NEHEMIYA

1 Byambo bya kwa Nehemiya*+ mwana wa kwa Hakaliya: Mu ñondo wa Kiselevu,* mu mwaka wa bu 20, najinga mu Shushani,*+ muji bishimikwa byakosa.* 2 Pa kyonkakya kimye, Hanani+ wa mu balongo bami, waishile na banabalume bamo kufuma ku Yuda, ne amiwa nebashikishe pa mambo a Bayudea bapulukile mu buzha+ ne biji Yelusalema. 3 Abo bakumbwile’mba: “Aba bashala mu kibunji bapulukile mu buzha babena kumanama bingi kabiji bebalengesha bumvu.+ Masakwa a Yelusalema akunduka+ ne binzhilo byao bebisoka na mujilo.”+

4 Byo naumvwinetu bino byambo, naikele panshi ne kujila pa moba avula, kabiji nazhikijilwenga na nzala+ ne kulomba kwi Lesa wa mwiulu. 5 Naambile namba: “Anweba Yehoba, Lesa wa mwiulu, Lesa mukatampe kabiji ulengesha moyo yenka anweba mulama lulayañano lwenu ne kumwesha butemwe bubula kwaluka ku boba bemutemwa kabiji balama mikambizho yenu,+ 6 nemusashijila namba, kutwi kwenu kuteleke ne meso enu alabe kuba’mba muteleke ku lulombelo lwami amiwa kalume wenu lo mbena kulomba kwi anweba lelo, mute ne bufuku,+ pa mambo a bakalume benu, bena Isalela, saka nsolola mambo alenga bena Isalela kwi anweba. Twalenga mambo, amiwa ne ba mu nzubo ya batata.+ 7 Twauba kintu kyatama bingi kwi anweba+ pa kubula kulama mikambizho, malamuna ne mizhilo yo mwapele Mosesa+ kalume wenu.

8 “Mwane vulukai byambo byo mwakambizhe* Mosesa kalume wenu amba: ‘Inge mwabula kwikala ba kishinka, nkemupalañenya mu bantu.+ 9 Bino inge mukabwele kwi amiwa ne kulama mikambizho yami ne kwiikookela, nangwa kya kuba bakemupalañenya kwapela jiulu, nkemukonkanya pamo+ kufuma koko ne kwimuleta mu mpunzha yo nasala mwa kwikala jizhina jami.’+ 10 Abo ke bakalume benu kabiji bantu benu, bonka bo mwapokolwele na bulume bwenu bukatampe ne na kuboko kwenu kwakosa.+ 11 Anweba Yehoba, nemusashijila, kutwi kwenu kuteleke ku lulombelo lwami amiwa kalume wenu ne ku lulombelo lwa bakalume benu basekela mu kwakamwa jizhina jenu, kabiji napopwela mwane, ngubilai byawama amiwa kalume wenu lelo, kabiji uno muntu angubile lusa.”+

Amiwa najinga kaseya wa mfumu.+

2 Mu ñondo wa Nisanyi,* mu mwaka wa bu 20+ wa Mfumu Atazakeshi,+ bamunengezhejile binyu, kabiji byonka byo kyaikalanga kimye kyonse nashikwile binyu ne kwibipana ku mfumu.+ Bino kechi nakipopomenwepo kala mu kyenyi kyanji ne. 2 Onkao mambo, mfumu wangipwizhe’mba: “Mambo ka o ubena kumwekela kupopomenwa saka wabula kukolwa? Akwe ke kupopomenwa kwa mu muchima kechi kintu kikwabo ne.” Ponkapo naumvwine bingi moyo.

3 Kepo nakumbwile mfumu amba: “Anweba mfumu mwikale myaka! Mambo ka o nafwainwa kubujila kupopomenwa muzhi, mpunzha ko bazhiika bashakulu bami byo yashalatu masala, ne bibelo byanji bebisoka na mujilo?”+ 4 Kepo mfumu angipwizhe’mba: “Ñanyi kintu kyo ubena kukeba?” Ponkapotu nalombele kwi Lesa wa mwiulu.+ 5 Kepo namubuujile mfumu namba: “Mwane inge kimutokela ku muchima anweba mfumu kabiji inge amiwa kalume wenu naubilwa bibusa kwi anweba, muntume ku Yuda ku muzhi ko bazhiika bashakulu bami kuba’mba nkamushimukulule.”+ 6 Ponkapo mfumu ne mukazhanji saka aikala nanji, wangipwizhe’mba: “Ukekalako moba anga, kabiji ukabwela kimye ka?” Byonkabyo, kyamutokele ku muchima mfumu kuntuma,+ kabiji namubuujile kimye.+

7 Kepo namubuujile mfumu amba: “Inge kimutokela ku muchima anweba mfumu, mpai makalata a kupa babinemanga ba kibunji kya ku Bushiya bwa Mukola,*+ kuba’mba bakanswishe kupita mu mutende poso nkafike ku Yuda, 8 ne nkalata ya kupa Asafwa kalama wa Ntanda ya Bichi bya Mfumu,* kuba’mba akampe bichi bya myamba ya ku bibelo bya Kyamba+ kya ku Nzubo,* ne ya ku masakwa a muzhi+ ne ya ku nzubo ko nkaya.” Onkao mambo, mfumu wiampele,+ mambo kuboko kwa Lesa wami kwajinga pe amiwa.+

9 Kepo nafikile ku babinemanga ba kibunji kya ku Bushiya bwa Mukola ne kwibapa makalata afumine ku mfumu. Kabiji mfumu wantumine pamo na bakulumpe ba bashilikale ne benda pa bambili. 10 Sanabalata+ mwina Holona ne Tobiya+ kiloolo* mwina Amonyi+ byo baumvwine kino, kibafichile bingi ku muchima amba muntu waiya na kubila bena Isalela byawama.

11 Byo papichile moba, nafikile mu Yelusalema, kabiji naikelemo moba asatu. 12 Naimene bufuku, amiwa ne banabalume bacheche bo najinga nabo, kabiji kechi nabuujilepo muntu nangwa umo kintu kyabikile Lesa wami mu muchima wami kya kubila Yelusalema ne, kabiji kechi najingapo na nyama mukwabo ne, kanatu yenka ye naendelengapo. 13 Kabiji nalupukile bufuku kupichila mu Kibelo kya ku Musanza,+ ne kukapita kulutwe ya Nsulo ya Muloolo Mukatampe ku Kibelo kya ku Milumba ya Buto,+ kabiji napikichile masakwa a Yelusalema akundukile ne bibelo byao byapile na mujilo.+ 14 Kabiji napichile ku Kibelo kya ku Nsulo+ ne ku Kizhiba kya Mfumu, bino kechi pajinga mpunzha yabaya pa kupita nyama ye naendelengapo ne. 15 Bino natwajijile kupita mu kimpachiko*+ bufuku, saka mpikita nsakwa, byo napwishishe naalulukile ne kutwelela ku Kibelo kya ku Kimpachiko, kepo nabwelele.

16 Bakalama ba kibiji+ kechi bayukile ko nayile ne kintu kyo naubilenga ne, mambo kechi nakibuujile Bayudea, bañanga, babineme, bakalama ba kibiji ne ba mingilo bonse kintu nangwa kimo ne. 17 Kepo nebambijile namba: “Mwamona malwa o tujimo, ne Yelusalema byo ashala ke masalatu ne bibelo byanji bebisoka na mujilo. Twayai tushimukulule masakwa a Yelusalema pa kuba’mba buno bumvu bubule kutwajijila.” 18 Kabiji nebabuujile Lesa wami byo ankwashishe+ ne byambo byañambijile mfumu.+ Ponkapo baambile’mba: “Twayai tushimike.” Byonkabyo, bekoseshe* abo bene na bene kuba’mba bengile mwingilo wawama.+

19 Sanabalata mwina Holona ne Tobiya+ kiloolo* mwina Amonyi+ ne Geshema mwina Alabya+ byo baumvwine kino, batendekele kwitukosamika+ ne kwitwendeleka amba: “Mubena kuba ka? Nanchi mubena kusatukila mfumu nyi?”+ 20 Nangwa byonkabyo, nakumbwile namba: “Lesa wa mwiulu ye usakwitukwasha,+ kabiji atweba bakalume banji tusakwimana ne kushimika; bino anweba kechi mujimo na lubaji nangwa na luusa nangwa na kya kwimuvulukilako mu Yelusalema ne.”+

3 Eliashiba+ ñanga mwine mukatampe ne balongo banji batendekele kushimika Kibelo kya Mikooko.+ Bekizhijikile*+ ne kubikako binzhilo; kabiji bazhijikile mpunzha kukafika ne ku Kyamba kya Miya,+ ne kukafika ku Kyamba kya Hananela.+ 2 Kabiji banabalume bena Yeliko+ bo balondejilepo pa kushimika; kabiji kufuma abo palondejile Zakula mwana wa kwa Imuli.

3 Baana ba kwa Hasenaa bashimikile Kibelo kya Masabi;+ babikileko mapulanga+ ne kubikako binzhilo, bya kushinkilako ne mipingilo. 4 Kabiji Melemota+ mwana wa kwa Uliya, Uliya mwana wa kwa Hakoza ye walondejilepo kuwamisha paonaikile, kabiji Meshulama+ mwana wa kwa Belekiya, Belekiya mwana wa kwa Meshezabela ye walondejilepo kuwamisha paonaikile, ne Zadoka mwana wa kwa Beana ye walondejilepo kuwamisha paonaikile. 5 Kabiji bena Tekoa+ bo balondejilepo kuwamisha paonaikile, bino banabalume babo baya nkuwa kechi bepelwile kuba’mba bengileko* uno mwingilo wa bankambo yabo ne.

6 Yoyada mwana wa kwa Pasea ne Meshulama mwana wa kwa Besodeya bawamishishe Kibelo kya Muzhi wa Kala;+ babikileko mapulanga ne kubikako binzhilo, bya kushinkilako ne mipingilo. 7 Melatiya mwina Gibeona+ ne Yadonyi mwina Melonata bo balondejilepo kuwamisha paonaikile, bajinga banabalume bena Gibeona ne bena Mizipa,+ bonka bo batangijilenga kwi* kinemanga wa kibunji kya ku Bushiya bwa Mukola.*+ 8 Uziela mwana wa kwa Hahaya sendwe wa ngolode, ye walondejilepo kuwamisha paonaikile, kabiji Hananiya wayukile kuvwangakanya binunka bulongo,* ye walondejilepo kuwamisha paonaikile; kabiji babikile kyalanta* mu Yelusalema kukafika ne ku Nsakwa Ikatampe.+ 9 Kabiji Lefwaya mwana wa kwa Hula, kinemanga wa kichika kya nkambi ya Yelusalema, ye walondejilepo kuwamisha paonaikile. 10 Yedaya mwana wa kwa Halumafe ye walondejilepo pa kuwamisha paonaikile kulutwe ya nzubo yanji, ne Hatushi mwana wa kwa Hashabaneya ye walondejilepo kuwamisha paonaikile.

