume baowelemo ku maboko ne ku maulu. 32 Kimye kyonse kyo batwelanga mu tente wa lusambakeno nangwa pa kuya ku kya kusokelapo bitapisho, baowangamo,+ byonkatu Yehoba byo akambizhe Mosesa.

33 Kepo alengele kipango+ kuzhokoloka tente wa lusambakeno ne kya kusokelapo bitapisho, kabiji wabikile kipembe* mu kibelo kya ku kipango.+

Onkao mambo, Mosesa wapwishishe kwingila. 34 Kabiji jikumbi javwetele tente wa lusambakeno ne lukumo lwa Yehoba lwakumbene mu tente wa lusambakeno.+ 35 Mosesa kechi wakonsheshe kutwela mu tente wa lusambakeno ne, mambo jikumbi jajinga ponka peulu ya tente wa lusambakeno ne lukumo lwa Yehoba lwakumbene monka.+

36 Mu lwendo lwabo lonse, bena Isalela baimenenga ne kuya umvwe jikumbi jafumapo pa tente wa lusambakeno.+ 37 Pano bino, umvwe jikumbi jabula kufumapo, kechi baimenenga ne kuya ne, kufikatu ne juba jo jikafumapo.+ 38 Mambo mu lwendo lwabo lonse, jikumbi ja Yehoba jaikalanga peulu ya tente wa lusambakeno mute, kabiji bufuku paikalanga mujilo ne ba mu nzubo ya kwa Isalela bonse bamumonanga.+