11 Malakiya mwana wa kwa Halima+ ne Hashuba mwana wa kwa Pahata-moabu+ bawamishishe lubaji lukwabo* pamo ne Kyamba kya Bitofu.+ 12 Kabiji Shaluma mwana wa kwa Haloheshi, kinemanga wa kichika kya nkambi ya Yelusalema, ye walondejilepo na baana banji ba bakazhi pa kuwamisha paonaikile.

13 Hanuna ne bangikazhi ba mu Zanoa+ bawamishishe Kibelo kya ku Musanza;+ bekishimikile ne kubikako binzhilo, bya kushinkilako, ne mipingilo, kabiji bawamishishe ne nsakwa yajinga makyubichi 1,000* kukafika ne ku Kibelo kya ku Milumba ya Buto.+ 14 Malakiya mwana wa kwa Lekaba, kinemanga wa nkambi ya Bete-hakelema,+ wawamishe Kibelo kya ku Milumba ya Buto; wikishimikile ne kubikako binzhilo, bya kushinkilako ne mipingilo.

15 Shaluni mwana wa kwa Kolahoze, kinemanga wa nkambi ya Mizipa+ wawamishe Kibelo kya ku Nsulo;+ wikishimikile pamo na musemi wakyo, wabikileko binzhilo, bya kushinkilako ne mipingilo yakyo, kabiji wawamishishe ne nsakwa ya ku Kizhiba+ kya Mukola wa ku Mashamba a Mfumu+ kukafika ne ku kya Kukanjijilapo+ Kiji na pa Kunyanta kyafumine mu Muzhi wa Davida.+

16 Kabiji Nehemiya mwana wa kwa Azebuka, kinemanga wa kichika kya nkambi ya Bete-zula,+ ye walondejilepo kuwamisha paonaikile patalañene na Mapunzha a Kuzhiikamo a kwa Davida+ kukafika ne ku kizhiba+ kyo bapoyile ne kukafika ku Nzubo ya Babilobo.

17 Kabiji bena Levi bo balondejile pe aye kuwamisha paonaikile: Lehumi mwana wa kwa Bani; ne Hashabiya, kinemanga wa kichika kya nkambi ya Keila+ ye walondejilepo kuwamisha nkambi yanji. 18 Balongo banji bo balondejile pe aye kuwamisha paonaikile: Bavwai mwana wa kwa Henadada, kinemanga wa kichika kya nkambi ya Keila.

19 Eza mwana wa kwa Yeshua,+ kinemanga wa ku Mizipa, ye walondejilepo kuwamisha lubaji lukwabo lwatalañene na kwa kutuntukila pa kuya ku Kishimikwa ko Balaminanga Byela bya Nkondo Pachimpukila Nsakwa.+

20 Baluka mwana wa kwa Zabai+ ye walondejile pe aye byo aingijilenga na mukoyo ne kuwamisha lubaji lukwabo, kufuma Pachimpukila Nsakwa kukafika ne ku kibelo kya nzubo ya kwa Eliashiba+ ñanga mwine mukatampe.

21 Melemota+ mwana wa kwa Uliya, Uliya mwana wa kwa Hakoza ye walondejilepo kuwamisha lubaji lukwabo, kufuma ku kibelo kya nzubo ya kwa Eliashiba kukafika ne kwapela nzubo ya kwa Eliashiba.

22 Kabiji bañanga, banabalume ba mu nkambi ya Yodano,*+ bo balondejile pe aye kuwamisha paonaikile. 23 Benjamina ne Hashuba bo balondejile pe aye kuwamisha paonaikile patalañene na nzubo yabo. Kabiji Azaliya mwana wa kwa Maaseya, Maaseya mwana wa kwa Ananiya ye walondejilepo kuwamisha paonaikile kwipi na nzubo yanji. 24 Binuwi mwana wa kwa Henadada ye walondejilepo kuwamisha lubaji lukwabo, kufuma ku nzubo ya kwa Azaliya kukafika ne Pachimpukila Nsakwa+ ne kufika ku jikonka.

25 Palalu mwana wa kwa Uzai ye walondejilepo kuwamisha paonaikile patalañene na Pachimpukila Nsakwa ne kyamba kyafuma ku Nzubo* ya Mfumu,+ kya peulu kya ku Lubanza wa Bakasopa.+ Pedaya mwana wa kwa Paloshi+ ye walondejile pe aye.

26 Kabiji bakalume* ba ku nzubo ya Lesa+ bonka baikalanga mu Ofela+ bawamishishenga paonaikile kukafika ne kulutwe ya Kibelo kya Mema+ ku musela ne ku kyamba kyasubukile.

27 Kabiji bena Tekoa+ bo balondejile pe aye kuwamisha lubaji lukwabo, kufuma kwatalañene na kyamba kikatampe kyasubukile kukafika ne ku nsakwa ya Ofela.

28 Bañanga bawamishishenga paonaikile peulu ya Kibelo kya Bambili,+ bonse bawamishe patalañene na nzubo yabo.

29 Zadoka+ mwana wa kwa Imela ye walondejilepo kuwamisha paonaikile patalañene na nzubo yanji.

Kabiji Shemaya mwana wa kwa Shekaniya, kalama wa Kibelo kya ku Musela+ ye walondejilepo kuwamisha paonaikile.

30 Hananiya mwana wa kwa Shelemiya ne Hanuna mwana wa butanu na bumo wa kwa Zalafe bo balondejile pe aye kuwamisha lubaji lukwabo.

Kabiji Meshulama+ mwana wa kwa Belekiya ye walondejilepo kuwamisha paonaikile patalañene na kibamba kyanji kikatampe.

31 Malakiya wa mu jibumba ja basendwe ba ngolode ye walondejilepo kuwamisha paonaikile kukafika ne ku nzubo ya bakalume* ba ku nzubo ya Lesa+ ne ya basulu, kwatalañene na Kibelo kya Kukonkenako ne kukafika ku kibamba kya peulu kya ku jikonka.

32 Kabiji pakachi ka kibamba kya peulu kya ku jikonka ne Kibelo kya Mikooko,+ basendwe ba ngolode ne basulu bo bawamishishenga paonaikile.

4 Sanabalata+ byo aumvwinetu’mba tubena kushimukulula nsakwa, waubile bukaji ne kuzhingila, kabiji waendelekelenga Bayudea. 2 Kabiji waambile balongo banji ne nzhita ya bena Samaliya saka bomvwa, amba: “Bano Bayudea babula kukosa babena kuba ka? Nanchi bakooba kino bunke bwabo nyi? Nanchi bakatapishanga bitapisho nyi? Abya bakapwisha mu juba jimo nyi? Nanchi mabwe o basoka aji pa milumba ya bibumbulubwe bakealengela kwikala atuntulu jibiji nyi?”+

3 Kabiji Tobiya+ mwina Amonyi,+ waimene kwipi ne aye, waambile’mba: “Umvwe lubwala wakanjila pa kyo babena kushimika, wakonsha kukundula nsakwa yabo ya mabwe.”

4 Umvwai, anweba Lesa wetu, mambo betulengulula,+ kabiji lengelai mwenga wabo abwele pa mitwe yabo,+ ne kwibalengela kwikala nobe bipukulwa ne kwikala bazha mu kyalo kikwabo. 5 Kabiji kange muvwetepo pa mambo abo nangwa kufuuta bubi bwabo ku meso enu ne,+ mambo batuka bantungi.

6 Byonkabyo, twatwajijile kushimika nsakwa, kabiji nsakwa yonse twiinungile ne kwiishimukulula kichika kya kimino kyayo, kabiji bantu batwajijile kutako muchima ku mwingilo.

7 Sanabalata, Tobiya,+ bena Alabya,+ bena Amonyi ne bena Ashadoda+ byo baumvwinetu’mba mwingilo wa kuwamisha nsakwa ya Yelusalema ubena kwendatu bulongo ne kuba’mba pa mapunzha pashalashala babena kushinkapo, bazhingijile bingi. 8 Baumvwañene amba bakaye na kulwisha Yelusalema ne kuletamo bufinda. 9 Bino twalombele kwi Lesa wetu, kabiji na mambo a abo twabikile bakasopa ba kwituzhikijila mute ne bufuku.

10 Nangwa byonkabyo, Bayudea baambilenga’mba: “Ngovu ya babena kwingila* yakepa kabiji kuji bibumbulubwe byavula; kechi tukakonsha kushimika nsakwa ne.”

11 Kabiji balwanyi betu baambilenga’mba: “Saka bakyangye kuyuka nangwa kwitumona, tukatwela mukachi kabo ne kwibepaya ne kulekesha mwingilo.”

12 Kimye kyonse kyaiyanga Bayudea bo baikalanga nabo kipikipi, betubuulanga javula* amba: “Bakeya na kwitulukuka kufuma konse konse.”

13 Onkao mambo, nabikile bantu mu mapunzha ajinga panekuka kunyuma ya nsakwa patoka, kabiji nebatanchikile monka mwayijile bisemi byabo na mapoko abo, mafumo abo ne mata abo a mikanda. 14 Byo namwene’mba baji na moyo, ponkapotu naimene ne kwambila babineme+ babo ne bakalama bakibiji ne bantu bonse amba: “Kange mwibachine ne.+ Vulukai Yehoba, yenka uji na bulume bukatampe kabiji ulengesha moyo;+ mulwileko balongo benu, baana benu ba balume ne baana benu ba bakazhi, bakazhi benu ne mazubo.”

15 Balwanyi betu byo baumvwine’mba twayuka byo baubilenga ne kuba’mba Lesa wa kine wavulañanya byo balangulukilenga, atweba bonse twabwelele na kwingila ku nsakwa. 16 Kufumatu pa joja juba kuya ne kulutwe, kichika kya banabalume bo najinga nabo baingijilenga mwingilo,+ kabiji kichika kya bakwabo bajinga na mafumo, makebo, mata a mikanda, ne malaya a kyela. Kabiji babinemanga+ baimene kunyuma ya Bayudea bonse 17 bashimikilenga nsakwa. Aba batunchilenga bipe baingijilenga mwingilo na kuboko kumo, ku kuboko kukwabo saka kuji kilwilo.* 18 Kabiji ntungi yense wakashile mpoko mu lubunda wanji aku na kushimika, kabiji wa kuvumya lusengo+ waimene kwipi ne amiwa.

19 Kepo naambijile babineme ne bakalama bakibiji ne bantu bonse namba: “Mwingilo wabaya bingi, kabiji twabalañana pa nsakwa twaimena palepa na paji muntu mukwabo. 20 Inge mwaumvwa kuvuma kwa lusengo, mwafwainwa kukonkana pamo ko tuji. Lesa wetu uketulwilako.”+

21 Byonkabyo, twatwajijile kwingila kichika kikwabo saka baji na mafumo, kufumatu ku makya kufika ne tubangabanga byo twatendekele kumweka. 22 Pa kyonkakya kimye, naambijile bantu namba: “Muntu yense pamo na wa mwingilo wanji, balaale mu Yelusalema bufuku, basakwitusopanga bufuku kabiji mute basakwingilanga.” 23 Onkao mambo, amiwa, balongo bami, ba mingilo bami,+ ne bakasopa bandondejile, kechi twavuujile bivwalo byetu ne, kabiji atweba bonse twajinga na bilwilo mu maboko etu a kilujo.

5 Nangwa byonkabyo, bantu ne bakazhi babo bejizhañenyenga bingi na mambo a balongo babo Bayudea.+ 2 Bamo baambilenga’mba: “Twavula bingi na baana betu ba balume ne baana betu ba bakazhi. Twafwainwa kutambula kajo ka kuja pa kuba’mba twikale na bumi.” 3 Bakwabo baambilenga’mba: “Tubena kupana majimi etu ne majimi etu a miñanzañanza ne mazubo etu kwikala bya kukwachilamo kuba’mba twikale na kajo mu kino kimye kya kipowe kya nzala.” 4 Kabiji bakwabo nabo baambilenga’mba: “Twakongola mali a majimi etu ne a majimi etu a miñanzañanza a kupana ke mulambo wa mfumu.+ 5 Twi mubiji umo ne mashi amo na balongo* betu, kabiji baana betu bajitu pamo na baana babo; nangwa byonkabyo, twaalula baana betu ba balume ne baana betu ba bakazhi ke bazha, kabiji baana betu ba bakazhi bamo baya kala mu buzha.+ Bino bulume bwa kulekesha kino tufwabo, mambo majimi etu ne majimi etu a miñanzañanza aaluka ke a bantu bakwabo.”

6 Nazhingijile bingi byo naumvwine kwijizhanya kwabo ne bino byambo. 7 Onkao mambo, nalangulukilepo bingi pa bino bintu mu muchima wami, kabiji nashinawijile babineme ne bakalama bakibiji ne kwibambila’mba: “Anweba bonse pa muntu pa muntu mubena kukanjikizha balongo benu kwimupa nsubu.”+

Kabiji nakonkenye jibumba jikatampe na mambo a abo. 8 Nebambijile’mba: “Twaeseka papelela bulume bwetu kupotolola balongo betu Bayudea bo bapoteshe mu bisaka bikwabo; pano nanchi musakupotesha balongo benu,+ ne kwibapotesha jibiji kwi atweba nyi?” Ponkapo bazhindaminetu nzoo, kabiji bakankelwe ne kya kwamba. 9 Kepo naambile’mba: “Kintu kyo mubena kuba kechi kyawama ne. Nanchi kechi mwafwainwa kwendanga na kwakamwa Lesa+ wetu pa kuba’mba bisaka bya bantu, balwanyi betu bakabule kwitwendeleka nenyi? 10 Kabiji amiwa, balongo bami ne ba mingilo bami tubena kukongwesha mali ne kajo. Twayai twikileke kukongwesha kaloba.+ 11 Nemupopwela babwezhezhai lelo jonka majimi abo,+ majimi abo a miñanzañanza, majimi abo a maolivi ne mazubo abo, kabiji mwibape ne kya bukitota* kya mali, kya kajo, kya binyu bya katataka ne kya manyi, byonka byo mubena kwibakanjikizha kwimupa kwikala nsubu yenu.”

12 Kepo baambile’mba: “Tusakwibabwezhezha bino bintu, kabiji kechi tusakwibambila kwitupa kintu nangwa kimo ne. Tusakuba byonka byo mwaamba.” Onkao mambo, naichile bañanga ne kuchipisha aba banabalume kuba’mba bakafikizhe uno mulaye. 13 Kabiji nakunchile kisapi kya pa kyaji kya pa kivwalo* kyami ne kwamba’mba: “Byonka bino, Lesa wa kine byo byo akakunta bantu bonse mu mazubo abo ne ku buswanyi bwabo bakabula kufikizha uno mulaye, kabiji byonka bino byo byo bakebakunta ne kwibashatu kwa kubula bintu.” Ponkapo kipwilo kyonse kyaambile’mba: “Amena!”* Kabiji batotele Yehoba, ne bantu baubile byonka byo balayile.

14 Kabiji kufumatu juba jo bantongwele kwikala kinemanga wabo+ mu kyalo kya Yuda, kufuma mu mwaka wa bu 20+ kukafika ne mu mwaka wa bu 32+ wa Mfumu Atazakeshi,+ myaka 12, amiwa ne balongo bami kechi twajiilenga kajo ko bapanga kinemanga ne.+ 15 Bino babinemanga bajingapo kala bayanjishenga bantu kabiji batambwilenga ku bantu mashekele* a siliva 40 a bashinkwa ne a binyu pa juba pa juba. Kabiji ba mingilo babo bamanyikilenga bantu. Bino amiwa kechi naubilenga kino ne,+ na mambo a kwakamwa Lesa.+

16 Kabiji naingijileko mwingilo ku ino nsakwa, kabiji kechi twajingapo na bujimi ne;+ ba mingilo bami bonse bakonkene konkakwa na kwingila. 17 Kwajinga bantu 150 Bayudea ne bakalama bakibiji bajanga ku tebulu wami, pamo na boba baishile kwi atweba bafumine mu bisaka bya bantu. 18 Pa juba pa juba bannengezhezhanga* ñombe mulume umo, mikooko yawama itanu na umo ne bañonyi, kabiji juba jimo pa kupitapo moba jikumi twaikalanga na binyu byavula byapusana pusana. Nangwa kyajinga bino, kechi nakanjikizhenga bantu namba bampe kajo ko bapanga kinemanga ne, mambo bantu banemenwe na mingilo. 19 Anweba Lesa wami, mumvulukenga ne kungubila bibusa* pa bintu byonse byo naubila bano bantu.+

6 Sanabalata, Tobiya+ ne Geshema mwina Alabya+ ne balwanyi betu bakwabo byo bebabuujiletu’mba nashimukulula nsakwa+ kabiji kafwapo pashajile mpunzha ne (nangwa kya kuba kechi nakibikile binzhilo mu bibelo ne),+ 2 ponkapotu Sanabalata ne Geshema bantumijile ano mawi amba: “Iya tulayañane kimye kyo tukasambakana mu muzhi umo wa mu Musanza wa Ono.”+ Bino bakebelenga kunguba kyatama. 3 Onkao mambo, nebatumijile baluwe na kwibambila’mba: “Amiwa mbena kwingila mwingilo mukatampe, kechi nakonsha kwiya ko ko ne. Mambo ka o nafwainwa kwishila ko muji ne kulengela mwingilo kulaala?” 4 Bantumijilenga mawi antutu amo bimye bina, ne amiwa nebakumbwilengatu mukumbu umo.

5 Kepo Sanabalata antumijile wa mwingilo wanji na byambo bintutu bimo ja butanu, wamupele nkalata ya kubula kushinka mu kuboko kwanji. 6 Mwanembelwe’mba: “Kyaumvwanyika mu bisaka bya bantu, ne Geshema+ naye ubena kwamba kino amba, obewa ne Bayudea mubena kukeba kusatuka.+ O ene mambo o mubena kushimikila nsakwa; kabiji kwesakana na ano masawakya obewa ukekala mfumu wabo. 7 Kabiji watongola ne bangauzhi ba kutaya mbila yobe monse mu Yelusalema amba, ‘Mu Yuda muji mfumu!’ Kabiji bamfumu bakebabuula bino bintu. Onkao mambo, iya twisambile pamo bino bintu.”

8 Nangwa byonkabyo, namutumijile uno mukumbu namba: “Bintu byonse byo ubena kwamba kechi bya kine ne; ubena kwibilangulukatu obewa mwine.”* 9 Mambo bonse bakebelenga kwituzakamisha, ne kwamba’mba: “Bakakooka kwingila uno mwingilo, kabiji kechi bakamwingila ne.”+ Nalomba namba, koseshai maboko ami.+

10 Kepo nayile ku nzubo ya kwa Shemaya mwana wa kwa Delaya, Delaya mwana wa kwa Mehetabela byo ajinga kwa bunke bwanji konkakwa. Waambile’mba: “Twayai tulayañane kimye kya kusambakana mu nzubo ya Lesa wa kine, monka mukachi ka nzubo ya Lesa, kabiji tushinkeko ne binzhilo bya nzubo ya Lesa, mambo babena kwiya na kwimwipaya. Basakwiya na kwimwipaya bufuku.” 11 Bino naambile’mba: “Nanchi muntu uji byonka byo nji wakonsha kunyema nyi? Nanchi muntu uji byonka byo nji wakonsha kutwela mu nzubo ya Lesa ne kwikala mumi nyi?+ Kechi nsakutwelamo ne!” 12 Kepo nayukile’mba Lesa kechi ye wamutumine ne, bino Tobiya ne Sanabalata+ bo bamupele mali amba aule bino pe amiwa. 13 Bamupele mali kuba’mba anzakamishe ne kundengela kulenga mambo, kuba’mba bataane kintu kya kutamishishapo jizhina jami ne kuñendeleka.

14 Anweba Lesa wami, vulukai Tobiya+ ne Sanabalata ne bino byubilo, ne Noadiya ngauzhi wa mukazhi ne bangauzhi bakwabo banzakamishenga kimye kyonse.

15 Onkao mambo, nsakwa yapwile pa juba ja bu 25 ja ñondo wa Elule,* mu moba 52.

16 Balwanyi betu bonse byo baumvwine kino ne bisaka byonse bituzhokolokele byo byamwene kino, baumvwine bingi bumvu,*+ kabiji bayukile’mba uno mwingilo twamwingila na mambo a bukwasho bwa Lesa wetu. 17 Mu oa moba babineme+ ba mu Yuda batumanga makalata avula kwi Tobiya, kabiji Tobiya wibabwezhezhanga. 18 Bavula mu Yuda bachipile kwikala ba kishinka kwi aye, mambo wajinga muko wa kwa Shekaniya mwana wa kwa Alaha,+ kabiji mwananji aye Yehohanana wasongwele mwana wa kwa Meshulama+ mwana wa kwa Belekiya. 19 Kabiji kimye kyonse bambuulanga bintu byawama pe aye, ne abo bamubuulanga bintu byo naambanga. Kabiji Tobiya watumanga makalata a kunzakamisha.+

7 Byo bashimukulwiletu nsakwa+ nabikileko binzhilo;+ kepo batongwele bakasopa ba pa bibelo,+ banyimbi+ ne bena Levi.+ 2 Kabiji natongwele mulongo wami aye Hanani+ kutalanga pa Yelusalema, pamo ne Hananiya mukulumpe watalanga pa Kishimikwa Kyakosa,+ mambo wajinga muntu waketekelwa bingi kabiji waakamwanga Lesa wa kine+ kukila bakwabo bavula. 3 Kepo nebambijile namba: “Bibelo bya Yelusalema kechi mwafwainwa kwibishinkula ne, posotu juba jasamisha, kabiji bakasopa ba pa bibelo saka bakimana na kusopa, bafwainwa kushinka binzhilo ne kukulamo mipingilo. Kabiji mwafwainwa kutongola bangikazhi ba mu Yelusalema kwikala bakasopa, au panji au panji, kabiji bakwabo kwatalañana na mazubo abo.” 4 Muzhi wabayile bingi, ne bantu mwajingatu bacheche,+ kabiji kechi bakishimukulwilemo mazubo ne.

5 Bino Lesa wikibikile mu muchima wami kya kukonkanya babineme ne bakalama bakibiji ne bantu kuba’mba banembwe monka mwayijile bisemi byabo.+ Kepo nataaine buku mo banembele bisemi bya boba baishile patanshi, kabiji nataaine banembamo’mba:

6 Bano bo bajinga bantu ba mu kibunji bafumine mu bantu bo batwajile mu buzha, bonka bo batwajile mu buzha+ kwi Nebukaneza+ Mfumu wa Babilona kabiji bonka babwelele ku Yelusalema ne ku Yuda, yense wabwelele ku muzhi wanji,+ 7 bonka baishijile pamo ne Zelubabele,+ Yeshua,+ Nehemiya, Azaliya, Laamiya, Nahamanyi, Modekai, Bilishana, Misepeleta, Bigevwai, Nehumi ne Beana.

Banabalume bena Isalela pa kwibabala bajinga bino:+ 8 baana ba kwa Paloshi bajinga 2,172; 9 baana ba kwa Shefwatiya bajinga 372; 10 baana ba kwa Alaha+ bajinga 652; 11 baana ba kwa Pahata-moabu+ ba mu baana ba kwa Yeshua ne Yoaba+ bajinga 2,818; 12 baana ba kwa Elama+ bajinga 1,254; 13 baana ba kwa Zatu bajinga 845; 14 baana ba kwa Zakai bajinga 760; 15 baana ba kwa Binuwi bajinga 648; 16 baana ba kwa Bebai bajinga 628; 17 baana ba kwa Azagada bajinga 2,322; 18 baana ba kwa Adonikama bajinga 667; 19 baana ba kwa Bigevwai bajinga 2,067; 20 baana ba kwa Adini bajinga 655; 21 baana ba kwa Atela, ba mu nzubo ya kwa Hezekiya bajinga 98; 22 baana ba kwa Hashuma bajinga 328; 23 baana ba kwa Bezai bajinga 324; 24 baana ba kwa Halifwa bajinga 112; 25 baana ba kwa Gibeona+ bajinga 95; 26 banabalume ba mu Betelema ne mu Netofwa bajinga 188; 27 banabalume ba mu Anatota+ bajinga 128; 28 banabalume ba mu Bete-azamabeta bajinga 42; 29 banabalume ba mu Kiliata-yealimu+ ne mu Kefila ne mu Beelota+ bajinga 743; 30 banabalume ba mu Lama ne ba mu Geba+ bajinga 621; 31 banabalume ba mu Mikimasa+ bajinga 122; 32 banabalume ba mu Betele+ ne ba mu Ai+ bajinga 123; 33 banabalume ba mu Nebo mukwabo bajinga 52; 34 baana ba kwa Elama mukwabo bajinga 1,254; 35 baana ba kwa Halima bajinga 320; 36 baana ba mu Yeliko bajinga 345; 37 baana ba kwa Loda ne ba kwa Hadida, ne ba kwa Ono+ bajinga 721; 38 baana ba kwa Senaa bajinga 3,930.

39 Bañanga bo bano:+ baana ba kwa Yedaya ba mu nzubo ya kwa Yeshua bajinga 973; 40 baana ba kwa Imela bajinga 1,052; 41 baana ba kwa Pashula+ bajinga 1,247; 42 baana ba kwa Halima+ bajinga 1,017.

43 Bena Levi bo bano:+ baana ba kwa Yeshua, ba mu nzubo ya kwa Kadamiela,+ ba mu baana ba kwa Hodeva bajinga 74. 44 banyimbi:+ baana ba kwa Asafwa+ bajinga 148; 45 bakasopa ba pa bibelo:+ baana ba kwa Shaluma, baana ba kwa Atela, baana ba kwa Talamona, baana ba kwa Akuba,+ baana ba kwa Hatita ne baana ba kwa Shobai bajinga 138.

46 Bakalume* ba ku nzubo ya Lesa bo bano:+ baana ba kwa Ziha, baana ba kwa Hasufwa, baana ba kwa Tabaota, 47 baana ba kwa Kelose, baana ba kwa Shia, baana ba kwa Padona, 48 baana ba kwa Lebana, baana ba kwa Hagaba, baana ba kwa Shamalai, 49 baana ba kwa Hanana, baana ba kwa Gidela, baana ba kwa Gahala, 50 baana ba kwa Leaya, baana ba kwa Lezina, baana ba kwa Nekoda, 51 baana ba kwa Gazama, baana ba kwa Uza, baana ba kwa Pasea, 52 baana ba kwa Besai, baana ba kwa Meunimu, baana ba kwa Nefusheshimu, 53 baana ba kwa Bakabuku, baana ba kwa Hakufwa, baana ba kwa Hahula, 54 baana ba kwa Bazalita, baana ba kwa Mehida, baana ba kwa Halasha, 55 baana ba kwa Balakosa, baana ba kwa Sisela, baana ba kwa Tema, 56 baana ba kwa Neziya ne baana ba kwa Hatifwa.

57 Baana ba bakalume ba kwa Solomone bo bano:+ baana ba kwa Sotai, baana ba kwa Sofeleta, baana ba kwa Pelida, 58 baana ba kwa Yaala, baana ba kwa Dakona, baana ba kwa Gidela, 59 baana ba kwa Shefwatiya, baana ba kwa Hatile, baana ba kwa Pokeleta-hazebaimu ne baana ba kwa Amonyi. 60 Bakalume* bonse ba ku nzubo ya Lesa+ ne baana ba bakalume ba kwa Solomone bajinga 392.

61 Kabiji bano bafumine ku Telamela, Telahasha, Kelubi, Adona ne Imela, bino bakankelwe kuyuka bikota byabo ne bisemi byabo, kana bajinga bena Isalela nangwa ne:+ 62 baana ba kwa Delaya, baana ba kwa Tobiya ne baana ba kwa Nekoda, bonse pamo bajinga 642. 63 Kabiji ba mu bañanga bo bano: baana ba kwa Hobaya, baana ba kwa Hakoza,+ baana ba kwa Bazilai, yenka wasongwele wa mu baana ba bakazhi ba kwa Bazilai+ mwina Gileada kabiji witumbile jizhina jabo. 64 Bano bakebele kebele byanembwa pa kuba’mba bayuke bisemi byabo, bino kechi bebitaaine ne, onkao mambo, bebakainye kwingila mwingilo wa buñanga.*+ 65 Kinemanga*+ wibambijile’mba kechi bafwainwa kujako ku bintu byazhijisha ne,+ kanatu kukamweke ñanga ukebepwizhako kupichila mu kwingijisha Ulimu ne Tumimu.+

66 Kipwilo kyonse pamo kyajinga na bantu 42,360,+ 67 kufumyako bazha ba balume ne ba bakazhi+ 7,337 bo bajinga nabo; bajinga ne na banyimbi ba balume ne ba bakazhi 245.+ 68 Bambili babo bajinga 736, ne bamyule babo bajinga 245, 69 bangamela babo bajinga 435 ne bambongolo babo bajinga 6,720.

70 Bakulumpe ba bikota bamo bapaine bya bupe bya ku mwingilo.+ Kinemanga* wapaine ku kipao madilakima* a ngolode 1,000, masanyi afukumana 50, ne minkukumba 530 ya bañanga.+ 71 Kabiji bakulumpe ba bikota bamo bapaine ku kipao kya mwingilo madalika a ngolode 20,000 ne mpondo* ya siliva 2,200. 72 Ne bantu bonse bashala bapaine madalika a ngolode 20,000, mpondo ya siliva 2,000 ne minkukumba 67 ya bañanga.

73 Kabiji bañanga, bena Levi, bakalama ba bibelo, banyimbi,+ ne bantu bamo ne bakalume* ba ku nzubo ya Lesa ne bena Isalela bonse bashala baikele mu mizhi yabo.+ Ñondo wa butanu na bubiji byo afikile,+ bena Isalela saka baikala kala mu mizhi yabo.+

8 Bantu bonse bakonkene pamo na muchima umo mu lubanza watalañene na Kibelo kya Mema,+ kabiji baambijile Ezela+ muntu ukopolola* byambo kuleta buku wa Mizhilo ya Mosesa,+ yonka Yehoba yo akambizhe bena Isalela kulondela.+ 2 Onkao mambo, Ezela ñanga waletele Mizhilo ku kipwilo kya banabalume,+ banabakazhi ne bonse bakonsheshe kuteleka ne kukwatakanya, pa juba jitanshi ja ñondo wa butanu na bubiji.+ 3 Kabiji wamutangile na jiwi ja peulu+ mu lubanza watalañene na Kibelo kya Mema, kufuma pa kusela juba kufika ne pa kushinkamana juba, ku banabalume, banabakazhi ne ku bonse bakonsheshe kukwatakanya; kabiji bantu batelekele bulongo+ ku uno buku wa Mizhilo. 4 Kabiji Ezela muntu ukopolola* byambo waimene pa mutuntamo wa mapulanga ye balengele na mambo a kokwa kupwila; kabiji ku kilujo kyanji kwaimene Matitiya, Shema, Anaya, Uliya, Hilikiya ne Maaseya; kabiji ku kipiko kyanji kwaimene Pedaya, Mishela, Malakiya,+ Hashuma, Hashebadana, Zekaliya ne Meshulama.

5 Ezela wazhikwile buku ne bantu bonse saka bamonako, mambo wajinga patuntama kukila bantu bonse. Byo azhikwiletu buku, bantu bonse baimene. 6 Kepo Ezela atotele Yehoba Lesa wa kine, Lesa wa bulume, kabiji bantu bonse bakumbwile’mba, “Amena!* Amena!”+ ne kusuntula maboko abo mwiulu. Kepo bafukamine ne kulambila Yehoba saka bakinka bilungi byabo panshi. 7 Kabiji Yeshua, Bani, Shelebiya,+ Yamina, Akuba, Shabetai, Hodiya, Maaseya, Kelita, Azaliya, Yozabada,+ Hanana ne Pelaya, bonka bajinga bena Levi, balumbulwilenga Mizhilo ku bantu,+ bantu saka baimana. 8 Kabiji batwajijile kutanga mu buku na jiwi ja peulu mu Mizhilo ya Lesa wa kine, ne kwiilumbulula bulongo ne kulumbulula mo yatala; onkao mambo bakwashishe bantu kumvwisha byo batangilenga.*+

9 Kabiji Nehemiya yenka wajinga kinemanga* ne Ezela+ ñanga kabiji muntu ukopolola* byambo, ne bena Levi bafunjishenga bantu, baambijile bantu bonse amba: “Jino juba jazhila kwi Yehoba Lesa wenu.+ Kange mujile mabingo nangwa kujila ne.” Mambo bantu bonse bajijilenga byo baumvwine byambo bya mu Mizhilo. 10 Wibambijile’mba: “Yainga mukaje kajo kawama* ne kutoma byatobala, kabiji mutuminepo kajo+ kamo aba babula kunengezhapo nangwa kimo; mambo jino juba jazhila kwi Nkambo yetu, kabiji kange mube bulanda ne, mambo lusekelo lwa Yehoba yo nsakwa yenu yakosa.”* 11 Kabiji bena Levi bazhindamikilengapo bantu bonse, amba: “Zhindamai! mambo jino juba jazhila, kabiji kange mube bulanda ne.” 12 Byonkabyo, bantu bonse bayile na kuja ne kutoma ne kutuminapo bakwabo kajo kamo ne kusangalala bingi,+ mambo bakwatakenye byambo byo bebabuujile.+

13 Kabiji pa juba ja bubiji, bakulumpe ba bikota bya bantu bonse, bañanga ne bena Levi bakonkene pamo kwi Ezela muntu ukopolola* byambo kuba’mba bayukilepo ne bikwabo pa byambo bya mu Mizhilo. 14 Kepo bataaine mu Mizhilo mwanembwa’mba Yehoba wakambizhe bena Isalela kupichila mwi Mosesa amba bafwainwa kwikala mu mimba* pa kimye kya kijiilo mu ñondo wa butanu na bubiji,+ 15 ne kuba’mba bafwainwa kutaya mbila+ ne kubijika monse mu mizhi yabo ne monse mu Yelusalema amba: “Yainga ku kibunji kya mitumba ne kuleta misampi iji na mabuula ya bichi bya maolivi, bichi bya manyi, bichi bya meleto ne bisonga, ne misampi iji na mabuula ya bichi bikwabo ne kulenga mimba, monka mwayila byanembwa.”

16 Byonkabyo, bantu bayile na kwibileta kuba’mba belengele mimba, muntu yense pa musemi wanji, ne mu mabanza abo, mu mabanza a nzubo ya Lesa wa kine,+ ne mu lubanza watalañene na Kibelo kya Mema,+ ne mu lubanza wa ku Kibelo kya Efelaimu.+ 17 Onkao mambo, bonse bajinga mu kipwilo kyafumine mu buzha balengele mimba; kabiji baikelenga mu mimba; mambo bena Isalela kechi bekyubilepo mu jino jishinda ne, kufumatu mu moba a kwa Yoshua+ mwana wa kwa Nuni kufikatu ne pa joja juba, kabiji kwajinga kusangalala bingi.+ 18 Kabiji pa juba pa juba batangilenga mu buku wa Mizhilo ya Lesa wa kine,+ kufumatu pa juba jitanshi kufika ne pa juba japeleleko. Kabiji baikele na kijiilo pa moba atanu na abiji, kabiji kwajinga kubuñana kwazhila pa juba ja butanu na busatu, byonka byo kyakebewenga.+

9 Pa juba ja bu 24 ja ñondo bena Isalela bakonkene pamo; bazhikijilwenga na nzala saka benyinga bisapi bya majila ne kwipukula maloba.+ 2 Aba basemenwe mu bena Isalela bepaatwileko ku bantu ba mu byalo bingi,+ kabiji baimene ne kusolola bubi bwabo ne mambo a bashabo.+ 3 Kepo baimene pa mpunzha yabo ne kutanga buku wa Mizhilo+ ya Yehoba Lesa wabo pa maola asatu;* ne pa maola akwabo asatu basolwelenga mambo abo ne kufukama kwi Yehoba Lesa wabo.

4 Yeshua, Bani, Kadamiela, Shebaniya,+ Buni, Shelebiya, Bani ne Kenanyi baimene pa mutuntamo+ wa bena Levi, kabiji babijikile kwi Yehoba Lesa wabo. 5 Kabiji bena Levi, Yeshua, Kadamiela, Bani, Hashabaneya, Shelebiya, Hodiya, Shebaniya ne Petahiya baambile’mba: “Imanai mumutote Yehoba Lesa wenu myaka ne myaka.+ Kabiji balekai batote jizhina jenu ja lukumo, jatumbalala kukila bibusa byonse ne lutotelo.

6 “Anweba yenu Yehoba bunketu;+ mwalengele mwiulu, ee kine, mwalengele mwiulu mwine ne byonse bijimo, ntanda ne byonse bijipo, tulunga twa mema ne byonse bijimo. Kabiji mwibilama byonse na bumi, ne jibumba ja bya mwiulu jibena kwimufukamina. 7 Anweba mwi Yehoba Lesa wa kine, yenka wasajile Abulama+ ne kumufumya ku Ula+ wa bena Kalodeya ne kumutumba’mba Abalahama.+ 8 Mwamwene’mba muchima wanji wajinga wa kishinka kwi anweba,+ onkao mambo, mwalayañene nanji lulayañano amba mukamupa kyalo kya bena Kenana, bena Hiti, bena Amoli, bena Pelizi, bena Yebusi ne bena Giligashi, ne kwikipana ku baana* banji;+ kabiji mwafikizhe milaye yenu, mambo anweba mwaoloka.

9 “Kabiji mwamwene kumanama kwa bashakulu betu mu Ijipita,+ ne kumvwa kujila kwabo ku Kalunga ka Mema Kachila. 10 Kabiji mwamwesheshe biyukilo ne bya kukumya kwi Felo ne ku bakalume banji bonse ne ku bantu bonse ba mu kyalo kyanji,+ mambo mwayukile’mba bamanyikilenga bantu benu.+ Mwilengejile jizhina jonka jijipo ne lelo jino.+ 11 Kabiji mwaabenye kalunga ka mema ku meso abo, kya kuba baabukile kalunga ka mema pa mushiji wauma,+ kabiji mwatayile aba bebapupijilenga mwine mwazhika nobe jibwe jo bataya mu mema abena kupomoka.+ 12 Mu kimye kya mute mwibatangijilenga na jikumbi jaimana mulumbulumbu, kabiji mu kimye kya bufuku na mujilo waimana mulumbulumbu, pa kuba’mba atokeshe mu jishinda jo bafwainwe kuyamo.+ 13 Kabiji mwaikijile pa Mutumba wa Sinai+ ne kwisamba nabo kufuma mwiulu+ kabiji mwibapele bunchibamambo bwaoloka, mizhilo ya bukine,* malamuna awama ne mikambizho.+ 14 Mwibabuujile Sabado wenu wazhila,+ kabiji mwibapele mikambizho, malamuna ne mizhilo kupichila mwi Mosesa kalume wenu. 15 Mwibapele kajo kufuma mwiulu kimye kyo bafwile nzala,+ kabiji mwalupwile mema kufuma mu jibwe kimye kyo bafwile kilaka,+ kabiji mwibambijile kutwela ne kutambula kyalo kyo mwachipile* amba mukebapa.

16 “Bino abo bashakulu betu, belundumikilenga+ ne kukosesha* michima,+ kabiji kechi baumvwinanga mikambizho yenu ne. 17 Bakaine kumvwa,+ kabiji kechi bavulukile mingilo ya kukumya yo mwibobijile ne, bino bakoseshe michima* ne kutongola ntangi kuba’mba babwele mu buzha mo bajinga mu Ijipita.+ Bino anweba mwi Lesa waswila jimo kulekela mambo,* wa kifyele* ne lusa, ubanda kuzhingila kabiji wavula butemwe* bubula kwaluka,+ kabiji kechi mwibatayile ne.+ 18 Nangwatu byo belengejile kipashañano kya kyela kya mwana ñombe ne kwamba’mba, ‘Uno ye Lesa wenu yenka wimufumishe mu Ijipita,’+ ne byo baubile bintu bikatampe bya kubula mushingi, 19 nangwatu kyajinga bino, na mambo a lusa lwenu lukatampe, anweba kechi mwibatayile mu kiselebwa ne.+ Jikumbi jaimana mulumbulumbu jibatangijilanga mu jishinda mute, kabiji kechi jafumangapo pe abo ne, nangwa mujilo waimana mulumbulumbu wibatokesheshanga mu jishinda bufuku, kechi wafumangapo ne.+ 20 Kabiji mwibapele mupashi wenu kuba’mba ebape milangwe,+ kabiji kechi mwibataaine manna ne,+ mwibapele mema byo bafwile kilaka.+ 21 Mwibapelenga kajo mu kiselebwa myaka 40. Kafwako kyo bakajilwenga ne.+ Bivwalo byabo kechi byafwilenga ne,+ ne maulu abo kechi avimbilenga ne.

22 “Mwibapele bufumu bwavula ne bantu, ne kwibabanya awu kyalo kyanji, awu kyalo kyanji,+ onkao mambo, batambwile kyalo kya kwa Sihona,+ ko kuba’mba, kyalo kya mfumu wa Heshibonyi,+ ne kyalo kya kwa Oga+ mfumu wa Bashana. 23 Kabiji mwavuzhizhe baana babo nobe tubangabanga twa mwiulu.+ Kepo mwibaletele mu kyalo kyo mwachipile ku bashakulu babo amba bafwainwa kutwelamo ne kwikitambula.+ 24 Onkao mambo, baana babo batwelelemo ne kutambula kyalo,+ kabiji mwashinjile ku meso abo bena Kenana,+ bajinga bangikazhi mu kino kyalo, ne kwibapana mu maboko abo, pamo na bamfumu babo ne bantu ba mu kyalo, kuba’mba bebobe kyo bakebelenga. 25 Kabiji baangachile mizhi ya masakwa akosa+ ne kyalo kyafuka* bulongo,+ ne kutambula mazubo mwajinga bintu byonse byapusana pusana byawama, mishima* ya mema yo bapoyijile jimo, majimi a miñanzañanza, majimi a maolivi+ ne bichi byavula bya bipangwa. Onkao mambo, bajiilenga ne kwikuta ne kubaya, kabiji basangalelenga mu buwame bwenu bukatampe.

26 “Nangwa byonkabyo, balekele kukookela kabiji bemusatukijile+ ne kuvundamina ku Mizhilo yenu.* Baipayile bangauzhi benu bonka bebajimwinengako kuba’mba bebabwezhe kwi anweba, kabiji baubile bintu bikatampe bya kubula mushingi.+ 27 Na mambo a kino mwibapaine mu maboko a balwanyi babo,+ bonka bebamanyikilenga.+ Bino byo bamanaminenga bemujijilanga, ne anweba mwaumvwanga mwiulu; kabiji na mambo a lusa lwenu lukatampe, mwibaletelanga bapokolweshi bebapokololanga mu maboko a balwanyi babo.+

28 “Bino inge bakasulukatu, baubanga jikwabo bintu byatama ku meso enu,+ ne anweba mwibapananga mu maboko a balwanyi babo bonka bebayanjishanga.*+ Kabiji baalulukilanga kwi anweba ne kwimujijila amba mwibakwashe,+ ne anweba mwaumvwanga mwiulu ne kwibapokolola javula na mambo a lusa lwenu lukatampe.+ 29 Nangwa kya kuba mwibajimwinengako kuba’mba mwibabwezhe ku Mizhilo yenu, belundumikanga ne kukana kumvwina mikambizho yenu;+ kabiji balengelenga mambo pa kubula kulondela malamuna enu, onka alengela muntu kwikala na bumi inge wialondela.+ Bino bemuvundamijile saka bakosesha michima ne kukosesha mashingo abo, kabiji bakaine kumvwa. 30 Mwibatekenyejile+ pa myaka yavula ne kutwajijila kwibajimunako na mupashi wenu kupichila mu bangauzhi benu, bino abo bakaine kumvwa. Kepo mwibapaine mu maboko a bantu ba mu byalo.+ 31 Kabiji na mambo a lusa lwenu lukatampe, kechi mwibavizhizhe+ nangwa kwibataya ne, mambo mwi Lesa wa kifyele* kabiji wa lusa.+

32 “Pano anweba Lesa wetu, Lesa mukatampe, wa bulume, kabiji ulengesha moyo, anweba mwalama lulayañano lwenu ne kumwesha butemwe bubula kwaluka,+ kange mutalepotu pa buyanji bwetu bwitufikila atweba ne bamfumu betu, babinemanga betu,+ bañanga,+ bangauzhi betu,+ bashakulu betu, ne bantu bonse kufuma mu moba a bamfumu ba Asilya+ kufika ne lelo jino ne. 33 Anweba mwajinga baoloka mu bintu byonse bitufikijile, mambo mwauba bintu mu bukishinka; bino atweba yetu twatamisha.+ 34 Pakuba bamfumu betu, babinemanga betu, bañanga betu, ne bashakulu betu kechi balondejilenga Mizhilo yenu nangwa kutako muchima ku mikambizho nangwa ku bya kuvululako* byenu byonka byo mwibafunjilengako ne. 35 Nangwatu byo bajinga mu bufumu bwabo saka basangalela mu bintu byawama byo mwibapele ne byo bajinga mu kyalo kyabaya kabiji kyafuka* bulongo kyo mwibapele, kechi bemwingijilenga ne,+ kabiji kechi balekele byubilo byabo byatama ne. 36 Pano lelo jino, twi bazha+—kine, twi bazha mu kyalo kyo mwapele bashakulu betu kuba’mba bajenga bipangwa byakyo ne bintu byakyo byawama. 37 Kajo kakyo kavula ko ka bamfumu bo mwitupa kwitutangijila na mambo a bubi bwetu.+ Babena kulama mibiji yetu ne bilelwa byetu pamo monka mo bamwena’mba kijitu bulongo, kabiji tuji mu lumanamo lukatampe.

38 “Na mambo a bino bintu byonse, tubena kulayañana lulayañano lwa kine+ ne kwilunemba, ne kwilwitabizha kupichila mu kubikapo katetesho ka babinemanga betu, bena Levi ne bañanga betu.”+

10 Aba baitabizhe kino kupichila mu kubikapo katetesho kabo bajinga+ bano:

9 Kabiji bena Levi bo bano: Yeshua mwana wa kwa Azaniya, Binuwi wa mu baana ba kwa Henadada, Kadamiela,+ 10 ne balongo babo abo ba Shebaniya, Hodiya, Kelita, Pelaya, Hanana, 11 Mika, Lehoba, Hashabiya, 12 Zakula, Shelebiya,+ Shebaniya, 13 Hodiya, Bani ne Beninu.

14 Bakulumpe ba bantu bo bano: Paloshi, Pahata-moabu,+ Elama, Zatu, Bani, 15 Buni, Azagada, Bebai, 16 Adoniya, Bigevwai, Adini, 17 Atela, Hezekiya, Azula, 18 Hodiya, Hashuma, Bezai, 19 Halifwa, Anatota, Nebai, 20 Magipyashi, Meshulama, Hezila, 21 Meshezabela, Zadoka, Yaduwa, 22 Pelatiya, Hanana, Anaya, 23 Hosheya, Hananiya, Hashuba, 24 Haloheshi, Pila, Shobeke, 25 Lehumi, Hashabana, Maaseya, 26 Ahiya, Hanana, Anana, 27 Maluka, Halima ne Beana.

28 Bantu bakwabo bonse, ko kuba’mba, bañanga, bena Levi, bakasopa ba pa bibelo, banyimbi, bakalume* baingijilanga ku nzubo ya Lesa, ne bantu bonse bepaatwileko ku bantu bonse ba mu byalo kuba’mba balondele Mizhilo ya Lesa wa kine,+ pamo na bakazhi babo, baana babo ba balume, ne baana babo ba bakazhi, aba bonse bajinga na maana kabiji bakonsheshe kukwatakanya* bintu, 29 bakwatankene pamo na balongo babo, banabalume baya nkuwa, ne kwikasa abo bene na jifingo ne na luchipo, kuba’mba bakendanga mu Mizhilo ya Lesa wa kine yo apaine kupichila mwi Mosesa kalume wa Lesa wa kine, ne kuba’mba bakalamanga mikambizho yonse ya Yehoba Nkambo yetu, mizhilo yanji, ne malamuna anji. 30 Kechi tukasongweshanga baana betu ba bakazhi ku bantu ba mu kyalo ne, kabiji baana betu ba balume kechi tukebaswisha kusongola baana babo ba bakazhi ne.+

31 Inge bantu ba mu kyalo bakalete bipe byabo nangwa kajo ka misango yonse na kupotesha pa juba ja Sabado, kechi tukapota kintu nangwa kimo kwi abo pa juba ja Sabado+ nangwa pa juba jazhila ne.+ Kabiji kajo ketu ka mu mwaka wa butanu+ na bubiji tukekaleka ne nkongole yonse.+

32 Kabiji twalayile kuba’mba tukapananga pa muntu pa muntu kipimo kimo kya mu bipimo bisatu bitwela mu shekele* pa mwaka pa mwaka kya ku mwingilo wa ku nzubo ya Lesa wetu,+ 33 kya bashinkwa* batentakana,+ mulambo wa kajo+ wa kimye kyonse, mulambo wa kusoka kimye kyonse pa juba ja Sabado+ ne pa kutentama kwa bañondo+ ne kya bijiilo byatongolwa,+ kya bintu byazhila, ne kya milambo ya bubi+ ya kufuchila mambo a bena Isalela, ne kya mingilo yonse ya ku nzubo ya Lesa wetu.

34 Kabiji twateele bubale pa mambo a nkunyi yo bafwainwe kuleta bañanga, ne bena Levi, ne bantu ku nzubo ya Lesa wetu monka mwayijile bikota byetu, pa bimye byatongolwa pa mwaka pa mwaka, kuba’mba ikale ya kubika pa kya kusokelapo bitapisho kya Yehoba Lesa wetu monka mo kyanembelwa mu Mizhilo.+ 35 Kabiji tukaletanga ne bipangwa bya nsomo bya mu kyalo kyetu ne bipangwa bya nsomo bya ku bichi byonse, pa mwaka pa mwaka, ku nzubo ya Yehoba,+ 36 pamo na baana betu ba balume babeji ne babeji ba bilelwa byetu,+ monka mwayila byanembwa mu Mizhilo, ne babeji ba bañombe betu ne ba mikooko yetu. Tukebaletanga ku nzubo ya Lesa wetu, ku bañanga bengijila ku nzubo ya Lesa wetu.+ 37 Ne bunga bwetu butanshi bwa nkapankapa,+ bupe bwetu, bipangwa bya ku bichi byonse,+ binyu bya katataka ne manyi,+ twafwainwa kwibileta ku bañanga monka mu bibamba mwa kulamina bintu* bya mu nzubo ya Lesa wetu,+ pamo na bya bujikumi bya mu kyalo kyetu ku bena Levi,+ mambo bena Levi bo batambula bya bujikumi bya mu majimi onse a mu mizhi yetu.

38 Kabiji ñanga, mwana wa kwa Alona, wafwainwa kwikala pamo na bena Levi kimye bena Levi kyo babena kutambula bya bujikumi; kabiji bena Levi bafwainwa kupana bya bujikumi byafuma mu bya bujikumi ku nzubo ya Lesa wetu,+ ku bibamba* bya mu nzubo ya kulaminamo bintu. 39 Mambo mu bibamba mwa kulamina bintu* bena Isalela ne baana ba bena Levi mo mo bafwainwa kuleta bupe+ bwa kajo, binyu bya katataka, ne manyi,+ kabiji mo muji bipe bya ku nzubo yazhila, pamo na bañanga bengila mingilo, bakasopa ba pa bibelo ne banyimbi. Kechi tukeilekelela nzubo ya Lesa wetu ne.+

11 Babinemanga ba bantu baikelenga mu Yelusalema;+ bino bantu bashala batele bubale+ kuba’mba muntu umo pa bantu jikumi bamutwale mu Yelusalema, muzhi wazhila, bino bakwabo batanu na bana bashajile mu mizhi ikwabo. 2 Kabiji bantu bapesheshe banabalume bonse bepaine kwikala mu Yelusalema.

3 Bano bo bakulumpe ba bibunji baikelenga mu Yelusalema. (Bena Isalela bakwabo, bañanga, bena Levi, bakalume* baingijilanga ku nzubo ya Lesa+ ne baana ba bakalume ba kwa Solomone,+ baikelenga mu mizhi ikwabo ya mu Yuda, muntu yense waikelenga awu panji awu panji mu muzhi wanji.+

4 Kabiji mu Yelusalema mwaikelenga bantu bamo ba mu Yuda ne ba mu Benjamina.) Mu bantu ba mu Yuda mwajinga Ataya mwana wa kwa Uzaya, Uzaya mwana wa kwa Zekaliya, Zekaliya mwana wa kwa Amaliya, Amaliya mwana wa kwa Shefwatiya, Shefwatiya mwana wa kwa Mahalalela wa mu baana ba kwa Peleze,+ 5 ne Maaseya mwana wa kwa Baluka, Baluka mwana wa kwa Kolahoze, Kolahoze mwana wa kwa Hazaya, Hazaya mwana wa kwa Adaya, Adaya mwana wa kwa Yoyaliba, Yoyaliba mwana wa kwa Zekaliya mwana wa mwina Shela. 6 Baana bonse ba kwa Peleze baikelenga mu Yelusalema bajinga 468 banabalume bafikilamo.

7 Bano bo bajinga bena Benjamina: Salu+ mwana wa kwa Meshulama, Meshulama mwana wa kwa Yoede, Yoede mwana wa kwa Pedaya, Pedaya mwana wa kwa Kolaya, Kolaya mwana wa kwa Maaseya, Maaseya mwana wa kwa Itiela, Itiela mwana wa kwa Yeshaya, 8 kabiji pe aye palondejile Gabai ne Salai, bonse pamo bajinga 928; 9 kabiji Yoela mwana wa kwa Zikili ye wajinga kalama wabo, ne Yuda mwana wa kwa Hasenua ye wajinga mukulumpe wa kibiji pa muzhi.

10 Ba mu bañanga bo bano: Yedaya mwana wa kwa Yoyaliba, ne Yakina,+ 11 ne Selaya mwana wa kwa Hilikiya, Hilikiya mwana wa kwa Meshulama, Meshulama mwana wa kwa Zadoka, Zadoka mwana wa kwa Melayota, Melayota mwana wa kwa Ahituba,+ ntangi wa ku nzubo ya Lesa wa kine, 12 ne balongo babo baingijilenga mingilo ya ku ino nzubo bajinga 822; ne Adaya mwana wa kwa Yelohama, Yelohama mwana wa kwa Pelaliya, Pelaliya mwana wa kwa Amizi, Amizi mwana wa kwa Zekaliya, Zekaliya mwana wa kwa Pashula,+ Pashula mwana wa kwa Malakiya, 13 ne balongo banji, bakulumpe ba bikota, bonse pamo bajinga 242; ne Amashai mwana wa kwa Azalela, Azalela mwana wa kwa Azai, Azai mwana wa kwa Meshilemota, Meshilemota mwana wa kwa Imela, 14 ne balongo babo bonka bajinga babilobo, banabalume bachinchika, bonse pamo bajinga 128; ne mukulumpe wabo wajinga Zabajela, wa mu kisemi kyaya nkuwa.

15 Ba mu bena Levi bo bano: Shemaya+ mwana wa kwa Hashuba, Hashuba mwana wa kwa Azilikama, Azilikama mwana wa kwa Hashabiya, Hashabiya mwana wa kwa Buni, 16 ne Shabetai+ ne Yozabada,+ ba mu bakulumpe ba bena Levi batalanga pa mingilo ya pangye ya nzubo ya Lesa wa kine; 17 ne Mataniya+ mwana wa kwa Mika, Mika mwana wa kwa Zabadi, Zabadi mwana wa kwa Asafwa,+ ntangi wa banyimbi, yenka watangijilanga pa kwimba nyimbo ya kutota kimye kya kulomba,+ ne Bakabukiya, wajinga wa kibiji mu balongo banji, ne Abeda mwana wa kwa Shamuwa, Shamuwa mwana wa kwa Galala, Galala mwana wa kwa Yedutuna.+ 18 Bena Levi bonse bajinga mu muzhi wazhila bajinga 284.

19 Kabiji bakasopa ba pa bibelo bajinga Akuba, Talamona,+ ne balongo babo bonka basopanga bibelo, bonse pamo bajinga 172.

20 Bena Isalela bonse, bañanga ne bena Levi bajinga mu mizhi yonse ikwabo ya mu Yuda, muntu yense mu mpunzha yanji ya buswanyi.* 21 Bakalume* baingijilanga ku nzubo ya Lesa+ baikajilenga mu Ofela,+ ne mu Ziha ne mu Gishipa, bo bajinga bakulumpe ba bakalume* ba ku nzubo ya Lesa.

22 Ntangi wa bena Levi baikalanga mu Yelusalema wajinga Uzi mwana wa kwa Bani, Bani mwana wa kwa Hashabiya, Hashabiya mwana wa kwa Mataniya, Mataniya+ mwana wa kwa Mika, wa mu baana ba kwa Asafwa, banyimbi; ye wajinga mukulumpe wa pa mwingilo wa ku nzubo ya Lesa wa kine. 23 Mambo kwajinga mukambizho wa mfumu pa mambo a abo,+ kabiji banyimbi bebatongwejile bintu bya kwibapa byonka byo kyakebewanga pa juba pa juba. 24 Kabiji Petahiya mwana wa kwa Meshezabela wa mu baana ba kwa Zela mwana wa kwa Yuda ye wafundangako* mfumu maana pa mambo onse a bantu.

25 Pa mambo a mizhi icheche yajinga na majimi ayo, bantu bamo ba mu Yuda baikelenga mu Kiliata-alaba+ ne mu mande anji,* mu Dibona ne mu mande anji, mu Yekabazeli+ ne mu mizhi yanji icheche, 26 mu Yeshua, mu Molada,+ mu Bete-peleta,+ 27 mu Hazala-shuala,+ mu Belesheba ne mu mande anji,* 28 mu Zikilagi,+ mu Mekona ne mu mande anji,* 29 mu Ene-limona,+ mu Zola,+ ne mu Yalamuta, 30 mu Zanoa,+ mu Adulama ne mu mizhi yabo icheche, mu Lakishi+ ne mu majimi anji, ne mu Azeka+ ne mu mande anji.* Baikele mu Belesheba kukafika ne ku Kimpachiko kya Hinomu.+

31 Kabiji bena Benjamina baikele mu Geba,+ mu Mikimashi, mu Aya, mu Betele+ ne mu mande anji,* 32 mu Anatota,+ mu Noba,+ mu Ananiya, 33 mu Hazola, mu Lama,+ mu Gitaimu, 34 mu Hadida, mu Zeboimu, mu Nebalata, 35 mu Loda,+ ne mu Ono, mu kimpachiko kya basendwe. 36 Ne bipanyi bimo bya bena Levi byafumine mu Yuda bebitwajile ku bena Benjamina.

12 Bano bo bañanga ne bena Levi bayijile pamo ne Zelubabele+ mwana wa kwa Shalachele,+ ne Yeshua:+ Selaya, Yelemiya, Ezela, 2 Amaliya, Maluka, Hatushi, 3 Shekaniya, Lehumi, Melemota, 4 Ido, Ginetoi, Abiya, 5 Miyamina, Maadiya, Biliga, 6 Shemaya, Yoyaliba, Yedaya, 7 Salu, Amoki, Hilikiya ne Yedaya. Bano bo bajinga bakulumpe ba bañanga ne balongo babo mu moba a kwa Yeshua.

8 Bena Levi bajinga Yeshua, Binuwi, Kadamiela,+ Shelebiya, Yuda ne Mataniya,+ yenka watangijilenga pa kwimba nyimbo ya kusanta pamo na balongo banji. 9 Kabiji balongo babo abo ba Bakabukiya ne Uni baimananga saka batalañana nabo pa kusopa.* 10 Yeshua wasemene Yoyakimu, ne Yoyakimu wasemene Eliashiba,+ kabiji Eliashiba wasemene Yoyada.+ 11 Ne Yoyada wasemene Yonafwanyi, ne Yonafwanyi wasemene Yaduwa.

12 Mu moba a kwa Yoyakimu, bano bo bajinga bañanga, bakulumpe ba bikota: mwi Selaya+ mwafumine Melaya; mwi Yelemiya mwafumine Hananiya; 13 mwi Ezela+ mwafumine Meshulama; mwi Amaliya mwafumine Yehohanana; 14 mwi Maluki mwafumine Yonafwanyi; mwi Shebaniya mwafumine Yosefwa; 15 mwi Halima+ mwafumine Adina; mwi Melayota mwafumine Helikai; 16 mwi Ido mwafumine Zekaliya; mwi Ginetona mwafumine Meshulama; 17 mwi Abiya+ mwafumine Zikili; mwi Minyamina mwafumine, . . . ;* mwi Moadiya mwafumine Pilitai; 18 mwi Biliga+ mwafumine Shamuwa; mwi Shemaya mwafumine Yehonafwanyi; 19 mwi Yoyaliba mwafumine Matenai; mwi Yedaya+ mwafumine Uzi; 20 mwi Salai mwafumine Kalai; mwi Amoki mwafumine Ebelu; 21 mwi Hilikiya mwafumine Hashabiya; mwi Yedaya mwafumine Netanela.

22 Bakulumpe ba bikota bya bena Levi ba mu moba a kwa Eliashiba, Yoyada, Yohanana ne a kwa Yaduwa,+ bebanembele byonka byo banembele bañanga, kufikatu ne kimye kya bufumu bwa kwa Daliusa mwina Pelisha.

23 Bena Levi bajinga bakulumpe ba bikota, bebanembele mu buku wa bintu byamwekele mu moba a kala, kufikatu ne mu moba a kwa Yohanana mwana wa kwa Eliashiba. 24 Bakulumpe ba bena Levi bajinga Hashabiya, Shelebiya ne Yeshua+ mwana wa kwa Kadamiela,+ ne balongo babo baimananga saka batalañana nabo pa kutota ne kusanta monka mwayijile mikambizho ya kwa Davida+ muntu wa Lesa wa kine, jibumba jimo ja bakasopa jalondejile pa jibumba jikwabo ja bakasopa. 25 Mataniya,+ Bakabukiya, Obadiya, Meshulama, Talamona ne Akuba+ bajinga bakasopa ba pa bibelo,+ basopelenga bibamba bya kulaminamo bintu byajinga kwipi na bibelo. 26 Bano baingijilenga mu moba a kwa Yoyakimu mwana wa kwa Yeshua,+ Yeshua mwana wa kwa Yozadaka ne mu moba a kwa Nehemiya kinemanga ne Ezela+ ñanga kabiji muntu ukopolola* byambo.

27 Pa kuzhijika masakwa a Yelusalema bakebele bena Levi kabiji bebaletele mu Yelusalema kufuma mu mapunzha onse mo baikalanga kuba’mba beye beizhijike na lusekelo, na nyimbo ya kusanta+ ne na nsonsolo, bijimba bya mizhinge ne byansa. 28 Kabiji baana ba banyimbi* bakonkene pamo kufuma mu nkambi,* mu mapunzha onse azhokoloka Yelusalema, ne mu mizhi icheche ya bena Netofwa,+ 29 mu Betegiligala,+ ne mu majimi a Geba+ ne mu Azamabeta,+ mambo banyimbi beshimikijile bene mizhi icheche kuzhokoloka Yelusalema yense. 30 Kabiji bañanga ne bena Levi betokeshe abo bene, kabiji batokeshe bantu,+ bibelo+ ne nsakwa.+

31 Kepo naletele babinemanga ba mu Yuda peulu ya nsakwa. Kabiji natongwele mabumba akatampe abiji a banyimbi ba kwimba nyimbo ya kusanta ne bantu ba kwialondela, kabiji jibumba jimo jayilenga ku kilujo kya nsakwa na ku Kibelo kya ku Milumba ya Buto.+ 32 Hoshaya ne kichika kya babinemanga ba mu Yuda bebalondejilenga, 33 pamo ne Azaliya, Ezela, Meshulama, 34 Yuda, Benjamina, Shemaya ne Yelemiya. 35 kabiji bajinga na baana bamo ba bañanga bajinga na matolompita:+ Zekaliya mwana wa kwa Yonafwanyi, Yonafwanyi mwana wa kwa Shemaya, Shemaya mwana wa kwa Mataniya, Mataniya mwana wa kwa Mikaya, Mikaya mwana wa kwa Zakula, Zakula mwana wa kwa Asafwa,+ 36 ne balongo banji abo ba Shemaya, Azalela, Malali, Gilalai, Maai, Netanela, Yuda ne Hanani, bajinga na byombesha bya kwa Davida+ muntu wa Lesa wa kine; kabiji Ezela+ muntu ukopolola* byambo wajinga kulutwe yabo. 37 Kabiji banankaminetu konka ku Kibelo kya ku Nsulo+ ne kukanjila pa kya Kukanjijilapo+ kya ku Muzhi wa Davida+ kiji kwatuntukila nsakwa peulu ya Nzubo ya kwa Davida ne ku Kibelo kya Mema+ kya ku musela.

38 Jibumba jikwabo ja banyimbi baimbilenga nyimbo ya kusanta japichijile ku lubaji lukwabo,* ne amiwa nejilondejilenga pamo na kichika kya bantu ponka pa nsakwa peulu ya Kyamba kya Bitofu+ kukafika ne ku Nsakwa Yabaya+ 39 ne peulu ya Kibelo kya Efelaimu+ kukafika ne ku Kibelo kya Muzhi wa Kala+ ne ku Kibelo kya Masabi,+ ku Kyamba kya Hananela,+ Kyamba kya Miya, ne ku Kibelo kya Mikooko;+ kabiji bakemenejile ku Kibelo kya Bakasopa.

40 Byo papichile kimye mabumba abiji a banyimbi aimbilenga nyimbo ya kusanta aimene ku nzubo ya Lesa wa kine; ne amiwa naimene ne kichika kya bakalama bakibiji bo najinga nabo, 41 ne bañanga abo ba Eliakima, Maaseya, Minyamina, Mikaya, Eliwenai, Zekaliya ne Hananiya saka baji na matolompita, 42 ne Maaseya, Shemaya, Eleaza, Uzi, Yehohanana, Malakiya, Elama ne Eza. Kabiji banyimbi baimbile na mawi a peulu saka bebatangijila kwi Izahalaya.

43 Pa joja juba, batapishe bitapisho byavula bingi kabiji basangalele,+ mambo Lesa wa kine wibalengejile kwikala na lusekelo lukatampe. Banabakazhi ne baana nabo basangalele,+ kya kuba kusangalala kwa ba mu Yelusalema kwaumvwanyikile ne kwalepa.+

44 Pa joja juba, banabalume bebatongwele kutalanga pa matala+ mwa kubika bya bupe,+ bya nsomo,+ ne bya bujikumi.+ Bafwainwe kuletamo kajo ka mu majimi a mu mizhi ka kupa bañanga ne bena Levi+ monka mwayijile Mizhilo,+ mambo mu Yuda mwajinga kusangalala na mambo a bañanga ne bena Levi baingijilenga. 45 Kabiji batendekele kwingila mingilo ya Lesa wabo ne mwingilo wa kutokesha, byonka byaubile banyimbi ne bakasopa ba pa bibelo, monka mwayijile mikambizho ya kwa Davida ne ya mwananji aye Solomone. 46 Mambo kala mu moba a kwa Davida ne Asafwa, kwajinga bantangi* ba banyimbi ne batangijilanga pa kwimba nyimbo ya kutota ne ya kusanchila Lesa.+ 47 Kabiji mu moba a kwa Zelubabele+ ne mu moba a kwa Nehemiya, bena Isalela bonse bapelengapo kajo kamo banyimbi+ ne bakasopa ba pa bibelo,+ kwesakana na byakebewanga pa juba pa juba. Kabiji abo nabo bapanangapo kamo ku bena Levi,+ ne bena Levi bafumyangapo kamo ka kupa ba mu kisemi kya kwa Alona.

13 Pa joja juba, buku wa Mosesa bamutangile ne bantu saka bomvwa,+ kabiji bataaine po kyanembelwe’mba kafwako mwina Amonyi nangwa mwina Moabu+ wafwainwa kutwela mu kipwilo kya Lesa wa kine ne,+ 2 mambo kechi batundaijile bena Isalela ne kwibasendelapo bashinkwa ne mema ne, bino baichile Balamu kuba’mba ebafinge.+ Nangwa byonkabyo, Lesa wetu waalwile mafingo abo ke mapesho.+ 3 Byo baumvwinetu ino Mizhilo, bafuminemo mu bena Isalela aba bonse bafumine mu byalo bingi.*+

4 Bino kino saka kikyangye kubiwa, ñanga watajilenga pa bibamba mwa kulamina bintu* bya mu nzubo ya Lesa wetu+ wajinga Eliashiba,+ mulongo wa kwa Tobiya.+ 5 Wamunengezhejile kibamba kikatampe mwa kulamina bintu,* mo balaminanga kala mulambo wa kajo, binunka bulongo ne bipe ne bya bujikumi bya kajo, binyu bya katataka, ne manyi,+ byo bapanga bena Levi,+ banyimbi ne bakasopa ba pa bibelo, pamo na bya bupe bya bañanga.+

6 Akya kimye kyonse kechi najinga mu Yelusalema ne, mambo nayile kwi mfumu mu mwaka wa bu 32+ wa kwa Atazakeshi+ Mfumu wa Babilona; kabiji byo papichile kimye, nalombele luusa kwi mfumu amba mfumepo. 7 Kepo naishile ku Yelusalema ne kumona kintu kyatama kyaubile Eliashiba+ pa kulengela Tobiya+ kibamba mwa kulamina bintu mu kipango kya nzubo ya Lesa wa kine. 8 Kino kyankolele bingi ku muchima, kya kuba natayile pangye bipe byonse bya kwa Tobiya byajinga mu kibamba mwa kulamina bintu.* 9 Kepo napaine mukambizho, kabiji bawamishe bibamba mwa kulamina bintu;* kabiji nabwezhezhemo bipe bya mu nzubo ya Lesa wa kine,+ pamo na mulambo wa kajo ne binunka bulongo.+

10 Kabiji nataaine ne kuba’mba bena Levi+ kechi bebapelenga kajo ne,+ kya kuba bena Levi ne banyimbi baingijilenga mingilo bafumineko ne kuya, awu ku bujimi bwanji, awu ku bujimi bwanji.+ 11 Onkao mambo, nanenene bakalama bakibiji+ ne kwibambila’mba: “Mambo ka o mwalekelela nzubo ya Lesa wa kine?”+ Kepo nebakonkenye pamo ne kwibabwezha mu bifulo byabo. 12 Kabiji Bayudea bonse baletele bya bujikumi+ bya kajo, binyu bya katataka, ne manyi mu bibamba mwa kulamina bintu.+ 13 Kepo natongwele Shelemiya ñanga, Zadoka muntu ukopolola* byambo, ne Pedaya wa mu bena Levi kuba’mba batalenga pa bibamba mwa kulamina bintu, ne Hanana mwana wa kwa Zakula, Zakula mwana wa kwa Mataniya wajinga nkwasho wabo, mambo bano banabalume bebaketekejile. Mwingilo wabo wajinga wa kwabila bintu balongo babo.

14 Anweba Lesa wami, mvulukai+ na mambo a kino, kabiji kange mufuute mingilo yami ya butemwe bubula kwaluka yo naubila nzubo ya Lesa wami ne mingilo yayo* ne.+

15 Mu oa moba, namwene bantu ba mu Yuda saka banyantaula mañanzañanza mu bya kufiinamo binyu pa juba ja Sabado,+ saka baleta milumba ya kajo ne kwiibika pa bambongolo, kabiji baletelenga binyu, mañanzañanza, makuyu ne bipe bya mitundu yonse mu Yelusalema pa juba ja Sabado.+ Onkao mambo, nebajimwineko pa mambo a kupotesha bintu pa joja juba.* 16 Kabiji bena Tila baikalanga mu muzhi baletelenga masabi ne mitundu yonse ya bipe bya busulu, ne kwibipotesha ku bantu ba mu Yuda ne mu Yelusalema pa juba ja Sabado.+ 17 Onkao mambo, nanenene babineme ba mu Yuda ne kwibambila’mba: “Mambo ka o mubena kubila buno bubi, ne kuzhilulula juba ja Sabado? 18 Nanchi kino kechi kyo kyaubile bashakulu benu, kyalengijile Lesa kuleta bino bya malwa byonse pe atweba ne pa uno muzhi nenyi? Kabiji mubena kunungapo pa bukaji bwaiya pa bena Isalela pa kuzhilulula juba ja Sabado.”+

19 Onkao mambo, byo kwatendekele kufiita ku bibelo bya Yelusalema juba ja Sabado saka jikyangye kutendeka, nakambizhe’mba bashinke binzhilo. Kabiji naambile ne kuba’mba kechi bafwainwa kwibishinkula ne, kufikatu ne juba ja Sabado byo jikapwa, kabiji nabikileko ba mingilo bami bamo ku bibelo pa kuba’mba babule kutwezha bipe pa juba ja Sabado. 20 Onkao mambo, basulu ne bapoteshenga bipe bya mitundu yonse ya busulu balaajile bufuku pangye ya Yelusalema juba jimo nangwa abiji. 21 Kepo nebajimwineko ne kwibambila’mba: “Mambo ka o mubena kulaajila bufuku kwipi na nsakwa? Inge mukabwezhepo, nkemumanyika.” Kufumatu kyokya kimye kechi babwezhezhepo kwiya pa juba ja Sabado ne.

22 Kabiji nabuujile bena Levi namba bafwainwa kwitokeshanga abo bene kimye kyonse ne kwiya na kusopa bibelo kuba’mba bazhijike juba ja Sabado.+ Pa kino nakyo, anweba Lesa wami, mumvulukenga ne kungubila lusa monka mwayila kuvula kwa butemwe bwenu bubula kwaluka.+

23 Mu oa moba namwene ne Bayudea basongwele* banabakazhi bena Ashadoda,+ ne bena Amonyi, ne bena Moabu.+ 24 Kichika kya baana babo baambilenga mulaka wa bena Ashadoda ne milaka ya bantu bangi, bino kafwako nangwa umo mwi abo wayukile kwamba mulaka wa Bayudea ne. 25 Onkao mambo, nebanenene ne kwibafinga ne kupumapo banabalume+ bamo ne kwibayokola nsuki ne kwibachipisha mu jizhina ja Lesa namba: “Kechi mwafwainwa kusongwesha baana benu ba bakazhi ku baana babo ba balume ne, kabiji kechi mwafwainwa kukebela baana benu ba balume banabakazhi mu baana babo ba bakazhi nangwa anwe bene ne.+ 26 Nanchi bano kechi bo balengejile Solomone Mfumu wa Isalela kulenga mambo nenyi? Mu bisaka bya bantu byavula kechi mwajinga mfumu wajinga nobe aye ne;+ kabiji bamutemenwe kwi Lesa wanji,+ kya kuba Lesa wamutongwele kwikala mfumu wa bena Isalela bonse. Bino banabakazhi ba mu byalo bingi bamulengejile kulenga mambo.+ 27 Nanchi kino kechi kyo kintu kyakilamo kutama byo mwauba buno bubi bukatampe ne kubula kwikala ba kishinka kwi Lesa wetu pa kusongola banabakazhi ba mu byalo bingi nenyi?”+

28 Umo wa mu baana ba kwa Yoyada,+ Yoyada mwana wa kwa Eliashiba+ ñanga mwine mukatampe, wajinga muko wa kwa Sanabalata+ mwina Holona. Onkao mambo, namupangile.

29 Anweba Lesa wami, bavulukai, mambo bazhilulula buñanga ne lulayañano lwa bañanga+ ne lwa bena Levi.+

30 Kabiji nebatokeshe ku bubipisho bonse bwa mu byalo bingi, ne kupa bañanga ne bena Levi mingilo, awu mwingilo wanji, awu mwingilo wanji,+ 31 kabiji nanengezhezhe ne bakuleta nkunyi+ pa bimye byatongolwa ne bakuleta bya nsomo.

Anweba Lesa wami, mumvulukenga ne kungubila bibusa.*+